திருமா.இன்

''ராஜபக்‌ஷேவுடன் ஏன் சிரித்துப் பேசினேன்?'' - திரும்பிப் பார்க்கும் திருமாவளவன்

noreply@blogger.com (Anonymous) — Tue, 28 Mar 2017 12:56:00 +0530

இலங்கையில், போரினால் பாதிக்கப்பட்ட தமிழர்களுக்குப் 'புதிய வீடுகள் வழங்கும் திட்டத்தைத் தொடங்கிவைப்பதற்காக ரஜினிகாந்த் இலங்கை செல்லவிருக்கிறார்' என்ற செய்திகள் கசியத் தொடங்கியதுமே, 'ரஜினி இலங்கைக்குப் போகக்கூடாது' என்ற முதல் எதிர்ப்புக் கோரிக்கையை வைத்தவர், விடுதலை சிறுத்தைகள் கட்சித் தலைவர் தொல்.திருமாவளவன். இப்போது, ரஜினியே தான் போகவில்லை என்று அறிவித்துவிட்ட பிறகு, விவகாரம் வேறு திசைக்குத் திரும்பியிருக்கிறது. இந்த நிலையில், திருமாவளவனைச் சந்தித்துப் பேசினோம்...

“ரஜினி, இலங்கை செல்லவிருப்பதாக அதிகாரப்பூர்வத் தகவல் எதுவும் வெளிவராத நிலையிலேயே, 'ரஜினி, இலங்கை செல்லக்கூடாது' என்று எந்த அடிப்படையில் எதிர்ப்புக்குரல் கொடுத்தீர்கள்?”

“இலங்கையில், போரினால் பாதிக்கப்பட்ட தமிழ்க் குடும்பங்களுக்காக லைகா நிறுவனம் சார்பில், சுமார் 50 வீடுகள் கட்டப்பட்டுள்ளதாகவும், அதன் திறப்பு விழாவுக்காக ரஜினிகாந்த வரவிருப்பதாகவும் அங்குள்ள வடமாகாணத் தமிழ்த் தலைவர்கள் சிலர் என்னிடம் தகவல்கொடுத்தனர். மேலும், இப்போது உள்ள சூழ்நிலையில், ரஜினியின் வருகை வரவேற்கத் தக்கதாக இல்லை. எனவே, அவரை வரவேண்டாம் என்று எடுத்துச் சொல்லுங்கள் என கோரிக்கையும் வைத்தனர். அதனை ஏற்று, ஊடகம் வாயிலாக நாங்களும் 'ரஜினி, இலங்கை செல்லக்கூடாது' எனக் கோரிக்கை வைத்தோம். அவரும், பெருந்தன்மையாக 'செல்லவில்லை' என அறிவித்திருக்கிறார். அதற்கு முதலில் ரஜினிக்கு நன்றி தெரிவித்துக்கொள்கிறோம்.

வீடுகளை இழந்து, வாழ்விடங்களை இழந்து, சொந்தங்களை இழந்து என லட்சக்கணக்கான தமிழ் மக்கள் இப்போதும் துயரங்களை அனுபவித்துவருகிறார்கள். சிங்கள அரசின் இந்த ஈவிரக்கமற்ற கொடுஞ்செயலை உலக நாடுகள் எல்லாம் கண்டித்துக் கொண்டிருக்கின்றன. இப்படியொரு இக்கட்டான சூழலில், ரஜினிகாந்த் இலங்கைக்குச் சென்று நிகழ்ச்சிகளில் கலந்துகொள்வாரேயானால், அது, தமிழ் மக்களின் பரிதவிப்புகளை எல்லாம் வெளியுலகுக்குத் தெரியாவண்ணம் புதைத்துவிடுவதோடு, 'சமதர்மம் மிக்க ஜனநாயக நாடு' என்ற பெயரையும் இலங்கைக்கு வாங்கிக்கொடுத்துவிடும் அபாயமும் இருக்கிறது. அதனால்தான், அப்படியொரு கோரிக்கையை நாங்கள் வைத்தோம்''.

''சம்பந்தன் உள்ளிட்ட வடமாகாணத் தலைவர்களே, ரஜினிகாந்த் இலங்கை வருவதை வரவேற்கிறார்களே..?''

''சம்பந்தன் உள்ளிட்ட சில தமிழ்த் தலைவர்கள், ஆரம்பத்திலிருந்தே மைத்ரிபாலா அரசுக்கு ஆதரவாகத்தான் செயல்பட்டுக் கொண்டிருக்கிறார்கள். அதுபற்றி நான் விமர்சிக்க விரும்பவில்லை. ஆனால், அங்குள்ள பொதுமக்கள் மத்தியில், 'இப்போதுள்ள சூழலில், ரஜினிகாந்த் இலங்கைக்கு வந்தார் என்றால், அது மைத்ரிபாலா சிறீசேனாவின் ஆளும் அரசுக்கு சாதகமாகத்தான் இருக்கும்' என்ற எண்ணம் அவர்களுக்கு இருக்கிறது. இதில் முக்கியமான விஷயம் என்னவென்றால், 'இப்போதைய சூழலில்தான் ரஜினிகாந்த் வரவேண்டாம்' என்கிறார்களே தவிர, எப்போதுமே வரவேண்டாம் என்று அவர்களும் சொல்லவில்லை; நாங்களும் சொல்லவில்லை''.

''போரினால் பாதிக்கப்பட்டுள்ள எங்களுக்கு சிறு அளவிலான உதவியும்கூட பெரிய நிவாரணமாக இருக்கும் என்று ஈழ மக்களே கூறிவரும் வேளையில், இதுபோன்ற போராட்டங்கள் பாதிக்கப்பட்ட மக்களுக்கு மேலும் ஒரு பின்னடைவாகத்தானே இருக்கும்?''

''லைக்கா நிறுவனம் 150 வீடுகளைக் கட்டவில்லை. வெறும் 50 வீடுகளைத்தான் கட்டியிருக்கின்றன. மீதம் உள்ள 102 வீடுகள் இந்திய அரசு கொடுத்திருந்த நிவாரணத் தொகையைக்கொண்டு கட்டப்பட்டது. அதாவது, சிங்கள அரசாங்கத்தின் ஒப்பந்தப் பணியை எடுத்துத்தான் லைகா நிறுவனம் இந்த வீடுகளைக் கட்டியிருக்கிறது. இதுபோன்று, புதிய வீடுகளைக் கட்டி திறப்புவிழா நடத்துவதென்பது அடிக்கடி நடக்கக்கூடிய நிகழ்வுதான். ஆனால், இப்போது ரஜினியை ஏன் அழைத்து திறப்புவிழா நடத்த வேண்டும் என்று லைகா நிறுவனம் ஏன் விரும்புகிறது என்றால், அவரை ஹீரோவாக வைத்து, '2.0' என்ற திரைப்படத்தை அந்நிறுவனம்தான் எடுத்துவருகிறது.

இந்தச் சூழலில், ரஜினிகாந்த் இந்த விழாவில் கலந்துகொண்டால், '2.0' படத்துக்கு புலம்பெயர்ந்த தமிழர்கள் மத்தியில் ஆதரவு கிடைத்து, லாபம் ஈட்ட முடியும் என்று லைகா நிறுவனம் நினைக்கிறது. கூடவே, மைத்ரிபாலா சிறீசேனா அரசும் தமிழர்களுக்கு நல்லது செய்துவருகிறது என்ற பொய்யான செய்தியும் உலக அரங்கில் பரப்பப்படும் வாய்ப்பு உண்டாகிவிடும். ஆக, வணிக அரசியல் உள் நோக்கங்கள் கொண்டதாலேயே இவ்விஷயத்தில் எங்கள் எதிர்ப்பைப் பதிவுசெய்தோம்.

ரஜினிகாந்த் போகாததாலேயே தமிழர்களுக்கு வீடுகள் ஒதுக்கப்படாமல் விட்டுவிடப்படும் என்ற சூழல் கிடையாது. ஏற்கெனவே, போரினால் பாதிக்கப்பட்ட தமிழ் மக்களின் புனர்வாழ்வுக்காக இந்தியா உள்ளிட்ட பல்வேறு நாடுகள் ஆயிரக்கணக்கான கோடிகளை இலங்கை அரசாங்கத்துக்குக் கொடுத்துள்ளது. ஆனால், அதில் 15 சதவிகிதப் பணத்தைக்கூட சிங்கள அரசு தமிழ் மக்களின் நலனுக்காகச் செலவிடவில்லை. இந்தியா கொடுத்த 1000 டிராக்டர்களில் 80 சதவிகித டிராக்டர்களை சிங்களவர்களுக்குத்தான் கொடுத்துள்ளது. தமிழ் மக்களுக்குக் கிடைக்கவேண்டிய உதவிகள் முழுவதுமாக கிடைக்க வேண்டும் என்பதுதான் எங்களுடைய நோக்கமே தவிர, உதவிகள் கிடைக்கக்கூடாது என்று தடுப்பதல்ல எங்கள் நோக்கம்.''

'' 'கடந்த 2009-ம் ஆண்டு இலங்கை சென்று, ராஜபக்‌ஷேவுடன் விருந்து உண்டுவந்த திருமா, தற்போது ரஜினி இலங்கை செல்லக்கூடாது என்று சொல்லலாமா?' என வலைதளங்களில் உங்களுக்கு எதிரான கேள்விகள் எழுப்பப்படுகிறதே?''

''அது மத்திய அரசு அமைத்த ஒரு குழு. அதில் என்னையும் சேருங்கள் என்று நான் சொல்லவில்லை. ஆனால், நாடாளுமன்ற உறுப்பினர் என்ற அடிப்படையில், என் பெயரும் அந்தக் குழுவில் இணைக்கப்பட்டிருப்பதாக அறிவிக்கப்பட்ட பின்னர்தான், எனக்கே தெரியவந்தது. அப்போதும்கூட, நான் போகவிரும்பவில்லை என்றுதான் என் கட்சியினரிடம் எடுத்துச் சொன்னேன். ஆனால், 'பாதிக்கப்பட்ட நம் தமிழ்ச் சொந்தங்களைப் பார்த்து ஆறுதல் சொல்வதற்காகத்தான் நாம் போகிறோம். அதனால், மறுக்காமல் போய்வாருங்கள்' என்றுதான் சொல்லியனுப்பினார்கள். 'போகிற 10 பேர்களில், நான் விடுதலைப் புலிகளின் ஆதரவாளராகத்தான் போகிறேன்' என்று சொல்லித்தான் நானும் சென்றேன்.

அங்கே சென்றபிறகு, ராஜபக்‌ஷேவுடன் ஏன் கைகொடுத்தீர்கள்? அவர்கள் கமென்ட் அடிக்கும்போது ஏன் சிரித்தீர்கள்? என்றெல்லாம் என்னைக் கேள்வி கேட்கிறார்கள். அவை நாகரீகம் என்ற ஒன்று இருக்கிறது. எவ்வளவுதான் நமக்கு உள்ளுக்குள் கோபம் இருந்தாலும், அவை நாகரீகத்தை மீறி எதுவும் செய்துவிட முடியாது. அப்போதும்கூட, 'இவர் பிரபாகரனின் ஆள். பிரபாகரன் இருந்தபோது இவர் வந்திருந்தால், இவரும் மேலோகம் போயிருப்பார்' என்றுதான் என்னை கமென்ட் அடித்தார் ராஜபக்‌ஷே. அந்த இடத்தில், 'எப்படிடா என்னை நீ இப்படிச் சொல்லமுடியும்?' என்று நான் சண்டைக்கா போகமுடியும்? இதுமட்டுமல்ல... வெளிவிவகாரத்துறை அமைச்சர் எங்களுக்கு ஆளுக்கு ஒரு டீத்தூள் பொட்டலத்தைப் பரிசாகத் தந்தார். எல்லோரும் அதை வாங்கினோமே தவிர, யாரும் இங்கே கொண்டுவரவில்லை; அங்கேயே வைத்துவிட்டு வந்துவிட்டோம். ஆனால், இங்கே உள்ள காழ்ப்புஉணர்ச்சி கொண்டவர்கள்தான் இப்படியெல்லாம் எங்களுக்கு எதிராக செய்திகளைப் பரப்புகிறார்கள்.''

நன்றி : விகடன்

ரூபாய் நோட்டு விவகாரம்: மத்திய அரசைக் கண்டித்து நவ.18-ல் விசிக ஆர்ப்பாட்டம்

noreply@blogger.com (Anonymous) — Tue, 15 Nov 2016 21:48:00 +0530

பொதுமக்களை அவமானப்படுத்தும் மோடி அரசைக் கண்டித்தும்;

ரிசர்வ் வங்கி ஆளுநர் பதவி விலக வலியுறுத்தியும்

விடுதலைச் சிறுத்தைகள் கட்சியின் சார்பில் 18 ஆம் தேதி சென்னையில் கண்டன ஆர்ப்பாட்டம்

தொல்.திருமாவளவன் அறிவிப்பு

500, ரூபாய் 1000 ரூபாய் நோட்டுகள் செல்லாது என அறிவித்த நாளிலிருந்து ஏழை எளிய மக்கள் சொல்லவொண்ணா துன்பத்துக்கு ஆளாகிவருகின்றனர். மோடி அரசின் சர்வாதிகார அறிவிப்பால் இதுவரை இருபத்தைந்து பேர் உயிரிழந்துள்ளனர். தமது குழந்தைகளுக்கு உணவு தர முடியவில்லையே என்ற கவலையில் பெண்கள் தூக்கிட்டுத் தற்கொலை செய்து கொண்டுள்ளனர். ரூபாய் நோட்டுகளை மாற்றுவதற்காக வரிசையில் நின்ற முதியவர்கள் அங்கேயே மயங்கிவிழுந்து உயிரிழந்துள்ளனர். ஏடிஎம்கள் செயல்படவில்லை; வங்கிகளிலும் பணம் இல்லை. தமது சொந்தப் பணத்தை எடுக்க முடியாமல் பொதுமக்கள் அல்லல்படுகின்றனர். பிரச்சனைகளைத் தீர்ப்பதற்கு எந்த நடவடிக்கையும் எடுக்காமல் தன் உயிருக்கு ஆபத்து என நாடகமாடுகிறார் பிரதமர் மோடி.

கறுப்புப் பணம் வைத்திருப்பவர்கள் அந்தப் பணத்தையெல்லாம் வெளிநாட்டு வங்கிகளில் பாதுகாப்பாக வைத்திருக்கிறார்கள் என்றும் அதை மீட்டு ஒவ்வொரு இந்தியக் குடிமகனின் கணக்கிலும் பதினைந்து லட்ச ரூபாய் டெபாசிட் செய்வேன் என்றும் வாய்ச்சவடால் அடித்த பிரதமர் மோடி இப்போது அன்றாடங்காய்ச்சிகளின் வயிற்றில் அடித்திருக்கிறார். தனது சொந்தப் பணத்தை எடுப்பதற்காக வங்கிகளுக்குச் செல்பவர்களுக்கு கை விரலில் மை வைக்கப்படும் என்ற புதிய அறிவிப்பை இப்போது மோடி அரசு வெளியிட்டிருக்கிறது. சட்டத்தை மதிக்கும் மக்களை இதைவிட மோசமாக எவரும் அவமானப்படுத்தமுடியாது. இதை விடுதலைச் சிறுத்தைகள் கட்சி வன்மையாகக் கண்டிக்கிறது.

ரூபாய் நோட்டுகளை செல்லாமல் ஆக்குவதால் கறுப்புப் பணத்தை ஒழிக்க முடியாது என்பதைப் பொருளாதார நிபுணர்கள் தெளிவாகக் கூறியுள்ளனர். அதுமட்டுமின்றி இப்படி அறிவிக்கப்போகிறோம் என்பதை தமக்கு வேண்டியவர்களுக்கு மட்டும் வெளிப்படுத்தி இந்த அறிவிப்பில் மிகப்பெரிய ஊழல் செய்திருக்கிறார்கள் என்ற குற்றச்சாட்டும் மோடி அரசு மீது இப்போது எழுந்துள்ளது.

* பொதுமக்களுக்கு எதிரான இந்த அறிவிப்பை உடனடியாகத் திரும்பப்பெற வேண்டும்.

*வழக்கம்போல 500, 1000 ரூபாய் நோட்டுகளைப் பயன்படுத்த பொதுமக்களை அனுமதிக்க வேண்டும்.

*பொதுமக்களுக்கு இன்னல் உண்டாக்கிய ரிசர்வ் வங்கி ஆளுநர் இதற்குப் பொறுப்பேற்று உடனடியாகப் பதவி விலகவேண்டும்.

இந்த கோரிக்கைகளை வலியுறுத்தி எதிர்வரும் 18 ஆம் தேதி வெள்ளிக்கிழமை காலை சென்னையில் எனது தலைமையில் (தொல்.திருமாவளவன்) கண்டன ஆர்ப்பாட்டம் நடைபெறும் என்பதைத் தெரிவித்துக்கொள்கிறேன்.

இவண்

தொல்.திருமாவளவன்

மக்களால் தேர்ந்தெடுக்கப்பட்ட பிரதமரா? அல்லது ராணுவ சர்வாதிகாரியா?

noreply@blogger.com (Anonymous) — Wed, 9 Nov 2016 15:48:00 +0530

மக்களால் தேர்ந்தெடுக்கப்பட்ட பிரதமரா? அல்லது ராணுவ சர்வாதிகாரியா? 500, 1000 ரூபாய் செல்லாது என்ற

அறிவிப்புக்கு தொல்.திருமாவளவன் கண்டனம்

நேற்று நள்ளிரவு முதல் 500, 1000 ரூபாய் நோட்டுகள் செல்லாது என இந்திய அரசு அறிவித்துள்ளது. நள்ளிரவு 12 மணிக்கு செல்லாமல்போகும் என்ற செய்தியை இரவு எட்டு மணிக்கு தொலைக்காட்சி வாயிலாக நாட்டுக்கு பிரதமர் நரேந்திர மோடி அறிவித்தார். ஏடிஎம்கள் இரண்டு நாட்களுக்கு இயங்காது, வங்கிகள் மூடப்பட்டன என்ற அடுக்கடுக்கான அறிவிப்பால் நேற்று நள்ளிரவு முதல் மக்களின் இயல்பு வாழ்க்கை பாதிக்கப்பட்டிருக்கிறது. பயணம் செய்யப் போனவர்கள் பேருந்தில் ஏற முடியவில்லை, ஓட்டலுக்குச் சென்றவர்கள் சாப்பிட முடியவில்லை.

ஏழை-எளிய மக்கள் தமது கையிலிருக்கும் ஒன்றிரண்டு 500 ரூபாய் நோட்டுகளும் செல்லாமல் போய்விட்டன என்பதையறிந்து செய்வதறியாது திகைத்து நிற்கிறார்கள். இந்த அறிவிப்பு கறுப்புப் பணத்தை ஒழிப்பதற்கும், கள்ளநோட்டுகளைத் தடுப்பதற்கும் பயன்படும் என மோடி கூறியிருக்கிறார். இது அப்பட்டமான ஏமாற்று என்பதைத் தவிர வேறல்ல. கணக்கில் வராத பணமே கறுப்புப் பணம். அதை வைத்திருப்பவர்கள் காகிதப் பணமாக அதை மூட்டை கட்டி வைத்திருப்பதில்லை. அதுபோலவே இந்தியாவின் 90 விழுக்காடு சொத்து வெறும் இரண்டு சதவீத பணக்காரர்களின் கையில்தான் இருக்கிறது.

மோடியின் பிரச்சாரத்துக்குப் பெரும் பணத்தை செலவிட்டு அவரைப் பிரதமரக அமர வைத்திருக்கும் அம்பானியோ, கடந்த இரண்டு ஆண்டுகளில் மோடியின் ஆதரவால் அசுர வளர்ச்சி கண்டிருக்கும் அதானியோ, மோடிக்கு ஒத்து ஊதும் கார்ப்பரேட்டுகளோ கணக்கில் காட்டாத கறுப்புப் பணத்தை காகிதப் பணமாக மூட்டை கட்டி வைத்திருப்பதில்லை. அவர்களது பணம் அயல்நாடுகளில் பாதுகாப்பாக இருக்கிறது. இது மோடிக்கு நன்றாகவே தெரியும்.

“நான் பிரதமரானால் அயல்நாட்டு வங்கிகளில் பதுக்கப்பட்டிருக்கும் கறுப்புப் பணத்தை இந்தியாவுக்குத் திரும்பக்கொண்டுவந்து இந்திய குடிமகன் ஒவ்வொருவரது வங்கிக் கணக்கிலும் 15 லட்ச ரூபாயை டெபாசிட் செய்வேன்” என தேர்தல் நேரத்தில் கொடுத்த ஜம்பமடித்த மோடி, அதைச் செய்யமுடியாத தனது தோல்வியை மறைப்பதற்காக ஆடுகிற கேலிக்கூத்துதான் இது.

இந்தியாவில் கறுப்புப் பணத்தின் ஊற்றுக் கண்ணாக இருப்பது இங்கிருக்கும் தேர்தல் முறைதான். 2014 பொதுத் தேர்தலில் பாஜக வேட்பாளர்கள் தமது கட்சியிடமிருந்து பெற்றதாக தேர்தல் ஆணையத்துக்கு அளித்த கணக்கில் உள்ள தொகைக்கும் பாஜக தனது கணக்கில் காட்டியிருக்கும் தொகைக்கும் பலகோடி ரூபாய் வித்தியாசம் இருக்கிறது என்பதை ஏடிஆர் இந்தியா என்ற அமைப்பு அம்பலப்படுத்தியது. தேர்தல் செலவை அரசே ஏற்றுக்கொண்டு தேர்தலை நடத்த முன்வந்தால்தான் கறுப்புப் பணத்தின் ஊற்றுக்கண்ணை முற்றாக அடைக்கமுடியும்.

மோடி அரசாங்கத்தின் இந்த அறிவிப்பால் ஏழை-எளிய நடுத்தர மக்கள் பெரிதும் பாதிக்கப்பட்டுள்ளனர். “நாட்டுக்காகத் தியாகம் செய்யுங்கள் “வங்கிகளுக்கு வருவோர் கண்காணிக்கப்படுவார்கள்” என்றெல்லாம் அதிகாரிகள் பேசுகின்றனர். இந்தியாவில் அவசரநிலை அறிவிக்கப்பட்ட காலத்தில் கேட்ட அதே வார்த்தைகளை இப்போது நாம் மீண்டும் கேட்கிறோம். இது “ பொருளாதார அவசரநிலை” இதைத் தொடர்ந்து எந்த நேரத்திலும் “அரசியல் அவசரநிலை” அறிவிக்கப்படும் ஆபத்து இருக்கிறது. மோடியின் இந்த ‘துக்ளக் தர்பாரை’ கண்டுகொள்ளாமல் விட்டால் அடுத்து மிகப்பெரும் ஆபத்து நாட்டுக்கு வந்துசேரும். இந்தியாவிலுள்ள ஜனநாயக சக்திகள் மோடி அரசின் ‘பொருளாதார அவசரநிலையை’ எதிர்த்து முறியடிக்க ஒன்றுதிரளவேண்டும் என விடுதலைச் சிறுத்தைகள் கட்சியின் சார்பில் அறைகூவல் விடுக்கிறோம்.

இவண்
தொல்.திருமாவளவன்

கவிஞர் அண்ணாமலை அவர்களுக்கு எழுச்சித்தமிழர் அஞ்சலி!

noreply@blogger.com (Anonymous) — Wed, 28 Sep 2016 21:10:00 +0530

தலித்துகளின் விடுதலைக் கருத்தியலில் ஈடுபாடு கொண்டவரும், விடுதலைச் சிறுத்தைகளின் தலைவர் எழுச்சித்தமிழர் மீது நீங்கா அன்பும், பற்றும் கொண்டிருந்தவருமான கவிஞர் அண்ணாமலை அவர்கள் மாரடைப்பால் மரணமடைந்த செய்தி நம் எல்லோரையும் அதிர்ச்சிக்குள்ளாக்கியது. தம் மீது அன்பு கொண்டிருந்தவருக்கு நேரில் சென்று தலைவர் எழுச்சித்தமிழர் அவர்கள் அஞ்சலி செலுத்தினார். அவரது மனைவி, பிள்ளை மற்றும் பெற்றோருக்கு ஆறுதல் சொன்னார்.

'எனக்கு பிடிச்ச தலைவர் திருமாவளவன்.. அவருக்கு பாட்டு எழுதுவது ரொம்ப பிடிக்கும்னு சொல்லுவீங்களே.. இப்ப அவரே வந்திருக்காரு பாருங்க' என்று அண்ணாமலை அவர்களின் மனைவி கதறியது எல்லோரையும் கண் கலங்க வைத்தது. கடந்த பொங்கலுக்கு தலைவர் தனக்கு பரிசளித்த பட்டு வேட்டி, சட்டையை அவ்வப்போது சொல்லி விரும்பி அணிவாராம். இன்றும் அதே பட்டு வேட்டியைத்தான் அவர் உடல் மீதும் போர்த்தியிருப்பதாக அவரது மனைவி தெரிவித்தார். இடுகாடு வரையிலான இறுதி ஊர்வலத்திலும் தலைவர் அவர்கள் இறுதி வரை நடந்தே சென்று பங்கெடுத்தார்.

கவிஞர் அண்ணாமலை அவர்களை இழந்து நிற்கும் குடும்பத்தினருக்கு ஆழ்ந்த இரங்கலையும், கட்சியின் சார்பில் செம்மார்ந்த வீரவணக்கத்தையும் தெரிவித்துக் கொள்கிறேன்.

வன்னி அரசு.

உள்ளாட்சித் தேர்தல் பணிக்குழு

noreply@blogger.com (Anonymous) — Sat, 24 Sep 2016 21:34:00 +0530

விடுதலைச் சிறுத்தைகள் கட்சி உள்ளாட்சி தேர்தல் விருப்ப மனு

noreply@blogger.com (Anonymous) — Fri, 23 Sep 2016 21:10:00 +0530

புழல் சிறையில் ராம்குமார் மர்ம மரணம் : சிறைத்துறை- காவல்துறை - கிரிமினல்கள் கூட்டணி

noreply@blogger.com (Anonymous) — Tue, 20 Sep 2016 12:39:00 +0530

புழல் சிறையில் ராம்குமார் மர்ம மரணம் : சிறைத்துறை- காவல்துறை - கிரிமினல்கள் கூட்டணி

உயர்நீதிமன்ற நீதிபதியின் தலைமையில்

விசாரணைக் குழு அமைத்திடுக!

தமிழக அரசுக்கு தொல்.திருமாவளவன் வலியுறுத்தல்

சுவாதி கொலைவழக்கில் குற்றம்சாட்டப்பட்டு நீதிமன்றக் காவலில் புழல் சிறையில் அடைக்கப்பட்டிருந்த ராம்குமார் மர்மமான முறையில் மரணம் அடைந்திருப்பது அதிர்ச்சியளிக்கிறது. அவர் மின்சார வயரைக் கடித்துத் தற்கொலை செய்துகொண்டார் என சிறை அதிகாரிகள் சொல்வது நம்பும்படியாக இல்லை. எனவே ராம்குமாரின் மரணம் குறித்து விசாரிக்க தற்போது பணியிலிருக்கும் உயர்நீதிமன்ற நீதிபதி ஒருவரின் தலைமையில் விசாரணக் குழு ஒன்றை அமைத்திடவேண்டும் என தமிழக அரசை விடுதலைச் சிறுத்தைகள் கட்சியின் சார்பில் வலியுறுத்திக் கேட்டுக்கொள்கிறோம்.

ராம்குமார் கைதுசெய்யப்பட்டபோது அவர் தனது கழுத்தை அறுத்துக்கொண்டு தற்கொலை செய்துகொள்ள முயற்சித்தாரென காவல் துறையினர் கூறினார்கள். ஆனால் அதை ராம்குமாரும், ராம்குமாரின் தந்தையும், அவரது வழக்கறிஞரும் மறுத்ததோடு போலீஸார்தான் தனது கழுத்தை அறுத்துக் கொலைசெய்ய முயற்சித்தார்கள் என்று ராம்குமார் தனது ஜாமீன் மனுவில் குறிப்பிட்டிருந்தார். கழுத்தை அறுத்த மர்மமே விலகாத நிலையில் மிகுந்த பாதுகாப்பு கொண்ட நவீன முறையில் கட்டப்பட்ட புழல் சிறையில் அடைக்கப்பட்டிருந்த ராம்குமார் திடீரெனத் தற்கொலை செய்துகொண்டுவிட்டதாக சிறை அதிகாரிகள் கூறுவது எவராலும் நம்பமுடியாத கதையாக இருக்கிறது.

ராம்குமார் தற்கொலை செய்துகொண்டது உண்மையாக இருந்தால் அவரது வழக்கறிஞர் தொலைபேசியில் கேட்டபோது ராம்குமார் சாப்பிட்ட உணவு ஒத்துக்கொள்ளாததால் வாந்தியெடுத்தாரெனவும் அதனால் மருத்துவமனைக்கு அழைத்துச் செல்லப்பட்டிருக்கிறாரெனவும் ஒரு தவறான தகவலை ஏன் சிறை நிர்வாகம் கூறவேண்டும்? இன்னும் ஒருசில நாட்களில் ராம்குமாரின் பிணைக்கான மனு நீதிமன்றத்தில் விசாரணைக்கு வரவிருந்த நிலையில் இப்படித் திடீரென அவர் இறந்திருப்பது பலத்த சந்தேகத்தை நமக்கு ஏற்படுத்துகிறது.

” சிறைச்சாலையில் நடக்கும் எந்தவொரு தவறுக்கும் அரசாங்கமே பொறுப்பேற்கவேண்டும்; தணடனைக் கைதியோ விசாரணைக் கைதியோ உயிர் வாழ்வதற்கான அவரது அடிப்படை உரிமையைப் பாதுகாக்கவேண்டியது சிறை அதிகாரிகளின் பொறுப்பு “ என நீலாவதி பெஹரா எதிர் ஒரிசா மாநில அரசு ( 1993) என்ற வழக்கில் உச்சநீதிமன்றம் தெளிவுபடுத்தியுள்ளது. ” சட்டத்தின் நோக்கம் பொது அதிகாரத்தை சீர்திருத்துவது மட்டும் அல்ல, தமது நலன்களையும் உரிமைகளையும் பாதுகாக்கிற சட்ட அமைப்பின்கீழ் தாங்கள் வாழ்கிறோம் என்ற நம்பிக்கையை பொதுமக்களிடம் ஏற்படுத்துவதுதான்” எனவும் அந்தத் தீர்ப்பில் கூறப்பட்டுள்ளது. உச்சநீதிமன்றத்தின் தீர்ப்பை புழல் சிறை அதிகாரிகள் மதிக்கவில்லை, தமிழக அரசாங்கமும் சிறையில் இருப்போரின் நலன் குறித்து கவலைப்படவில்லை.அதைத்தான் ராம்குமாரின் மர்ம மரணம் வெளிச்சம்போட்டுக் காட்டுகிறது.

தமிழ்நாட்டில் உள்ள சிறைகளில் கடந்த ஒருசில ஆண்டுகளாகவே ஏராளமான மர்ம மரணங்கள் நிகழ்ந்து வருகின்றன. 2014 ஆம் ஆண்டு சென்னை உயர்நீதிமன்றத்தில் தமிழக சிறை நிர்வாகம் தாக்கல்செய்த பதில் மனுவில் 2000 க்கும் 2013 ஆம் ஆண்டுக்கும் இடையே 1155 பேர் தமிழக சிறைகளில் மரணம் அடைந்துள்ளனர் எனக் கூறியது. அதாவது நான்கு நாட்களுக்கு ஒருவர் தமிழக சிறைகளில் மரணம் அடைகிறார். இது இந்திய அளவில் மிகவும் அதிகம்.

சிறைக்கு உள்ளேயும் வெளியேயும் பெருகிவரும் குற்றங்களுக்கு காவல்துறை,சிறைத் துறை,கிரிமினல்கள் ஆகிய மூன்று தரப்பினருக்கும் இடையே எற்பட்டுள்ள கூட்டணியே முதன்மையான காரணமாகும். அண்மையில் சிறைக்குள் பேரறிவாளன் தாக்கப்பட்டிருப்பது இதற்கொரு சான்று.

ராம்குமார் மர்ம மரணம் குறித்து விசாரிப்பதற்காக அமைக்கப்படும் விசாரணைக் குழு காவல்துறை,சிறைத் துறை,கிரிமினல்களின் கூட்டணி குறித்தும் விசாரிக்கவேண்டும். அதற்கேற்ப தமிழக அரசு உத்தரவு பிறப்பிக்கவேண்டும் என வலியுறுத்துகிறோம்.

இவண்

தொல்.திருமாவளவன்

சுவாதி படுகொலை இராம்குமார் சாவு இரண்டையும் சிபிஐ விசாரிக்க வேண்டும் !

noreply@blogger.com (Anonymous) — Sun, 18 Sep 2016 19:26:00 +0530

சுவாதி படுகொலை இராம்குமார் சாவு

இரண்டையும் சிபிஐ விசாரிக்க வேண்டும் !

கோவை விமான நிலையத்தில் செய்தியாளர்கள் சந்திப்பில் -தொல்.திருமாவளவன்.

இராம்குமார் தற்கொலை செய்துகொண்டார் என்பது அதிர்ச்சி அளிக்கிறது. நீதிமன்றக் காவலில் சிறையிலிருந்தவர் தற்கொலை செய்துகொண்டார் எனக் கூறுவதை ஏற்கமுடியவில்லை.

இராம்குமார் கைது செய்யப்பட்ட பிறகு அவருடைய வழக்கறிஞர் மற்றும் பெற்றோர் அவரை ஒருமுறைக்கு பலமுறை சந்தித்து பேசி இருக்கிறார்கள். அவர்களை சந்தித்த ராம்குமார் தனக்கும் அந்த கொலைக்கும் எந்த சம்மந்தமும் இல்லை என்று திரும்ப திரும்ப சொல்லியிருப்பதாக தகவல்கள் கூறுகின்றன.

அப்படிப்பட்ட நிலையில் அவருடைய இறப்பு என்பது உண்மையிலேயே தற்கொலையா அல்லது வேறு ஏதேனும் பின்னணி இருக்கிறதா என்கிற சந்தேகத்தை எழுப்பியிருக்கிறது. அவருடைய சாவுக்கு தமிழக அரசுதான் முழுமையாகப் பொறுப்பேற்க வேண்டும். இதை தற்கொலை என்று உடனடியாக மூடிமறைக்க அரசு முயற்சிக்கக் கூடாது. அவருடைய உடலை உடனடியாக அடக்கம் செய்துவிட கூடாது. அவருடைய சாவு தற்கொலைதான் என்பதை உறுதிப்படுத்துகிற வகையில் உயர்நீதிமன்ற நீதிபதி தலைமையில் விசாரணை நடத்தப்பட வேண்டும்.

அவர் திட்டமிட்டு கொலை செய்யப்பட்டிருக்கிறாரா அல்லது தற்கொலை செய்து கொண்டாரா என்கிற அய்யத்தை போக்க வேண்டியது, அதை தெளிவுப்படுத்த வேண்டியது, தற்கொலைதான் என்பதை உறுதிப்படுத்த வேண்டியது அரசின் பொறுப்பு. எனவே தமிழக அரசு இதற்கு முழு பொறுப்பேற்க வேண்டும் என்று கேட்டுக்கொள்கிறேன்.

தொடக்கத்திலிருந்தே காவல்துறையினர் ராம்குமாரை அணுகியமுறையும் கைதுசெய்த முறையும் அவரை நடத்திய முறையும் பல்வேறு சந்தேகங்களை எழுப்பியிருக்கிறது. ஆகவே அவருடைய இறப்பில் சந்தேகமிருக்கிறது. அது உரிய விசாரணைக்கு பிறகு தான் உறுதி செய்யப்பட வேண்டும்.

சுவாதி கொலையிலேயே ராம்குமாருக்கு எந்த அளவுக்கு தொடர்பிருக்கிறது என்பது இன்னும் பெரிய கேள்விக்குறியாக இருக்கிறது. இப்போது ராம்குமாருடைய சாவு மிகப்பெரிய சந்தேகத்தை எழுப்பியிருக்கிறது. எனவே, சுவாதியின் படுகொலை, இராம்குமார் சாவு ஆகிய இரண்டையும் சிபிஐ விசாரிக்க வேண்டும்.

இவண்
தொல்.திருமாவளவன்.

16ஆம் தேதி முழு அடைப்பு விடுதலைச்சிறுத்தைகள் கட்சி ஆதரவு

noreply@blogger.com (Anonymous) — Thu, 15 Sep 2016 16:45:00 +0530

16ஆம் தேதி முழு அடைப்பு

விடுதலைச்சிறுத்தைகள் கட்சி ஆதரவு

தொல் திருமாவளவன் அறிவிப்பு

காவிரி பிரச்சனையில் மத்திய அரசு தலையிட்டு தமிழகத்ததிற்கு கிடைத்திடவேண்டிய நீரை பெற்றுத்தருவதற்கு நடவடிக்கை எடுக்கவேண்டும் என வலியுறுத்தியும், கருநாடகாவில் தமிழர்களின் மீது தொடுக்கப்பட்ட தாக்குதலை கண்டித்தும் தமிழகம் தழுவிய முழு அடைப்புப் போராட்டம் 16ஆம் நாள் நடைபெறவுள்ளது. இந்தப் போராட்டத்திற்கு தமிழ்நாடு அனைத்து விவசாயச் சங்கங்கள் கூட்டமைப்பு உள்ளிட்ட விவசாய அமைப்புகளும், வணிகர்களின் அமைப்புகளும் அழைப்பு விடுத்துள்ளன. இந்தக் கோரிக்கைகளுக்குப் பின்னால் எவ்வித வேறுபாடுமன்றி ஒட்டுமொத்த தமிழகமும் ஒன்றாக நிற்கிறது என்பதை காட்டும்விதமாக முழு அடைப்புப் போராட்டத்தை வெற்றிப்பெறச் செய்வது அவசியமாகும்.

எனவே, நாளை (16-9-2016) நடைபெறவுள்ள முழு அடைப்புப் போராட்டத்திற்கு விடுதலைச்சிறுத்தைகள் கட்சி, தமது ஆதரவை தெரிவித்துக்கொள்கிறது. தமிழகம் முழுவதும் அமைதியான முறையில் அனைத்து அமைப்புகளும் பங்கேற்று முழு அடைப்பை வெற்றிப்பெறச் செய்யுமாறு விடுதலைச்சிறுத்தைகள் கேட்டுக்கொள்கிறது. தமிழ்நாட்டின் உயிர் ஆதரமான காவிரிப்பிரச்சனையில் ஒட்டுமொத்த தமிழகமும் ஒரே குரலில் முழங்குகிறது என்பதை உலகுக்கு காட்டும் வண்ணம் இந்தப் போராட்டத்தில் பங்கேற்று முழு அடைப்பை வெற்றிப்பெறச் செய்யுமாறு தமிழக மக்களை வேண்டிக் கேட்டுக்கொள்கிறோம்.

இவண்

தொல்.திருமாவளவன்

காவிரி பிரச்சனையில் மத்திய அரசு தலையிட வலியுறுத்தி ரயில் மறியல் போராட்டம்

noreply@blogger.com (Anonymous) — Wed, 14 Sep 2016 16:32:00 +0530

காவிரி பிரச்சனையில் மத்திய அரசு தலையிட வலியுறுத்தி

ரயில் மறியல் போராட்டம்

தொல்.திருமாவளவன் அறிவிப்பு

காவிரி நடுவர்மன்ற இறுதித் தீர்ப்பின்படி தமிழ்நாட்டுக்குரிய, காவிரி நீரைத் தருவதற்கு கர்னாடகம் மறுப்புத் தெரிவித்திருந்த நிலையில் உச்சநீதிமன்றம் அளித்த இடைக்கால உத்தரவின்படி மிகக் குறைந்த அளவு தண்ணீரைத்தான் அது திறந்துவிட்டுள்ளது. ஆனால் அதை முகாந்திரமாக வைத்துக்கொண்டு கர்னாடகாவில் இருக்கும் இனவெறி உதிரிக்குழுக்கள் கர்னாடகாவில் வாழும் தமிழர்களுக்கும், தமிழ்நாட்டுக்கும் எதிரான மிகப்பெரிய வன்முறையைத் தூண்டிவிட்டுள்ளனன. தமிழர்கள் தாக்கப்பட்டுள்ளனர், கோடிக்கணக்கான ரூபாய் மதிப்புள்ள சொத்துகள் தீக்கிரையாக்கப்பட்டுள்ளன. தமிழர்கள் நடத்தும் வணிக நிறுவனங்கள் சேதப்படுத்தப்பட்டுள்ளன.

காவிரி பிரச்சனை என்பது கர்னாடகம் தமிழ்நாடு என்ற இரண்டு மாநிலங்களுக்கு இடையிலான பிரச்சனை என்பது மாறி இரண்டு மாநில மக்களுக்கு இடையிலான மோதலாக உருவெடுத்துள்ளதற்கு தொடர்ந்து இப்பிரச்சனையில் மத்திய அரசு காட்டிவரும் அலட்சியமே காரணம். இதில் காங்கிரஸ் அரசு பின்பற்றிய அதே வழியைத்தான் இன்றைய பாஜக அரசும் பின்பற்றிவருகிறது. காவிரி மேலாண்மை வாரியம், காவிரி ஒழுங்காற்றுக்குழு ஆகியவற்றை அமைக்காமல் காலம் கடத்திவருகிறது. கர்னாடகாவில் ஆட்சியைப் பிடிக்கும் வாய்ப்பு காங்கிரஸ், பாஜக ஆகிய கட்சிகளுக்கு இருப்பதாலும் தமிழ்நாட்டில் அத்தகைய வாய்ப்பு அந்தக் கட்சிகளுக்கு இல்லை என்பதாலும் வாக்குவங்கி நலனை மனதில்கொண்டு தொடர்ந்து தமிழ்நாட்டை வஞ்சிப்பதையே தமது கொள்கையாக அக்கட்சிகள் வைத்துள்ளன.

கர்னாடகாவில் நடந்துவரும் இனவெறித் தாக்குதல்கள் தமிழ்நாட்டிலும் அத்தகைய சக்திகளை உசுப்பேற்றிவருகின்றன. இந்த நிலையிலும்கூட இந்தியப் பிரதமர் இந்தப் பிரச்சனையைக் கண்டுகொள்ளாமல் அலட்சியப்படுத்துவது வேதனை அளிக்கிறது.

* உச்சநீதிமன்றத் தீர்ப்பின் அடைப்படையில் காவிரி மேலாண்மை வாரியம், காவிரி ஒழுங்காற்றுக்குழு ஆகியவற்றை மத்திய அரசு உடனடியாக அமைக்க வேண்டும்;

*பிரதமர் இப் பிரச்சனையில் தலையிட்டு தமிழ்நாட்டுக்கு உரிய தண்ணீர் கிடைத்திட வகைசெய்ய்யவேண்டும்;

* கர்னாடகாவில் வாழும் தமிழர்களுக்கு உரிய பாதுகாப்பு அளிக்கப்படவேண்டும்

- என்ற கோரிக்கைகளை வலியுறுத்தி எதிர்வரும் செப்டம்பர் 16 ஆம் நாள் வெள்ளியன்று விடுதலைச் சிறுத்தைகள் கட்சியின் சார்பில் தமிழ்நாடு முழுவதும் ரயில் மறியல் போராட்டம் நடைபெறும், சென்னையில் அப்போராட்டத்தில் நான் தலைமையேற்கவுள்ளேன் என்பதைத் தெரிவித்துக்கொள்கிறேன்.

இவண்

தொல்.திருமாவளவன்

கருநாடகத்தில் வன்முறை விடுதலைச் சிறுத்தைகள் கண்டனம்

noreply@blogger.com (Anonymous) — Mon, 12 Sep 2016 11:58:00 +0530

கருநாடகத்தில் வன்முறை
விடுதலைச் சிறுத்தைகள் கண்டனம்
துணை இராணுவத்தை உடனடியாக கருநாடகத்திற்கு அனுப்பவேண்டும்.
தொல். திருமாவளவன் அறிக்கை

கருநாடகத்தில் தமிழர்களுக்கு எதிரான வன்முறை வெறியாட்டம் தலைவிரித்தாடுகிறது. தமிழகத்தைச் சார்ந்த வாகனங்கள், கடைகள், மற்றும் நிறுவனங்கள் குறிவைத்து தாக்கப்படுகின்றன. தமிழகத்தைச் சார்ந்த பேருந்துகள் சரக்குந்துகள் உள்ளிட்ட 100க்கும் மேற்பட்ட வண்டிகள் இதுவரை தீக்கிரையாக்கப்பட்டுள்ளன. பெங்களூர் மற்றும் மைசூர் பகுதிகளில் உள்ள தமிழர்கள் பாதுகாப்பற்ற நிலையில் உள்ளனர். வன்முறை வெறியாட்டத்தில் ஈடுபடுவோர்கள் மீது கருநாடக அரசு நடவடிக்கைகள் எதுவும் எடுக்கவில்லை. மாறாக, அவர்களை ஊக்கப்படுத்தும் வகையில் செயல்படுவது அதிர்ச்சியளிக்கிறது. நடுவர்மன்ற தீர்ப்பின்படி தமிழகத்திற்கு வழங்கவேண்டிய தண்ணீரை காலம் தாழ்த்தாமல் உடனடியாக வழங்கவேண்டுமென உச்சநீதிமன்றம் அண்மையில் தீர்ப்பளித்தது. 34 டிஎம்சி தண்ணீரை வழங்கவேண்டிய நிலையிலும் 15 டிஎம்சி தண்ணீர் மட்டுமே வழங்கிட உச்சநீதிமன்றம் தீர்ப்பளித்தது. இதுவும் மிகக்குறைந்த அளவேயாகும். எனினும், இதற்கு கன்னட இனவெறி அமைப்புகள் எதிர்ப்பு தெரிவித்து முழு அடைப்புப் போராட்டத்தில் ஈடுபட்டனர். ஒருசில இடங்களில் தமிழக இளைஞர்களைத் தாக்கினர்.

அடுத்து, கருநாடக அரசு உச்சநீதிமன்றத்தில் சமர்பித்த மனுவை விசாரித்த உச்சநீதிமன்றம் ஏற்கெனவே அளித்த தீர்ப்பில் திருத்தம் செய்து ஆணையிட்டது. அதாவது, 15டிஎம்சி தண்ணீரை 12டிஎம்சி ஆக குறைத்து 17ஆம் தேதி வரையில் வழங்கவேண்டுமென ஏற்கெனவே அறிவித்ததை மாற்றி 20ஆம் தேதிவரையில் தண்ணீரை திறந்துவிடு வேண்டுமென தீர்ப்பளித்தது. கருநாடக அரசின் வேண்டுகோளையேற்று உச்சநீதிமன்றம் இத்திருத்தத்தை செய்துள்ள நிலையிலும், இதனைப் பொறுத்துக்கொள்ளாத சில இனவெறி அமைப்புகள் கருநாடகத்தில் திடீர் வன்முறையில் ஈடுபட்டுள்ளது. ஒரே இடத்தில் நிறுத்திவைத்திருக்கப்பட்ட தமிழகத்தைச் சார்ந்த சுமார் 50 பேருந்துகள் 30 லாரிகள் தீவைத்து கொளுத்தப்பட்டுள்ளன. தமிழத்தைச் சார்ந்த உணவகங்கள் இதர நிறுவனங்கள் தாக்கப்பட்டுள்ளன. பல 100 கோடி ரூபாய் மதிப்புள்ள சொத்துகள் இந்த வன்முறை வெறியாட்டத்தில் சாம்பலாக்கப்பட்டுள்ளன. கருநாடகத்தில் உள்ள அரசியல் கட்சிகளும் கருநாடக அரசும் கன்னட இனவெறி அமைப்புகளின் நடவடிக்கைகளுக்கு உடந்தையாகவே உள்ளன. இது மாநிலங்களுக்கு இடையிலான நல்லிணக்கத்தைப் பாழ்படுத்துவதோடு இந்திய தேசிய ஒருமைப்பாட்டையும் சீர்குலைக்கும் நடவடிக்கையாகும். எனவே, இந்திய பிரதமர் உடனடியாக இந்தப்பிரச்சனையில் தலையிடவேண்டும். தமிழர்களின் உடமைகளுக்கும் தமிழ் மக்களுக்கும் பாதுகாப்பு அளிக்கும் வகையில் துணை இராணுவத்தை உடனடியாக கருநாடகத்திற்கு அனுப்பிவைக்கவேண்டும். தென்மாநில முதல்வர்களை அழைத்து பிரதமர் பேசவேண்டும். காவிரி நடுவர்மன்றத் தீர்ப்பின்படி காவிரி மேலாண்மை மற்றும் ஒழுங்குமுறைக் குழு ஆகியவற்றை உடனடியாக நியமிக்கவேண்டும்.

அத்துடன், தமிழகத்தில் உள்ள அரசியல் கட்சிகளும் விவசாயச் சங்கங்களும் ஒருங்கிணைந்து செயல்பட முன்வரவேண்டும். தமிழக முதல்வர் அவர்கள் அனைத்துக் கட்சிக் கூட்டத்தைக் கூட்டி மத்திய அரசுக்கு உரிய அழுத்தம் கொடுக்கவேண்டுமென்றும் விடுதலைச் சிறுத்தைகள் வேண்டுகோள் விடுக்கிறது.

இவண்,
தொல்.திருமாவளவன்

நூற்றுக்கும் மேற்பட்ட கல்லூரி மாணவர்கள் இணைந்தனர்

noreply@blogger.com (Anonymous) — Sat, 10 Sep 2016 17:41:00 +0530

சென்னை நந்தனம் அரசு கலை மற்றும் அறிவியல் கல்லூரி மாணவர்கள் நூற்றுக்கும் மேற்பட்டோர் இன்று(09.09.2016) மாலை 4 மணி அளவில் தலைவர் தொல். திருமாவளவன் முன்னிலையில் தங்களை விடுதலை சிறுத்தைகள் கட்சியில் இணைந்தனர்.

செஞ்சுடர், ஜெகன், அஸ்வின், மூர்த்தி, பிரகாஷ், விக்கி. ஆகியோர் மாணவர்களை ஒருங்கிணைப்பு செய்யும் பணியில் தங்களை ஈடுபடுத்திக் கொண்டனர்.

தலைவரிடம் மாணவர்கள் வைத்த கோரிக்கைகள்:

1) பஸ் பாஸ் வழங்கிட
2) அடிப்படை வசதிகள் இல்லை
3) நூலகம் வசதி இல்லை
4) கல்வி உதவித்தொகை நிதி வழங்க வேண்டும்
5) குடிநீர் வசதி வழங்க வேண்டும்
6) கழிப்பறை ஒழுங்க பராமரிப்பு தேவை.

ஏழை எளியோர் மாணவர்கள் அதிகம் படிக்கும் இக்கல்லூரியில் அனைத்து வசதிகள் வழங்க வேண்டும் என்று தலைவர் தொல். திருமாவளவன் கல்லூரி நிர்வாகதிடம் கோரிக்கை வைத்தனர்.

இந்நிகழ்வை வெ.அம்பேத்தேவன், வெ.கோட்டி, து.அப்புன் ஆகியோர் முயற்சியில் மேற்கொள்ளப்பட்டது. நிகழ்சியில் முற்போக்கு மாணவர் அமைப்பின் நிர்வாகிகள் கலந்து கொண்டனர்.

செய்தி & புகைப்படம் : கலாநிதி

காவிரி பிரச்சனை உச்சநீதிமன்றத் தீர்ப்பு : கர்நாடகத்தின் இனவெறி அரசியலுக்குக் கண்டனம்!

noreply@blogger.com (Anonymous) — Tue, 6 Sep 2016 16:42:00 +0530

காவிரி பிரச்சனை

உச்சநீதிமன்றத் தீர்ப்பு :

கர்நாடகத்தின் இனவெறி அரசியலுக்குக் கண்டனம்!

தமிழக அரசு அனைத்துக்கட்சிக் கூட்டத்தைக் கூட்டவேண்டும்!

தொல்.திருமாவளவன் வலியுறுத்தல்

காவிரியில் நாளொன்றுக்கு 15 ஆயிரம் கன அடி வீதம் பத்து நாட்களுக்குத் தண்ணீர் திறந்துவிடவேண்டும் என உச்சநீதிமன்றம் அளித்துள்ள தீர்ப்பு காவிரியில் தமிழ்நாட்டுக்கு உள்ள உரிமையை அங்கீகரித்துள்ளது என்றபோதிலும், தமிழகத்துக்கு சட்டப்படி சேரவேண்டிய தண்ணீரில் அது கால்வாசிகூட இல்லை. இந்தத் தண்ணீரைக்கொண்டு தற்போது டெல்டா மாவட்டங்களில் சாகுபடி செய்யப்பட்டிருக்கும் நாற்பதாயிரம் ஏக்கர் சம்பா பயிரைக் காப்பாற்ற முடியாது. இந்தத் தீர்ப்பு மிகவும் ஏமாற்றம் அளிப்பதாக உள்ளது என விடுதலைச் சிறுத்தைகள் கட்சியின் சார்பில் தெரிவித்துக்கொள்கிறோம். ஆனால் இந்தத் தண்ணீரைக்கூடத் தரக்கூடாது என கன்னட இனவெறி அமைப்புகள் எதிர்ப்புத் தெரிவித்துள்ளன. கர்நாடக பந்த்துக்கும் அழைப்புவிடுத்துள்ளன. இந்த இனவெறிப்போக்கை வன்மையாகக் கண்டிக்கிறோம்.

கர்நாடகம், தமிழ்நாட்டுக்கு மாதந்தோறும் தரவேண்டிய நீரின் அளவை காவிரி நடுவர் மன்றம் தனது இறுதித் தீர்ப்பில் வரையறுத்துள்ளது. ஜூன் மாதத்தில் 10 டி.எம்.சி., ஜூலையில் 34, ஆகஸ்டில் 50 டி.எம்.சி., செப்டம்பரில் 40 டி.எம்.சி., அக்டோபரில் 22 டி.எம்.சி., நவம்பரில் 15 டி.எம்.சி., டிசம்பரில் 8 டி.எம்.சி., ஜனவரியில் 3 டி.எம்.சி., பிப்ரவரி மார்ச், ஏப்ரல் மற்றும் மே மாதங்களில் தலா 2.5 டி.எம்.சி. தண்ணீர் தமிழ்நாடுக்கு அளிக்கப்பட வேண்டும் என நடுவர் மன்றம் கூறியுள்ளது. ஆனால் இந்த அட்டவணைப்படி இதுவரை ஓர் ஆண்டில்கூட கர்நாடகம் தண்ணீர் திறந்துவிட்டதில்லை.

ஜூன் மாதத்திலிருந்து செப்டம்பர் வரை தமிழகத்துக்கு 134 டிஎம்சி தண்ணீர் திறந்துவிடப் பட்டிருக்க வேண்டும். ஆனால் அந்த அளவைக்கூட வலியுறுத்தாமல் சம்பா பயிரைக் காப்பாற்ற வெறும் 50.52 டிஎம்சி தண்ணீர் திறந்துவிடவேண்டும் என்றுதான் உச்சநீதிமன்றத்தில் தமிழக அரசு முறையிட்டது. உச்சநீதிமன்றமும் ‘வாழு வாழ விடு’ என்று கர்நாடக அரசைக் கடிந்துகொண்டது. உயிர்ப்பிச்சை போடுவதுபோல் 13 டிஎம்சி தண்ணீர் தர ஆணையிட்டது. ஆனால் காவிரி நடுவர் மன்ற உத்தரவையோ, உச்சநீதிமன்றத் தீர்ப்பையோ மதிக்காமல் இனவெறி நெருப்பில் குளிர்காய கர்நாடக அரசு முயற்சிக்கிறது. இது மிகவும் ஆபத்தான அணுகுமுறை என்பதைச் சுட்டிக்காட்டுகிறோம்.

உச்சநீதிமன்றத் தீர்ப்பை முன்வைத்து கர்நாடக அரசு இன்று அனைத்துக்கட்சிக் கூட்டத்தைக் கூட்டியுள்ளது. நீதிமன்றத் தீர்ப்பில் சொல்லப்பட்ட 13 டிஎம்சி தண்ணீரைக்கூட கர்நாடகம் தரப்போவதில்லை என்பது தெளிவாகத் தெரிகிறது. இந்நிலையில் அடுத்து மேற்கொள்ளவேண்டிய நடவடிக்கைகுறித்து ஒருமித்த முடிவை மேற்கொள்ளும்வகையில் உடனடியாக அனைத்துக்கட்சிக் கூட்டத்தைக் கூட்டவேண்டுமென தமிழக அரசை வலியுறுத்திக் கேட்டுக்கொள்கிறோம்.

இவண்

தொல். திருமாவளவன்

தலித்துகள் மீதான வன்முறை தமிழ்நாட்டில் அதிகரிப்பு

noreply@blogger.com (Anonymous) — Fri, 2 Sep 2016 16:45:00 +0530

தலித்துகள் மீதான வன்முறை தமிழ்நாட்டில் அதிகரிப்பு

தேசிய குற்ற ஆவண மைய அறிக்கையில் தகவல்!

தமிழக அரசு கடுமையான நடவடிக்கை எடுக்க வேண்டும்

தொல்.திருமாவளவன் வலியுறுத்தல்

இந்தியா முழுவதும் நடைபெறும் குற்றங்கள் குறித்த ஆண்டறிக்கையை தேசிய குற்ற ஆவண மையம் ஒவ்வோர் ஆண்டும் வெளியிட்டு வருகிறது. அதில் பெண்கள், குழந்தைகள், தலித்துகள் மீதான வன்முறைகள் குறித்து மாநிலவாரியான புள்ளி விவரங்களை வெளியிட்டு வருகிறது. 2015ஆம் ஆண்டுக்கான அறிக்கை தற்போது வெளியாகியிருக்கிறது. அந்த அறிக்கையின்படி இந்திய அளவில் தலித் மக்கள் மீதான வன்முறைத் தாக்குதல்களின் எண்ணிக்கை குறைந்திருப்பதாகத் தெரிய வந்துள்ளது. 2014ஆம் ஆண்டில் 47,064ஆக இருந்த தாக்குதல்கள், 2015இல் 45,003ஆகக் குறைந்துள்ளது. ஆனால், தமிழ்நாட்டில் தலித்துகள் மீதான வன்முறைகளின் அளவு உயர்ந்திருப்பது அதிர்ச்சியளிக்கிறது. தலித் மக்களைப் பாதுகாப்பதில் தமிழக அரசு மெத்தனமாக இருக்கிறது என்பதையே இந்தப் புள்ளி விவரம் வெளிப்படுத்துகிறது. தலித்துகளைத் தாக்கும் சாதிவெறியர்கள் மீது தமிழக அரசு இப்போதாவது கடுமையான நடவடிக்கை எடுக்க வேண்டும் என விடுதலைச் சிறுத்தைகள் கட்சியின் சார்பில் வலியுறுத்துகிறோம்.

2014ஆம் ஆண்டில் 22 தலித்துகள் படுகொலை செய்யப்பட்டனர். இந்தியாவிலேயே மிக அதிக அளவில் தலித்துகள் படுகொலை செய்யப்படும் மாநிலங்களில் ஒன்றாக தமிழ்நாடு இருக்கிறது. 2015ஆம் ஆண்டில் 50 தலித்துகள் படுகொலை செய்யப்பட்டுள்ளனர். இது தமிழகக் காவல்துறையின் அலட்சியப் போக்கையே காட்டுகிறது.

தமிழ்நாட்டில் தலித் பெண்கள் மீதான வன்கொடுமைகள் அதிர்ச்சியளிக்கும் வகையில் உயர்ந்து வருகின்றன. 2014ஆம் ஆண்டு 33 தலித் பெண்கள் கற்பழிக்கப்பட்டனர். 2015ஆம் ஆண்டிலோ 43 தலித் பெண்கள் கற்பழிக்கப்பட்டுள்ளனர். தலித் பெண்கள் மானபங்கப்படுத்தப்படும் நிகழ்வுகள் 2014ஆம் ஆண்டைவிட 2015ஆம் ஆண்டு 4 மடங்கு அதிகரித்துள்ளன. பாலியல் தொந்தரவு கொடுக்கப்படும் குற்றங்களும் அதிகரித்து வருகின்றன.

தலித்துகளின் குடியிருப்புகளை சாதிவெறியர்கள் கும்பலாகச் சென்று தாக்குகின்ற சம்பவங்கள் சுமார் 5 மடங்கு உயர்ந்துள்ளன. 2014ஆம் ஆண்டில் 39 கலவரங்கள் நடந்தன. 2015ஆம் ஆண்டிலோ அது 185ஆக உயர்ந்துள்ளது. தலித் கிராமங்களைச் சூறையாடும் சம்பவங்கள் 14 நடந்துள்ளன. தலித் குடியிருப்புகள் தாக்கப்படுவதில் உத்தரப்பிரதேசத்திற்கு அடுத்து இந்திய அளவில் 2வது மாநிலமாக தமிழ்நாடு உள்ளது.

வன்கொடுமைத் தடுப்புச் சட்டம், குடியுரிமை பாதுகாப்புச் சட்டம் முதலான சிறப்புச் சட்டங்களின்கீழ் அல்லாமல் இந்தியத் தண்டனைச் சட்டத்தின்கீழ் பதியப்பட்டுள்ள குற்றங்களின் எண்ணிக்கை சுமார் 3 மடங்கு உயர்ந்துள்ளது. 2014ஆம் ஆண்டில் தலித்துகள் மீதான வன்முறை தொடர்பாக இந்தியத் தண்டனைச் சட்டத்தின்கீழ் 388 வழக்குகள் பதிவு செய்யப்பட்டன. 2015ஆம் ஆண்டில் அந்த எண்ணிக்கை 1198ஆக அதிகரித்துள்ளது.

தமிழ்நாட்டில் தலித் மக்கள் மீதான வன்முறைகள் இந்த அளவுக்கு அதிகரிப்பதற்கு குறிப்பிட்ட ஒரு அரசியல் கட்சி மேற்கொண்டுவரும் வெறுப்புப் பிரச்சாரமே முதன்மையான காரணமாக இருக்கிறது. தமிழக அரசு அந்த வெறுப்புப் பிரச்சாரத்தைத் தடுத்து நிறுத்தாமல் வேடிக்கை பார்க்கிறது. 3 ஆண்டுகளுக்கு முன்னால் தமிழக முதல்வர் சட்டமன்றத்திலேயே இந்த வெறுப்புப் பிரச்சாரத்தைப் பற்றி அறிக்கை வெளியிட்டார். ஆனால், அதில் தொடர் நடவடிக்கை இல்லாமல் போய்விட்டது.

தலித்துகள் மீதான வன்முறை இந்த அளவுக்கு அதிகரித்திருப்பதற்கு தமிழக அரசே பொறுப்பேற்க வேண்டும். சமூகத்தில் மிகவும் பலவீனமான தலித்துகள் மீது வன்முறையை ஏவுகிறவர்களை பயங்கரவாதிகளாகக் கருதி இரும்புக்கரம் கொண்டு ஒடுக்க வேண்டும். தமிழ்நாட்டிலுள்ள அரசியல் கட்சிகள் யாவும் இதற்குக் குரல் எழுப்ப வேண்டுமெனவும் வேண்டிக் கேட்டுக்கொள்கிறோம்.

இவண்

தொல்.திருமாவளவன்

செப்டம்பர் 17 சென்னையில் நதிநீர் உரிமை பாதுகாப்பு மாநாடு

noreply@blogger.com (Anonymous) — Wed, 31 Aug 2016 22:17:00 +0530

செப்டம்பர் 17 சென்னையில்

விடுதலைச்சிறுத்தைகள் கட்சி ஒருங்கிணைக்கும்

நதிநீர் உரிமை பாதுகாப்பு மாநாடு

தொல்.திருமாவளவன் அறிக்கை

~~~~

நதிநீர்ச் சிக்கல் தமிழகத்தின் மிகப் பெரிய சவாலாக மாறி வருகிறது. தமிழகத்தில் விவசாயம் மற்றும் குடிநீர் ஆகியவற்றுக்கு நதி நீர் மிகப் பெரும் ஆதாரமாக உள்ளது. தமிழகத்தின் பெரும்பாலான மாவட்டங்களின் விவசாயம் காவிரி, முல்லை பெரியாறு, பவானி மற்றும் பாலாறு ஆகியவற்றை நம்பியே உள்ளன. ஆனால், கடந்த பல பத்தாண்டுகளாக இந்த நதிகளின் நீர்வரத்து படிப்படியாகக் குறைந்து விவசாய உற்பத்தி பொய்த்து வருகிறது.

தமிழகத்தில் நிலத்தடி நீரின் அளவும் வெகுவாகக் குறைந்து வருகிறது. தமிழ்நாட்டிலுள்ள பெரும்பாலான மாவட்டங்களில் நிலத்தடி நீரை அளவுக்கதிகமாகவே நாம் பயன்படுத்திவிட்டோம். இந்நிலையில் மழைநீரை மட்டுமே நம்பி வாழ வேண்டிய நிலைக்குத் தமிழகம் தள்ளப்பட்டிருக்கிறது.

விவசாயம், தொழிற்சாலை, கால்நடைகளுக்கான தேவை இவற்றைத் தாண்டி குடிநீருக்கே மிகப் பெரிய பற்றாக்குறை உருவாகியுள்ளது. வெகுவேகமாக நகர்மயமாகிவரும் தமிழகத்தில் தற்போது உள்ள மாநகராட்சிகளில் இரண்டில் மட்டும் குடிநீர் விநியோகம் நல்ல நிலையில் உள்ளதென்றும், அதுபோல 44 நகராட்சிகளில் மட்டுமே போதுமான அளவில் குடிநீர் வழங்கப்படுகிறது என்றும் தமிழக அரசின் புள்ளிவிவரங்கள் தெரிவிக்கின்றன.

தமிழகத்திலேயே உற்பத்தியாகும் நதிகள் இல்லாத நிலையில், பிற மாநிலங்களை நம்பித்தான் தமிழகம் இருக்க வேண்டியுள்ளது. தேசிய அளவிலும், சர்வதேச அளவிலும் ஒப்புக்கொள்ளப்பட்ட நியதிகளின் அடிப்படையில் தமிழகத்திற்குத் தேவையான நீரை அண்டை மாநிலங்கள் வழங்கித்தான் ஆக வேண்டும். உச்ச நீதிமன்றத்தின் பல்வேறு தீர்ப்புகளும் அதை உறுதிப்படுத்தி யுள்ளன. ஆனால் நியதிகளையும் தீர்ப்புகளையும் மதிக்காமல் தமிழகத்தின் நதிநீர் உரிமையை அண்டை மாநிலங்கள் மறுத்து வருகின்றன. ஆட்சிகள் மாறினாலும் தமிழகத்திற்கு எதிரான போக்குகள் மாறவில்லை. தமிழகத்தின் நீர் உரிமையை மறுக்கும் கேரளா, கர்நாடகா, ஆந்திரா மாநிலங்களில் உள்ள அரசியல் கட்சிகள் ஒன்றுபட்டு நிற்கும்போது, உரிமையைக் காக்க வேண்டிய தமிழகத்தின் அரசியல் கட்சிகளோ ஓரணியில் திரளாமல் இருக்கின்றன என்பது வேதனையளிக்கிறது.

இந்நிலையில், தமிழகம் பாலைவனமாக மாறாமல் தடுக்க வேண்டுமென்றால் நமது நதிநீர் உரிமைகள் காப்பாற்றப்பட வேண்டும். தமிழ்நாட்டின் உயிர்நாடியான இந்தப் பிரச்சனையை முன்வைத்து செப்டம்பர் 17ஆம் நாள் சென்னையில் ‘நதிநீர் உரிமை பாதுகாப்பு மாநாடு’ விடுதலைச் சிறுத்தைகள் கட்சியால் கூட்டப்படுகிறது. இம்மாநாட்டில் அரசியல் கட்சிகளின் தலைவர்களும், விவசாய அமைப்புகளின் பிரதிநிதிகளும் நீரியல் வல்லுநர்களும் பங்கேற்க உள்ளனர் என்பதைத் தெரிவித்துக்கொள்கிறோம்.

இவண்

தொல்.திருமாவளவன்

செப்.2 - அகில இந்திய வேலை நிறுத்தப் போராட்டத்தில் விசிகவின் தொழிற்சங்கங்கள் பங்கேற்கும்

noreply@blogger.com (Anonymous) — Wed, 31 Aug 2016 20:20:00 +0530

மோடி அரசின் தொழிலாளர் விரோதப்போக்கைக் கண்டித்து

செப்.2 - அகில இந்திய வேலை நிறுத்தப் போராட்டத்தில்

விசிகவின் தொழிற்சங்கங்கள் பங்கேற்கும்

தொல்.திருமாவளவன் அறிக்கை

தொழில் நிறுவனங்களில் ஒப்பந்தக் கூலி முறை, குறைவான கூலி, தொழிற்சங்கம் அமைக்கும் உரிமை மற்றும் அங்கீகாரம், தொழிலாளர் நலச் சட்டங்களை முழுமையாக நடைமுறைப்படுத்துதல், அமைப்புசாரா தொழிலாளர்களுக்கு சமூகப் பாதுகாப்பு, பொதுத்துறைப் பங்குகளை விற்பதைத் தடுத்தல் உள்ளிட்ட 12 அம்சக் கோரிக்கைகளை வலியுறுத்தி மத்திய தொழிற்சங்கங்களின் கூட்டமைப்பு 2-9-2016 அன்று அகில இந்திய வேலை நிறுத்தத்திற்கு அழைப்பு விடுத்துள்ளது.

கடந்த ஆண்டும் இதே நாளில் (2-9-2015 அன்று) மேற்கண்ட 12 அம்சக் கோரிக்கைகளை வலியுறுத்தி தொழிற்சங்கங்கள் வேலை நிறுத்தத்தில் ஈடுபட்டன. ஆனால் மைய அரசு இப்பிரச்சனைகளுக்குத் தீர்வு காண எவ்வித நடவடிக்கையும் எடுக்காதது தொழிலாளர் விரோதப் போக்கையும், மோடி அரசின் நிர்வாகத் திறமையின்மையையும் வெளிப்படுத்துகிறது. அத்துடன், பன்னாட்டு நிறுவனங்கள் மற்றும் உலக வர்த்தக அமைப்புகளின் நிர்ப்பந்தங்களுக்குப் பணிந்து முற்றிலும் தொழிலாளர்களுக்கு எதிரான சட்டங்களை நிறைவேற்றுவதிலும் உள்நாட்டுத் தொழில்களை நசுக்கும் வகையிலும் பா.ச.க. அரசின் செயல்பாடு உள்ளது.

தொழிலாளர்களின் கோரிக்கைகளுக்குத் தீர்வு காண வேலை நிறுத்தப் போராட்டத்திற்கு அழைப்பு விடுத்துள்ள மத்திய தொழிற்சங்கக் கூட்டமைப்புடன் பா.ச.க. அரசு எவ்விதப் பேச்சுவார்த்தையிலும் ஈடுபடவில்லை. ஆனால், ஆர்.எஸ்.எஸ்.சின் துணை அமைப்பான டி.எம்.எஸ். தொழிற்சங்கத்துடன் மத்திய அமைச்சர்கள் பேச்சுவார்த்தையில் ஈடுபட்டு வருவது கேலிக்கூத்தாகும்.

மைய அரசின் இத்தகைய தொழிலாளர் விரோதப் போக்கையும் மக்கள் விரோதப் போக்கையும் விடுதலைச் சிறுத்தைகள் கட்சி மிக வன்மையாகக் கண்டிக்கிறது.

ஆகவே, உடனடியாக தொழிற்சங்கங்களுடன் பேச்சுவார்த்தை நடத்தி தொழிலாளர்களின் கோரிக்கைகளை நிறைவேற்ற வேண்டுமென்று மைய அரசையும், போக்குவரத்து ஊழியர்களை அரசு ஊழியர்களாக அறிவிக்க வேண்டுமென்று தமிழக அரசையும் விடுதலைச் சிறுத்தைகள் கட்சி கேட்டுக்கொள்கிறது.

இக்கோரிக்கைகளுக்காகத் தொடர்ந்து போராடிவரும் மத்திய தொழிற்சங்கக் கூட்டமைப்பு 2-9-2016 அன்று நடைபெறுவதாக அறிவித்துள்ள அகில இந்திய வேலைநிறுத்தப் போராட்டத்தில் அறிவர் அம்பேத்கர் போக்குவரத்துத் தொழிலாளர் விடுதலை முன்னணி மற்றும் விடுதலைச் சிறுத்தைகள் கட்சியின் தொழிலாளர் விடுதலை முன்னணி தமிழகத்தில் முழுமையாகப் பங்கேற்கும் என அறிவிக்கப்படுகிறது.

இவண்

ஈழத்தில் காணாமல் போன 25,000 தமிழர்கள் பற்றி அனைத்துலக விசாரணை தேவை

noreply@blogger.com (Anonymous) — Tue, 30 Aug 2016 16:47:00 +0530

ஈழத்தில் காணாமல் போன

25,000 தமிழர்கள் பற்றி அனைத்துலக விசாரணை தேவை

தொல்.திருமாவளவன் வேண்டுகோள்

ஆகஸ்டு 30ஆம் நாள் அனைத்துலக காணாமல் போனோர் நாளாக ஐ.நா.பேரவையால் அறிவிக்கப்பட்டு முதல் ஆண்டாக உலகம் முழுவதும் இன்று கடைபிடிக்கப்படுகிறது. இரண்டு நாடுகளுக்கு இடையில் நடைபெறும் போர் மற்றும் உள்நாட்டுப்போர் ஆகியவற்றால் போர் நடக்கும் தேசங்களில் பல்லாயிரக் கணக்கானோர் காணாமல் போகின்றனர். போரில் இறந்ததாகவோ அல்லது புலம்பெயர்ந்து வந்ததாகவோ கணக்கில் வராத அனைவரும் காணாமல் போனோராகக் கருதப்படுகின்றனர். போர்க் காலங்களில் இவ்வாறு காணாமல் போனோரைப் பற்றி போரில் ஈடுபடும் அரசுகள் பெரிதாகக் கவலைப்படுவதில்லை. தமிழீழத்தில் நடந்த இனப்படுகொலைக்குப் பின்னர் தமிழ்ச் சமூகத்தினராலும் மனித உரிமை அமைப்புகளாலும் ஐ.நா. பேரவையில் மேற்கொள்ளப்பட்ட முயற்சியின் விளைவாக ஆகஸ்ட் 30ஆம் நாள் அனைத்துலக காணாமல் போனோர் நாளாக அறிவிக்கப்பட்டுள்ளது.

தமிழீழத்தில் 2009ஆம் ஆண்டு சிங்கள இனவெறி அரசு நடத்திய இனப்படுகொலையின்போது பல்லாயிரக் கணக்கான தமிழர்கள் காணாமல் போய்விட்டனர். ஏறத்தாழ 25,000 தமிழர்கள் அவ்வாறு காணாமல் போய்விட்டதாக புள்ளிவிவரம் கூறுகிறது. இவர்களில் விடுதலைப் புலிகள் இயக்கத்தைச் சேர்ந்த முன்னோடிகள் மட்டுமின்றி அப்பாவி பொதுமக்களும் அடங்குவர். போர் முடிந்து ஆறு ஏழு ஆண்டுகள் கடந்த நிலையிலும் இவ்வாறு காணாமல் போன 25,000 பேர் பற்றி சிங்கள இனவெறி அரசு கிஞ்சிற்றும் அக்கறை காட்டவில்லை.

அனைத்துலக நாடுகளின் அழுத்தத்திற்குப் பிறகு சிங்கள ஆட்சியாளர்கள் காணாமல் போனோர் தொடர்பாக சட்டம் ஒன்றை இயற்றியுள்ளனர். இச்சட்டத்தின்படி மாவட்டந்தோறும் காணாமல் போனோர் பற்றி விவரங்களைத் திரட்டவும், காணாமல் போனோர் தொடர்பாக சான்றிதழ் வழங்கவும், மாவட்டந்தோறும் செயலகங்களை உருவாக்கிடும் பணியில் சிங்கள அரசு ஈடுபட்டு வருகிறது. இதனால் பாதிக்கப்பட்டோருக்கு நீதி கிடைக்க வாய்ப்பில்லை.

இனப்படுகொலை குறித்து, சிங்கள இனவெறியர்கள் இடம்பெறாத சர்வதேச விசாரணை நடைபெற வேண்டும் என்று தமிழ்ச் சமூகத்தின் சார்பில் வலியுறுத்தப்பட்டது. ஆனால், அமெரிக்கா, இந்தியா உள்ளிட்ட அனைத்துலக நாடுகள் சிங்கள இனவெறியர்களின் கட்டுப்பாட்டிலேயே விசாரிக்கும் பொறுப்பை ஒப்படைத்தது. இது தமிழ்ச் சமூகத்திற்கு இழைக்கப்பட்ட மாபெரும் அநீதியாகும். இந்நிலையில், காணாமல் போனோர் தொடர்பாகவும் விசாரிக்கும் பொறுப்பை சிங்கள இனவெறியர்களிடம் ஒப்படைப்பது தமிழ் மக்களுக்கு இழைக்கப்படும் கொடுமையாகும்.

எனவே, காணாமல் போனோர் நாளை அறிவித்துள்ள ஐ.நா. பேரவை சிங்கள இனவெறியர்கள் இடம்பெறாத வகையில் அனைத்துலக விசாரணை நடத்திட ஆவன செய்ய வேண்டுமென விடுதலைச் சிறுத்தைகள் வேண்டுகோள் விடுக்கிறது.

இவண்

தொல்.திருமாவளவன்

தேர்தல் வெற்றிக்காக என்னைக் கொல்லவும் துணிவார்கள் - திருமாவளவன்

noreply@blogger.com (Anonymous) — Sat, 27 Aug 2016 14:24:00 +0530

2015 ஆகஸ்ட் 17-ம் நாள், சென்னை தேனாம்பேட்டையில் உள்ள காமராஜர் அரங்கத்தில், விடுதலைச் சிறுத்தைகள் கட்சியின் தலைவர் திருமாவளவனின் பிறந்தநாள் விழா நடந்தது. அந்தப் பிறந்தநாள் விழாவில் பிறந்தது, ‘மாற்று அரசியல்... கூட்டணி ஆட்சி’ என்ற கோஷம். அதன் நீட்சியே, ‘மக்கள் நலக்கூட்டு இயக்கம்’. அந்த நீட்சியின் தொடர்ச்சிதான், ‘மக்கள் நலக் கூட்டணி’. 2016 சட்டமன்றத் தேர்தலில், பழைய கணக்குகளைப் பொய்யாக்கி, சில புதிய கனவுகளை நிஜமாக்கியது.

அதுபோல, 2016 ஆகஸ்ட் 17-ம் நாள், திருமாவளவனின் 54-வது பிறந்தநாள் விழா, சென்னை ஒய்.எம்.சி.ஏ மைதானத்தில் நடைபெற்றது. தனிநபர் துதிபாடும் விழாவாக இல்லாமல், ‘மதச்சார்பின்மை பாதுகாப்பு மாநாடு’ என்ற கருத்தாக்கத்தை முன்வைத்து நடைபெற்றது. இந்த விழாவும், எதிர்வரப்போகும் உள்ளாட்சித் தேர்தல் மற்றும் நாடாளுமன்றத் தேர்தலில் பல அரசியல் அதிர்வுகளை உருவாக்கும் என்ற தோற்றத்தை உண்டாக்கிச் சென்றுள்ளது.

83 கிலோ எடையுள்ள திருமாவுக்கு 93 கிலோ நாணயம்!

விடுதலைச் சிறுத்தைகளின், ‘மதச்சார்பின்மை பாதுகாப்பு மாநாடு’, இரவு 7 மணிக்குத் தொடங்கியது. பொதுவுடைமைக் கட்சி மேடைகளில் மட்டும் முழங்கிவந்த கவிஞர் இன்குலாப், முதன்முதலாக மாற்றுக் கட்சி மேடையில் நடைபெற்ற கவியரங்கத்துக்குத் தலைமை தாங்கினார். வி.சி.க-வின் செய்தித் தொடர்பாளர் வன்னியரசு, வரவேற்புக் கவிதை வாசித்தார். கவிஞர்கள் கனல் மைந்தன், இளவேனில், ரசாக், தணிகைச்செல்வன் ஆகியோர் திருமாவளவனைப் புகழ்ந்து கவிதை படித்தனர். கவிதைகள் வாசிக்கப்படும்போது, திருமாவளவனின் முகம் பூரிப்பு அடைந்தது. பெரம்பலூர் கிட்டு என்பவர், கட்சி நிதிக்காக திருமாவளவனின் எடைக்கு எடை, அம்பேத்கர் உருவம் பொறித்த 10 ரூபாய் நாணயங்களை வழங்கினார். அதைப் பெற்றுக்கொண்ட திருமாவளவன், “என்னுடைய எடை 83 கிலோதான். ஆனால், பெரம்பலூர் கிட்டு வழங்கிய நாணயங்களின் எடை 93 கிலோ 600 கிராம். கட்சி நிதிக்காக என் எடையைவிடக் கூடுதலாகவே கொடுத்துள்ளார்’’ என்று பாராட்டினார்.

‘‘திருமா பிறந்தநாள்... திருமண நாளாக இருக்க வேண்டும்!’’

கவியரங்கத்துக்குப் பிறகு, மக்கள் நலக் கூட்டணித் தலைவர்கள் மேடைக்கு வந்தனர். ஒவ்வொருவர் பேச்சிலும், மக்கள் நலக் கூட்டணி சட்டமன்றத் தேர்தலில் கண்ட தோல்விக்கான விளக்கம் இருந்தது. அதே நேரத்தில், எதிர்வரும் உள்ளாட்சித் தேர்தலிலும் தொடர வேண்டும் என்ற ஆவலும் தெரிந்தது. இந்தியக் கம்யூனிஸ்ட் கட்சியின் தமிழ் மாநிலச் செயலாளர் முத்தரசன் பேசியபோது, ‘‘திருமாவளவனின் பிறந்தநாள் விழாவை, மதச்சார்பின்மை பாதுகாப்பு மாநாடாக நடத்துகிறீர்கள். ஆனால், இங்கு முன்வரிசையில் அமர்ந்துள்ள, திருமாவளவனின் தாயாரும் சகோதரியும், இது திருமாவின் பிறந்தநாளாக இல்லாமல், ஒரு திருமண நாளாக இருந்தால் நன்றாக இருக்கும் என்று எதிர்பார்க்கிறார்கள். இன்றைக்கு மத்தியில் ஆட்சியில் இருப்பவர்கள், செத்த மாடுகளைவைத்து, உயிருள்ள மனிதர்களைக் கொல்லும் அரசியலைச் செய்கின்றனர்; வாயில்லாத பசுக்களைக் காரணம் காட்டி, முஸ்லிம்களைக் கொல்கின்றனர்; தலித்களைத் தாக்குகின்றனர். அந்த மதவாத சனாதனக் கும்பல், காங்கிரஸ் இல்லாத இந்தியா என்கிறது; முஸ்லிம் இல்லாத இந்தியா என்கிறது. அவர்கள் கம்யூனிஸ்ட்கள் இல்லாத இந்தியா என்று சொல்லவில்லை... விடுதலைச் சிறுத்தைகள் இல்லாத இந்தியா என்று சொல்லவில்லை... ம.தி.மு.க இல்லாத இந்தியா என்று சொல்லவில்லை என்று நாம் சும்மா இருக்க முடியாது. ஏனென்றால், அவர்களை முடித்துவிட்டுப் பிறகு நம் பக்கம் வருவார்கள். அதனால், அவர்கள் மற்றவர்களைக் குறிவைக்கும்போதே நாம் குரல் கொடுக்க வேண்டும். அப்படிச் செய்யவில்லை என்றால், அவர்கள் நம்மைத் தாக்க வரும்போது, நமக்காகக் குரல் கொடுக்க யாரும் வரமாட்டார்கள். ஜெர்மனியில் ஹிட்லர் செய்து தோற்றுப்போன மோசமான வெறுப்பு அரசியலை இப்போது பி.ஜே.பி செய்கிறது. நாம் அதை அனுமதிக்கக் கூடாது. ஒன்றுபட்டுச் செயல்பட வேண்டும். வெற்றி - தோல்வி சகஜம். மக்கள் நலக் கூட்டணி, சட்டசபைத் தேர்தலில் தோற்றுவிட்டது. அதனால், ‘உள்ளாட்சித் தேர்தலில் அந்தக் கூட்டணி நீடிக்குமா?’ என்று கேட்கிறார்கள். அதற்கு, ‘நான் நீடிக்கும்’ என்று சொன்னேன். ‘இந்தக் கூட்டணி உள்ளாட்சித் தேர்தலிலும் நீடித்தால், வெற்றி பெறுமா?’ என்று அடுத்த கேள்வி கேட்கிறார்கள்... அவர்களுக்கு என்ன சொல்வது? மக்கள் ஓட்டு போட்டால் வெற்றி பெறும்... இல்லையென்றால், தோற்றுப்போகும். ஆனால், எங்கள் கூட்டணியும், சாதிய மதவாத சக்திகளை எதிர்த்து நாங்கள் நடத்தும் போராட்டங்களும் தொடரும். உள்ளாட்சித் தேர்தலில் இந்தக் கூட்டணியும் தொடரும்” என்றார்.

‘‘பெரியாரின் வாரிசுகள் ஆணவக் கொலையைக் கண்டிக்கவில்லை!’’

ஜி.ராமகிருஷ்ணன் பேசியபோது, “இந்திய விடுதலைப் போராட்டத்தில் சாதி - மத வேறுபாடு இன்றி அனைவரும் கலந்துகொண்டனர். தங்களின் உயிரைக் கொடுத்தனர். ஆனால், அந்தத் தியாகத்தில் ஈடுபட்ட உழைப்பாளி மக்களுக்குச் சுதந்திரத்தின் பலன் முழுமையாகக் கிடைக்கவில்லை. சுதந்திரப் போராட்டத்தில் கலந்து கொள்ளாததோடு, அந்தப் போராட்டத்தைக் காட்டிக்கொடுத்தவர்கள் ஆர்.எஸ்.எஸ் அமைப்பினர். அந்த அமைப்பைச் சேர்ந்தவர்கள்தான், இன்று இந்தியாவை ஆள்கின்றனர். அவர்கள், இந்திய அரசியல் சாசனத்தின் உள்ளடக்கத்தையே மாற்றும் முயற்சியில் இறங்கி உள்ளனர். தமிழகத்திலும் சிலர் தலித் மக்களுக்கு எதிரான வெறுப்பு அரசியலை செய்கின்றனர். அதையே தங்களின் முழுநேர அரசியலாகச் செய்கின்றனர். அதனால்தான், சாதி ஆணவக் கொலைகள் அதிகரித்து வருகின்றன. ஆனால், பெரியாரின் வாரிசுகள் என்று சொல்லும், ஆளும் கட்சி - எதிர்க் கட்சி ஆகிய இரண்டு கட்சியினர், ‘ஆணவக் கொலை’ என்ற வார்த்தையையே உச்சரிக்க மறுக்கின்றனர். அதனால்தான், சிலர் தாழ்த்தப்பட்ட ஒடுக்கப்பட்ட மக்களுக்கு எதிரான, ‘வெறுப்பு அரசியல்’ செய்வதையே தங்களின் முழுநேரத் தொழிலாகக் கொண்டிருக்கின்றனர். அப்படிச் செய்வதன் மூலம், தாழ்த்தப்பட்ட - பிற்படுத்தப்பட்ட மக்களுக்கு இடையே பகையை உருவாக்கி, அதைத் தங்களுக்கு அரசியல் ஆதாயமாக்க முனைகின்றனர். அந்த முயற்சி தொடர்ந்தால், அதை நாங்கள் ஒன்றுபட்டு முறியடிப்போம். இந்தக் கூட்டணியில், அம்பேத்கரியத்தைக் கொள்கை கோட்பாடாகக் கொண்ட திருமாவளவன் இருக்கிறார்; மார்க்சியக் கொள்கையை ஏற்றுக்கொண்ட இடதுசாரிகளாகிய நாங்கள் இடம்பெற்றுள்ளோம்; பெரியாரின் பாசறையில் இருந்துவந்த வைகோ இருக்கிறார். ஆக, இதுதான் மதவாத - ஆதிக்க சாதி உணர்வுகளுக்கு எதிரான உண்மையான கூட்டணி. ஒரு தேர்தல் தோல்வியால், நாம் அரும்பாடுபட்டு உருவாக்கிய இந்தக் கூட்டணி முறிந்துவிடக் கூடாது” என்று பேசினார்.

‘‘தே.மு.தி.க சேர்ந்ததால் மக்கள் நலக் கூட்டணி இருட்டடிப்பு செய்யப்பட்டது!’’

வைகோ தன்னுடைய பேச்சில், “திருமாவளவன் தன்னலம் கருதாத தலைவர்; ஓய்வறியா உழைப்பாளி. அவர் மட்டும் கொஞ்சம் சுயநலம் பார்த்திருந்தால், காட்டுமன்னார் கோயிலில் வெற்றி பெற்றிருப்பார். கடைசி நாள் மட்டும் அவர் தொகுதியில் திருமாவளவன் பிரசாரம் செய்திருந்தால், அவருக்கு அந்த வெற்றி வாய்த்திருக்கும். சட்டசபையில், அவர் குரல் ஒலித்திருக்கும். ஆனால், தே.மு.தி.க தலைவர் (பெயரைச் சொல்லவில்லை) தன்னுடைய தொகுதியில், திருமாவளவன் பிரசாரம் செய்ய வேண்டும் என்று கேட்டுக்கொண்டதால், அங்கு போய் பிரசாரம் செய்தார். இப்படிப்பட்ட சுயநலம் இல்லாத ஒரு தலைவரை இதுநாள் வரை நான் கண்டதில்லை. திருமாவளவன் முன்வைத்த கூட்டணி ஆட்சி என்ற கோரிக்கையை ஏற்றுக்கொண்டு, நாங்கள் மக்கள் நலக் கூட்டணியைத் தொடங்கினோம். தமிழக அரசியல் அரங்கில் பல அதிர்வுகளை அந்தக் கூட்டணி உருவாக்கியது. ஆனால், தே.மு.தி.க-வும், தமிழ் மாநில காங்கிரஸ் கட்சியும் எங்கள் கூட்டணியில் இணைந்த பிறகு, நாங்கள் இருட்டடிப்புச் செய்யப்பட்டோம்; ஏகடியத்துக்கு ஆளானோம். அதன் விளைவு, மக்கள் நலக் கூட்டணி தோல்வியடைந்தது. ஆனால், இந்தத் தோல்வியால் நாங்கள் துவண்டுவிடவில்லை. ஏனென்றால், போராளிகள் நாங்கள். யுத்தத்தைத்தான் இழந்திருக்கிறோம்; களத்தை இழக்கவில்லை. இன்னும் பல களங்கள் இருக்கின்றன. உள்ளாட்சித் தேர்தல் வருகிறது... அடுத்து, நாடாளுமன்றத் தேர்தல் வருகிறது. அதில், நாங்கள் வெல்வோம்” என்றார்.

‘‘மக்கள் நலக் கூட்டணி என்றும் தொடரும்!’’

“இது வரலாற்றுச் சிறப்பு வாய்ந்த மாநாடு. ஏனென்றால், ஒரு கோட்பாட்டின் அடிப்படையில், அரசியல் அரங்கில் மாபெரும் விவாதத்தைக் கிளப்புகிற மாநாடாக உள்ளது. புரட்சியாளர் அம்பேத்கரின் கருத்தை, மேற்கோளாகப் பதிவு செய்துள்ளோம். வெறும் ஓட்டு, பதவி, அதிகாரம், சுகம் என்று நினைக்கிற கும்பலுக்கு மத்தியில், அதைப் பற்றிக் கவலைப்படாமல், தேசத்தைப் பற்றியும் மக்களைப் பற்றியும் கவலைப்படுகிற விதத்தில் இந்த மாநாட்டை ஏற்படுத்தி உள்ளோம். இந்தியாவை அச்சுறுத்திக்கொண்டிருக்கிற பூதம் திடீரென்று மோடியின் வடிவில் வந்துவிடவில்லை. நீண்டகாலமாக அது, இங்கு இருந்துவருகிறது. அந்த அச்சுறுத்தலில் இருந்து தேசத்தைப் பாதுகாக்கும் நோக்கில் அன்றே செயல்பட்டவர் அம்பேத்கர். அம்பேத்கரையும் பகுத்தறிவுப் பகலவன் பெரியாரையும் கொள்கை ஆசான்களாக நாம் ஏற்றுக்கொண்டுள்ளோம். அதுதான் பலரின் கண்களை உறுத்துகின்றன; நெஞ்சைப் பதறவைக்கிறது; அடிவயிறை எரிச்சலடைய வைக்கிறது. அதனால், திருமாவளவனைக் குறிவைத்து மிகக் கேவலமான அவதூறுகளைத் திட்டமிட்டுப் பரப்பிக் கொண்டிருக்கின்றனர். அவர்களின் செயல், கொலைவெறியைத் தூண்டுகிற முயற்சி. அபாண்டமான பழி. ஆதாரமில்லாத அவதூறு. அப்பட்டமான பொய். ஆனால், அதை அந்தக் கும்பல் திட்டமிட்டுத் தொடர்ந்து செய்து வருகிறது. நாட்டைப் பற்றி, மக்களைப் பற்றி, மதவெறி அரசியலைப் பற்றிப் பேசாமல், நம்மைப் பற்றி அவதூறுகள் பேசுகின்றனர் அந்த அற்பர்கள். பொய் பேசுகிறவர்களுக்கு உலகத்தில் நோபல் பரிசு கொடுக்க வேண்டும் என்றால், அதைத் தைலாபுரத்தில் இருக்கிற, அந்தப் பொய் சொல்லிக் கும்பலுக்குத்தான் கொடுக்க வேண்டும். அண்டப்புளுகு... ஆகாசப் புளுகு புளுகுகிறார். மனச்சாட்சி இல்லாமல், பொய் சொல்கிறார். பொண்டாட்டி நம்மைக் கேவலமாக நினைப்பாளே என்ற எண்ணமின்றி... அவருடைய பிள்ளைகள், இப்படிப்பட்ட பொய் சொல்கிறவரா நம் தந்தை என்று நினைப்பார்களே என்ற வெட்கமில்லாமல், மனச்சாட்சி இல்லாமல் பொய் சொல்கிறார். அவர்களுடைய அருவருப்பான அரசியலை நாம் கண்டுகொள்ள வேண்டாம் என்று நாம் ஒதுங்கிச் சென்றுகொண்டே இருக்க... அவர்கள் பொய்ப் பிரசாரத்தைத் தொடர்ந்துகொண்டே இருக்கின்றனர். அதிகாரம், பரிசு, பதவி முக்கியம் என்று நான் கருதி இருந்தால், நான் எடுத்த முடிவு சட்டசபைத் தேர்தல் நேரத்தில் வேறு மாதிரியாக இருந்திருக்கும்.

தோல்வியைப் பற்றிக் கவலையில்லை. நாம் எடுத்துவைத்திருக்கிற மாற்று அரசியல்தான் முக்கியம் என்று உறுதிப்பாட்டோடு இருக்கிறோம். நம் கொள்கைக் கற்பை எவராலும் கலங்கப்படுத்திவிட முடியாது. கட்சிக்குள் முன்னணிப் பொறுப்பாளர்களிடம் குழப்பத்தை ஏற்படுத்த சிலர் முயற்சிக்கின்றனர். அவர்கள் யார்? ஒட்டுமொத்தத் தமிழகமே ஈழத்தமிழர்களுக்காகப் போராடிக் கொண்டிருந்தபோது, மரக்காணத்தில் சாதிக் கலவரத்தைத் தூண்டிவிட்டு, ஈழத்தமிழர் போராட்டத்தைத் திசை திருப்பியவர்கள் அவர்கள். ஒட்டுமொத்த தமிழகமே, தி.மு.க - அ.தி.மு.க உள்பட ஈழத் தமிழர்களுக்காக போராட்டம் நடத்திக்கொண்டிருந்தபோது, தர்மபுரியில் திட்டமிட்டு வன்முறையைத் தூண்டி, தமிழகத்தின் அரசியல் திசைவழியைத் திருப்பியவர்கள் அவர்கள். எவ்வளவு கேடான அரசியல்... எவ்வளவு தற்குறித்தனமான அரசியல்... எவ்வளவு சுயநலமான அரசியல்... எவ்வளவு அருவெருப்பான அரசியல்? அதைக் கண்டிக்காதவர்கள் இன்று விடுதலைச் சிறுத்தைக்கு அறிவுரை கூறக் கிளம்பி உள்ளனர்.

மானம் கெட்டுப் பல்லை இளித்து, காலை நக்கிப் பிழைக்கிறவன் அல்ல திருமாவளவன்... பதவிக்காகச் சுயமரியாதையை அடகுவைப்பவன் அல்ல திருமாவளவன். கோகுல்ராஜ் கழுத்தை அறுத்து, தலையைத் துண்டித்து, தண்டவாளத்தில் அவரைத் தூக்கி எறிந்த கொடூரம் சாதாரணமான கொடூரமா... அதற்கு இங்கே யார் பதறினார்கள்? அவர் யார் என்பது நமக்குத் தெரியாது. அவர் என்ன காதல் விவகாரத்தில் ஈடுபட்டார் என்பதற்கு இங்கு எந்த ஆதாரமும் இல்லை. அதற்கு என்ன பதற்றம் ஏற்பட்டது? அவர் உடலை அடக்கம் செய்தபோது ஏற்பட்ட ஆற்றாமையில் நான் பேசினேன்... இயலாமையில் பேசினேன். அந்தக் கொடுமையைக் கண்டு நான் பேசினேன். இவர்களுக்கு எல்லாம் தெரிந்தது பொம்பளை சமாசாரம்தான். அதைத் தாண்டிய அரசியல் இவர்களுக்குத் தெரியாது என்று பேசினேன். அப்போது தோழர் ரவிக்குமார் சொன்னார், ‘உங்கள் ஸ்டேட்டஸுக்கு நீங்கள் இப்படிப் பேசக் கூடாது. உங்களை மாற்றுச் சமூகத்தவர்கள் மதிக்கிறார்கள். அந்தப் பெருமை உங்களுக்கு இருக்கிறது. அந்தப் பெருமையால்தான் நானும் உங்களோடு இருக்கிறேன்’ என்றார். அப்படிப்பட்டவர்கள்தான் என்னோடு இருக்கிறார்கள். அப்படியில்லாமல், ஜீன்ஸ் பேன்ட்டும் கூலிங் கிளாஸும் போட்டுக்கொண்டு போய் மாற்றுச் சமூகப் பெண்களை, காதலி என்று நான் சொல்லிக்கொண்டு இருந்தால், ரவிக்குமார் என்னைத் தலைவராக ஏற்றுக்கொள்வாரா? சிந்தனைச்செல்வன் என்னைத் தலைவராக ஏற்பாரா? அதையெல்லாம் தாண்டி, என் தாயும் தந்தையும் அப்படிப்பட்ட ஓர் அற்பனாக வளர்க்கவில்லை. யாருக்கும் எந்தத் தீங்கும் நினைக்கக் கூடாது என்று கட்டுப்பாடுகளைச் சொல்லிக் கொடுத்து, அடுத்தவர் வருந்தும் செயலை நீ செய்யக் கூடாது என்று சொல்லித்தான் என்னை வளர்த்தனர். அன்றைக்கு நான் பேசியது, ஒரு குறிப்பிட்ட கட்சியைச் சார்ந்தவர்களை மனதில் வைத்துத்தான் பேசினேன். அதற்காக நான் வருத்தப்பட்டேன். அதை ஏன் இன்று நான் சொல்கிறேன் என்றால், அரும்பாடுபட்டுக் கட்சியை வளர்த்து, வைகோ போன்றவர்களெல்லாம் இடதுசாரித் தலைவர்கள் எல்லாம் இங்கு நீண்டநேரம் காத்திருந்து நம்மை ஊக்கப்படுத்தும் எல்லையைத் தொட்டிருக்கிறோம். ஆனால், சிலர் மாற்றுச் சமூகங்களை எல்லாம் நமக்கு எதிராகத் திருப்பி, என் ரத்தத்தில் சோறு பிசைய நினைக்கிறார்கள். என்னைப் பற்றி எனக்குக் கவலை இல்லை. ஆனால், இரண்டு சமூகங்களுக்கு இடையில் மிகப்பெரிய மோதலை உருவாக்க நினைப்பதை நினைத்துக் கவலைப்படுகிறேன்.

சாதியவாதமும் மதவாதமும் வேறல்ல. மதவாதம், என்பது ராணுவம் என்றால், அதில் ஒவ்வொரு சாதியும் ஒரு பட்டாலியன். சாதியம் கீழ்த்தளத்தில் வேலை பார்த்து, இந்து என்ற இந்துத்துவ கோட்பாட்டைப் பாதுகாத்துக் கொண்டிருக்கிறது... மதம் என்பதைப் பாதுகாக்கும். சாதியவாதம் மதவாதத்தின் அடித்தளம். சாதியவாதம் மதவாதத்தின் உயிர் மூச்சு. எனவே, மதவாதம் என்பதை பார்பனியம் என்று மட்டும் புரிந்துகொள்ளக் கூடாது. இந்த நிலையில்தான், மோடி வாய் திறக்கிறார். அவர் ஏன் வாய் திறந்தார் என்று நமக்குத் தெரியாதா? எந்தப் பிண்ணனியில் சொல்கிறார் என்று நமக்குத் தெரியாதா? தருண் விஜய் யார் என்று நமக்குத் தெரியாதா? தலித்களைக் குறிவைத்துத் தமிழ்நாட்டு அரசியல் களத்தில் ராமதாஸ், தலித் வெறுப்பு அரசியலை உயர்த்திப் பிடிக்கிற நேரத்தில், ‘தலித்களைத் தாக்காதீர்கள்’ என்று ஒரு குரல் நாட்டின் பிரதமர் மோடியின் வாயில் இருந்து வருவது - அது உண்மை அல்ல; அது நீலிக்கண்ணீர் என்பது வேறு - வரும்போது, நாம் அதைக் கருவியாக எடுத்துக்கொள்கிறோம். இந்தச் சாதி வெறியர்களுக்கு ஒரு சவுக்கடிபோல, நாம் அதை ஓர் ஆயுதமாக ஏந்திக்கொள்கிறோம். அவர்களுக்கு ஒரு சவுக்கடி கொடுப்பதற்கான வாய்ப்பு அது. ராமதாஸை இயக்குகிறவர்களே, சங்பரிவார்தான். அதனால்தான், திருமாவளவன், மதச்சார்பின்மை பாதுகாப்பு மாநாடு நடத்தும்போது, பேசி வைத்துக்கொண்டு ஒரு தனியார் தொலைக்காட்சியில், ராமதாஸ் பேட்டி கொடுத்தார். அவன் யாரை எதிர்ப்பான்... அதில், கலந்துகொள்கிறவர்கள் யார்? இவர்கள் கட்டாயம் சங்பரிவார் கும்பலை எதிர்த்துத்தான் பேசுவார்கள் என்று அவர்கள் பேசி வைத்துக்கொண்டு, அவர்கள் அந்தப் பேட்டியைத் திட்டமிட்டனர். மதவாத அரசியலைக் கையில் எடுப்பதுதான் நமக்குச் சிக்கல். ஒருவேளை, கூலிப்படைவைத்து என்னை ஒழித்துக்கட்டலாம். அவர்கள், அப்படிச் செய்வார்கள்... யோசிப்பார்கள். ஏனென்றால், அப்படிச் செய்தால், தலித்கள் ஆத்திரப்படுவார்கள். அப்படி நடந்தால், தலித் - தலித் அல்லாதவர்கள் என்று பிரிந்து ஒரு யுத்தம் மூளும். அப்படி யுத்தம் மூண்டால், அதில் வாக்குகளைப் பொறுக்கிக்கொள்ளலாம் என்பதுதான் அவர்கள் திட்டம். அதனால்தான் நான் சொல்கிறேன்... சமூக வலைதளங்களில் நம்மை ஆத்திரமூட்டினால், நாம் அவர்களுக்குப் பதில் சொல்லத் தேவையில்லை. அவர்களை நாம் ‘பிளாக்’ செய்தால் போதும். நாம் தரம் தாழ்ந்து பேசக் கூடாது... என்னால் முடியாது. அவர் பேசுகிற அளவுக்கு தரம் தாழ்ந்துபோய்ப் பேச முடியாது. அதனால், என்னைப் பின்பற்றும் நீங்களும் தரம் தாழ்ந்துபோகக் கூடாது. நாம் விவாதிக்கப் பல அவைகள் இருக்கின்றன. அங்கு நாம் விவாதித்துக்கொள்ளலாம். நம்மை மற்றவர்கள் தூண்டுவார்கள். ஏனென்றால், உள்ளாட்சித் தேர்தல் வருகிறது. இது பெரியாரின் மண்... இங்கு மதவெறிக்கு இடமில்லை. இது சிறுத்தைகளின் மண்... இங்கு சாதிவெறிக்கு இடமில்லை. சாதியவாதிகளும் மதவாதிகளும் வேறு வேறானவர்கள் அல்ல... சி.பி.ஐ., சி.பி.ஐ.எம் வகுப்புவாதத்துக்கு ஆதரவானவர்கள் என்று என்றாவது சொல்ல முடியுமா? சாதியவாதத்தை உள்ளடக்கியதுதான் மதவாதம். பசுப் பாதுகாப்பு இயக்கத்தினர் செய்கிற வன்முறைத் தாக்குதல்களால், வட மாநிலங்களில் முஸ்லிம்களும் தலித்களும் ஒன்றிணையும் போக்கு உருவாகிவிட்டது. அதற்குத்தான் மோடி பயப்படுகிறார். அதனால்தான், திடீர் ஞானோதயம் வந்துள்ளது. மதவாத சக்திகள், முஸ்லிம் - கிறிஸ்தவர்களுக்கான எதிரான வெறுப்பு அரசியல்... சாதியவாதச் சக்திகள், தலித் மக்களுக்கான எதிரான வெறுப்பு அரசியல் என்ற இந்த இரண்டை மட்டும் மையப்படுத்தி, அரசியலைச் சந்திக்கிற ஒரு தற்குறித்தனத்தை இங்கு நாம் பார்க்கிறோம். இதில் இருந்து இந்தத் தேசத்தைக் காக்க, நாம் இடதுசாரிகளோடு என்றும் கைகோர்த்து நிற்போம். இதில் இருந்து தமிழ்நாட்டைப் பாதுகாக்க, அண்ணன் வைகோவோடும் என்றும் கைகோர்த்து நிற்போம்’’ என்று பேசினார்.

தே.மு.தி.க - த.மா.கா இல்லாத மக்கள் நலக் கூட்டணி உள்ளாட்சித் தேர்தலிலும் தொடர்வதை உறுதி செய்துள்ளது திருமாவளவனின் 54-வது பிறந்தநாள் விழா.

- ஜோ.ஸ்டாலின்

படங்கள்: மீ.நிவேதன்

வீடியோ: வீ.நாகமணி

நன்றி : விகடன்

Posted Date : 19:43 (18/08/2016)

ஒரே கிராமத்தைச் சேர்ந்த 4 குழந்தைகள் பலியான அவலம்

noreply@blogger.com (Anonymous) — Sat, 27 Aug 2016 14:05:00 +0530

ஒரே கிராமத்தைச் சேர்ந்த 4 குழந்தைகள் பலியான அவலம்

டெங்கு காய்ச்சல் ஆய்வு மையங்களை அனைத்து அரசு மருத்துவமனைகளிலும்

தமிழக அரசு உருவாக்கவேண்டும்

திருவள்ளூர் மாவட்டம் கனகம்மாசத்திரத்திற்கு அருகிலுள்ள காவேரிராஜபுரம் கிராமத்தில் 4 குழந்தைகள் டெங்கு காய்ச்சலுக்கு பலியாகியுள்ளனர் என்கிற செய்தி மிகவும் வேதனையும் அதிர்ச்சியையும் அளிக்கிறது. கடந்த சில வாரங்களாக அக்கிராமத்தில் குறிப்பாக ஒடுக்கப்பட்ட மக்கள் வாழும் பகுதியில் குடிதண்ணீர் மற்றும் அகற்றப்படாத கழிவுகளால் 50க்கும் மேற்பட்டோர் காய்ச்சலுக்கு ஆளாகியுள்ளனர். ஆனால், உரிய நடவடிக்கையை மேற்கொள்ளாத மாவட்ட நிர்வாகத்தின் அலட்சியமும் மற்றும் சுகாதாரத் துறையினர் முன்னெச்சரிக்கையாக செயல்படாமல், டெங்கு நோயை கட்டுப்படுத்த தவறியதும்தான் ஒரே கிராமத்தை சேர்ந்த யுவராஜ், சந்தோஷ், மோகன் குமார், மோகன் ஆகிய நான்கு குழந்தைகள் உயிரிழப்பதற்கு காரணமாகும்.

கடந்த 2-8-2016 அன்று சட்டப் பேரவையில் டெங்கு காய்ச்சல் பாதிப்பு குறித்து சிறப்பு கவனஈர்ப்பு தீர்மானத்திற்கு சுகாதாரத்துறை அமைச்சர், தமிழகத்தில் டெங்கு காய்ச்சலால் மரணம் நிகழாது என்றும், அத்தகைய நிலை உருவாவதையும் தமிழக அரசு அனுமதிக்காது என்றும், இக்காய்ச்சலால் மரணம் ஏற்படாத வகையில் முதல்வர் ஜெயலலிதா பாதுகாத்து வருகிறார் என்றும் கூறியுள்ளார். ஆனால், தமிழகத்தில் கடந்த 2014இல் 1,146 பேரும், 2015இல் 2,357 பேரும் டெங்கு காயச்சலால் பாதிக்கப்பட்டுள்ளனர் என்று புள்ளிவிவரம் சொல்லுகிறது. உரிய முன்னெச்சரிக்கை நடவடிக்கையை அரசு மேற்கொள்ளாததால்தான் டெங்கு காய்ச்சல் பாதிப்பு அதிகரித்து வருவதற்கும் உயிரிழப்புகள் தொடர்வதற்கும் காரணமாகும்.

இவ்வாண்டு திருவள்ளூர் மாவட்டத்தில் மட்டும் கடந்த 20 நாட்களில் அரசு மருத்துவமனையில் 1,049 பேர் வைரஸ் காய்ச்சலால் பாதிக்கப்பட்டு சிகிச்சை பெற்றுவருவதாகவும், டெங்கு காய்ச்சலால் 4 குழந்தைகள் பலியான காவேரிராஜபுரம் கிராமத்தில் மேலும் 8 பேருக்கு டெங்கு காய்ச்சல் பாதிப்பு உள்ளதாகவும் தெரியவருகிறது. இதனால், அக்கிராமத்தைச் சார்ந்த மக்கள் அச்சத்தால் தங்களது கிராமத்தை விட்டு இடம்பெயர்ந்து செல்லும் அவலநிலை உருவாகியுள்ளது.

ஆகவே, இதற்கு தமிழக அரசு பொறுப்பேற்பதுடன் தமிழகம் முழுவதும் உரிய முன்னெரிச்சரிச்கை நடவடிக்கையை போர்க்கால அடிப்படையில் மேற்கொள்ளவேண்டும் என்றும் விடுதலைச் சிறுத்தைகள் கட்சி கேட்டுக்கொள்கிறது. அத்துடன், இத்தகைய உயிழப்புகளுக்கு உரிய நேரத்தில் சிகிச்சை மேற்கொள்ளாததற்கு, அதற்குரிய பரிசோதனைக் கூடங்கள் இல்லாததுதான் காரணமாகும். ஆகவே, டெங்கு காய்ச்சல் ஆய்வு மையத்தை அனைத்து அரசு மருத்துவமனைகளிலும் தமிழக அரசு உடனடியாக உருவாக்கவேண்டுமென்றும் காவேரிராஜபுரத்தில் உயிரிழந்த குடும்பங்களுக்கு உரிய நிவாரணமும் டெங்கு காய்ச்சலால் பாதிக்கப்பட்டு திருவள்ளூர் மற்றும் சென்னை மருத்துவமனைகளில் அனுமதிக்கப்பட்டிருக்கிற அனைவருக்கும் உயர்த்தர தீவிர சிகிச்சை அளிக்கவேண்டுமென்று விடுதலைச்சிறுத்தைகள் கட்சி தமிழக அரசை கேட்டுக்கொள்கிறது. பாதிப்புக்குள்ளான காவேரிராஜபுரம் மற்றும் அதனைச்சுற்றிள்ள கிராமங்களில் விடுதலை சிறுத்தைகள் கட்சியின் மருத்துவ தொண்டு மையம் மக்களை நேரில் சந்தித்து உரிய விழிப்புணர்வையும் உதவிகளையும் செய்யும் எனவும் தெரிவித்துக்கொள்கிறோம்.

இவண்

தொல்.திருமாவளவன்

திமுக சட்டமன்ற உறுப்பினர்களின் இடைநீக்கத்தைத் திரும்பப் பெறுக!

noreply@blogger.com (Anonymous) — Thu, 18 Aug 2016 14:01:00 +0530

திமுக சட்டமன்ற உறுப்பினர்களின்

இடைநீக்கத்தைத் திரும்பப் பெறுக!

தமிழக சட்டப்பேரவைத் தலைவருக்கு தொல்.திருமாவளவன் வேண்டுகோள்

தமிழக சட்டப்பேரவையிலிருந்து திமுக சட்டப்பேரவை உறுப்பினர்கள் 88 பேர் இடைநீக்கம் செய்யப்பட்டுள்ளனர். எதிர்க்கட்சித் தலைவர் திரு மு.க.ஸ்டாலின் அவர்கள் சபை காவலர்களால் குண்டுக்கட்டாகத் தூக்கிவந்து வெளியேற்றப்பட்டுள்ளார். இடைநீக்கம் செய்யப்பட்ட திமுக உறுப்பினர்கள் சட்டப்பேரவையில் அமைந்துள்ள எதிர்க்கட்சித் தலைவரின் அறைக்குச் செல்வதற்கும்கூட அனுமதிக்கப்படவில்லை. இந்த நடவடிக்கைகள் சட்டசபையின் மாண்புக்குக் கொஞ்சமும் உகந்தவையல்ல என்பதோடு தமிழ்நாட்டில் நடப்பது ஜனநாயக ஆட்சிதானா என்ற ஐயத்தையும் எழுப்பியுள்ளன.

திமுக உறுப்பினர்களின் இடைநீக்கத்தை ரத்துசெய்து சட்டப்பேரவைக் கூட்டத் தொடர் அமைதியாக நடைபெற மாண்புமிகு பேரவைத் தலைவர் நடவடிக்கை எடுக்க வேண்டும் என விடுதலைச் சிறுத்தைகள் கட்சியின் சார்பில் வலியுறுத்துகிறோம்.

நமது அரசியலமைப்புச் சட்டம் சில சிறப்புரிமைகளை சட்டப் பேரவைத் தலைவருக்கு வழங்கியுள்ளது. ஆனால் அந்த அதிகாரத்தை ஜனநாயகத்தைக் காப்பதற்குத்தான் பயன்படுத்த வேண்டும். ஒட்டுமொத்தமாகப் பேரவை உறுப்பினர்களை இடைநீக்கம் செய்வது அவர்களுக்கு வாக்களித்துத் தேர்ந்தெடுத்த மக்களை அவமதிப்பதற்கு ஒப்பானதாகும். இதை பேரவைத் தலைவர் அவர்கள் கவனத்தில் கொள்ளவேண்டும் என கேட்டுக்கொள்கிறோம்.

சட்டப்பேரவையில் உறுப்பினர்கள் பேசுவதை அவைக் குறிப்பிலிருந்து நீக்கும் அதிகாரம் பேரவைத் தலைவருக்கு உள்ளது. அது ஆதாரமற்ற கருத்துகள் அவைக் குறிப்பில் இடம்பெறக்கூடாது என்பதற்கான பாதுகாப்பே ஆகும். ஆனால் அந்த அதிகாரத்தை, அரசாங்கத்தின் செயல்பாடுகள் குறித்து விமர்சனமாக எதிர்க்கட்சி உறுப்பினர்கள் எதைப் பேசினாலும் அதை நீக்குவதற்குப் பயன்படுத்துவது முறையல்ல.

இது தகவல் தொழில்நுட்பம் வளர்ச்சி பெற்ற காலமாகும். அரசாங்கத்தின் செயல்பாடுகள் எல்லாமே குடிமக்களுக்குத் தெரிய வேண்டும் என்பதற்காகத்தான் தகவல் அறியும் உரிமை சட்டம் இயற்றப்பட்டுள்ளது. பாராளுமன்ற நிகழ்ச்சிகளை நேரலையாக தொலைக்காட்சியில் ஒளிபரப்புவதுபோல சட்டப் பேரவை நிகழ்ச்சிகளையும் ஒளிபரப்புவது காலத்தின் கட்டாயமாகும். அதற்கான நடவடிக்கைகளை விரைந்து மேற்கொள்வதன்மூலமே சட்டப்பேரவை விவாதங்களின் தரத்தை உயர்த்தமுடியும்.

தமிழகத்தின் நதிநீர் உரிமைகள் பறிக்கப்பட்டு லட்சக்கணக்கான விவசாயிகள் அல்லல்படும்போது அதற்காக அவர்கள் கடையடைப்புப் போராட்டம் நடத்துகிற நேரத்தில் தமிழகத்தின் ஒற்றுமையை வெளிப்படுத்தவேண்டியது மிகவும் அவசியமாகும். இந்த நேரத்தில் எதிர்க்கட்சி உறுப்பினர்களை இடைநீக்கம் செய்திருப்பது கர்னாடக அரசுக்கு சாதகமாக அமைந்துவிடும். இவற்றையெல்லாம் கருத்தில்கொண்டு இடைநீக்க உத்தரவை ரத்து செய்ய முன்வரவேண்டுமென பேரவைத் தலைவரை மீண்டும் வலியுறுத்துகிறோம்.

இவண்

தொல்.திருமாவளவன்

மதச்சார்பின்மை பாதுகாப்பு மாநாடு - தீர்மானங்கள்

noreply@blogger.com (Anonymous) — Wed, 17 Aug 2016 13:58:00 +0530

விடுதலைச் சிறுத்தைகள் கட்சி

மதச்சார்பின்மை பாதுகாப்பு மாநாடு

17-08-2016

தீர்மானம்

ஆகஸ்டு 17 - எழுச்சித்தமிழர் பிறந்த நாள் - தமிழர் எழுச்சி நாளையொட்டி 17-8-2016 அன்று சென்னை, இராயப்பேட்டை, ஒய்.எம்.சி.ஏ. திடலில் விடுதலைச் சிறுத்தைகள் கட்சி ஒருங்கிணைத்த மதச் சார்பின்மை பாதுகாப்பு மாநாடு நடைபெற்றது. தலைவர் தொல்.திருமாவளவன் அவர்கள் தலைமையில் நடைபெற்ற இம்மாநாட்டில் நிறைவேற்றப்பட்ட தீர்மானம் வருமாறு:

உலகெங்கும் வலதுசாரி சக்திகளின் கை ஓங்கியுள்ள காலத்தில், இந்தியாவில் ஆட்சிப்பொறுப்பேற்றிருக்கும் பாரதிய சனதா கட்சி இந்த சமூகத்தின் அனைத்துப் பகுதிகளையும் காவிமயமாக்கும் முயற்சியில் தீவிரமாக ஈடுபட்டுள்ள சூழலில் இந்திய சனநாயகத்தைக் கொடுங்கோன்மை இருள் சூழ்ந்து அச்சுறுத்திக் கொண்டிருக்கும் நிலையில், இம்மாநாடு கூட்டப்பட்டுள்ளது.

பா.ச.க. ஆட்சிக்கு வந்ததிலிருந்து கல்வி நிறுவனங்களையும் ஆராய்ச்சி மையங்களையும் தனது பிடிக்குள் கொண்டுவருவதில் தீவிரமாக இருக்கிறது.

துணைவேந்தர் நியமனங்களிலும் தன்னாட்சி அமைப்புகளின் தலைமைப் பொறுப்புகளிலும் வரலாற்று ஆராய்ச்சி மையங்களிலும் இந்துத்துவ சார்பாளர்களே பொறுப்புகளில் அமர்த்தப்படுகின்றனர்.

எழுத்தாளர்கள், கலைஞர்கள் குறிவைத்துத் தாக்கப்படுகின்றனர். பேராசிரியர் கல்புர்கி, நரேந்திர தபோல்கர், கோவிந்த் பன்சாரே ஆகியோர் படுகொலை செய்யப்பட்டனர். அந்தப் படுகொலைகளில் ஒரு மதவாத அமைப்பே ஈடுபட்டது என்பது காவல்துறையால் வெளிப்படுத்தப்பட்டிருக்கிறது.

சிந்தனையாளர்கள் மீது தொடுக்கப்பட்ட தாக்குதல்களுக்கு எதிர்ப்புத் தெரிவித்து நாடு முழுவதும் எழுத்தாளர்களும் கலைஞர்களும் தமக்கு வழங்கப்பட்ட விருதுகளை அரசிடமே திரும்ப ஒப்படைத்து போராட்டங்களை நடத்தினர்.

இந்திய இலக்கியம், பண்பாடு ஆகியவை குறித்து மதிக்கத்தக்க ஆய்வுகளை வழங்கியுள்ள அயல்நாட்டு அறிஞர்களின் நூல்களும்கூட தடை செய்யப்பட்டன. அவர்களும் இந்துத்துவ இயக்கங்களால் அச்சுறுத்தப்பட்டனர்.

2014ஆம் ஆண்டு நாடாளுமன்றத் தேர்தலில் பெரும்பான்மை இடங்களைப் பெற்று பா.ச.க. ஆட்சி அமைத்தது முதற்கொண்டு அதன் தாக்குதல் தீவிரமாகியுள்ளது. இந்தத் தேர்தலில் பொது சிவில் சட்டம், காஷ்மீருக்கு சிறப்பு அந்தஸ்து, இராமர் கோவில் பிரச்சனை முதலானவற்றை வெளிப்படையாக முன்வைத்து பிரச்சாரம் மேற்கொண்டதால் மக்கள் தமக்கு அளித்த ஆதரவை பிரச்சனைக்குரிய இந்த மூன்று நோக்கங்களுக்கு அளிக்கப்பட்ட ஒப்புதலாக அது கருதி வருகிறது. இதனால், ஆர்.எஸ்.எஸ். அமைப்பின் நீண்ட நாள் கனவான இந்து ராச்சியத்தை இங்கே உருவாக்குவதற்கு அது முனைகிறது.

1990களில் பிற்படுத்தப்பட்ட மக்களின் இடஒதுக்கீட்டை வெளிப்படையாக எதிர்த்ததுபோல அல்லாமல், எண்ணிக்கை பலம் கொண்ட சாதிகளின் ஆதரவைத் திரட்டுவதற்கு அது இப்போது பல்வேறு உத்திகளைக் கையாண்டு வருகிறது. மத அடிப்படைவாதமும், சாதி அடிப்படைவாதமும் ஒருங்கிணைந்து உருவெடுத்திருப்பதுதான் இன்றைய இந்துத்துவம். அதன் இலக்கு மதச் சிறுபான்மையினர் மட்டுமல்ல தலித் மக்களும்தான்.

பா.ச.க. ஆட்சி அமைந்ததிலிருந்து நாடு முழுவதும் தலித் மக்கள் குறிவைத்துத் தாக்கப்படுகின்றனர். அவர்கள் மீதான வன்கொடுமைகளின் எண்ணிக்கையிலும் தன்மையிலும் பெரும் மாற்றம் ஏற்பட்டுள்ளது. பசு பாதுகாப்பு என்ற பெயரில் இசுலாமியர்கள்தான் முன்னர் தாக்கப்பட்டனர். இப்போதோ தலித்துகளும் அந்தந்தப் பகுதி ஆதிக்க சாதியினரால் தாக்கப்படுகின்றனர். தலித்துகளுக்கு எதிரான சாதிய வன்முறையை மதம் என்கின்ற பெயரால் அவர்கள் நிகழ்த்துகின்றனர்.

இந்த மதவாத, சாதியவாத கூட்டணியை சரியாக அடையாளம் காண வேண்டியது மதச்சார்பற்ற சக்திகளின் கடமையாகும். மதவெறியை மட்டும் எதிர்த்துக்கொண்டு சாதிவெறியைக் கண்டும் காணாமல் இருப்பவர்களை மதச்சார்பற்றவர்கள் என நாம் ஏற்க முடியாது.

இந்திய அரசியலமைப்புச் சட்டத்தால் பாதுகாக்கப்பட்டுள்ள மதச்சார்பின்மைக்கு மிகப் பெரும் அச்சுறுத்தல் ஏற்பட்டுள்ள இந்தச் சூழலில் நாடு முழுவதும் உள்ள மதச்சார்பற்ற சக்திகள், மதவெறி, சாதிவெறி இணைந்த இந்துத்துவத்தை எதிர்த்து ஓரணியில் திரளுவது இன்றியமையாததாகும்.

இதற்காகத்தான் திருச்சியில் ஜூலை 16, 2016 அன்று கூடிய எமது மாநிலச் செயற்குழுவில் பின்வரும் தீர்மானம் நிறைவேற்றப்பட்டது:

“மத்தியில் ஆளும் பாஜக அரசு புரட்சியாளர் அம்பேத்கர் வகுத்தளித்த அரசியலமைப்புச் சட்டத்தின் அடிநாதமாக உள்ள மதச்சார்பின்மைத் தத்துவத்தை அழிக்கும் வகையில் பல்வேறு நடவடிக்கைகளை எடுத்து வருகிறது. மதச் சிறுபான்மையினருக்கு எதிராகவும் தலித் மக்களுக்கு எதிராகவும் ஆர்எஸ்எஸ் உள்ளிட்ட இந்துத்துவ அமைப்புகள் மேற்கொண்டு வரும் வெறுப்புப் பிரச்சாரத்தை ஊக்குவித்து, கட்டமைப்புரீதியான வன்முறையை அதிகரிப்பதற்கு ஆதரவளித்து வருகிறது. பட்ஜெட்டில் தலித் மக்களின் நலத் திட்டங்களுக்கான நிதியைக் குறைத்தும், ஷிசிஷிறி/ ஜிஷிறி

முதலான திட்டங்களை ரத்துசெய்தும் மிகப்பெரும் துரோகத்தை இழைத்து வருகிறது; சட்டத்துக்குப் புறம்பான வழிமுறைகளைக் கையாண்டு எதிர்க்கட்சிகள் ஆளும் மாநில அரசுகளை முடக்க முயற்சிக்கிறது.

இந்திய நாட்டின் மதச்சார்பற்ற கொள்கையை அழிக்க முற்படும் மத்திய அரசின் போக்கைக் கண்டிக்காததோடு அந்த அரசுக்கு மக்களவையிலும் மாநிலங்களவை யிலும் ஆதரவளிப்பதன் மூலம் தமிழ்நாட்டை ஆளும் அதிமுகவானது பாஜகவின் கூட்டாளியாகச் செயல்பட்டு வருகிறது. இது தமிழ்நாட்டில் மெல்ல மெல்ல இந்துத்துவ சக்திகள் வலுப்பெற ஊக்கமளிக்கிறது.

இந்நிலையில், புரட்சியாளர் அம்பேத்கர், தந்தை பெரியார், பெருந்தலைவர் காமராசர் வழியில் தமிழ்நாட்டில் மதச்சார்பற்ற சக்திகளை ஒன்றிணைக்க வேண்டிய வரலாற்றுக் கடமையை விடுதலைச் சிறுத்தைகள் கட்சியின் இம்மாநிலச் செயற்குழு உணர்கிறது. அத்தகையதொரு பரந்த அணி சேர்க்கையை உருவாக்குவதற்கான உத்திகளை வகுத்துச் செயல்படுத்திட இம்மாநிலச் செயற்குழு உறுதியேற்கிறது.”

இந்தத் தீர்மானத்தைத் தொடர்ந்துதான் மதச்சார்பின்மை பாதுகாப்பு மாநாடு இன்று கூட்டப்பட்டுள்ளது.

2014ஆம் ஆண்டைவிட 2015ஆம் ஆண்டில் மதவாத வன்முறைகளின் எண்ணிக்கை 17 விழுக்காடு உயர்ந்துள்ளது என புள்ளிவிவரங்கள் காட்டுகின்றன. பா.ச.க. ஆட்சி செய்யும் மத்திய பிரதேசம், ராஜஸ்தான், மகாராஷ்டிரா ஆகிய மாநிலங்களில் மதவாத வன்முறைகள் ஒப்பீட்டளவில் அதிக எண்ணிக்கையில் நடந்துள்ளன. தலித்துகள் மீதான வன்கொடுமைகளும் மேற்குறிப்பிட்ட பா.ஜ.க. ஆளும் மூன்று மாநிலங்களில் அதிகரித்திருப்பதை புள்ளிவிவரங்கள் காட்டுகின்றன.

பா.ஜ.க. ஆட்சியில் எழுச்சி பெற்றுள்ள வகுப்புவாதம் என்பது மதச்சிறுபான்மை யினர்களை மட்டுமின்றி தலித்துகளையும் எதிரிகளாகவே கட்டமைக்கிறது என்ற உண்மையைத்தான் இந்தப் புள்ளி விவரங்களும் தற்போது குஜராத் மாநிலம் உனா என்ற கிராமத்தில் நடைபெற்ற நிகழ்வுகளும் காட்டுகின்றன.

இந்துத்துவத்தின் பொருளாதார அணுகுமுறை என்பது பெரும்பான்மை மக்களை ஓட்டாண்டிகளாக்கி ஒரு சிலரது கைகளில் மட்டும் நாட்டின் வளங்களையெல்லாம் கொண்டுபோய்ச் சேர்க்கிற, தாராளவாத தனியார்மயக் கொள்கையாக இருக்கிறது. உலகமயமாதல் என்ற பெயரில் இன்று மேற்கொள்ளப்பட்டிருக்கும் பொருளாதாரச் சுரண்டலுக்கு அது அனுசரணையாக இருக்கிறது. பா.ச.க.வின் அரசியல் கொள்கையோ, இந்திய அரசியலமைப்புச் சட்டம் உறுதிப்படுத்தியுள்ள உரிமைகளைப் பறிப்பதாகவும், பாராளுமன்ற சனநாயக முறையை நீர்த்துப் போகச் செய்து அதிபர் ஆட்சிமுறையை அமைப்பதாகவும், மாநில உரிமைகளைப் பறித்து மத்தியில் ஒரு சர்வாதிகார அரசை நிறுவுவதாகவும் உள்ளது. அதன் பண்பாட்டு அணுகுமுறை ஒரே தேசம், ஒரே பண்பாடு என்பதாக இந்திய நாட்டில் நிலவிவரும் பன்மைத்துவத்தை அழிப்பதாக, பெண்களின் உரிமைகளைப் பறித்து அவர்களை ஆணாதிக்கச் சிறைக்குள் முடக்குவதாகவும், மதச் சிறுபான்மையினரை அந்நியர்களாகவும், தேச விரோதிகளாகவும் கட்டமைப்பதாகவும், தலித் மக்களை வர்ணாசிரமத்தின்கீழ் நிரந்தர அடிமைகளாக மாற்றுவதாகவும் உள்ளது.

இந்தியாவில் வலுப்பெற்றுவரும் இந்துத்துவம் என்ற மதவாத, சாதியவாத கூட்டணியை முறியடிப்பதன் மூலமே இந்திய சனநாயகத்தை, அரசியலமைப்புச் சட்டத்தில் உறுதிப்படுத்தப்பட்ட மதச் சார்பின்மையை நாம் காப்பாற்ற முடியும்.

மதச் சார்பின்மையைப் பாதுகாப்பதென்பது மதமும் சாதியும் ஒருங்கிணைந்த கூட்டணியை எதிர்த்து முறியடிப்பதுதான். அந்த வரலாற்றுக் கடமையை நிறைவேற்ற சனநாயக சக்திகளை அறைகூவி அழைக்கிறோம்.

இவண்

தொல்.திருமாவளவன்

ஆம்னஸ்டி இண்டர்நேஷனல் அமைப்புமீது தேசத்துரோக வழக்கு தொல்.திருமாவளவன் கண்டனம்

noreply@blogger.com (Anonymous) — Tue, 16 Aug 2016 14:37:00 +0530

ஆம்னஸ்டி இண்டர்நேஷனல் அமைப்புமீது தேசத்துரோக வழக்கு

தொல்.திருமாவளவன் கண்டனம்

~~~~~~~~

உலகப் புகழ்பெற்ற மனிதௌரிமை அமைப்புகளில் ஒன்றான ஆம்னஸ்டி இண்டர்நேஷனல் அமைப்பின் இந்தியப் பிரிவின்மீது 'பகமையைத் தூண்டுதல், கலவரம் செய்தல், தேசத்துரோகம்' உள்ளிட்ட குற்றங்கள் புரிந்ததாக பெங்களூரு போலீஸார் வழக்குப் பதிவுசெய்துள்ளனர். சுதந்திர தினத்தன்று மேற்கொள்ளப்பட்டிருக்கும் கருத்துரிமைக்கு எதிரான இந்தத் தாக்குதலை விடுதலைச் சிறுத்தைகள் கட்சியின் சார்பில் வன்மையாகக் கண்டிக்கிறோம்.

ஆம்னஸ்டி இண்டர்நேஷனல் அமைப்பு காஷ்மீர் பிரச்சனை தொடர்பாக கருத்தரங்கு ஒன்றை நடத்தியுள்ளது. பாதிப்புக்குள்ளான காஷ்மீர் மாநிலத்த்வர் சிலரை அழைத்துவந்து தமக்கு நேர்ந்த கொடுமைகளை நேரடியாக எடுத்துரைக்கச் சொல்லியுள்ளனர். சட்டவிரோதமாக ராணுவத்தினரால் சுட்டுக்கொல்லப்பட்ட ஷாஹாத் அஹமத் கான் என்பவரின் குடும்பத்தினரும் இந்த நிகழ்ச்சியில் பங்கேற்றுள்ளனர். இந்தக் கொலையில் ஈடுபட்ட ராணுவத்தினர் ஐந்துபேர் குற்றம் நிரூபிக்கப்பட்டு ஆயுள்தண்டனை விதிக்கப்பட்டுள்ளனர். இந்த நிகழ்ச்சி குறித்து முறைப்படி காவல்துறையினருக்குத் தகவலும் தெரிவிக்கப்பட்டுள்ளது.

பாஜகவின் மாணவர் அமைப்பான ஏபிவிபியைச் சேர்ந்த சிலர் அளித்த புகாரின் அடிப்படையிலேயே பெங்களூரு போலீஸார் வழக்கு பதிந்துள்ளனர். இந்துத்துவ அமைப்பு ஒன்றின் நெருக்குதலுக்கு கர்னாடகத்தை ஆளும் காங்கிரஸ் அரசு பணிந்துபோவதும், தயக்கமில்லாமல் வழக்கு போடுவதும் வியப்பளிக்கின்றன. இந்த நிகழ்வில் சட்டவிரோதமான எந்தவொரு பேச்சும் இடம்பெறாத நிலையில் இப்படி வழக்குபதிவு செய்திருப்பது கருத்துரிமை குறித்த உச்சநீதிமன்ற தீர்ப்புகளை மீறுவதாக உள்ளது.

இந்தியாவெங்கும் பல்கலைக்கழக வளாகங்களை காவிமயமாக்குவதோடு கல்விச்சூழலையும் சீரழித்துவருகின்ற ஏபிவிபி அமைப்பு இப்போது மனித உரிமை அமைப்புகளைக் குறிவைக்கத் தொடங்கியிருக்கிறது. பாஜக ஆட்சிக்கு வந்தபிறகு கிரீன்பீஸ் அமைப்புக்குக் கடுமையான நெருக்கடி தரப்பட்டது. இப்போது ஆம்னஸ்டி இண்டர்நேஷனல் அமைப்பைக் குறிவைத்துள்ளனர்.

இந்தியக் குடியரசுத் தலைவர் தனது சுதந்திரதின உரையில் ' சகிப்புத்தன்மையற்ற பிரிவினைவாத சக்திகள் தமது கோரமுகங்களை உயர்த்த முயற்சிக்கின்றன ' என எச்சரித்திருந்தார். அதை மெய்ப்பிக்கும்விதமாகவே ஆம்னஸ்டி இண்டர்நேஷனல் அமைப்பின்மீதான தாக்குதல் நடந்துள்ளது. அந்த அமைப்பின்மீது போடப்பட்டுள்ள பொய் வழக்குகளை உடனடியாக ரத்துசெய்யவேண்டும் என வலியுறுத்திக் கேட்டுக்கொள்கிறோம்.

இவண்

தொல்.திருமாவளவன்

தலைவர் பிறந்த நாள் நிகழ்ச்சிகள்

noreply@blogger.com (Anonymous) — Tue, 16 Aug 2016 13:09:00 +0530

ஆகஸ்டு 17 - தலைவர் தொல்.திருமாவளவன்
பிறந்த நாள் நிகழ்ச்சிகள்

விடுதலைச் சிறுத்தைகள் கட்சியின் தலைவரும் முன்னாள் நாடாளுமன்ற உறுப்பினருமான எழுச்சித்தமிழர் தொல்.திருமாவளவன் அவர்களின் பிறந்த நாளை ஆகஸ்டு 17 அன்று விடுதலைச் சிறுத்தைகள் கட்சியின் சார்பில் ஒவ்வோர் ஆண்டும் மிகச் சிறப்பாகக் கொண்டாடி வருகிறோம். அந்நாளில் வெகுமக்களின் கோரிக்கைகளை உள்ளடக்கியும் சமூக நலனை முன்னிறுத்தியும் ஒவ்வோர் ஆண்டும் மையப்படுத்தப்பட்ட நிகழ்ச்சிகளை நடத்தி வருகிறோம். அதேபோல இவ்வாண்டும் அவரது 54வது பிறந்த நாளை முன்னிட்டு மதச்சார்பின்மை பாதுகாப்பு மாநாட்டை நடத்தவிருக்கிறோம்.

தலைவர் தொல்.திருமாவளவன் அவர்கள் பிறந்த நாளில் நிகழ்ச்சிகளில் பங்கேற்கும் விவரம் வருமாறு:

அன்று காலை 8.30 மணியளவில் புரட்சியாளர் அம்பேத்கர் மணிமண்டபத்தில் அம்பேத்கர் சிலைக்கு மாலை அணிவிக்கிறார்.
அதனைத் தொடர்ந்து 8.40 மணிக்கு சென்னை சாந்தோமில் உள்ள காதுகேளாதோர் பள்ளியில் உள்ள மாணவ, மாணவிகளுக்கு காலை உணவு வழங்குகிறார்.
10 மணியளவில் வெளிச்சம் தொலைக்காட்சி நிகழ்ச்சியில் பங்கேற்கிறார்.
அதனையடுத்து 11 மணிக்கு கோயம்பேடு பேருந்து நிலையம் எதிரில் உள்ள அம்பேத்கர் சிலைக்கு மாலை அணிவித்துவிட்டு 12 மணியளவில் கோயம்பேடு காய், கனி சந்தையில் உள்ள தொழிலாளர்களுக்கு மதிய உணவு வழங்குவதுடன் பல்வேறு நலத் திட்ட உதவிகளையும் வழங்குகிறார்.
அதன் பிறகு நண்பகல் 1 மணியளவில் அசோகர் நகர் அம்பேத்கர் திடலில் கட்சித் தொண்டர்களின் வாழ்த்துக்களைப் பெறுகிறார்.
பிற்பகல் 3 மணியளவில் இராயப்பேட்டை ஒய்.எம்.சி.ஏ. திடலில் நடைபெறும் மதச்சார்பின்மை பாதுகாப்பு மாநாட்டை தலைமையேற்று நடத்துகிறார். மாநாடு பல்வேறு கலை நிகழ்ச்சிகளுடன் தொடங்குவதுடன் மக்கள் நலக் கூட்டணியின் உறுப்புக்கட்சிகளான மதிமுகவின் பொதுச் செயலாளர் திருமிகு வைகோ, இந்திய பொதுவுடைமைக் கட்சியின் (மார்க்சிஸ்ட்) மாநிலச் செயலாளர் ஜி.இராமகிருஷ்ணன், இந்தியப் பொதுவுடைமைக் கட்சியின் மாநிலச் செயலாளர் இரா.முத்தரசன் ஆகியோர் கலந்துகொண்டு சிறப்புரையாற்றுகிறார்கள்.

இவண்

கு.கா.பாவலன்

“ஸ்டாலின் இன்னொரு ஜெயலலிதா!”

noreply@blogger.com (Anonymous) — Thu, 11 Aug 2016 14:27:00 +0530

“ஸ்டாலின் இன்னொரு ஜெயலலிதா!”

``ஊடக வலிமை இல்லாத எந்த ஒரு கட்சியும் அரசியல் வலிமை பெற முடியாது. திரைப்படங்கள் வெற்றிகரமாக ஓடவேண்டும் என்றால்கூட, ஊடகம் இப்போது தேவைப்படுகிறது. திரைப்படத்துக்கே அப்படி என்றால், அரசியல் கட்சிகளுக்கு நிச்சயம் ஊடகம் தேவை. அதனால்தான் எங்களுக்கான குரலாக `வெளிச்சம்' என்ற தொலைக்காட்சி சேனலை ஆரம்பித்திருக்கிறோம்''.

`தொல்.திருமாவளவன் தி.மு.க-வை நோக்கி நகர்கிறார், மக்கள் நலக் கூட்டணியில் இருந்து விலகுகிறார்' என செய்திகள் வந்துகொண்டிருக்க, அவரோ தங்கள் தொலைக்காட்சிக்கான நிகழ்ச்சித் தயாரிப்புப் பணிகளில் பரபரப்பாக இருக்கிறார்.

``திரைப்படம், ஊடகம் பற்றி நீங்கள் பேசியதால், முதலில் `கபாலி'யில் இருந்தே ஆரம்பிப்போம். படம் பார்த்தீர்களா?''

`` `கபாலி' எனக்கு மிகவும் பிடித்திருந்தது. இரு குழுக்களுக்கு இடையே நடக்கும் மோதல் பற்றிய கதைதான் படம். இதில் எங்கேயுமே சாதி முன்நிறுத்தப்படவில்லை; தமிழர் அடையாளம், கொத்தடிமைக் கலாசாரம்தான் முன்நிறுத்தப்படுகின்றன. ஆனால், பா.இரஞ்சித் தலித் சமூகத்தைச் சார்ந்த இயக்குநர் என்ற காரணத்தினாலேயே, அவர் மீது விமர்சனம் வைக்கிறார்கள்.

ரஜினிகாந்துக்குத் தெரியாமல் இரஞ்சித்தால் ஒரு வசனம்கூட படத்தில் பேசவைத்திருக்க முடியாது. சாதி என்ற எல்லைகளைக் கடந்து, சினிமா என்ற அடிப்படையில்தான் படத்தைப் பார்த்திருக்கிறார் ரஜினிகாந்த். இந்த விமர்சனங்களை எல்லாம் கடந்து படம் வெற்றிகரமாக ஓடிக்கொண்டிருக்கிறது. கொச்சையான விமர்சனங்களால் ரஜினிகாந்தையும் இரஞ்சித்தையும் வீழ்த்த முடியாது. படம் பார்த்து முடித்ததுமே இரஞ்சித்தை அழைத்து வாழ்த்தினேன். மகிழ்ச்சி.''

``தற்போது தமிழ்நாடு சட்டமன்றத்தில் நடப்பவற்றைக் கவனிக்கிறீர்களா?''

``இது சட்டமன்றம் அல்ல; பஜனை மடம். அ.தி.மு.க-வினர் மக்கள் பிரச்னைகளைப் பற்றிப் பேசுவதைவிட... முதலமைச்சருடைய புகழ் பாடுவதற்குதான் அதிக நேரத்தைச் செலவழிக்

கிறார்கள். முக்கியப் பிரச்னைகளில் எல்லாம் தி.மு.க தலைவரை வசைபாடுவது, ஒருமையில் விளிப்பது, அதன் மூலம் சட்டமன்றத்தில் கூச்சல் குழப்பதை ஏற்படுத்துவதுதான் அவர்கள் நோக்கமாக இருக்கிறது. இதனால், மக்களின் வரிப்பணமும் காலமும் நேரமும்தான் வீணாகின்றன. சபாநாயகர், ஆளும் கட்சி தொண்டரைப்போல செயல்படுகிறார். எதிர்க்கட்சியும் ஆளும் கட்சியும் மக்களுக்கு ஏதாவது செய்ய சட்டமன்றத்தில் வாதிட வேண்டும். எதிர்க்கட்சியும் அடிக்கடி வெளிநடப்பு செய்யாமல் எதிர்ப்பை, கண்டனத்தை அங்கேயே பதிவுசெய்துவிட்டு சட்டமன்றத்தில் பங்கேற்க வேண்டும் என்றுதான் பொதுமக்கள் எதிர்பார்க்கிறார்கள்; நாங்களும் எதிர்பார்க்கிறோம்.''

``உள்ளாட்சித் தேர்தல் நெருங்குகிறது. மக்கள் நலக் கூட்டணியில் தே.மு.தி.க இன்னும் நீடிக்கிறதா?''

``தே.மு.தி.க பற்றி இப்போதைக்கு நான் எந்தக் கருத்தையும் சொல்ல முடியாது. ஆனால், ம.தி.மு.க., இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, விடுதலைச் சிறுத்தைகள் ஆகிய நான்கு கட்சிகளும் இணைந்தே இந்த உள்ளாட்சித் தேர்தலைச் சந்திக்கும். சட்டமன்றத் தேர்தலின்போது எங்களோடு தே.மு.தி.க-வும் தமிழ் மாநில காங்கிரஸும் தொகுதி உடன்பாடு மட்டுமே வைத்துக்கொண்டன. அதனால்தான் நாங்கள் `தே.மு.தி.க - மக்கள் நலக் கூட்டணி - த.மா.க' என பெயர் வைத்தோம். மக்கள் நலக் கூட்டணியில் அவர்கள் ஐக்கியமாகியிருந்தால், அவர்களையும் சேர்த்து `மக்கள் நலக் கூட்டணி' என்றே முன்னிலைப்படுத்தியிருப்போம். சட்டமன்றத் தேர்தல் முடிந்துவிட்டது. இனியும் அவர்கள் எங்களோடு தொடர வேண்டும் என்ற எந்தக் கட்டாயமும் இல்லை. அதே சமயம் விலகி நிற்பதாலேயே, அவர்கள் வெளியேறிவிட்டதாகவும் சொல்லிவிட முடியாது.''

`` `எனது ராஜதந்திரத்தால்தான் தி.மு.க தோல்வியைச் சந்தித்தது' என ம.தி.மு.க செயல்வீரர்கள் கூட்டத்தில் வைகோ பேசியதாக...''

குறுக்கிடுகிறார். ``அந்த அவையில் நானும் இல்லை; என் கட்சித் தொண்டர்களும் இல்லை. இந்தச் செய்தி, ஊடகத்தில் வந்தது... படித்தேன். அன்று மாலையோ, அடுத்த நாளோ அவரோடு பேசும் வாய்ப்பு கிடைத்தது. `என் தொண்டர்களுக்குப் புரியவைப்பதற்காக, பல விஷயங்களைப் பேசினேன். அதில் இந்தக் கூட்டணி அமைத்ததே ஒரு ராஜதந்திரம் என்று சில விஷயங்களைப் பேசினேனே தவிர, இதுபோல நான் சொல்லவில்லை' என என்னிடத்தில் சொன்னார். அதன் பிறகு இந்த மறுப்புச் செய்தியும் ஊடகத்தில் பதிவு ஆகியிருக்கிறது.''

``தி.மு.க தலைவர் கருணாநிதியுடன் இருந்த நட்பு மு.க.ஸ்டாலினுடன் உங்களுக்கு இல்லை என்றும், அவர் தான் கூட்டணியில் விடுதலைச் சிறுத்தைகள் வேண்டாம் என்கிற முடிவை எடுத்ததாகவும் சொல்கிறார்களே?''

``எந்தத் தனிநபர் மீதும் ஆதாரம் இல்லாத குற்றச்சாட்டைச் சொல்லக் கூடாது. ஆனால், ஓர் உண்மையை இங்கு நான் சொல்ல வேண்டும். ஸ்டாலின் அவர்கள், கலைஞரை முன்மாதிரியாக வைத்துச் செயல்படுகிறார் என்பதைவிட, ஜெயலலிதாவை முன்மாதிரியாக வைத்துத்தான் செயல்படுகிறார். கலைஞர் அவர்கள், பெரியார் கொள்கை, மூடநம்பிக்கை எதிர்ப்பு, தலித்கள் போன்ற விளிம்பு நிலை சமூகத்தினரை அரவணைப்பது, பாரதிய ஜனதா கட்சி ஒரு மதவாதக் கட்சி எனச் சொல்கிற துணிச்சல் என பல பன்முகங்களைப் பெற்றிருக்கிறார்.

ஸ்டாலினைப் பொறுத்தவரையில், இதில் இருந்து விலகி ஜெயலலிதாவைப் போல இந்துத்துவத்தை விமர்சிக்காமல், பெரியார் கொள்கைகளைத் தூக்கிப் பிடிக்காமல், ஒடுக்கப்பட்ட மக்களுக்காக நிற்கிறோம் எனக் காட்டிக்கொள்ளாமல், ஒரு வெற்றியைப் பெற வேண்டும் என நினைக்கிறார். இத்தனை ஆண்டுகளாக பெரியார் கருத்துக்களைச் சிலாகித்துப் பேசியோ, ஒடுக்கப்பட்ட மக்களுக்காக உரத்துக் குரல்கொடுத்தோ, ஈழத்துப் பிரச்னையில் கலைஞர் காட்டிய வேகத்தையோ, செயலையோ ஸ்டாலினிடம் நான் பார்க்கவில்லை. இவை எல்லாம் இனி அரசியலில் எடுபடாது என ஸ்டாலின் நினைக்கிறார். பா.ஜ.க., அ.தி.மு.க எப்படிப்பட்ட அரசியல் செய்கிறதோ, அது மாதிரியான ஓர் அரசியலைச் செய்ய வேண்டும் என ஸ்டாலின் எண்ணுகிறார். முக்கியமாக, தோழமைக் கட்சிகளுக்கு நிறையத் தொகுதிகளைக் கொடுத்து ஊக்கப்படுத்தக் கூடாது, எல்லாருக்கும் ஒரு ஸீட் கொடுப்பது, எல்லோரையும் தன் கட்டுப்பாட்டுக்குள் வைத்திருக்க நினைப்பது என ஜெயலலிதாவை ரோல்மாடலாகக்கொண்டு ஸ்டாலின் செயல்படுவதுபோல தெரிகிறது. என்னைப் பொறுத்தவரை ஸ்டாலின், இன்னொரு ஜெயலலிதா!''

``ஸ்டாலினை விமர்சிக்கிறீர்கள். அதேசமயம் எதிர்காலத்தில் தி.மு.க-வுடன் சேர வாய்ப்பு இருப்பதை மறுக்க முடியாது என்றும் சொல்கிறீர்களே?''

``நான் சொன்ன சம்பவங்களை எல்லாம் பெரிய பகை எனச் சொல்ல முடியாது. இது அணுகுமுறையில் ஏற்படக்கூடிய ஓர் இடைவெளி; பகைவெளி அல்ல. பொதுநலன் கருதி சில நேரங்கள் சிலரோடு கைகோக்கும் சூழல் நிலவும். நாங்களும் எந்த இடத்திலும் எதிர்காலத்தில் தி.மு.க-வோடு உறவே கிடையாது எனச் சொல்லவும் கிடையாது; சொல்லவும் மாட்டோம்.''

``சட்டமன்றத் தேர்தல் தோல்விக்குப் பிறகு விஜயகாந்த்தைச் சந்தித்தபோது என்ன சொன்னார்?''

``எல்லா தலைவர்களும் விஜயகாந்த் கட்சி அலுவலகத்தில் ஒன்றாகச் சந்தித்துப் பேசினோம். விஜயகாந்த் இந்தத் தோல்வியை பெரிய பொருட்டாகவே எடுத்துகொள்ளவும் இல்லை; இதற்காக வருத்தப்பட்டதாகவும் தெரியவில்லை. அவர் யார் மீதும் குற்றம் சுமத்தவில்லை. ஆனால், `நீங்க எலெக்‌ஷன்ல நின்னு இருக்கணும். நீங்க நிற்காமல்போனது எனக்கு வருத்தம்தான்' என அண்ணன் வைகோவிடம் மட்டும் சொன்னார்.''

``கடந்த சட்டமன்றத் தேர்தலில் வாக்கு சதவிகிதத்தில் பா.ம.க மூன்றாவது இடம் பிடித்திருக்கிறதே. இதை எப்படிப் பார்க்கிறீர்கள்?''

``அது மலைக்கும் மடுவுக்குமான வேறுபாடு. இரண்டு பெரிய கட்சிகளும் சேர்ந்து 75 சதவிகிதத்துக்கும் மேல் வாக்குகள் பெற்றிருக்கிறார்கள். அதை ஒப்பிடும்போது பா.ம.க சதவிகிதம் எல்லாம் கணக்கில் எடுத்துக்கொள்ளவே கூடாது. எங்களைவிட அவர்கள் கூடுதலான வாக்குகளைப் பெற்றிருக்கிறார்கள். அவ்வளவுதான்.''

``இன்று வரையில் விஜயகாந்தையும் வைகோவையும் டார்கெட் செய்து நிறைய மீம்ஸ்கள் மற்றும் காமெடி வீடியோக்கள் பரப்பப்படுவதை எப்படிப் பார்க்கிறீர்கள். சோஷியல் மீடியாவின் தாக்கம் உங்கள் கூட்டணியை அதிகம் பாதிப்பதாகக் கருதுகிறீர்களா?''

``விமர்சகர்களுக்கு எப்போதும் மல்ட்டி டைமன்ஷன் பார்வை இருக்க வேண்டும். ஆனால், சமூக வலைத்தளங்களில் சிங்கிள் டைமன்ஷன் பார்வை உள்ளவர்களே அதிகம் இருக்கிறார்கள். அவர்கள் நினைப்பதை அந்தத் தலைவர் செய்ய வேண்டும் என நினைக்கிறார்கள். அவரவர் மனதில் தோன்றுவதை எழுதுகிறார்கள். அது ஒரு தாக்கத்தை ஏற்படுத்துகிறது. விஜயகாந்தால் சரியாகப் பேச முடியவில்லை. வார்த்தைகள் சரியாக வரவில்லை, கமாண்டிங்காகப் பேச முடியவில்லை என்பது எல்லாம் உடல்நலத்தோடு தொடர்புடையது. அதைக் குறை சொல்லவும் முடியாது. இதை எல்லாம் சமூக ஊடகங்களில் கிண்டல் அடித்ததை நினைத்து, அதைப் பரப்பியவர்கள் பிற்காலத்தில் வருத்தப்படுவார்கள்.''

``நீங்கள் எல்லா பிரச்னைகளையும் சாதிரீதியாக அணுகுகிறீர்கள் என்ற குற்றச்சாட்டு இருக்கிறது. சுவாதி கொலையைக்கூட அப்படித்தான் பார்க்கிறீர்கள் எனச் சொல்கிறார்களே?''

``இது அப்பட்டமான அறியாமை; காழ்ப்புஉணர்வு. சுவாதி கொலை செய்யப்பட்டதும் கண்டன ஆர்ப்பாட்டத்தை நடத்தினேன். சுவாதியின் பெற்றோரைச் சந்தித்துப் பேசி, அவர்கள் சார்பாக பல கோரிக்கைகளை அரசாங்கத்திடம் வைத்தேன். இதை சாதியப் பிரச்னையாக மாற்றியது சுவாதிக்கு நெருக்கமான நண்பர்கள்தான். ஒய்.ஜி.மகேந்திரன்தான் முதலில் சாதியைக் குறிப்பிட்டுப் பேசினார். அதுவரை நாங்கள் எங்குமே சாதியைப் பற்றி பேசவில்லை. அதன் பிறகு கிருஷ்ணமூர்த்தி என்கிற வழக்குரைஞர், `ராம்குமார் கொலையாளி இல்லை' எனச் சொன்னார். அடுத்து ஹெச்.ராஜா ஒரு தொலைக்காட்சியில் `இந்தக் கொலையை ராம்குமார் செய்ய வாய்ப்பு இல்லை; யாரோ ஒரு பயங்கரவாதிதான் செய்திருக்கணும்' எனச் சொன்னார். இப்படிப் பேசினது எல்லாமே அவர்கள்தான். நான் அதில் உள்ள முரண்பாடுகளைப் புறம்தள்ளக் கூடாது என்று சொன்னேன். `தமிழ்நாடு காவல் துறையின் மேல் எனக்குப் பல சந்தேகங்கள் இருக்கின்றன. இனி, சி.பி.ஐ விசாரிக்க வேண்டும்' எனச் சொன்னேன். சி.பி.ஐ என்ன பாகிஸ்தானில் இருக்கும் ஓர் உளவுத் துறையா? இல்லையே. அது மத்திய அரசாங்கத்திடம் இருக்கும் ஒரு துறைதானே! அப்படிப்பார்த்தால் ஹெச்.ராஜாவும் சுவாதிக்கு வேண்டியவர்களும் என்னை வரவேற்றுப் பாராட்டியிருக்க வேண்டும்தானே? இந்தக் கொலையில் இன்னமும் பல சந்தேகங்கள் இருக்கின்றன. அதற்குத்தான் சி.பி.ஐ விசாரணை வேண்டும் எனக் கோருகிறேன். எப்போதும் எல்லா பழிகளையும் சுமத்துவதுபோல, இப்போதும் எங்கள் மீது பழி சுமத்துகிறார்கள். அவ்வளவுதான்.''

நா.சிபிச்சக்கரவர்த்தி, படம்: தி.குமரகுருபரன்

ஓவியம்: கார்த்திகேயன் மேடி

நன்றி : ஆனந்த விகடன் - 10 Aug, 2016

தமிழகத்தில் அதிகரித்துவரும் பெண்களுக்கு எதிரான பாலியல் வன்கொடுமைகள்

noreply@blogger.com (Anonymous) — Sat, 6 Aug 2016 12:58:00 +0530

தமிழகத்தில் அதிகரித்துவரும் பெண்களுக்கு எதிரான பாலியல் வன்கொடுமைகள்

தமிழக அரசு கடுமையான நடவடிக்கை எடுக்க வேண்டும்

தொல்.திருமாவளவன் வலியுறுத்தல்

தமிழகத்தில் அண்மைக் காலமாக பெண்களுக்கு எதிரான பாலியல் வன்கொடுமைகள் அதிர்ச்சியூட்டும் அளவில் அதிகரித்து வருகின்றன. 5, 6 வயது சிறுமிகள் முதற்கொண்டு வேலைக்குச் செல்லும் பெண்கள் வரை எவருக்குமே பாதுகாப்பற்ற சூழல் நிலவுகிறது. பெண்களுக்கு எதிராக அதிகரித்து வரும் வன்கொடுமைகளைத் தடுத்து நிறுத்த தமிழக அரசு கடுமையான நடவடிக்கைகளை காலந்தாழ்த்தாமல் எடுக்க வேண்டுமென விடுதலைச் சிறுத்தைகள் கட்சியின் சார்பில் வலியுறுத்துகிறோம்.

சென்னையில் ரயில் நிலையத்தில் நடைபெற்ற இளம்பெண் படுகொலை, சேலத்தில் ஒரு பெண் செய்துகொண்ட தற்கொலை, விழுப்புரத்தில் நடந்துள்ள கொடூரக் கொலை, தற்போது திருவெண்ணெய்நல்லூரில் நிகழ்த்தப்பட்ட படுகொலை, தஞ்சை மாவட்டம் அம்மாபேட்டை அருகில் சாலியமங்கலம் என்ற இடத்தில் நிகழ்ந்துள்ள பயங்கரமான படுகொலை என ஒவ்வொரு நாளும் பெண்கள் மீதான வன்கொடுமைகள், படுகொலைகள் அதிகரித்துக்கொண்டே இருக்கின்றன. கிராமம், நகரம் என எங்குமே பெண்களுக்கு பாதுகாப்பற்ற நிலை அதிகரித்து வருகிறது.

சங்கிலிப் பறிப்பு சம்பவங்களில் பெண்கள் தாக்கப்பட்டு உயிரிழக்கும் நிலை ஏற்பட்டுள்ளது. திருடர்கள், வழிப்பறிக்கொள்ளைக்காரர்கள் முதலானவர்களால் வக்கிரம் பிடித்த கொடூரர்களாலும் பெண்கள் பாதிப்புக்கு ஆளாகிவருகின்றனர்.

டெல்லியில் நிர்பயா படுகொலை நிகழ்ந்த பின்னர், இந்தியாவிலேயே முதல் மாநிலமாக பெண்களைப் பாதுகாப்பதற்கென 13 அம்ச செயல்திட்டம் ஒன்றை தமிழக முதலமைச்சர் அறிவித்தார். 2013ஆம் ஆண்டு புத்தாண்டு நாளில் செய்யப்பட்ட அந்த அறிவிப்பில் மாவட்டந்தோறும் மகளிர் விரைவு நீதிமன்றங்கள் அமைக்கப்படும், பொது இடங்களில் சிசிடிவி கேமிராக்கள் பொருத்தப்படும், பெண்கள் மீதான குற்ற சம்பவங்கள் அனைத்தும் உயரதிகாரிகளைக் கொண்டு விசாரிக்கப்படும் என்பது உள்ளிட்ட பல திட்டங்களை அவர் முன்வைத்திருந்தார். அவை தீவிரமாக நடைமுறைப்படுத்தப்பட்டிருந்தால் இந்த அளவுக்கு வன்கொடுமைகள் பெருகியிருக்காது. சென்னை உயர்நீதிமன்றம் அண்மையில் பெண்களின் பாதுகாப்புக்கென தமிழக அரசு உடனடியாக மேற்கொள்ள வேண்டிய சில நடவடிக்கைகளைப் பரிந்துரை செய்திருந்தது. பொது இடங்களில் சிசிடிவி கேமிரா பொருத்துவது உட்பட, சென்னை உயர்நீதிமன்றம் பரிந்துரைத்த நடவடிக்கைகள் எதுவும் இதுவரை தமிழக அரசால் மேற்கொள்ளப்படாதது வருத்தமளிக்கிறது.

பெண்கள் மீதான பாலியல் வன்கொடுமைகள் அதிகரிப்பதற்கு சில தமிழ்த் திரைப்படங்களில் வரும் காட்சிகள் தூண்டுதலாக இருக்கின்றன என்றும், பெண்களைப் பின்தொடர்ந்து சென்று தம்மை காதலிக்குமாறு வற்புறுத்துகிற நிகழ்வுகளும், அதற்கு உடன்படாத பெண்கள் மீது வன்முறையைச் செலுத்துகிற சம்பவங்களும் அதிகரித்து வருவதோடு அத்தகைய காட்சிகள் திரைப்படங்களில் இடம்பெறுவதையும் இணைத்து சமூக ஆய்வாளர்கள் சுட்டிக்காட்டியுள்ளனர். இதை திரைப்பட இயக்குநர்கள், கவனத்தில்கொள்ள வேண்டும்.

பெண்களுக்கு எதிரான வன்கொடுமைகளில் பாலியல்ரீதியாகத் துன்புறுத்துவது, தாக்குவது முதலானவற்றோடு பின்தொடர்ந்து செல்வது (stalking) என்பதையும் தீவிரமான குற்றமாகக் கருதி காவல்துறை கடும் நடவடிக்கை மேற்கொள்ள வேண்டும் என்று கேட்டுக்கொள்கிறோம்.

ஒரு நாட்டின் முன்னேற்றத்தை அந்த நாட்டில் பெண்கள் நடத்தப்படும் நிலையைக்கொண்டே மதிப்பிடுவார்கள். தமிழகம் அனைத்துத் தளங்களிலும் முன்னேற வேண்டுமெனில், தமிழ்நாட்டில் பெண்களின் பாதுகாப்பு உத்தரவாதப்படுத்தப்பட வேண்டும். பெண்களின் உரிமையை மதிக்கும் மனோபாவத்தை நமது ஆண் பிள்ளைகளுக்கு பள்ளியிலிருந்தே உருவாக்கி வளர்க்க வேண்டும். அதற்கு உகந்த நடவடிக்கைகளை தமிழக அரசு விரைந்து மேற்கொள்ள வேண்டுமென வலியுறுத்திக் கேட்டுக்கொள்கிறோம்.

இவண்

தொல்.திருமாவளவன்