Túkallinn

5 ódýrir en áhrifaríkir hrekkjavökubúningar

2011-10-27T23:14:06+00:00

Hrekkjavaka nálgast óðfluga og nú fer hver að verða síðastur að finna sér búning. Ef þið viljið vera bæði hagsýn - og öðruvísi en allir keyptu búningarnir, þá eru hér 5 góðar hugmyndir að búningum.

1. Hvar er Valli?

Valla þekkja allir og hann er ekki svo erfitt að útbúa. Allt sem þú þarft er dúskhúfa, gjarnan rauð og hvít, og rauð/hvít röndóttur bolur. Þar sem röndóttir bolir eru í tísku ætti ekki að vera svo erfitt að finna slíkan. Restin er svo hinir ýmsu aukahlutir sem auðvelt ætti að vera að finna á hverju heimili (eða allaveganna heimili foreldra og afa og ömmu). Það er t.d. myndavél, kíkir, bakpoki, kafaragleraugu með snorkli, stafur, vatnsbrúsi í ól og annað sem þér finnst passa.

2. Rækju-nigiri

Já, hljómar flókið og er vissulega frumlegt, en alls ekki svo snúið, né dýrt. Allt og sumt sem þarf í þetta er slatti af pökkunarfrauðkúlum, gömul svampdýna, svartur eða grænn borði og appelsínugult sprey.

a) Þú tekur frauðkúlurnar og límir þar saman til að búa til grjónin. Ágætt er að líma þær t.d. á gamlan hvítan bol.

b) Því næst skerðu út dýnuna og formar hana eins og stóra rækju og spreyjar með appelsínugulu spreyi.

c) Að lokum bindurðu um með svörtum borða. Einnig er hægt að bæta við smá wasabi í hárið og engiferi sem búið er til úr filti.

3. Vélmenni

Þetta er einfaldur en skemmtilegur búningur sem getur vakið mikla lukku, sérstaklega hjá yngri kynslóðinni. Það sem þarf í þennan búning er einfaldlega pappakassi, álpappír og ýmislegt smádót í hnappa og mæla.

a) Fyrsta skrefið er að skera út göt í pappakassa fyrir hendur og höfuð. Kassann er hægt að hafa opinn í botninn. Hann er síðan þakinn með álpappír.

b) Kassinn er síðan skreyttur. Hér hefur hann verið skreyttur með tveimur geisladiskum, álbakka með borði úr gömlu raftæki og tveimur skrautkúlum. Einnig hefur verið bætt nokkrum límmiðum á og skreytingin síðan toppuð með litlum batterísljósum. En þið notið bara hvað sem þið finnið sem glitrar, pípir, blikkar eða lítur út eins og hlutur af vélmenni :)

c) Fæturnir eru búnir til úr álbarka fyrir þurrkara. Ef þú átt engan afgangs ætti að vera auðvelt að kaupa slíkan fyrir lítið fé. Hluti af barkanum var líka rifinn niður og notaður til að skreyta kassann enn frekar.

d) Höfuðið er í grunninn reiðhjólahjálmur en framan á hann er búið að líma spjald úr pappakassa þar sem klippt hefur verið gat fyrir augun. Allt er þetta síðan þakið með álpappír.

Og þá ertu komin með vélmenni. Innanundir vélmenninu er hægt að vera í hvaða fötum sem er, en ágætt er að vera með hvítar, svartar eða gráar ermar þar sem þær standa út úr kassanum.

4. Freslisstyttan

Frelsisstyttan er alltaf klassísk og þarf ekki að vera svo flókin. Hér er hugmynd að því hvernig hægt er að búa til frelsisstyttu handa dótturinni, nú eða þér sjálfri :)

a) Kjóllinn er í þessu tilfelli búin til úr gömlum fötum úr skápnum, hvítum stuttermabol, og pilsi sem er saumað saman. Áður en saumað var voru allar flíkurnar settar í bala með vatni og fatalit og hrært í til að allt fengi á sig grænan blæ. Flíkurnar tóku upp mismikinn lit sem gefur kjólnum skemmtileg blæbrigði. Til þess að fá "réttar" fellingar í kjólinn var pilsið saumað við aðra öxlina.

b) Kórónan er búin til úr ennisbandi sem á er fest frauð. Síðan eru klipptir út 7 þríhyrningar úr frauðinu til þess að búa til toppana á kórónuna og að lokum notaður litur til þess að búa til gluggana og línur í toppana.

c) Kyndillinn er í raun vasaljós, þannig að það lýsir líka :) Vasaljósið er klætt með grænu frauði og aukalag klippt til og sett efst til þess að skapa mynstrið efst á kyndlinum.

d) Eldurinn í kyndlinum er búinn til úr appelsínugulu umbúðaplasti en einnig er hægt að nota ýmiskonar föndurefni eða sellófan.

e) Að lokum er smá silfurblár augnskuggi og varablýantur notaður til að skappa "styttulegra" andlit.

Skórnir eru bara venjulegir sandalar og voila, þú ert orðin frelsisstytta :)

5. iPhone

Hver vill ekki vera iPhone í dag?

a) Finndu tvö spjöld. Mega vera pappaspjöld en ef þú getur fundið þykkari frauðspjöld þá væru þau betri. Rúnaðu hornin á þeim, málaðu þau svört og gerðu krómaðan kant með málningu eða álpappír.

b) Prentaðu út hnappana og Apple lógóið fyrir bakhliðina og límdu á. Hér eru hnapparnir:

iPhone Icons 1 - iPhone Icons 2 - iPhone Icons 3
iPhone Icons 4 - iPhone Icons 5 - iPhone Icons 6

c) Hengdu þetta yfir axlirnar á þér og vertu í svörtum fötum innanundir. Bingó - þú átt ekki bara iPhone, þú ert ORÐIN iPhone! :)

Nú, ef peningar eru ekki vandamálið, þá er hægt að taka iPhone hugmyndina skrefinu lengar og búa til iPhone búning sem virkar! Eins og þessir:

Grunnurinn í þessum búningi er 42" flatskjár sem tengdur er við iPhone síma. Einfalt og virkar!

Gleðilega hrekkjavöku :)

Túkallinn

Ódýrar rennihurðir í stað hefðbundinna hurða

2011-10-21T03:26:42+00:00

Hér er einföld en smart lausn á ódýrum hurðum. Þessar rennihurðir voru settar upp í gömlu húsi í stað þeirra hurða sem voru þar fyrir. Ofan við hurðaropin voru hengdar 175cm BESTA brautir úr IKEA. Síðan var sturtuhurðafestingum rennt inn í brautirnar. Hurðirnar eru plötur úr "frystu" plexigleri sem fengnar voru í plexiglerverslun og hengdar í festingarnar. Borað er fyrir handfanginu og það fest á. Einföld en áhrifarík leið til þess að gefa íbúðinni nútímalegt og skemmtilegt útlit fyrir lítið fé.

Efni: Besta brautir úr IKEA, sturtuhurðafestingar, IKEA handfang, plexiglerplötur

Túkallinn

Aumingjans fátæka fólkið

2011-09-30T08:08:00+00:00

Dag einn tók mjög efnaður maður son sinn með sér í sveit í þeim tilgangi að sýna honum hvernig fátækt fólk býr.

Þeir dvöldu tvo daga og tvær nætur á sveitabýli sem myndi teljast fátæklegt.

Á leiðinni til baka spurði faðirinn son sinn hvernig honum hafi þótt ferðin.
"Hún var frábær pabbi."
... ... ... "Sástu hvernig fátækt fólk býr?" spurði faðirinn.
"Ó já," sagði sonurinn.
"Jæja segðu mér, hvað lærðir þú af þessari ferð?" spurði faðirinn.
Sonurinn svaraði:
"Ég sá að við eigum bara einn hund en þau eiga fjóra.
Við eigum sundlaug sem nær út í miðjan garð en þau eiga læk sem engan enda tekur.
Við erum með innflutt ljósker í garðinum en þau hafa milljón stjörnur og norðurljós á næturnar.
Veröndin okkar nær alveg að framgarðinum en þau hafa allan dalinn og fjöllin.
Við eigum smá blett til að búa á en þau eiga akra, tún og haga sem ná eins langt og augað eygir.
Við höfum þjónustufólk sem þjónar okkur en þau þjóna hvort öðru og hjálpa öðrum.
Við þurfum að kaupa okkar mat en þau búa sinn til sjálf.
Við erum með háa girðingu til að verja okkur en þau eru umkringd vinum og nágrönnum sem verja þau."
Faðir drengsins varð orðlaus.

Þá bætti sonurinn við:
Takk pabbi fyrir að sýna mér hve fátæk við erum.

Notum réttu mælistikurnar þegar við mælum gæði lífsins :)

Túkallinn

Verum þakklát fyrir það sem við höfum

2011-09-29T08:03:00+00:00

Á meðan það er margt sem íþyngir okkur og við séum kannski að upplifa erfiðari tíma en við töldum okkur nokkurn tímann þurfa að gera, þá skulum við passa okkur að gleyma samt ekki því hversu fádæma lánsöm við erum á öðrum sviðum. Það er til nóg af fólki sem myndi gefa allt sitt til að vera í okkar sporum.

Túkallinn

Sjálfsmorðsbréf flugmannsins sem flaug á skattinn í Texas

2010-02-18T23:57:05+00:00

Í dag var flugvél flogið á höfuðstöðvar IRS, eða Bandarísku skattstofunnar í Austin í Texas. Flugmaðurinn, hinn 53 ára Andrew Joseph Stack lét lífið. Þegar farið var að kanna málið kom í ljós að Joe eins og hann var kallaður hafði rekið hugbúnaðarfyrirtæki og átt í deilum við skattinn. Hann hafði fengið nóg og ákveðið að senda skýr skilaboð til þjóðarinnar. Á heimasíðu fyrirtækisins setti hann inn 6 síðna sjálfsmorðsbréf um klukkustund áður en flugvélin skall á byggingunni. Í millitíðinni brenndi hann niður húsið sitt.

Margt af því sem hann skrifar í bréfi sínu eru hlutir sem mörgum hér á landi finnst eflaust óþægilega kunnuglegir:

"Hvers vegna er það svo að lítill hópur þrjóta og óreiðumanna getur valdið ólýsanlegum skaða (eins og yfirmenn GM í áraraðir) og þegar gróðaskip þeirra er að brotna undan þyngd græðgi þeirra og yfirþyrmandi heimsku, er afli allrar ríkisstjórnarinnar vandkvæðalaust beitt þeim til björgunar innan örfárra daga, ef ekki klukkustunda?"

"Ég man eftir að hafa lesið um hrunið á verðbréfamarkaðnum fyrir kreppuna miklu og hvernig ríkir bankastarfsmenn og viðskiptamenn stukku út um glugga þegar þeir áttuðu sig á því að þeir hefðu klúðrað málunum og tapað öllu. Er það ekki kaldhæðið að 60 árum seinna hafa þeir fundið lausnina á því efnahagsvandamáli; þeir stela bara frá millistéttinni (sem fær ekkert um það að segja, kosningar eru bara brandari) til að bjarga sér og sínu "business-as-usual". Nú þegar hinir ríku hafa skitið upp á bak, fá hinir fátæku að blæða fyrir mistökin þeirra... er það ekki sniðug og snyrtileg lausn."

"Ég veit að ég er varla fyrstur til að komast að þeirri niðurstöðu að ég hafi fengið nóg. Það hefur alltaf verið þjóðsaga að fólk sé hætt að fórna lífi sínu fyrir frelsið í þessu landi, og það einskorðast ekki bara við svarta og fátæka innflytjendur. Ég veit að það hefur verið fjöldi manns á undan mér og eiga eftir að verða jafn margir á eftir mér. En ég veit líka að með því að bæta mér ekki í tölu látinna, tryggi ég að ekkert muni breytast. ... Ég er bara búinn að fá nóg."

"Þótt sorglegt sé, og þó ég eyddi ævinni í þeirri trú að það væri ekki svo, er ofbeldi ekki aðeins lausnin, það er eina lausnin." ...

"Ég las einu sinni að skilgreiningin á geðveiki væri að endurtaka sama hlutinn aftur og aftur og búast við annarri niðurstöðu. Ég er loks tilbúinn að stöðva þá geðveiki. Jæja, herra Skattmann stóri bróðir, prófum eitthvað annað; take my pound of flesh and sleep well."

"Trúarjátning kommúnista: Frá hverjum í samræmi við getu hans, handa hverjum í samræmi við þarfir hans.

Trúarjátning kapítalista: Frá hverjum í samræmi við trúgirni hans, handa hverjum í samræmi við græðgi hans."

Joe Stack (1956-2010)
18/02/2010

Hægt er að lesa bréfið í heild sinni hér.

Við skulum vona að við fáum að sjá raunverulegar breytingar og lausnir hér á landi áður en fólk fer að grípa til róttækra aðgerða eins og Joe Stack. Það er nauðsynlegt að binda enda á örvæntingu fólks, áður en það gerir það sjálft á örvæntingarfullan hátt.

Hjörtur

Hvenær er botninum náð?

2009-12-07T22:15:42+00:00

Þú veist það þegar þú ert kominn þangað:

Hjörtur

ps. munið að gerast fans á facebook ==>

Hvað ertu tilbúinn að leggja á þig fyrir túkallinn?

2009-06-05T00:02:00+00:00

Það er spurning hvort við förum að sjá glugaþvottamenn sem þennan á götunum hér í Reykjavík, svona eins og efnahagsástandið er þessa dagana.

Skemmtilega útfærður :)

Túkallinn

hverrar krónu virði

Baunaréttir

2009-06-04T11:55:36+00:00

Margir sem gjarnan myndu vilja hafa baunir oftar á borðum eru svolítið skelkaðir að elda þær sjálfir og kaupa þær frekar í dósum. Og ástæðan er hið ógurlega loft sem myndast í þörmum neytandans og veldur honum leiðindum og ama. Til er ráð sem má nota til að komast hjá þessu en það er að sjóða með baununum svolítinn legg af kombú sem er sólþurrkaður stórþari og er seldur hér ýmist frá Japan eða íslenskur. Kombúið er veitt uppúr í lokin en það má líka borða það sér eða með baununum.

Baunir eru frekar ódýr matur, fitulítill en gefa vel af prótíni, vítamínum og steinefnum. Þær geymast vel í góðum pokum eða dósum og langur geymslutími virðist ekki hafa áhrif á mýkt eða bragðgæði þeirra. Gott er að fara í gegnum baunir sem á að sjóða og tína burtu ef skemmdar baunir eða steinar hafa slæðst með.

Það er hagstætt að sjóða t.d. hálft eða heilt kíló í einu, frysta það sem ekki á að snæða strax og síðan er hægt að nýta baunirnar á óteljandi máta. Munið bara að frysta þær í litlum skömmtum, svona rétt mátulegum fyrir hvert skipti.

Hér á landi eru nýrnabaunir, hvítar baunir, sojabaunir og kjúklingabaunir algengastar og aðferðin við að sjóða þær er ætíð sú sama.

Og svona gerum við:

Við leggjum baunirnar í bleyti yfir nótt eða ekki minna en 8–10 tíma. Þá er vatninu hellt af þeim, og baunirnar settar í góðan pott, vatni bætt við eða ca 3 bollum fyrir hvern bolla af baunum – þegar þær voru þurrar. Suðan er látin koma rólega upp, kombóið látið út í og allt soðið 30–60 mínútur. Saltið ef þið viljið. Það er gott að sjóða baunirnar ekki alveg í mauk, síst ef á að nota þær í heita rétti eða rétti sem þarf að sjóða smávegis.

Þegar baunirnar eru soðnar er aukavatni hellt af þeim og þær sem eiga að fara í frysti eru settar í litlar plastdósir og þegar innihaldið er orðið kalt er þeim komið fyrir í frystinum. Munið að merkja með dagsetningu.

Þá er að athuga hvað má gera við skammtinn sem við skildum eftir.

T.d. má gera:

HVÍTAR BAUNIR með skinku og epli

Þá er smáttskorinn laukur 1–2 stykki léttsteikt í olíu, grænt epli í litlum teningum sett út í og strax þar á eftir er hrært saman við lítilli dós af tómatkrafti og kryddi einsog timian og 1–2 negulnöglum. Stjakið þessu svolítið um pönnuna og látið hitna vel í gegn en síðan er bætt við grænmetissoði, 3–4 dl, lokið sett á og soðið í ca hálftíma. Hrærið í öðru hvoru og bætið aðeins vatni ef þetta verður of þurrt. Baununum sem mega vera 3–400 gr. er bætt við þegar líður að lokum suðunnar.

Þegar þarna er komið má alveg nota þetta sem meðlæti með kjöti eða fiski eða ofan á brauð.

EEEN, það má líka setja þetta í eldfast fat, dreifa slatta af skinku í sneiðum eða bitum og einu rauðu epli í skífum yfir. Hitað vel í gegn við 200°. Og þessi réttur stendur fyrir sínu.

Hér er gott meðlæti t.d. með kjúklingarétti:

HVITAR BAUNIR í karrí

Saxaður laukur er hitaður í olíu á pönnu með karrí að vild. Jurtasalti er stráð yfir og slatta af rjóma hrært út í og síðan er soðnu baununum bætt út í. Soðið í nokkrar mínútur.

Borið fram.

Einfalt –ekki satt?

Refapottréttur - sönn íslensk kreppusteik

2009-01-02T00:09:00+00:00

Á gamlársdag segir í Morgunblaðinu frá Jóni Vigfúsi Guðjónssyni, sjómanni frá Suðureyri sem eldaði sér refapottrétt. Jón Vigfús er veiðimaður og ákvað að prófa sig áfram með ref sem hráefni. Ég læt lýsingu Jóns Vigfúsar á refauppskriftinni fylgja hér, ef einhver vill prófa að matreiða ref:

„Síðan steikti ég kjötið á heitri pönnu, kryddaði með salti og pipar. Svissaði síðan lauk, sveppi og papriku saman við refinn og bjó til villibráðarsósu. Skellti þessu öllu út í sósuna og lét malla í 20 mínútur og úr varð þessi fíni refapottréttur sem smakkaðist vel.“ Sagði Jón Vigfús matinn góðan og hafa helst minnt á kindagúllas.

Túkallinn
hverrar krónu virði

Í upphafi nýs árs

2009-01-01T15:58:01+00:00

Gleðilegt nýtt ár!

Og ég meina það mjög innilega. GLEÐILEGT nýtt ár. Annus horribilis er líklega það fyrsta sem flestum dettur í hug þegar hugsað er um árið 2008. Árið sem allt fór til fjandans. En það gerðist líka margt gott á árinu. Við unnum silfur í handbolta á ólympíuleikunum. Við komumst án teljandi meiðsla úr Suðurlandsskjálftanum. Fyrir mig persónulega stendur fæðing fimmta barnsins míns upp úr en í maí fæddist mér hraustur og heilbrigður drengur. Og ég tók sjálfur á móti honum. Stórfengleg stund.

Það hvíla þungbúin drungaský yfir nýja árinu með horfur á allt að 10% atvinnuleysi og tilheyrandi erfiðleikum. Þjóðin stendur frammi fyrir stærstu áskorunum sínum frá því að hún fékk sjálfstæði. En þetta eru engin móðuharðindi. Vissulega eiga margir eftir að missa vinnuna, missa bílana sína og jafnvel missa húsin sín og enda í gjaldþroti. En það er mikilvægt að missa aldrei sjálfsvirðinguna né virðinguna fyrir öðrum. Missa aldrei trúna á að þetta sé bara dimmviðri sem gengur yfir og aftur komi bjartari tímar. Missa aldrei trúna á mátt vinskapar og fjölskyldu. Og gleymum ekki fyrirgefningunni. Örvæntingin er slæmur ráðgjafi og mörk mistök hafa verið gerð og fleiri eiga eftir að vera gerð. Finnum reiðinni uppbyggilegan farveg.

Kornið
Hvað var það sem gerðist? Það má kannski líkja þessu við kornuppskeru. Kornið okkar hefur sprottið gríðarlega vel á undanförnum árum og orðið stærra og glæsilegra eftir því sem við höfum borið meiri áburð á það. En í stað þess að skera kornið þegar það var tilbúið bárum við meira á til að stækka það enn frekar. Og við héldum áfram þó komið væri fram á haust. Og við hættum ekki fyrr en kornið fraus og stönglarnir brustu undan þessum stóru glæsilegu kornum og öll uppskeran fór til spillis.

En það sem enn er eftir er frjór jarðvegurinn, nýplægður akur sem býður þess að í hann sé sáð. Nú er komið að grasrótinni. Það kemur enginn og bjargar okkur í þetta skiptið. Ekki ný álver. Ekki olíuhreinsistöð. Ekki þorskurinn. Við þurfum að rækta hið “nýja Ísland” sjálf.

2009 er ár nýsköpunar
Stórar björgunaraðgerðir krefjast stórra lána. Og þau liggja ekki á glámbekk þessa dagana. En aðrar aðgerðir krefjast fyrst og fremst vinnu, framtaksemi og þátttöku okkar. Þaðan mun uppbyggingin koma. Þaðan mun framtíðin koma. Því þar er okkar stærsta auðlind. Mannauðurinn og hugvitið.

Þetta er ekki einhver klisja til þess að peppa fólk upp og láta það halda að það sé einhvers virði. Þetta er einfaldlega staðreynd. Ef náttúruauðlindir væru svona góð fjárfesting væri Kongó í Afríku ríkasta land í heimi. Kongó á gull, olíu, demanta og 75% af öllum góðmálmum sem notaðir eru í tölvuiðnaðinum. Og er Kongó ríkasta land í heimi? Nei, hvergi nálægt því. Síðan höfum við lönd eins og Sviss, Danmörku og Lúxemborg sem eru meðal ríkustu landa í heimi. Og hvaða náttúruauðlindir hafa þessi lönd? Engar. Alls ekki neitt. Ekki málma, ekki olíu, ekki einu sinni fisk nema í mjög takmörkuðu magni. Það sem þessar þjóðir hafa nýtt sér er hugvit. Þar er framlegðin mest, en ekki í álvinnslu, olíuvinnslu eða annarri hráefnisframleiðslu. Álið verður ekki virkilega verðmætt fyrr en það er komið Audi merki á það og slatti af hugviti á bak við það.

Í Íslendingum býr geysimikill sköpunarmáttur. Við erum óhefluð og kreatív og í okkur býr mikill kraftur. Það er þessi kraftur sem nú mun koma okkur áfram, sem við þurfum að virkja. Hvort sem er í grasrótinni, fiskvinnslunni eða innan stærri fyrirtækja. Fólk er sneisafullt af hugmyndum. Nú er rétti tíminn til að koma þeim í framkvæmd.

2009 er ár draumanna
Við höfum tilhneigingu til þess að byggja okkur upp ákveðið öryggisnet. Starf sem við erum sæmilega örugg í. Hús sem við erum sæmilega ánægð með. Líf sem er í föstum skorðum og tiltölulega átakalítið. Þetta veitir okkur öryggi sem við viljum síður raska og heldur aftur af okkur þegar kemur að því að fylgja draumum okkar og láta þá rætast. Þorum við að leggja þetta öryggi undir?

Nú hefur þessu jafnvægi verið raskað, við höfum verið svipt örygginu. Það er óþægilegt en um leið er það hvatning til þess að grípa nú tækifærið og láta langþráða drauma rætast. Hvort sem það er að fara í langt ferðalag, stofna nýtt fyrirtæki, fara í nám, skipta um stafsvettvang, sinna listsköpun, flytja á nýjan stað ... Árið 2009 er einmitt rétta árið til þess að láta draumana rætast.

2009 er árið þitt
Breytingum fylgja tækifæri og nú er tækifæri fyrir þig til þess að láta til þín taka, til þess að láta draumana rætast, til þess að byrja á einhverju nýju. Endirinn á einu er óhjákvæmilega upphafið að einhverju öðru. Það er þitt að ákveða hverju.

Verum dugleg að rækta vini okkar og fjölskyldu og styðja við bakið hvort á öðru. Hittumst, tölum saman, deilum hugmyndum og góðum ráðum. Það kemur margfalt til baka, þótt síðar verði.

Með bestu óskum um farsælt og gæfuríkt nýtt ár
Hjörtur Smárason