Olzii's software development blog

Бид Дэлхийн Аваргатай боллоо !!!

noreply@blogger.com (Д.Өлзий-Орших) — Wed, 26 Aug 2009 17:02:00 +0000

Голландын Роттердам хотноо болж буй жудо бөхийн Дэлхийн аварга шалгаруулах тэмцээний эрэгтэйчүүдийн 66 кг-ийн жинд барилдсан Монгол Улсын гавьяат тамирчин, Афиний олимпийн хүрэл медальт, Азийн наадмын аварга, Ази тивийн хошой аварга, Зүүн Азийн аварга Х. Цагаанбаатар эхний тойрогтоо хийлж, 2-р тойрогтоо Казакстаны бөх Сергей Лимийг, 3-р тойрогт Бельгийн бөх Фабрис Фламандийг, хэсгийн аваргын төлөө Румыны бөх Дэн Фэсиег ялж, хагас шигшээд ОХУ-ын бөх Алим Гадановыг, улмаар аваргын төлөө Испаний бөх Сугой Уриартетэй урамтай сайхан хүч үзэж ялснаар Монгол улсын анхны Жүдо бөхийн дэлхийн аварга боллоо.

Цагаанаадаа баяр хүргэе, бид чамаар бахархаж байна !

С.Жавхлан "Нууцхан сэтгэлийн үнэн" (Даян аварга А.СҮХБАТ-д зориулав)

noreply@blogger.com (Д.Өлзий-Орших) — Tue, 16 Jun 2009 19:53:00 +0000

Уран хурц, дайчин шаламгай, үзэгчдийг шуугиулсан барилдаанаараа олны талархлыг хүлээсэн миний хамгийн хайртай бөх бол "Жижиг" Сүхбат аварга маань билээ. Монгол бөхийн дэвжээнээ тодрон гарсан дахин үл давтагдах гайхамшигтай мэдрэмжтэй бөх бол даян аварга Сүхбат. Энэ сайхан аварга маань зодог тайлснаас хойш би хувьдаа Монгол бөхийг бараг үзэхээ байсан бөгөөд тоотойхон үзсэн барилдаануудаас маань үнэхээр сэтгэл хөдөлгөсөн, хамт хазайлгасан, орилоод босч ирүүлсэн сайхан барилдаан үзсэнээ ер санахгүй юм. А.Сүхбаттай барилдаан бүр тийм байж билээ.

Үзэгчдийг байлдан дагуулж явсан идэр залуу аваргад маань зориулаад нэгэн сайхан дуу зохиогджээ. С.Жавхлан өөрөө шүлгийг нь зохиож аваргадаа зориулан дуулсан уг дууны клипийг миний дүүгийн GO студи бүтээсэн байна.

Хайртай аваргынхаа тухай дууны клипийг хамгийн анх олон түмэндээ түгээж байгаадаа миний бие тун их баяртай байна. Аварга маань энэ зун наадмын зүлэг ногоон дэвжээнээ дахин зодоглож бид бүхнийгээ баясгах болтугай !

Youtube хувилбар

High Quality MP4 файлыг нь rapidshare-с татах :

MP4 видео

Электрон ном бүтээжээ. (FLEPia)

noreply@blogger.com (Д.Өлзий-Орших) — Fri, 24 Apr 2009 07:35:00 +0000

Fujitsu компани электрон ном FLEPia-г (Flexible Electric Paper) бүтээжээ. Энэ төхөөрөмж дээр өөрийн PDF, TXT, HTML, XMDF, Word, Excel, Powerpoint электрон номуудыг хуулаад хүссэн газраа уншаад явах бололцоотой юм байна. Notebook компьютер болон гар утаснаас юугаараа давуу вэ гэхээр авч явахад тохиромжтой маш хөнгөн, батерей нь олон цаг барьдаг том дэлгэцтэй гэх мэт олон давуу талуудтай юм байна. Одоохондоо зөвхөн Японд худалдаалж байгаа бөгөөд удахгүй гадаад зах зээлд гаргана.

FLEPia-гийн зарим үзүүлэлтүүдээс дурдвал :

Интерфейс : Touchscreen дэлгэц, 6 функциональ товч, scroll товч

Хэмжээ : A4, A5

Жин : A4 нь 480гр, A5 нь 320 гр

Батерейны хугацаа : Бүрэн цэнэглээд 50 цаг ажиллана

Дүрслэх өнгө : 260,000 хүртэл өнгө

Дэлгэцийн хэмжээ : 1024 х 768 цэг

Карт уншигч : SD карт

Дараах видеоноос дэлгэрэнгүй мэдээллийг авна уу.

Уг нь маш хэрэгтэй эд байгаа биз, нэгийг авах юм сан. Даан ч японд зарж буй үнэ нь 1000 орчим доллар байгаа нь дэндүү үнэтэй байна. Яваандаа хямдрах байлгүй, ямар notebook компьютер биш дээ. Ямар ч байсан маш хэрэгтэй бүтээгдэхүүний санаа сэдсэн нь сайшаалтай, хөгжих тусмаа үнэ нь хямдраад илүү сайн болох биз (Цаас шиг хуйлаад авч явдаг бол бүр гоё гэж бодлоо)

SSRS хичээл

noreply@blogger.com (Д.Өлзий-Орших) — Fri, 24 Apr 2009 07:34:00 +0000

MSSQL үзэж буй оюутнууддаа зориулаад SQL Server Reporting Services ашиглан хэрхэн тайлан хийх тухай зааж байсан хичээлийнхээ хэсгээс орууллаа. Энэ хичээлд Wizard ашиглаад маш энгийн тайлан хийх болно.

Шинэ блог нээв

noreply@blogger.com (Д.Өлзий-Орших) — Wed, 15 Apr 2009 21:08:00 +0000

Сүүлийн үед Аваргуудын Лигийн тоглолтууд үнэхээр өрсөлдөөнтэй, сонирхолтой болж байгаа тул блог дээрээ хөлбөмбөгийн тухай бичихгүй байх аргагүй байдаг. Гэтэл блогийн маань үндсэн зорилго алдагдан Software Dev блог биш Soccer блог болчих гээд байгаа тул шинэ блог үүсгэн хөлбөмбөгийн тухай бичиж байхаар шийдэв. Иймд дахин энэ блог дээрээ хөлбөмбөгийн тухай бичлэг оруулахгүй байх болно.

Шинэ блогийн хаяг : http://my-best-goals.blogspot.com/

Go Go Chelsea !!!

noreply@blogger.com (Д.Өлзий-Орших) — Tue, 14 Apr 2009 21:42:00 +0000

Chelsea 4 - 4 Liverpool

Ойрын хэдэн сар магадгүй хэдэн жил үзээгүй гоё тоглолт боллоо гэж. Хоёр баг үнэхээр сайн байна аа, хөл бөмбөг яаж тоглодгийг, хөл бөмбөг ямар агуу болохыг, хөл бөмбөгт боломжгүй зүйл байдаггүйг ёстой нэг үзүүлсэн тоглолт боллоо. Дэндүү уран цохилтыг алс холоос хийх юм, хариуд нь Чэлсигийн Alex тэрнээс ч дутахгүй цөм цохилтыг маш хүчтэй хийх юмаа. Хэрэв Alex-н цохилтыг Reina хаасан бол бөмбөгтэйгээ хамт хаалганд орох байсан шүү, хахаха.

Дрогбагийн мэдрэмжийг бас магтаад баршгүй юмаа, ноднин жил мөн л Liverpool-н хаалганд аймаар нарийн өнцгөөр оновчтой цохилтыг хийн хожиж байсан бол энэ жил бас л маш нарийн гоолыг хийлээ, үнэхээр мэдрэмжтэй агуу довтлогч юмаа.

Ойрд миний энэ блог SOFTWARE DEV блог биш FOOTBALL BLOG болох дөхөж байна. Ажил ихтэй учраас шинэ бичлэгүүд нэмж чаддаггүй, гэхдээ хөл бөмбөгт бол үргэлж цаг гаргана шүү...

Алив Чэлсигийн фэнүүд сэтгэгдлээ хуваалцаад байгаарай, баярлаад, бахдаад ханахгүй байна шүү... Аваргуудын Лигийн түүхэн дэх нэгэн агуу тоглолтыг үзлээ гэж...

Chelsea 0 - 1 Liverpool

Chelsea 0 - 2 Liverpool

Chelsea 1 - 2 Liverpool

Chelsea 2 - 2 Liverpool

Chelsea 3 - 2 Liverpool

Chelsea 3 - 3 Liverpool

Chelsea 3 - 4 Liverpool

Chelsea 4 - 4 Liverpool

Өчигдөр шөнө English Premier League-н шилдгийг баталсан үнэхээр агуу тоглолт болж өнгөрлөө. Энэ тоглолтын гэрч болсондоо маш их баяртай байна. www.uefa.com сайт энэхүү тоглолтыг агуу тоглолтуудын жагсаалтанд оруулжээ.

Агуу тоглолтууд :

Liverpool FC v Chelsea FC

2008/09 quarter-final: 1-3, 4-4 (agg: 5-7)

Arsenal FC v Liverpool FC

2007/08 quarter-final: 1-1, 2-4 (agg: 3-5)

Fenerbahçe SK v Sevilla FC

2007/08 first knockout round: 3-2, 2-3 (agg: 5-5, 3-2 pens)

Liverpool FC v AC Milan

2004/05 final: 3-3 aet, 3-2 pens

AC Milan v RC Deportivo La Coruña

2003/04 quarter-final: 4-1, 0-4 (agg: 4-5)

Real Madrid CF v AS Monaco FC

2003/04 quarter-final: 4-2, 1-3 (agg: 5-5, Monaco win on away goals)

Liverpool FC v Bayer 04 Leverkusen

2001/02 quarter-final: 1-0, 2-4 (agg: 3-4)

Chelsea FC v FC Barcelona

1999/00 quarter-final: 3-1, 1-5 aet (agg: 4-6)

Manchester United FC v FC Bayern München

1998/99 final: 2-1

Manchester United FC v Juventus

1998/99 quarter-final; 1-1, 3-2 (agg: 4-3)

Liverpool 1 - 3 Chelsea

noreply@blogger.com (Д.Өлзий-Орших) — Thu, 09 Apr 2009 04:01:00 +0000

Миний дэмждэг бас тоглолтыг нь үзэх дуртай хоёр баг өчигдөр үнэхээр гал гарсан тулаан хийлээ. Чэлси маань Liverpool-г талбай дээр нь 3 гоол оруулан хожиж, Чэлсигийн фэнүүд баярласандаа унтаагүй шөнө байлаа. Manchester United, Real Madrid нарыг дараалан бут ниргэж бүгдийн зүрхэнд шар ус хуруулаад байсан Liverpool-г Чэлси бут ниргэж, тун хүнд байдалд орууллаа. Гуус Хиддинк ч үнэхээр ШИДТЭН юмаа, тактикийн хувьд Liverpool-с хамаагүй илүү байж тэдний түлхүүр тоглогчдийг юу ч хийлгэсэнгүй.

GO GO CHELSEA !!!

Миний аав

noreply@blogger.com (Д.Өлзий-Орших) — Thu, 26 Mar 2009 18:42:00 +0000

dashkhuu.blogspot.com

4-р сарын 1-ний өдөр. Жил бүрийн энэ өдөр хайрт аавыгаа маш их үгүйлэн санадаг бөгөөд аавынхаа гэгээн дурсгалд зориулан ямар нэг зүйл хийж байхыг хүсдэг юм. Учир юу вэ гэвэл миний аав Гончигийн Дашхүү болвоос ард олондоо хайрлагдан хүндлэгдсэн хошин урлагийн нэрт мастер жүжигчин хүн байсан юм.

Намайг бүр хүүхэд байх үеэс жил бүрийн 4-р сарын 1-нд Хүүхэд Залуучуудын Театрт "Элдэв зураг" инээдмийн хөтөлбөр тавигддаг байсан ба аав маань энэ хөтөлбөрийн зохиолыг бичин бэлдэж, өөрөө тоглодог байлаа. Энэ үеэр Хүүхэд Залуучуудын Театр олны хөлд дарагдаж, билет нь шаглагдаж, инээдээр цангасан хотынхон ёстой л нэг шавдаг байж билээ. "Элдэв зураг" тоглолтыг тоглох бүрт нь үзэж, үзэх бүрдээ элгээ хөштөл инээж, театраар сэлгүүцэн тоглож, олон сайхан жүжигчин ах эгч нарын өрөөгөөр хэсч том наадамд өөрөө оролцож байгаа аятай нэг л их баяр баясгалантай амьтан явдаг байж дээ.

Тийм ч учраас энэ өдөр бол миний амьдралын жаргалтай мөчүүдийг санагдуулсан сайхан өдөр, мөн хайрт аавыгаа дурсан санаж сэтгэлдээ гуниглах тийм л нэг өдөр билээ.

Би гадаад төрхөөрөө аавтайгаа дэндүү адилхан төрсөн тул хамт явахаас их ичдэг, барагтай бол хамт явахаас зайлсхийдэг байлаа. Хамт явахаар бүх хүн бид хоёрыг хараад байх шиг санагдаад бас хамт явж байхад таарсан аавын найзууд "Дашхүү хө, чи мөн адилхан зуржээ, сайн зураач юмаа" гэж ирээд л олон юм ярьж хүүхдийг мөн ч их ичээдэг байж билээ. "Чи яагаад жүжигчин болоогүй юм ?" гээд хүмүүс надаас их асуудаг юм. Арга ч үгүй биз, жүжигчин хүний хүүхэд учраас хүүхэд наснаасаа авахуулаад урлагаар амьсгалж урлагийн сайн сайхныг мэдэрсэн түүнд татагдсан байх ёстой доо.

Үнэхээр ч аав маань жүжигчин, ээж маань кино үйлдвэрийн монтажчин бүхэлдээ урлагийн гэр бүл байсан учраас манайхаар их олон урлагийн хүмүүс байнга ирж очдог, урлагийн хүмүүстэй хамт зусланд гардаг, бас Хүүхэд Залуучуудын Театрын шинэ тавигдсан жүжгүүдийг байнга үздэг, шинээр гарсан Монгол кинонуудыг ээжийнхээ ажил дээр үздэг гээд л үргэлж урлагаар л амьсгалдаг байлаа. Нээрээ Мандухай сэцэн хатан гэх мэт олон сайхан уран сайхны киног дэлгэцэнд гарахаас нь өмнө эх хувилбараар нь үзэж байлаа. Ингээд бодохоор би урлагийн хүн болох нь гарцаагүй мэт, гэхдээ би багадаа их дуу цөөтэй бүрэг ичимхий хүүхэд байсан юм. Хэрэв хүсвэл жүжиг, кинонд тоглох боломжтой л байсан, нэг сонин юм хэлэхэд манай гэрийнхнээс надаас бусад нь бүгд ямар нэг жүжиг, кинонд тоглосон байдаг юм билээ, бүр эмээ өвөө хүртэл шүү.

Би маш ичимхий байсан тул боломж гарах бүрд зугтдаг байлаа, нэг удаа "Хайрыг хайрла" жүжгийн том бандид тоглодог хүүхэд ирээгүй, тэгээд би тэр үед театр дээр байж таараад, намайг тайзан дээр гаргах юм болвоо. Харин би зугтаад тайзны ард байдаг шатны доор жүжиг дуустал нуугдсан юм даг, хүмүүс "Дашхүүгийн том банди энд байсан хааччихав?" гээд хажуугаар хайгаад л, би нуугдаад л... Хэхэ.

Математик сонирхож эхлээд, програм зохиогч болсон маань ердөө л сургуулиасаа явахгүй гэсэн хүсэлтэй минь холбоотой. Тэр үед гэр маань шинэ байранд нүүж ороод, сургуулиасаа шилжих болоход, шилжихгүйн тулд шинэ байгуулагдсан математикийн сонгоны ангид орсноор л програм зохиогч болох зам минь тавигдсан. Хэрэв тэгээгүй бол өдийд жүжигчин ч юмуу эсвэл урлагийн өөр ямар нэг ажил хийгээд явж байх байсан бизээ.

Хэхэ, аавынхаа тухай бичнэ гэсэн чинь баахан өөрийнхөө тухай болоод хадуурчихлаа, энэ багш хүний зан л даа.

Аав маань хэдий олны танил нэртэй хүн байсан ч маш төлөв даруу, хүнд тусархаг, цайлган сэтгэлтэй, гүндүүгүй сайхан эр хүн байсан. Уран бүтээлийнх нь талаар мэргэжил нэгт нөхөд нь үнэлж дүгнэсэн, дурсан ярьсан ярилцлагууд сонин сэтгүүл дээр олон удаа хэвлэгдэж байсан тул энэ тухай биш ямар аав байсан талаар дурсаж бичье.

Гэртээ байхдаа аав маань маш их хөгжилтэй, байнга л биднийг хөгжөөсөн, хурцалсан, ухаарал хайрласан үг хэлдэг, ховорхон уурладаг тайван хүн байлаа. Ер нь аавдаа маш цөөхөн удаа зодуулж байсан юм байна, хамгийн сүүлд 3 билүү 4-р ангид байхдаа орос хэлээр долоо хоногийн гаригуудыг нэрлэж чадахгүй байсан учраас тоосоо гөвүүлж нэг сайн сургамж авч байсан санагдах юм.

Аав маань хүүхдүүдийнхээ боловсролд маш их анхаарал тавьдаг, таван хүүхдээ бүгдийг нь боловсролтой хүн болгохыг чармайдаг хүн байлаа. "Өөрийн сонгосон мэргэжлээ эзэмшсэн шиг эзэмш, үргэлж бүхний манлайд нь явж бай." гэж бидэнд үргэлж захидаг байсан. Үнэндээ бид аавын захиасыг биелүүлэхийн тулд хичээн суралцсаар бүгд сонгосон мэргэжлүүддээ эзэн болж чадсан гэж би дүгнэдэг юм.

Аав маань зураг авах хоббитой хүн байсан. Манай гэрт хар цагаан ба өнгө зураг авах, угаах бүх хэрэгслүүд байдаг, аав зураг аваад бид хоёр хамт угаадаг байсан юм. Мэдээж мэргэжлийн зурагчдыг яаж гүйцэх вэ, гэхдээ л өөртөө кайфтай зугаатай байсан биз. Сүүлдээ тэр зургийн хэрэгслүүд нь миний гараар ороод дууссан даа.

Аав маань бас хөгжим тоглох дуртай, манайх гэдэг айл чинь жүжигчнийх биш хөгжимчнийх гэмээр байдаг байсан шүү. Аав баянхуур, морин хуур гэх мэт олон хөгжмийг чадварлаг тоглодог байсан төдийгүй сонгодог хөгжим сонсох маш дуртай байсан. Дүүг маань хийлийн ангид Хөгжим бүжгийн сургуульд оруулчихсан учир гэртээ байхаараа байнга хажуудаа сонгодог хөгжим тоглуулаастай, өөрөө уярчихсан сууж байдаг дүр зураг одоо ч нүдэнд тод бууж байна. Миний хувьд дүүгийн тоглоод аавын уяраад байгаа тэр "аймаар" сонгодог хөгжим үнэхээр "залхмаар" байдаг байлаа. Мэдээж би ойр зуурын аялгуу гоётой сонгодог хөгжим сонсоно л доо, гэхдээ дүү аав хоёрын сонсож уярдаг сонгодогууд бол үнэн "аймаар". Дүү маань Хөгжим бүжгийн сургуулиа дүүргээд нэг хэсэг багшилж, Улсын Филармонид хөгжимчин хийж байгаад Швед улсад суралцахаар мордож, одоо Шведийн Хааны Академийн дэлхийд эхний 10-т тоологдох том хөгжимчинд тоогдож шавь нь болоод сурч байна.

Аав маань бас ан хийх дуртай байсан юм. Тарваганы мах, айрганд нугасгүй. Аавтайгаа хамт бригадаар хэд хэдэн удаа явж байсан ба хөдөө явахад жүжигчин ах эгч нарын дунд уйдна аа гэж байхгүй үнэхээр хөгжилтэй явцгаадаг юм. Мөн хөдөө явахад тарваганы махыг ч ёстой залхталаа иднэ, сүүлдээ идэж чадахгүй, хүмүүс жүжигчдийг ид уу гээд дайлаад байдаг, хэцүү л юм байна лээ. Ан гэснээс манай гэрт ангийн буу, сум байдаг би тэрүүгээр нь их сахилгүйтдэг байлаа. Сумных нь толгойг хананд үрж байгаад салгаад дарийг нь аваад лентэд ороож байгаад янз бүрийн тэсэрч дэлбэрдэг юм хийгээд тэрийгээ энд тэнд дэлбэлж хүн айлгадаг байлаа. Сүүлд тэрийгээ нүхэлж байгаад гар дээрээ дэлбэлээд тэгээд больсон доо. Бас хоосон хонгиог нь буунд хийгээд сумлаж байгаад хий бууддаг байж билээ. Хэхэ...

Алгадуулах, аргадуулах аавтайгаа хамт байх үнэхээр сайхан, даанч аав маань биднийгээ дэндүү эрт орхисон юм, аавтайгаа өтөлж буй хүмүүсийг хараад үнэхээр их атаархдаг даа...

Аавынхаа тухай, бага насныхаа тухай дурсахад сайхан байлаа. Би түрүүн хэлсэн жил бүрийн 4-р сарын 1-нд аавыгаа дурсан санадаг ба аавынхаа гэгээн дурсгалд зориулан ямар нэг зүйл хийж байхыг хүсдэг юм. Урьд жилүүдийн энэ өдөр аав таньдаа зориулан хүндэтгэлийн тоглолт зохион байгуулж, дуун суврага босгож , түүнийгээ дүрсжүүлэн сайхан клип хийж байсан бол энэ удаа аавдаа зориулан монголын анхны "Жүжигчний блог" нээлээ.

Дараах хаягаар орж миний аавын амьдрал, уран бүтээлтэй танилцана уу...

Жүжигчин Г.Дашхүүгийн блог : dashkhuu.blogspot.com

Одоо л ээж, аавыгаа жаргаая гэтэл

Орчлонгийн тоглоом даанч хатуу…!

Алба ажлын эрхээр газар алс одоод

Аян замыг хороосоор яаран яарсаар ирэхэд

Аав минь энэ хорвоогоос явчихсан байлаа!

“Хvvтэйгэй л нэг уулзмаар байна даа” гэж ээжид минь хэлсэн гэдэг!

Хvслийн сvvлч нь ганцхан энэ л байсан юм шvv!

Чи зэмлэл хvлээж, зэргийн нөхөддөө орхигдож болно

Чи зээрийн янзага шиг хөөрхөн бvсгvйдээ хаягдаж болно

Харин аав, ээж чинь сэрvvн тунгалаг байж

Харьж ирэхийг чинь хvлээхээс илvv жаргалыг

Хамаг орчлонгоос хайж эрэвч олохгvй…

Алдааг минь та нар бvv давтацгаа!

Аав, ээжийгээ амьдад нь амжиж баярлуулцгаа!…

Алтан дэлхийд vvнээс илvv гавъяаг ах нь мэдэхгvй ээ!

Vзээд өнгөрөх амьдралыг мөнхийн юм шиг бодож

Vдлээд буцах хорвоог vvрдийн юм шиг сэтгэж

Залуу, идэр насаа хөгшрөхгvй юм шиг санаж

Замба тивийн элгэн дээр туйлж яваа дvv минь!

Өнгөт алаг хорвоо дээр

Өөрийн сайндаа чи төрөөгvй!

Өдөр өдрийн нарыг vзэж, тэнгэрийг харах

Өндөр их тавилан хайрласан аав, ээждээ баярла!

UEFA Champions League

noreply@blogger.com (Д.Өлзий-Орших) — Fri, 20 Mar 2009 13:47:00 +0000

Аваргуудын лигийн шилдэг 16 багийн хасагдах шатны тулаанууд маш сонирхолтой болж өнгөрсөн билээ. Тэгвэл дараагийн шатны хуваарь гарсан байна. Миний дэмждэг Чэлси багд нэлээд хэцүү сугалаа таарсан байх юм. Алдарт Liverpool клуб саяхан Испанийн эзэн хааны клуб Real Madrid ба Английн Лигийг тэргүүлэгч Manchester United 2-ыг хоёуланг нь бут ниргэж үнэхээр үзүүштэй гоё тоглолт үзүүлэн гялалзаж яваа билээ. Гэтэл Чэлситэй таарчих юмаа, би Чэлсиг дэмждэг бас Liverpool-г үзэх маш дуртай учраас жаахан харамсалтай л байна. Аль ялсныг нь цааш нь аваргуудын лигт дэмжээд явахаас даа.

Хагас финалд Chelsea, Liverpool-н ялсан нь Barcelona, Bayarn-н аль ялсантай тулах юм байна. Мөн нөгөө хагас финалд Английн Arsenal ба Manchester United хоёр учрах магадлал өндөр юм байна даа. За ямар ч байсан 4 сарын 7,8-нд болох эхний тоглолтуудыг тэсэн ядан хүлээе дээ.

Ялагдаагүй арми /АА-ийн 88 жилийн ойд/

noreply@blogger.com (Д.Өлзий-Орших) — Tue, 17 Mar 2009 10:49:00 +0000

Өчигдөр орой 25-р суваг телевизийг үзэж суутал Монголын Ардын Армийн талаар сонирхолтой баримтуудыг дурдсан "Ялагдаагүй арми" нэвтрүүлэг гарлаа. Нэвтрүүлгийг үзээд үнэхээр таалагдлаа, монгол хүн гэдгээрээ их бахархлаа. Мөн дээрх тулаануудад оролцож явсан өөрийн элэнц өвөө партизан Аюурзанын Шагдар өвөөгөөрөө ч бахархаад авлаа, 10000 гаминг хөөгөөд давхиж явсан эрэлхэг 400 малчны нэг нь манай өвөө байж дээ.

Нэвтрүүлгийг бичлэг хийгээд блогтоо оруулъя гэсэн боловч чадсангүй харин нэтээс текстийг нь оллоо. Уг нийтлэл “Улс төрийн сонин”-ны 2009 оны № 5-рт гарсан юм байна.

Маргааш АА-ийн 88 жилийн ой болно, эх орноо баатарлагаар хамгаалж ирсэн бүх монгол цэргүүддээ, эх орон дуудсан цагт хэзээд бэлэн байх бэлтгэл хүчин болсон бүх эрчүүддээ баярын мэнд хүргээд дээрх нийтлэлийг орууллаа. Эх сурвалж : (gankhuyag.wordpress.com)

А.БААТАРХУЯГ: 10.000 ХЯТАДЫГ 400 МОНГОЛ ЯЛЖ ЧАДНА…

Хиагтыг чөлөөлөх тулалдаанд 400 монгол цэрэг, 10 000 гамингийн өөдөөс давшаад ялсан нь огт худлаа. Буу, сэлэм барьж үзээгүй 400 малчин орчин үеийн зэвсэгтэй, бас ч гэж байнгын армийн 10 000 цэргийг ялах ямар ч боломж байхгүй, энэ бол “домог” гэлцэнэ.

Энэ гаргалгааг анх Баабар “Нүүдэл суудал” номондоо гаргаснаас хойш ихээхэн тархах шинжтэй болжээ. Хятадуудтай байлдвал заавал ялна гэж боддог Монголчууд сүүлийн үед орчин үеийн зэвсэгтэй хятадууд биднээс илүү гэж бодох болжээ.

Хүн хүчний харьцаа ба зэвсэглэлийн чанарыг тооцвол энэ нь байж болох мэт авч бодит хийгээд бодит бус хүчин зүйлүүд бас бий. Бодит хүчин зүйл нь зэвсэглэлийн хувьд Хиагтыг чөлөөлсөн Монголчууд тийм ч муу байгаагүй юм.

ХХ зууны эхээр Оросын армийг зэвсэглэж эхэлсэн Мосины загварын винтов, морин цэргийн сэлмээр өвч зэвсэглэсэн байлаа. Түүнээс бороохой шийдэм барьж, нум сум эвшээлгэж дайраагүй юм. Пулемёт буу лав дөрөв байжээ. Мөн их бууны галын дэмжлэгтэй байв. Харин 400 цэрэг нь дан малчин байсан эсэх тухайд тун сонирхолтой дүгнэлт хийж болно. Хиагтын орчимд цугларсан Ардын журамт цэргийг лав л Зөвлөлтийн сургагч нар сургасан гэх мэдээлэл байдаггүй. Нөгөө талаас нь үзвэл байлдааны туршлага хийгээд зэвсэг эзэмших чадварын хувьд Монголчууд илүү байсныг нотлож болно.

Учир нь Хиагтын орчим цугласан цэргийн дотор хашир туршлагатай дайчин олон байв. 1913-1919 онд Өвөр Монгол болон Монголын өмнөд хязгаарт хятадуудтай амжилттай байлдаж байсан Богд хаант улсын цэргийн дайчид олноор очжээ. Д.Сүхбаатар ч гэсэн Харчин гүн Бавуужавын цэргийг устгахад гарамгай байлдаж баатар цол шагнуулсан 12 хүний нэг. Ногоон намын дарга Д.Энхбатын дурсан ярьснаас үзвэл Сүхбаатартай зэрэг баатар болсон өвөг ах Сэрээтэр нь Сүхийг дагаж Хиагтад очсон ба хувьсгал хийж байгаа эсэхээ ч мэдэхгүй, хятадтай байлд гэхэд хятадтай, оростой байлд гэхэд Оростой байлдаж явжээ.

Зэвсгээ хураалгаад тарсанд цөөнгүй нь Богд хаант улсын армийн пулемёт сумангийн дарга Д.Сүхбаатар нарын хамт Монгол улсаа чөлөөлөх хүсэлтэй Хиагтад очжээ. Тэд өмнө нь ялж сурсан, хятадуудтай эрэгчин эмэгчнээ үзэхэд бэлэн байв.

Тэр ч байтугай 1918 оны сүүл, 1919 оны эхээр Хятадын цэрэг Монголд орж байхад Баргын ван Манлайбаатар Дамдинсүрэн “Хүрээнд хятадыг бүү оруул, зүүн хязгаараас хятад оруулахгүйг би батлан даана” гэсэн захидал ирүүлж байсныг бодоход Монголчууд хятадтай байлдахдаа огт эмээхгүй байжээ.

Учир нь 1911 оноос хойшхи Монгол Хятадын тулалдаануудад Монголчууд үргэлж ялж байв. Мөн цэргийн хашир дайчид нэгдсэн нь Шинжаанд Хятадыг эсэргүүцэн босоод байлдсаар Оросын хилд орж Сэлэнгэд ирж суусан Илийн Сумъяа бэйсийн хошууны дайчид байв. Тулаанд хатуужсан тэр дайчид байлдааны чадвар өндөртэй байсан нь дамжиггүй. Пулемётчид нь дан Монголчууд байжээ.

Цэргийн тоо чадварыг өсгөхийн тулд Оросын армийн цэргүүдэд лам дээл өмсгөсөн, дээлийн хэлтгий захны цаанаас орос цэргийн форм харагддаг байсан гэх цуу яриа үндэсгүй юм. Хэрэв үнэхээр оросын цэргийг Хиагтын тулаанд оруулсан бол юуны өмнө зэвсэгтэй харьцах чадвараар нь пулемётчидийн дунд оруулах учиртай.

Харин Өвөр Монголоос ирсэн цэргүүдээс нэг цахар суман /тавьт/ Баяр гүний захиргаанд Бароны цэрэгт байв. Энэ тавьт хятадуудтай байлдахдаа аймшигтай харгис агаад өршөөлгүйгээрээ зартай байлаа. Баяр гүн Хиагтыг чөлөөлөөд байсан ардын журамт цэргийг дутуу үнэлсэн үү, харгис дайчидтайгаа түрүүлж давшаад бутцохиулж, өөрөө шархдаж олзлогдсоныг бодоход Хиагтыг чөлөөлсөн Монголчуудын байлдах чадвар сүрхий байжээ.

ХХ зууны эхний Монгол Хятадын дайн

“Сайтар бэлтгэгдсэн түмэн хүнтэй” хятадын байнгын арми гэгч хөөрхийлөлтэй байдалд байжээ. Чухамдаа Юань Шикай Монголыг цэргийн хүчээр бус дипломатын зальжин аргаар эрхэндээ оруулсан юм. Түүнээс бус Сүй шүжаны арми Монголд орж ирэхдээ байлдаан хийгээгүй билээ.

Хэрэв Монголчууд байлдсан бол? Энэ бол их сонин асуулт.

Гэхдээ үүнд хариулах жишээ бий. Нэг дэх нь Манлайбаатар Дамдинсүрэн вангийн захидал. Хоёр дахь нь Монголын армийн жанжин Хатанбаатар Магсаржавын цэргийн ур чадвар. Энэ хүн 1911 онд Ховдыг чөлөөлөх дайнаас хойш гадны цэргүүдтэй 41 удаа байлдахдаа нэг ч ялагдаагүй юм. Ялангуяа 1913-1914 оны Монгол хятадын дайны туршлага тэдэнд хангалттай байв.

1912 оны эцсээр Юань шикай 33 460 цэрэг, 85 их буу, 54 пулемёт бүхий зургаан замын цэргийг сайтар зэвсэглээд өвөр Монголд түлхэн оруулж, Монгол руу давшуулжээ. Чингийн Засгийн газар хар тамхины дайнд ялагдсаны дараахнаас армиа шинэчилж эхэлсэн бөгөөд Чин гүрэн унасны дараа генерал Юань Ши Кай засгийн эрхэнд гараад армиа өргөтгөсөн юм. Мэдээж бүр 1912 онд Хятад цэргийн тоо, зэвсэглэлээр Монголоос хамаагүй давуу байснаас гадна армиа европ маягаар зохион байгуулсан байв.

Харин үүний өөдөөс Оросын армийн зэвсэглэлээс хасаж байсан бердан буунаас дөнгөж салж, хагас нь винтовоор зэвсэглэсэн Монголын армийн 1000 орчим цэрэг замдаа хүчээ зузаатгах уламжлалт аян дайнд хятадын армийн өдөөс хөдөлсөн байна. Монголын арми тэр үед ердөө л хоёрхон хээрийн хөнгөн их буутай байв.

Тулалдаан одоогийн Монгол Улсын нутаг дээр бус өвөр Монголын нутагт болсон нь Богд хаан бүх Монголын хаан хэмээн нутаг дэвсгэрээ харийнхнаас хамгаалсан хэрэг байв. Баруун хязгаараар нэг зам, Дариганга, Егзөрийн хийдийн чиглэлээр нэг зам, Сөнид Улаанцавын чиглэлээр Монголчууд давшжээ.

Гэтэл үр дүн нь гайхалтай. Хятадууд анх довтолсноор баруун замын цэрэг Цагаан түнгийн орчим тулалджээ. Анхны тулалдаан 1913 оны 6 дугаар сарын нэгэнд болоход хоёр талаас 22 хүн үрэгдэж, 30 хүн шархаджээ. Хоёр дахь тулалдаанд Хятадын талаас 2000 гаруй цэрэг, харин Монголын талаас 700 цэрэг тулалджээ. Мэдээж хятадын байнгын арми зэвсэгээр Монголоос хамаагүй илүү л байж таарна.

Тулалдааны үр дүн тооцоогоор биш, ёстой жам ёсоор Монголчуудын ялалтаар төгсчээ. Монголчууд 20-ийг алаад, 50 агтыг нь олзлоод хөөн гаргасан байна. Энд уг нь Монголчууд ялагдах ёстой биз дээ? Энэ мэт Монголчууд Хятадын армийг байнга ялж байснаар барахгүй Хөх хотыг өнгөртөл давшжээ. Хятадын армитай хийсэн тулаанаас олзолсон зэвсгээр өөрсдийгөө зэвсэглээд зогсохгүй, олзолсон болон “хоцрогдсон хуучин” зэвсгээсээ 10.925 нэгж бууг Өвөр Монголчуудад өгсөн ажээ.

Мэдээж Монголын арми дан морьт цэргээс бүрдэж байлаа. Байлдаанд ялж байсан ч гурван улсын хэлэлцээрээр Монголын армийг эргүүлэн татжээ. Оросууд Богд хаанаас цэргээ татахыг шаардаж, шинээр зэвсэг нийлүүлэхээ зогсоож байв. Монголын ноёд армиа зэвсэглэх бүхий аргыг хэрэглэж байв. Оросын хаан зэвсэг олгохыг татгалзсаны дараа Монгол ноёд зэвсгийн үйлдвэрийн даргыг нь хахуульдах замаар “албан бусаар” зэвсэг авахыг хүртэл оролджээ.

-1914 оны дайны хүчний харьцааг үзэцгээе. Хятадын арми зарим мэдээгээр герман, хятадад үйлдвэрлэсэн винтовоор хангасан 39.900 цэрэг, 85 их буу, 54 пулемёттай байжээ. Гэтэл Монголын арми хоёр замын нийлээд 2000 гаруй цэрэг, үүний хагас нь винтовоор хангасан, хоёрхон их буутай буюу зам бүр нэг их буутай байлаа. Бүр 1915 онд Монголчууд ердөө 24000 цэргийг л зэвсэглэх чадвартай болсон юм.

Гэтэл байлдааны үр дүнг гайхалтай. Монголчууд 1911-1919 оны хооронд хятадыг дийлж 1693 винтов, 160 шахам мянган сум, 715 сумтай 4 их буу, 5 пулемет олзолжээ. Цэргийн тоогоор 15 дахин, пулемётаар 8 дахин, их буугаар 42.5 цөөн хэрнээ ийм амжилт олжээ. Тэр үед хүрээнд Монголчууд их түрэгдэж байгаа гэнэ, үхэх нь гайгүй юм байх гэлцэж байснаа ялж байна гэлцэх болжээ.

Хожим Хатанбаатар “Байлдахад хэцүү биш, хүний олноор л бүслэх гээд байх нь зовлонтой” гэж ярьж байжээ.

Мэдээж монголын арми нөгөө “Тунгалаг тамир” киноны Ням өвгөн цахиур буугаа магтахдаа “Баатрыг нь эс боловч жирийн цэргийг нь дөнгөчихнө” гэсэнчлэн суманд даагддаггүй баатруудаас бүрдээгүй. Бүгд л буу, сэлэм барьж үзээгүй гэгдэх “малчид” л байсан. Тэгэхээр прагматикаар үнэнийг тодруулдаг хүмүүсийн тооцоогоор бол Хиагтад Монголчууд гарцаагүй ялагдахаар барахгүй аль 1914 онд л бүрэн эзлэгдчих байжээ. Тэгтэл яагаад ялагдсангүй вэ?

1914 онд Монголын Засгийн газар цэргээ эргүүлэн татсан ба Өвөр Монголыг цэргийн хүчээр бус дипломатын аргаар нэгтгэх боломж бий гэж үзэж байжээ.

Хүрээ яагаад эзлэгдэв?

Арми нь амжилттай байлдаж байсан атал Сүй Шү Жан 1919 онд яагаад хүрээг эзэлчихдэг билээ? гэж гайхмаар.

Богдын Засгийн газрыг муучлах, ангийн тэмцлийн зоригоор түүхийг гуйвуулахдаа коммунизмын үед Богд Хаант Монгол Улсын армийн дайчин гавъяаг нуудаг байжээ. Хүрээнд Хятад цэрэг орж ирсэн нь үнэндээ зальжин дипломатч Чен И-гийн явуулга байв. Монголын ноёдыг, тэр дундаа Ерөнхий сайд болсон шанзав Бадамдоржийг хээл хахууль цутгах, айлган сүрдүүлэх замаар эрхэндээ оруулж, тэднээр Зөвлөлтийн аюулаас хамгаалах цэргийг Хүрээнд ирүүлэх хүсэлтийг Юань Ши Кайд бичүүлснээр Хятадын цэрэг байлдалгүй Хүрээнд иржээ.

1921 оны эхээр Барон Унгерн Хүрээг эзлэхэд Хятадын байнгын арми 12.000 мянган хүнтэй байжээ. Гэвч энд бас л гайхалтай үйл явдал болж, Хүрээнд бэхэжсэн хятадын цэрэг Баронд бутцохиулан сарнин зугтжээ. Барон Унгерны Азийн морин дивиз ердөө 800 гаруй хүнтэй, нийлсэн Монголчууд 200 гаруй байв. Хэрэв дагуураас авч гарсан зэвсгээ бүрэн авчирсан бол 6 их буу, 20 пулемёттай байжээ.

Гэтэл Хүрээнд байсан генерал Жан Цинхуйд 2 бригад явган болон морьт цэрэг, нэмж дайчилсантай нийлээд 15.000 хүн, 40 их буу, Гочкисийн системийн хүнд пулемёт 100 байжээ. Гэвч тэр Хүрээнээс ховх цохиулан ихэнх нь хойшоо Хиагтын зүг зугтсан ба 1500 орчим цэрэг өмнөд зүг зугтсаныг Саж ламын төвд цэргүүд ба Унгерний цэргүүд толгой дараалан хяджээ.

Хиагтад

Хиагтад байрласан хятадын цэргийн хүчин дээр Баронд цохигдон хүрээнээс ухарсан 6000 цэрэг нэмж очсоноор 10.000 орчим цэрэг лавтай байжээ. Энэ бол сүр сүлд нь үхсэн эмх цэгцгүй, хүний нутагт хашигдсан арми байлаа. Хиагтын тулааныг Монголчууд 3 дугаар сарын дундуур бага хүчээр эхлүүлсэн нь хүйтэн хахир цаг өнгөрөхөөс урьтаж ялах гэж яарсных. Нөгөө талаас Бароны дайралтаас амжих гэсэн хэрэг байх.

Гитлерийн армийн ялагдлын шалтгааныг Оросын хахир өвөл гэж олон эрдэмтэн үздэгтэй адил Оросоос ч хатуу хахир Монголын өвөл хавар гамингуудыг бүрмөсөн зутраажээ. Харин Монголчуудын хувьд хавар цаг бол эх нутгийн нь нэг л улирал билээ. 3 дугаар сарын 18-ны үүрээс авахуулж давшсан Монголчууд харуй бүрий болоход хятадын армийг бүрмөсөн бут цохиод Хиагтаас хөөсөн байв.

Хятадын армийн үзэл суртал, цэргүийн сэтгэл санаа авах юмгүй байсан нь ойлгомжтой. Хүрээнд 10 дахин бага хүчтэй Баронд ховх цохиулсан энэ армийн үлдэгдэл урагш бус хойшоо зугтсан нь гайхалтай. 10.000 орчим мянган хүнтэй арми байсны нотолгоо нь Ардын журамт цэрэгт цохиулсан гамингууд хүчээ бөөгнүүлж байгаад Хүрээний баруун талаар дайрч гарахыг оролджээ.

Генерал Рекухин тэднийг тосч байлдахад Барон Унгерн цахар цэргүүдээр хүч нэмж, эцэст нь өөрөө цэрэг аван байлджээ. 3 дугаар сарын 24-нд Барон ялж, генерал Жа У тэргүүтэй 4000 гаминг олзолжээ. Энэ тулаанд 5000 гамин алуулсан гэсэн мэдээ байдаг ба 8000 винтов өдий төдий сум олзолсон байна. Ингээд тооцвол Хиагтаас 9000 гамин, 8000 орчим винтовтой зохион байгуулалттай ухрах оролдлого хийжээ. Их буу, пулемётаа хаясан бололтой.

Яаж ч бодсон Хиагтад Монголчууд ялсан нь маргаангүй юм. Энэ бол бараг сүүлийн 70 жилд Монголчуудыг зоригжуулж байсан ба хятадтай байлдвал бид гарцаагүй ялна гэсэн итгэлийг хадгалж ирсэн юм. Монголчууд Хятадыг дорд үзэж байхад харин Хятадууд хүч чадалтай, зэрлэг дайчин Монголчуудаас эмээсээр иржээ.

Бүр 1455 онд Монголын Эсэн хааны 40.000 цэрэг авч давшаад Хятадын хагас сая цэргийг дийлж, эзэн хааныг нь олзолж ирсэн түүх бий. Үүний түүхэнд Түмогийн хэрэг гэдэг. Монголчууд дайтах чадвараа хадгалж ирсэн бөгөөд ХХ зуунд ч хэвээрээ л байсан юм.

Зэвсэглэл харьцангуй ойролцоо нөхцөлд Монголчууд илэрхий аархаж ялалт байгуулж байжээ. Байлдааны тактик, цэргийн үзэл суртал зэрэгцэн сэргэж байв. Монголчууд аймшигтай харгис хэрцгий байсан тухай Хятадын түүхчид бичдэг нь ч бас худал биш. Олзны хүнээр туг тахих, чойжин буух зэрэг ёслолууд нь Хятадын цэргүүдийг их айлгадаг байжээ. Харин энэ бол харгислал биш ердөө л уламжлал байжээ.

Сүүлийн үед зөвхөн МАХН-ыг муучлах зорилгоор Хиагтын тулалдааны яруу алдарт эргэлзэх болсон нь тийм ч сайн юм биш. Үнэндээ Хиагтыг чөлөөлсөн олон Монголчууд коммунист хувьсгалын төлөө тулалдаагүй бөгөөд эх орноо харийнхнаас чөлөөлөх л хүсэлтэй байжээ. Сүхбаатарын болон Магсаржавын цэрэгт байлдсан дайчдаас хожим ердөө 15 хүн л МАХН-д элсэж байжээ. Тиймээс МАХН-ыг муучлах гээд бүх түүхээ муучилж болохгүй нь.

Коммунист засаглал хожим 1929 онд зүүнтнүүд төрийн эрхэнд гарснаар бодат байдал болсон юм. Энэ гуравдугаар сарын 18-нд Хиагтын алдарт тулааны ой, Монголын Ардын армийн 88 жилийн ой болно.

Дашрамд хэлэхэд Монголын арми ХХ зуунд нэг ч ялагдаагүй билээ. Харин армийнхаа ойг 11 жилээр урагшлуулж, Богд хаант Монгол Улсын арми байгуулагдсан өдрөөр тогтоовол зүйтэй мэт санагддаг.

АА-ийн 88 жилийн ойн мэндийг хүргээд төгсгөлд нь дүүгийнхээ студийн хийсэн нэгэн цоглог дууны клипийг хүргэе.

"Мистер" хамтлагийн "Энхийн манаанд" :

SQL 2005 Express Edition for Beginners

noreply@blogger.com (Д.Өлзий-Орших) — Thu, 12 Mar 2009 02:57:00 +0000

Transact SQL хэлийг судалж байгаа оюутнууддаа зориулаад SQL 2005 Express edition for Beginners хэмээх анхан шатны хичээлийг оруулж байна. Хичээл дээр үзсэн мэдлэгээ бататгах, давтах, бие даан судлахад чинь хэрэг болно гэж найдаж байна.

1. What is a Database ?

2. Understanding Database Tables and Records

3. More about Column Data Types and other Properties

4. Designing Relational Database Tables

5. Manipulating Database Data

6. More Structured Query Language

7. Understanding Security and Network Connectivity

8. Connecting your Web application to SQL Server Express Edition

9. Using SQL Server Management Studio Express

10. Getting started with Reporing Services

11. Building and Customizing Reports in Business Intelligence Development Studio

12. Creating and Using Stored Procedures

13. Enabling Full Text Search in Your Text Data

UEFA Champions League

noreply@blogger.com (Д.Өлзий-Орших) — Tue, 10 Mar 2009 22:45:00 +0000

Аваргуудын лигийн тоглолтууд ч үнэхээр сайхан болж байна. Өнөөдөр Чэлси маань яллаа, Liverpool эзэн хааны баг Real Madrid-г ёстой бут ниргэлээ. Түүнээс ч илүү олон гоолтой, рекорд эвдсэн тоглолтыг Bayern үзүүллээ.

Өнөөдрийн тоглолтын үр дүн :

Маргааш болох тоглолтууд

Маргааш бас л үзүүштэй тоглолтууд болох нь ээ. Inter Milan-ы дасгалжуулагч José Mourinho хэлэхдээ 2003/2004 оны аваргуудын лигт Porto багтайгаа Manchester United-г хасагдах шатнаас мулталсан амжилтаа давтана гэсэн байна. Форм сайтай байгаа алдарт Barcelona баг өөрийн Camp Nou цэнгэлдэхдээ өрсөлдөгчөө хүлээн авч дараагийн шатанд орох эсэхээ шийднэ. Гайхамшигтай тоглолт үзүүлэн группээ тэргүүлсэн Roma баг талбай дээрээ өрсөлдөгч Arsenal-г хүлээн авна.

Ер нь маргааш бас унтахгүй гэдэг нь тодорхой боллоо шүү. Угаасаа унтдаггүй ! хүнд амар ч юм уу даа. Хөл бөмбөгөөр амьсгалаад л сууж байя.

Chelsea vs Juventus

noreply@blogger.com (Д.Өлзий-Орших) — Tue, 10 Mar 2009 20:34:00 +0000

Эхний 45 минут өнгөрч тоглолт түр завсарлалаа, зурагтнаасаа харцаа салгахын аргагүй өрсөлдөөнтэй тоглолт болж байна. Сэтгэл санаа өндөр байна аа, Челси-г олон дараалсан хожигдол аваад Premier League-н түрүүг авах шансгүй болоход сэтгэл санаагаар унаад блог дээрээ Челсигийн талаар бичиж нэг л чадахгүй байлаа. Харин Гуус Хиддинг Челсид ирснээс хойш байдал үнэхээр дээрдэж байна шүү, тоглолт ч сайхан болж байна.

Аваргуудын лигийн хасагдах шатны эхний тулаанд Челси маань Juventus-тай учраа таарсан билээ. Эхний тулаан буюу Челси өөрийн талбай дээрээ тоглосон тоглолтыг би үзэж чадаагүй юм. Тэгсэн Juventus чинь санасныг бодвол сайн баг байна шүү. Del Piero, Nedved, Trezeguet, Buffon гэх мэт дэлхий хэмжээний одууд байхыг хараад шууд л сүрдлээ шүү. Гэхдээ Челсид ч бас Cech, Lampard, Terry, Ballack, Drogba, Anelka, Essien, Deco, Kalou гээд international одууд байгаа гэж бодохоор гайгүй байна аа.

Тоглолтын эхэн үед Juventus-н Nedved-н бие нэг л биш байгаа бололтой , тоглолтыг орхилоо. Juventus арай суларлаа даа гээд баярлаж суутал David Trezeguet-н дамжуулалтаар Vincenzo Iaquinta гоол оруулчих юмаа.

Челси мэдээж гоол алдсан учир довтолж эхэллээ.

Juventus-н тоглогч гараараа тоглож алдаа гаргаад Дрогба чөлөөт цохилт гүйцэтгэх болов оо. Дрогба үнэхээр сайн цохиод гоол оруулчихлаа шүү. Тэгсэн Buffon заль гаргаад гоолыг тооцуулсангүй, давтан бичлэгээс зогсоогоод харуулахад яг гоол байлаа. Уур хүрээд сууж байтал, Lampard маш хүчтэй цохилт хийн хаалганы хөндлөвч оноод, ойсон бөмбөгийг Michael Essien амжилт болгож чадав. ГОООЛ !!!! (Michael Essien 6 сар гэмтэлтэй байж байгаад анх тоглоод л багтаа гоол авч ирж байна, тэр аваргуудын лигт үнэхээр одтой тоглох юмаа)

За ингээд эхний хагас өндөрлөлөө, одоогийн байдлаар Челсид ашигтай байна. Juventus хожихын тулд 2 гоол оруулах ёстой боллоо доо.

2-р үед хаалгач Cech хальтарч унаад 16-н гадна гараараа тоглон том алдаа гаргав. Маш ойрхоноос чөлөөт цохилт хийсэн боловч Juventus энэ боломжийг ашиглаж чадсангүй. 70 дахь минутад Chiellini Дрогба дээр алдаа гаргаснаар энэ тоглолтоос 2 шар хуудас авч талбайгаас хөөгдсөнөөр Juventus арвуулаа болов. Удалгүй Баллак 16-н ойролцоо алдаа гаргаснаар Juventus чөлөөт цохилт хийх үед Belleti гараараа хаагаад 11 метрийн торгуулийн цохилт шүүгч заав.

Del Piero ч үүргээ амжилттай биелүүлж гоол оруулж, байдал дахиад л эгзэгтэй болж ирлээ.

Juventus нэг хүн дутуу байгаа нь Chelsea-д сайхан боломж олгож, арай илүү тоглолтыг үзүүлсээр 83 дахь минутад Ballack ба Belleti-н дамжуулалтаар Drogba гоол оруулж тооны харьцааг 2:2 болголоо.

Drogba-н гэмтэл эдгэсэн бололтой Челсигийн сүүлийн хэдэн тоглолтуудад байнга гоол оруулж байна, магадгүй Гуус Хиддинк өөрт нь итгэж байгаа учраас илүү сайн тоглож байж ч магадгүй ээ.

Челсигээс Cech, Drogba, Anelka зэрэг түлхүүр тоглогчид шар хуудас авсан нь дараачийн тоглолтуудад муугаар нөлөөлж магадгүй шүү.

За за, ямар ч байсан үнэхээр өрсөлдөөнтэй сайхан тоглолт болж өнгөрлөө. Челсигийн фэнүүд баяртай байна аа. GO GO CHELSEA !

Ethical hacking хичээл (2-р хэсэг)

noreply@blogger.com (Д.Өлзий-Орших) — Sat, 07 Mar 2009 16:22:00 +0000

- Web-based Password Cracking Techniques, SQL Injection ...

- Hacking Wireless Networks, Cryptography . . .

13. Web-based Password Cracking Techniques

14. SQL Injection

15. Hacking Wireless Networks

16. Virus and Worms

17. Physical Security

18. Linux Hacking

19. Evading, IDS, Firewalls, and Honeypots

20. Buffer Overflows

21. Cryptography

22. Penetration Testing

Ethical hacking хичээл (1-р хэсэг)

noreply@blogger.com (Д.Өлзий-Орших) — Sat, 07 Mar 2009 03:44:00 +0000

Сүүлийн үед ajaxmaa-гийн буянаар системийн админууд нойрноос сэрж, онгорхой цоорхой нүхнүүдээ бөглөж таглаж эхэлсэн байх, үгүй ядаж энэ тухай бодож эхэлсэн байх гэж найдаж байна. Сервер рүү орох нууц хаалга байгааг олж мэдээд түүнийгээ баталсан нөхөр бол яах аргагүй сайшаал хүртэхүйц үйл хийж буй нэгэн билээ. Харин тэрхүү хаалгаа ашиглан бусдыг нэвтрүүлж, хохирол учруулсан бол яах аргагүй гэмт хэрэг хийж буй нэгэн юм. Системийн админууд маань хэн нэгэн өөрийг нь нэгжихээс, хохирол учруулахаас өмнө өөрөө энэ ажлыг түрүүлж хийвэл зохилтой. Иймд системийн админуудад, мөн ethical hacking сонирхож буй сайн санаат залууст зориулаад энэхүү цуврал хичээлийг хүргэж байна.

Анхааруулахад , саваагүй нөхдүүд үзэхгүй байсан нь дээр шүү !

1. Introduction to Ethical Hacking

2. Footprinting Techniques

3. Scanning

4. Enumeration

5. System Hacking

6. Trojans and Backdoors

7. Sniffers

8. Denial of Service

9. Social Engineering

10. Session Hijacking

11. Hacking Web Servers

12. Web Application Vulnerabilities

NetBeans хөгжүүлэлтийн орчны тухай

noreply@blogger.com (Д.Өлзий-Орших) — Fri, 06 Mar 2009 08:26:00 +0000

NetBeans хөгжүүлэлтийн орчны тухай зарим видеог орууллаа. Үүнд :

- NetBeans 6.5 хувилбарын тухай

- Яагаад NetBeans-г сонгох ёстой шалтгаан

- NetBeans-н TOP 10 API

1. NetBeans 6.5 хувилбарын танилцуулга

2. NetBeans-г сонгох 5 шалтгаан

3. NetBeans-г сонгох дахиад 5 шалтгаан

4. NetBeans IDE-н TOP 10 API (1-р хэсэг)

NetBeans IDE-н TOP 10 API (2-р хэсэг)

NetBeans IDE-н TOP 10 API (3-р хэсэг)

NetBeans IDE-н TOP 10 API (4-р хэсэг)

NetBeans IDE-н TOP 10 API (5-р хэсэг)

NetBeans IDE-н TOP 10 API (6-р хэсэг)

NetBeans IDE-н TOP 10 API (7-р хэсэг)

Visual C# Express edition хичээл (2-р хэсэг)

noreply@blogger.com (Д.Өлзий-Орших) — Fri, 06 Mar 2009 04:14:00 +0000

10. Databinding data to user interface controls

11. Working with XML

12. Handling exceptions

13. The RSS Reader Project - Designing and Planning

14. The RSS Reader Project - Building the UI

15. The RSS Reader Project - Working with XML and SQL server 2005 Express edition data

16. The RSS Reader Project - Expanding and Refining Application Functionality

17. The RSS Reader Project - Fortifying, Testing and Deploying the Application

Visual C# Express edition хичээл (1-р хэсэг)

noreply@blogger.com (Д.Өлзий-Орших) — Fri, 06 Mar 2009 03:44:00 +0000

Visual C# Express edition-ы нэг хичээлийг C# хэлийг анхлан суралцахаар шамдаж буй оюутнууддаа зориулан оруулж байна.

1. Getting Started

2. Creating a Windows Application User Interface

3. Writing Code to handle events and Set properties

4. Working with variables, expressions, statements and operators

5. Using branching and recursion

6. Object Oriented programming fundamentals -1

7. Object Oriented programming fundamentals -2

8. Getting to know the .NET framework CS

9. Obtaining data from a SQL Server 2005 Express edition Database

NetBeans Visual Web JSF Tutorial

noreply@blogger.com (Д.Өлзий-Орших) — Fri, 06 Mar 2009 03:13:00 +0000

Netbeans IDE дээр хэрхэн Visual JSF вэб хийх талаар хичээл орууллаа. Хэрэв үзээд цааш судалмаар санагдвал www.netbeans.org сайт руу ороод өөр олон хичээлүүд, материалуудыг үзэж судалж болно шүү.

1. Netbeans Visual web pack tutorial

2. Table tutorial

3. Toggle sample

4. Custom message

Том аюулаас бид аврагджээ !

noreply@blogger.com (Д.Өлзий-Орших) — Wed, 04 Mar 2009 10:36:00 +0000

Манай дэлхий өчигдөр аварга том солиртой мөргөлдөх дөхжээ. 1908 онд Сибирийн шигүү тайгад унаж байсан тунгуссийн солиртой хэмжээгээр ойролцоо аварга том солир нь дэлхийгээс ердөө 70 мянган км-ын зайтай өнгөрсөн байна. Сансар огторгуйн хувьд бол 70 мянган км гэдэг нь маш ойрхон зай юм. Хэрвээ дэлхий аварга том солиртой мөргөлдсөн бол мянга гаруй цөмийн бөмбөг дэлбэрсэнтэй тэнцэхүйц хэмжээний хохирол учрах байсан гэж эрдэмтэд үзэж байгаа юм. Одон орон судлаачид 1908 оны 6 сард дэлхий дээр унаж байсан тунгуссын солиртой тэнцэхүйц хэмжээтэй солир манай дэлхийтэй ойртон ирж байгааг, зөрж өнгөрөхөөс нь ердөө хоёрхон хоногийн өмнө мэдсэн байна.Тиймээс хэрвээ солир дэлхий дээр унасан бол гамшигийн аюулыг урьдчилан анхааруулж ч амжихгүй байх байсан юм.

Санамсаргүй USB телевизийн сайтнаас дээрх мэдээг олж уншлаа. Итгэсэнгүй нэт ухаад шалгасан чинь үнэн байна. CNN-ны сайт дээрх мэдээ : Asteroid passes close to Earth

Жич: olloo.mn, news.mn, news.gogo.mn сайтууд дээр ийм мэдээ алга. Бодвол cnn-ны мэдээг үздэггүй бололтой.

Netbeans IDE ашиглан J2SE application бичих зарим хичээлүүд

noreply@blogger.com (Д.Өлзий-Орших) — Wed, 04 Mar 2009 08:49:00 +0000

Энэ удаа Netbeans IDE ашиглан Java програм бичихэд туслах зарим анхан шатны богино хичээлүүдийг орууллаа. Netbeans IDE нь Windows, Mac, Linux, Solaris үйлдлийн системүүд дээр ажиллах үнэгүй нээлттэй эх бүхий хөгжүүлэлтийн орчин юм. Netbeans IDE ашиглан Java, PHP, Javascript ба Ajax, Ruby ба Ruby on Rails, Groovy, C/C++ хэлүүд дээр web, enterprise, desktop, mobile програм хангамжуудыг хөгжүүлэх боломжтой.

Та Netbeans IDE-ийн сүүлчийн хувилбарыг эндээс татан аваарай.

1. JTable ашиглах

2. SwingX ба Beansbinding

3. Calculated column үүсгэх

4. Хуудаслах

5. MDI интерфейс үүсгэх

Хавиргаа хадарч хажуудхаа хавчин түлхэгч халхууд

noreply@blogger.com (Д.Өлзий-Орших) — Mon, 02 Mar 2009 02:30:00 +0000

Өнөөдөр бид монгол улсад амьдарч байгаа өөрсдийгөө л монголчууд гэж ярьж ойлгодог , үүгээрээ ч бардамнаж онгирдог. Эх орноороо бахархаж бахдах нь зүйн хэрэг гэхдээ бидэнд байдаг нэг муу зүйл бол бид бусад угсаатнуудаа алагчилж нүд үзүүрлэж хавчин гадуурхдаг . Монгол үндэстэн бол зөвхөн халх бус Дөрвөд , Буриад , Урианхай , Үзэмчин , Торгууд , Өөлд гэх мэт маш олон өөр өөр ёс заншилтай угсаатны нэгдэл . Бүр эртний монгол нутаг дээр амьдарч байсан нүүдэлчдийг оруулаад ярьвал үүнээс ч хавьгүй их бий байх . Эдгээр бүх угсаатан нийлж байж л уг нь жинхэнэ монгол үндэстэний дүр төрх гарч ирнэ харин бид зөвхөн бид нар л монгол юм шиг бусаддаа дээрэлхсээр өдийг хүрсэн .

Гэтэл эх нутгаасаа алс хол хүний нутагт 300 , 400 -н жил нүд үзүүрлэгдэн хавчигдаж , монгол хэлээ монгол уламжлалаа монгол цусаа харамлан хадгалах гэж чадах хирээрээ тэмцэж эх нутгаа санан нүдэндээ нулимстай , зүрхэндээ гунигтай суугаа тэдгээр хүмүүсийн дэргэд бидний эх орон гэж цээжээ балбадаг нь ердөө л хоосон хийрхэл төдий зүйл. Тэнд хичнээн эх нутгаасаа хол суугаа ч бидний төлөө сүүгээ өргөж , бидэнд хамаг сайн сайхан бүхнээ ерөөж , Монгол үндэстний өлгий нутагт эх орон тусгаар тогтнолоо зарлан суусан монголын бахархал гэж биднээр бахархаж сууна. Монгол улс монголын газар шороон дээр амьддаа ганц удаа ч болов алхаж үзэхсэн гэж мөөрөөдөж сууна. Бидний өдөр болгон бодох юмгүй алхан яваа газар шороо , дээр гийх цэлмэг хөх тэнгэр , хайр найргүй сэндийчэн онгичдог уул ус , өдөр өдрөөр бусниулан байгаа хэл соёлыг тэнд харь газар хүмүүс эрээд олдохгүй эрдэнэ мэт нандигнан хайрлаж эрхэмлэн дээдэлж байна .

Цааш нь эндээс уншаад, сэтгэгдлээ үлдээгээрэй : http://galaa-beacon.blogspot.com

Сар шинэдээ сайхан шинэлээрэй !

noreply@blogger.com (Д.Өлзий-Орших) — Mon, 23 Feb 2009 18:17:00 +0000

JasperReport хичээлүүд

noreply@blogger.com (Д.Өлзий-Орших) — Mon, 23 Feb 2009 17:29:00 +0000

Өмнө нь JasperReport-н талаар дурдаж байсан тул дахин бичих шаардлагагүй байх. Энэ удаа JasperReport-г хэрхэн ашиглах талаар хэдэн видео хичээл орууллаа.

1. Jasper Report-г JPA-тай (Java Persistence API) хамт ашиглах

2. Тайландаа зураг оруулах

3. Тайландаа link оруулах

4.Netbeans IDE-д JasperReport тохируулах, Swing Application-д JasperReport холбох

C# хэлний хичээл (2-р хэсэг)

noreply@blogger.com (Д.Өлзий-Орших) — Mon, 23 Feb 2009 17:10:00 +0000

C# Soup To Nuts Webcast Series хичээлийн үргэлжлэл

13. Delegates and Events

14. Inheritance and Polymorphism

15. C# and the Web

16. Custom Web Controls

17. C# and Windows Applications

18. Custom Controls

19. C# and Windows Presentation Foundation

20. C# and SQL Server 2005

21. C# and Game Development

22. C# Application Deployment Options