من تسلط القوات المسلحه؟ أم من الفتنه الطائفيه؟ أم من النهاية الدموية المؤسفه التى ربما تنتهي إليها مصر؟

في مساء الجمعه 4 مارس حدثت فتنة أطفيح و أكلت نيران الكراهيه بالكامل كنيستي مار جرجس و مارمينا ، النار التى لم يتخيل الشاب الصعيدي ذو الواحد و عشرين ربيعا أبو الحسن محمد أحمد عبد التواب أنها ستطاله بعد عشرة أيام دون أدنى ذنب إقترفه.

أبو الحسن كان في شارع السوق القديم بعد أن حصل مبالغ ماليه من أرباب محال العصير في المنطقه، هذه الأموال التى لا تتعدى 2000 جنيه ربما كانت سببا كافيا للإشتباه به في منطقة الزاوية الحمراء حيث يظن أهله أنه ألقي القبض عليه في حملة إعتقالات عشوائية

منذ 15 مارس لم يرى أبو الحسن أهله و لم يروه ، و بين المشارح و المستشفيات ذابت أقدامهم إلى أن دلهم ظابط بالجيش أنه بالسجن الحربي و يقول عبد التواب (الأخ الأكبر لأبو الحسن) أن الظابط دفع ثمن هذه المعلومه بقرار نقل مفاجئ من رؤسائه

أبو الحسن إذن أغلب الإحتمالات أنه معتقل دون أن محاكمه و دون إثبات إعتقاله في أي أوراق رسميه

لنا و لأهل أبو الحسن الله، حسبنا هو و نعم الوكيل

قعدت مع نفسي لحظات أحاول أفتكر القرارات الثورية إللى أخدتها في حياتي .. لقيت أتخن قرار خدته لا يمكن إعتباره إلا مجرد نكته .
فمع إني عارف و متأكد إن أيامنا الغبره اللي جاييه مع الصهاينه مش مع الأمريكان و الإنجليز بس..28 سنه هي حياتي مخدتش فيها قرار ثوري بتعلم اللغة العبريه.

حتى و أنا ف ثانويه عامة المجموع هو إللى خد قرار حياتي بالعمل في مجال ملئ بأعز ما نهديه لوجوه بعضنا البعض (و هي الإبتسامه و ليس البصاق بالضروره)… ورغم كده 6 سنين هي حياتي المهنيه مخدتش فيها قرار ثوري إني أنفض للشغلانه دي و لشغل الحكومه المعوق الكسيح القاتل للآمال.

و برغم إن بند الصرف ع التاكسيات ف ميزانية السنه دي أغلقت لي المؤشر العام لبورصة جيبي على إنخفاض حاد ، ف بلد تاخدها رايح جاي مشي على رجليك يا مؤمن (المنيا قبل ما تسأل) .. 11 سنه مخدتش فيها قرار ثوري بأقتناء عجله أتحرك بيها ، غير ف ثانويه عامه و كانت عشان أروح الدروس و ف الآخر إتسرقت مني.

و بالتطرق للمناقشات السلميه التي دارت بيني و بين العديد من الكائنات المكتوب في بطايقهم “بني آدم” و عبرت فيها عن رأيي -بصورة ديمقراطيه- في أهاليهم الأحياء و الأموات .. إلا أني لازلت لا أملك قرار ثوري بالذهاب لهم و الإعتذار ، و لو من باب خيركم من يبدأ بالسلام.

و برغم أنني مؤمن بالثورة .. صناعة القرار الثوري ف حياتي لسه بحسبه له ألف حساب و ف الآخر باخد قرار حزب الكنبه الأشهر “أفرك إيدك” .
ده لأن القرار الثوري ما ينفعش تقعد كتير تجمعه له المعلومات و تحللها و تقييم النتايج و تحسب المخرجات…إلى آخر الفيلم ده كله، وده لأنه ببساطه ثوري و بيغير تغيير جذري و نتايجه نتائج ثوريه يستحيل توقعها . فبننتهي جميعاً للنهاية البراجماتيه المعتاده ..”هنشوف!”.

فهل ممكن ننتظر ثورة كاملة في بلد يخاف معظم أهلها إللى زي حالاتي من تطبيق أي قرار ثوري على أنفسهم .

و صناعة القرار الثوري اظنها مش محتاجه مننا غير الرغبه و القدرة و الإيمان الحقيقي بالله .
أما الرغبه فهي الرغبه التغيير للأفضل حتى لو كان ده ضد الثقافه و الأعراف و عادات و تقاليد المجتمع (بشرط عدم مخالفة الشرع طبعاً).
و أما القدرة على التغيير .. يعني القرار إللى هتاخده تبقى دكر و قده و بلاش غشامه.
أما الإيمان الحقيقي بالله ، هو أنك تعرف إن ما عندكش غير قلب واحد ف كف الواحد ، حد له عندك حاجه بقى؟

يا ترى أخبارك إنت كمان إيه؟ ممكن ف يوم تاخد قرار ثوري صغير قوي فتروح للفكهاني تاخد إتنين تلاته كيلو موز على إتنين تلاته تفاح، و أنت ف السكه تاخد موزتين و تفاحه ليك و الباقي زي ما هو عند أقرب صندوق زباله و تديهم للي قاعد بيدور فيها على غداه؟

و صبرك لما أبوها يبان و هتعرف يعني إيه “النط على السلطه” بجد .. أصلك ما تعرفش يعني إيه أمك تنام 60 سنه ع الرصيف و الرايح و الجاي يبص على رجليها و يبصبص و آخرتها لما يجيي الواد أبو عيون زرق و شعر أشقر ياخد منها حته تلف وشك الناحية التانيه و تتدكرن على إللى عايزين يحوشوا عنها.

و هتعرف منين إنت و شلة الأنس إللى معاك؟ ما هو السلاح ف أيدك .. و السلاح لما يبقى مع أبو فنله تبيتوه بلطجي و لما يبقى مع أبو باريه أحمر تنصبوه شريف!
آه من زمن .. الشتيمه فيه هي سلاح الضعيف.

و هتحس ببنتها إزاي و إنت شايفها خسرانه و بنت خسرانه ، مع إنك لو خدتها في حضنك و و وريتها الشهامه و الحماية إللى بجد و بطلت صرمحه على بارات أونكل سام كانت هتشيل جميلك العمر كله.

و بدل ما تكري عليها الغلابة إللى في البيوت و تشنع عليها كنت أستر عليها ، دور على إللى بيوزّها بجد و يتاجر بعرضها على أرض سينا و أشكمه.
إلا صحيح .. عارف سينا ؟ صحيح أنا و إنت نسينا ، بس البدو ما نسيوش .. رجاله دمهم حر ،و عشان ياخدوا حقهم ما بيستأذنوش ، و في دم إللى إتدفنوا فيها ما بيفرطوش.

البت بت سبعه آه .. لكن مورياكم العين الحمره ، طيرت النوم من عينيكم إنتوا و شيخ شرم الكبير، و عمالين تلفوا و تدورا عليها إنما الحره بنت الأحرار مدياكوا الطرشه ، و آخرتها بتهددوها بصباع.

إختشوا على دمكم يا أخي .. البت مش طايقاكم يا بني آدم ،و الود ودها تتف على وش التخين فيكم بس هقول إيه؟! المجنونه سابت الرصيف و سرحت “إخوانها” و نكشت شعرها ع التلفزيون و عملت نفسها محلله سياسيه و خبيرة إستراتيجيه و هاتك يا حوارات.

على العموم .. إن ماتت البت و للا غارت ف داهيه .. ربك مطلع و عالم ، و أمها موجوده -ينفخ فيها سبحانه- تولد غيرها ألف ، و اللي عجبه صباع الجيش يوطي و يلف.

هذه العربة في القطار الواقعه بين الجرار و عربة توليد القوى موصدة الأبواب و لا سبيل لدخولها إلا بتسلق الرابط بينها و بين الجرار و الدخول من الباب الأمامي ، هذا بجانب أن تكييف الهواء مفصول عنها عمداً و ليست بها أي تهوية ،ذلك أن الخواجه الذي صممها يرى -بحسن نيته- أن التكييف ضروره قصوى و أن سكك حديد مصر تنظر لجنود الشرطه على أنهم بني بشر.

العجيب في الأمر أن العربة ملئت بالكامل تقريباً من المنيا و تكدست طرقتها من بني سويف و كلهم بزي مدني و عرفت من الجالس بجواري أنه يحمد الله على الثورة التى ضبطت أداء الداخليه و رفعت عنهم الكثير من الظلم في ساعات العمل و الأجور، و أن تقوى الله و خشيته يجب أن تكون هي الدافع الحقيقي للعمل .. كلمات أثلج بها صدري هذا الجندي و لكن الصمت الدائر فيما بيننا سمعت فيه من عينيه كلام آخر.

عينيه التى تعلقتا بفتاة جذابه على صفحة الجريده التى أتصفحها قالت أنني لم أذق الكثير من طعم الحياه و أن هذا المغفل ذو العطر الفواح و النظارات الشمسيه يتمنى أن أبل ريقه بما يود سماعه عن فساد و ظلم أعتادت عليه عيني بوزارة الداخليه.

(على كل حال لم أنتظر كثيراً حتى أسمعنيه لؤي نجاتي بنفسه في الميدان حين روى عن التصرفات النجسه لكلاب الداخلية في قسم الشرطه الذي أحتجز به قبل تسليمه للنيابه العسكريه و تحرشهم جنسياً بطفل لا يتعدى الـ16 عاماً ،رواية طويله يبدو منها أن هذا القسم لم يمسه أي تطهير و لم يسمع كلابه عن ميدان التحرير )

و سمعت أيضاً من الشجاع الوحيد بينهم المرتدي بكل فخر زيه “الميري” و الذي قال صراحة أنه يفخر بأن يموت بزيه الميري و لا أن يذهب لعمله بزي مدني خشية بطش الناس .. لكن الصراحه المطلقه سمعتها أيضاً من عينه التى علقها في سقف العربه و في عضلات وجهه حين أخذ يجز على أسنانه. قال فيها أنه أيضاً لم يتذوق الكثير من طعم الدنيا ،و أن شباب الثورة المخنث لا هم لهم إلا الإنتقام من أسيادهم ، و أن وزير الداخليه يعول علينا في حماية بهوات القاهرة ، و أن إبن القحبة الذي فصل التكييف ليتركنا هنا دون تهويه كالحيوانات سيذوق من نفس الكأس لما يشرفنا في السلخانه .. ثم سكتت عينه و نطق لسانه أخيراً
“حد عارف المتين جنيه الزياده هنقبضها الشهر ده و للا الشهر الجاي؟”

الأسوانليه و السوهاجيه و الإسكندرانيه ربنا وحده يعلم أنا بحبهم قد إيه ، كل محافظة رحتها أو عرفت منها ناس دوقت فيها أو شفت من ناسهم حاجات كتير إلا التلات محافظات دول .. ما دقتش فيهم غير طعم مصر الأصلي إللى لسه مش عارفه أمريكا إزاي تمسّخه.

طعم تحس بيه قوى لما تبقى في الأولى مكيف و شايف كل واحد مبوط في لاب توب أو معلق في ودنه سماعه الموبايل و مش واخد باله من المتشرد إللى واخد القطر رايح جاي بيدور على كرسي فيفوض أمره لله و يفرش الجرنان إللى ف إيده و يقعد ع الأرض بين العربيات. و يجي الشاب الأسوانلي الجدع الدايخ هو كمان على فيشه يشحن موبايله ، فكل إللى يعمله صاحبنا إنه يشاور له عليها فياخده بالحضن و يقوله لازم أكافئك .. تعالى .!!

يمشي صاحبنا وراه الأسوانلي المجدع لحد آخر عربيه في القطر .. عربية أسوان، و أول ما يدخل فيها يحس بأن روح بيته قبل ما يروح بجد ،طعم مصري أصيل مش الطعم الأمريكاني العريان إللى طفحه مع الشاي و النسكافيه على قهوة الندوة الثقافيه في باب اللوق.

ف عربية أسوان ما تستغربش لما تلاقي واحد طالع من الحمام معلق الفوطه على رقبته و لابس شبب البيت و ف إيده اليمين فرشة السنان أو ماكنة الحلاقه.ف عربية أسوان لو سألت حد عن حاجه ، هيديك كل تفاصيلها و يحذرك من عيوبها و يشكر لك في مميزاتها ، كأنك أخوه شقيقه.
ف عربية أسوان عيب لما ترد حاجه من إيد إللى جنبك ، حتى لو كانت منين بالجبنه.
ف عربية أسوان مش هتعرف تنام من جمال البنوته السمره أم غمازات ، و هي و إخواتها عمالين يشاكلوا في بعض و في الركاب.
ف عربية أسوان هتعرف إن العري لا يمت بأي صله للجمال و إن الوش الهادي المريح هو إللى طير النوم من عين صاحبنا مش البت الصغيره زي ماهو عمال يسرح بيك كده
ف عربية أسوان هتعرف و إنت جنبك شاب أسمراني بشعره القصير و عضم وشه البارز إنه لو زغر بعينه لجيش بحاله م الجيوش المنسونه إياها هينشف الدم ف عروقهم ، و لو ضحك ،ياجماله يا حلاوته .. يوقع ميت بنت ف حبه.

و الشئ بالشئ يذكر كان في دكتور من أسوان و كان رفيق غرفه الفندق في أحد الرحلات و متزوج من إسكندرانيه ، دايماً يقوللي “أوعى يابني تتجوز م الصعيد” و “البحاروه يحبوا السمر”. الله يمسيه بالخير قصة جوازه كانت أعجوبه ، و كل ما أفتكرها أضحك.

بحبكوا يا أسوانليه

و يتفرج على آلاف الفيديوهات عن أحداث المحله إللى حصلت بعد كده في أبريل 2008 ، لازم يحس بحجم الكارثه إللى ممكن تحصل في الفترة الجاية لو الحكومة و المجلس العسكري ما إتحركوش بخطوات أسرع و بقرارات أقوى و أكثر حسم في أمور طالما إشتكى منها الناس و أهمهم في رأيي الأجور، ضبط الأسعار و المحاكمات السريعه العادله.

لازم أعترف لكم مرة كمان إني قابلت الدعوة للخروج يوم 25 يناير بكل سخريه .. و لو كنت رسام كاريكاتير كنت شبعتهم تريقه وقتها ، و ده لأن صورة تجربة 6 أبريل المرّه في المحله تحديداً كانت ما راحتش من ذهني. فأي حد يدعو لثورة أو حتى الحلم بثورة سلميه بيضاء تاني على الفيسبوك يبقي أكيد عبيط أو بيستعبط.

إللى خلاني أكتب بقى النهارده إني لاحظت إن نفس سيناريو 6 أبريل في المحله بيتكرر بس في مصر كلها النهارده .. حالة غليان مكتومه ، و ردود أفعال بطيئة و أحياناً مستفزه من الحكومة و المجلس العسكري (زي الغاز اللى رجع يتصدر لإسرائيل تاني مثلاً).

هتسألوني .. طيب ما الثورة إللى كنا خايفين منها برغم الخساير تعتبر تمت الحمد لله بأقل نسبة تخريب في الممتلكات العامه ، أجاوبكوا إن ثورة 25 يناير إحتمال إنها مجرد بداية و ده لأنها كانت و هتفضل علامة إستفهام و ربنا وحده إللى عالم بسرها .. و حتى عمر طاهر كتب في أحد مقالاته مره و أنا أتفق معاه جداً .. إن عادة الثورات بتبدأ بحركات إحتجاجيه و تنتهي بالإنفجار إللى هو قمة حالة الغليان أما إللى حصل فهو تقريباً العكس .. حالة إنفجار مستلهمه من تونس إستتبعها حركة إحتجاجات إللى هي مسمينها إحنا دلوقتي “فئويه” .. بس هل الأمور خلصت كده؟

بمعني تاني إن الثورة غالباً لسه ما قامتش .. و إن الناس إللى قامت عشانهم الثورة .. في الواقع بتلعن الثورة (أو الأحداث إللى إحنا بنقول عليها ثورة) النهارده ، الأحوال ساءت جداً معاهم و أي كلام معاهم للنظر في مكتسبات الثورة هي بالنسبه لهم ما تفرقش كتير عن دعاوي الحزب الوطني للنظر في “إنجازات الرئيس مبارك” .. ده غير إن كل إللى إتعمل عشانهم لحد دلوقتي مجرد مسكنات ضعيفه و قصيرة المفعول.

أضيفوا لكل ده.. كمية السلاح إللى موجوده في مصر (ربنا وحده يعلم حجمها قد إيه) .. و أقسم لكم إن النهارده إن دكتور بيشتغل في أحدى القرى قاللى إن واحد عرض عليه يشتري “قنابل يدويه” أيوه “قنااااابل يدويييه”
مش هتتبسطوا لو عرفتوا إن الدكتور ده مسيحي .. و لولا إنه محترم و راجل وطنى بجد و بحق و حقيقي أكتر من زبالة كتير تعرفوهم كويس و مش لازم “نجيب” سيرتهم دلوقت .. كان ممكن يضعف و يشتري . و واضح إن إللى عرض عليه العرض ده مش بيبيع لأي زبون و بس.

أضيفوا تاني لكل الهم إللى فات ده.. إن أمريكا بدأت تقول إن لا خوف من الإخوان المسلمين في مصر .. و حياة أماتكوا؟ من إمتى الرضى ده؟ إحنا هنستهبل؟ و للا فاكرينا داقين عصافير؟
مقال في التايمز الأمريكيه من كام يوم بيقول إن الإخوان بيمارسوا و فاهمين الديموقراطيه أكتر من باقي التيارات!!
الموقف الأمريكي ده مالوش عندي غير تفسير واحد .. في خابور محترم بيتحضر لمصر ، لأن الثورة دي لو جت بديمقراطيه حقيقيه و ممثل حقيقي للشعب هتكون و دون أدني ذرة شك نهاية الكيان الصهيوني.

أنا لا أتمنى إن أي سيناريو أسود يحصل في مصر .. و بدعي ربنا يعدي الفترة إللى جاية على خير و لازلت أصر على أن التظاهر السلمي لازم يستمر دائماً و أبداً .. بس لو المجلس و الحكومة .. أو حتى الرئيس القادم و الحكومة هيفضلوا ماشيين بسياسة “خليهم يتسلوا” مع جرعات متتاليه من المسكنات .. يبقى عليه العوض و منه العوض.

و الله من وراء القصد

و من حوالي كام سنه كده ضرب لنا الدكتور/محمد يونس الحائز على نوبل للسلام واحد من أعظم و أروع أمثله الإقراض و الإقتراض ، و التى لا أقول أنها متوافقه مع روح الإقتصاد الإسلامي بل هي عين و قلب الإقتصاد الإسلامي (أو كما أظن)  .

الفكره كانت عباره عن منح قروض متناهية الصغر بدون أي أرباح أو فوائد لسيدات يعملن في قرى بنجلاديش الفقيره و يردونها من أرباح هذه المشاريع ، و يقدم هذه القروض من أفاء الله عليهم من نعمه و لهم أن يستردوها متى شائوا .

الرائع أن نسبه الوفاء بهذه القروض جاوزت الـ90% و أنقذت مئات الأسر الفقيره من فقرها المدقع، كل هذا من خلال بنك عرف بأسم “جرامين بنك” أو “بنك الفقراء” بالعربيه

صديقة أمريكيه أثلجت صدري أمس بموقع يحمل الفكره و يتبناها مع شركاءه حول العالم و هو موقع

http://kiva.org/

و هو موقع يتيح لك المساهمه (و لا أقول التبرع أو الصدقه) لهؤلاء الفقراء في مشاريعهم الصغيره (بمبلغ 25 دولار أو أكثر). ثم بعد أن ينجز صاحب المشروع فكرته يردها للشريك الذي يردها للموقع و لك أن تسحبها إن أردت أو تعيد المساهمه بها في مشروع آخر .

القروض لا أرباح لها إطلاقاً و الموقع و القائمين عليه هم مجموعه من المتطوعين ، و إذا أردت يمكنك التبرع للموقع نفسه أيضاً .

الموقع منذ عام 2005 و حتى الأن أصبح به أكثر من نصف مليون مساهم (مقرض) ساهموا بقروض تناهز 222 مليون دولار بنسبة وفاء للديون تزيد عن 98%

فكرة عمل الموقع ببساطه

روابط مفيده عن الموضوع

• صفحة د/محمد يونس على الويكيبيديا http://en.wikipedia.org/wiki/Muhammad_Yunus
• بعض إحصائيات القروض التى تمت عبر الموقع http://www.kiva.org/about/stats
• معلومات عن فكرة القروض متناهية الصغر http://www.kiva.org/about/microfinance

و للحديث بقيه إن شاء الله عن كيفيه إستخراج بطاقة كريديت كارد للدفع عبر الإنترنت و حل لمشكلة عدم إتاحه الباي بال لجمهورية مصر العربيه ،حتى ذلك الحين أترككم و أوصيكم بنشر الموقع و المساهمه فيه إن إستطعتم

1. لو شنعوا عليا ولاد الكلب دول أحب أقولكم بالنسبة للبانجو و لفافاته و باكتاته أنا مليش فيه ، إنما باكل لبان كلورتس كتير .. و ده بالتأكيد بالتأكيد ممكن يعمل أسفكسيا لو كنت واكل توم قبليه .
2. فكي التحتاني ملزوق بأمير بعد آخر حادثه حصلت لي و أنا ماشي بالجمل على 180 الصيف إللى فات وأنا مسافر هولندا . إذن بالنسبة للمسعفين ياخدوا بالهم كويس و هما بيشيلوني عشان ما تلزقش ف الآخر ف الداخليه لو وقعت منهم و إتفك اللحام لا قدر الله.
3. عنيا بتورم بصورة دورية و منتظمة كل سبت و إتنين و أربع.
4. سناني ضعيفه جدا جدا و بتتكسر كل ما أكح .. و لأن الحاجه الوحيده إللى هعملها قبل حفلة الشاورمه إنى هكح معاهم .. فطبيعي جداً إنكوا ما تلاقوش صفين سناني.
5. أى سحجات أو كدمات أو تورمات أخرى يسأل عنها الكفتجي الشرعي إللى هيشرحني و أكيد هيلاقيلها مخرج بأذن الله.
6. المظاهرات و الجروبات و التويتات عني ممنوعه لحد السنوية التالته.

و الله على ما أقول حسبي و نعم الوكيل

قليل من العدل لا يضر- حقنا في حد أدنى للأجور في مصر from 2maystrike on Vimeo.

يا ضنايا ضهري محني
و من ذل السنين بركع
إزاي إشيلك تطول صدري
و إزاي دماي فى العروق تجري
و إزاي أرسم بسمتك فجري
إزاي يا ضنايا و دراعي متقطع

أنا يا أمي بكيت بليل
و دموعي نزلت دم
تجري سواد فى النيل
البرد جمد ميته و طفى قناديل
و الشبك على شطه داب
و لا حتى رزق قليل
يسد جوع حريتي
و لساني م الهم تقيل

صورتك يا ولدي لحظة حياتك
يوم ميلادك
منقوشه فخيالي
و كنت وقتها بتوضا
شفت إبتسامتك
و ف كف إيدك ورده
شميت عبيرها و الآذان ينادي
الله أكبر
يا رب أشوف ضنايا
بحق الدعا و السجده
بكينا إنت و أنا
مع أول نفس ليا و ليك
أنا عشت ميته و حياتي بدأ بيك
رضيت أنا ينهشوا لحمي
كان كل همي فيك
و هرضى تاني
ينهشوا تاني……
لأ
لأ يا أمي و الله ما أرضى

الشمس طلعت يا أمي
سامعه نداها؟
الدفا جاي أهو
و جايبه الضحك و ياها
أنا مش ناسيها يا أمي
و لا يمكن أنساها

لأ يا أمي و الله ما أرضى بهوانك
لأ يا أمى و الله ما انا ساكت
و لو مقدرتش آخد م الكلاب تارك
عزاي إن الكلب الكبير قيامته هانت

إبراهيم عبد الغني
فبراير 2010