ttntv

ஜனநாயகப் போராளிகள் கட்சியின் தலைமைச் செயலகத்தில் நடைபெற்ற கேணல் கிட்டு உட்பட பன்னிரு வேங்கைகளின் நினைவேந்தல் நிகழ்வு

2018-01-16T05:02:00.001-08:00

தமிழ் மக்களது உரிமைப்போரின் நியாயப்பாடுகளை உலகின் செவிகளுக்கு சொல்லி தாயகவிடுதலைக்கு பலம்சேர்க்க சர்வதேசம்சென்ற எங்கள் ஊர்க்குருவி தன்தேசம்நோக்கி வந்தபோது காந்திய தேசத்தின் நயவஞ்சகசதிவலையில் சிக்கி தன்மீது தீமூட்டி தன் தாய்த்தேசத்திற்கு பலம்சேர்த்த பத்துவேங்கைகளின் 25 வருடநினைவேந்தல்கள் இன்றையதினம் கைவேலி புதுக்குடியிருப்பில் அமைந்துள்ள ஜனநாயகபோராளிகள் கட்சியின் தலைமைச்செயலகத்தில் நடைபெற்றது.

நீங்கள் நெஞ்சினில் தாங்கிய தாயககனவினை நிச்சயம் எடுத்தாழ்வோம்.
ஊடகபிரிவு ஜனநாயக போராளிகள் கட்சி

விடுதலைப்புலிகளின் தீர்மானத்தை நோக்கி கூட்டமைப்பை நகர்த்துவோம் , ஜனநாயக போராளிகள் கட்சி

2017-12-31T11:48:00.001-08:00

விடுதலைப்புலிகளின் தீர்மானத்தை நோக்கி கூட்டமைப்பை நகர்த்துவோம் என தமிழீழ விடுதலைப்புலிகளின் அரசியல் பிரிவான ஜனநாயக போராளிகள் கட்சியின் ஊடகப்பேச்சாளர் துளசி அவர்கள் தெரிவித்துள்ளார்.

ஜனநாயக போராளிகள் கட்சியினால் வவுனியா குருமன்காட்டில் உள்ள விருந்தினர் விடுதியில் ஒழுங்கு செய்யப்பட்டிருந்த ஊடக சந்திப்பின் போதே இவ்வாறு தெரிவித்திருந்தார்.

இது தொடர்பாக அவர் மேலும் தெரிவிக்கையில்,”தமிழ் தேசிய கூட்டமைப்பிற்குள் எவ்வாறான முரண்பாடுகள் இருக்கின்றதோ இல்லையோ ஒட்டு மொத்தமாக தமிழர்கள் தங்களது ஒற்றுமையின் ஊடாக தமிழ் தேசிய கூட்டமைப்பையே இதுவரை காலமும் பலப்படுத்தி வந்திருக்கிறார்கள்.

அந்த வகையில் தமிழ் தேசிய கூட்டமைப்பின் ஊடாக தமது அரசியல் முகவரியை பெற்றுக்கொண்டவர்கள் தாயக பிரதேசத்திலேயே தமிழ்த் தேசிய கூட்டமைப்பை சிதைத்தழிக்கும் நடவடிக்கையில் ஈடுபட்டுள்ளனர். விடுதலைப்புலிகளினால் ஆரம்பிக்கப்பட்ட தமிழ்த் தேசியக் கூட்டமைப்பு தமிழர்களது அரசியல் வடிவமாக பயணிப்பது காலத்தின் கட்டாயமானதாகும்.

அந்தவகையிலேயே தமிழ் தேசிய கூட்டமைப்பை பாரிய வெற்றிக்கு இட்டுச்செல்வதற்காக தமிழீழ விடுதலைப்புலிகளின் அரசியல் பிரிவான ஜனநாயக போராளிகள் கட்சியானது தனது முழுமையான ஆதரவை தமிழ் தேசிய கூட்டமைப்பிற்கு வழங்கியிருக்கிறது.

தமிழ் தேசிய கூட்டமைப்பிற்குள் சில விமர்சனங்கள் இருக்கலாம், கூட்டமைப்பிற்குள் இருப்பவர்களில் சில விமர்சனங்கள் இருக்கலாம். ஆனால் தமிழ் தேசிய கூட்டமைப்புதான் தமிழர்களின் ஒற்றுமையின் வெளிப்பாடு.

தமிழ் தேசிய கூட்டமைப்பு 2001ம் ஆண்டு உருவாக்கப்பட்ட போது அந்த கட்டமைப்பில் இருந்தவர்களை விட விடுதலைப்புலிகளில் மிக திறமையான அரசியலாளர்கள் இருந்தார்கள். ஆனால் காலத்தின்தேவை கருதியே தமிழ் தேசியத்திற்காக ஒன்றினைத்து தேசியத் தலைவர் கூட்டமைப்பை உருவாக்கியிருந்தார்.

இந்தநிலையில் தமிழர்களிற்கான தீர்வு விடயத்தில் தமிழீழ விடுதலைப்புலிகளினால் எட்டப்பட்ட தீர்மானத்தை நோக்கித் தமிழ்த் தேசியக் கூட்டமைப்பை நகர்த்துவதற்கான முயற்சிகளை நாங்கள் மேற்கொண்டுள்ளோம்” என துளசி மேலும் தெரிவித்தார்.

ஜனநாயக போராளிகள் கட்சியை முடக்குவதற்க்கான மற்மொரு சதி, புலனாய்வுத்துறை தகவல்

2017-12-27T13:29:00.001-08:00

தமிழீழ விடுதலைப்புலிகளின் அரசியல் பிரிவான ஜனநாயக போராளிகள் கட்சியை முடக்குவதற்க்கான மற்மொரு சதி தயாராகிவருகின்றது,

தமிழ்த் தேசியக் கூட்டமைப்பினை சிதைக்க எடுத்த திட்டம் ஜனநாயக போராளிகளால் முறியடிக்கப்பட்டதை அடுத்தே, கயவர்களின் புதிய திட்டமாக ஜனநாயக போராளிகள் கட்சியை முடக்க புதிய முயற்சிகள் முன்னெடுக்கப்பட்டு வருகின்றது.

எதிரிகளின் பிண்ணணியுடன் புதியகுழுவொண்று தயாராகி வேலைகளை ஆரம்பித்துள்ளது,

புலம்பெயர் நாடுகளிலுள்ள போராளிகள் சிலரும் இந்த விடயத்தில் தொடர்பு பட்டுள்ளதாக தெரிய வருகிறது , தெரிந்தோ தெரியாமலோ நீங்கள் எதிரியின் வலையில் வீழ்ந்துள்ளீர்கள், நீங்கள் செய்த தவறுகளுக்கான விலையை என்றோ ஒரு நாள் கொடுத்தே ஆக வேண்டும் ,

தமிழீழத்துக்கான போராட்ட வடிவத்தை மாற்றலாம் , ஆனால் போராட்டத்தை சிதைப்பதை யாராலும் ஏற்றுக்கொள்ளமுடியாது.

புலம்பெயர் நாடுகளில் வசிக்கும் புலனாய்வு பிரிவைச் சேர்ந்த போராளிகளே உங்கள் பணியை தொடங்குவதற்கான நேரம் வந்து விட்டது,

இந்த தகவலை புலிகளின் புலனாய்வுத்துறை கண்டுபிடித்துள்ளது, எனவே இது தொடர்பாக போராளிகள் மக்கள் விழிப்பாக இருக்கவேண்டும்.

புலனாய்வுத்துறை,
தமிழீழ விடுதலைப்புலிகள், தமிழீழம்

தமிழீழ விடுதலைப் புலிகளை நாம் என்றைக்கும் எதிர்த்ததில்லை , தமிழரசுக்கட்சி

2017-12-27T11:05:00.001-08:00

அண்மையில் யாழில் நடைபெற்ற ஊடகவியலாளர் மாநாட்டில் வடமாகாண அவைத்தலைவரும், தமிழரசுக் கட்சியின் இணைச் செயலாளருமான சி வி கே சிவஞானம் தெரிவிக்கையில்,

தமிழீழ விடுதலைப் புலிகள் உறுப்பினர்களை தமிழரசுக் கட்சி என்றும் எதிர்த்தது கிடையாது, ஜனநாயகப்போராளிகள் தான் விடுதலைப்புலிகள் என்று தெரிந்தபின்னேயே இன்று நாம் அவர்களுடன் இணைந்து செயற்பட முடிவெடுத்துள்ளோம் ,

கடந்த நாடாளுமனற தேர்தலில் ஆசனங்கள் தொடர்பாக செய்தியாளர் கேட்ட போது,

ஆம் ஆசனங்கள் கேட்ட்து உண்மைதான் , அப்பொழுது அதை வழங்க முடியவில்லை என்றும் ஆனால் அதன் பின்னரான காலப்பகுதி முதல் இன்று வரை ஜனநாயகப் போராளிகளுடன் மிக நெருக்கமாக உள்ளோம் என்றும் தெரிவித்தார்.

மகிந்தவுக்கு ஆதரவான தமிழ் வேட்ப்பாளர்களே, இது தான் இறுதி எச்சரிக்கை

2017-12-27T03:26:00.000-08:00

மகிந்தவின் கட்சி சார்பாக வடக்கு கிழக்கு மாகாணங்களில் போட்டியிடும் தமிழ் வேட்ப்பாளர்களே, உங்கள் அரசியல் தலைவர் மகிந்த தமிழர்கள் பற்றி சிங்கள மக்களிடம் என்ன சொல்லுகிறார் என்று கொஞ்சம் கேளுங்கள்,

ஹோமகமவில் நேற்றுமுன்தினம் நடந்த சிறிலங்கா பொதுஜன முன்னணியின் கூட்டம் ஒன்றில் உரையாற்றிய போதே மகிந்த இவ்வாறு கூறியுள்ளார்.

“புதிய அரசியல் அமைப்பை உருவாக்கி இந்த நாட்டைத் துண்டாடும் சதித்திட்டம் முன்னெடுக்கபட்டு வருகிறது.

வடக்கு -கிழக்கு இணைப்பு, அதியுச்ச அதிகாரங்கள் என அனைத்தையும் தமிழர்களுக்கு வழங்கி இந்த நாட்டைப் பிளவுபடுத்தும் செயற்பாடுகளை முன்னெடுத்து வருகின்றனர்.

இந்த நாடு பிளவுபட வேண்டுமா அல்லது இணைந்து செயற்பட வேண்டுமா என்பதை இந்த நாட்டு மக்கள் தீர்மானிக்க வேண்டும்.

இந்த நாடு பிளவுபடுவதை விரும்பாத அனைவரும், இம்முறை தேர்தலில் எம்முடன் கைகோருங்கள்.

நான் கடந்த அதிபர் தேர்தலில் தோற்கவில்லை, அனைத்துலக சக்திகளின் மூலமாக தோற்கடிக்கப்பட்டேன்.

இந்த அரசாங்கத்தை வீழ்த்தும் பயணத்தில் அனைவரும் ஒன்றிணைவோம்,” எனவும் அவர் குறிப்பிட்டார்.

இவைகளை தெரிந்தும் மகிந்தவின் பணத்துக்கு விலை போய் உங்கள் தாய் நாட்டை தாரை வார்க்க துணிந்து விட்டீர்கள்,

நீங்கள் வெல்லப்போவது கிடையாது. ஆனாலும் மகிந்தவுக்கு ஆதரவாக தேர்தலில் நின்று விட்டு பின்னர் தமிழன் என்று சொல்லி எமது இனத்தை அவமதிக்க வேண்டாம் ,

சம்பந்தனிடம் நலம் விசாரித்தார் விக்னேஸ்வரன்

2017-12-27T03:02:00.002-08:00

தமிழ்த் தேசியக் கூட்டமைப்பின் தலைவர் இரா.சம்பந்தனை, வடக்கு மாகாண முதலமைச்சர் சி.வி.விக்னேஸ்வரன் நேற்றுச் சந்தித்து நலம் விசாரித்துள்ளார்.

உடல்நலக் குறைவினால், இரா.சம்பந்தன் கடந்த வியாழக்கிழமை கொழும்பு தனியார் மருத்துவமனை ஒன்றில் அனுமதிக்கப்பட்டார்.

நேற்றுக்காலை அவர், சிகிச்சைகள் முடிந்து, முழுமையாக குணமடைந்த நிலையில், வீடு திரும்பினார்.

எதிர்க்கட்சித் தலைவரின் அதிகாரபூர்வ இல்லத்தில் தங்கியிருந்த இரா.சம்பந்தனை நேற்று பிற்பகல் வட மாகாண முதலமைச்சர் சி.வி.விக்னேஸ்வரன் சந்தித்து நலம் விசாரித்தார்.

சுமார் 30 நிமிடங்கள் வரை இந்தச் சந்திப்பு இடம்பெற்றதாக தகவல்கள் தெரிவிக்கின்றன.

கேப்பாபுலவில் 132 ஏக்கர் காணி நாளை விடுவிப்பு – ரூபவதி கேதீஸ்வரன்!

2017-12-27T02:51:00.001-08:00

முல்லைத்தீவு கேப்பாபிலவு மக்களின் நிலமீட்பு போராட்டம் இன்று(27) 302 ஆவது நாளாக நடைபெற்று வருகிறது.

இந்நிலையில் மக்களின் காணிகளில் 132 ஏக்கர் காணி நாளை(28) காலை பத்து மணிக்கு விடுவிக்கப்படவுள்ளதாக முல்லைத்தீவு மாவட்ட செயலாளர் திருமதி ரூபவதி கேதீஸ்வரன் தெரிவித்துள்ளார்.

கடந்த மாசி மாதம் முதலாம் திகதி 138 குடும்பங்களுக்கு சொந்தமான 482 ஏக்கர் காணிகளை விடுவிக்குமாறு மக்கள் போராட்டத்தை ஆரம்பித்தனர்.

இந்நிலையில் குறித்த போராட்டம் 302 ஆவது நாளை கடந்து முன்னெடுக்கப்பட்டு வருகின்றது.வெயில், மழை, பனி என்று பாராது அம்மக்கள் 10 மாதங்களாக தொடா்ச்சியாக போராட்டத்தை முன்னெடுத்து வருகின்றனர்.

அத்துடன் தமது காணிகள் முழுமையாக விடுவிக்கப்படாமல் தமது போராட்டம் நிறைவு பெறாதென மக்கள் தெரிவிக்கின்றனர்.

இந்நிலையில் 132 ஏக்கர் காணி நாளை (28) விடுவிக்கப்படவுள்ளதாக முல்லைத்தீவு மாவட்ட செயலா் ரூபவதி கேதீஸ்வரன் தெரிவித்துள்ளமை குறிப்பிடத்தக்கது.

அத்தியவசியப் பொருட்களுக்கு கட்டுப்பாட்டு விலை!

2017-12-27T02:30:00.002-08:00

பண்டிகைக் காலத்தில் அத்தியவசியப் பொருட்களை கட்டுப்பாட்டு விலையில் விற்பனை செய்ய இலங்கையின் வாழ்க்கைச் செலவுக் குழு தீர்மானித்துள்ளது.

அதன்படி, இந்த கட்டுப்பாட்டு விலையானது எதிர்வரும் 2018ஆம் ஆண்டு ஏப்ரல் மாதம்வரை அமுலில் இருக்கும் என அறிவிக்கப்பட்டுள்ளது.

அரிசி, சீனி, பெரிய வெங்காயம், கிழங்கு, பருப்பு, ரின் மீன் மற்றும் நெத்தலி கருவாடு ஆகிய ஏழு பொருட்கள் மீதே கட்டுப்பாட்டு விலை அறிமுகப்படுத்தப்பட்டுள்ளது.

இந்த கட்டுப்பாட்டு விலையானது நாடளாவிய ரீதியிலுள்ள அனைத்து சுப்பர் மார்க்கெட்டுகள் மற்றும் சதொச வர்த்தக நிலையங்களில் நடைமுறையில் உள்ளதாக தொழில் மற்றும் வர்த்தக அமைச்சு அறிவித்துள்ளது.

இந்நிலையில், இப்பொருட்களை கட்டுப்பாட்டு விலையைவிட மேலதிக விலைக்கு விற்பனை செய்யும் வர்த்தகர்களுக்கு எதிராக சட்ட நடவடிக்கை எடுக்கப்படும் என நுகர்வோர் விவகார அதிகார சபை தெரிவித்துள்ளது.

தமிழீழ விடுதலைப் புலிகளை நாம் என்றைக்கும் எதிர்த்ததில்லை , தமிழரசுக்கட்சி

2017-12-27T01:31:00.002-08:00

அண்மையில் யாழில் நடைபெற்ற ஊடகவியலாளர் மாநாட்டில் வடமாகாண அவைத்தலைவரும், தமிழரசுக் கட்சியின் இணைச் செயலாளருமான சி வி கே சிவஞானம் தெரிவிக்கையில்,

தமிழீழ விடுதலைப் புலிகள் உறுப்பினர்களை தமிழரசுக் கட்சி என்றும் எதிர்த்தது கிடையாது, ஜனநாயகப்போராளிகள் தான் விடுதலைப்புலிகள் என்று தெரிந்தபின்னேயே இன்று நாம் அவர்களுடன் இணைந்து செயற்பட முடிவெடுத்துள்ளோம் ,

கடந்த நாடாளுமனற தேர்தலில் ஆசனங்கள் தொடர்பாக செய்தியாளர் கேட்ட போது,

ஆம் ஆசனங்கள் கேட்ட்து உண்மைதான் , அப்பொழுது அதை வழங்க முடியவில்லை என்றும் ஆனால் அதன் பின்னரான காலப்பகுதி முதல் இன்று வரை ஜனநாயகப் போராளிகளுடன் மிக நெருக்கமாக உள்ளோம் என்றும் தெரிவித்தார்.

நத்தார் தினத்தில் கியுபாவில் ஏற்பட்ட சோகம் - 39 பேர் வைத்தியசாலையில்

2017-12-26T13:25:00.001-08:00

கியுபாவில் ரெமீடியாஸ் நகரில் வானவேடிக்கை நிகழ்வின் போது ஏற்பட்ட விபத்தில் சிக்கி 39 பேர் காயமடைந்துள்ளனர்.

இவர்களில் பலரின் நிலை கவலைக்கிடமாக உள்ளதாக வைத்தியசாலை வட்டாரங்கள் தெரிவிக்கின்றன.

நத்தார் தினத்தை முன்னிட்டு ரெமிடியாஸ் நகரில் பல நூற்றாண்டு காலமாக நடத்தப்பட்டு வரும் கொண்டாட்ட விழாக்கள் கடந்த ஞாயிற்றுக் கிழமை முதல் ஆரம்பமாகி நடைபெற்று வந்தன.

இந்த விழாக்களில் சுற்றுலாப்பயணிகள் உட்பட ஆயிரக்கணக்கான மக்கள் கலந்து கொண்டிருந்தனர்.

இந்த நிலையில் நேற்று நத்தார் தினத்தையொட்டி பாரிய வான வேடிக்கை நிகழ்ச்சிகள் குறித்த பகுதியில் நடததப்பட்டிருந்தன.

இதன்போது திடிரென ஏற்பட்ட வெடி விபத்தினால் குறித்த வெடிகள் அனைத்தும் தொடர்ந்து வெடிக்க ஆரம்பித்தன.

இதனால் குறித்த நிகழ்சியை பார்க்க வந்த பார்வையாளர்களில் 39 பேர் காயமடைந்துள்ளனர்.

இதேவேளை, காயமடைந்தவர்களில் 20 பேரின் நிலைமை கவலைக்கிடமாக இருப்பதுடன், படுகாயமடைந்தவர்களில் 11வயது முதல் 15 வயதுவரையான 6 சிறுவர்களும் அடங்குவதாக, ஊடகமொன்று செய்தி வெளியிட்டுள்ளது.

தாயகமெங்கும் ஒருவித மர்மக் காய்ச்சல் , பலர் உயிரிழப்பு

2017-12-26T13:19:00.001-08:00

யாழ்ப்பாணம் மற்றும் முல்லைதீவு உட்பட பல மாவட்டங்களில் ஒரு வித மர்மக் காய்ச்சலால் பலர் பலியாகி வருகின்றனர்,

ஆனால் இது பற்றி அரசு எந்த ஒரு நடவடிக்கையையும் எடுக்கவில்லையென மாவட்ட வைத்தியர்கள் தெரிவிக்கின்றனர்.

வைத்தியசாலைகளுக்கு வரும் நோயாளர்களுக்கு சாதாரண காய்ச்சல் இருப்பதாகவும் தாமும் அதற்கான மருந்துகளையே கொடுப்பதாகவும், ஆனால் அவர்களுக்கு உயிரிழப்பு ஏற்படுவது தமக்கு அதிர்ச்சியளிப்பதாகவும் வைத்தியர்கள் தெரிவிக்கின்றனர்.

இது தொடர்பாக சுகாதார திணைக்களத்துக்கு தெரியப்படுத்தியும் அவர்கள் இதுவரை நடவடிக்கை எதையும் எடுக்கவில்லை என தெரிவிக்கப்பட்டுள்ளது.

வடக்கு மாகாண சுகாதார திணைக்கள பொறுப்பதிகாரி அவர்களே, வடக்கு மாகாண முதலமைச்சரே இது உங்களின் கவனத்துக்கு........

இந்த செய்தி இவர்களின் காதுகளுக்கு செல்லும் வரை செய்தியை SHERE செய்யுங்கள்.

விடுதலைப் புலிகளின் வெற்றியை சுனாமி எவ்வாறு திசை திருப்பியது?

2017-12-26T04:05:00.003-08:00

விடுதலைப் புலிகளுக்கும் இலங்கை இராணுவத்திற்குமான போர் 2005இல் தொடங்கப்படவிருந்த ஒன்று. ஆனால் 2004 ஆம் ஆண்டு இதே நாளில் ஏற்பட்ட சுனாமிப் பேரலை களத்தை திசை திருப்பியது. சுனாமி நிகழ்ந்திராவிடில் 2009 அழிவும் நிகழ்ந்திருக்காது. சுனாமி மக்களை அழித்தது மட்டுமன்றி களத்தை திசைதிருப்பி ஈழ வரலாற்றையே மாற்றிப்போட்டது.

கடந்த 2004 ஆம் ஆண்டு தலைவர் பிரபாகரனின் மாவீரர்நாள் உரை மிக முக்கியமான ஒன்று. இலங்கையில் முக்கியமான மாற்றங்களை எதிர்கொண்ட ஆண்டு அது. புலிகள் போருக்கு தயார் என்பதை அன்றைய உரையில் சூசகம் உரைத்திருந்தார் தலைவர் பிரபாகரன். அந்த உரையின் இறுதிப்பகுதி பின்வருமாறு அமைந்திருந்தது,

"இடைக்காலத் தீர்வுமின்றி, நிரந்தரத் தீர்வுமின்றி, நிலையான அமைதியுமின்றி, நிம்மதியான வாழ்வுமின்றி, நாம் அரசியல் வெறுமைக்குள் தொடர்ந்தும் சிறைபட்டுக் கிடக்க முடியாது. சிங்களத் தேசமானது தமிழினத்தை அரவணைத்து, இணைத்து வாழவும் விரும்பவில்லை. அதே சமயம், பிரிந்து சென்று தனித்து வாழவும் விடுவதாக இல்லை. இரண்டுங் கெட்டான் நிலையில் விடிவின்றி, விடுதலையின்றி, எதிர்காலச் சுபீட்சமின்றி சூனியமான அரசியல் இருட்டுக்குள் நாம் தொடர்ந்து வாழமுடியாது.

பொறுமைக்கும் எதிர்பார்ப்புக்கும் எல்லைக்கோடுகளுள்ளன. அந்த எல்லைக் கோடுகளை நாம் அடைந்து விட்டோம். இந்த நெருக்கடியான சூழ்நிலையிற் சிறீலங்கா அரசுக்கு நாம் அவசரமான அழைப்பு ஒன்றை விடுக்க விரும்புகின்றோம். அதாவது, நாம் முன்வைத்த இடைக்காலத் தன்னாட்சி அதிகார சபைத் திட்டத்தின் அடிப்படையில், நிபந்தனையற்ற முறையில், காலந் தாமதிக்காது பேச்சுக்களை ஆரம்பிக்குமாறு வேண்டுகோள் விடுக்கின்றோம்.

எமது இந்த அவசர வேண்டுகோளை நிராகரித்து, காலத்தை இழுத்தடித்து, எமது மக்களின் துயர வாழ்வை நீடித்துச் செல்ல சிங்கள அரசு முற்படுமானால், நாம் எமது தேசத்தின் சுதந்திரப் போராட்டத்தை முன்னெடுத்துச் செல்வதைத் தவிர எமக்கு வேறு வழியில்லை. எமது இந்த இக்கட்டான நிலையை, தமிழரின் இனப்பிரச்சினையில் அக்கறையுடைய உலக நாடுகள் கருத்தில் எடுத்து, எமது நியாயமான நிலைப்பாட்டின் அடிப்படையிற் சமாதானப் பேச்சுக்களை ஆரம்பிக்கும்படி சிறீலங்கா அரசிற்கு அழுத்தம்கொடுக்குமாறு வேண்டிக்கொள்கிறோம்."

புலிகள் போருக்கு தயார் என்பதை தலைவர் மேற்கண்டவாறு சூசகமுரைத்ததன் காரணம் 2003 இல் விடுதலைப்புலிகளால் சமர்ப்பித்த இடைக்கால தீர்வு வரைபு அன்றைய சனாதிபதியாக இருந்த சந்திரிகாவினால் நிராகரிக்கப்பட்டமையும் அதன் பின்னர் ஏற்பட்ட அரசியல் மாற்றங்களுமே. விடுதலைப் புலிகளின் வரைபிற்கேற்ப ரணில் (பிரதமர்) தலைமையிலான UNP அரசாங்கம் பேச்சுவார்த்தை நடத்தலாம் என ஆதரவு தெரிவித்திருந்தது.

ஆனால் நிறைவேற்று அதிகாரமுள்ள சனாதிபதியாக இருந்த சந்திரிகா அதை அடியோடு நிராகரித்தது மட்டுமன்றி தனது அதிகாரத்தைப் பயன்படுத்தி ரணில் வசமிருந்த பாதுகாப்பு அமைச்சர் உட்பட நான்கு அமைச்சுக்களை தானே எடுத்துக்கொண்டார். அத்தோடு பாராளுமன்றத்தையும் கலைத்துவிட்டு UNP அரசாங்கத்தைக் கவிழ்த்தார். மீண்டும் பொதுத்தேர்தல் 2004 ஏப்ரல் மாதம் நடந்ததில் அன்று கடுமையான இனவாதத்தை கக்கிவந்த JVP மூன்றாவது பெரும் சக்தியாக உருவெடுத்து ஸ்ரீலங்கா சுதந்திரக் கட்சிக்கு மிண்டுகொடுத்து நாட்டின் ஆட்சியதிகாரத்தை மாற்றியது.

(பெண் போராளிகள் மீட்புப் பணிகளில்)

விடுதலைப் புலிகளோடு சமரசம் மேற்கொண்டால் தமது கூட்டணியை விலக்கிக்கொள்ள நேரிடும் என சந்திரிகாவை மிரட்டியது ஜே.வி.பி. இந்தப் பின்னணியில்தான் சமாதானத்துக்கான கதவுகள் பூட்டப்படும் அறிகுறிகள் தென்பட்டன. ஜே.வி.பியும் ஸ்ரீலங்கா சுதந்திரக் கட்சியில் இருந்த இனவாதிகளும் சந்திரிகாவை சமாதானம் வேண்டாம் என மிரட்டியவண்ணமே இருந்தனர். இதன் தொடர்ச்சியாகவே தலைவர் பிரபாகரன் போருக்கான ஆயத்தங்களை மேற்கொள்கிறார்.

நிர்வாகப் பணிகளை பெரும்பாலும் காவல்துறையினரே கவனித்துவந்த நிலையில் அரசியல்துறைப் போராளிகள் எல்லைப்படையினர், துணைப்படையினர் உட்பட கணிசமான போராளிகள் புலிகளின் மரபுவழி இராணுவப் படையணிகளோடு இணைக்கப்பட்டிருந்தனர். இதனைத் தொடர்ந்து புலிகளின் முன்னரங்குகள் பலப்படுத்தப்படுகின்றன; வடபோர்முனையில் புலிகளின் மரபுவழி இராணுவ படையணிகள் தீவிர ஆயத்தங்களில் ஈடுபடுகின்றன; தாக்குதல் உந்து செலுத்திகள் நிலையெடுக்கின்றன; அதேபோல் தெற்கே ஓமந்தையிலும் மன்னாரிலும் மணலாறிலும் படையினரின் முன்னேற்றத்தைத் தடுக்கும் ஏற்பாடுகள் பூர்த்தியாகின; அனைத்தும் பூர்த்தியாகி தலைமையின் கட்டளைக்காக காத்திருந்தபோதே அந்த கொடூரம் நிகழ்கிறது. பெருமளவு மக்கள் பலியெடுக்கப்பட்டார்கள். கடற்புலிகளுக்கும் குறிப்பிடத்தக்க அழிவுகளும் இழப்புக்களும் ஏற்பட்டன.

இந்த நிலையிலும் புலிகள் விரைந்து செயற்பட்டு மீட்பு பணிகளையும் மீள்கட்டுமானப் பணிகளையும் சில நாட்களுக்குள்ளேயே மக்களுக்கு ஏற்படுத்திக்கொடுத்தனர். கனரக மீட்பு இயந்திரங்கள் அற்ற நிலையிலும் முற்றிலும் மனித உழைப்பையே நம்பி துரிதமாக செய்துமுடித்தார்கள். இது ஒரு புறம் இருக்க, அன்றைய சந்திரிகா அரசாங்கமோ தமது கட்டுப்பாட்டு பிரதேசங்களை சுனாமி அழிவிலிருந்து மீட்டெடுக்க தலையைப் பிய்த்துதறிக்கொண்டிருந்தது. சர்வதேசத்திடம் உதவியை நாடியிருந்தது. சர்வதேசத்திலிருந்து வந்த உதவிகளை அரச கட்டுப்பாடு-புலிகள் கட்டுப்பாடு பிரதேசங்களுக்கென பிரித்துக்கொடுக்கும் 'சுனாமிக் கட்டமைப்பை' கூறுபோடுவதில் இழுத்தடிப்புச் செய்து இறுதியில் ஏமாற்றியது!

குறுகிய நேரத்துள் கொத்துக்கொத்தாக மக்களை அழித்தொழித்தது கடல். போருக்காக கருக்கட்டிய மேகங்களை அன்றைய ஆழிப்பேரலை கலைத்தது. களமுனையையே மாற்றிப்போட்டது. கிழக்கு கரையை அழித்த கடல் இன்னும் இதே கரையில் அழிவீர்கள் என சாபமிட்டுச் சென்றது.

(கடற்புலிகளின் தலைவர், கேணல் சூசை மீட்புப் போராளிகளுடன்)

அன்று சுனாமி நிகழாதிருந்திருந்தால் புலிகளின் கை ஓங்கியிருக்கும். அன்றைய படை வலுச் சமநிலையில் புலிகளின் போரியல் உத்திகளும் கடல் தரை தாக்குதல் அணிகளும் இலங்கையின் முப்படைகளைவிட சற்று பலமாயிருந்தது. யாழ்ப்பாணக் குடாநாட்டை முற்றுகையிட்டு முழுமையாக கைப்பற்றிவிட்டு வங்கக் கடலில் தமது கடல் ஆதிக்கத்தின்மூலம் தடையின்றிய ஆயுத வழங்கலை ஏற்படுத்தியபின் ஏனைய பகுதிகளை மீட்பதே புலிகளின் திட்டமாக இருந்தது. அதற்கான சரியான நேரமாகவும் இன்றை நாட்கள் அமைந்திருந்தன. ஆனால் சுனாமி வந்து அனைத்தையும் குழப்பியது.

அதன் பின்னரான இலங்கையின் அரசியல் மாற்றங்கள் பாதுகாப்புக்கென நாட்டின் பொருளாதாரத்தின் பெரும்பகுதியை தாரைவார்த்தது. இராணுவக் கட்டமைப்புக்குள் வளர்ந்த பாதுகாப்பு அமைச்சின் செயலாளரும் இராணுவத் தளபதியும் புலிகளின் பலம் என்ன பலவீனம் என்ன என்பதை நன்கு அறிந்து இராணுவப் பற்றாலியன்களைப் பெருக்கினர்.

(மீட்புக் களத்தில் விசேட கொமாண்டோக்களுடன் கேணல் சூசை)

தம்மை கடல்போலே முற்றிகையிட்டு வந்த படையணிகளை புலிகளின் உச்சக்கட்ட வியூகங்கள் சற்று தாமதிக்க வைத்தனவேயன்றி எதிர்பார்த்த பலாபலன்களை அடையமுடியவில்லை. கொஞ்சம் கொஞ்சமாக இழந்துவந்த தமது பகுதிகளை மீட்பதற்கான இறுதிக்கட்ட வீயூகமும் மாபெரும் தளபதிகளோடு ஆனந்தபுரத்தில் தோற்றுப்போனது! ஆம் சுனாமி கோரமாகத் தொடக்கி வைத்த அழிவை முள்ளிவாய்க்கால் அகோரமாக முடித்துவைத்தது!

Artist Shan

vsshan26@gmai.com

தாயக கடலில் இன்று புயல் காற்று வீசும் அபாயம் , மீனவர்களே அவதானம்

2017-12-26T04:01:00.001-08:00

சுண்டிக்குளம் , நாகர் கோவில், முல்லைத்தீவு கடற் பிரதேசங்களில் பாரிய அலைகள் ஏற்பட கூடும் , அத்துடன் புயல் காற்று மணிக்கு 90 கிலோமீற்றர் வேகத்தில் வீசும் . எனவே தாயக மீனவர்கள் இன்று கடலுக்குள் செல்வதை தவிர்க்கவும்

மன்னார், புத்தளம் ஊடாக, கொழும்பு வரையிலான கரையோரபிரதேசத்திலும் காலி மாத்தறை ஊடாக ஹம்பாந்தோட்டை வரையிலான கடற்பிரதேசசத்திலும் ஓளரவு கொந்தளிப்புடன் காணப்படும்.

கடற்பகுதியில் கொந்தளிப்புடன் காணப்படும் பிரதேசங்களில் 70 கிலோமீற்றருக்கும் 80 கிலோமீற்றருக்கும் இடைப்பட்ட வேகத்தில் தற்காலிகமாக காற்றுவீசக்கூடும்.

என்று குறிப்பிடப்பட்டுள்ளது. கரையோர பிரதேசங்களில் இடியுடன் கூடிய மழை பெய்யக்கூடும் என்பதினால் கடல் நடவடிக்கையில் ஈடுபடுவோர் அவதானத்துடன் செயற்படுமாறு இடர்முகாமைத்துவ மத்தியநிலையம் தெரிவித்துள்ளமை குறிப்பிடப்பட்டுள்ளது.

வடக்கு, கிழக்கு, வடமத்தி, ஊவா மாகாணங்களிலும் ஹம்பாந்தோட்டை மாவட்டத்திலும் மழை பெய்யக்கூடும்.

கிழக்கு மாகாணத்திலும் நுவரெலியா, இரத்தினபுரி, காலி, மாத்தறை மாவட்டங்களிலும் சுமார் 75 மில்லிமீற்றர் மழை பெய்யக்கூடும்.
நாட்டின் பெரும்பாலான பிரதேசங்களில் பிற்பகல் 2.00 மணிக்கு பின்னர் மழை அல்லது இடியுடன் கூடிய மழை பெய்யும்.

யாழ். உடுத்துறையில் 13ஆம் வருட சுனாமி நினைவேந்தல் அனுஷ்டிப்பு

2017-12-26T03:46:00.001-08:00

ஆழிப்பேரலை அனர்த்தம் இடம்பெற்று இன்றுடன் 13 வருடங்கள் பூர்த்தியாகின்றன.

இந்த அனர்த்தினால் உயிர்நீத்த உறவுகளின் நினைவாக யாழ். வடமராட்சி கிழக்கு உடுத்துறை பகுதியில் அமைக்கப்பட்டுள்ள சுனாமி பொது நினைவாலயத்தில் இன்று (செவ்வாய்க்கிழமை) காலை நினைவேந்தல் நிகழ்வுகள் இடம்பெற்றன.

இந்த அஞ்சலி நிகழ்வில் ஆயிரக்கணக்கானவர்கள் கலந்துகொண்டு பிரார்த்தனையில் ஈடுபட்டதோடு உயிரிழந்த தமது உறவுகளை மிகவும் உணர்வுபூர்வாக நினைவுகூர்ந்ததாக எமது பிராந்திய செய்தியாளர் தெரிவித்தார்.

மன்னாரில் இடம்பெற்ற சுனாமி நினைவேந்தல் நிகழ்வுகள்

2017-12-26T03:42:00.001-08:00

சுனாமிப் பேரலையினால் காவுகொள்ளப்பட்ட உறவுகளின் 13 ஆம் ஆண்டு நினைவேந்தல் நிகழ்வு இன்று (செவ்வாய்க்கிழமை) காலை மன்னாரில் நினைவு கூறப்பட்டுள்ளது.

மன்னார் மாவட்ட கலை இலக்கிய பண்பாட்டு கழகத்தின் இயக்குனர் மோகன் ராஜ் தலைமையில் மன்னார் பிரதான பாலத்தடி கடலேரி பகுதியில் குறித்த நினைவேந்தல் நிகழ்வு இடம்பெற்றது.

குறித்த அஞ்சலி நிகழ்வில் தீபம் ஏற்றப்பட்டு மலர் தூவி உயிரிழந்த உறவுகளுக்கு அஞ்சலி செலுத்தப்பட்டது.

இதன் போது அருட்தந்தை நேரு அடிகளார், வடமாகாண சுகாதார அமைச்சர் வைத்திய கலாநிதி ஜீ.குணசீலன் மற்றும் பொது அமைப்புக்களின் பிரதி நிதிகள் என பலர் கலந்து கொண்டு அஞ்சலி செலுத்தியுள்ளனர்.

இதேவேளை, தேசிய பாதுகாப்பு தின நிகழ்வு இன்று காலை மன்னார் சாந்திபுரம் சிறுவர் பூங்காவில் இடம்பெற்றது.

மன்னார் மாவட்ட அனர்த்த முகாமைத்துவ அலகு ஏற்பாடு செய்திருந்த குறித்த நிகழ்வில் சர்வ மதத்தலைவர்கள், மன்னார் பிரதேசச் செயலாளர் என்.பரமதாசன், மாவட்ட அனர்த்த முகாமைத்துவ பிரிவின் உதவிப்பணிப்பாளர், மாவட்ட கடற்தொழில் திணைக்களத்தின் உதவிப்பணிப்பாளர் உட்பட பொது மக்கள், பொது அமைப்புக்களின் பிரதிநிதிகள் என பலர் கலந்து கொண்டிருந்தனர்.

இதன் போது சுனாமி அனர்த்தத்தில் உயிர் நீத்த மக்களின் 13 ஆம் ஆண்டு நினைவு கூறப்பட்டதோடு, அஞ்சலி உரைகளும் இடம்பெற்றமை குறிப்பிடத்தக்கது.இதன் போது சுனாமி அனர்த்தத்தில் உயிர் நீத்த மக்களின் 13 ஆம் ஆண்டு நினைவு கூறப்பட்டதோடு, அஞ்சலி உரைகளும் இடம்பெற்றமை குறிப்பிடத்தக்கது.

வவுனியா மத்திய பேரூந்து நிலையத்தில் குழப்பம்

2017-12-26T03:34:00.001-08:00

இலங்கைப் போக்குவரத்துச் சபைக்குச் சொந்தமான வவுனியா பேரூந்து நிலையத்தில் இருந்து வவுனியா தனியார் பஸ்கள் உள்ளுர் சேவைகளை இன்று (செவ்வாய்க்கிழமை) முன்னெடுக்கச் சென்ற போது, இ.போ.சபையினர் அவர்களை தடுத்து நிறுத்தியுள்ளனர்.

இதனால் அங்கு பதற்ற நிலை ஏற்பட்டுள்ளதுடன், அதிகளவான பொலிஸார் குவிக்கப்பட்டுள்ளதாக எமது பிராந்திய செய்தியாளர் குறிப்பிட்டுள்ளார்

வவுனியாவில் அமைக்கப்பட்டுள்ள புதிய பஸ் நிலையத்தில் இருந்து அரச மற்றும் தனியார் பேரூந்து சேவைகள் நடைபெற வேண்டும் என வட மாகாண முதலமைச்சர் சி.வி.விக்னேஸ்வரனினால் தீர்மானம் எடுக்கப்பட்டிருந்தது.

எனினும் இதனை நடைமுறைப்படுத்துவதில் இ.போ.சபை தரப்பால் சில பிரச்சினைகள் முன்வைக்கப்பட்டுள்ளன. அத்துடன் நத்தார் மற்றும் பண்டிகைக்காலம் என்பதால் புதிய பேரூந்து நிலையத்தில் இருந்து முழுமையான சேவையை மேற்கொள்வதனை இரண்டு வாரங்களுக்கு பிற்போடுவது என தீர்மானிக்கப்பட்டிருந்தது.

எனினும் இடைப்பட்ட காலப்பகுதியில் தனியார் பஸ்ஸின் உள்ளுர் சேவைகள் மட்டும் பழைய பேரூந்து நிலையத்தில் இருந்தும், தூர இடங்களுக்கான சேவைகள் புதிய பேரூந்து நிலையத்தில் இருந்தும் செயற்படுத்துவதற்கு முதலமைச்சர் உத்தரவிட்டுள்ளதாக முதலமைச்சரின் சிரேஷ்ட செயலாளர் விஜயலட்சுமி கேதீஸ்வரன் நேற்று தெரிவித்திருந்தார்.

இதையடுத்து இன்று காலை வவுனியா இ.போ.ச பேரூந்து நிலையத்திற்கு தனியார் பஸ்கள் உள்ளூர் சேவைகளை முன்னெடுக்க சென்ற போது இ.போ.சபையினர் பிரச்சினையை ஏற்படுத்தியுள்ளதாக தெரிவிக்கப்படுகிறது.

நிகழ்காலத்தில் கிடைக்கக்கூடிய சந்தர்ப்பங்களை விட்டுவிடக்கூடாது- ஸ்ரீநேசன் எம்.பி.

2017-12-26T03:30:00.001-08:00

ஏவலாளிகள் கிழக்கில் ஆட்சியாளர்களாக இருக்க வேண்டும் என்று நினைத்ததன் விளைவாக ‘மாமனிதர்’ ஜோசப் பரராஜசிங்கதின் உயிர் பறிக்கப்பட்டது என தமிழ்த் தேசியக் கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் ஞானமுத்து ஸ்ரீநேசன் தெரிவித்தார்.

கூட்டமைப்பின் முன்னாள் நாடாளுமன்ற உறுப்பினர் ஜோசப் பரராஜசிங்கத்தின் 12ஆவது நினைவேந்தல் நிகழ்வு நேற்று (திங்கட்கிழமை) மட்டக்களப்பில் உணர்வுபூர்வமாக அனுஷ்டிக்கப்பட்டது. இதில் பங்கேற்று உரையாற்றுகையில் அவர் இவ்வாறு குறிப்பிட்டார்.

ஸ்ரீநேசன் அங்கு தொடர்ந்தும் உரையாற்றுகையில், கிழக்கு மாகாணத்தில் தமிழ்த் தேசியத்தை உடைதெறிந்துவிட்டு அந்த இடத்தில் தங்களது ஏவலாளிகளை எங்களுக்கு எஜமானர்களாக மாற்றி, அந்த எஜமானர்கள் எங்களை அவர்களது கட்டுப்பாட்டிற்குள் வைத்திருக்க வேண்டும் என்பதற்காக செய்யப்பட்ட கொலையாகவே மாமனிதர் ஜோசப் பரராஜசிங்கத்தின் கொலையை நான் கருதுகிறேன்.

இந்த படுகொலையின் சூத்திரதாரிகள் யார் என்பதை மக்கள் அறிந்துள்ளார்கள். தமிழீழ விடுதலைப் புலிகள் அமைப்பு பிளவுபட்ட பின்னர் யாரை ஆதரிக்க வேண்டும் என கொள்கையோடு தீவிரமாகப் பரிசீலித்து முடிவெடுத்து அதன் வழியாக செயற்பட்டதன் காரணமாக அவரது உயிர் பறிக்கப்பட்டது.

ஊடக தர்மத்தில் இருட்டிப்புக்கள் இருக்கக்கூடாது. மட்டக்களப்பில் ஊழல் மோசடிகளுக்கு எதிராக களமிங்கியுள்ளார். ஆனால் கடந்த காலத்தில் மட்டக்களப்பில் ஊழல் மோசடி செய்தவர்களைப் பாராட்டி எழுதியவர்கள் இன்று ஊழல் மோசடியைப் பற்றிச் சொல்வதற்கு எந்தவித யோக்கியதையும் கிடையாது.

தமிழ்த் தேசியக் கூட்டமைப்பின் தலைவர் சம்பந்தன் ஐயாவுக்கு நிகராக அரசியல் பேச்சுவார்தையினை நடத்தக்கூடிய தலைவர் எவரும் இல்லை என்பதை வடகிழக்கு மாகாண முன்னாள் முதலமைச்சர் வரதராஜபெருமாள் தொலைக்காட்சி நிகழ்வொன்றில் கூறியுள்ளார்.

நிகழ்காலத்தில் கிடைக்கக்கூடிய சந்தர்ப்பங்களைத் தூக்கி எறிந்துவிட்டு வாய்ச்சவால்களை விட்டுக்கொண்டிருப்போமானால் 30 வருட யுத்தத்தில் பாதிக்கப்பட்ட மக்களுக்குரிய தீர்வினைப் பெற்றுக்கொடுப்பது யார்? எமது மக்கள் பொருளாதார, சமூக, அரசியல், கல்வி ரீதியாக பாரிய இடைவெளியில் இருந்து கொண்டிருக்கிறது.

இந்த நிலையில் இன்னும் இந்த மக்களைப் பலிக்கடாக்களாக்கி ஒரு கற்பனையான இலக்கைக் காட்டிக் கொண்டு நாங்கள் ஏமாற்றிக் கொண்டிருக்க முடியாது.

அபிவிருத்தி எமக்கு வேண்டாம் உரிமைதான் எமக்கு வேண்டும் என கேட்ட எமது மக்கள் தீர்வும், அபிவிருத்தியும் வேண்டும் என இரு பக்கங்களிலும் சிந்திக்கின்றார்கள். உரிமையைப் பெற்றுவிட்டு அபிவிருத்திக்குச் செல்ல வேண்டும் என கூறும் வார்த்தைகள் மக்களிடையே ஏற்றுக்கொள்ளப்பட மாட்டாது’ என்றார்.

தமிழ்த் தேசியக் கூட்டமைப்பைப் பலப்படுத்தும் நோக்குடன் அதனுடன் இணைந்து போட்டியிடவுள்ளோம் , ஜனநாயகப் போராளிகள் கட்சி

2017-12-25T16:38:00.001-08:00

தமிழர் தாயகத்தில் தற்போதுள்ள அரசியல் நிலைமைகளைக் கருத்தில்கொண்டு தமிழ்த் தேசியக் கூட்டமைப்பைப் பலப்படுத்தும் நோக்குடன் அதனுடன் இணைந்து போட்டியிடவுள்ளோம் என்று ஜனநாயகப் போராளிகள் கட்சி தெரிவித்தது.

அந்தக் கட்சியின் சார்பில் கலந்துகொண்ட வேந்தன் மேற்கண்டவாறு கூறினார். இது தொடர்பில் கருத்துரைத்த அவர்,

நடைபெறவுள்ள உள்ளூராட்சி சபைத் தேர்தல் தேசியத்தைப் பெறுவதற்கானதல்ல. அபிவிருத்தியை இலக்காகக்கொண்ட தேர்தல்.
இந்தத் தேர்தலில் பல குழுக்களாகப் பிரிந்துநின்று போட்டியிட்டு தாயகத்தைப் பிளவுபடுத்தக்கூடாது. அதற்காகவே நாம் தமிழ்த் தேசியக் கூட்டமைப்பில் இணைந்து போட்டியிடுகின்றோம்.

ஆயுதப் போராட்டத்தின்போது தமிழ் மக்களாகப் பலம் பொருந்தியிருந்தோம். அவ்வாறான நிலைமை இப்போது இல்லை. அரசியல் பலம் மாத்திரமே உள்ளது.
அரசியலில் நாம் பிரிந்துநிற்காது தேசிய பலத்தை சர்வதேச சமூகத்துக்கும் இலங்கை அரசுக்கும் காட்டவேண்டும். அதன் ஊடாக நாம் பேரம்பேசும் சக்தியாக உருவாக முடியும்.

தற்போது தமிழ்த் தேசியக் கூட்டமைப்பில் இணைந்துள்ளோம். கூட்டமைப்பில் எவர் பிழை செய்தாலும் தட்டிக்கேட்போம் , தற்போதுள்ள அரசியல் களத்தை கருத்தில் கொண்டே நாம் கூட்டமைப்புடன் இனைந்து உள்ளோம் என மேலும் தெரிவித்தார்.

ஜனநாயகப் போராளிகளின் வருகையால் ஆட்டம் காணப்போகும் இலங்கை அரசியல்

2017-12-25T16:16:00.001-08:00

தமிழீழத் தேசியத் தலைவரால் உருவாக்கப்படட தமிழ்த் தேசியக் கூட்டமைப்பில் இன்று முன்னாள் போராளிகள் இணைந்துள்ளதை பல சக்திகள் அச்சத்துடனேயே பார்த்துவருகின்றனர் ,

அதுவும் சிங்கள பேரினவாத கட்சிகள் இவர்களை எப்படி அழிக்கலாம் என்று யோசித்துக்கொண்டிருக்கிறார்கள்.

உலக நாடுகளுக்கு முன்னே அன்று ஆயுதம் தாங்கிய வீரர்கள் இன்று ஜனநாயக வழியில் காலடி எடுத்து வைத்துள்ள இவர்களை தமிழீழ மக்கள் இன்னும் தலைவனின் பிள்ளைகளாகவே பார்க்கின்றனர் என்பதை யாராலும் மறுக்க முடியாது ,

இவர்கள் இருக்கின்றார்கள் என்ற துணிவுடனேயே இம்முறை மாவீரர் நாள் நிகழ்வில் மக்கள் எழுச்சியுடன் கலந்துகொண்டிருந்தனர்,

தாயாக விடிவுக்காக தலைவன் வழியில் வந்தவர்களுக்கு நாம் என்ன செய்யப் போகின்றோம்?

தேர்தலில் ஒதுங்கியிருந்தவர்கள், திடீரென்று தேர்தலுக்குள் பிரவேசித்ததன் காரணம் என்ன?

ஆம் அது தான் தேசியத் தலைவரால் கட்டமைக்கப்பட்ட தமிழ்த் தேசியக் கூட்டமைப்பினை உடைக்க கயவர்களால் திட்டம் தீட்டப்பட்டு செயல்படுத்தும் நேரத்தில் அண்ணன் உருவாக்கிய தமிழ் மக்களின் அரசியல் பலம் உடைபடக்கூடாது என்ற உறுதியுடன் கூட்டமைப்பினை தக்க நேரத்தில் பிடித்து நிறுத்தினர்,

தாயகத்தில் தமிழ் மக்கள் நிம்மதியாக வாழ வேண்டும் என்பதற்காக அரசியல் களத்தில் குத்தித்த அந்தத் தலைவனின் வழி வந்த உங்கள் பிள்ளைகளுக்கு என்ன செய்ய வேண்டும் என்பதை நன்குணர்ந்து செயல்படுங்கள்.

புலம்பெயர் மக்களே இனி நீங்கள் என்ன செய்யவேண்டுமென்று யோசிக்கும் காலம் போய் விட்டது , நமது பலத்தை மீண்டும் ஒரு முறை உலகுக்கு எடுத்துரைக்க வேண்டிய நேரம் வந்துவிட்டது , இன்றே ஜனநாயக போராளிகள் வழியில் நாமும் இணைந்து அந்த மாவீரர்கள் கண்ட கனவை நனவாக்க தயாராகுவோம்.

விடுதலை என்பதே நமது இலக்கு

நத்தார் தினத்தில் மீண்டும் வெளிவருகிறது TTN தமிழ் ஒளி

2017-12-25T11:56:00.000-08:00

தமிழீழத் தேசியத் தலைவரின் நேரடி வழி காட்டலில் உருவாக்கப்படட TTN தமிழ் ஒளி பல சாதனைகளை புரிந்து தமிழீழ மக்கள் மத்தியில் தனக்கென்று ஒரு சாதனைத் தடத்தை பதித்திருந்தது.

தாயகத்தில் நடக்கும் செய்திகளை உடனுக்குடன் புலம்பெயர் நாடுகளில் வசிக்கும் தமிழ் மக்களுக்கு எடுத்துரைத்த தொலைக்காட்சி, ஐரோப்பிய ஒன்றியம் தமிழீழ விடுதலைப்புலிகளை தடை செய்தபொழுது TTN தமிழ் ஒளியையும் தடை செய்தனர்,

இறுதி யுத்தம் முடிவடைந்த பின்னர் மீண்டும் இணையத்தில் தமிழ் ஒளி தனது ஒளிபரப்பை தொடங்கியது , பின்னர் தனி நபர்களின் விருப்பு வெறுப்புக்களுக்கு ஏற்ப தொலைக்காட்சி இடையிடையே பலதடவை இடைநிறுத்தப்பட்டது ,

பிரான்ஸ் தமிழர் ஒருங்கிணைப்பின் மூலம் TTN மீண்டும் தனது ஒளிபரப்பை இணையத்தில் தொடங்கியது. இதற்கு பொறுப்பாக கரன் என்பவர் நியமிக்கப்படடார், இவரின் விடாமுயற்சியால் இணையத்தில் ஒளிபரப்பாகிய TTN , SMART BOX மூலம் மீண்டும் தமிழ் மக்களின் வாசல் தேடி வந்தது ,

ஒரு சில வருடங்களில் பல பொருளாதார சிக்கல்களை எதிர் கொண்ட TTN குழுமம் , TTN இல் பணி புரிந்த பணியாளர்களுக்கு மாதாந்த சம்பளம் கொடுக்க முடியாமல் திணறியது ,

இதன் காரணமாக பல பணியாளர்கள் தமது பணிகளை இடை நிறுத்திக்கொண்டனர் ,

சில மாதங்களின் பின்னர் மின்சாரக்கட்டணம் கட்ட முடியாத நிலையில் தொலைக்காட்சி இடைநிறுத்தப்பட்டது ,

தாயகத்தில் ராணுவம் எமது கட்டுமானங்களை சிதைத்த பின்னர் புலத்தில் தமிழீழ தேசியத் தலைவரின் எண்ணத்தில் உருவான கட்டமைப்புக்களை பாதுகாப்பது ஒவ்வொரு தமிழரினதும் தலையாய கடமையாகும் ,

ஆதலால் இந்த தொலைக்காட்சியை மீள ஒளிபரப்பாக்க வேண்டிய வேலைத்திட்டங்கள் சமகாலத்தில் மேற்கொள்ளப்பட்டு வருகிறது , அதன் முதல் கட்டமாக இணையத்தில் செய்திகளின் சங்கமமாக இன்று TTN தமிழ் ஒளி வெளிவருகிறது .

நன்றி.

போராளிகளை புறந்தள்ள முடியாது , மட்டக்களப்பில் கூட்டமைப்பு

2017-12-25T10:52:00.000-08:00

கல்முனை மாநகர சபைக்கான தேர்தலில் தமிழ்த் தேசியக் கூட்டமைப்பில் தமிழரசுக் கட்சி சார்பில் போட்டியிடும் அன்னம்மா சௌந்தரராஜன், ரி. இராஜரெத்தினம், கே. சிவலிங்கம், பொன். செல்வநாயகம் மற்றும் எஸ். இராஜரெத்தினம் தங்களது பிரசார நடவடிக்கைகளை முன்னெடுத்துள்ளனர்.

இதன் போது கருத்து தெரிவித்த எஸ். இராஜரெத்தினம், போராளிகளை புறக்கணிக்க முடியாது என்பதில் நாம் தெளிவாகவிருக்கிறோம் , அத்துடன் அவர்கள் உருவாக்கியதே தமிழ் தேசிய கூட்டமைப்பு , இன்று அவர்களுடனேயே தேர்தல் களத்தில் நிற்கிறோம் , காலம் வெற்றியை ஈட்டித் தரும் என்கிறார் ,

உள்ளூராட்சி மன்றங்களுக்கான பிரசார நடவடிக்கைகளை கிழக்கில் உள்ள கட்சிகளும் சுயேச்சைக் குழுக்களும் ஆரம்பித்துள்ளன.

இந்த நிலையில், கிழக்கின் பல்வேறு பகுதிகளிலும் பிரசார நடவடிக்கைகள் முன்னெடுக்கப்பட்டு உள்ளதாகவும் குறிப்பாக அம்பாறை, மட்டக்களப்பு போன்ற பகுதிகளிலும் பிரசார நடவடிக்கைகள் ஆரம்பிக்கப்பட்டுள்ளதாக எமது பிராந்திய செய்தியாளர்கள் தெரிவித்துள்ளனர்.

தமிழரசுக் கட்சியின் மூத்த உறுப்பினரும் முன்னாள் கிழக்கு மாகாண சபை உறுப்பினருமான எம். இராஜேஸ்வரனின் மக்கள் சந்திப்பு பணிமனையிலிருந்து தமது பிரசாரத்தினை நேற்று (ஞாயிற்றுக்கிழமை) ஆரம்பித்தனர்.

அத்துடன், ஹென்றிமகேந்திரன், சந்திரசேகரம் ராஜன் ஆகியோர் கல்முனை அம்பலதத்டிப் பிள்ளையார் ஆலயத்திற்குச் சென்று வழிபாடு செய்து தமது பிரச்சாரத்தினை ஆரம்பித்துள்ளனர்.

மேலும், மட்டக்களப்பு மாவட்டத்தில் நல்லாட்சிக்கான மக்கள் முன்னணியும் நேற்று (ஞாயிற்றுக்கிழமை) காத்தான்குடியில் பிரசார நடவடிக்கைகளை முன்னெடுத்துள்ளது.

எமது வளங்களை ஒருபோதும் பிறருக்கு தாரைவார்க்க மாட்டோம்: வினோராஜ்

2017-12-25T10:39:00.002-08:00

எமது வளங்களை பிறருக்கு தாரை வார்த்துக் கொடுப்பதற்கு நாம் ஒருபோதும் அனுமதிக்க மாட்டோம் என தமிழ் தேசியக் கூட்டமைப்பின் சார்பில் களுவாஞ்சிகுடி வட்டாரத்தில் போட்டியிடும் மேகசுந்தரம் வினோராஜ் (வினோ) தெரிவித்துள்ளார்.

களுவாஞ்சிக்குடியில் இன்று (திங்கட்கிழமை) காலை நடைபெற்ற மக்கள் சந்திப்பில் உரையாற்றும் போதே அவர் இவ்வாறு குறிப்பிட்டார்.

அங்கு தொடர்ந்து தெரிவித்த அவர், ”எமது வளங்களைப் பிறருக்குத் தாரை வார்த்துக் கொடுக்க நாம் ஒருபோதும் அனுமதிக்க முடியாது. எமது பிரதேசத்தில் தேங்கிக் கிடக்கின்ற வளங்களை பயன்பாட்டுக்கு கொண்டு வந்து அவற்றினூடாக எமது மக்கள் அதி உச்ச நன்மையடையக் கூடிய வகையில் மாற்ற வேண்டும். இவற்றுக்கெல்லாம் முறையான ஒரு உள்ளூராட்சிமன்றக் கட்டமைப்புத் தேவை. முறையான உள்ளுராட்சி மன்றத்தை உருவாக்கும் பொறுப்பு தற்போது எமது பிரதேச மக்களின் கையில் வழங்கப்பட்டுள்ளது.

உள்ளூராட்சி மன்றத்தினூடாக மேற்கொள்ளப்படும் அபிவிருத்திகளை மேற்கொள்வதற்கு யார் ஆட்சிக்கு வந்தாலும் அதனை மேற்கொள்ளலாம். அதற்கு பேரினவாதக் கட்சிகளைப் பிரதிநிதித்துவப் படுத்துபவர்கள் தான் ஆட்சிக்கு வரவேண்டும் என்பதில்லை. காலாகாலமாக எமது மக்களின் அடிமட்டப் பிரச்சினைகள் தொடக்கம் அரசியல் பிரச்சினைகள் வரைக்கும் உடனுக்குடன் கரிசனை செலுத்திக் கொண்டிருப்பது தமிழ் தேசியக் கூட்டமைப்பு மாத்திரமே.

எனவே இதுவரைகாலமும் தமிழ் தேசியத்திற்கு ஆதரவு தெரிவித்து வந்ததுபோல் நடைபெறவுள்ள உள்ளுராட்சி மன்றத் தேர்தலிலும் அனைவரும் ஒன்றிணைந்து வீட்டுச் சின்னத்திற்கு வாக்களித்து வெற்றிபெறச் செய்ய வேண்டும்” என அவர் தெரிவித்தார்.

நாடாளுமன்ற தேர்தலுடன் மீண்டும் சட்டப்பேரவைத் தேர்தல்: சீமான் தகவல்

2017-12-25T10:32:00.001-08:00

எதிர்வரும் நாடாளுமன்றத் தேர்தலுடன் தமிழக சட்டப் பேரவைக்கும் தேர்தல் வரும் என, நாம் தமிழர் கட்சியின் ஒருங்கிணைப்பாளர் சீமான் தெரிவித்துள்ளார்.

இன்று (திங்கட்கிழமை) செய்தியாளர்களை சந்தித்து கருத்து தெரிவிக்கும் போதே, அவர் மேற்கண்டவாறு தெரிவித்துள்ளார்.

இதன் போது மேலும் தெரிவித்த அவர்,

“2019 ஆம் ஆண்டில் நடிகர் ரஜினிகாந்தை முன்னிறுத்தி பா.ஜ.க. ஆட்சி நடத்தும்.

தினகரனின் இந்த வெற்றியையோ அல்லது அவர் ஆட்சி நடத்துவதை பா.ஜ.க. விரும்பாது. எனவே இந்த ஆட்சியை கலைத்து ஆளுநர் ஆட்சியை கொண்டு வந்து, பின்னர் 2019ஆம் ஆண்டு மீண்டு ரஜினியை வைத்து பா.ஜ.க. தமிழகத்தை ஆளும் வாய்ப்புக்கள் தான் அதிகம் உள்ளது.

ஏன் என்றால் இந்த உள்ளக கட்சிகள் ஒற்றுமையாக செயற்படாது. இங்குள்ளவர்கள் அங்கும், அங்குள்ளவர்கள் இங்கும் என இன்னும் சிறிது நாட்களில் கட்சிதாவ முட்படுவார்கள்” என அவர் மேலும் தெரிவித்துள்ளமை குறிப்பிடத்தக்கது.

புதுக்குடியிருப்பில் புலிகளால் புதைத்த தங்கத்தை தோண்டி எடுக்க வந்தவர்களை பிடித்த பொலிஸார்

2017-12-25T10:29:00.000-08:00

புதுக்குடியிருப்பு கைவேலி பகுதியில் முன்னர் விடுதலைப்புலிகளின் முகாம் அமைந்துள்ள காட்டுப்பகுதியில் 11 பேர் கொண்ட குழுவினர் இரண்டு ஊர்திகளில் வந்து தங்கம் தோண்டும் நடவடிக்கையில் ஈடுபட்டுள்ளார்கள்.

இந்த நிலையில் இது குறித்து புதுக்குடியிருப்பு பொலீஸாருக்கு கிடைக்கப்பெற்ற தகவலையடுத்து சம்பவ இடத்திற்கு சென்று பொலீஸார் தங்கம் தோண்டும் நடவடிக்கையில் ஈடுபட்டுக்கொண்டிருந்த சந்தேகத்தின் அடிப்படையில் மாத்தறை, கொழும்பு,கண்டி,கொட்டாவ,கடவத்த,கொட்டகேன,கிறான்பாஸ்,கிளிநொச்சி,யாழ்ப்பாணம் போன்ற மாவட்டங்களை சேர்ந்த 11 பேரை கைதுசெய்துள்ளனா்.

இவர்கள் வந்த டாட்டா கப் வாகனம் மற்றும் கைப்பற்றிய வாகனங்களையும் தோண்டும் நடவடிக்கைக்கு பயன்படுத்திய உபகரணங்களையும் கைப்பற்றியுள்ளனா்.

இவர்களை நாளை முல்லைத்தீவு மாவட்ட நீதிமன்றில் முன்னிலைப்படுத்த நடவடிக்கை எடுக்கப்பட்டுள்ளதாக தெரிவிக்கப்பட்டுள்ளது.

இயலாமையில் உள்ள மக்கள் மீது கரிசனையை காட்ட வேண்டும், சம்மந்தன்

2017-12-25T10:25:00.000-08:00

கிறிஸ்து நாதரின் பிறப்பினை கொண்டாடும் அனைத்து கிறிஸ்தவர்களுக்கும் தனது மனங்கனிந்த நத்தார் தின வாழ்த்துக்கள் என தமிழ் தேசியக் கூட்டமைப்பின் தலைவரும் எதிர்க்கட்சி தலைவருமான இரா. சம்பந்தன் தெரிவித்துள்ளார்.

தமிழ் தேசியக் கூட்டமைப்பின் தலைவரும் எதிர்க்கட்சி தலைவருமான இரா. சம்பந்தன் வெளியிட்டுள்ள நத்தார் வாழ்த்து செய்தியிலேயே இதனை தெரிவித்துள்ளார்.

சுமார் இரண்டாயிரம் வருடங்களுக்கு முன் நிகழ்ந்த கிறிஸ்து நாதரின் பிறப்பானது மக்களுக்கு சமாதானத்தையும் நம்பிக்கையையும் கொண்டு வந்தது.

நத்தார் பண்டிகையின் நிகழ்வுகளானது கிறிஸ்து நாதர் வெளிக்காட்டிய தாழ்மை, அன்பு, பிறரை நேசித்தல், மற்றும் தியாகம் போன்ற பண்புகளை எமக்கு மீள ஞாபகமூட்டி நிற்கின்றன.

மேலும் அன்பு, மனதுருக்கம். பிறரை நேசித்தல், உண்மை, சமத்துவம் மற்றும் சமூக நீதி போன்றவை தொடர்பில் கிறிஸ்து நாதரின் போதனைகளானது இன்றும் எமது சமூகங்களுக்கு தொடர்புடையதாக இருப்பதுமன்றி எப்போதும் அவை தொடர்புடையதாகவே காணப்படும்.

நத்தார் தின ஒளியானது நம்பிக்கை இழந்து வாழும் எமது மக்களின் மனங்களில் நம்பிக்கையையும் சமாதானத்தையும் மீள் உயிர்ப்பிக்கிறதாக அமைய வேண்டுமென பிரார்த்திப்பதோடு, இந்த நத்தார் பண்டிகை காலங்களை வசதியற்று இயலாமையில் உள்ள எம் சக மக்கள் மீதான எமது கரிசனையை வெளிக்காட்டும் காலங்களாக அனுஷ்டிக்குமாறும் வேண்டிக்கொள்கிறேன்.

இனிய நத்தார் தின வாழ்த்துக்கள் என எதிர்க்கட்சி தலைவர் இரா. சம்பந்தன் விடுத்துள்ள நத்தார் வாழ்த்துச் செய்தியில் குறிப்பிட்டுள்ளார்.