TLÂNGSAM

Shillong-ah Hmar tlangval a thi

2014-09-15T05:59:00.000+05:30

Shillong, September 15, 2014: Zani Pathienni zan dar 1 vel khan Shillong-a lekha inchuka um Tv. Lalkhawmawi Songate s/o Samuel Songate (Parbung) chu a in hluona chung New Hebron, Madanrting, Shillong-ah a thisain a ruong hmu a nih.

Zani sun dar 1 vel khan Tv. Lalkhawmawi ruol hai chun an ruolpa in hluona-ah va kan dingin an fe a; Lalkhawmawi in hluo chu kot hongsa’n a lo um a, in-a chun tu khom an umnaw bak-ah a laptop in on-sa’n a um a, a phone khom a um bok leiin a ruolhai ngai ṭhat naw leiin a in kawl le vel bak-ah Shillong sunga zong theina po po zong a ni hnungin zan dar 1 vel khan a in hluona chung-ah a thisain a ruong hmu a nih.

Zani sun dar 1 vel khan ruo nasatakin a sur a, Lalkhawmawi hi a in chunga pipe siem ṭha tuma in chung-ah a kai ni dinga ring a nih. A ruong hi electric hrui hnuoi chara hmu a ni a, a bul-ah nihliep inphen nengin hmu ani bok. In chung zawn a hin electric hrui (main line, a tuomna umlo) zuk ban phak el ding a fethlenga; a nihliep khum chun a tawk pal a, Lalkhawmawi chu a manhlum ni dinga ring a nih.

Lalkhawmawi ruong hi zing dar 6 vel hin an khuo Parbung tieng phur dinga ti a nih.

512 GB memory card

2014-09-15T05:58:00.002+05:30

Amsterdam, September 15, 2014: SanDisk Corporation chun khawvela Secure Digital (SD) Card zor suok laia ‘data’ la keng rawn tak ding 512 GB SanDisk Extreme PRO SDXC UHS-I memory card chu September 11 khan a tlangzar.

SanDisk thuneituhai hrildan chun, 512 GB memory card hi professional photographer le videographer hai hmang ding bik deu, thlalak le video khom 4K resolution-a an lak theina ding le olsam taka sie ṭhat thei a ni dan ding ngaituo a siem a ni thu an hril.

Hi 512 GB SD Card hi 799 US dollars (Rs. 48585 approx.) man vel dinga ti a nih.

Extreme PRO SDXC UHS-I hi 256 GB le 128 GB khoma a um ding thu hril a ni bok.

SP capsule Rs. 2 lakh chuong manhu man

2014-09-15T05:56:00.002+05:30

CCPur, September 15, 2015: Zani hmasak Inrinni khan Churachandpur district police hnuoia Drug Cell hai chu Francis Vala (k. 31) s/o (F) Lienkhomang of Rengkai, Venglai chu a chengna in anthokin damdawi Spasmo Proxyvon (SP) mum 14,841 an man.

Damdawi man hai hi mum khat pei-ah Rs. 20 hisapin a reng hin Rs. 2,96,820 manhu vel ni dinga hril a nih.

Tipaimukh inzin Dr. Amo a hungtlung

2014-09-08T19:59:00.002+05:30

CCPur, September 7, 2014 (HT): Sept. 3, 2014 nia Tuiṭhaphai, CCPur suoksana Tipaimukh lampui sietna hmun enfela inzin Dr Chaltonlien Amo, Chairman, HAC chu zani khan dam takin Tuiṭhaphai a hungtlung nawk tah.

Dr Amo hi EE/PWD le a staff hai; BRTF Officer hai bakah a workers hai bakah Village Authority Union han an zui a nih.

KRA-U in an VC an inchawltir

2014-09-08T19:58:00.002+05:30

Imphal, September 7, 2014 (HT): Kuki Revolutionary Army-Unification (KRAU) chun an Vice President Thangcha Chongloi @ S.H.T. George chu a hriselna ṭhatnaw le insung thil leiin a sina inthawk an inchawltir niin Boboi Kuki chun thusuok a siem.

UPF hnuoi le helpawl group dang thilthawnaa an rawl phal ninaw ni a, a lo inrawl chun a phutawk hremna pek ning a tih tii thusuok chun a hril.

Mercy Home-ah assessment camp nei

2014-09-08T19:57:00.001+05:30

CCPur, September 7, 2014 (HT): Zani 10:00AM khan Kamdou Veng, Tuibuong-a Mercy Home-ah Liliance Fonds sponsored-na le FCC-Mercy Home huoihawtnain Assessment Camp nei a nih.

Hi huna hin kut le ke kim lo mi 50 thlangsuok hai kuoma Artificial Limb semna nei a nih. Hi programme hi Pu P.K. Jha, IAS, DC, CCPur in a hawng.
Artificial Limbs dawng ding mi 50 thlangsuok hai hi Mobility India a inthawka hung technician mi 4 han Mercy Home hmunah fitting thaw pek an tih.

Thosilien hai damdawitui an inchie pek

2014-09-08T19:56:00.004+05:30

CCPur, September 7, 2014 (HT): National Vector Borne Disease Control Society/CCPur chun zanikhan CCPur khawpui sunga Orphanage Home 6, Muon Inn, Bijang; Amazing Grace, Bungmual; Angels’ Place, Bungmual; Tabitha Home, Hiangtam Lamka; Only Grace, Vengnuam, New Lamka le Happiness Home, Pangjol hai an kan a, thosilen 200 chuong damdawi tui an inchie (bed-net impregnation) pek.

Kohran 10 ṭhuoituhai an inpawlpui

2014-09-08T19:53:00.002+05:30

CCPur, September 7, 2014 (HT): Zani 11:00AM khan Dr Thangchinkhup Guite, CMO, CCPur inrawinain District Health Society (DHS), CCPur ṭhuoitu hai chun CCPur kawpui sunga Kohran tum tum 10-a ṭhuoituhai CMO Office chamber-ah an inpawlpui.

Hi huna hin Kohran ṭhuoitu-hai chu JSSK thua District Hospital, CCPura nuhmei nau nei han sawrkar a inthawk hamṭhatna chi tum tum an hmu hai an hril pui.

HLS, Meghalaya in literature tienga hma nasa taka lak an tum

2014-09-08T19:52:00.000+05:30

Shillong, September 7, 2014 (HT): August 31, 2014 khan Hmar Literature Society (HLS), Meghalaya ṭhuoitu han Pu Rohminglien Buhril, IFS chengnain, Sylvan House, Cleve Colony, Shillong hmuna inhmukhawmna an nei a, hmatienga hmalak pei dan ding hai an hriltlang.

HLS, Meghalaya hi August 10, 2014 a kha in ngir ṭan chau a nih. HLS, Meghlaya ṭhuoituhai inhmukhawmna huna hin HSA Gen. Hqrts; HYA Shillong Jt. Hqrts, Val upa le ṭhuoitu dang dang hai an ṭhang tawl bakah HLS, Mizoram Chairman Pu Lalthankunga Hmar khawm a ṭhang ve.

HLS Meghalaya chun Literature tieng nasa taka hma lak an tum a, hi le inzawm hin a hmasatakna in Hmar hawrawp A, AW, B a lam dan leh siema sungkuo tin kuoma sem a tum bakah Bu Hmasa sut thar nawka sem a tum bakah HLS journal umsun THURO chu Meghalaya sunga a tam thei ang tak zawr dawk a tum a nih.

Hi baka hin kum 2010 a inthawka sut suok lekhabu le thusep hai Book of the year le Article of the Year buotsai a tum a, hi thu hi HLS Co-Ordination Committee intlun an tum.

Thingat phur Shaktiman changsuol; mi 2 thi

2014-09-08T19:47:00.000+05:30

Pherzawl, September 8, 2014: Zantieng dar 5 vel khan Talan le Pherzawl khuo inkar lai vel Thingat phur Shaktiman truck a changsuol a, a hmun-ah mi 2 an thi a, mi 5 an hliem niin ei thu lakna’n a hril.

Mawtor hi Pherzawl khuo khel met, lamthlang tieng a tlan tla ni a hril a nih.

A thi hai hi Serhmun khaw mi Lalsuongmawi w/o Ditsang le Suongnal khaw mi, Shaktiman truck neitupa a nih. A hliem hai hi an hliem rik tawl hle a, Pherzawl-ah enkol mek a ni thu ei thu lakna’n a hril bok.

Ditsang hi a naupa leh hliem tuok hai lai an ṭhang ve a, chanchin ei ziek lai chen hin Ditsang hi khawmuol a la hriet naw zing a nih. A hliem hai hi Tuiṭhaphai tieng phur tum mek an nih.

Silchar HSA ṭhuoitu inthlang

2014-09-08T11:17:00.000+05:30

Silchar, September 8, 2014: Zani khan Hmar Students Association, Silchar Branch chun kum 2014-15 sunga ṭhuoitu ding Durga Shankar LP School, Ambiccapaty-ah thlangna an nei a, hun hmasatak-ah Isaac Lalmalsawm-in ṭongṭaina a nei loin Lalringum Riengsete Dy. Secretary, HSA GHQ inrawina hnuoi-ah kum 2014-15 sunga HSA Silchar Branch ṭhuoitu ding a hnuoia ang hin thlang an nih.

President: Johnson Zote
V. President: Robert Pangamte
Secretary: Gospel Songate
Asst. Secretary: Daniel zote
Finance Secy: Nehemia
Treasurer: Rebecca
Education: Lalbiektluong Amo
Cultural: Lalremsang Changsan
Information: Laldamtluong
Public Relation: Noel Țhiek
Games & Sport: Joshua Ralsun

Hung tlung ding tarik September 20 khin HSA Silchar Branch chun Freshers’ Meet voi 22-na le HSA Platinium Jubilee lawmna nei an ta, hi huna hin ṭhuoitu thlang thar hai nina inhlanna nei ning a tih.

CCPur HSA PJ Football Tournament zinga ṭan ding

2014-09-07T21:30:00.000+05:30

Tuiṭhaphai, September 7, 2014: Hmar Students’ Association (HSA), Churachandpur JHQ Platinum Jubilee Football Tournament Qualifying Round chu zing-ah September 8 chawhnung dar 2:00 khin Saikot Khelmuol-ah ṭan ning a tih.

Hi tournament hongna hunser hi hmang ning a ta, khuollien dingin Kuki Students’ Organisation (KSO) GHQ president Paotinthang Lupheng chu hmang ning a ta, khuolzaum-in Mizo Zirlai Pawl (MZP) Manipur HQs president Paul Lalchhanhima hmang ning a tih.

Hi huna ṭhang ding hin mitin ngainatakin HSA JHQ CCPur le Organising Board chun an fiel.

Hi tournament a hin CCPur huom sunga HAS member hai le Unit tina ṭhuoituhai a kim thei ang taka ṭhang seng dingin ṭhuoitu le huoihottuhai chun ngenna le inhriettirna an siem bak-ah, chawhnung dar 1:30-ah Saikot tlung kim seng dingin an ngen nghal bok.

“Hun indik taka ṭan pei ning a ta, hmatieng peia hun vong indiknaw leia inkhel theilo an um pal khomin anni mawphur a nih,” tiin Organising Board chun an hril. Hi inkhelnaa hin tulai a dan thar tak hmang a ni ding thu an hril bok.

Programme

Time: 2:00 PM
Comperes: Nk. Esther Thiek & Pu Joshua R Joute
Opening Prayer: Rev. Lalngailien Puruolte, Youth Cordinator, RPC NEI
Keynote Address: Richard Laltanpuia President, HSA JHQ, CCPur
Presentation : Organising Board
Special No: Platinum Jubilee Group Singers’
Speech: Guest of Honour, Chief Guest
Inauguration of Tournament: Chief Guest
Kick Off: HSA, Saikot v/s HSA, Rengkai B

FIXTURE CHU HUNG INSUO PEI NING A TIH

HSA Platinum Jubilee Street Corner Campaign ropui taka nei

2014-09-07T01:45:00.001+05:30

By LRS Puruolte

CCPur, September 6, 2014: Hmar Students’ Association (HSA) chun an Platinum Jubilee le inzawmin Street Corner Campaign chu September 6 sun dar 12 anthawka zantieng dar 6 inkar sung khan Tuithaphai sunga Hmar khawtin fangin ropui le puithu takin an nei.

Hi hun hi Sinlung Royal Riders’ (SRR) leh a bul anthawka a tawp chen HSA ditsaktu le ngainatuha’n an motor hai leh an ṭawiawm bak-ah, khaw tum tuma lo ṭawiawmtu an ṭhahnem thei hle. Hi hun a hin HSA Platinum Jubilee Celebration le inzawma Event Coordinators haia inthawk HSA Platinum Jubilee lawm dan ding chungthu, tuchen a hmalaknahai le thuhril tawitete ngaithlak a ni a; HSA Platinum Jubilee Theme Song, HSA PJ Group Song, Solo, Live Band HSA PJ Band le Sinlung Royal Riders’ Sinlung Gurup (Live Band) haiin mipui hai hla le rimawiin an inawi a, mipui mit le na a suktlai hle. Tiddim Road line a lem chun Traffic a sukbuoi pha met a nih.

Hi hun thiltum puong a um hai lai HSA Platinum Star Hunt Audition Round chu Pu HL Daka Hall, HSA Campus, Rengkai, Churachandpur (Manipur)-ah September 13 anthawka ṭan a ni ding thu, HSA Platinum Football Tournament Qualifying Round/ Trail khawm Tuithaphai/ Churachandpur Joint Headquarters level-a mi chu September 8 anthawka ṭan a ni ding thu hai puong a nih.

Hi hun a hin Donation Box a mi ṭhahnemngai haiin an phal ang tawk tawk sum an thawlawm tawl a, hi sum hi HSA hmalakna le inzawma hlu taka hmang a ni ding thu HSA PJCC Event Coordinator in a hril bawk.

HSA Education Fund khawm tuta hma khan indin ṭan a lo ni tah a, hi Education Fund hi nakie tieng Hmar nau inchuklai lekhathiem thei tak tak tamtakin an la sawr ṭangkai besei a nih. Tuhin hi le inzawm hin Bank Account khawm hawng a lo ni tah a nih. HSA Education Department-in Education Fund hi enkai a tih. Inhnikna nei hai ta dingin HSA GHQ ṭhuoituhai indawn chieng thei a ni bawk thu HSA PJCC i/c Media (Publicity) chun a hril.

HSA PJ Live Band a hin Tv. Stephan P. Songate (Guiterist), Tv. Japhet Hranngul (Basist), Tv. Joseph Remruotsang (Drummer) hai hi an nih a insit an um naw hle. Chuongang bawka insit umlo HSA PJ Group Songs Tv. Vanlalchhunga Joute, Nk. Lalrindiki, Nk. Clearance Mawite, Nk. Priscilla Lalliensung Darngawn hai an ni a, anni hin PJ Theme Song khawm audio-in an khum zo tah nghe nghe a nih. Hun sawtnawte-ah HSA website-ah an hla khum hi upload ning a tih. Anni sak hi HSA PJ Theme Song Demo a hmang ding a nih, tiin HSA PJCC chun an hril bawk.

Tulaia rawlthar laia malzaia inlar thar mek Nk. Grace Famhoite in “Aw HSA, Aw HSA...” ti hla mipui a hang inawi ngat nawk lem chun mipui mit-le-na a tlai hle. Chu chauh khawm chu a la ni nawk nawh! Pu Lien Shakum-in “Punk Pawisa Neilo ti le Bithu D’” ti hla a hei sak nawk pei lem chun mipui an um ṭawk ṭawk thei naw hiel a nih. Tawp zai khawm rel an tak pha hiel.

Hmar ni sukhlutu laia mi Sinlung Royal Riders’ (SRR) Band (Sinlung Gurup) Pu David Buhril (Drummer & Singer), Pu Nicky Joute (Lead Guiterist), Tv. Blessing Buhril (Rhythm Guiterist), Tv. Immanuel Pulamte (Bass Guiterist) hai an nih. Hmar hi Pathien zarin ei lo duoi naw zie an lang chieng hle. Pu David Buhril-in “Pistol Puokruk” a hang sak lem chu mipui khawm a hip hle a, inlirthei inlawn khom a sukbuoi pha hiel. Press inlar tak takin hi hun hi an hung cover bawk. Hmatienga Event hrang hrang la um hai phur thar a um hle. Grand Finale huna lem chu an hawi ding ziet lo ngaituo tham a nih. MDCs/MLA Music Nite khawm la nei tum niin chanchin ei dawng bawk.

Hi hun hi Hmar Inpui president le general secretary khawmin an ṭawiawm a. Zantieng dar 6pm an riin Ngurte khuo-ah hun dit khawplo takin suktawp a nih.

HSA Platinum Jubilee lawmna le inzawm hin HSA General Assembly neina hmun hmasatak Ngurte, Tuithaphai/Churachandpur-ah tu kum December 11-14 khin nei dinga riruong a nih. Hi huna hin India ram le khawvel huopa Hmar inchuklai le Hmar MDCs, MLA, Officers han fiel an ni angin an hung uop beisei a nih. Hi hun ropui tak hi Central le State Sawrkar tienga milien mi lal hai khawmin fiel an ni ang ngeiin an hung uop ve ngei dinga beisei a ni bawk.

Hmatienga HSA Platinum Jubilee lawmna le inzawm hin Platinum Choir Hunt, Cultural Dance Competition, Debate, Traditional Sports le a dang dang khawm Item la nei tum pei niin chanchin ei dawng. Hi hun mi ṭhuoi tlungtu ei Pathien hring le hi hun hlawtlingna ding a hung hai po po le chanvo peka um anga mani chanvo ngai pawimaw a sukpuitlingtu, hun hmangna hun le hmun haia lo ṭawiawmtu hai po po bak-ah Donation Box-a ṭhahnemngaina suklanga thilpek le thawlawm thlaktuhai po po kuomah HSA PJCC chun lawmthu a hril.

Shillong HSA special conference hmasatakna ding nei

2014-09-07T01:26:00.000+05:30

Shillong, September 7, 2014: Zani September 6 (Inrinni) zing dar 9:30 khan Hmar Students’ Association (HSA), Joint Headquarters (JHQ), Shillong huoihotna hnuoi-ah Shillong HSA conference hmasatak ding Pu Rohminglien Buhril In, Sylvan House, Cleve Colony, Shillong-ah nei a nih.

Hi special conference a hin Shillong HSA JHQ hnuoia Unit hrang hrang 5-a haia ṭhuoituhai, Shillong JHQ le General Headquarters ṭhuoituhai an fekhawma, chawhnung dar 4 vel chen rorelna hun nei a ni a, ruoi inhnik tawk tak kiltlang a ni bok.

Hi inkhawmnaa thurel ṭhenkhat hai chu – HSA JHQ Shillong hmingin Edu Fest huoihot nisien ti niin, Edu Fest-a hin Career Guidance, Leadership Training, Coaching le Educational Awareness Programme hai nei dinga ti a nih. Conference chun HSA Annual Magazine sutsuok nisien ṭha an ti tlang bok a, Editorial Board hai insiem a, kum nawk tieng khin sutsuok dinga ti a nih. HSA inopdan hai khom member ha’n an hriet theina dingin tiin HSA Inopdan Bu (Constitution)-a JHQ hmang dinga zieklanga um hai chu a hranin sutdoka, Unit tina sem dar nisien ti a ni bok.

HSA ṭhuoituhai bak-ah Shillong tlanga Hmar mi poimaw mi iemanizat hai khom conference hung uop dingin fiel an ni a, special conference-a ṭhang po hi mi 50--60 bawr vel an nih. Ruoi kil zo hin September 25-a Shillong HSA puol bika HSA Platinum Jubilee lawmna ding le inzomin inṭhungkhawm niin, hun tawp tieng hla le rimawi remin hun inhoi taka hmang a ni zoin zan dar 9 vel khan ṭin dar a nih.

Doctorate degree hmu thar

2014-09-06T07:32:00.000+05:30

Aizawl, September 6, 2014: Tv (Dr). Zomuana Zote, S/o Tlanglawma, Kanan Veng, Aizawl chu Department of Library & Information Science, Mizoram University (MZU) chun thla hmasak August 25, 2014 khan Doctorate Degree a lo inhlân tah.

A thesis ziek hi “Resource Generation & Mobilisation in College Libraries in Mizoram” ti a nih.

Dr. Zomuana Zote hin subject 2 ah Master Degree neiin, kum 1993 khan NEHU hnuoi-ah MA (Sociology) ṭha taka a zo hnungin MZU hnuoi-ah M.Lib a'nchûk nawk a. M.Lib hi First Class-a pass in Gold Medallist a ni nghe nghe a nih. M.Lib a zo hnung hin research (Ph.D) thaw nawkin August 25 khan MZU chun Doctorate Degree a lo inhlân fel tah a nih. Ama hi Khawlian (Mizoram) khuo suok niin tuhin Kanan Veng, Aizawl-ah in-le-lo nghet tak neiin sungkuo a khawsa mek a nih. Ama hi Govt. Aizawl North College-a Librarian sin chel lai zing a ni bawk.

HSA PJCC ha'n Manipur chief secretary inhmupui

2014-09-05T00:05:00.001+05:30

Imphal, September 4, 2014: Voisun khan Hmar Students Association (HSA) Platinum Jubilee Celebration Committee (PJCC) honorary chairman Dr. John Pulamte le HSA CEC member Hrilsangmawi hai chun Manipur chief secretary PC Lawmkunga chu a office chamber-ah an inhmupui a, kum tawp December-a HSA Platinum Jubilee 'main celebration' huna Choir Festival-a khuollien dingin an fiel.

Fiel a nina chu PC Lawmkunga hin a lo remti el khelah Ngurte khuo-a HSA rama Ecological Park riruonga um mek chu Eco-Tourism pakhata hlangkai a ni ngei theina dingin hma lakpui a lo intiema, Churachandpur DC fethlengin a'nhma tienga Detail Project Report (DPR) buotsai dingin a'nfui bok ti thu HSA PJCC publicity (media) LRS Puruolte chun a hril.

Motor inlawn hai an dap

2014-09-04T23:56:00.000+05:30

CCPur, September 4, 2014 (HT): Traffic Police le District Police ṭhangruol hai chun zani hmasa khan Tuibuong Peace Ground-ah motor inlawn vel hai check an thaw ṭan.

Motor inlawn hai hi motor lekha, driving licence le helmet an khum le khumnaw check an ni bakah kum tlinglo (under-aged) motor khal an um le umnaw khawm enfel a nih. Zani hmasa khan mi 36 an man a, TR5 receipt katin motor pakhatah Rs. 100/- pei fine an inchawitir.

Chun, zanikhan DTO Office tuol, Tiddim Road-ah zanikhan motor dapna an sunzawm nawk a, mi 30 chuong an man nawk.

Teacher transfer hai an post pangngai-a an la thawk ding

2014-09-04T23:53:00.000+05:30

CCPur, September 4, 2014 (HT): Director of Education (s), Govt. of Manipur in August 27, 2014 nia Teachers hai transfer & posting order an suo naa CCPur District sunga Primary Teacher 225 an ṭhang a, hienghai laia 48 hai chu CCPur district puotienga sawn an nih.

Teacher sawn (transfer & posting) hai lai hin CCPur town sunga thawk teachers 86 an ṭhang a nih.

Teacher transfer-a um hai chu September 4, 2014 chena an thawkna ding senga joining report pe dinga inhriettir an ni a, sienkhawm tukum session laklaw lai a ni leiin tukum chu an thawkna pangngai bawka umin an la thawk ding a nih tiin ei thu dawngna chun a hril.

Mary Kom a lungawi nawh

2014-09-04T23:51:00.000+05:30

New Delhi, September 4, 2014 (HT): Bollywood actress Priyanka Chopra in a chanchin ‘Mary Kom’ ti film an changna Manipura theatres/cinema Hall haia insuo lo ding ngirhmuna a umna thuah Olympic medalist boxer Mary Kom chun a lungawinaw thu a hril.

A film hi Manipur-a insuo a ni ngei theina dingin theitawp suoa hma a lak thu a hril a, sienkhawm a hlawsam niin a hril. Manipur phairam helpawl han Hindi film hrim hrim Manipur Cinema Hall haia insuo an khap (ban) a nih.

Boxing ka ṭan hlim lai chun ka chanchin film-a siem la hung ning a tih ti hi ka ngaituo phak ngai naw a, sienkhawm Pathien ṭhatna le India mipui hai ditsakna leiin ka chanchin hi film-a siem a hung ni thei chau a ni thu Mary Kom chun a hril.

Dr Chaltonlien Amo Tipaimukh bielah

2014-09-04T23:46:00.000+05:30

CCPur, September 4, 2014 (HT): Dr Chaltonlien Amo, Chairman, Hill Areas Committee, Manipur le President, HNU chu vawituk hin Imphal suoksanin Tipaimukh A/C pan a tih.

NH-150 a km. 223-na hmuna mimkeiin lampui a suksiet en a ta, hi taka inthawk Taithu pan a ta, Taithuah zan khat riek a ta, Sept. 5, 2014 in Pherzawl-ah zingbu fang a ta, chu zova CCPur tieng hung pan nawk a tih.

Platinum Jubilee Souvenir Board le Election

2014-09-04T18:54:00.000+05:30

Shillong, September 4, 2014: Thla hmasak August 24 khan Hmar Students’ Association (HSA) Extended CEC inṭhungkhawmna chu Shillong hmuna nei a ni a, hi inṭhungkhawmnaa hin HSA Platinum Jubilee Souvenir chungchang ngaituo niin Editorial Board a hnuoia ang hin indin nghal a nih.

Editor: Tv Robert Wilson Thilsong
Asst. Editors: Pu Lalremkuong Pakhuongte, Tv. Lalremlien Neitham
Members: HSA Shillong President & Secretary, Tv. Vanlalmuon Pakhuongte, Dr. Crossthang Sanate, Tv. Simon L Infimate, Tv. Lienthanglur Khawzawl
Ex-Officio: President & Secretary, GHQ

HSA Imphal JHQ le Silchar Branch haiin ṭhuoitu inthlangna an nei thar ding le inzoma GHQs-a inhriettirna an siem chu ngaituo a ni a; September 13-a Imphal JHQ ṭhuoitu inthlangna neipuitu dingin Pu Hrilsangmawi, HSA GHQ CEC member ruot a nih. September 7-a HSA Silchar Branch ṭhuoitu inthlangna neipuitu dingin Tv. Lalringum Riengsate, Dy. Secretary, Assembly Secretariat, GHQ ruot a ni bok. Anni hin inthlangna ding le inzoma ṭul le poimaw hai bawzui dinga dande nghal an ni thu, HSA thusuok chun a tarlang.

HSA Platinum Jubilee Street Corner Campaign

2014-09-04T18:40:00.000+05:30

Tuiṭhaphai, September 4, 2014: Hmar Students’ Association (HSA) Platinum Jubilee Celebration le inzomin hung tlung ding September 6 (Inrinni) sun dar 12 le chawhnung dar 4 inkar Tuiṭhaphai sunga Hmar khuotin fangna “HSA Platinum Jubilee Street Corner Campaign” nei ning a tih.

Hi campaign hi Thingchom khuo anthok inṭanin, kum tawp December 11-14 sunga HSA Platinum Jubilee Celebration Grand Finale innghatna hmun ding Ngurte khuo-ah suktawp ning a tih.

Street Corner Campaign a hin Live Music Band le Hmar hlasak thiem le rimawi siem thiem tak tak ha’n Talent Show nei an ta, hun kar lak-ah thuhril ngaithlakna um bok a tih. Hi hun hi Sinlung Royal Riders (SRR) khomin an Bike hai leh an ṭawiawm ve ding niin ei thu lakna'n a hril.

HSA Platinum Jubilee Celebration Committee (PJCC) chun, “Hi hun hi hnam darthlalang pakhat ve an lei le Platinum Jubilee urlawkna a ni bok leiin mani ṭhahnemngaina insuo a, mani motor – two, three, four-wheeler hai chawia ṭhang seng dinga fiel ei nih,” tiin an thusuok chun a tarlang.

PJCC chun, mani remchangna hmuna hai hi Campaign hi lo zom ding le khuo i hraw ding hai khawtlang ṭhuoitu le mipuiin hlutsaka lo uop seng dingin ngenna an siem a, ṭhahnemngai hai ta ding khomin Donation Box siem a ni ding thu le mani ngam ang tawk pek/thawlawm thei a ni ding thu an thusuok chun a tarlang bok.

Hmar thlatin chanchinbu Zawlbuk Today tlangzar

2014-09-04T17:59:00.001+05:30

Guwahati, September 4, 2014: Voisun khan Hmar ṭonga thlatin suok chanchinbu thar full-coloured hmasatak ding Zawlbuk Today chu Guwahati khawpui-ah tlangzar a lo ni tah.

Zawlbuk Today a hin thupui hrang hrang thuziek inchuon a ni a; thusep bak-ah gospel thu, interview-na, tienami tawi, bu-le-hme, rimawi, thlirletna, khuolzinna, thu-le-hla, fasion, arts, entertainment, sports, home décor, health, events, HSA chanchin le a dang dang hai inchuon a ni bok.

Hi magazine hi Guwahati anthoka sutsuok niin, Hmar ṭong hmang hai umna Haflong, Churachandpur, Aizawl, Shillong le Delhi a hai thondar mek a nih. Hi thlatin chanchinbu thar hi pakhat-ah Rs. 80-a zor suok a nih.

Shillong HSA Special Conference

2014-09-03T19:42:00.000+05:30

Shillong, September 3, 2014: Hung tlung ding Inrinni September 6 zing dar 9:30 khin Hmar Students’ Association (HSA), JHQ, Shillong Special Conference chu Pu Rohminglien Buhril In, Sylvan House, Cleve Colony, Shillong-ah nei ning a tih.

Zani zan khan HSA JHQ Shillong hnuoia Unit hrang hrang hai chun inṭhungkhawmna neiin, Unit tin anthoka thu putlut hai nguntaka entlangna nei a ni a, Conference Agenda dinga thlang suok hai chu a hnuoia hai hi an nih.

1. Education Awareness Programme (Khaddum Unit).
2. High School hai khom Unit hnuoi-ah inṭhangtir thei ve nisien (Sawrtui Unit).
3. HSA Quarterly Magazine sutsuok thei nisien (NEHU Unit).
4. Kum khat-ah voikhat bek HSA JHQ huoppin Career Guidance ti thupui hmangin Seminar nei nisien (Rakhen Unit & Sawrtui Unit).
5. Kum khat-ah voikhat bek Leadership Training nei hlak nisien (HSA JHQ).
6. HSA hmingia Hostel siem dan ding (Rakhen Unit).
7. HSA Unit Contribution Fee le Membership Fee chungchang (HSA JHQ).
8. Unit visit ngun nisien (Khaddum Unit).

Jorhat Hmar Welfare

2014-09-03T16:56:00.002+05:30

Jorhat, September 3, 2014: Jorhat Hmar Welfare hai chun thusuok siemin, nikum 2013 August 11 khan Jorhat-a Hmar um hai chun Jorhat Hmar Welfare an indin thu tarlangin, Jorhat-a inzin buoina le harsatna tuok an um chun inthlahrung loa bel thei zing an ni thu an hril.

A hnuoia hi Jorhat Hmar Welfare hai le an mobile no hai chu a nih.

President: Kaprosang Joute - 9435718225
Advisor: Samuel Darsuolal - 9854040985
General Secretary: Jonathan Lalthanglien Inbuon - 8822891765
Education Secretary: Lalhrilthang Hmar - 8011544630