வெடிவால்

2015-05-08T10:41:00.001-07:00

09/05/2015. இன்று எங்கள் அப்பா நினைவு நாள்,

அப்பாவை சந்தோஷமாக வைத்திருந்தால் அப்பாவும் நம்மை சந்தோஷமாக வைத்திருப்பார் என்று டெலிபோன் விளம்பரத்தில் பார்த்தோம்.
அப்பாவை நாங்கள் சந்தோஷமாக வைத்திருந்தோமா தெரியலை. ஆனால் அவர் எங்கள் எல்லோரையும் மிக சந்தோஷமாகவே வைத்திருந்தார்.
தன் மணிவிழாவுக்கு முன்னே மறைந்த அம்மாவை நினைத்து சோர்ந்து விடாமல் பிள்ளைகள் படிப்பு, கல்யாணம் எல்லாம் பார்த்து பார்த்து செய்து வைத்தார்.
பெளர்ணமி அன்று இரவு ஆபீஸிலிருந்து வந்ததும் குளித்து விட்டு, ராஜராஜேஸ்வரி அம்மனுக்கு பூஜை செய்வார்.பேரக்குழந்தைகளிடம் பிரியமாக விளையாடுவார்.
டி.வி.எஸ் அதிபர்கள், ராஜம், கிருஷ்ணா, ரத்னம், ராமச்சந்திரன், யாரும் திருந்நெல்வேலி வந்தால் அவர்கள் வீட்டுக்கு வந்து சந்திப்பதோ, அப்பா டி.வி.எஸ் போய் பார்ப்பதோ தவறியதில்லை. புதிய மாவட்ட கலெக்டர் வந்து பதவி ஏற்ற அன்றே அவரை சந்திப்பார்.
நெல்லை சங்கீத சபா, மெசானிக் லாட்ஜ், ரோட்டரி க்ளப், போன்ற அமைப்புகளில் தலைவர் செயலர் பதவிகள் வகித்து திறம்பட நடத்தினார்..
அவர் நினைவில் வாழும்,

சுப்பிரமணியன், பொன்னம்மாள், வடிவேல்முருகன், கல்யாணி .

.

.

.

2015-03-18T03:21:00.000-07:00

ஸ்கூல் பஸ்ஸில் ஏறினதும் வகுப்பு தோழிகள் எல்லோரும்
ராஜகுமாரி வந்துவிட்டாள் என்று கேலி செய்ய, வீட்டுக்கு
வந்ததும், கோபமாகஅம்மாவிடம், ஆயிரம் பெயர்கள் இருக்க "ராஜகுமாரி"தான் எனக்கு வைக்க கிடைச்சுதா என்று கேட்கிறாள்,
நூடுல்ஸ் விளம்பரத்தில்.

என் அண்ணன் இசக்கி, அம்மாவிடம் கேட்டதாக மணி அண்ணன்

சொன்ன தகவல்:- அண்ணன் தம்பிக்கெல்லாம், முத்துவேல், சுப்பிரமணியன், சண்முகம், வடிவேல்முருகன் என்று முருகன் பேரா வைச்சு எனக்கு மட்டும் ஏன் இசக்கி"ன்னு பேர் வைச்சே?

இசக்கி அண்ணன்

அம்மா சொன்னாராம் - "அப்போ நீ என் வயிற்றில் இருந்தாய். அப்பாவுடன் தேவநல்லூர் போய் விட்டு வரும்போது வழியில் பயங்கர வலி. குழந்தை நல்லபடியாக பிறக்கணும், உன் பேரை வைக்கிறேன் என்று நம்ம குலதெய்வமான இசக்கி அம்மனிடம் வேண்டிக் கொண்டே வர, கோவில் தாண்டியதும் வலி பறந்தது. அதான் உனக்கு அந்த நல்ல பெயர்."

'ஆனந்தம்' படத்தில் இங்கே தவசி யாருங்க? ரிஜிஸ்டர் தபால்.அவர் கையெழுத்து போடணும் என்று கேட்டு வரும் தபால்காரரிடம், விஜயகுமார்(தவசி) ரொம்ப நாளைக்கு அப்புறம் என்னை பேர் சொல்லிக் கூப்பிட்டது நீதான் என்று சொல்வாரே அது போல எங்க அப்பாவை "சோமு" என்று பெயர் சொல்லி கூப்பிடுபவர், தாத்தா தவிர, அப்பாவின் பள்ளித் தோழர் ஐயாக்குட்டி முதலியார் மட்டும்தான்.
ஒருநாள் போன் மணி அடிக்க இசக்கி அண்ணன் எடுத்து -ஹலோ சொல்ல, "சோமு இருக்கானா?" என்று அவர் கேட்க, "சோமு இருக்கானே" என்று வேடிக்கையாக சொல்ல, அப்பாவும் அங்கே வர, பயந்து ஓடி விட்டானாம். அப்பாவுக்கு ஒரே சிரிப்பு.
அன்றாடம் சினிமாவிலும் டிவியிலும் நாம் பார்க்கும் நிகழ்ச்சி, நம் வாழ்வில் நடந்த ஒரு சம்பவத்தை நினைவூட்டுவதாகவே அமைகிறது பாருங்கள்.

2015-03-15T22:48:00.002-07:00

நெல்லை ம.தி.தா இந்து கல்லூரியின் கல்வி சங்கசெயலர்

திரு.மு.செல்லையாமோட்டார் பைக்கில் வரும் மாணவ மாணவிகள்

பலரிடம் டிரைவிங் லைசென்ஸ் இல்லை என்று அறிந்து எல்லோருக்கும் லைசென்ஸ் பெற்றுத்தர விரும்பினார்.

வட்டார போக்குவரத்து அதிகாரி திரு.கு.தங்கவேலு அவர்களை அணுகியதும், அவர் முதலில் போட்டோவுடன் கூடிய விண்ணப்பம் தருவோம். பிறகு பயிற்சி உரிமம் வழங்குவோம் என்றார். 175 பேரை இரண்டு நாளாக தன் பஸ்ஸில் R.T.O அலுவலகத்திற்கு அழைத்து வந்து விண்ணப்பம் சமர்ப்பணம் செய்தார் செயலர் திரு.மு.செல்லையா

இந்துகல்லூரியும், நாட்டுநலப் பணித்திட்ட ஒருங்கிணைப்பாளர்களும்,

வட்டாரப் போக்குவரத்து அலுவலகமும், திருநெல்வேலி மாவட்ட பஸ் உரிமையாளைர்கள் சங்கமும் சேர்ந்து நடத்தும் விழாவாக 14/03/2015 காலை

11.00 மணிக்கு பேட்டை இந்து கல்லூரியில், முன்னாள் கல்வி சங்க செயலாளர் திரு எ.ஏல்.எஸ் நினைவரங்கில் நடந்தது.
ஏ.எல்.எஸ்ஸின் மகன் திரு சு.சண்முகமும் வந்திருந்தார்

முதலில் திரு நயினா முகமது, உரிமையாளர், சிட்டி டிரைவிங் ஸ்கூல், விடியோ மூலம் விபத்து நிகழ்ச்சிகளை காட்டி சாலையில் கவனம் எவ்வளவு முக்கியம் என்று சொல்லி, சாலையில் காணும் எச்சரிக்கை, உத்தரவு, தகவல் சின்னங்களின் அச்சுப் பிரதிகளை வழங்கினார்.
கல்விச் சங்க பொருளாளர், திரு.தளவாய் தீ.ராமசாமி தலைமையில், திரு செல்லையா வரவேற்றார். தன் உரையில், விழாவின் நோக்கம் என்ன என்றும், ஒத்துழைத்த எல்லோருக்கும் நன்றியும் கூறினார், , தலைமை உரையில் திரு.தீ.ராமசாமி யும் வாழ்த்துரையில் திரு.ப.தி.சிதம்பரம் இந்துக் கல்லூரி ஆட்சிக்குழு உறுப்பினர், முனைவர்.ப.சின்னத்தம்பி கல்லூரி முதல்வர், முனைவர் நா.ராஜலிங்கம் நாட்டு நலப்பணித் திட்ட ஒருங்கிணைபாளர், திரு.சோ.வடிவேல்முருகன் தி-லி மாவட்ட பஸ் உரிமையாளர்கள் சங்கம், திரு ப.பாலசுப்ரமனியன் வேணி பஸ், ஜனாப்.முகமது அப்துல் காதர், ஜப்பான் பஸ், திரு.சீ.பார்த்தசாரதி சீதாபதி டிரான்ஸ்போர்ட், திரு..ஸ்ரீதர் கே.வி.வி பஸ்,
திரு.டி.சரவணன் கே.எஸ்.ஏ பஸ்- சங்கரன்கோவில்

ஆகியோர், ஓட்டுனர் உரிமம் , சாலை விதிகள், சிக்கனம், பற்றியெல்லாம் சொன்னார்கள்.
திருமதி.ஜீ.சசி மோட்டார் வாகன ஆய்வாளர் நிலை 1 அவர்கள், தான் காண நேர்ந்த மோட்டார் பைக் விபத்துகளில் பெற்றோர் பட்ட வேதனை பற்றி கூறி பிள்ளைகள் கவனமாக ஓட்ட வேண்டுமென்றார்.

வட்டார போக்குவரத்து அலுவலர் திரு கு.தங்கவேலு, ஓட்டுனர் உரிமமும், திரு.வடிவேல்முருகன் தன் கைப்பட வரைந்த சாலை விதிகளின் பட நகலையும் மாணவர்களுக்கு வழங்கி வாழ்த்திப் பேசினார்.

திரு.ஜானகிராம் அந்தோணி நன்றி உரையில் திரு.செல்லையாவின் முயற்சியை பாராட்டி, வாழ்த்திய எல்லோருக்கும், நிகழ்ச்சியை ஒருங்கிணைத்த நாட்டு நலப்பணி திட்ட அலுவலர்களுக்கும், தொகுத்து வழங்கிய முனைவர்.கோ.சங்கர வீரபத்திரனுக்கும் நன்றி கூறினார்.

2015-02-19T01:54:00.002-08:00

BASKET BALL விளையாட்டு ஜேம்ஸ் நெய்ஸ்மித் (JAMES NAISMITH) என்ற அமெரிக்கரால் 1891ம் ஆண்டு வடிவமைக்கப் பட்டது. முதல் விளையாட்டு தொடங்கிய போது, "NAISMITH GAME" என்று பெயரிடலாம் என்று எல்லோரும் சொன்னார்களாம். அவர்தான் விளையாட்டில் பாஸ்கெட் இருக்கு, பால் இருக்கு, ஏன் பாஸ்கெட் பால் என்று சொல்லக்கூடாது என்றாராம். நம்மூரில் கூடைப்பந்து ஆனது.

முதலில் வெறும் கூடை மட்டும் ஒரு போஸ்ட்டில் கட்டி விளையாடுவார்கள். கோல் போட்டதும் கம்பு கொண்டு கீழிருந்து தள்ளி எடுப்பார்கள்.

பிறகு கூடையிலிருந்து பந்து கீழே விழுமாறு ஓட்டை போட்டார்கள். 1906ல் தான் இரும்பு வளையம், வலைக்கூடை, கரும்பலகை எல்லாம் அமைக்கப் பட்டதாம்.Y M C A,, அமெரிக்க ராணுவ வீரர்கள், கல்லூரி/பள்ளிகளிலெல்லாம் ஆடத் தொடங்கி உலகளவில் பிரபலமானதாம்.

திருநெல்வேலி ம.தி.தா இந்துக் கல்லூரி மேல்நிலைப் பள்ளியில் உள்ள கூடை பந்து மைதானத்தை உலகத்தரத்திற்கு இணையாக, சுமார் 7 லட்சம் செலவில் புதுப்பித்து நேற்று 18/2/15, புதன் கிழமை மாலை 4.00 மணிக்கு, கல்விச் சங்கத் தலைவர் திரு மீனாக்ஷிசுந்தரம் திறந்து வைக்க, செயலர் திரு

மு.செல்லையா வரவேற்றார்.

இந்துக் கல்லூரி மாணவர்களும் இந்து மேல் நிலைப் பள்ளி மாணவர்களும் சேர்ந்து ஒரு அணி. வள்ளியூர் கிங்ஸ் மெட்ரிகுலேஷன் மேல் நிலைப் பள்ளி மாணவர்கள் ஒரு அணியாகவும் ஆடத் தொடங்கி, இந்துக் கல்லூரி அணி

39 - 28 என்ற கணக்கில் வெற்றி பெற்றது.

இந்து மேல்நிலைபள்ளி முன்னாள் மாணவர் திரு. ராஜசேகர் படிக்கும் போது கூடைப் பந்து வீரர். அதன் பின் பல ஆண்டுகள் மாணவர்களுக்கு கோச் ஆக இருந்து ஆட்டம் கற்றுத் தந்தாராம். மாநில அளவில் பல பட்டங்களும் பரிசுகளும் வாங்கியவர். பணி ஓய்வு பெற்று நெல்லையில் வசிக்கிறார்.அவருக்கு கல்விச் சங்கத்தின் 'வாழ்நாள் சாதனையாளர்' விருதை, செயலர் திரு செல்லையா வழங்கினார்.

விளையாட்டு வீரர்கள், நடுவர்கள், எல்லோரும் நினைவுப் பரிசுகள் பெற்றார்கள்.

2014-12-11T19:35:00.000-08:00

நேற்று பாரதியார் பிறந்தநாள் என்றதும் அவர் படித்த மதுரை திரவியம் தாயுமானவர் இந்து மேல்நிலை பள்ளிக்கு சென்றேன். கள்ளிபட்டி(தேனி மாவட்டம்) நல்லாசிரியர் திரு.சு.குப்புசாமி சிறப்பு விருந்தினர், பள்ளியின் கல்வி சங்க் செயலாளர் திரு.மு.செல்லையா, திரு.கணேசன்(தேனி)தலைமை ஆசிரியர் திரு.சுப்பையா பங்கேற்க, விழா நிகழ்ச்சிகளை ஒரு மாணவன் அழகாக தொகுத்து வழங்கினா(ர்)ன்.
திரு.கணேசன் பாரதியாரைப் பற்றி ஒரு கவிதையுடன் பேசினார். சிறப்பு விருந்தினர் திரு.குப்புசாமி பேசும்போது சொன்ன தகவல்கள்:
சீவலப்பேரியில் வாழ்ந்த சின்னசாமி ஐயர், எட்டயபுரத்திற்கு குடிபெயர்ந்து, ராஜா அரண்மனையில் பணியில் சேர்ந்தார். 1882ம் ஆண்டு டிசம்பர் 11 அன்று மகன் சுப்பிரமணியம் பிறந்தார். திருநெல்வேலி, மதுரை திரவியம் தாயுமானவர் இந்து கல்லூரி உயர்நிலை பள்ளியில் 3 முதல் 5ம் வகுப்பு வரை படித்தார் சுப்பிரமணியம்.
1893ல் யாழ்ப்பாணத்திலிருந்து வந்த ஒரு தமிழ்ப் புலவர் மாணவர்களுக்கு கவிதைப் போட்டி நடத்தி, அதில் கலந்துகொண்ட சுப்பிரமணியத்தை பாராட்டி பாரதி என்று அழைத்தார். அன்றிலிருந்து சுப்பிரமணிய பாரதி என அழைக்கப் பட்டார்.
சின்ன வயதில் அவர் பெற்ற புகழைக் கண்டு பொறாமை கொண்ட காந்திமதிநாதன் என்பவர், பாரதியிடம், தம்பி உன்னால் "பாரதி சின்னப் பயல்" என்று பாட முடியுமான்னு கேட்டார்.
பாரதி சொன்ன கவிதை:
"காரது போல் நெஞ்சிருண்ட
காந்திமதிநாதனைப்
பார் அதி சின்னப் பயல்"
தன்னை சின்னப்பயல் என்று சொன்ன எதிரியை "அதி சின்னப் பயல்" என்று பாடிவிட்டார்.
1897ல் பாரதிக்கு செல்லம்மாளுடன், நான்கு நாள் விழாவாக கல்யாணம் நடந்ததாம்.. மதுரை சேதுபதி உயர்நிலைப் பள்ளியில் தமிழ் ஆசிரியராகவும், பின், சுதேசமித்திரன் பத்திரிகை உதவி ஆசிரியராகவும் வேலை பார்த்தாராம்.

ஒரு நாள் பத்திரிகை ஆபீசிலிருந்து வீடு செல்லும்போது, அன்று வாங்கிய சம்பள பணத்தை அப்படியே தான் வந்த குதிரை வண்டிக்காரனின் மனைவி குழந்தைகளின் வைத்திய செலவுக்காக தந்துவிட்டாராம்.
திருவல்லிக்கேணி பார்த்தசாரதி கோவில் யானைக்கு தேங்காய், பழம் உண்ணத் தருவாராம். ஒரு நாள் அவரை, யானை கிட்ட போகாதே, அதற்கு மதம் பிடித்து விட்டது என்று தடுத்தும், "அது நான் வணங்கும் பராசக்தி,என்னை ஒன்றும் செய்யாது" என்று யானை அருகில் போனார். யானையோ அவரைத் தும்பிக்கையால் தூக்கி வீசிவிட்டது.
ராயப்பேட்டை ஆஸ்பத்திரியில் சில நாள் சிகிச்சைக்கு பிறகு வீட்டுக்கு வந்தார். ஆனாலும் அன்றிலிருந்து மிகவும் பலவீனமானார்.
"காலா உனை நான் சிறு புல்லென மதிக்கிறேன்; என்றன்
காலருகே வாடா, சற்றே உதைக்கிறேன்"
என்று பாடிய மகாகவி 1921 செப்டம்பர் 12 அன்று மறைந்தார்.

2014-11-21T19:59:00.002-08:00

KIDDIVAL

RmKVயின் கிட்டிவல் தொடங்கி 25 அருஷம் ஆச்சு. போன சனிக்கிழமை
சாரா டக்கர் காலேஜில் நடந்தது. திருநெல்வேலி, தூத்துக்குடி, கன்னியாகுமரி மாவட்டங்களிலிருந்து 80 பள்ளிகளின் 1500க்கு மேற்பட்ட மாணவ மாணவிகள் உற்சாகமாக தங்கள் திறமையை காட்டினார்கள்.
பாலகிருஷ்ணா மெட்ரிக் பள்ளி (75 மார்க்)முதல் பரிசையும்,ஜெயேந்திரா கோல்டன் ஜூபிலி (65) இரண்டாம் பரிசையும், பாரத் வித்யாலயா CBSE (50) மூன்றாம் பரிசையும் பெற்றது.
இந்த ஆண்டின் புதிய போட்டி - SPELLING BEE
மேலை நாடுகளில் இந்த விளையாட்டில் இந்திய வம்சாவளி குழந்தைகள்தான் அதிகம் ஜெயிக்கிறார்கள். பிள்ளைகள் டாண் டாண்னு சொன்னார்கள்.
போட்டியில் ஸ்பெல்லிங் கேட்ட சில வார்த்தைகள் -
SIGNIFICANCE ; ETIQUETTE ; COMMITTEE ; RESTAURANT ; CALENDAR

JUMBLE WORDS- TOPMREUC ; AGHRMRUBE ; LESENKTO

E T I Q U E T T E

TOPMREUC ---COMPUTER

FANCY DRESS

"கனவு காணுங்கள்"

Vivekanadar as statue

2014-07-21T20:35:00.001-07:00

இன்றும் ஒரு சதாபிஷேகம்.

முந்தாநாள், சனிக்கிழமையன்று நண்பர் என்னைப்பார்க்க வரேன் என்று போன் பண்ணினார். ஒரு சதாபிஷேக நிகழ்ச்சி.பிறகு பார்க்கலாம் என்றேன். திங்களன்று மீண்டும் கூப்பிட்டு, இன்னிக்கு வரலாமான்னு கேட்டார். இன்றும் ஒரு சதாபிஷேகம். மேலச்செவலுக்கு போகிறேன்
. அன்று என் மாமாவுக்கு. இன்னிக்கு என் அத்தானுக்கு.

மேலச்செவல் பண்ணையார் வீட்டைப்பற்றி THE HINDU நாளிதழில் சில மாதங்கள் முன் படித்திருப்பீர்கள். அவர் வீட்டிலேயே நடந்த சுப நிகழ்ச்சிக்கு ஊரே திரண்டு வந்தது. சொந்தங்கள் நாங்கள் மீண்டும் கூடினோம்.

மகன் சுரேஷ், மருமகள் சித்ரா

எஸ்.கல்யாணி,சண்முகம்(பேபி), பத்மா
,முத்துலக்ஷ்மி, பிச்சம்மாள்,முனைவர்.ரமாபிரபா, ஆர்.கல்யாணி

Family Chart

கெட்டி மேளம், கெட்டி மேளம்

மாங்கல்யம் தந்தது நானேநா............


	வாழ்க வளமுடன்

முந்தாநாள் சதாபிஷேகம் கண்ட கோமதிநாயகம் தம்பதி


	ராதா, ரமணி, பத்மா, வடிவேல்முருகன், கல்யாணி, சங்கர், லக்ஷ்மனன், செல்விலோகா ,பொன்னம்மாள், தாயுமான ராமலிங்கம், சுப்பிரமணியன்	.

2014-07-19T03:50:00.000-07:00

சதாபிஷேகம்.

ஆயிரம் பிறை கண்ட எங்கள் மாமா, கோமதிநாயகம் அவர்களின் சதாபிஷேகம் இன்று நடந்தது.
அமெரிக்காவில் இருந்து வந்த அவரது இரண்டு மகள், மகன், பேரன் பேத்திகளுடன்
உறவினர்கள், உற்றார், நண்பர்கள் என ஆசி பெற
எல்லோரும் மகிழ்ச்சியுடன் கூடியிருக்க,

கோமதிநாயகம்,சூர்யகுமாரி தம்பதிகளை ஆசீர்வதிக்க பெரியவர்களும் வர, விமரிசையாக நடந்தது.

2014-06-26T23:34:00.000-07:00

ராதா ஜெயலக்ஷ்மி
பெயர்கள் ஞாபகம் இருக்கா? 'காஞ்சனா' -கே.ஆர்.ராமசாமி, லலிதா பத்மினி நடித்த பக்ஷிராஜா பிலிம் தயாரிப்பு.1954னு நினைக்கிறேன். அதில் ஒரு கல்யாண கச்செரி சீனில் ராதா ஜெயலக்ஷ்மி பாடுவார்கள்."சலமேலரா சாகேதராமா" கீர்த்தனை. அதன் பிறகு இன்று வரை யாரும் அந்த கிருதியை பாடி நான் கேட்டதில்லை. அன்றிலிருந்து நான் அவர்கள் ரசிகன். இருவரும் கஸின்ஸ்

.பக்தி பாடல்கள் . ஹெச்.எம்.வி, கொலம்பியா ரிகார்டுகளில் நிறைய பாடியிருக்கிறார்கள். பிறகுதான் சபாக்களில் கச்செரி செய்ய தொடங்கி பிரபலமானார்கள்.
ஜி.என்.பி பாணியிலேயே பாடியதால், வயலினிஸ்ட் மைசூர் டி.செளடையா,
"G.N.B IN SAREES" என்று பாராட்டுவாராம். 1981ல் சங்கீத் நாடக அகாடமி அவார்ட் பெற்றார்கள்.
சினிமாவிலும் பின்னணி நிறைய பாடினார் ஜெயலக்ஷ்மி. டைட்டிலில் ராதா ஜெயலக்ஷ்மி என்றே வரும்.

மாங்கல்யம் (ஒட்டும் இரு உள்ளங்கள.)
கல்யாணம் பண்ணியும் பிரம்மச்சாரி (வெண்னிலாவும் வானும்..)
மோட்டார் சுந்தரம் பிள்ளை (மனமே முருகனின் மயில் வாகனம்..)
மனோகரா (சிங்கார பைங்கிளியே பேசு)
இன்னும் பல இனிய பாடல்கள்.

1990க்கு பிறகு இசை ரசிகர்களும் சபாக்களும் இவர்களை மறந்து விட்டார்களோ என்னவோ. சென்ற மாதம் ஜெயலக்ஷ்மி அவர்கள் மறைந்த செய்தி சென்னை ஹிந்து இதழில் பார்த்தேன். மற்ற நாளிதழ்களிலோ, டிவியிலோ வந்த மாதிரி தெரியவில்லை. ராதா ஜெயலக்ஷ்மி பாடிய "பண்டு ரீதி கோலு" என்ற தியாகராஜர் கிர்த்தனை எனக்கு ரொம்ப பிடிக்கும். நீங்களும் கேட்டுப் பாருங்களேன்.
http://www.youtu.be/a25osFeLkgM

2014-05-08T23:08:00.003-07:00

உயிரை காப்பாற்றிய லயன் பஸ்

புதன்கிழமை காலை என் அண்ணி ஆஸ்பத்திரியில் இருக்கிறார்ன்னு தெரிந்ததும் பார்க்கப் போனேன். "ஒன்றுமில்லை சித்தப்பா, அம்மா சுவாசிக்க சிரமப்பட்டதால் வந்தோம் என்றான் ரமணி. எங்களை யார் என்று விசாரித்த டாக்டர் பாலாஜியிடம் லயன் கம்பெனி என்றதும், ற்ட்ன்.வடிவேல்முருகன் உங்களுக்கு என்ன வேன்டும் என்று கேட்டார். திருநெல்வேலி மெடிக்கல் காலேஜில் படிக்கும் போது உங்கள் க்விஸ் நிகழ்ச்சி பற்றி சொன்னார். இப்போ டாக்டர் வருவார், என்ன சொல்கிறார் பாருங்கள் என்றான்,

சிறிது நேரத்தில் வந்த டாக்டர் பாலாஜி, என்னைப் பார்த்ததுமே சார் வாங்க,

"என் உயிரை காப்பாற்றியதே லயன் பஸ்தான் " என்றார்.

அவரது சொந்த ஊர் எட்டயபுரம். 1974ல், தான் சின்னக்குழந்தையாக (1 1/2 வயது) இருந்தபோது ஒரு நாள் நள்ளிரவில் திடீரென்று உடல் சரியில்லாமல் போனதால் கோவில்பட்டி ஹாஸ்பிடல் போக வேறு வண்டி எதுவும் கிடைக்காமல் பஸ் ஸ்டாண்டில் ஹால்ட் ஆகி நின்ற எங்கள் லயன் பஸ் டிரைவரிடம் கேட்டிருக்கிறார்கள். ஆபீஸ் அனுமதியில்லாமல் என்ன செய்ய என்று யோசித்த டிரைவர் சமயோசிதமாக அருகில் போலீஸ் ஸ்டேஷனிலிருந்து திருநெல்வேலி ஆபீஸுக்கு ட்ரங்க் காலில் கேட்டு அனுமதி வாங்கினாராம் - டிரைவரும் ட்யூட்டியில் இருந்த போலீஸ்காரர்களும் பாராட்டுக்குரியவர்கள் -

உடனே பேற்றோருடன் குழந்தை பாலாஜியை கோவில்பட்டி கொண்டு சேர்த்துவிட்டு எட்டயபுரம் திரும்பினார்.

முதலுதவிக்குப் பிறகு மறுநாள் காலை பாலாஜியை மதுரை ஹாஸ்பிடல் கூட்டிப் போனார்களாம்.

அந்த பஸ்ஸை போட்டோ எடுத்து இன்றும் தங்கள் வீட்டில் வைத்திருக்கிறார்களாம்

"ஆவணி ரோகிணியில் அஷ்டமியிலே.........."

2014-05-01T10:11:00.000-07:00

1950களில் GRUNDIG, PHILLIPS ஸ்பூல் டேப் ரிகார்டர்கள் பிரபலமாக தொடங்கியது. டாக்டர் ஆர்.சுப்பிரமணியமும் என் அண்ணன் முத்துவேலும் நெல்லை சங்கீத சபா கச்சேரிகளை ரிகார்ட் செய்து கேட்டு மகிழ்வார்கள். அப்போ எல்லாம் பாடுபவர்களும் அனுமதித்தார்கள். அண்ணனின் நண்பர் கிருஷ்ணனின் கல்யாணத்தில் திருமதி எம்.எல்.வசந்தகுமாரியில் கச்சேரி. அண்ணன் அதை டேப்பில் பதிவு செய்து வந்தார்.

அதில் நான் கேட்டு ரசித்த பாட்டுதான்,
"பாற்கடல் அலை மேலே பாம்பணையின் மேலே பள்ளி கொண்டாய் ரெங்கநாதா......". ராஜாதேசிங்கு படத்தில் எம்.எல்.வி பாடியது. கீர்த்தனை எல்லாம் பாடியதும் துக்கடாவில்தான் தமிழ் பாட்டுகளுடன் சினிமாவில் தாங்கள் பாடிய பாட்டு உட்பட பாடுவார்கள். அன்று இந்த பாட்டை ராகமாலிகையிலேயே பாடினாரோ என்னவோ. நாட்டிய பேரொளி பத்மினி படத்தில் பாடி ஆடுவார்.
அதில் சில வரிகள்:
"எங்கிருக்கிறான்? ஹரி எங்கிருக்கிறான்.." என்று ஹிரண்யன் கேட்க, "எங்குமிருப்பான். தூணில் இங்குமிருப்பான் என்று மகன் பிரகலாதன் சொல்ல, நரசிம்மமாகவே தோன்றி பத்மினி ஆடுவார் பாருங்கள்.

ஆவணி ரோகிணியில் அஷ்டமியிலே அர்த்தசாம நேரத்திலே அவதரித்தோனே..ஆயர்பாடி மேவிய யசோதை நந்தபாலா..."என்று கிருஷ்ணன் அவதரிக்க, கோபியரும் சேர்ந்துகொள்ள அருமையான நடனம். நடன அமைப்பு யார் என்று நினைவில்லை.

பத்து அவதாரங்களையும் சொல்லும் பாடலின் சந்தங்களை பல ராகங்களில் அமைத்திருப்பார் இசைமேதை ஜி.ராமநாதன். பாட்டைக் கேட்டு என்னென்ன ராகங்கள் என்று யாராவது கமெண்டுங்களேன்.

நாளை ஜி.ஆர். எம்.எல்.வி, பத்மினி மூவரின் இன்னொரு திருவிளையாடல் பாட்டு பற்றி எழுதுகிறேன்

OLD BOYS !!!

2014-01-27T01:42:00.000-08:00

தூய சவேரியார் கல்லூரியின் முன்னாள் மாணவர் மன்ற குடும்ப விழா- 2014 வழக்கம் போல குடியரசு தினத்தன்று மாலை 5.00 மணிக்கு, கல்லூரியின் நூலக முற்றத்தில் நடந்தது.
மன்றத்தின் தலைவர் திரு.அழகியநம்பி தலைமையில், கல்லூரி முதல்வர் Rev.கில்பர்ட் கமில்லஸ், இயக்குனர் Rev.Dr.ஆரோக்கியசாமி, செயலர்.Rev.ஜேஸு மைக்கேல்தாஸ் ஆகியோரின் முன்னிலையில், மன்றத்தின் செயலர் திரு.ஜி.முத்துகிருஷ்ணன் அவையோரை வரவேற்க விழா தொடங்கியது.

சிறப்பு விருந்தினர்களாக, தூத்துக்குடி வ.உ.சி கல்லூரி தாளாளர்

திரு.A. P. C V.சொக்கலிங்கமும்
பாளை தூய யோவான் கல்லூரி தாளாளர் திரு.குணசிங் செல்லதுரையும் வந்தார்கள்.
திரு.சொக்கலிங்கம் தன் உரையில், தான் தூத்துக்குடி கால்ட்வெல் பள்ளியில் படித்த காலம் தொடங்கி, கால்ட்வெல் கிறிஸ்துவ மதப் பிரசாரத்திற்காக இந்தியா வந்தவர், தமிழை கற்றுக் கொண்டதையும், கல்விக்காக பள்ளிகள் நிறுவியதையும் விவரித்தார். முன்னாள் மாணவர்கள் குடும்பத்துடன் வந்து, கல்லூரியில் ஏற்பட்டிருக்கும் மாற்றங்கள், முன்னேற்றங்கள் கண்டு மகிழ்ந்து. மனைவி,குழந்தைகளிடம் இதுதான் என் க்ளாஸ் ரூம் என்று காட்டி மகிழ்ந்தீர்கள் என்றார். கல்லூரி நடத்துவதில் இப்போது உள்ள சிரமங்கள் என்னென்றும், நம் கல்லூரிகள்தான் கல்வியை வியாபாரம் ஆக்காமல் ஒரு சேவையாக நடத்திக் கொண்டிருக்கிறோம் என்றும் சொன்னார்.

ஓய்வு பெற்ற கல்லூரி பேராசிரியர்களை, முன்னாள் மாணவர் திரு.பா.வளன் அரசு பாராட்ட, முன்னாள் மாணவர், நீதியரசர் ஐ.டேவிட் கிறிஸ்டியன் வாழ்த்திப் பேசினார்.

முன்னதாக நடந்த விளையாட்டு போட்டிகளில் வென்றவர்களுக்கு பரிசு தந்தார்கள்.

நான் சந்தித்த, Old Boys - பாண்டியன் கிராம பேங்க் ஸ்தாபக டைரக்டர், திரு.கள்ளபிரான், குணசிங், ஸ்டேட் பேங்க்-ஓய்வு பெற்ற ஜோஷுவா, Dr.மஹாகிருஷ்ணன், மகராஜன் ஆறுமுகம், ஆடிட்டர் சாமுவேல், எல்.ஐ.சி பி.மணி. என் 1962 பாட்ச் யாரும் பார்க்க முடியவில்லை. முகநூலில் பார்த்து தொடர்பு கொண்டால் சந்தோஷம்.

Rev.டேனியல் பொன்னையா சங்கத்தின் ஆண்டு மலரை வெளியிட்டார்.

நிகழ்ச்சியை Dr.S.V.L. மைக்கேல் தொகுத்து வழங்கினார். மன்ற செயலாளர்திரு.எஸ்.சுப்பிரமணியன் நன்றி கூறினார்

2014-01-22T22:22:00.002-08:00

விபத்தில்லா வாழ்க்கை

திங்கட்கிழமை 20/01/14 அன்று பள்ளி மாணவ/மாணவிகள் விபத்தில்லா வாழ்க்கை பெற சாலை பாதுகாப்பு உறுதிமொழி எடுத்துக்கொள்ளும் நிகழ்ச்சி மாநிலம் முழுதும் நடந்தது.

நெல்லை மதுரை திரவியம் தாயுமானவர் இந்து கல்லூரி மேல் நிலை பள்ளியில் திரு மு.செல்லையா - செயலர், கல்வி சங்கம், திருநெல்வேலி மாவட்ட பஸ் உரிமையாளர்கள் சங்கம் - வரவேற்க,
திரு.ப.தி.சிதம்பரம் -ஆட்சி மன்றக்குழு உறுப்பினர் தலைமை வகிக்க,
சிறப்பு விருந்தினர், திரு.ச.தங்கவேலு-R.T.O., திருநெல்வேலி, தேசியக்கொடி ஏற்றினார்.

பாரதியார் படித்த பள்ளி அல்லவா? மாணவ/மாணவிகள், கடவுள் வாழ்த்தாக
"ஓம் சக்தி ஓம் சக்தி ஓம் -பராசக்தி
ஓம் சக்தி ஓம் சக்தி ஓம்"
என்ற பாரதி பாடலும் தமிழ்த் தாய் வாழ்த்தும் கோரஸாக பாடினர்.

திரு.தங்கவேலு, "ஓட்டுனர் உரிமம் இல்லாமல் பைக் ஓட்ட வேண்டாம். உரிமம் பெற R.T.O., அலுவலத்தில் ஏற்பாடு செய்கிறோம். சாலை விதிகளை மதிக்க வேண்டும்" என்றும் கூறினார்.

திரு செந்தில்குமார் -M.V.I .Gr.I., வாசிக்க, எல்லோரும் விபத்தில்லா தமிழகம் உருவாக்கிட உறுதிமொழி எடுத்துக் கொண்டார்கள்.

முன் தினம் பள்ளியில் நடந்த பேச்சுப்போட்டி, கட்டுரை போட்டி, ஓவியப்போட்டிகளில் வென்றவர்களுக்கு பரிசுகளும், N S S மாணவர்களுக்கு
T ஷர்ட்டும் வழங்கப்பட்டன.

நிகழ்ச்சியில் திரு.S.வடிவேல் முருகன், திரு K.G.கிருஷ்ணன் -முறையே தலைவர், பொருளாளர், பஸ் உரிமையாளர்கள் சங்கம், திரு.சீ.வ.ஜானகிராம் அந்தோணி-மாநில செயற்குழு உறுப்பினர், பஸ் உரிமையாளர் சங்கங்களின் சம்மேளனம் ஆகியோரும் கலந்து கொண்டனர். பள்ளி தலைமை ஆசிரியர், திரு சூ.அழகிய சுந்தரம் நன்றியுரை அளித்தார்

சாலை பாதுகாப்பு வாரம் - மாணவர் பேரணி.

2014-01-13T08:53:00.000-08:00

பொங்கல் விடுமுறை வருவதால், வட்டார போக்குவரத்து அதிகாரி கேட்டுக்கொண்டபடி, 17ம் தேதி வெள்ளிக்கிழமையன்று மாணவ/மாணவிகள் பேரணி நடத்த திருநெல்வேலி மாவட்ட பஸ் உரிமையாளர்கள் சங்கத்தில் திட்டமிட்டோம்.
தலைமைச் செயலகத்திலிருந்து 13ந்தேதி திங்களன்று மாநில அளவில் எல்லா மாவட்டத்திலும் பேரணி நடத்த வேண்டும் என்று வந்த உத்தரவால், போக்குவரத்து ஆய்வாளர்கள் கேட்டதும் எங்கள் சங்க செயலாளர் எம். செல்லையா விரைந்து செய்த ஏற்பாட்டினால் பள்ளி மாணவர்கள் திரண்டனர். சங்கரன்கோவில், அம்பாசமுத்திரத்திலிருந்தும் பிள்ளைகள்.வந்தனர்.

பாளை வ.உ.சி மைதானத்தில் அணிவகுத்த பேரணி, மாவட்ட ஆட்சியாளர் கருணாகரன் பகல் 3.00 மணிக்கு கொடி அசைக்க,

குலவணிகர்புரம் லெவல் க்ராஸ் வரை ஊர்வலம் சென்றது. சங்கத்திலிருந்து கொண்டு சென்ற பிஸ்கட், தண்ணீர் பாக்கெட் பிள்ளைகளுக்கு கொடுத்து, பின் அவர்களை சங்க பொருளாளர் கே.ஜி.கிருஷ்ணன்(SGKR),
-ஸ்ரீதர்(KVS) தங்கள் சிடி பஸ்ஸில் பள்ளிகளுக்கு அனுப்பி வைத்தார்கள்.

தன்னார்வத் தொண்டர்களுக்கு சங்கம் சார்பில் டீ ஷர்ட் வழங்கினோம்.

நிகழ்ச்சியில் கலந்து கொண்டவர்கள்:
திருநெல்வேலியில் இன்று பதவி வகுத்த வட்டார போக்குவரத்து அதிகாரி தங்கவேல், மாற்றலாகி செல்லும் முத்துசாமி, ராஜசேகர்(தென்காசி), மகாதேவன்(சங்கரன்கோவில்)
காவல்துறை டெபுடி கமிஷனர் தாம்ஸன், போக்குவரத்து ஆய்வாளர்கள் - செந்தில்குமார், இளமுருகன், சசி மேடம், விநாயகம்(வள்ளியூர்),
ராம்குமார்(அம்பை)

பஸ் உரிமையாளர்கள் -எஸ்.வடிவேல்முருகன்(தலைவர்),
மு.செல்லையா(செயலாளர்), கபீர்(உபதலைவர்), கே.ஜி.கிருஷ்ணன்(பொருளாளர்) ஸ்ரீதர், நாராயணம்குமார், வாலைமுருகன்,

ஓட்டுனர் பயிற்சி பள்ளி நிர்வாகிகள், வக்கீல் பிரபாகரன் ஆகியோருடன் பலர் வந்திருந்தார்கள்.

ஜில்லா

2014-01-11T09:03:00.000-08:00

ஜில்லா

தியேட்டரில் சினிமா பார்த்து ரொம்ப நாளாச்சு. ஜில்லா பார்க்கலாம் என்று நானும் தாமரையும் மேட்னி ஷோ போனோம்.

ரொம்ப 'ஜில்'லா இருந்தது ஏஸி. தியேட்டரில் பாதி ஸீட் காலி. கூட்டத்தை பொருத்து ஏஸி டெம்பரேச்சரை கூட்டி/குறைத்து வைத்தால் என்ன?

அது போல சவுண்ட். பாட்டு வரிகள், ஏன் வசனம் கூட சில இடங்களில் புரியவே இல்லை. இளைய தளபதி ரசிகர் கூட்டம் அடித்த விசில், போட்ட கூச்சலில் ஏன் தியேட்டருக்கு வந்தோம் என்றாகி விட்டது.
சில மாதங்கள் பொறுத்திருக்கலாம்.

விஜய், மோகன்லால் ஜோடி. ரஜினி, மம்முட்டி மாதிரி தளபதி சப்ஜெக்ட் தானோ என்று நினைத்தேன்.
ஜில்லா வேற மாதிரி. படம் நல்லா இருந்தது. ஆனால் ஃபுல்லா சண்டை, வெட்டு, குத்து, டுமீல்தான்.

ஓடும்

"முதல்ல நீங்க"

2014-01-11T08:33:00.003-08:00

"முதல்ல நீங்க"

சாலை பதுகாப்பு வாரம் அனுசரிக்க தொடங்கி 25 வருஷம் ஆச்சாம். இந்த வெள்ளிவிழா ஆண்டில் சிறப்பாக, ஜனவரி 11 முதல் 17 வரை கொண்டாடுகிறது இந்திய அரசு. "சாலையில் செல்கையில் 'முதல்ல நீங்க' என்று எப்போதும் சொல்லுங்கள்" என்ற தீம் அறிவித்திருக்கிறது.

விபத்துக்களை தவிர்க்கும் பொறுப்பு சாலைகளில் பயணிப்போரிடம் தான் இருக்கிறது என்று முதல்வர் இன்று தினமலரில் தன் வாழ்த்து செய்தியில் சொல்கிறார்.

முதல்ல நீங்க - அருமையான தகவல். கார் பைக் ஓட்டும்போது முந்திச் செல்ல முனைவோருக்கு முதல்ல நீங்கள் போங்க என்று வழி விடுங்கள். முச்சந்தியிலும் நாற்சந்தியிலும் உங்கள் வலது புறமிருந்து வரும் வண்டிகளுக்கு முன்னுரிமை கொடுங்கள்.

அரசு என்னதான் கோடிக் கணக்கில் செலவு செய்து வேகத்தடை, சாலை மையத்தடுப்பு சுவர்கள், சிக்னல் பலகை, சிக்னல் விளக்கு, மலைப்பாதையில் உலோக தடுப்பு வேலிகள்,மாணவர்களுக்காக பாடப் புத்தகத்தில் சாலை விதிகளை அச்சிடுதல் செய்தாலும் 'விலையில்லா' உயிரை காப்பது நம் கடமை.

பைக் ஓட்டினால் ஹெல்மெட்டும், காரில் சீட் பெல்ட்டும் கட்டாயம் அணியுங்கள். செல்போனை ஸ்விட்ச் ஃஆப் செய்து விட்டு காரில் ஏறுங்கள். எங்காவது நிற்கும்போது மிஸ்ட் கால் பார்த்து கூப்பிட்டு பேசுங்கள்.
மது வேண்டவே வேண்டாம்.

இலங்கையில் சாலை விதி என்று சொல்லவில்லை. "வீதி ஒழுங்கு" என்றுதான் சொல்கிறார்கள். நாமும் ஒழுங்காக செல்வோம்

சோனியா

2014-01-02T21:09:00.000-08:00

நேற்று சூப்பர் ஸிங்கர் பார்த்தேன். ரொம்ப நல்லா பாடியும் சோனியா ஏனோ தேர்வாகவில்லை. மறைந்திருந்து பார்த்து மார்க் போட்டது யாருன்னு தெரியலை.

அவள் குரலில் என்ன நேர்ந்தது? அதை நடுவர்கள் சொல்லிச் சொல்லி காரணம் காட்டினார்கள்.

அழகு மலராட என்று அன்று தன் சொந்த சோகத்தையே பாடிய சோனியாவுக்கு ஜானகி அம்மா, தானே மேடைக்கு வந்து பாராட்டியது யாருக்கும் கிடைக்காத பரிசு. அன்று ஆனந்தக் கண்ணீர் விட்ட பெண் நேற்று அழுவதை பார்த்த எனக்கே பார்க்க சங்கடமாகி விட்டது.

சூப்பர் ஸிங்கராகி அருண் எக்ஸெல்லோ வழங்கும் ஃப்ளாட்டை சோனியா வென்றதும், பாட்டு பாடுகிறாள் என்று இவளை விட்டுப் பிரிந்த போன கணவன் வீடு திரும்பணும் என்பதே என் ஆசை.

நிறைவேறுமா எண்ணம் நிறைவேறுமா?

ரஜினியை விட்டுருங்கப்பா

2013-12-21T00:35:00.000-08:00

அவர் அரசியலுக்கு வருவாரா என்று சில ஆண்டுகளாகவே பல எதிர்பார்ப்புகள். போனவாரம் 12/12 அன்று அவர் பிறந்தநாள் விழா வள்ளுவர் கோட்டத்தில் நடத்த அனுமதி மறுக்கப் பட்டதால் ஒய்.எம்.சி.ஏ அரங்கில் பொது விழாவாக நடந்ததாம். விழாவில் பேசிய ரஜினி, "யார் ஆளணும், யார் ஆளக் கூடாதுன்னு ஆண்டவன் முடிவு செய்வான்..."என்று அருணாசலம் ஸ்டைலில்,......"ரஜினி ஆளுவான்" என்று சொல்லாமல் சொல்லிவிட்டார்.

அரசியலில் பெரிய ஆளாகி அமைச்சர் ஆக சினிமாதான் முதல் படி என்று ஏன் நினைக்கிறார்கள். எம்ஜிஅர் மலைக்கள்ளனில் "எத்தனை காலந்தான் ஏமாற்றுவார் இந்த நாட்டிலே" என்று பாடினார். பின் "நானே போடப்போறேன் சட்டம் பொதுவில் நன்மை புரிந்திடும் திட்டம்" என்றார். "நான் ஆணையிட்டால் அது நடந்துவிட்டால் இனி ஏழைகள் வேதனை படமாட்டார் என்றும் சொன்னார். திமுகவில் இருந்தே படங்களில் சொல்லி பிறகு அதிமுக தொடங்கி மக்கள் ஆதரவில் சிஎம் ஆனார்.

முதல்வன் படத்தில் அர்ஜுன் போல வி.என்.ஜானகியும் ஒருநாள் முதல்வர் ஆனார். ஜெயலலிதா பல முறை முதல்வர் ஆகி கட்சியையே அனைத்து இந்திய அம்மா திமுக ஆக்கி விட்டார்.

விஜயகாந்த் தன் படங்களில் சண்டைக் காட்சிகளில் பிரமாதமாக நடிப்பார். சட்டசபையில் பேசவேண்டிய வசனம் எழுதித் தரவும் டைரக்ட் செய்யவும் ஆளில்லை. குடித்தால் என்ன தப்பு என்று பொது இடங்களில் பேசி மதிப்பைக் கெடுத்துக் கொள்கிறார். சரத்குமார், நெப்போலியன் எல்லாம் என்ன செய்யப் போகிறார்களோ?

கலைஞர், 1954லிலேயே "அண்ணா நீதான் நாட்டை ஆள வேணும்" என்று வசந்தன் (காகா ராதாகிருஷ்ணன்) மனோகரனிடம் (சிவாஜி கணேசன்) சொல்வதாக வசனமெழுதினார். 1967ல் அது நடந்தது. அண்ணாவுக்குப் பிறகு சிஎம் ஆனவர் மது முதல் பல திட்டங்களைக் கொண்டு வந்தார். பிறகு அம்மாவும் அவரும் மாறி மாறி சிஎம் ஆகி பலத்த போட்டி நடக்கிறது.. வசனகர்த்தா, பாடலாசிரியர், தயாரிப்பாளர் என்று சினிமாவில் கலைஞரின் உழைப்பை நூற்றாண்டு விழாவில் அம்மா ஒரு வார்த்தை சொல்லியிருக்கலாம். கலைஞரின் குடும்பத்திலும் வாரிசுகள் பதவி சண்டை போடுகிறார்கள்

சிவாஜி கணேசனும் அரசியலில் நுழைந்து செய்வதறியாமல் கொஞ்சம் இழப்புக்கு பின் விலகிக் கொண்டார். ஜெமினி கணேசனோ இந்த வேலையே வேண்டாம் என்று நிறைய சொத்துக்கள் வாங்கி நிம்மதியானார். வடிவேலு பாவம், தேர்தல் பிரச்சாரம் செய்ததால் ரெண்டு வருஷமாக பட வாய்ப்புக்கள் இழந்து நொந்து போனார்.

ரஜினியை விட்டுருங்க. அரசியல் வேண்டாம்.அவரைத் தூண்டாதீர்கள். நல்ல பேரும் புகழும் சம்பாதித்து விட்டார். மந்திரியாக மக்களுக்கு என்னென்ன செய்யணுமோ அதை ரஜினியாகவே இருந்து செய்து கொண்டு, சினிமாவில் தொடர்ந்து, இன்று பிறக்கப் போகும் பெண் குழந்தையுடன் 15 வருஷம் கழித்தும் ஹீரோவாக நடிக்கணும்

2013-12-19T06:49:00.000-08:00

Good for your goods

டில்லியிலிருந்து வெளியாகும் பத்திரிகையான ஆல் இந்தியா "மோட்டார் டிரான்ஸ்போர்ட்"Good for your goods - to carry perishables safely with extra mileage"

என்று இரண்டு இதழ்களில் வந்த ஜேகே ரேடியல் டயர் - என்னை கவர்ந்த விளம்பரங்கள்.

2013-12-01T23:14:00.002-08:00

நான் சந்தித்த சினிமா பிரபலங்கள்

ஒருமுறை அப்பாவுடன் நானும் மதுரை சென்றபோது(1968ல்) டி.வி.எஸ் விருந்தினர் மாளிகையில் தங்கி, காலையில் புறப்படுமுன், அங்கு தங்கியிருந்த சிவாஜி கணேசனுக்கு அப்பாவை அறிமுகம் செய்தார்
கெஸ்ட் ஹவுஸ் மானேஜர்.
தான் புகைத்துக் கொண்டிருந்த சிகரெட்டை அணைத்து விட்டு,தண்ணீர் எடுத்து வாய், கையெல்லாம் சுத்தம் செய்து, அப்பா அருகில் வந்து வணங்கி, சில நிமிடங்கள் பேசினார்.

என் மகள் ராமலக்ஷ்மிக்கு (1975/76)திருப்பதியில் முடி எடுத்துவிட்டு காரில் மெட்ராஸ் வந்தோம். நுங்கம்பாக்கம் சாலையில் எதிரில் வந்த ஜெயசங்கர் என் மகளைப்பார்த்து காரை ஸ்லோ பண்ணி, "எந்த ஊர் மொட்டை , திருப்பதியா? என்று கேட்டுவிட்டு விரைந்து சென்றார்.

நான் டி.வி.எஸ்ஸில் பயிற்சியாளனாக சேர்ந்து படிப்படியாக டெபுடி ஒர்க்ஸ் மானேஜராகி, சில வருஷத்தில் விலகினேன்.
மதுரையில் ஒரு நாள் செவர்லே காரில் சாண்டோ சின்னப்ப தேவர், தன் குழுவுடன் வந்தார். காரில் சின்ன வேலை தான். அவரை விசிட்டர் அறையில் அமரச் செய்து, இரண்டு மெக்கானிக்கிடம் சொல்லி விரைவில் முடித்து, ஓட்டிப் பார்த்து விட்டு அவரிடம் வந்து உங்கள் கார் ரெடி என்றேன். அதுக்குள்ளாகவா? தம்பி உன் பேர் என்ன என்றவரிடம் , 'வடிவேல் முருகன்'னு சொன்னதும் "முருகா முருகா" என்று என்னைக் கட்டிப்பிடித்து நன்றி சொன்னார் அந்த முருக பக்தர்.

திருச்சிகிளையில் பார்ட்ஸ் பிரிவில் கணேசன்னு ஒரு புதுக்கோட்டைக்காரர் இருந்தார். ஜெமினி கணேசனும் புதுக்கோட்டைதானே. இருவரும் சொந்தக்காரர்கள்கூட.. திருச்சி வந்த ஜெமினி, புதுக்கோட்டை கணேசனைப் பார்க்க டி.வி.எஸ் வந்தார். கணேசன் உடனே என்னை அழைத்து ஜெமினிக்கு அறிமுகம் செய்தார். ஒளவையாரிலிருந்து எனக்குப் பிடித்த அவர் படங்களை சொன்னேன்.

திருநெல்வேலி டி.வி.எஸ்ஸில் ஒருநாள், டெல்லி கணேஷ், தன் நண்பர் கோபாலகிருஷ்ணனைப் பார்க்க வந்தார். இருவருக்கும் அருகில் உள்ள முறப்பநாடுதான் சொந்த ஊர்.

குமுதத்தில், அரசு ஒரு கேள்விக்கு பதில் சொன்னார், முந்தாநாள் நடிகைகள், நேற்றைய நடிகைகள், இன்றைய நடிகைகளில் தனக்கு யாரைப் பிடிக்கும் என்று.
விஜய் டிவியின் 'ஆபீஸ் சீரியலில் வரும் லக்ஷ்மியின் தங்கை, தன் மகளின் வகுப்பு தோழியாம். சீக்கிரம் லக்ஷ்மியை பேட்டி கண்டு உங்கள் காதில் புகை வருமாறு எழுதுவேன் என்று வலைப்பூவில் ஒரு பதிவர் எழுதினார். இரண்டையும் நான் ரசித்தேன்.

சந்தித்த நடிகர்கள் பற்றி சொல்லிவிட்டேன். ஆனால் உங்கள் காதில் புகை வரும்படி எழுத, முந்தாநாள், நேற்றைய, இன்றைய நடிகை யாரையும் நான் இன்னும் சந்திக்கவில்லை

2013-11-26T03:48:00.001-08:00

"பூப்பூவா பூத்திருக்கு.........

பூமியிலே ஆயிரம் பூ, பூவிலே சிறந்த பூ

என்ன பூ?........."

என்று அறிய, நாட்டார் வழக்காற்றியல் துறையும் அத்துறையின் ஆய்வு மையமும் தூய சவேரியார் தன்னாட்சிக் கல்லூரியும் இணைந்து, பள்ளிகளுக்கான கிராமியக் கலைப் போட்டிகளை சவேரியார் கல்லூரியில் நடத்தினார்கள் . இரண்டு நாட்களாக நடக்கும் "கிராமியம்- 2013" நிகழ்ச்சிக்கு இன்றுதான் என்னால் போக முடிந்தது.

குழுப் பாடல், கதை சொல்லல், தனிப் பாடல்,கோலம், குழு நடனம், குறு நாடகம், மாறுவேடம் என்று பல போட்டிகள்.

கோலப்போட்டியில் பையன்களும் கலந்து கொண்டு ரங்கோலி வரைந்து வண்ணப்போடிகள் தூவினார்கள். கோலம் என்றால் எனக்கு புள்ளி வைத்துபோடுவதுதான் கோலம்.

புள்ளி கோலம் போட்ட பெண்ணிடம், "என் அம்மா போட்ட கோலம் மாதிரி இருக்கு" என்றேன். அவளுக்கு ஒரே சந்தோஷம்.

பங்கேற்ற பள்ளி அணிகளுக்கு பூக்களின் பெயர்கள் தந்திருந்தார்கள். நடுவர்களுக்கு எந்தப் பள்ளி என்று தெரியக்கூடாது என அணிகளுக்கு பெயர்கள் அல்லது 1,2,3 என்று நம்பர்களாக குறிப்பிடுவது வழக்கம்

அல்லி, தாமரை, தாழம்பூ, வாடாமல்லி, மகிழம்பூ, கனகாம்பரம், சூரியகாந்தி, சங்குபுஷ்பம், பிச்சி, சாமங்கி, மனோரஞ்சிதம், செம்பருத்தி, நித்யகல்யாணி, மகரந்தம், ரோஜா, நீலாம்பரி, அந்திமந்தாரை, பூவரசு.

ஆகா, இத்தனை பூக்களா? அமைப்பாளர்களின் ரசனைக்கு என் பராட்டுக்கள்.
இன்று மாலை 4 மணிக்கு சிறந்த மூணு பூக்களுக்கு, முதல், இரண்டாம், மூன்றாம் பரிசுகள் தருவார்கள்

என் கல்லூரிக்குள் நுழைந்ததும் அந்த நாள் ஞாபகம் நெஞ்சிலே வந்தது.

1962ல் இப்படி இருந்த நான் இப்போ எப்படி ஆயிட்டேன்னு பாருங்க. சினிமாவிலே ஃப்ளாஷ்பேக் என்றால் B/W தானே. எதிரில் படி ஏறி வந்த மாணவனிடம் கேமரா தர, அவன் எடுத்த படம்

2013-11-25T18:57:00.000-08:00

செந்தமிழ் தேன்மொழியாள்

விஜய் டிவியில் சூப்பர் சிங்கர் தவறாமல் பார்க்கிறேன். குழந்தைகள் எல்லொரும் ரொம்ப அழகாக பாடுகிறார்கள்..

இன்று உன்னி கிருஷ்ணன் டீமில் வந்த சோனியா, சர்த் சந்தோஷ், சாயி விக்னேஷ் மூவருமே தாங்கள் தேர்வு செய்த பாட்டை அழகாக பாடினார்கள்.

"வான் நிலா" பாட்டில் வயலின் வாசித்தவரை, சிறப்பு விருந்தினர் வயலினிஸ்ட் சீனிவாசன் பாராட்டி 1978ல் தான் சென்னை வந்த புதிதில் எஸ்.பி.பாலசுப்ரமணியனுடன் ஒரு மேடைக் கச்சேரில் அந்த் பாட்டுக்கு தான் வயலின் வாசித்ததை சொன்னார்."

"செந்தமிழ் தேன்மொழியாள்" என்று சாயி விக்னேஷ் பாடியதும் , சீனிவாசன் பாராட்டி, படத்தில் பாடியது திருச்சி லோகநாதன் தானே என்று கேட்க விக்னேஷ் ஆமாம் என்று சொன்னான். அனந்த் சார் உடனே அது மாலையிட்ட மங்கை படத்தில் டி.ஆர்.மகாலிங்கம் பாடியது என்று சொல்வார் என்று பார்த்தேன். இல்லையே.

ஆர்கெஸ்ட்ராவில் எல்லோருமே அழகாக வாசிக்கிறார்கள். புல்லாங்குழல், வயலின், தபேலா வாசிப்பை முக்கியமான இடங்களில் கேமரா காட்டுவது ரொம்ப அழகு

2013-11-24T09:27:00.001-08:00

கிட்டிவல் (Kiddival)

ஆண்டு தோறும் நடக்கும் LKG முதல் 5ம் வகுப்பு குழந்தைகளுக்கான போட்டி நேற்று சாரா டக்கர் கல்லூரியில் நடந்தது.

குழந்தைகளின் வயது, திறமைக்கு ஏற்றவாறு,

திருக்குறள் ஒப்பித்தல், க்ரேயான் கலரிங், ஆங்கிலம்/தமிழில் பேச்சுப் போட்டியும் கையெழுத்து போட்டியும், பெயிண்டிங், வாய்ப்பாட்டு,

வாத்திய இசை, பரதநாட்டியம், குழு நடனம்,

ஃபாஷன் - பாய்ஸ்/கேர்ல்ஸ் என்று பல போட்டிகள்.

1600+ மாணவ மாணவிகள், நெல்லை, தூத்துக்குடி, கன்னியாகுமரி, விருதுநகர் மாவட்டங்களிலிருந்து வந்து அசத்தினார்கள்.

காலை 9 மணிக்கு சீதாலக்ஷ்மி விஸ்வநாதன் அவர்கள் தொடங்கி வைக்க, மாலை வரை நடந்த போட்டிகளில் சங்கர்நகர் ஜெயேந்திரா கோல்டன் ஜூபிலி, , இலஞ்சி பாரத் வித்யா மந்திர் மெட்ரிக், வடக்கன்குளம் பாலகிருஷ்ணா மெட்ரிக் பள்ளிகள் முதல் மூன்று பரிசுகளை பெற்றன.

எல்லா போட்டிகளிலும் நாலாவது மார்க் வாங்கிய குழந்தைகள். ஆறுதல் பரிசாக ஒரு கப் பெற்றார்கள். பரிசளிப்பு விழாவில் மனோன்மணியம் சுந்தரனார் பல்கலைகழகத் துணைவேந்தர் திரு.ஏ.கே.குமரகுரு வெற்றி பெற்றவர்களுக்கு பரிசு வழங்கி வாழ்த்தி பேசினார்

குழந்தைகள் மேல் அளவற்ற பாசம் கொண்ட Rm.K..விஸ்வநாதன் 24 ஆண்டுகள் முன்பு தொடங்கிய கிட்டிவலை தொடர்ந்து, அவர் தம்பிகள் திருநெல்வேலி வெஸ்ட்,திருநெல்வேலி வேணுவனம் ரோட்டரி கிளப் மெம்பர்களுடன் சேர்ந்து நடத்துகிறார்கள்.

ஆர்ரெம்கேவி நிர்வாகிகள் திரு.கே.மகேஷ் கோவையிலிருந்தும், என்.மாணிக்கவாசகம் சென்னையிலிருந்தும் வந்திருந்தார்கள்.

க்விஸ் நிகழ்ச்சியில் பார்வையாளர்கள் வரிசையில் இருந்த என்னை பார்த்த க்விஸ் மாஸ்டர் திரு ஜான் சுதாகர், இவர்தான் என் முதல் க்விஸ் மாஸ்டர் என்று என்னை அவைக்கு அறிமுகம் செய்தார். 1982ல் நான் நடத்திய க்விஸ்ஸில் அவர் முதலாக கலந்து கொண்டதை நினைவு கூர்ந்தார்

ஜெமினியும் நாங்களும்

2013-10-26T00:27:00.000-07:00

ஜெமினியும் நாங்களும்

'மூங்கில் மூச்சு' என்று திரு K.சுகா அவர்கள் விகடனில் இரண்டு ஆண்டுகளுக்கு முன் எழுதிய தன் தொடர் கட்டுரையில் ஒரு வாரம் ,திருநெல்வேலியில் உள்ள தியேட்டர்கள் பற்றி எழுதும்போது 'பாலஸ்-டி-வேல்ஸ் பற்றி அந்த காலத்து ஆட்கள் விசேஷமாக சொல்வார்கள்' என்றார். நான் அந்தகாலத்து ஆள் (72) மட்டுமல்ல, பாலஸ் டி வேல்ஸ் தியேட்டர்காரனும் கூட. உடனே எழுத நினைத்தாலும் பல வேலைகள் காரணமாக முடியவில்லை.

சினிமா ப்ரொட்யூசர், டிஸ்ட்ரிபியூட்டர், எக்ஸிபிட்டர் எல்லாம் ஒரு குடும்பமாக பழகிய காலம். ஏ.வி.எம் படங்கள் பாப்புலர் டாக்கீஸிலும். மாடர்ன் தியேட்டர்ஸ் , விஜயா-வாஹினி படங்கள் ராயல் டாக்கீஸிலும் ஓடும். 1962ல் பாப்புலர் உரிமையாளர்கள் கட்டிய சென்ட்ரல் தியேட்டரை திரு. ஏ.வி.மெய்யப்ப செட்டியார் அவர்கள் வந்து திறந்துவைத்தார்.

ஜெமினி நிறுவனம் தங்கள் படங்களை ஜெமினி பிக்சர் சக்யூட் என்ற பெயரில் தாங்களே எல்லா ஊர்களிலும்,தியேட்டர்காரர்களுடன் ஒப்பந்த அடிப்படையில் திரையிட்டார்கள். அப்படி தொடங்கியதுதான் ஜெமினி- பாலஸ்-டி-வேல்ஸ் உறவு.

தாத்தா திரு.ஏ.ஆர்.சண்முகம் பிள்ளை,அப்பா திரு.எம்.சோமசுந்தரம் பிள்ளை, இருவரும்தான் தியேட்டரின் பார்ட்னர்கள்.

ஏ.ஆர்.சண்முகம் பிள்ளை எம்.சோமசுந்தரம் பிள்ளை

ஜெமினி படம ரிலீஸ் தேதியில் வேறு எந்த படம் ஓடிக்கொண்டிருந்தாலும் திரையிட வேண்டும். 1943ல் ஜெமினியின் மங்கம்மா சபதம் ரிலீஸ் ஆனபோது நன்றாக ஓடிக்கொண்டிருந்த தியாகராஜ பாகவதரின் 'சிவகவி', தொடர் ஓட்டமாக ராயல் டாக்கீஸுக்கு மாற்றப்பட்டதாக என் மணி அண்ணன் சொன்னார்.

ஜெமினியின் பிரமாண்டமான தயாரிப்பான 'சந்திரலேகா', 1948ல் வரும் வரை எங்கள் தியேட்டரில் சிங்கிள் ப்ரொஜெக்டர்தான். தயாரிப்பாளர்-டைரக்டர் திரு S.S.வாசன் அவர்கள் அப்பாவிடம், "படம் மூன்றரை மணி நேரம் ஓடும். அதனால் டபுள் ப்ரொஜெக்டராக மாற்றி விடுங்கள்" என்று சொன்னதால் புதிய RCA Simplex ப்ரொஜெக்டர்களும் RCA சவுண்ட் சிஸ்டத்துடன் வந்தது. ஜெமினி இரட்டையர்களின் குழலோசை ரொம்ப தூரம் கேட்குமாம்.

1955ல் சென்னை உட்லண்ட்ஸில் நடந்த என் அக்கா திருமதி பொன்னம்மாள் நடராஜனின் திருமண வரவேற்பில், கூட்டத்தில் பேசி பழக்கமில்லாததால் அத்தான் எழுதித் தந்த உரையை மனப்பாடம் செய்து அக்கா விருந்தினரை வரவேற்றாள்.
திரு வாசன் அவர்கள் கலந்து கொண்டு அக்காவுக்கு ஒரு தங்க நெக்லெஸ் பரிசளித்தார். புகைப் படங்களுடன் நிகழ்ச்சிகளை சொல்ல இந்த ஒரு ''பொக்கிஷம்'' மட்டும்தான் அக்காவின் கல்யாண ஆல்பத்திலிருந்து கிடைத்தது

அமர்ந்திருப்போர் இடமிருந்து வலம் :அத்தான் நடராஜன், கிண்டி இஞ்ஜினியரிங் காலேஜ் பிரின்ஸிபல் திரு,பால்,
திரு எஸ்.எஸ்.வாசன், அப்பா. -- இடது பக்கம் சிறுவன், நான்(14)

திரு வாசன் அவர்களின் குமாரர் திரு பாலசுப்பிரமணியன் கல்யாணத்திற்கு அப்பாவும் தாத்தாவும் சென்றார்கள். ஆனந்தவிகடனின் இணை பத்திரிகையான 'நாரதர்' இதழில் கல்யாண போட்டோக்களுடன் அவர்கள் படமும் 'திருநெல்வேலி பிரமுகர்கள்' என்ற குறிப்புடன் பிரசுரமானதாம்

புதுமணத் தம்பதிகளுடன் திருமதி பட்டம்மாள் வாசன் அவர்கள், திருச்செந்தூர் செல்லுமுன் நெல்லை வந்து எங்கள் வீட்டில் தங்கினார்கள். அவருடன் விகடன் குழுவான மணியன் (பின்னாளில் ''இதயம் பேசுகிறது''), ஓவியர் கோபுலு உட்பட பலர் வந்திருந்தார்கள். மருமகள் திருமதி சரோஜாவை அறிமுகம் செய்த திருமதி வாசன், 'இவள்தான் எங்கள் வீட்டு மகாலக்ஷ்மி' என்றார்கள். (அந்தப் படம் அப்போது ஓடிக்கொண்டிருந்தது ).

திரு பாலு அவர்கள் குளித்து விட்டு வந்ததும் விரலில் குங்குமம் எடுத்து கட்டை விரலால் சுற்றி அதை வட்டமாக்கி நெற்றியில் இட்டுக்கொண்டதை பார்த்த தங்கை கல்யாணி அது முதல் நானும் அப்படித்தான் செய்கிறேன் என்கிறாள். மருமகள் காதில் அணிந்திருந்த ஜிமிக்கி, மாட்டல் ரொம்ப அழகாக இருக்கிறதே என்றுதான் என் அம்மா சொன்னார்களாம்.. ஊருக்குப் போனதும் திருமதி வாசன்,அதே போல ஒரு ஜோடி வாங்கி அனுப்பி வைத்தார் என்று அக்கா சொன்னாள்.

உதவியாட்களுடன் அம்மா, இரண்டு அம்மியில் (அப்போ மிக்ஸி கிடையாதே) சட்னி அரைத்து, இட்லி, சாம்பார் எல்லாம் தயார் செய்தார்கள்.

இவ்வளவு வெண்மையான, மென்மையான இட்லியா என்று அனைவரும் பாராட்டி ருசித்து சாப்பிட்டார்கள். திருச்செந்தூருக்கு என் சின்ன அண்ணி திருமதி லோகா சுப்பிரமணியத்தையும் அழைத்துச் சென்றார்கள். மாலையில் மாயாபஜார் படம் பார்க்க பாலஸ்-டி-வேல்ஸுக்கு கல்யாணியும் அவர்களுடன் போனாள்.

அக்கா சென்னையில் இருப்பதால் திருமதி சரோஜா வளைகாப்பிலும், குழந்தை சீனிவாஸன் பெயர் சூட்டுவிழாவிலும் கலந்து கொண்டாள். வளைகாப்புக்கு போன என் பெரிய அண்ணன் திரு.முத்துவேல், அண்ணி திருமதி M. பொன்னம்மாள் இருவரையும் அப்போது நடந்து கொண்டிருந்த வஞ்சிக்கோட்டை வாலிபன் படப்பிடிப்பை பார்க்க ஸ்டூடியோவுக்கு

அழைத்துச் சென்றார்களாம்.

அவள் விகடன் நடத்திய மகளிர் விழாவுக்கு சென்ற அக்காவும் கல்யாணியும், திரு.பா.சீனிவாசன் அவர்களிடம் தங்களை அறிமுகம்

செய்து கொண்டதும் அப்பாவிடம் சொல்கிறேன் என்றாராம்.

'நானும் விகடனும் என்று ஆனந்தவிகடனில்

பிரபலங்கள் எழுதுவதைப் பார்த்ததும்,

'ஜெமினியும் நானும்' என்று கட்டுரை எழுதப் போகிறேன் என்றதும்

எல்லோரும் தங்கள் நினைவில மலர்ந்த நிகழ்ச்சிகளை சொன்னார்கள். அதனால் தலைப்பு ''ஜெமினியும் நாங்களும்'' என்று மாறியது.

திருமதி.லோகா, திரு.சுப்பிரமணியன்

அக்கா, நான், கோமதி, கல்யாணி

திரைக்கு வந்து பல மாதங்கள் ஓடிய ஜெமினி படங்கள் பற்றி சொல்ல நினைத்தால் முதலில் சந்திரலேகாதான். 31 வாரங்கள் ஓடியதாக என் அண்ணன் சொன்னார்.

ரஞ்சன் (இயற்பெயர் வெங்கடரமண சர்மா) முறைப்படி FENCING ஃப்ரான்ஸில் கற்றவராம். சமீபத்தில் நெட்டில் படித்தேன். எம்.கே.ராதாவுடன் அவர் போடும் வாள் சண்டை போல அதற்குப் பிறகு எந்தப் படத்திலும் நான் பார்க்கவில்லை. FENCING - ஸ்டன்ட் சோமு என்று படத்தின் டைட்டிலில் பார்க்கலாம்

இங்கிலாந்து இளவரசர் வில்லியம்ஸ், ,கல்யாணமானதும் பால்கனியிலிருந்து நாட்டு மக்களுக்கு கை அசைப்பதை டிவியில் பார்த்ததும படத்தின் கடைசிக் காட்சியில் எம்.கே.ராதாவும் டி.ஆர்.ராஜகுமாரியும் உப்பரிகையில் இருந்து மக்களைப் பார்த்தது நினைவு வந்தது. யு ட்யூபில் அந்த காட்சியை பார்க்க முடிந்தாலும் காபி ரைட்டினால் பதிவு செய்ய முடியவில்லை ராஜ குடும்ப கல்யாணம் எப்படி நடக்கும் என்று டைரக்டர் வாசனின் அருமையான காட்சியமைப்பு.

1953ல் ஒளவையார் படம் ரிலீஸ் அன்று, எங்கள் சொந்தங்கள், கம்பெனி ஆட்களுக்காக அப்பா ஒரு பிரத்யேக காலை காட்சி ஏற்பாடு செய்தார்கள். அப்பாவுடன் நாங்கள் பார்த்த ஒரே படம் அது தான். நூறாவது நாள் விழாவுக்கு நெல்லை வந்த திருமதி சுந்தராம்பாள், எங்கள் வீட்டுக்கும் வந்தார். என் தங்கை கோமா(5- 6)வை தன் மடியில் அமர்த்தி பழம் தந்ததை மறக்காமல் சொன்னாள். படத்தில் இருக்கும் முருகன் யார் தெரியுமா? K.பாலாஜி.

சக்ரதாரி, அபூர்வ சகோதரர்கள், சம்சாரம், மூன்று பிள்ளைகள், .....என்று ஜெமினி படங்களை பற்றி எழுதத் தொடங்கினால். அது ஒரு தொடர் கட்டுரை ஆகிவிடும்.

ஜெமினியின் ஹிந்தி படம் 'இன்ஸானியத்,' தேவ் ஆனந்தும் திலீப் குமாரும் இணைந்து நடித்த ஒரே படம், பாலஸில் ரொம்ப நாள் ஓடியது. சிரிப்பு நடிகர் ஆகாவுடன் ஜிப்பி (சிம்பன்ஸி) செய்யும் சேட்டைகள் எல்லோரும் ரசித்த காட்சிகள்.

பாலஸ் டி வேல்ஸ்-- ஈரடுக்கு மேம்பாலத்திலிருந்து நான் எடுத்த படம்

தியேட்டர் அமைப்பு காரணமாக மேட்னி ஷோ தடை ஆனதால், ஜெமினியின் வஞ்சிக்கோட்டை வாலிபனை பார்க்க பார்வதி டாக்கீஸ் போனபோது எனக்கு கண்ணில் நீர் கசிந்தது. பழைய படங்களை தினம் இரண்டு காட்சிகள் மட்டும் நடத்தும் போது ஈரடுக்கு மேம்பாலம் அமைந்ததால் ரசிகர் கூட்டம் குறைந்தது, குத்தகை காலம் முடிந்ததும் நில உரிமையாளர்களான கோவில் நிர்வாகக்குழு வாடகையை பல மடங்கு உயர்த்தியது போன்ற பல காரணங்களால் தியேட்டரை மூட வேண்டியதாயிற்று.

ஆலும் வேலும் பல்லுக்கு உறுதி என்பார்கள். இன்று ஆலும் வேலும்தான் பாலஸுக்கு நிழல். கோவில் நிர்வாகம் அந்த இடத்தில் கல்யாண மண்டபம் கட்ட திட்டமிடுகிறார்களாம். ஜெமினியும் பாலஸும் சேர்ந்து கல்யாண மாப்பிள்ளை- பெண்ணை வாழ்த்துவோம்

சோ.வடிவேல் முருகன்

அவர் இல்லை என்று சொல்லுவதில்லை..

2012-10-09T00:42:00.000-07:00

தபால்காரரிடம் எனக்கு கடிதம் இருக்கா என்று கேட்டால் நாளை என்றுதான் சொல்வார். மகனிடமிருந்து கடிதம் எதிர்பார்க்கும் தாய்க்கு, இல்லை என்று சொன்னால் எவ்வளவு வருந்துவாரென்று தெரிந்தவர் அவர்.
தபாலை எதிர்பார்த்து பெற்றோரும், கணவன் மனைவியும், மணி ஆர்டருக்காக காத்திருக்கும் மகன்களும் இருந்தது ஒரு காலம். இன்று செல்போன், இன்டர்நெட் எல்லாம் வந்த பிறகு தபால்துறைக்கு வேலை இல்லாமல் போய் விடுமோ

இன்று உலக தபால் தினம்.
தபால்காரர்களுக்கு என் வாழ்த்துக்கள்.