కొత్త బంగారులోకం

దీపావళి శుభాకాంక్షలు

2014-10-23T06:41:00.002+05:30

బృందావన్ గార్డెన్స్

2014-01-10T10:00:00.000+05:30

బృందావన్ గార్డెన్స్ మైసూరుకి 25కి.మీ దూరంలో కృష్ణరాజసాగర్ డ్యాం ప్రాంతంలో ఏర్పాటు చేయబడ్డ ఒక అందమైన ఉధ్యానవనం. అందమైన మొక్కలు, పచ్చిక బయళ్ళు, ఫౌంటైన్‌లతో ఏర్పాటుచేయబడింది.

ఇక్కడ ప్రతి రోజు సాయంత్రం 6:30 నుంచి మ్యూజికల్ ఫౌంటైన్ లైట్ షో ఉంటుంది. ఇది తప్పకుండా చూడాలి.

శని, ఆది వారాలు, సెలవు దినాలు మరియు సీజన్లో ఇక్కడ విపరీతమైన రద్దీగా ఉంటుంది. అందుకె సాయంత్రం 4 లేదా 4:30 కల్లా ఇక్కడ ఉండేలా చూసుకుంటే సౌత్ గార్డెన్లో అన్ని చూసుకొని 6 కల్లా నార్త్ గార్డెన్ కి చేరుకుంటే లైట్ షో చూసుకొని 7 లేదా 7:30 కి తిరిగి ప్రయాణం అయితే ఈ రద్దీ నుంచి కొంత తప్పించుకొవచ్చు. అన్ని చూసిన అనుభూతి పొందవచ్చు.

కృష్ణరాజసాగర్ డ్యాం

వసతికి మైసూరు మరియు గార్డెన్‌కి వెళ్ళే దారిలో లాడ్జిలకు కొదవే లేదు.

పర్భని పర్యాటకం

2013-11-16T13:14:00.001+05:30

పర్భని మహారాష్ట్ర మరట్వాడా రీజియన్లో ఒక పట్టణం.
హైదరాబాదునుంచి ఇక్కడికి రైలు సదుపాయం ఉంది.

పర్భనిలో చూడదగ్గ ప్రదేశాలు పరదేశ్వర్ మందిరం, మోటా మారుతి మందిరం.

మోటా మారుతి మందిరం ఒక చెట్టు కింద పైన ఎటువంటి సీలింగ్ లేకుండా ఉంటుంది.

పరదేశ్వర్ మందిరంలో పరమేశ్వరుడు పాదరసంతో తయారు చేసిన లింగ రూపంలో కొలువై అందంగా ఉంటుంది.

మహరాష్ట్రలోని ముఖ్యమైన పర్యటక ప్రాంతాలైన ఔండ్ నాగ్‌నాథ్ జ్యోతిర్లింగం, లోనార్ క్రాటర్ , నాందేడ్, పత్రి మొదలగు ప్రాంతాలకు వెళ్ళటానికి పర్భని ఒక మజిలి.

పర్భనిలో బస చేయటానికి వసతి సదుపాయాలు ఉన్నాయి.

సాయి జన్మస్థాన మందిరం పత్రి

2013-07-29T10:30:00.000+05:30

సాయిబాబా పుట్టిన పత్రి గ్రామంలోని ఆయన జన్మించిన ఇంటి స్థానంలో కట్టిన మందిరమే సాయి జన్మస్థాన్ మందిర్.

పత్రి, పర్భని నుంచి 45 కి.మీ దూరంలోను, సేలు నుంచి 22 కి.మీ దూరంలోను, మన్వత్ రోడ్డు స్టేషన్ నుంచి 17 కి.మీ దూరలోను ఉంది. హైదరాబాద్ నుంచి ఔరంగాబాద్ పాసింజర్ ఎక్కి లేదా ఇతర రైళ్ళ ద్వారా పర్భనిలో గాని, మన్వత్ రోడ్ స్టేషన్్‌లో గాని, సేలులో గాని దిగి అక్కడి నుంచి బస్సుల ద్వారా పత్రి చేరుకోవచ్చు.

పత్రి బస్ స్టాండ్

సాయి మందిరం

భక్తి నివాస్ - ప్లాన్

క్రింద, ప్రస్తుతం ఉన్న భక్తి నివాస్. ఇది మందిర ప్రాంగణంలొనే ఉంది. ప్రస్తుతం ఇక్కడ 200 మందికి వరకు వసతి సదుపాయానికి వీలు ఉంది. దీనిని మరింత పెంచటానికి చూస్తున్నారు. భక్తులు ఆలయ ప్రాంగణంలొనే ఉన్న భక్తి నివాస్ వసతి గృహంలో ఉండవచ్చు మరియు అక్కడే ఉన్న ప్రసాదాలయంలో భోజన సదుపాయం పొందవచ్చు.

భూగృహంలోని ధ్యాన మందిరం.

డొనేషన్ వివరాలు

ఆలయంలోని సాయి విగ్రహం

మందిర నిర్మాణ సమయంలో దొరికిన సాయి బాబా జన్మించిన ఇంటిలోని వస్తువులు మరియు ఇంటి పునాదులు.

ఆలయం లోపలి భాగం

మరిన్ని వివరాలకు ఈ క్రింది ఇమేజ్‌లో ఉన్న వెబ్ సైటులను చూడండి. లేదా నాకు ఒక కమెంటు వ్రాయండి.

సాయి భక్తులు తప్పక దర్శించదగిన ప్రాంతం, సాయి జన్మస్థాన మందిరం పత్రి. ఓం సాయిరాం.

గురు రాఘవేంద్ర బృందావనం మంత్రాలయం ఫోటోలు

2013-04-28T10:00:00.000+05:30

బృందావన గోపురం

మాంచాలమ్మ వారి సన్నిధి

గజ వాహన సేవ

బంగారు వాహన సేవ

ఆలయానికి వెళ్ళే దారి

ఊయల సేవ

మధుర గాయకుడు ఏ.ఎం.రాజా

2013-04-11T01:00:00.000+05:30

మల్లీశ్వరి, పాతాళ భైరవి, దేవదాసు చిత్రాల విజయంతో సంగీత పరంగా ఘంటసాల గానమాధుర్యంలో ఆంధ్ర దేశమంతా పరవశిస్తున్న కాలంలో చల్లని మలయ పవనంలా సినీ సంగీత ప్రపంచంలో ప్రవేశించి, స్వరమాధుర్యంతో తనదంటూ ఒక ప్రత్యేకశైలిని శ్రోతల హృదయాల్లో ప్రతిష్టింపచేసిన మధుర గాయకుడు ఎ.ఎం.రాజా (అనిమేల మన్మధరాజ).
1954లో విడుదలయిన మూడు చిత్రాలు ‘ప్రేమలేఖలు’, ‘అమర సందేశం’, ‘విప్రనారాయణ’పై అంశాన్ని రుజువుచేశాయని చెప్పవచ్చు.
షోమాన్ ఆఫ్ ది సిల్వర్ స్క్రీన్ రాజ్‌కపూర్ హిందీలో నిర్మించిన ‘‘ఆహ్’’ తెలుగు వర్షన్ ‘‘ప్రేమలేఖలు’’. ఈ చిత్రంలో ‘‘నీవెవ్వరవో చిరునవ్వులలో’’ ‘‘విధి రాకాసి కత్తులు దూసి’’ గీతాలు రాజ్‌కపూర్ స్వయంగా ఆలపించిన అనుభూతిని ప్రేక్షకులకు కలిగించారు రాజా. ఈ చిత్ర విజయానికి ఆయన స్వరం ఓ వరంగా మారింది. సంగీత ప్రధాన చిత్రం ‘‘అమర సందేశం’’లో ‘‘ఆనతి కావలెనా’’, ‘‘దయామయి శారద’’, పోటీ పాట ‘‘మానసలాలస సంగీతం’’రసజ్ఞుల ప్రశంసలు అందుకున్నాయి. ఇక విప్రనారాయణ చిత్రానికి కారణాలేవయినా కాని ఘంటసాల వారిని కాదని ఎ.ఎం.రాజాకు అవకాశమిచ్చారు భానుమతి, రామకృష్ణలు. ఈ చిత్రంలో ఒక భక్తుని హృదయావిష్కరణను ‘‘పాలింపరా రంగా’’, ‘‘చూడుమదే చెలియా’’ గీతాల్లోనూ, అన్యోన్య అనురాగాన్ని ‘‘మధుర మధురమీ చల్లనిరేయి’’, విరహాన్ని ‘‘అనురాగాలు దూరములాయేనా’’ అంటూ అక్కినేని స్వరధర్మానికి తగినట్టు ఆలపించి వాటిని చిరస్మరణీయం చేశారు రాజా.
ఇక రాజా గురించి ఫ్లాష్‌బ్యాక్‌లోకి వెడితే... 1929 జూలై 1వ తేదీన చిత్తూరు జిల్లా రామచంద్రాపురంలో లక్ష్మమ్మ, మన్మధరాజు దంపతులకు జన్మించారు ఎ.ఎం.రాజా. మద్రాస్‌లో బి.ఏ. పూర్తిచేశారు. కాలేజీ రోజులనుంచి సంగీత కార్యక్రమాల్లో ప్రతిభ చూపుతున్న రాజాను ఓ సంగీత కార్యక్రమంలో చూసి ముగ్ధులైన జెమినీ వాసన్ తొలిసారి ‘సంసారం’ (1951) తమిళ చిత్రం ద్వారా గాయకునిగా అవకాశం కల్పించారు. 1952లో ‘ఆదర్శం’చిత్రం ద్వారా తెలుగు చిత్రసీమలో ప్రవేశించారు. నటుడు జగ్గయ్య కూడా ఈ చిత్రం ద్వారానే పరిచయమయ్యారు.
ఆనాటినుంచి తమిళ తెలుగు, మలయాళ, కన్నడ భాషల్లోనూ, శ్రీలంకలో నిర్మించిన సింహళ చిత్రాల్లోనూ వందలాది గీతాలు ఆలపించారు. పదులకొద్ది చిత్రాలకు సంగీత దర్శకత్వం వహించారు.
తమిళంలో నటులు యం.జి.రామచంద్రన్, శివాజీ గణేశన్, జెమినీ గణేశన్‌లకు కన్నడ నటులు రాజ్‌కుమార్‌కు ఎన్నో పాటలు పాడిన ఎ.ఎం.రాజా హిందీలో ‘‘బహుత్ దిన్ హుయే’’ చిత్రం ద్వారా దక్షిణాది నుంచి ప్లేబాక్ పాడిన తొలి గాయకునిగా గుర్తింపు తెచ్చుకున్నారు.
గాయని జిక్కి (పి.జి.కృష్ణవేణి)ని ప్రేమించి పెళ్ళిచేసుకున్నారు రాజా. వీరిరువురి కాంబినేషన్ అనేక గీతాలు శ్రోతలనలరించాయి.
తెలుగులో రాజా రెండు చిత్రాలకు సంగీత దర్శకత్వం వహించారు. అవి ‘శోభ’, ‘పెళ్ళికానుక’. పెళ్ళికానుక పాటలన్నీ (పులకించని మది పులకించు, వాడుక మరిచెదవేల, ఆడేపాడే పసివాడా) ఎంతో ప్రజాదరణ సాధించాయి.
ఎన్.టి.ఆర్.కు ‘మిస్సమ్మ’ చిత్రంలో రాజా ఆలపించిన గీతాలన్నీ ఆణిముత్యాలే. ‘‘బృందావనమది అందరిది’’, ‘‘ఆడువారి మాటలకు అర్థాలే వేరులే’’ ఎన్నదగినవి. విజయావారి ‘‘అప్పుచేసి పప్పుకూడు’’ చిత్రంలో ఘంటసాలతో కలిసి ‘‘సుందరాంగులను చూచిన వేళల’’, ‘చిన్నారి చూపులకు ఓ చందమామ’’, ‘‘మూగవైననేమిలే’’, ‘‘చేయి చేయి కలుపరావే’’ జగ్గయ్యకు ప్లేబాక్ పాడగా, ‘వీరకంకణం’ చిత్రంలో హీరో ఎన్.టి.ఆర్.కు ‘‘కట్టండి వీరకంకణం’’, ‘‘అందాల రాణి ఎందుకోగాని’’ పాడగా, విలన్ పాత్రధారి జగ్గయ్యకు ఘంటసాల పాడడం ఓ విశేషం. ‘వెన్నెల పందిరిలోనా’’ ‘‘యవ్వన మధువనిలో’’ (బంగారుపాప) ‘‘ప్రియతమా మనసు మారునా’’ (ఆలీబాబా 40 దొంగలు) మరపురానివి.
‘‘పక్కింటి అమ్మాయి’’ చిత్రంలో హీరో స్నేహితునిగా నటించారు. ‘‘కలయేమో ఇది నా జీవిత ఫలమేమో’’ అని ఆలపించారు.
వీరికి ఎక్కువ ప్రోత్సాహమిచ్చిన సంగీత దర్శకులు కె.వి.మహదేవన్, సత్యం. రాజా చివరిగా 1970లో విడుదలయిన ‘పుట్టినిల్లు మెట్టినిల్లు’ చిత్రంలో ఓ పాట పాడారు.
తన భార్య జిక్కి పాడాలంటే తాను కూడా ఆ చిత్రంలో పాడాలనే నిబంధన పెట్టడంవల్ల ఇద్దరికీ అవకాశాలు సన్నగిల్లాయి. నిక్కచ్చి మనస్థత్వం, సూటిగా మాట్లాడ్డంవల్ల చిత్రసీమలో రాణించలేకపోయినా తన ప్రత్యేకతను నిలబెట్టుకున్న మధుర గాయకుడు ఎ.ఎం.రాజా. 1989లో రైలు ఎక్కబోతూ జారిపడి ప్రమాదవశాత్తూ మరణించారు.

కొండగట్టు ఆంజనేయస్వామి ఆలయం ఫోటోలు

2013-02-10T10:00:00.000+05:30

కొండగట్టు ఆంజనేయస్వామి దేవాలయం కరీంనగర్ జిల్లాలో ఉంది. సికిందరాబాద్ జూబ్లి బస్ స్టాప్ నుంచి కరీంనగర్ వెళ్ళి అక్కడ్నుంచి జగిత్యాల వెళ్ళే బస్సు ఎక్కి కొండగట్టులొ దిగొచ్చు. లేదంటే డైరెక్ట్ జగిత్యాల వెళ్ళే బస్సు ఎక్కి కొండగట్టులొ దిగొచ్చు. అన్ని ఎక్స్‌ప్రెస్స్ బస్సులు ఇక్కడ ఆగుతాయి.

కొండగట్టు కొండ మీదకి వెళ్ళటానికి జీపులు ఉంటాయి.

ఇక్కడ వసతికి ఎటువంటి ఇబ్బంది లేదు. కొండ మీద, కొండ కింద వసతి సదుపాయాలు ఉన్నాయి.

గుడి దగ్గర అడుగడుగున వానరాలు ఉంటాయి. ఏ మాత్రం ఏమరపాటుగా ఉన్నా మీ దగ్గర ఉన్న వస్తువులు లాక్కునిపోతాయి. సికిందరాబాద్ నుంచి పొద్దున బయలుదేరితే సాయంత్రానికి వచ్చేయవచ్చు.

కొమురవెల్లి ఫోటోలు

2012-12-03T10:30:00.000+05:30

కొమురవెల్లి మల్లన్నగా భక్తులు కొలుచుకొనే మల్లికార్జున స్వామి ఆలయం కొమురవెల్లిలో ఉంది. ఇది హైదరాబాదునుంచి సిద్దిపేటకి వెళ్ళే దారిలో ఉంది. మెయిన్ రోడ్డులో ఉన్న ఈ ఆర్చ్ నుంచి 5 కిలోమీటర్లు లోపలికి వెళ్ళాలి.ఇక్కడి నుంచి షేర్ ఆటోలు ఉంటాయి.

సికిందరాబాద్ జెబిఎస్ నుంచి సిద్దిపేట వెళ్ళలే బస్సులో ఎక్కి ఈ ఆర్చ్ దగ్గర దిగి వెళ్ళోచ్చు. సికిందరాబాద్ జెబిఎస్ నుంచి కొమురవెల్లి డైరెక్ట్ బస్సు కూడా ఉంది.

ఇక్కడ పరమశివుడు లింగ రూపంలో కాకుండా విగ్రహరూపంలో కొలువై ఉన్నాడు.

ఇక్కడ స్టే చెయ్యటానికి వసతి సదుపాయం ఉంది.

కొమురవెల్లి గ్రామం

కొమురవెల్లి వెళ్ళే దారి

అయినవిల్లి టెంపుల్ ఫోటోలు

2012-11-17T10:41:00.000+05:30

అయినవిల్లి వెళ్ళటానికి అమలాపురం బస్ స్టాండ్ నుంచి ముక్తేశ్వరం వెళ్ళే బస్సులు లేదా షేర్ ఆటోలలో ప్రయానించి ముక్తేశ్వరం చేరుకోవాలి.

ముక్తేశ్వరం నుంచి అయినవిల్లి 1 కిలోమీటరు. షేర్ ఆటోలు ఉంటాయి.

ఇక్కడ మొక్కుకొనేటప్పుడు ఒక కొబ్బరికాయ కొట్టి మొక్కుకోవాలి. మొక్కు తీరిన తరువాత తొమ్మిది కొబరికాయలు కొట్టాలి.

ఉచిత అన్నదాన కార్యక్రమం కూడా ఇక్కడ ఉంది. ఉదయం 10 నుంచి మధ్యానం 2 గంటలవరకు ఉచిత అన్నదానం కార్యక్రమం నిర్వహిస్తారు. భోజనం చాలా రుచిగా ఉంటుంది. దీనికి గుడిలో టోకెన్ తీసుకోవాలి.

గుడికి 2 కిలోమీటర్ల దూరంలో రిసార్ట్స్ సదుపాయం ఉంది. లేదంటే అమలాపురంలో బస చేయవచ్చు.

మహానంది ఫొటోలు, విశేషాలు

2012-09-24T10:00:00.000+05:30

పరమశివుడు మహానందీశ్వరుడుగా కొలువై ఉన్న క్షేత్రం మహానంది. ఇది నంద్యాల పట్టణానికి 15 కి.మీ దూరంలో ఉంది.

ఇదే మహానంది ముఖద్వారం. ఇక్కడ శివున్ని మనం స్పర్శ దర్శనం ద్వారా తాకి పూజించవచ్చు. కాని దీనికి ప్రత్యేక రశీదు తీసుకోవాలి. స్పర్శ దర్శనం చేసుకొవాలంటే మగవారు చొక్కా లేకుండా గర్భగుడిలోనికి ప్రవేశించాలి.
ఈ శివలింగం కిందనుంచి నిరంతరం జలం నీళ్ళు ఉధ్భవిస్తుంటాయి. ఈ నీరు బయట ఉన్న ప్రధాన కోనేరు లోనికి వస్తాయి. ఈ ప్రధాన కోనేరులోని నీరు చాలా స్వచ్చంగా ఉంటుంది. ఈ కోనేరులో స్నానం చేస్తే అన్ని పాపాలు పోతాయని భక్తుల నమ్మకం.

కాని ఇందులోకి కొన్ని వేళల్లో మాత్రమే అనుమతిస్తారు.కాని ఆలయ మండపం బయట మరో రెండు కొనేర్లు ఉన్నాయి. ప్రధాన కోనేరులోని నీరు ఈ రెండు కొనేరులలోనికి వస్తుంది. ఈ రెంటిలో అన్ని వేళలా భక్తులకు స్నానానికి అనుమతి ఉంది.

ఈ రెండు కొనేరులలోని నీరు తరువాత చుట్టుపక్కల పంటపొలాలకి ప్రవహిస్తుంది. అందుకే మహానంది చుట్టుపక్కల పచ్చని పంటపొలాలతో, అరటి తోటలతో చాలా పచ్చగా ఉంటుంది. ఇక్కడ మహానందితో పాటు మరో ఎనిమిది గుడులు ఉన్నాయి. వీటినన్నిటి కలిపి నవనంది క్షేత్రాలు అంటాలు. ఇవన్ని మహానంది చుట్టుపక్కలే ఉంటాయి. ఒక పూటలో అవన్ని చుట్టి రావచ్చు. వాటిలో ఒకటైన వినాయకనంది మహానంది ఆలయం ప్రాంగణంలొనే ఉంటుంది.

ఇక్కడ వసతి సదుపాయానికి సత్రాలు ఉన్నాయి. లేదంటే నంద్యాలలో స్టే చెయ్యొచ్చు.

వీరబ్రహ్మంగారు నడయాడిన బనగానపల్లి ఫొటోలు

2012-08-16T10:48:00.004+05:30

యాగంటికి వెళ్ళే దారిలో పోతులూరి వీరబ్రహ్మేంద్ర స్వామివారు నడయాడిన బనగానపల్లిలోని ఉంది. బనగానపల్లినుంచి యాగంటి 10 కి.మీ.

బ్రహ్మం గారు నివసించిన గరిమిరెడ్డి అచ్చమాంబ గారి ఇల్లు. ఇక్కడ చెట్టు కిందే కాలజ్ఞాన తాళపత్రాలు నిక్షిప్తం చేశారు. ఇంటిని మ్యూజియంగా మార్చారు.

బ్రహ్మం గారి జీవితానికి సంబందించిన విశేషాలు ఇక్కడ చూడొచ్చు. బ్రహ్మం గారు ఇక్కడ నుంచే రోజు రవ్వలకొండకు ఆవులను తోలుకు వెళ్ళి అక్కడ వాటిని కట్టి, అక్కడి గుహలో కాలజ్ఞానం రాసేవారు.

రవ్వలకొండ ప్రాంతం. ఈ చెట్టు కిందే ఆవులను కట్టేవారు.

ఎండిపోయిన బావి

బ్రహ్మం గారు కాలజ్ఞానం రాసిన గుహకి దారి.

గుహకి వెళ్ళటానికి ఇక్కడ టికెట్ తీసుకోవాలి. టికెట్ ఖరీదు 2 రూ.

గుహలోకి వెళదాం

ఈ గుంట స్వామి వారు స్నానం చేయటానికి వాడినది.

గుహలోనుంచి శ్రీశైలం, మహనంది, యాగంటి వెళ్ళటానికి దారులు ఉన్నాయి. ఈ దారి వెంబడి స్వామి వారు ఆ ప్రాంతాలకి వెళ్ళేవారు.

ఇక్కడ నుంచే అచ్చమాంబగారు స్వామివారు కాలజ్ఞానం రాయటం చూశారు.

బ్రహ్మం గారు కాలజ్ఞానం రాసిన ప్రాంతం

బనగానపల్లిలో స్టే చెయ్యటానికి ప్రెవేట్ లాడ్జులతో పాటు బ్రహమంగారి మఠం వారి వసతి గృహాలు ఉన్నాయి. మఠం వారి వసతి గృహాలు అచ్చమాంబగారి ఇల్లు, రవ్వలకొండ ప్రాంతాల్లో ఉన్నాయి. అచ్చమాంబగారి ఇంటి దగ్గర ఉన్న వసతి గృహాలు ఇవే. ఇక్కడ ఏసి సదుపాయం కూడా ఉంది.

ఎర్రమల కొండల్లో యాగంటి క్షేత్రం

2012-07-09T10:21:00.003+05:30

ఈ క్షేత్రం బనగానపల్లి నుంచి 10 కి.మీ, నంద్యాల నుంచి 50 కి.మీ దూరంలో ఉన్నది.

అందమైన ఎర్రమల కొండల్లో అలరారుతున్న పుణ్యక్షేత్రం యాగంటి. అగస్త్య మహాముని తపస్సుకి మెచ్చి ఇక్కడ పరమేశ్వరుడు పార్వతీదేవి సహితంగా ఏకశిలపై వెలిశారు.

ఎర్రమల కొండలు

ప్రధాన ఆలయ గోపురం

ఎర్రమల కొండలనుంచి వచ్చిన నీరు ఇక్కడ కొనేరుగా ఏర్పడింది. ఈ నీటిని స్వామివారి అభిషేకానికి వాడతారు.

కింద బొమ్మలో ఉన్నది వెంకటేశ్వర గుహ.అగస్త్య మహాముని ప్రతిష్ఠించ తలపెట్టిన వెంకటేశ్వరస్వామి విగ్రహం పాదముయొక్క గొరు విరిగి పోవుటచే ప్రతిష్టకి అనర్హముగా భావించి ఈ గుహలో భద్రపరిచారు.

ఈ క్షేత్రంలో శనికి , కాకులకి ప్రవేశం లేదు. దానికి సంబందించిన వివరాలు కింద ఉన్న బొమ్మలో చూడొచ్చు. బొమ్మమీద క్లిక్ చేయండి.

కింద ఉన్నదే అగస్త్య మహర్షి తపస్సు చేసిన గుహ. దీనినే రోకళ్ళ గుహ అంటారు.
ఈ గుహలో ఉన్న శివలింగం ముందు నూనె దీపం పెడితే శని ప్రభావం ఉండదని నమ్మకం.

కింద బొమ్మలో ఉన్నది శంకర గుహ.ఇక్కడే పోతులూరి వీరబ్రహ్మేంద్రస్వామి వారు తన శిష్యులకి జ్ఞానోపదేశం చేశారని చెప్తారు.

యాగంటి నందికి సంబందించిన విశేషాలు కింద ఉన్న బొమ్మలో చూడొచ్చు. బొమ్మమీద క్లిక్ చేయండి.

ఇదే యాగంటి నంది

మరిన్ని వివరాలకు ఈ కింది బొమ్మల మీద నొక్కి చూడండి.

మహేష్‌బాబు బ్రాండ్ బీడిలు

2012-07-05T10:30:00.004+05:30

దూకుడులో మహేష్‌బాబు బ్రహ్మానందన్ని వాడుకున్నట్టు ఇక్కడ మహేష్‌బాబుని బీడి కంపెనీలు వాడుకున్నాయి. ఇది మహేష్ చూస్తే ఎలా ఫీల్ అవుతాడో.

50 వసంతాల గుండమ్మ కథ

2012-06-03T10:21:00.008+05:30

శ్రీశైలం ఫొటోలు

2012-03-05T10:09:00.003+05:30

వరంగల్ వేయిస్తంభాలగుడి

2012-02-26T10:30:00.002+05:30

విలక్షణ సంగీత దర్శకుడు సుసర్ల

2012-02-18T13:47:00.008+05:30

భారతదేశంలో నెంబర్ వన్ గాయకురాలు లతామంగేష్కర్ చేత తెలుగు పాట పాడించిన సుసర్ల దక్షిణామూర్తి తెలుగు చలనచిత్ర సంగీత చరిత్రలో తనకొక ప్రత్యేక స్థానాన్ని తొలి చిత్రం నుండే సంపాదించుకున్నారు. ఘంటసాల, రాజేశ్వరరావు వంటి సంగీత దర్శకులు తెలుగు చిత్ర పరిశ్రమని ఏలుతున్న సమయంలో ‘సంసారం’, ‘సంతానం’, ‘ఇలవేల్పు’ వంటి చిత్రాలకు విలక్షణమైన తన సొంత బాణీలో సంగీతం సమకూర్చి సుసర్ల తన ప్రత్యేకతని చాటుకున్నారు.
అందరు వినియోగించే రాగాలనే ఒక భిన్నమైన కోణంలో వినియోగిస్తూ పాటలకి బాణీలు సమకూర్చడం సుసర్ల శైలిలో ప్రత్యేకత. ‘సంసారం’ చిత్రంలో ‘శివరంజని’ రాగంలో ఆయన స్వరపరచిన ‘చిత్రమైనది విధి నడక’లో పల్లవి, మూడు చరణాలలోను ‘విర్రవీగుట వెర్రి కాని’, ‘తల్లితండ్రి గురువుతానై’ తప్పునా సామాన్యులకు’ వంటి సాహిత్య సంబంధమైన ఎగుడుదిగుడులు సంగీతంలో చాలా ప్రమాణాత్మకంగా నిర్వహించి సుసర్ల ధన్యులయ్యారు. ఈ మాటల్ని ఆయన ఎలా పాడించారో పాట ఒకసారి వింటే అర్థమవుతుంది. అలాగే ‘సంసారం’ చిత్రం టైటిల్ సాంగ్ ‘సంసారం సంసారం ప్రేమసుధా పూరం నవజీవన సారం’, ‘సంతానం’ చిత్రంలో ‘చల్లని వెనె్నలలో’ పాటలు కల్యాణి రాగాన్ని ప్రయోగాత్మకంగా ఒక భిన్న కోణంలో సుసర్ల వినిపించారు. ‘ఇలవేల్పు’ చిత్రంలో భీంపలాసి (అభేరి) రాగంలో స్వరపరచిన ‘చల్లనిరాజా ఓ చందమామా’ అలాగే‘్భపాల’రాగంలో స్వరపరచిన ‘కనుమూసినా కనిపించే నిజమిదేరా.’ ‘నర్తనశాల’ చిత్రంలో ‘నాట’ రాగంలో స్వరపరచిన ‘జనగణ నాయక’ (బిలావల్) (శంకరాభరణం) రాగంలో స్వరపరచిన ‘సరసాలు పులకింప’ పాటలు కూడా స్వరకల్పనలో ఆయన విలక్షణతకి చక్కని ఉదాహరణలు. రొటీన్‌గా రాగాలలో వచ్చే ప్రేజెస్ కూకుండా భిన్నమైన ప్రేజెస్ వాడడం, పాట ఎత్తుబడిలో భిన్నత్వం సుసర్ల సృజనాత్మకతకి, విలక్షణతకి గుర్తు. పాటని జాగ్రత్తగా వింటే గాని రాగాన్ని గుర్తుపట్టడం కష్టం. సుసర్లకి హిందుస్తానీ సంగీతంలో మంచి పట్టు ఉందనడానికి చక్కని ఉదాహరణలు. ‘సంతానం’ చిత్రంలో లత పాడిన ‘నిదురపోరా తమ్ముడా’, ‘నర్తనశాల’ చిత్రంలో ‘సఖియా వివరించవే’, ‘సరసాలు పులకింప’ పాటలు. ‘నిదురపోరా తమ్ముడా’ పాట పల్లవి, మొదటి చరణం ‘ఖమాజ్’ (హరికాంభోజి) రాగంలో స్వరపరచి అందులోంచి బసంత్ ముఖారి రాగంలోకి జారి (గ్లిదిన్ జి) ‘జాలి తలచి కన్నీరు తుడిచే’ ‘బసంత్ ముఖారి’ రాగంలో పాడి మళ్లీ ఖమాజ్‌లోకి జారడం ఒక చక్కని ప్రయోగం. అలాగే ‘గోరఖ్ కళ్యాన్’ రాగంలో స్వరపరచిన ‘సఖియా వివరించవే’ బసంత్ ముఖారిలో స్వరపరిచిన ‘సరసాలు పులకింప’ సుసర్ల ప్రయోగసీలతకి, సృజనాత్మకతకి, విలక్షణతకి చక్కని ఉదాహరణలు. సుసర్ల మనం మరచిపోయిన మధుర గాయకుడు రఘునాథ్ పాణిగ్రాహి చేత ‘ఇలవేల్పు’లో చక్కని పాటలు పాడించారు. ‘చల్లని రాజా ఓ చందమామ’ పాటలో మూడవ వంతు మాత్రమే పాడినా పాణిగ్రాహి తనదంటూ ఒక ముద్ర వేయగలిగారు. ఆయన పాడిన ఏనాడు కనలేదు ‘నీ వంటి సుందరి’ చాలా మంచి పాట. సుసర్ల సంగీత జీవితంలో మైలురాయి ‘నర్తనశాల’. ఈ చిత్రంలో ‘సలలిత రాగ సుధారస సారం’, ‘జనని శివకామిని’ (దర్బారీ కనడ) ‘నరవరా ఓ కురువర’ (అసావేరి/నట భైరవి) వంటి పాటలు ‘్ధన్యాసిరాగంలో’ సుశీల పాడిన ‘హే గోలక’, ‘కల్యాణి’ రాగంలో ఘంటసాల పాడిన ‘ఎవ్వాని వాకిట’ వంటి పద్యాలు ఈనాటికీ శ్రోతల్ని అలరిస్తూనే ఉన్నాయి.
చలనచిత్ర సంగీతం వాద్య గోష్టి (ఆర్కెస్ట్రేషన్)లో ఒక కొత్త వరవడి సృష్టించిన ముంబై సంగీత దర్శకుడు శంకర్ (శంకర్, జైకిషన్ జోడిలో ఒకరు)తో కలసి పనిచేయడంవల్ల సుసర్ల వాద్యగోష్టి కూడా ప్రత్యేకతని సంతరించుకుంది అనడానికి ‘సరసాలు పులకింప’, ‘సఖియా వివరించవే’‘ పాటలే నిదర్శనం.
సంగీత జ్ఞానం, సృజనాత్మకత, ప్రయోగశీలత్వం, ఒరిజినాలిటీ వంటి లక్షణాలన్నీవున్నా బహుశా కర్మఫలమేమో చక్రవర్తి వంటి సంగీత దర్శకుడి వద్ద దక్షిణామూర్తిగారు వయొలెనిస్ట్‌గా పనిచేయాల్సి వచ్చింది. చిత్రమైనది విధి నడక (సంసారం చిత్రంలోని పాట).
ఈరోజు సుసర్ల దక్షిణామూర్తిగారు భౌతికంగా మనమధ్య లేకపోయినా ఆయన సృజించిన పాటలవల్ల ఆయన చిరంజీవే!

శ్రీకూర్మం

2012-02-14T09:58:00.005+05:30

శ్రీకూర్మం శ్రీకాకుళం పట్టణానికి 15 కి.మీ దూరంలో ఉంది. శ్రీకాకులం నుండి శ్రీకూర్మం వెళ్ళటానికి బస్సులు , షేర్ ఆటోలు రెగులర్గా ఉంటాయి. మిగిలిన వివరాలు కింది ఫొటొల్లో చూడండి.

కాకినాడ గోకులం

2012-02-06T11:29:00.007+05:30

ఈ ఆలయం కాకినాడలోని అశోక్‌నగర్లో ఉంది.
బస్ స్టాండ్ మరియు రైల్వే స్టేషన్ నుంచి 2 కి.మీ దూరం.

శ్రీముఖలింగం చూసొద్దాం

2012-01-26T10:39:00.004+05:30

శ్రీముఖలింగం శ్రీకాకుళం జిల్లాలోని జలమూరు మండలంలోని ఒక గ్రామము. ఇది శ్రీకాకుళం పట్టణానికి 45 కి.మీ దూరంలో ఉంది. పురాతనమైన ఈ ఆలయాన్ని ఒరిస్సా రాజులు కట్టించటం వల్ల ఈ గుడి చూడటానికి ఒడిసా స్టైల్లో చాలా అందంగా ఉంటుంది.

ఇక్కడ బస చేయటానికి ఉండదు. ఈ గుడి చూడాలనుకుంటే శ్రీకాకుళం పట్టణంలో బస చేయాలి.ఇక్కడికి వెళ్ళటానికి శ్రీకాకుళం బస్‌స్టాండ్ నుంచి ప్రతి 45 నిమషాలకి ఒక బస్సు ఉంది.

గుడిలో శివలింగం ముఖాకృతిలో ఉండటం వల్ల ఈ లింగానికి శ్రీముఖలింగం పేరు వచ్చింది. లింగంలో పొడవైన ముక్కుని మనం చూడవచ్చు. మధ్యలో ప్రధన ఆలయం, చుట్టూ ఇతర ఆలయాలు ఉంటాయి.

మారుమూల అవ్వటం వల్ల పెద్దగా జనాదరణ లేక ప్రసిద్ది చెందలేదనిపిస్తుంది. అద్భుతమైన శిల్పకళ ఉన్న ఈ ఆలయన్ని ప్రతి ఒక్కరు తప్పక దర్శించాలి. మీరు శ్రీకాకుళం వెళితే మాత్రం ఈ గుడిని తప్పక దర్శించుకోండి. శ్రీకాకుళం పట్టణానికి దగ్గరలోనే అంటే 3 కి.మీ దూరంలో అరసవిల్లి మరియు 15 కి.మీ దూరంలో శ్రీకూర్మం క్షేత్రాలు ఉన్నాయి.

ప్రధాన ఆలయం

ప్రధాన ఆలయంలోని ఉపాలయం

ప్రధాన ఆలయ ముఖద్వారం

ఆలయంలోని శిల్పకళ

సాయంసంధ్యలో ఆలయం

అరసవిల్లి సూర్యదేవాలయం

2012-01-23T10:00:00.002+05:30

మొన్న డిసెంబర్లో అరసవిల్లి, శ్రీకూర్మం, శ్రీముఖలింగం మరియు సింహాచలం చూసి వచ్చాం. అప్పుడు నా మొబైల్లో తీసిన అరసవిల్లి ఫొటోలు. అరసవిల్లి శ్రీకాకుళం బస్‌స్టాండ్కి రెండు నుంచి మూడు కిలోమీటర్ల దూరంలో ఉంది. షేర్ ఆటొలో మనిషికి 7 రూపాయలు. సూర్యదేవుని విగ్రహం మంచి కళతో ఉంది.

అసలైన హాస్యానికి చిరునామా

2012-01-06T20:11:00.006+05:30

నవ్వడం ఒక భోగం, నవ్వించడం ఒక యోగం, నవ్వలేకపోవడం ఒక రోగం’ అంటూ నవ్వుకు సరికొత్త నిర్వచనం చెప్పిన ‘జంధ్యాల’ పేరు వినగానే, ప్రతివారి పెదవులపై నవ్వు తొణికిసలాడుతుంది. ఆరోగ్యకరమైన హాస్యానికి చక్కని చిరునామా జంధ్యాల. తెలుగు చలనచిత్ర పరిశ్రమకు ఎక్కువ మంది ప్రతిభావంతులైన హాస్యనటులను అందించిన ఘనత కలిగిన దర్శకుడు జంధ్యాల.
తెలుగు సినిమా రంగంలో హాస్య దర్శకుడుగా తనకంటూ ఓ ప్రత్యేక ముద్రను సంపాదించుకున్న జంధ్యాల పశ్చిమగోదావరి జిల్లాలోని నరసాపురంలో 1951 జనవరి 14న జన్మించారు. జంధ్యాల నారాయణమూర్తి, సూర్యకాంతం వీరి తల్లిదండ్రులు. జంధ్యాల వెంకట దుర్గా శివసుబ్రహ్మణ్యశాస్ర్తీ అనేది ఈయన పూర్తి పేరు. విద్యాభ్యాసం మొత్తం విజయవాడలో కొనసాగింది. జంధ్యాల కాలేజి రోజులనుంచే నాటకాలు రాస్తూ, దర్శకత్వం వహించారు. స్వయంగా విన్నకోట రామన్నపంతులు ఆధ్వర్యంలో ఒక నాటక సంస్థ ప్రారంభించారు. మొదటి నాటకం ‘‘ఏక్ దిన్ కా సుల్తాన్’’ ఎంతో పేరుతెచ్చిపెట్టింది. తన నాటకాలే కాకుండా, ఇతరులు రాసిన నాటకాల్ని ప్రదర్శించి, ప్రముఖుల్ని సత్కరిస్తుండేవారు. జంధ్యాల రాష్టవ్య్రాప్తంగా అనేక నాటక పరిషత్తుల్లో పాల్గొని ఉత్తమ నటుడు, ఉత్తమ ప్రదర్శన అవార్డులు ఎన్నో పొందారు.
సినీ రంగంపై మక్కువతో మిత్రులు, శ్రేయోభిలాషుల ప్రోత్సాహంతో 1973లో మద్రాసులో అడుగుపెట్టారు. మొదటిసారిగా ‘‘పెళ్ళికాని పెళ్ళి’’ అనే సినిమాకు రచన చేసారు. అయితే ‘‘దేవుడుచేసిన బొమ్మలు’’ సినిమా ముందు రిలీజైంది. దాదాపు 140 సినిమాలకు రచయితగా పనిచేసారు. ఎక్కువ సినిమాలు హాస్యరస ప్రధానమైనవే. కె.విశ్వనాథ్, కె.రాఘవేంద్రరావు, ఎ.కోదండరామిరెడ్డి లాంటి ప్రముఖ దర్శకుల చిత్రాలకు రచనలు చేసారు. 1983లో ఏకంగా 80 సినిమాలకు మాటలు రాసారు. తెలుగు సినిమా చరిత్రలో ఇదొక రికార్డు. హాస్య చిత్రాలకు ఎంత చిలిపిగా రాసారో, ‘‘శంకరాభరణం’’లాంటి చిత్రాలకు అంత హృద్యంగా రాసారు.
1981లో ‘‘ముద్దమందారం’’ సినిమా ద్వారా దర్శకులుగా మారారు. ప్రదీప్, పూర్ణిమ హీరో హీరోయిన్లుగా చేసిన ఈ చిత్రం శత దినోత్సవం జరుపుకుంది. దర్శకులుగా 40 సినిమాలు రూపొందించారు. వీటిలో నాలుగు స్తంభాలాట, రెండుజెళ్ళ సీత, శ్రీవారికి ప్రేమలేఖ, ఆనందభైరవి, నెలవంక, రావుగోపాలరావు, శ్రీవారి శోభనం, రెండురెళ్ళఆరు, సీతారామకళ్యాణం, పడమటి సంధ్యారాగం, అహనాపెళ్ళంట, వివాహ భోజనంబు, చూపులు కలిసిన శుభవేళ, బావా బావా పన్నీరు, ప్రేమ ఎంత మధురం, బాబాయ్ హోటల్, ఓహో నా పెళ్ళంట లాంటి సినిమాలు విజయవంతమవడంతోపాటు దర్శకులుగా జంధ్యాలకు ఎంతో పేరు తెచ్చిపెట్టాయి. నరేష్, రాజేంద్రప్రసాద్ లాంటి కామెడీ హీరోలతోనే కాకుండా ఇమేజ్ చట్రంలో ఇరుక్కుపోయిన చిరంజీవి, బాలకృష్ణ, అక్కినేని నాగేశ్వరరావు లాంటి అగ్ర హీరోలతో కూడిన తనదైన ముద్రలో చిత్రాలు రూపొందించడం ఒక్క జంధ్యాలకే సాధ్యమైంది.
జంధ్యాల ఎందరో హాస్య నటుల్ని తెలుగు తెరకు పరిచయం చేసారు. బ్రహ్మానందం, వేలు, వీరభద్రరావు, గుండు హనుమంతరావు, శ్రీలక్ష్మి, కోట శ్రీనివాసరావులను సమర్థవంతమైన హాస్య కళాకారులుగా తీర్చిదిద్దారు. ‘‘నాలుగుస్తంభాలాట’’ సినిమాలో ‘‘సుత్తి’’ అనే పదాన్ని ప్రయోగించి, ఆ పదానికి ఎంతో ప్రాచుర్యం కల్పించారు. ఈ పదం ఇప్పటికీ జనసామాన్యంలో పదే పదే వినిపిస్తుంటుంది. అందులో నటించిన వేలు, వీరభద్రరావు ‘సుత్తిజంట’గా ఎంతో ప్రసిద్ధులయ్యారు. జంధ్యాల సినిమాల్లో ప్రత్యేక హాస్య పాత్రలు పోషించిన శ్రీలక్ష్మి హాస్య నటిగా తెలుగు తెరపై ఎంతోకాలం రాణించింది. ఎంతోమందిని పరిచయం చేసిన జంధ్యాల ‘‘ఆపద్బాంధవుడు’’ సినిమాలో నటించి, ఆ పాత్రకు ఎంతో వనె్నతెచ్చారు.
జంధ్యాల సినిమాల్లో సున్నితమైన హాస్యం ఉంటుంది. అది సుతారంగా తాకి మనసును గిలిగింతలు పెడుతుంది. ఇలాంటి హాస్యాన్ని సృష్టించి, హాస్యబ్రహ్మ అయిన జంధ్యాల 2001 జూన్ 19న తెలుగు ప్రేక్షకుల్ని విచార సాగరంలో ముంచి అనంత లోకానికి వెళ్ళిపోయారు. వెనుకటి తరం హాస్య రచయితలు పింగళి నాగేంద్రరావు, చక్రపాణి, సముద్రాల వంటి వారి బాటలో నడిచి, హాస్యాన్ని తన ఆయుధంగా నమ్మి, ఆరోగ్యవంతమైన హాస్యాన్ని తన చిత్రాల్లో చూపించిన జంధ్యాల, తెలుగువారి పెదవులపై చిరస్థాయిగా ఉంటారు.
జనవరి 14 జంధ్యాల జయంతి

మల్లెమాల

2011-12-17T10:10:00.002+05:30

మాట కరుకు.. మనసు సున్నితం.. ఈ వాక్యం అచ్చంగా సరిపోయే వ్యక్తిత్వం మల్లెమాల సుందరరామరెడ్డిది. ఇంత పెద్ద పేరు తెలియకున్నా.. ఎంఎస్ రెడ్డి అన్నా, మల్లెమాల అన్నా సినీ అభిమానులందరికీ సుపరిచితమే. ఆయన మనసులాగే భావాలు కూడా సున్నితం. అచ్చమైన పల్లెటూరు అమాయకత్వం, భోళాతనం ఆయనలో తొంగిచూసేది. ఉన్నది ఉన్నట్లు మాట్లాడడం మాత్రమే ఆయనకు చాతనైనది. మాటల్లో అచ్చమైన నెల్లూరు నుడికారం పలకరిస్తుంది. పాటలు, మాటల్లో మాత్రం లలితమైన పదాలు వాడేవారు. ‘తెల్లావారక ముందే పల్లె లేచింది..తనవారినందరినీ తట్టిలేపింది..పాడు చీకటికెంత భయమేసిందో పక్క దులుపుకుని ఒకే పరుగుతీసింది’- అంటూ ‘మంచుపల్లకి’ సినిమా పాటలో రాసిన వాక్యాలు చాలు ఆయన భావాలు ఎంత హాయిగా, సున్నితంగా వుంటాయో అర్థం చేసుకునేందుకు. మంచి సినిమాలు, మంచి పాటలు, మంచి మాటలకు ఆయన కేరాఫ్ అడ్రస్. లాభనష్టాలు తరువాత. నిజానికి మంచి సినిమాలే కానీ పెద్ద ‘హిట్’ చిత్రాలు తీసింది లేదని ఆయనే స్వయంగా అంగీకరించేవారు. తన కుమారుడు శ్యాంసుందరరెడ్డి నిర్మాత అయ్యాకే తమ సంస్థకు సరైన హిట్‌లు వచ్చాయని మొహమాటం లేకుండా చెప్పేవారు. ఆయన తన సినిమాలన్నింటిలో ‘ఏకలవ్య’ను ఎక్కువగా ఇష్టపడేవారు. అక్కడ కూడా ఏకలవ్యుడి అమాయకత్వం, గురువు అంటే అభిమానం వంటి లక్షణాలు ఆయనను ఆకట్టుకోవడమే అందుకు కారణం.
‘ఆత్మకథ’ కలకలం
ముక్కుసూటితనంతో ఉండడమే ఆయన జీవిత చరమాంకంలో కొన్ని వివాదాలకు గురిచేసింది. ‘ఇదీ నా కథ’ పేరిట నిర్మొహమాటంగా ఆయన రాసిన ఆత్మకథ తెలుగు సినీ పరిశ్రమలో ప్రకంపనాలు సృష్టించింది. కేవలం కొద్ది కాపీలను మాత్రం ఆయన స్వయంగా తన సన్నిహితులకు అందేలా చేసారు. పుస్తకం నిండా పలువురు సినీ ప్రముఖులకు సంబంధించి వివాదాస్పద వ్యాఖ్యలు వుండడమే ఇందుకు కారణం. బయటకు వచ్చిన కాపీల ఆధారంగా వివిధ మాధ్యమాల ద్వారా పుస్తకంలోని విషయాలు జనానికి చేరాయే తప్ప, పుస్తకాలు మాత్రం బహిరంగ మార్కెట్‌లో అమ్మకానికి లేకుండా పోయాయి. అలా ఓ నిర్మొహమాటి రాసిన ఆత్మకథ దాదాపు చీకటి కొట్లోనే ఉండిపోయింది.
ఎవరినీ వదల్లేదు.
నిర్మాతగా మల్లెమాల ఎనె్నన్నో ఆటుపోట్లను చవిచూశారు. అలుపెరుగని పోరాటం చేశారు. వృత్తిపరంగా ముళ్లబాటలు ఎదురైనా తాను నమ్ముకున్న రంగాన్ని మాత్రం వదులుకోలేదు. సినిమా ప్రపంచమంటే భారీగా సంపాదన, విలాసవంతమైన జీవితం కాదని, నిర్మాతకూ ఎన్నో కష్టాలుంటాయని ఆయన తన ఆత్మకథలో పలు విషయాలను నిస్సంకోచంగా ప్రస్తావించారు. నటీనటుల నుంచి దర్శకుల వరకూ అందరూ ఏదోరకంగా నిర్మాతను పీడించేవారన్నది ఆయన ఆవేదన సారాంశం. సినీ రంగంలో ఎంతటి ప్రముఖులైనా వారి వల్ల తాను ఎలాంటి ఇబ్బందులు పడ్డానోనన్న విషయాలను ఆయన కుండ బద్దలు కొట్టినట్లు ‘ఇదీ నా కథ’లో బహిర్గతం చేశారు. ఎన్టీఆర్, శోభన్‌బాబు, చిరంజీవి, రాజశేఖర్, జూనియర్ ఎన్టీఆర్, దర్శకుడు గుణశేఖర్.. ఇలా ఎవరినీ ఆయన వదిలిపెట్టలేదు.
ఆత్మకథ సంగతి పక్కనపెడితే, మనిషిగా మల్లెమాల చిత్రపరిశ్రమలో మంచి పేరే సంపాదించుకున్నారు. ఎన్టీఆర్, కృష్ణ,శోభన్‌బాబు, చిరంజీవి లాంటి అగ్రహీరోలందరితో సినిమాలు నిర్మించారు. అటు పౌరాణికాలు, ఇటు సాంఘికాలు సమానంగా నిర్మించారు. అన్ని పాత్రల్లో పిల్లలనే నటింపచేస్తూ రామాయణం నిర్మించారు. దాదాపు ఇటు వంటి ప్రయత్నం ప్రపంచ సినీ చరిత్రలోనే మొదటిది. ఈ చిత్రంతోనే జూనియర్ ఎన్టీఆర్‌ను వెండితెరకు పరిచయం చేసారు. ఎందరో నటులను, సాంకేతిక నిపుణులను సినిమా రంగానికి పరిచయం చేయడంలో ఆయన చొరవచూపారు. తన సినిమా పాటలన్నింటిలో సంగీత సాహిత్యాలకు పెద్దపీట వుండేలా చూసేవారు. తన నిర్మాణ సంస్థకు కౌముది అని తన రికార్డింగ్ థియేటర్‌కు శబ్దా లయ అని పేర్లు పెట్టడం మల్లెమాల అభిరుచిని తెలియచేస్తాయి. ఎమ్మెస్‌రెడ్డి పలుసార్లు తన సినిమాలకు సంబంధించి నంది అవార్డులు అందుకున్నారు.

మనసు పాటల ఆత్రేయ

2011-10-16T14:27:00.005+05:30

ఆత్రేయ పేరు చెప్పగానే అందరికీ గుర్తువచ్చేది ఆయన మనసు పాటలు. ఆ తర్వాత వలపు పాటలు, వానపాటలు వగైరా..కానీ ఆత్రేయకు వీణపాటలంటే ప్రత్యేకమైన అభిమానమనీ, ఆయన హృదయాలను ద్రవింపచేసే విశిష్టమైన వీణపాటల్ని రాశారనీ చాలామందికి తెలియదు. ఆ మాటకొస్తే తెలుగు సినిమాల్లో ఎక్కువ వీణ పాటల్ని ఆలపించిన మధుర గాయని పి.సుశీల అయితే ఎక్కువ వీణపాటల్ని రాసిన కవి ఆచార్య ఆత్రేయే! లభిస్తున్న ఆధారాల మేరకు ఆత్రేయకు ఏడుసినిమాల్లో తొమ్మిది వీణపాటల్ని రాసే అవకాశాలు లభించాయి. (ఈ అంకెను నా ‘తెలుగు సినీ కవుల చరిత్ర’పుస్తకంలో ఆరుగా పేర్కొనడం పొరపాటు!). వీటిలో ఎనిమిదింటిని వీణావాణి అయిన పి.సుశీల ఆలపించగా ‘మురళీకృష్ణ’ చిత్రంలో పాటను మాత్రం జానకి పాడారు. ఈ వీణపాటల్లో ఆత్రేయ ఎంతటి వైవిధ్యాన్ని కనబరిచారో, ఆయన వీణపాటల నేపథ్యం ఏమిటో తెలుసుకుందాం.
వీణను ప్రధాన వస్తువుగా తీసుకుని రాసిన పాటలు, వీణ ప్రధాన వాద్యంగా చిత్రీకరించిన పాటలు రెండూ తెలుగులో వీణపాటలుగానే పరిగణింపబడ్డాయి. ‘అర్ధాంగి’ చిత్రంలో ఆత్రేయ రాసిన
వద్దురా కన్నయ్య ఈ పొద్దు/ఇల్లు వదలిపోవద్దురా అయ్య/ పశువులింటికి పరుగులెత్తే వేళ/ పసిపాపలను బూచి పట్టుకెళ్లే వేళ..
అనే గొప్ప పాటలో వీణ ప్రసక్తి ఎక్కడా లేదు. అది వీణకోసం రాసింది కూడా కాదు. కాని దర్శకుడు తన అభిరుచిమేరకు ఆ పాటను వీణమీదే చిత్రీకరించాడు. ఇదికాక ఆద్యంతం వీణమీద లేదా ఆ వాదనానికి తగిన గానం మీద ఆత్రేయ మరి తొమ్మిదిపాటల్ని రాశారు. తెలుగు సినిమాల్లో వీణమీద చిత్రీకరించిన పాటలన్నీ ఇలా ఉద్దేశించి రాసినవి కావు!
ఆత్రేయ రెండేసి వీణపాటలు రాసిన చిత్రాల్లో మొదటిది ‘డా.చక్రవర్తి’ (1964). ఈ రెండు పాటల్లో తెరమీద ఒకటి కథానాయకుని చెల్లెలు (గీతాంజలి), రెండోది కథానాయిక (సావిత్రి) వీణ వాయిస్తూ పాడినట్టు చిత్రీకరించారు. వీటిలో మొదటిదానిలో వీణ ప్రసక్తి ఉంది. రెండోదానిలోలేదు. ముఖ్యంగా ఈ రెండూ గాన ప్రధానమైనవి. స్థూలంగా చూస్తే రెండుపాటల్లో భావ సారూప్యం కనిపించినా సూక్ష్మంగా పరిశీలిస్తే మొదటిపాటలో వినమ్రతతో కూడిన నివేదనం రెండోపాటలో తన ప్రణయగీతి కృష్ణుడికి మాత్రమే వినిపించాలనే ఆరాధనా భావం స్పష్టంగా కనిపిస్తాయి.
1. పాడమని నన్నడగవలెనా/ పరవశించి పాడనా/ నేనే పరవశించి పాడనా
2. పాడమని నన్నడగతగునా/ పదుగురెదుటా పాడనా/ కృష్ణా పదుగురెదుటా పాడనా
ఈ రెండు పల్లవులకు బసవరాజు అప్పారావుగీతం- పదిమందిలో పాట పాడుమని/బలవంతము చేయకు నాధా మూలమైనా ఆత్రేయ శైలి, శిల్పం-మూలాన్ని మరిపించాయి.
ఆత్రేయ ‘చక్రవాకం’ (1974) చిత్రంలో రాసిన వీణపాటలు బొమ్మ-బొరుసు తరహాకి చెందినవి.
1. వీణలోనా తీగలోనా/ ఎక్కడున్నది నాదము
అది ఎలాగైనది రాగము
2. వీణలోనా తీగలోనా/ ఎక్కడున్నది అపశ్రుతి-అది/ ఎలాగైనది విషాద గీతి -మొదటిది సంతోష సమయానికి, రెండోది విషాద సందర్భానికి రాసినవి. ఇలాంటి జమిలి పాటలు రాయడం ఆత్రేయకు కొట్టిన పిండి. రెండింటిలోనూ శ్రుతిరాగ గానాలను అన్వయించిన తీరు ఆత్రేయ సంగీత పరిజ్ఞానాన్ని తెలియజేస్తుంది. ‘మురళీకృష్ణ’ (1964) చిత్రంలో పెళ్లి పీటలపైనే సౌభాగ్యాన్ని కోల్పోయిన విధివంచిత అయిన యువతి పాత్ర (గీతాంజలి) ఆలపించిన
మోగునా ఈ వీణ, మూగవోయిన/ రాగహీన, అనురాగ హీన అనేపాటకు- ‘గోరింటాకు’ (1979) చిత్రంలో రెండవనాయిక (స్వప్న) పాత్ర పరిచయంలోనే వినిపించిన
పాడితే శిలలైనా కరగాలి/ జీవిత గతులైనా మారాలి/ నా పాటకు ఆ బలమున్నదో లేదో/ పాడిన పిదపే తెలియలా
పాటకు చాలా పోలికలున్నాయి. రెండో పాటలోని- తాళి కట్టెడి వేళకోసమై/ లేచి చూచినది విరిమాల/ కట్టే వేళకు కట్టని తాళిని/ కత్తిరించినది విధిలీల -అనే చరణం ఈ పాత్రలకున్న సాదృశ్యాన్ని స్పష్టం చేస్తుంది. ‘గోరింటాకు’ నిర్మాత మురారి తన చిత్రంలోని పాటకు ‘దేశోద్ధారకులు’ చిత్రంలో ఆత్రేయ రాసిన వీణపాట స్ఫూర్తి అంటారు. కానీ-అది జ్ఞాపక లోపం. ఈ పాటకు, పాత్రకు ‘మురళీకృష్ణ’యే మూలం!
‘దేశోద్ధారకులు’ (1973) చిత్రంలోని
ఈ వీణకు శృతిలేదు
ఎందరికో హృదయం లేదు
నా పాటకు పల్లవి లేదు
బతుకెందుకో అర్ధం కాదు
అనే పాట ఓ వేశ్య ప్రశ్నించే గుండెల్ని పిండే ఆర్తగీతం
ఆత్రేయ వీణపాటల్లో ఎక్కువ ప్రాచుర్యాన్ని పొందింది ప్రేమ్‌నగర్’ (1971)లోని
ఎవరో రావాలి, నీ హృదయం కదిలించాలి
నీ తీగలు సవరించాలి, నీలో రాగం పలికించాలి
అనే ఉద్వేగభరితమైన పాట. మూలపడిన మధురవీణ లాంటి కథానాయకుని ఆంతర్యం స్ఫురించేలా అద్భుతంగా రాసిన ఈ పాట నాయిక లత (వాణిశ్రీ) మీద చిత్రీకరించబడింది. ఆత్రేయ మనసు పొరల్లోంచి వచ్చిన ఈ పాటకు మామ బాణీ సుశీల గానం, వాద్య సహకారం ప్రాణం పోశాయి. కనె్న మనసులో పరవళ్లు తొక్కే పారవశ్యానికి అక్షరాకృతి నిచ్చింది ‘అత్తలూ-కోడళ్లు’ (1971) చిత్రంలోని ఆత్రేయ వీణపాట. ఈ వీణ పలికించు ఎన్ని రాగాలో/ నాలోన పులకించు ఎన్ని భావాలో అనే ఈ పాటలో మోహన, కల్యాణి మొదలైన రాగాలను పేర్కొంటూ వలపుకూ సంగీతానికి అందంగా ముడివేశారు ఆత్రేయ. ఈ పాట, డా.చక్రవర్తిలోని ఆత్రేయ వీణ పాటలు పెళ్లి చూపుల్లో వధువు పాట పాడి వినిపించే కాలంలో తరచుగా వినిపించేవి.
వీణ కర్నాటక సంగీతానికి ప్రధానమైన, హృద్యమైన వాద్యం. కనువిందైన నాయిక వీణముందు కూర్చుని వీనుల విందుగా పాట పాడుతుంటే-ఆ మనోహరమైన దృశ్యం వీక్షకులనలరిస్తుందని ఆనాటి సినీ దర్శకులు తమ చిత్రాల్లో వీణపాటలకు స్థానం కల్పించేవారు. సాధారణంగా నాయిక మధురోహలలోనో, ప్రణయ స్మృతులలోనో తెలియాడే సన్నివేశానికి వీణపాటను రూపొందించేవారు. కానీ ఆత్రేయ వీణపాటల్లో అధిక శాతం ఆవేదనా భరితాలు కావడం, అవి ప్రేక్షకామోదాన్ని పొందడం గమనార్హం.
ఆత్రేయ వీణపాటలు బాణీ వెనక ఓ కథ ఉంది. దానిని ఆయన ఆత్మకథలో ‘తొలిగాయం’గా పద్యరూపంలో రాశారు. ఆయన ప్రియురాలు ‘బాణం’ వీణావాదనంలో నేర్పరి. కారణాంతరాలవల్ల ఆమెకు ఆత్రేయతో వివాహం కాలేదు. వివాహానంతరం ఆమె ఆయనకు తారసపడినప్పుడు -‘నీతో పెళ్లి జరగలేదు కనుక వీణను అటకెక్కించాను’ అందట! అప్పటినుంచి వీణ ప్రసక్తి వస్తే ఆత్రేయ పగిలిన హృదయంనుంచి ప్రకంపనలు వినిపించేవి! అవే ఆయన వీణపాటలయ్యాయి!
వెండితెర మీద వీణపాటలు కనుమరుగై చాలాకాలమయినా, ఇప్పటికీ ఆత్రేయ వీణపాటలు వినిపిస్తుండడం వాటి విశిష్టత!

సినిమా పోస్టర్

2011-10-02T08:02:00.001+05:30

ముక్కలు చేసింది తిరిగి అతికితే ఎంతయినా కృతకంగానే వుంటుంది. కానీ అదేం చిత్రమో.. ముక్కలు ఎన్ని ఎక్కువైతే అంతకు అంతా అందంగా తయారవుతుంది....సినిమా పోస్టర్.. చెప్పే విషయం ఏదైనా చదివించేదిగా వుండాలంటే, అక్షరాలు అందంగా అమరాలి.. విడివిడి అక్షరాలు కలివిడిగా మారితేనే అందమైన కావ్యం అవతరిస్తుంది. 24ముక్కలు కలిసి కమనీయ పోస్టర్‌గా మార్చిన వాడికి, వేన వేల అక్షరాలు కూర్చి జీవిత కావ్యం అందించడం అసాధ్యమా..కానే కాదు. అందుకే చిత్రకారుడు ఈశ్వర్ జీవితకథ..సినిమా పోస్టర్ అందంగా..అంతకన్నా ఠీవిగా జంక్షన్‌లో జయకేతనం ఎగురేసింది. 3గీతా2చార్యుల్లో, రాతనేర్చిన వారు అరుదు. రమణ చాటు నేస్తం బాపుసంగతి అంతగా తెలియదు కానీ, మోహన్, చంద్ర భలేగా రాయగలరు. భావాలను కుంచెతోనే కాదు..కలంతో కూడా చెప్పేయగలరు. ఇప్పుడు చిత్రకారుడు ఈశ్వర్ సొంత కథ చదివాక ఈ జాబితాకు మరో పేరు జోడయిందనిపిస్తుంది. ఈశ్వర్‌కు పబ్లిసిటీ ఆర్టిస్టు అనో, సినిమా డిజైనర్ అనో, పోస్టర్ డిజైనర్ అనో విశేషణం జోడిస్తే, కచ్చితంగా ఆయన్ను తక్కువ చేసినట్లే అవుతుంది. తెలుగుసినిమా ప్రగతిలో ఆయన వాటా ఆయనకు వుంది. ఆ రంగ చరిత్రలో ఆయన పేజీ ఆయన డిజైన్ చేసుకున్నదే. ఎన్ని సినిమాలు..ఎంత మంది హీరోలు..ఎన్ని పాత్రలు..ఎన్ని ఆహార్యాలు..ఎన్ని వైవిధ్యమైన డిజైన్లు. రచయిత ఊహలో దాగుడుమూతలాడుతున్న పాత్రలను తన ఊహతో ఒడిసిపట్టి, కుంచెలోకి కుదించి, కాగితంపైకి మళ్లించి, జనం కళ్ల ముందుంచడంలో తొలి కష్టం ఈశ్వర్‌దే. కంప్యూటర్ కాలం కాదది. ప్రతీదీ స్వంత కష్టంపైనే ఆధారపడి చేయాల్సింది. అలాంటి రోజుల్లో ఈశ్వర్ చేసిన 3సిత్రాలు2 ఇన్నీ అన్నీనా? మాస్ జనాలని థియేటర్ దిశగా మళ్లించే సినిమా పోస్టర్‌కు క్లాసిక్ హంగులు అద్దారా.. సినిమాకో వేషం వేసే హీరోలకు అన్ని రకాల వేషాలూ అమరేలా విగ్గులు డిజైన్ చేసారా... సింగిల్ కట్ నుంచి 24షీట్ వరకు ఎన్ని ప్రయోగాలు చేయాలో అన్నీ చేసేసారా?... సింగిల్ హ్యాండ్‌తో ఎన్ని జూనియర్ హ్యాండ్‌లను తయారుచేసి, సినిమా రంగానికి కానుకగా ఇచ్చారనీ..? ఇన్ని చేసిన 3ఈశ్వరుడి2కి ఈ రంగమే కాదు..జగమంతా తెలుసుని ఇప్పుడు జనానికి తెలిసింది..ఈ సినిమా పోస్టర్ పుస్తకంతో. సినిమా ఆర్టిస్టు ఈశ్వర్ జీవితకథ. పుట్టిందీ..పెరిగిందీ..సినిమారంగంలో నిలదొక్కుకున్న వైనం..ఇవేగా వుండేది. అచ్చంగా అంతే వుంటే..ఇంతలా చెప్పుకోనక్కర్లేదు. పేజీలు తిరగేసి, ఫొటోలు చూసేసి, పక్కన పెట్టేసుకోవచ్చు. కానీ ఈశ్వర్ డిజైన్ చేసిన సినిమా పోస్టర్‌లాగే ఈ పుస్తకం కూడా మనల్ని అంత సులువుగా కళ్లు తిప్పుకోనివ్వదు. పైగా ఏకబిగిన మొత్తం చదివేయమంటుంది. అలా అని గబగబా చదివేద్దామంటే వీలు కాదు. ఎందుకంటే దాన్నిండా విషయం కిక్కిరిసిపోయింది. ఇటు మన సినిమా డిజైనింగ్ రంగంలోనే కాదు, దేశీయంగా, అంతర్జాతీయంగా ఈ విభాగంలో వినుతికెక్కినవారి వైనాలన్నీ విడమర్చి వివరించారు. అక్కడితో ఆగిపోయారా...మన 3గీతా2చార్యుల్లో కాస్త చేయితిరిగిన వారి గురించి విన్నవించుకున్నారు. ఇది తన కథ కాదు..తను దర్శించిన చిత్రప్రపంచం అని సవినయంగా కళ్లముందుకు తీసుకొచ్చారు.. వినయంగా అని ఎందుకనాల్సి వచ్చిందంటే, ఇంత మంచి విషయాలు అన్నీ ఓపిగ్గా సేకరించి, గుదిగుచ్చి అందించిన తరువాత కూడా 3తిలకాష్ట మహిషబంధనం2లా..ఓ అద్భుతమైన, గాంభీర్యమైన పేరు పెట్టకుండా, తను నముకున్న, తనను ఇంతవాణ్ణి చేసిన సినిమా పోస్టర్‌నే మకుటంగా వుంచారు ఈశ్వర్. పుస్తకంలో పలు ప్రధానాంశాలున్నాయి. ఒకటి ఈశ్వర్ అనే ఈశ్వరరావు పుట్టింది..పెరిగింది..ఎలా చెన్నపట్నం చేరిందీ. చెన్నపట్నంలో సినిమా రంగంలో కాలూనిన దగ్గర నుంచి నడిచిన తోవలో ఎదురైన అనుభవాలు..ఆపై, మన సినిమా ప్రచార రంగం, దాని ప్రగతి పయనం, వివిధ రకాల ప్రక్రియలూ,(ముఖ్యంగా పేజీ 85 నుంచి), కాలంతో పయనించిన వివిధ ప్రకటన సంస్థలు, వాటి వైనాలూ ఇవన్నీ ఒక ఎత్తు. ప్రపంచ ప్రఖ్యాత వర్ణ చిత్రాలూ, కళాకారులూ, బాలీవుడ్ ప్రచార కళాకారులూ, వారి సంక్షిప్త పరిచయాలూ, ఇవి చాలవన్నట్లు మన తెలుగు చిత్రకారులూ, వారి విఖ్యాత విలాసం జోడించారు మళ్లీ వెనక్కివచ్చి తెలుగు తమిళ సినీ ప్రముఖులూ, సంస్థలూ, స్టూడియోలూ, పలువురు పోస్టర్ డిజైనర్లూ ఇలా ఎందరెందరినో, ఆఖరికి తన దగ్గర పనిచేసిన ప్రతి ఒక్కరితో సహా.. స్మరించుకున్నారు..తలుచుకుని మురిసిపోయారు. ఇక ఇవన్నీ చాలవన్నట్లు, తన సుదీర్ఘ వృత్తి జీవితంలో తన కుంచె నుంచి వెలువడిన ఎన్నో చిత్రాలను ఆల్బమ్‌లా గుదిగుచ్చి అందించారు. పుస్తకం చదవుకుండా పొరపాటున ఈ బొమ్మల జోలికి వెళ్లారో..అలా అలా వాటి వెంట వెళ్లిపోయే ప్రమాదం వుంది. వాటిని చూడాలనే ఆతృతను అలాగే అదిమిపెట్టి, అక్షరాల వెంట పరుగులు పెట్టి, ఆ తరువాత ఈ వర్ణచిత్ర సౌరభాన్ని తనివితీరా ఆస్వాదిస్తే, ఆ అలసట మటుమాయమవుతుంది. పఠన ప్రయాణం పరిపూర్ణమవుతుంది. అంతా పూర్తయ్యాక, అప్పుడనిపస్తుంది. ఇంతకీ ఈశ్వర్ 3గీతాచార్యుడా.. ..రాతకారుడా? తన బొమ్మలంత అందంగానూ, పుస్తకం రాసేసాడే అని. అదే సమయంలో చేయి తిరిగిన స్క్రిప్ట్ రైటర్‌లా రాయదల్చుకున్నవి, చెప్పదల్చుకున్నవి ఒక పద్దతి ప్రకారం చెప్పాడే అని. కొసమెరుపేమిటంటే..అప్పుడప్పుడు పుస్తకంలోకి కైలాసం అనే పాత్రధారి వచ్చి ఈశ్వర్ మనసులోని మాటలు చటుక్కున చెప్పేసి, వేయాల్సిన చెణుకులు వేసేసి వెళ్లిపోతుంటాడు. భలే చమత్కారంగా. ఏదైనా చూడాల్సినదే కాదు..చదవాల్సింది కూడా సినిమా పోస్టర్?2 సినిమా పోస్టర్ రచన: ఈశ్వర్ వెల: రూ.450/- విజయా పబ్లికేషన్స్ 15, పలయకరన్ స్ట్రీట్ కలైమానగర్, చెన్నయ్-32 ఫోన్: 9848046535