෴පන්හිඳ෴

සුදු බුදු පිළිමය෴

2009-06-08T17:45:00.010+05:30

සුදු බුදු පිළිමය
පියුමාසන මත
වැඩ හිඳිනා දෙස
පිය නඟනෙමි මම

අවර දිගින් එන
රත් පැහැ රැස් කඳ
සිවුරු තලයෙ වැද
මවන රටා රඟ
බලා සිටිමි මම

මෙත් කරුණා ගුණ
ගලනා නෙතු යුග
දෙස නෙත් යොමු කොට
දැහැන් ගත ව සිත
බලා සිටිමි මම

හිමි ඔබ නිසලව
බලා සිටින සඳ
ඔබෙ පාමුල හිඳ
ඒ නෙතු යුග දෙස
බලා සිටිමි මම
෴

නිදහස් රටක සිට ලියමි

2009-05-19T11:20:00.006+05:30

නිදහසේ උතුම් හැඟීම! එය චමත්කාරජනකයි. ආනන්දනීයයි. පූජනීයයි. ජීවිතයේ පළමු වරට මා ඒ අභිමානවත් අත්දැකීම ඊයේ දින ලැබුවා.

නිදහස් රටක් එකලු කළ හිරු කිරණ අද උදෑසන මා අවදි කළ විට, දෙනෙතට දැනුණු සුවය, නිදහස් රටක් පීරා ආ මඳ නල මා ගතට වෙනදා නොගෙනෙන සුවයක් ගෙන ආ බවක මට දැනුණා. ඔබටත් එය එසේම වන්නට ඇති.

වෙන දා මඟ දෙපස වැයෙන ගී ඇතැම් විට කණට කරදරයක් සේ දැනුණත්, මෙදා මඟ දෙපස දෙදරුම් දෙන දෑ අබිමන් ගී මා දැහැන් ගත කළා. හද ගැස්ම තීව්‍ර කළා. ඔබටත් එය එසේම වන්නට ඇති.

අහස ගුගුරන්නා සේ නැඟි රතිකඤ්ඤා හඬ, සිත් තුළ සතුට දෙගුණ තෙගුණ කළා. මඟ දෙපස එක් රොක් වී සිටි ජනයා නඟන ජය ගොස මුව රැඳි සිනහව පුළුල් කළා. ඔබටත් එය එසේම වන්නට ඇති.

රටේ පුදුමාකාර වෙනසක්! මඟ දෙපස ජාතික ධජ. වාහන වල ජාතික ධජ. පදිකයන් අතත් ජාතික ධජ! තාප්ප පුරා ජනපතිඳුන්ගේ රූප කාය! ඒ සියල්ල මා සොම්නස් කළා. ඔබටත් එය එසේම වන්නට ඇති.

ගෙවූ දින කිහිපය, ලොවටම ශ්‍රී ලංකාවේ වෙනසක් දිස් කළා.

වෙනත් රටවල නායකයින්ට විරුද්ධව පෙළ ගැසෙන ජන ගංගා වෙනුවට සිරිලක් ජනතාව අතිගරු ජනපතිතුමන්ව රජෙකු ලෙස අබිසෙස් කළා. එතුමාත් ලක් පොළොව මත වැඳ වැටුණා. ලක් ඉතිහාසයේ රන් අකුරින් ලියැවෙන පරිච්ඡේද සුළුතරය අතරට මේ කතාවත් එක් වුණා.

ක්‍රි.පූ. 377 දි පඬු අබා රජතුමන්, ක්‍රි.පූ. 161 දී දුටු ගැමුණු මහ රජතුමන්, ක්‍රි.පූ. 89 දී වළගම්බා රජතුමන්, ක්‍රි.ව. 1070 දී මහ විජයබා මහ රජතුමන්, ක්‍රි.ව. 1153 දී මහ පැරකුම්බා මහ රජතුමන්, සහ අවසාන වශයෙන් ක්‍රි.ව. 1449 දී සයවන පැරකුම්බා මහරජතුමන් විසින් කරන ලද ඒ ප්‍රෞඪ කාර්‍ය්‍ය, රට එකසේසත් කිරීම, ක්‍රි.ව. 2009 ක් වූ මැයි මස 18 වන දින, එනම්, ශ්‍රී බුද්ධ වර්‍ෂ ප්‍රමාණයෙන් 2553 ක් වූ වෙසක් මස අව නවවක සඳු දින මහින්ද රාජපක්‍ෂ ජනපතිඳුන් විසින් ඉටු කිරීම ඉහත සඳහන් කළ වෙනස් වීම්වලට හේතු වුණා. ඉතා කළාතුරකින් දකින්නට ලැබෙන රට එක්සේසත් කිරීමක්, එනම් වසර දහස් ගණනක ඉතිහාසයේ, මහාවංශයේ ලියැවී ඇති වසර 2553ක කාලය තුළ සය වතාවක් පමණක් ඉටු කරන ලද කාර්‍ය්‍යක් දැක බලා ගන්නට, ඒ විජයග්‍රහණයේ ප්‍රීතියෙන් ඇලළී යන්නට, අපත් වාසනාවන්ත වුණා.

ජනපතිඳුන් අද උදෑසන ජාතිය අමතා කළ කතාවේ, වසර ගණනකට පසු ලක් දෙරණේ සවනක් නෑර පැතිරුණු ඒ කතාවේ, ඒ අභිමානනීය කතාවේ කොටසක්, මට තේරුණු බසින් කියා, අභිමානවත් වියුණු සටහනක් අවසාන කරමි.

දැන් රට තුළ සිටින්නේ එකම ජාතිය යි. ඒ ශ්‍රී ලාංකික ජාතිය යි. ජාතික කොඩිය යට එකමුතු වන ජාතියයි. දේශ ප්‍රේමීන්ගේ ජාතියයි. එන්න, ඒ ජාතියේ අභිමානවත් පුරවැසියෙක වන්න. සිංහ කොඩිය යට එකට එකතු වෙමු. එකමුතු වෙමු.

ආච් ලිනක්ස් සමඟ සිංහළ - පියවර පහකින්෴

2009-04-19T14:19:00.008+05:30

ආච ලිනකස් පද්ධතියේ සිංහළ යතුරු ලිවීම හා කියැවීම් සහාය පිහිටුවා ගන්නා අයුරු පිළිබඳ ව කෙටි සටහනක් තබන්නට සිත් වූයේ මා හටම අනාගතයේ අවැසි වේ දෝ යි සිතුණු නිසායි. මෙතෙක කල් මා භාවිතා කළ උබුන්ටු පද්ධතිය ඉවත් කොට නැවතත් ආච ලිනක්ස් පිහිටුවීමට සිතුණේ අලුත් අවුරුදු නිවාඩුවත් සමඟ කලකින් නො ලැබුණු විවේකයක් ලැබුණු බැවිනි. එහෙත් එහිදී මා මුහුණ දුන් ගැටළුවක් වුණේ සිංහළ සහාය පිහිටුවා ගන්නා අයුරු මතකයෙන් ඈත් වී තිබීමයි.

එහිදී මා මුහුණ දුන් ගැටළුවක් වුණේ මේ පිළිබඳ ව උපදෙස් හා සහාය ඉතා අල්ප වීමයි. ඒ ගැටළුව යම් පමණකට හෝ මඟ හැරවීමට මා අනුගමනය කළ පියවර මෙහි කෙටියෙන් සඳහන් කරමි.

සැ.යු: මෙහි සඳහන් වනනේ ග්නෝම් යටතේ scim ඇසුරෙන් සිංහළ සහාය පිහිටුවා ගන්නා අයුරු යි.

1. සිංහළ අකුරු රටාවක් පිහිටුවා ගන්න.

සිංහළ අකුරු රටාවක් බාගෙන, එය ~/.fonts වෙත පිටපත් කරන්න.
# cp lklug.ttf ~/.fonts

2. scim පිහිටුවා ගන්න.

# sudo pacman -S scim

ඉන් පසු /etc/profile වෙත පහත පේළි පිටපත් කරන්න.

export XMODIFIERS=@im=SCIM
export GTK_IM_MODULE="scim"
export QT_IM_MODULE="scim"
scim -d

3. සිංහළ ලිවීම සඳහා සයුර පිහිටුවා ගන්න.

# yaourt -S scim-sayura

මෙහි දී ඔබේ පිරිගණකය බිටු 64bit නම්, PKGBUILD හි arch('i686') යන්න, arch('x86_64') ලෙස සැකසිය යුතු යි.

4. scim ඔබට අවැසි පරිදි රිසිකරන්න.

# scim -d

scim හි Scim Setup වෙත පිවිස ඉන් සයුර තෝරා අනෙක් රිසිකරණ ද සිදුකොට, XSession නැවත අරඹන්න.

5. සිංහළෙන් වැඩ අරඹන්න!

මෙහෙමත් මිනිස්සු෴

2009-04-12T17:09:00.003+05:30

නලින් ද සිල්වා මහැදුරන් විසින් ලියන ලද, නොමිනිස් ලිපියක් පිළිබඳව යි. ඒ ලිපිය දුටු මා, විස්මිත වූ යේ මෙහෙමත් මිනිස්සු, මෙ ලොව සිටිත් දැයි පළ වූ ලැජ්ජාවෙනි. ජාතියෙන් වෙනස් වූ පමණින් එක පැහැ එක ම ලෙය ඇති අපේ රටේ අපේ ම මිනිසුන් මැරුණාට කමක් නැතැ යි, කියන්නේ කවර නම් සිතකින් ද?

නලින් ද සිල්වා මහැදුරන් විසින් ලියැවුණු ඒ ලිපියේ කොටසක් මෙ සේ වේ,

යූද මූක්ත කලාපයේ කොටූවී සිටින ජනයා සම්බන්ධයෙන් අනූගමනය කළ හැක්කේ එක් ප්‍රතිපත්තියක් පමණකි. එහිදී අපේ ප්‍රධාන පරමාර්ථය කුමක්ද යන්න පැහැදිලිව තේරුම්ගත යූතුය. අපේ ප්‍රධාන අරමූණ අන් කිසිවක් නොව කොටි සමූල ඝාතනය කිරීම හා රටේ ඒකීයභාවය ආරකෂා කරගැනීමය. එහිදී ඊනියා සිවිල් ජනයාගේ ජීවිත ආරක්ෂා කරගත හැකි නම් අප සතුටූ වෙමූ. එහෙත් ඔවූන්ගේ ජීවිත ආරක්ෂා කරගැනීම කෙතරම් මානූෂික කටයූත්තක් වූවද ඒ අපේ ප්‍රධාන අරමූණ නොවෙයි. සිවිල් වැසියන් හෙවත් කොටූවී ඇති ජනයා ආරක්ෂා කිරීමට ගොස් කොටි සමූල ඝාතනය කරගත නොහැකි වූවහොත් රටේ ඒකීයභාවය ආරක්ෂා කරගැනීමට නොහැකි වූවහොත් හමූදාව මෙතෙක් කර ඇති කැපවීම්වලට කුමක් සිදුවන්නේද? මූලතිව්හි සිවිල් වැසියන්ගේ ඊනියා මානව අයිතිවාසිකම් ගැන කතා කරන ඇතැම් විශ්වවිද්‍යාල ආචාර්යවරු කොළඹ විශ්වවිද්‍යාලයෙන් මා අස් කළ විට මගේ පැමිණිල්ල මා සාමාජිකයකු හා සභාපතිව සිටි ආචාර්ය සංගම්වලට ඉදිරිපත් කිරීමට ඉඩ නොදීම තරම් මානව දයාවෙන් පිරී ඉතිරී ගිය ඇත්තෝ වූහ. ඔවූන්ගෙන් එක් අයකු ව්‍යවස්ථාදායක මණ්ඩලයට ද නම් කෙරී ඇත. ඔහූ ඒ තනතුරට පත් වූවහොත් ක්‍රියා කරන්නේ කෙසේදැයි අපට සිතාගත හැකිය.

මහැදුරන්ට අනුව, කොටින් සතු බිම්කඩ අල්වා ගැනීම අහිංසක ජීවිත බිලි දී හෝ ඉතා ඉක්මණින් කළ යුතු කාර්‍ය්‍යකි. එතුමෝ මෙම හමුදා මෙහෙයුම "මානුෂීය මෙහෙයුමක්" බව ද අමතක කරති. එතුමාට, දකුණේ බොහෝ ජනයා මෙන් උතුර දකුණ යළි එක් වී, තල් රුප්පාව පොල් රුප්පාවට යා කිරීමේ කැමැත්තක් නැත. සිංහළ ජනයා දෙමළ ජනයා හා සමඟිව වෙසෙන අනාගතයක් ගැන සුබ සිහින නැත. ඔහුගේ එම ලිපිය කියැවූවොත් හැඟෙන්නේ ඔහු හැකිනම් යාපනයේ තල් ගස් ගලවා පොල් ගස් සිටුවීමට වුව අමුඩය ගසා ගන්නට පසුබට නොවන බව යි.

ඔහුට අනුව මානව හිමිකම් ඊනියා වේ. මිනිසුන්ගේ ජීවත් වීමේ අයිතිය ව්‍යවස්ථාපිත ව පළ වී ඇති රටක, අහිංසක මිනිසුන්ගේ ජීවිත බිලි කර දිනා ගන්නා බිම් කඩෙහි කිසිඳු වටිනාකමක් නැති බව ඔහුගේ මහැදුරු මොළයට නො වැටහේ.

තව ද, ඔහු යුධ මුක්ත කලාපයේ අහිංසකයින්ගේ ජීවිත නැති කරමු යැ යි යෝජනා කරන්නේ, ඊට ඔහුව කොළඹ සරසවියෙන් අස් කිරීම සසඳමිනි. අහිංසකයින් දහස් ගණනකගේ ජීවිත, තම රැකියාව හා සැසඳිය හැකි තරම් ආත්මාර්ථකාමීන් ලංකාවේ සිටී දැයි සිතීම පවා ලැජ්ජාවට කරුණි.

ඔහුගේ යෝජනාව බැරි වී හෝ ක්‍රියාත්මක් වුවහොත්, රටක්, ජාතියක් වශයෙන් අපට විඳින්නට වන අපකීර්තිය, අනාගතයේ ඇති විය හැකි වෙනත් ගැටළු, එසේ ම බහුතරයක් ලාංකිකයින්ට අහිමි වන නිදහසේ නියම සතුට, ඔහුගේ ජාතිවාදයට වැසී තිබේ. දරුණුත ම ගැටළුව නම්, ඔහු නිර්මල බුදුදහම ද මෙයට ඈඳා ගැනීම යි. මා දන්නා බුදු සමයේ නම් බුදු රදුන් අනු දැන වදාළේ අන් ආගම් අදහන්නන්ට ඒ ඒ ආගම් ඇදහීමට ඇති නිදහසට ගරු කරන්නටත්, අන් ආගමික පූජකයින්ට හා ශාස්තෲවරුන්ට ගරු කරන්නටත් ය. එක්කෝ මට එක්කෝ ඔහුට බුදු දහම බරපතළ ලෙස වැරදී ඇත.

තම ජාතියට ආදරය කිරීමේත්, අන් ජාතීන්ට වෛර කිරීමේත් ඇති වෙනස මෙය යි. ඔහුගේ ලිපියෙන් තහවුරු වන ආකාරයට නම්, ඔහු සිංහළ ජාතියට ආදරය කරන්නේ නැත, ඔහු තුළ ඇත්තේ අනෙකුත් ජාතීන් කෙරෙහි වෛරයකි.

මහැදුරන්ගේ සම්පූර්ණ ලියමන පහත පරිදි වේ.

from info@chinthana.org
to info@chinthana.org
date Sun, Apr 12, 2009 at 2:42 PM
subject "Milibandla Paradaveema" (www.kalaya.org)

Note: This message displays only for "Sinhala Unicode" Installed/Supported Computers. Alternatively, you may find attached PDF file of the article.

මිලිබෑන්ඩ්ලා පැරදවීම
- මහාචාර්ය නලින් ද සිල්වා (http://en.wikipedia.org/wiki/Nalin_de_Silva)

දිවයින - 2009 අප්‍රේල් 12 (ඉරිදා)
http://www.divaina.com/2009/04/12/feature19.html

ප්‍රභාකරන් පැනගියේ ද එසේත් නැත්නම් ඊනියා යූද මූක්ත කලාපයෙහි සාමාන්‍ය ජනතාව සමග ජීවත්වන්නේ ද යන්න මේ ලිපිය ලියන විට ද නොවිසඳී ඇති ප්‍රශ්නයකි. මූළු ලොවෙහිම ඒ ප්‍රශ්නයට පිළිතුර දන්නා අය කිහිප දෙනකුට පමණක් සීමා විය යූතුය. ප්‍රභාකරන් කොහේ සිටියත් ඔහූ පැරදවීම ලංකාණ්ඩූවේ වගකීම වෙයි. එහිදී අපට හරස් වන්නේ කවරහූද? පසූගියදා බිරිතානි පාර්ලිමේන්තුවේදී මූලතිව් ගැන ප්‍රකාශයක් කළ එරට විදේශ ඇමැති ඩේවිඩ් මිලිබෑන්ඩ් මහතා කියා සිටියේ ප්‍රභාකරන් අහිංසකයන් පිරිසක් මිනිස් පළිහක් මෙන් යොදා ගැනීම වරදක් බවය. එහෙත් ඔහූ ඒ සමගම ප්‍රකාශ කළේ සාමාන්‍ය වැසියන්ට කරදරයක් නොවන අයූරින් ඔවූන් මූදාගත යූතු බවය. ඒ අතර ඔහූ කලින් දිනෙක ඊනියා මානූෂික සටන් විරාමයක් ඇති කළ යූතු බව ද සඳහන් කළේය. බිරිතානියේ විදේශ කටයූතු පිළිබඳ ඇමැතිවරයා ලෙස ඔහූ කරන ප්‍රකාශ සූළුවෙන් සැලකිය යූතු නොවේ.

මෙරට ඉංගිරිසි උගත් අය හා ඔවූන්ගෙන් ආභාසය ලබන අය අතරින් විශාල පිරිසක් තවමත් බිරිතානිය කෙරෙහි ඉමහත් ගෞරවයකින් යූක්තව කටයූතු කරති. එහෙත් බිරිතානිය යනූ අපේ ප්‍රධාන සතුරා වෙයි. පසූගියදා මූලතිව්හි ඊනියා සිවිල් ජනයා වෙනූවෙන් ආධාර රැගත් නැවත එවීමට සූදානමින් සිටියේ ද බිරිතානිය ය. ඒ ඊනියා දූත මෙහෙවරක් විය. එයට නම් තබා තිබූණේ මර්සි මිෂන් යනූවෙනි. එය සානූකම්පිත දූත මෙහෙවර හෝ බටහිරයන් අපට පූදුරු කිරීමට උත්සාහ කළ වචනවලින් නම් අනූකම්පා මීසම ලෙස පරිවර්තනය කළ හැකිය. අප බොහෝ විට සඳහන් කර ඇති ආකාරයට මෙරට සිටින යාපන දෙමළ ජනයාගේ සම්භවය ලන්දේසීන් විසින් දුම්කොළ වගාවට ගෙනෙන ලද වෙල්ලාල නමින් හැඳින්වෙන ජනයා වෙත යොමූ වෙයි. වෙල්ලාලයන්ට මෙරට සම්භාවනීය තත්ත්වයක් ලබාදී මෙරට සිංහල බෞද්ධ සංස්කෘතියට හිමි තැන ලබා නොදීමටත් සිංහල බෞද්ධයන් පාගා දැමීමටත් ඔවූන් යොදාගනූ ලැබූයේ බිරිතානීන් විසිනි. නෝර්වේ රාජ්‍යය යනූ බිරිතානිය විසින් දෙමළ ජාතිවාදය, බෙදුම්වාදය හා ත්‍රස්තවාදය ආරකෂා කිරීමට හා වර්ධනය කිරීමට යොදාගනූ ලැබූ රාජ්‍යයක් පමණකි. සියල්ල, එනම් දෙමළ ජාතිවාදයට බෙදුම්වාදයට හා ත්‍රස්තවාදයට අවශ්‍ය මතවාද, මූල්‍ය හා සම්පත් ආධාර ආදී සියල්ල ඇත්තේ බිරිතානියය. අපට හරිහැටි කරුණූ සොයාගත හැකිනම් කොටි සංවිධානයට ආයූධ හා සබ්මැරීන වැනි වෙනත් උපකරණ ලබාදීම පිටූපස ද සිටින ප්‍රධාන රට බිරිතානිය බව දැනගැනීමට හැකිවනූ ඇත.

මිලිබෑන්ඩ්ගේ සූදානම පැහැදිලිය. ඔහූට හා බිරිතානියට අවශ්‍ය හැකිනම් පළමූව එක්සත් ජාතීන්ගේ හමූදා මෙරටට එවා කොටි පරාජයෙන් ගලවා ගැනීමය. ඒ කළ නොහැකි නම් ජනාධිපතිතුමා ඇතුළු කිහිප දෙනකුට විරුද්ධව ඊනියා ජාත්‍යන්තර අධිකරණයේ යූද්ධ අපරාධ පිළිබඳ චෝදනා ඉදිරිපත් කිරීමටය. ඊනියා ජාත්‍යන්තර අධිකරණය ද වෙනත් බොහෝ ජාත්‍යන්තර ආයතන මෙන්ම ඇමරිකාව ප්‍රමූඛ බටහිරයන්ගේ අවශ්‍යතා සඳහා පිහිටූවාගෙන ඇති ආයතනයකි. එහි කිසි දිනෙක බටහිර යූරෝපීය රටවල නායකයන්ට විරුද්ධව යූද්ධ අපරාධ පිළිබඳ නඩූ පැවරී නැත. එහෙත් යූද්ධ අපරාධ යැයි කියැවෙන දේ පිළිබඳ හොඳම නිදර්ශන ඇත්තේ බටහිර යූදෙව් ක්‍රිස්තියානි සංස්කෘතියෙහි හා ග්‍රීක යූදෙව් ක්‍රිස්තියානි චින්තනයෙහිය. ප්‍රභාකරන් මූලතිව්හි තවමත් ඇත්නම් මේ වන විට ඊනියා එක්සත් ජාතීන්ගේ හමූදා මෙරටට පැමිණ සිටිය යූතුය. මිලිබෑන්ඩ්ලා එදාත් අනෙක් රටවල ස්වෛරීභාවය තුටිටූවකට මායිම් නොකළහ. ඔවූහූ එදා අප රටවල් ආක්‍රමණය කර කොල්ල කෑහ. ඔවූහූ අද මෙන් නග්නව රටවල් ආක්‍රමණය නොකරති. ඒ වෙනූවට ඔවූන්ගේ උගතුන් ලවා සකස් කරවා ගන්නා ලද සංකල්ප, ප්‍රවාද ඇතුළු දැනූම යොදා ගනිති. පසූගිය දිනවල කතාබහට ලක්වූණූ ආරකෂා කිරීමට ඇති අයිතිය හෙවත් රයිට් ටූ ප්‍රොටෙක්ට් යන්න ඉන් එක් සංකල්පයකි.

යූද මූක්ත කලාපයේ කොටූවී සිටින ජනයා සම්බන්ධයෙන් අනූගමනය කළ හැක්කේ එක් ප්‍රතිපත්තියක් පමණකි. එහිදී අපේ ප්‍රධාන පරමාර්ථය කුමක්ද යන්න පැහැදිලිව තේරුම්ගත යූතුය. අපේ ප්‍රධාන අරමූණ අන් කිසිවක් නොව කොටි සමූල ඝාතනය කිරීම හා රටේ ඒකීයභාවය ආරකෂා කරගැනීමය. එහිදී ඊනියා සිවිල් ජනයාගේ ජීවිත ආරක්ෂා කරගත හැකි නම් අප සතුටූ වෙමූ. එහෙත් ඔවූන්ගේ ජීවිත ආරක්ෂා කරගැනීම කෙතරම් මානූෂික කටයූත්තක් වූවද ඒ අපේ ප්‍රධාන අරමූණ නොවෙයි. සිවිල් වැසියන් හෙවත් කොටූවී ඇති ජනයා ආරක්ෂා කිරීමට ගොස් කොටි සමූල ඝාතනය කරගත නොහැකි වූවහොත් රටේ ඒකීයභාවය ආරක්ෂා කරගැනීමට නොහැකි වූවහොත් හමූදාව මෙතෙක් කර ඇති කැපවීම්වලට කුමක් සිදුවන්නේද? මූලතිව්හි සිවිල් වැසියන්ගේ ඊනියා මානව අයිතිවාසිකම් ගැන කතා කරන ඇතැම් විශ්වවිද්‍යාල ආචාර්යවරු කොළඹ විශ්වවිද්‍යාලයෙන් මා අස් කළ විට මගේ පැමිණිල්ල මා සාමාජිකයකු හා සභාපතිව සිටි ආචාර්ය සංගම්වලට ඉදිරිපත් කිරීමට ඉඩ නොදීම තරම් මානව දයාවෙන් පිරී ඉතිරී ගිය ඇත්තෝ වූහ. ඔවූන්ගෙන් එක් අයකු ව්‍යවස්ථාදායක මණ්ඩලයට ද නම් කෙරී ඇත. ඔහූ ඒ තනතුරට පත් වූවහොත් ක්‍රියා කරන්නේ කෙසේදැයි අපට සිතාගත හැකිය.

මිලිබෑන්ඩ්ලාට ඇති මානව දයාවක් නැත. ඔවූන්ගේ මානව දයා ඇත්තේ පොත්වල පමණය. බිරිතානියේ පමණක් නොව බටහිර ක්‍රිස්තියානි නූතනත්වයේ පැවැත්මට තර්ජනයක් එල්ල වන අවස්ථාවකදී මිලිබෑන්ඩ්ලා ක්‍රියා කරන්නේ කෙසේදැයි අපි දනිමූ. අද ඇෆ්ගනිස්තානයට එරෙහිව කරන සටන් තව තවත් වර්ධනය කළ යූතු යැයි බරක් ඔබාමා තම මිතුරු රටවලට කියයි. බූෂ් මෙන්ම බරක් ඔබාමා ද ලෝකයට බරක් බව වැඩිකල් නොගොස් ලෝකයා තේරුම් ගනූ ඇත. බටහිර ක්‍රිස්තියානි නූතනත්වය වෙනූවෙන් පසූගිය අවූරුදු පන්සීයයක කාලයක් තිස්සේ මිලිබෑන්ඩ්ලා විසින් ඝාතනය කෙරී ඇති සංඛ්‍යාව දළ වශයෙන් වූවද ගණන් බැලීමට සූදුසූ කාලයක් පැමිණ ඇත. අප මිලිබෑන්ඩ්ලාගේ බයිලා තුටිටූ දෙකකට මායිම් කළ යූතු නොවෙයි. කොටූවී සිටින ජනයා අතර ඇති කොටි සොයා යන්නේ කෙසේදැයි හමූදාව දනියි. හමූදාව අනූගමනය කළ යූතු ක්‍රියාමාර්ගය කුමක්දැයි ප්‍රසිද්ධියේ සාකච්ඡා කළ යූතු නොවේ. එහෙත් ප්‍රතිපත්තියක් ලෙස අපට මේ අවස්ථාවේදී වැදගත් වන්නේ මිලිබෑන්ඩ්ලාගේ හා අනෙක් සියල්ලන්ගේ උප්පරවැට්ටිවලින් රටේ ස්වෛරීභාවය මේ තිබෙන ප්‍රමාණයෙන් වූවද ආරක්ෂා කර ගැනීමය. එහිදී කොටූවී සිටින ජනයා ඝාතනය වේ නම් ඒ ගැන කළ හැකි කිසිවක් නැත. හැකිතාක් දුරට ඔවූන්ගේ ජීවිත බේරාගැනීම ආණ්ඩූවේ යූතුකමකි. එහෙත් ඒ කළ නොහැකි නම්, ඔවූන්ගේ ජීවිත ආරක්ෂා කිරීම සඳහා රටේ ස්වෛරීභාවය හා කොටි සමූල ඝාතනය කිරීමට ඇති අවස්ථාව පාවා දිය යූතු නැත.

යම් අයූරකින් ප්‍රභාකරන්, ඔහූගේ පූත්‍රයා, පොට්ටූඅම්මාන් වැනි ඉහළම නායකයන් පැනගොස් ඇත්නම් බිරිතානීන් ඔවූන් යොදාගෙන මූහූදින් එතෙර සිට ඊළමක් ප්‍රකාශ කිරීමට කටයූතු කරනූ ඇත. බිරිතානිය එයට සෘජූව මැදිහත් නොවූණ ද එවැන්නක් කෙරෙනූ ඇත්තේ ඔවූන්ගේ අනූදැනූම, අනූග්‍රහය හා උපදෙස් යටතේය. ඇතැම්විට නෝර්වේ රාජ්‍යය ලවා එවැනි ඊළමක් පිළිගැනීමට ද බිරිතානිය කටයූතු කරනූ ඇත. ඒ නැතත් බිරිතානිය ඉන්දියාව ලවා දහතුන් වැනි ව්‍යවස්ථාවෙන් ඔබ්බට යන ඊනියා විසඳුමක් ක්‍රියාත්මක කිරීමට උත්සාහ දරනූ ඇත. ඉන්දියාව ද වයිකෝලා සතුටූ කිරීමට එයට කරගසනූ ඇත. එහිදී ද යම් අයූරකින් මූහූදින් එතෙර සිට ඊළමක් පිහිටූවූවහොත් එවැනි අවස්ථාවක දී ද රජය ඒ සියල්ලටම විරුද්ධව කටයූතු කළ යූතුය. එපමණක් නොව හැකිනම් පළාත් සභා අහෝසි කිරීමට කටයූතු කළ යූතුය. අද මූරලිදරන් (කරුණා අම්මාන්) ඇමැතිවරයා වූවද පවසන්නේ බලතල විමධ්‍යගත කිරීම අනවශ්‍ය බවය. අද නැගෙනහිර පළාතේ කුමක් හෝ සංවර්ධනයක් සිදුවන්නේ එහි පළාත් සභාවෙහි ආනූභාවයක් නිසා නොව ලංකාණ්ඩූව ඒ කටයූත්තට අත ගසා ඇති බැවිනි. පළාත් සභා අහෝසි කිරීම මේ අවස්ථාවේ ගැටලු සහගත නම් ඒවාට දැනට දී ඇති බලතලවලට එහා යන අබමල් රේණූවක බලයක් හෝ නොදිය යූතුය.

ආණ්ඩූවට ඒ ප්‍රතිපත්තියෙහි සිටීමට බලපෑම් ඇති කිරීමට ජනතාවට සිදුවෙයි. සිංහලයන්ගෙන් සියයට හැත්තෑවකට ආසන්න ප්‍රමාණයක් ඒ ප්‍රතිපත්තියට එකඟ කරගැනීමට හැකිනම් ආණ්ඩූවට ඒ ශක්තිය මත පදනම් වී මිලිබෑන්ඩ්ලා පරාජය කළ හැකි බව පසූගිය අවූරුදු දෙකහමාරක ඉතිහාසයෙන් අපට ඉගෙනගත හැකි පාඩම වෙයි. හමූදා මෙහෙයූම්වලට එරෙහිව ඊනියා ජාත්‍යන්තර බලපෑම් තිබූණ ද, සූදු නෙළුම් ගෙන අවලම් තවලම් ගිය ඇතැම් චන්ද්‍රිකා හිතවාදී ඇමැතිවරුන්ගේ කන්කෙඳිරි තිබූණ ද මහින්ද රාජපකෂ මහතාට ජනතාවගේ සහාය විය. පළාත් සභාවලට පකෂ ඇමැතිවරුන් ද මිලිබෑන්ඩ්ලා ද පරාජය කිරීමට එක මතයකට පැමිණි සිංහලයන්ට හැකිය.

------------------------------------------------------------------------------------------------------
තෙරුවන් සරණයි!
මීට දෑහිතකාමී,
චින්තන පර්ෂදය
විද්්‍යුත් තැපෑල: info@chinthana.org
වෙබ් අඩවිය: http://www.kalaya.org/

නැවුම් පෙනුමක් සමඟින් පන්හිඳ

2009-03-22T15:00:00.002+05:30

පන්හිඳෙහි පැරණි පෙනුම බොහෝ කල් එකසර ව රැඳී තිබිණි. පන්හිඳ අරඹා වසරකුත් මාස තුනක් පමණ වන්නට එන මේ මොහොතේ පන්හිඳේ පෙනුම සැලකිය යුතු සෙයින් වෙනස් කරන්නට සිත් විය. කලකට පසුව ලද විවේකයත් බිජුවට කොට, කරළියට පැමිණි නව පෙනුම යි මේ෴

මෙම නව පෙනුම සපුරා ගැනීම උදෙසා, මම "Our Blogger Templates" යන වෙබ් අඩවිය සහාය කර ගතිමි. රිසිකරණය ඉතා පහසු වියමන් (templates) ලබා දෙන මෙම අඩවිය ගූගල්හි බ්ලොගර් සේවාව සාර්ථක ව භාවිතා කිරීම පිළිබඳ සම්පත් රැසක් ද, සපයයි.

මැය සඳහා පසුතලය, මා හට ලැබුණු නවතම තෙවන ඇසින් පුස්කොළ පොත් කිහිපයක් දිස්වන අයුරු දක්වයි.

පන්හිඳේ පෙනුම තව දුරටත් නෙත්කලු කරගනිමින් නව වසරට පිය නැඟීම සඳහා, පන්හිඳ වෙත පියනැඟූ ඔබේ වටිනා අදහස් අපේක්‍ෂා කරමි.

පරණවාඩිය

2009-02-28T15:56:00.005+05:30

අනඳ විදුහල පිහිටි බිම ඈත අතීතයේ හඳුන්වා තිබුණේ, "පරණවාඩිය" ලෙස යි. ඒ පෘතුගීසි හමුදා සමඟ සටනට යන අතරතුරේ දී, පළමු වන රාජසිංහ රජුගේ සේනා ලැගුම් ගෙන තිබුණු තැනක් නිසා බවත් අසා තිබුණා. "පරණවාඩිය" යන්න මෑතක දී යෙදුණු බවක් නම් මා දැන සිටියේ නැහැ.

මේ ළඟක දී පටන් විදුලි ටිකට් යන්ත්‍ර මඟින් ටිකට් නිකුත් කරන බැවින් වෙන දා බොහෝ විට ටිකට් නො දෙන කෙටි දුර (රු. 6ක දුර) ගමන් සඳහා ද, ටිකට් ලබා දෙනු දක්නට ලැබුණා. පාසලේ සිට බොරැල්ලට යාමේ දී මා හට ලැබුණු ටිකට් පතක් පහත සේයාරුවෙහි දක්නට ලැබෙනවා. මෙහි නැවතුමේ නම "පරණවාඩිය" ලෙස දක්වා තිබීම වෙසෙස් කරුණක් ලෙස සිතුණු නිසා මෙහි පළ කරන්නට අදහස් කළා.

පෙම්බර ලක් මව අද දින නිදහස් සුවයෙන් නැළවෙන්නී෴

2009-02-04T23:41:00.004+05:30

නිදහසේ අබිමනින්, දැයක් සැනහෙන මොහොත යි මේ෴ අකුරු සතරේ සීමා බිඳිමින්, ගතට නිදහස දැනුණු සමයයි මේ෴ හිස ඔසවා "නිදහස නිදහස" යි, උසුරුවන්නට හැකි වූ දින යි මේ෴ උස් නිදහස පිණිස කැපවූවනට පන්හිඳෙන් පිදෙන මල් මිට යි මේ෴

සිහ	දද	ලෙළෙන නිලඹර දැකුමත් සුව	දේ
සිහ	දද	පෙළින් පෙළ හැම නිවසක ලෙළ	දේ
සිහ	නද	නඟා සතුරන් බල බිඳි	නිබඳේ
සිහ	එඩි	සපිරි සුරු රණ විරුවන් සැර	දේ

කෙ සේ අමතක කරන්නෙමු ද අපි?

2008-12-26T12:43:00.005+05:30

මින් සිව් වසරකට පෙර වූ සුනාමිය, ලක්වැසි අපට අමතක කරන්නට බැහැ. ඒ වෙන දා මිතුරු සයුර සතුරු ව, ලක් බිම් කරා විත්, අපෙන් කොටසක් රැගෙන ගිය නිසා. එදා අප හැර දා ගිය ලක්වැසි, ලෝවැසි සියලු දෙනා සිහි කරමු මෙ ලෙසින්෴

රුදු රළ පෙරළෙමින් එන විට අප	හැඬුවා
රළ පෙළ අතර ගිලෙමින් බුදු ගුණ	ගැයුවා
අදහන නො යෙක් දෙව් ගුණ ගයමින්	යැදුවා
සැඩ රළ පහර එක් සොහොනක යට	කෙරුවා

රට වට සයුර මිතුරුව සිටි මුත් වෙන	දා
අප හැඬවුවා රුදු රළ පහරින් එම	දා
ගෙන ගිය සොහොයුරන්, සෝයුරියන් අප	දා
අමතක වන්නෙ නැහැ සිහි කරනෙමු සැම	දා

හදවතින් අප යුද බිමේ ඔබ තනි කළේ නැත කිසි දිනේ෴

2008-11-18T18:03:00.005+05:30

මේ රණවිරු සතිය යි. රට රකින සෙන් මුළු දකුණේ සිට උතුරට, උතුරේ සිට දකුණට, නො කැඩි බිම් තීරුවක් ලක් මව වෙත ලබා දුන්හ. බටහිර වෙරළ තීරය කොටි පිළිලයෙන් නිදහස් විය. ඒ වෙනුවෙන් රට රකින රණවිරුවන්ට පන්හිඳෙන් කෙරෙන උපහාරය යි මේ.

පෑ	විකුම් ඇති රණ තෙදින් ඔද රුපුන් මඬිනා	වීරයින්
රෑ	දිවා නො බලා සටන් වදිනා දැයේ	වාසනාවන්
මේ	විකුම් පුතණුවන් ලක් මව පුද කරමු ඔල්වර	හඬින්
නෑ	දුරක් දිනනා දිනත් උතුරත් වසා සිහ දද	පෙළින්

අබා - මගේ මතය

2008-10-19T23:34:00.002+05:30

අබා නැරඹුවෙමි. රස නො වින්දෙමි. හේතු කිහිපයකි.

බොහෝ රටවල් තමන් නිපදවන ඉතිහාස සිතුවම් පට මඟින් තම ඉතිහාසය අබිමන ලොව හමුවේ පෑමට තැත් කරයි.

එහෙත් අබා හි දක්නට ලැබුණේ මීට හාත්පසින් ම වෙනස් දෙයකි. ඉතා නොදියුණු වනසැරි ජන කොටස් ලෙසින් සිංහළ රැස හඳුන්වා දී ඇත. මෙහි දැක්වෙන ගැමියන්ගෙන් සියයට අනූවක් අමුඩ ගසා ගත් උදවිය යි. කාන්තාවන්ගේ ඇඳුම් ද නොදියුණු කම පිළිබිඹු කරන කැටපත් වැනි යි.

අප සතුව තිබූ අබිමන් සමහරක් මෙම සිතුවම් පට තුළින් දැන හෝ නො දැන හෝ මැකී ඇත්තේ ඒ ලෙසිනි.

මේ සඳහා තවත් පැහැදිලි නිදසුනක් නම්, පඬුවස් දෙව් රජුගේ සිරි යහන් ගැබ, සී මැඳුරු කවුළුව හා රජ මාළිගය යි. රජුගේ යහන් ගැබ පිහිටා ඇත්තේ ගල් ගෙයක් තුළ යි. ගලක් මත මඬුවක් ඇටවූවා වැනි යි. සී මැඳුරු කවුළුව පලංචියක් වැනි යි. රජ මැඳුර උණ බට හා මැටියෙන් තැනූවකි. එහෙත් අවිවාදයෙන් ම පඬු අබා කතාවේ කාලයේ දී මීට වඩා දියුණු ගොඩනැඟිලි සිප්ලකුවක් අප සතුව පැවතිණි. උණ බම්බු හා මැටි යොදා ගෙන එක්-ටැම්-ගෙවල් තැනිය නො හැකි යි. එහෙත් චිත්‍රාව සිර කොට තැබූ විසල් එක් ටැම් ගෙහි නටඹුන් තවමත් පඬුවස් නුවර ඇත.

තවත් හේතුවක් නම් අදාළ නො වන්නා වූ සංකේත යොදා ගැනීම මඟින් අප උරුමයට එල්ල වන සියුම් පහර යි. චිත්තරාජ හිස ගසා දැමීමට ගෙන එන්නේ, අත් වලට දඬු කඳක් දමා, පයට විලංගු දමා යි. දඬු කඳ කර මත තබා ගෙන තිබෙන අයුරු කුරුසයක් කර තබා ගෙන ඒමට සමාන ද? ගැටළුවෙකි. ඒ කෙසේ වෙතත්, හේ දඬු කඳත් කර තබා ගෙන තමන්ව මැරීමට නියමිත කන්ද මතට පැමණීමේ දීම, කාන්තාවන් කිහිප දෙනෙකු හඬා වැලපෙමින්, පැමිණ ඔහුගේ පා වැළඳ-ගනිමින් ඔහු යන මඟ තම කෙස් අතුරා ගෙන සිටීම නම් නරඹන්නන්ගේ සිත් කුකුසින් ඇළලුවා වන්නට ඇත. එසේ ම අංජනම් බලන්නා ද, පිටරට හැදියාවක් පිළිබිඹු නො කරන්නේ ද?

අවසන් හේතුව නම්, මෙහි දක්නට ලැබෙන වනසැරියාවේ අග තැන් පත් පෙම් ජවනිකාව යි. හබරා හා භුම්බකභූතා (නම් කෙසේ සැපයූවේ දැයි නො දනිමි.) යන දෙ දෙනා පෙම් බස් දොඩන්නේ තිරිසනුන් මෙන් ගෙරවීමෙනි, රැවීමෙනි. භුම්බකභූතා සිය පෙම්වතා අමතන්නේ, “උලමෝ”" කියා යි. මෙය කොතෙක් දුරට තාත්විකදැයි, මා නො දන්නේ මා හට ජැක්සන් ඇන්තනි මහතාට තරම් පෙම ගැන අත්දැකීම් නොමැති නිසා යි.

කෙ සේ වෙතත්, නිමැවුම්කරුවාට තම නිමැවුම තමාට රිසියුරු කිරීමට නිදහස තිබේ. එ නිසා එම සිතුවම් පට, මා හට රස විඳිය නො හැක්කක් මිස, සිතුවම් පටයක් ලෙස නරක නිමැවුමක් දැ යි, එක හෙළා කීම අපහසු යි. ඔබත් බලන්න, අදහස් පවසන්න.

ඉහත කී අඩුපාඩු තිබුණ ද, අබා සිතුවම්පට නිසා, ඉතිහස් කතා සිරිලක් තිර මතට ගෙන ඒමට තවත් අය ඉදිරියේ පෙළඹෙනු ඇති. මෙය අබා මඟින් සිදු වූ යහපතකි.

සිරි ලක් වැනුම්

2008-10-05T00:05:00.002+05:30

කලෙකින් වියුණු සටහනක් නො තැබීමේ අඩුවත් මැකීමට, ම විසින් රසැයුණු පැදි පෙළක්෴

සසිරි	අසිරි	ඉසුරු	සපිරි	මෙ බිම	ම බිම	සිරි	ලක	යි
සුරන	විමන	සදිසි	ලකල	රුසිරු	දෙරණ	සිරි	ලක	යි
සිරිනි	නො මඳ	දියත	පතළ	ලොවට	පහන	සිරි	ලක	යි
පවතු	මෙ කප	වැජඹ	වැජඹ	මෙ ලොව	මැණික	සිරි	ලක	යි

කළු ද, කැළණි, වලවේ මහවැලි සේලය	ඉණ වට යි
සිරිපද පියුමැති සමනොල බැඳි නිල් කෙස්	මුදුනට යි
සුදු වැලි විසිරුණු වෙරළ'ස ඉසි ගෝමර	සිහි කරයි
ලොව රුසිරු ම අඟනන'තුර සුදිලි තරුව	ලක'ඟන යි

ජය සිරි මා බෝ පත් ලෙලෙනා	හඬ	හද	රාවය	යි
දළ දා හිමිගේ සුදු බුදු රැස්	ලක්	දිව	අනුහස	යි
දෙව්රම් රන්මැලි ඈ සුවිසල්	සෑ	අප	උරුමය	යි
නැවත නැවත උපදිමි මම මව්	බිම	මගෙ	සිරි ලක	යි

කුමරතුඟු ගුණ සමරමු

2008-07-25T13:45:00.003+05:30

අද දින වෙසෙසි දවසෙකි. හෙළයට දිවි දුන් විසි වන සිය වසේ මහ පඬු වූ කුමරතුඟු මුනිදසුන් මෙ ලොව පහළ වී අදට වසර එක සිය විසි එක යි. මේ වෙසෙස් බව නිසා ම ඔහු ගුණ සමරන්නට අද සටහන වෙන් වේ. දෙසට - බසට - රැසට අනගි මෙහෙයක් කළ මේ මහා වියතාණන් ගේ ගුණ අපමණ යි. ඒ ගුණ වනන්නට මා නුසුදුසු යි. එ නිසා කුමරතුඟු ගුණ ගැයෙන මේ ගීය උපුටා දක්වමි. එය කුමරතුඟු නමට මල් දමක් ම වේ වා!

කුමරතුඟුන් ගේ අගේ
දවසැ දවසැ හෙළ දැයේ
ඉර වගේ හඳ වගේ
ජයට පතළ වේ

මගෙ රට මගෙ දැය නිසා
යුද වැද සතුරන් නසා
ම දිවි ගියත් කිම අසා
දැයට පණ පෙවූ

කුමරතුඟුන් ගේ අගේ...

බසේ අවුල් ගැට මුදා
රැසේ ඇළුම් ගෙන බදා
දෙසේ සැබෑ කොට උදා
තෙ රුවනක් මැ වූ

කුමරතුඟුන්ගේ අගේ...

දෙවියකු කීවත් එපා
පිළිගන්නට දෙස් නොපා
එ හඬින් අඩි බිම දපා
හෙළ මොළ මෙළැ වූ

කුමරතුඟුන්ගේ අගේ...

නොයෙක් නොයෙක් දේ බදා
බිඳුණු මෙ දැය බස සදා
එකට එකතු කොට යොදා
හෙළ හවුල් මැවූ

කුමරතුඟුන්ගේ අගේ...

පද: අරීසෙන් අහුබුදු සූරීන්
හඬ: සුනිල් සාන්ත සූරීන්

ඒත් සමඟම කුමරතුඟුන් ගේ උදාර බව පෙන්වන්නට ඔහු ලියූ අනගි කවි කිහිපයක් එක් තැන් කොට දක්වමි. කුමරතුඟුහු දෙස - බස - රැස යන තෙ රුවන ඇදැහූ හ. දෙසට - බසට - රැසට ඉමහත් පෙමක් දැක් වූ හ.

මා දෙස හෙළ දෙස වෙන කිසි දෙසකට
මා බස හෙළ බස වෙන කිසි බසකට
මා රැස හෙළ රැස වෙන කිසි රැසකට
මේ හිස නො නමමි නො නමමි කිසි විට

හේ පිට රටට ගැති කම් කිරීම නො ඉවසුයේ ය.

මෙහි වියූ පිළිය
ඇඟැ නො ලා මැළිය
පිට රටින් විළිය
වැසුමැ නෑ එළිය

සිය රට සැම විට අගය කළේ ය.

අපට කුමට සැප නිකමුන් ලගිනා අර සුර ලොවේ
අපට කුමට ලෙඩට දුකට ඇරුණු දෙරණ දඹ දිවේ
තව ද නොයෙක තැන් ඇති ලොවැ ඉනෙ'කකට ද රිසි නො වේ
සිරි සර ඇති සුව සැප ඇති විසිතුරු ඇති හෙළ දිවේ

හෙළ බසට ඇලුම් කළේ ය.

හෙළ රටැ හෙළ ගෙයි හෙළ ඇඳැ සැතැපෙන
මගෙ මව මට දුනු හෙළ බසැ ගී
මැලැවිලි දුරු කැරැ සැනැසිලි ගෙනැ දිනි
මිහිරි යැ මිහිරි යැ රස අනැඟී

හෙළය රක්නට අනුන් ද යොමු කළේ ය.

රටට දැයට හිත දපා
මඳකට දිවි ලොබ ලොපා
කළ මෙහෙයක් නැති දෙ පා
හෙළයකු දැකුමත් එපා

කුමරතුඟු ගුණ හෙළ මුවග රැව් දේ වා!

සිංහල ද? සිංහළ ද?

2008-07-24T10:25:00.008+05:30

බොහෝ කලක සිට විවාදයට තුඩු දුන් කරුණෙකි෴ පන්ති වාර්තා පොතේ සිංහළ කියා ලීවාට සිංහළ ගුරුතුමියගෙන් වරක් බැනුම් ඇසුවාත් මතකයි!

මේ වදනට රූ දෙකක් ආවේ කෙසේ ද? නිවැරදි කිමෙක් ද? විමසන්නට යි මේ වියුණු සටහන෴

රටකට බසකට නම සැදෙන්නේ ඒ රටේ රැස නිසාවෙන්෴ (ස්පාඤ්ඤය - දෙස, ස්පාඤ්ඤ - බස, ස්පාඤ්ඤ - රැස සලකා බලන්න෴) අතීතයේ සිරි ලකට කීවේත් සිංහළය කියා෴ එහි දිවි ගෙවූවන් සිංහළුන් ද, ඔවුන් දෙඩූ බස සිංහළය ද, වූ වා෴

දැන් බලමු සිංහළය කියන වදනේ පිරිනමුව:

හෙළ කියන්නේ මුල්(ප්‍රකෘති) කියන වදනට සම අරුත් ඇති පදයක්෴ මිනිසෙකුගේ මුල් සොබාව(ඉපදුණු හැටි) තමා හෙළුව කියල කියන්නේ෴ මේ වගේම මෙ රටේ ඈත අතීතයේ දිවි ගෙවූ මුල් මිනිසුන් හැඳින්වූයේ හෙළයින්

මේ හෙළයින් කොටස් හතරක් සිටියා:

යක්
නා
අසුර
රකුස්

මේ කොටස් හතරම පොදුවේ සිවු හෙළයින් කියා හැඳින්වූ වා෴ (පඬු අබා රජුගේ කල සිට එක් එක් ගොතේ නම් වෙනුවට සිවුහෙළයින් යන නම් වැඩියෙන් යෙදූ බව කියැවේ෴)

සිවුහෙළ සිංහළ වූයේ කෙ සේ ද?

1.) සිවුහෙළ යන්න සීහෙළ වූ වා,

ඒ සිවුපද > සීපද වුණා වගේ , සිවුරැස්ස > සීරැස්ස වූ වාක් මෙන්෴

අද සීහෙළයෝ ඇසින් - තෙමෙති යුදෙකැ යන බසින්

සීහෙළ යන්න වහරේ පවතින බවට ඉහත කවි දෙ පදය නිදසුනක්෴

2.)සීහෙළ යන්න සීහළ වූ වා෴

මෙය පර රූ කියන වියරණ විදියට අනුව සිදු වූ දෙයක්෴

නිද: මහෙසුරු > මෙහෙසුරු, ගියහොත්>ගියොහොත්(ගියොත්), බලෙන්>බෙලෙන්

(සීහළ යන්න සීහළට්ඨකථා, සීහළ සංඝ වැනි තන්හි දක්නට ලැබේ෴)

3.)සීහළ යන්නෙහි දිගු සර(ස්වර) කෙටි වීමේ දී බින්දුව එක් වී සිංහළ වූ වා෴

ඒ දු > එයිදු වීමේ දී 'යි' එක් වූවා ක් මෙන්෴ ගීපොල් > ගිංපොල් වූවා ක් මෙන්෴

මේ අනුව සිවුහෙළ යන්න මුල් දන කොටස් සතරක් සිටීම නිසා ලැබුණු බවත්, එතැන් සිට සිවුහෙළ යන්න,

සිවුහෙළ > සීහෙළ > සීහළ > සිංහළ

වූ බවත් බස් සතර(භාෂා ශාස්ත්‍රය) අනුව පැහැදිලි කළෙමි෴

දැන් විමසමු සිංහල යන්න හැදුණේ කෙසේ ද කියා:

සිංහළ යන්න පාළියට හැරවූ විට සීහළ වූ වා (ඉහත සීහළ සංඝ වැනි නිදසුන් දැක්වූ වා)෴ ඒ, පාළියේ දතේ ල-යන්න මෙන්ම මුදුන් ළ-යන්න තිබුණු නිසා෴

එහෙත් එය සකුවට නැඟූ කල, සිංහල වූ වා෴ ඒ, සකුවේ තිබුණේ දතේ ල-යන්න පමණක් නිසා෴ සකුවේ අඩු පාඩුව නිසා සකුවෙන් සිංහ"ල" කියා ලියනු දුටු පර ගැත්තන් එසේ ලියන්නට පටන් ගත්තා පමණක් නොව එය සිංහළ පෙළ පොතේ ඉදිරි පිටටත් දමා ගන්නට සමත් වූ වා෴

විමසමු෴ විමසා නිවැරදි කිමෙක් දැයි වටහා ගනිමු෴

එකතුවක් (2008 - 07 - 25):
හෙළ හවුලේ පඬුවන් හැර අන් අය ද, සිංහළ යන්න යොදා ගත් බවට සිරිමත් ඩී. බී. ජයතිලකයින් ලියූ "සිංහළ සාහිත්‍ය ලිපි" නමැති ගත නිදසුනි. එහි මුල් පිටෙහි සේ රුවක් ලිපිය මැදට එක් කළෙමි.
තව ද, ඉහත තොරතුරු පිළිබඳ නිදනස ගැන සැක අදහස් ලෙස පළ වී තිබුණෙන් ඒ පිළිබඳව ද, යමක් සඳහන් කරමි.

අද සීහෙළයෝ ඇසින් - තෙමෙති යුදෙකැ යන බසින්

යන්න කුමරතුඟු මුනිදසුන් ගේ හෙළ මීයැසිය පළමු වන වෙළුමෙන් උපුටා ගන්නා ලදී. අනෙකුත් නිදසුන් වහරෙහි පවතින වදන් ඇසුරෙන් දක්වා ඇත. වදනේ පිරිනමුව පිළිබඳ මුල් අදහස අරීසෙන් අහුබුදුවන් ගේ 'අරුත නිරුත' පොතෙනි.

දා - මුදුන් - දතැගි

2008-07-20T22:23:00.003+05:30

ළඟදී මුදුන්-දතැගි බෙය ගැන නොයෙක් වාද විවාද අඩුවක් නොමැතිව දක්නට ලැබිණි. ඉඩ ලද පමණින් යමක් එක් කරන්නටත් අමතක නො කළෙමි.

එසේම, සිහළ බොදු පිරිගණින්නන් වන අපට අමතක නොකළෑකි වැදගත් සිදු වීමක් ඇසළ පුන් පෝ දා සිදු විණි. දන්නෝ දනිති. බෝ සතුන් පෙරුම් දම් පිරූ දා කතා ඇතුළත් පන්සිය පනස් දා ව තුරුදැලට එක් විය.

මේ දෙක අතර සබැඳියාව කෙබඳු ද? සිතා ගන්නට නො හැකි යි. එසේ නො හැකි වූ වා නම් එය වාසනාවකි. එහෙත් අහෝ! අවාසනාවක මහත! පන්සිය පනස් දා පොතේ තුරු දැල් සැකැස්ම මුදුන්-දතැගි බෙය තඹ සතයකටත් මායිම් නො කොට ලියන ලද්දකි.

බොහෝ දෙනාගෙන් ලැබුණු උපදෙස් මත පළමු අපණ්ණක දාවෙහි නමෙහිම තිබුණු වරද නිවැරදි කර ඇත. එහෙත් එහි කතාව කියවාගෙන යාමේ දී වියරණ අමතක කොට ලියූ කුණු හරුප බෙහෙවින් ඇත.

නිදසුන ලෙස දක්වා ඇත්තේ අපණ්ණක දාවෙහි තිබී සමුවුණු වරදෙකි.

...මනුෂ්‍යයන් හා ගොන්ද බත් හා තන කවා මනුෂ්‍යයන් මධ්‍යය යේ...

කවර කුණු හරුපයක් ද? අසන්නට ඇත්තේ එකම පැනයකි, තන කැව්වේ ගොනුන්ට ද? මිනිසුන්ට ද? පෙරුම් පුරන බෝ සත්හු මෙබඳු කැත වැඩක් කරත් ද? මේ වන් කුණු අදහස් මතු වන සේ දා පොත තුරුදැලට එක් කළේ කවු ද? ඔහු මින් යම් විඳීමක් ලැබුවා දෝ සැක ද, මතුවේ.

මිනිසුන් ලියන විට දී මීට වඩා අකුරු විනස ගැන සැලකිලිමත් විය යුත්තේ එබැවිනි. නූගතා තන යන්නෙන් බිම වැවෙන පැළෑටිය යන්න අදහස් වේ යැයි ගනු ඇත. එහෙත් උගතා දනී තනෙහි හා තණෙහි වෙනස. අමාරුවේ වැටෙන්නේ උගතා යි. උගන්නා යි.

මෙහි බරපතල කම දැන් හෝ වැටහෙනු ඇත. දහස් අවුරුදු සුරැකිව තිබූ දා පොත කන්නට වියරණ නො සැලකූ (නො දන්නවා වීමට නො හැක) පඬුවකු සමත් වූ හැටි!

වරදක් ඇතොත් කමත්වා!

නුමුසු වදනින් - නිවැරදි නියරින්

2008-06-13T19:03:00.004+05:30

මගේ වියුණු සටහනෙහි ලිපි පළ කිරීමේදී අද පටන් වෙසෙස් වෙනසක් කරන්නට සිත් පහළ විය෴ ඒ නුමුසු වදනින් ලිපි පළ කෙරුම යි෴ වෙනත් අයුරකින් කියතොත් සකු බසේ හෝ පෙළ බසේ හෝ ඉග්‍රීසියේ හෝ පිහිටක් නො ගෙන සිංහළ වදනින් ම ලිපි රසැයීම යි෴

මෙහි දී මම මගේ වියුණට පැමිණෙන සියලු දෙනා ගෙන් සුළු උදව්වක් බලාපොරොත්තු වෙමි෴ මා අතින් වැරදීමකින් හෝ නුමුසු වදනක් ගැන තිබෙන නොදැනුවත්කම නිසා හෝ මුසු වදනක් පළ වුණි නම්, ඔබ ඒ වදන සඳහා වන විකල්ප වදනක් දනී නම්, අදාල ලිපිය යටතේ අදහසක් ලෙස එය සඳහන් කරන්න෴ එ පමණක් නො වේ෴ තවත් වෙසෙස් උදව්වක් අවැසි ය෴

මා හැකි තාක් දුරට දන්නා වියරණ නියර නො බිඳා රසැයුමට තැත් කරමි෴ එහෙත් අතපසු වීමකින් හෝ නොදැනුවත්කම නිසා හෝ වියරණ බිඳීමක් සිදු විය හැක෴ මෙහි දී පද බෙදීමේ දොස්, අකුරු වින්‍යාසයේ (නුමුසු වදනක් දතොත් දන්වන්න) දොස් සහ අනිකුත් වියරණ විදි බිඳීම් මුල් කොට සලකමි෴ මෙබඳු දොසක් ගැන වුව ද, අදහස් යටතේ මා හට දන්වන්න෴ ඇතැමුන් මෙන් දොස් පෙන්වා දීමේ දී කිපෙන්නෙක් නොවෙමි෴ එහෙත් වැරදි අදහස් ලෙස පළ කිරීමට මැලි නම් විදුලි පණිවුඩයක් (විද්‍යුත් තැපැල්) හෝ එවන්නේ නම් මැනවි෴ මන්ද, ඒ සුළු උදව්ව මගේ බස පිළිබඳ දැනුම වැඩි දියුණු කිරීමටත්, වැරදි සිංහළ සහිත දේ තුරුදැලට (අන්තර්ජාලයට) එක් වීම වැළකීමටත්, උදව් වන බැවිනි෴

මේ වියුණු අඩවියේ ලිපියක හෝ වෙනත් කිසිම තැනක හෝ ඉහත සඳහන් කළ කරුණු දුටොත් ඒ ගැන ද, මැලි නො වී දන්වන්නේ නම් එ ද, මහඟු උදව්වකි෴

සිංහළ පෙරැළියක රඟ

2008-06-01T00:48:00.004+05:30

කොතැනකවත් තිබුණු පෙරැළියක් නෙමෙයි - ශ්‍රී ලංකා පරිගණක සංගමයේ නිල වෙබ් අඩවියේ තිබුණු එකක්!

මෙහි "පමා" දොස් 12ක් මා හට දැනට දක්නට ලැබුණු අතර, ඉන් 11ක් රූප සටහනේ 1 සිට 11 තෙක් යොදන ලද අංක වලින් පෙන්වා ඇත෴ ඒ එකිනෙක පිළිබඳ විස්තරයක් සියල්ලන්ගේම දැන ගැනීම පිණිස පහත දක්වමි෴

1. "ලේකණයේ" යන්න "ලේඛනයේ" විය යුතු යි෴

2. "කුසලතාසෙවුම" යන්න "කුසලතා සෙවුම" ලෙසින් පද වෙන් කොට දැක්විය යුතු යි෴

3. "සන්දානය" යන්න "සන්ධානය" ලෙසින් නිවැරදි විය යුතු යි෴

4. මෙහි "පාසල" යන්න "පා සල" විය යුතු යි෴ එසේම රූපයේ නොයෙක් තැන් ව්ල් "පාසල" සහ "පාසැල" යන යෙදුම් දෙකම භාවිතා කර ඇති බව පෙනේ෴ "පාසැල" යන්න ඉතා වැරදි අරුතක් දෙන අතර "පාසල" යන්න ද පද වෙන්කර ලිවීම වඩා සුදුසු බව මගේ මතය යි෴

5. "කරවි" යන්න "කරවිය" විය යුතු යි෴

6. "කණ්ඩායමක්මක්" යන්න "කණ්ඩායමක්" විය යුතු යි෴

7. "ගැටළු සතර ලබා දෙනුයේ .... භාෂා උපයෝගී කරගෙන" නොව ".... භාෂා අතුරින් එකක් උපයෝගී කරගෙන විසඳීමට යි" ... එ නිසා මෙය ද කියවන්නන් නොමඟ යවන සුළු වගන්තියකි෴

8. අවසන් තරගය යැයි කීමට නම් ඊට පෙර ද, තරග තිබිය යුතු යි෴ එහෙත් මෙය එබඳු තරගයක් නො වේ෴ එසේම "තරඟ" යන්න "තරංග" යන අරුත දෙන බැවින් මෙහි දී "තරග" යන අරුත දීම පිණිස යෙදීම නො වටී෴

9. "ලියාපදින්චි" යන්න "ලියාපදිංචි" යනුවෙන් නිවැරදි විය යුතු යි෴

10. අඩවි ලිපිනය ලබා දී ඇත්තේ "www,cssl.lk" යනුවෙනි෴ (තිත වෙනුවට කොමාව යොදා ඇත). එසේම "ෆෝරමය" යන්න වෙනුවට "අයදුම් පත" යනුවෙන් යෙදුවේ නම් වඩා සුදුසු ය෴

11. "SEARCC තරඟාවයට" යන්න "SEARCC ISSC තරගයට" යනුවෙන් සඳහන් විය යුතුය෴ (SEARCC යනු තරගයේ නම නොවන බැවින්)

12. (රූප සටහනේ දක්වා නොමැත - "SEARCC ජාත්‍යන්තර තරඟ සඳහා සහභාගී වීම:" යන ඡේදය බලන්න) - මෙහි තරගයේ නම දක්වා ඇත්තේ NSCC ලෙසයි෴ මෙය NSSC (National Schools' Software Competition) විය යුතු යි෴

මේ වැරදි පිළිබඳව මාගේ අදහස නම් මේවා නොදැනුවත් කම නිසා නොව නොසැළකිල්ල නිසා සිදු වූ ඒවා බව ය෴ එහෙත් ශ්‍රී ලංකා පරිගණක සංගමය විසින් සංවිධානය කරන වැදගත් තරගයක් පිළිබඳව තම නිල වෙබ් අඩවියේ පල කෙරෙන දැන්වීමක් මීට වඩා හොඳ මට්ටමකින් විය යුතු බව මගේ අදහස යි෴

ප.ලි. : මෙහි තවත් එක වරදක් ඇත෴ හැකි නම් සොයන්න෴

වෙසක් පොහෝ දින දිනූ සේක ලොව බුද්ධ දිවාකරයාණෝ

2008-05-20T01:33:00.002+05:30

බුදු පිරිනිවනින් වසර දෙදහස් පන්සිය පනස් දෙවසක් ගත වූ අද දිනත් අපි වෙසක් උළෙල බැතියෙන් සමරන්නෙමු෴ බුදු තෙමඟුල සිදු වූ ඒ උතුම් දිනය උදෙසා ලියැවෙන වියුණු සටහනයි මේ෴

ලුම්බිණි සල් උයන මල් බරව බැබලුණා
සල් මල් සුවඳ උයනත විසිර විහිදුණා
ලොව්තුරු සුවඳ විහිදෙන කුසුම දිස්වුණා
තිලොවග රදුන් මෙදියත එදින බිහිවුණා෴

පුන් සඳ නිසා නිලඹර සොබව දිස්වුණා
පෙදෙසෙහි ගයා නිහැඬිය නොමඳ පැතිරුණා
විදසුන් තෙදින් වසවත් මරහු පැරදුණා
තිලොවග සමිඳු කෙළෙසුන් නසා බුදු වුණා෴

කුසිනාරාව නිහඬව එදා වැළපුණා
සල් මල් සමිඳු සිරුරට කෙමෙන් ගිලිහුණා
පුන් සඳ එළිය පරදන එළිය නිම වුණා
තිලොවග කුසුම පෝ දා ලොවින් පරවුණා෴

වහරනුසෙරෙන් සපයා - පසු වදනක්

2008-05-13T02:40:00.006+05:30

සපයනුයේ කවර වහර අනුසෙරෙන්‍ ද? නිවැරදි වීම උදෙසාම විද්වත් වහර ගුරු කර ගතිමි. එනිසාම මෙය විද්වත් වහරින් ගත් උපුටන සහිතව ලියමි. විද්වත් මතය නම් සිංහළ භාෂාව ඇතුළුව බොහෝ භාෂා වල වදන් ගත් කල්හි, ඒවා ප්‍රකෘතිය අනුව ප්‍රභේද තුනකට බෙදිය හැකි බව යි.

සිදත් සඟරාවෙහි දැක්වෙන අයුරු නම්, සිංහළයෙහි වියරණ විදි විස්සකි :-

*2. එ බැවින් සන් සඳ - ලිඟු විබත් සමස් පියෙවි
පස කිරිය ලොප'දෙස් - අගම් පෙර රූ දෙ රූ පෙරැළි

වැඩි අඩු නිපා නියම් - අනියම් අවිදුමන් විදි
වී විසි වැදෑරුම් - වියරණ විදින් සපයා

මින් සය වැන්න පියෙවි යි. එනම් ප්‍රකෘති යි.

*12. පියෙවි දෙ වැදෑරුම් දා පියෙවි සද පියෙවි වී.

*13. පද යොන් දා පියෙවි නම්.

*14. විබතෑනට ඇසිරු සද පියෙවි නම්.

*15. වෙන වෙන දෙක නිපන් - තසම තබවැ යි එ තෙබේ
කිසි අන් බසින් නුමුසු - හෙළ දිවැ පළ නිපන් නම්.

මගද සකු ඈ බණ - සම වූ බස තසම නම්
බිඳුණේ තබව නම් වී - විමසා දනු එහි පියෝ.

*16. රුකුර - නරඹ ඈ නිපන් දා පියෙවි නම්.

*17. යා - දා - කර ඈ තසම දා පියෙවි නම්.

*18. දන - නැඟි - සමර - තුලුර ඈ තබව දා පියෙවි නම්.

*19. කොළොඹ - කරළු ඈ නිපන් සද පියෙවි නම්.

*20. ගජ - කර - කිරණ ඈ තසම සද පියෙවි නම්.

*21. අත් - රුක් - සමන්බහදුරු - ඇදුරු - කන් - ඇඹුල් ඈ තබව සද පියෙවි නම්.

මේ සිදත් සඟරායෙහි පියෙවි අඳුන්වා දෙන අයුරුයි.

දැන් කුමරතුඟු මුනිදසුන් ගේ හි "ව්යාකරණ විවරණයේ" එතුමා මෙසේ සඳහන් කරයි.

සැලැකිය : ප්‍රකෘතියක් යනු දේශීයද, අනුපාතිත ද, ආනීත ද යනු මහා විශාරදයන් විසින් විනිශ්චය කළ යුත්තෙකි. ඇතැම් විටැ එ බඳු විශාරදයන්ගේ විනිශ්චයය ද වෙනස් කළ යුතු සේ පෙනේ. සියලු ලොවෙහි සියල්ල කවුරු දනිත් ද? එකෙක් එක් ප්රකෘතියක් දේශීය යැයි සිතයි. වෙන භාෂාවෙකැ එයට ආසන්න ප්රකෘතියක් දුටුවෙක් එය ආනීත බව මැ කියා-සිටී. ඒ කියුම් ද තවත් දහසක් කරුණු නො විමසා සැබෑ මැ යැ යි පිළිගත නොහැකි යැ. භාෂා කිහිපයෛකැ සර්වසම වූ හෝ ඒක-දේශ-සම වූ හෝ ප්රකෘති ඇති වීම ස්වභාවානුකූලයි. ඒ ප්රකෘති අතුරින් සමහරක් අතීත භාෂාවෙකින් පැමිණි සේද සිතියැ හැකි යි. පවත්නා එක් බසෙකින් තවත් බසකට පැමිණීම ද, නොහැකි නො වේ. පැරණි බසෙකින් අලුත් බසකට ද යනු නොබැරි යැ. එහෙයින් නුවණට හුරු වනුයේ, නො බිඳියැ හැකි, සැක නො කළ හැකි, සාක්ෂ්ය නැති තන්හි, භාෂාන්තර සාම්යය පමණක් දක්වා නැවතීම යැ.

සිදතෙහි එන "වහර'නුසෙරෙන් සපයා" යන්න ගැනද යමක් සඳහන් කළ යුතුය. මෙය සිදතෙහි පළමු කවියෙහි අවසන් පදයයි.

*1. සද'රුත් විදි සියල් - අනුරූ සේ පියෝනන්
ඉති සන් සඳ සමස් ඈ - වහර'නුසෙරෙන් සපයා

මෙය පැහැදිලි කිරීම සඳහා 1969 පෙබරවාරි 24 දින ශ්රී ලංකාදීප පුවත් පතෙහි වියරණ විනය (මහානාම) ලිපියේ උපුටනයක් දක්වමි.

කෙනෙක් 'සිදත් සඟරාවේ' එන 'වහරනු'සෙරෙන් සපයා' යන්න පමණක් දක්වමින්ම් බසේ වියරණය වහර අනුව සකස් කරගත යුතු යැයි කියති. එහෙහ් 'සිදත් සඟරාවේ' එය සඳහන් වන්නේ 'සද'රුත් විදි සියල් - අනුරූ සේ පියෝනන් - ඉති සන් සඳ සමස් ඈ - වහර'නුසෙරෙන් සපයා' යනුවෙනි. 'සේ පියෝනන්' යනු ඡේක ප්රයෝග හෙවත් උගතුන්ගේ යෙදුම්ය. එබැවින් අනුව යා යුත්තේ උගතුන්ගේ වහර මිස නූගතුන්ගේ වහර නොවන බව පැහැදිලි ය. ලිවීමේදී උගතුන්ගේ යෙදුම් අනුව යා යුත්තේ එය සම්මත වහර බැවිනි. එය ජනවහර යැයි තෝරා දීමට යෑම දිව යට සඟවා ගෙන දෙඩීමට තැතනීම වැනි ක්රියාවෙකි. ජන වහර ඒකාකාර නොවෙයි. ඇතැම් පෙදෙසක වහර තවත් පෙදෙසක වහරට ඉඳුරා වෙනස් ය.

එහි තව දුරටත් මෙසේ ද, සඳහන් වෙයි...

"සිංහල ව්යවහාරයට සම්මතයක් වුවමනා නැත", ඕනෑම කෙනෙකුට තමා සිතන පතන විදියට ලිවීමේ නිදහස තිබිය යුතුයැයි කියමින් ඉහළ පෙළේ සිංහල උගත්තු පිරිසක් අමෝරා ගත් 'මොට්ට' අවි ඇතිව සටන් බිමට පිවිස සිටිති.

මාගේම අදහස් දැන් දක්වමි. වරදක් ඇත්නම් පෙන්වන්න. දොසක් ඇත්නම් කමන්න. තරහ ගන්න නම් එපා.

මාගේ අදහසට අනුව සිංහළ සිප්යුරු වදන් තැනීමේදී තත්සමය පාවාදී ඉංග්රීසි වචනය ඇද දමා අගට "එක" යැයි කීම අශෝභනය. එසේම පරිවර්තන කාර්යයන් සඳහා මෙය යොදා ගැනීම ඊටත් වඩා අශිෂ්ටය. මන්ද, පෙරැළියක් කරනුයේ ඉංග්රීසිය (හෝ වෙනයම් බසක්) නොතේරෙන අයටය. ඒ අයට ඉංග්රීසි වදන ඉදිරියෙන් "එක" දැමූ විට අමුතු ඥානයක් පහළ වේද? නැත. තවද, කුමරතුඟුවන්ගේ අදහස අනුව වදනක් තත්සමද, තත්භවද, නිෂ්පන්නද යන්න තීරණය කිරීම අපහසු කරුණකි. එයින් පැහැදිලි කෙරෙන කරුණක් වන්නේ තත්සම යනු වදන් නිර්මාණය කරන ක්රමයක් නොවන බවයි. තත්සම යනු භාෂා දෙකකම එකම ආකාරයට ඇති වදනක ප්රකෘතිය (මූලය) නිගමනය කරන ආකාරයකි. සිදත් සඟරාවෙහි දී ඇති නිදසුන් අනුව ඊනියා "නවීන තත්සම වදන් සැකසීමේ" අනුවණ කම වැටහෙනු ඇත. හේතුව එහි පියෙවි යටතේ වදන් නිර්මාණය කරන ආකාරය ගැන කිසිඳු දෙයක් නොදැක්වීමයි. කරුණු එබඳුව තිබියදී "සිදත් සඟරාව" හා "තත්සම" යන්න නිදහසට කරුණු වශයෙන් තබාගනිමින් "සිංග්‍රීසි-එක" වදන් තැනිය යුතුද?

තවත් දෙයක් මතක් කිරීමට කැමැත්තෙමි,

අලුත් අලුත් දෑ නො තනන ජාතිය ලොවැ නො නඟී
හිඟා කෑම බැරි වුණු තැන ලගී ගයා මර ගී
ගැමි වහරින් හද පොපියන අරුත් රසය නො හැඟී
මහ දද දන ගණ උපදින කලැ පර දෑ අනැඟී

හිඟා නොකා , අපේම දෑ අගය කරමින්, අලුත් අලුත් දේ තනමින් ඉදිරියට යනවාද? හිඟා කන්න බැරි වන තුරු වෙන භාෂා වලට අත පානවාද?

* සිදත් සඟරාවෙහි කවි අංකය මෙයින් දැක්වේ

ඇසුරු කර ගත් මූලාශ්‍ර :

සිදත් සඟරාව - බළන්ගොඩ ආනන්‍දමෛත්‍රෙය මහ නා හිමි සංස්කරණය - මොඩන් පොත් සමාගම
ව්‍යාකරණ විවරණය - කුමාරතුංග මුනිදාස - ගුණසේන ප්‍රකාශකයෝ
සිංහල භාෂාව - පුවත්-පත් මත වාද - ඒ.ඒ. පියරත්න - එස්. ගොඩගේ සහ සහෝදරයෝ
අරුත නිරුත - අරීසෙන් අහුබුදු - සදීපා පොත්හල
සිංහළ සිප්යුරු වදන් - 1 - වරලත් උවදෙසු ඉංජිනේරු ඊලියන් ද සිල්වා - මොඩන් පොත් සමාගම

බට් එකට කික් කරන්න

2008-05-11T01:40:00.003+05:30

වේදනාවෙන් ලියමි,

ඔව, මම අද රයිට් කරන්න යන්නෙ වෙනදට වැඩිය චේන්ජ් එකක් තියෙන පෝස්ට් එකක්. මේ අයිඩියා එක මගේ බ්‍රේන් එකට ආවෙ මේ ළඟඳි වෙච්ච පොඩි කේස් එකක් නිසා. මගේ යූෂුවල් ස්ටයිල් එකට වැඩිය ලිට්ල් ලිට්ල් ඩිෆරන්සස් තිබුණට වොරි වෙන්න එපා. ඊළඟ පෝස්ට් එකේ ඉඳල ආයිත් රිවර්ට් වෙන්න තමයි මගේ ප්ලෑන් එක.

ආ ඉස්සෙල්ලම්, දන්නවද මොකද්ද මේ ලැන්ග්වේජ් එක කියල?

ඇයි නැත්තෙ අර ලංකාව කියන සවුත් ඒෂියන් කන්ට්‍රි එකේ ලැන්ග්වේජ් එකනෙ.. එහේ ඉන්න අය හුඟක් වෙලාවට ස්පීක් කරන්නෙ මෙහෙම තමයිලු.

ඉතින් මගෙ ක්වෙස්ෂන් එකට අන්ස්වර් කළේ නැහැනෙ? මොකද්ද ඒකෙ නේම් එක?

හූ නෝස්? දැන් හැබැයි ඒ කන්ට්‍රි එකේ අය ඉන්ටනෙට් එකේ සම් පාට්ස් ට්‍රාන්ස්ලේට් කරන්න යන්නෙ මෙහෙමලු.

වයි මෙයා? ඒගොල්ලන්ට ව'ඩ්ස් නැද්ද ඒ ලැන්ග්වේජ් එකේ?

නෝ නෝ, ඒගොල්ලන්ට තියෙනවලු. ඒත් ඒව ටූ ඩිෆිකල්ට්ලු නෙ.. මෙමරි එකට ඇඩ් කර ගන්න. ඉන්ග්ලිෂ් වර්ඩ් එකම තිබුණම වෙරු වෙරි ඊසිලු.

ඒත් ඉතින් එතකොට හාෆ් හාෆ් නෙ?

යස්, දැන් තමයි ඔයාට ක්ලික් වුණේ. එහෙම රයිටින් ස්පීකින් තිබුණම ඒගොල්ලොන්ට හරි ජොලිලු.

දෙන්, ඒගොලොන්ගෙ කන්ට්‍රි එකේ අනිත් පීපල්ල?

අපෝ නෑ ඒගොල්ලො ඕව මයින්ඩ් කරන එකක් නැහැ.. ඒගොල්ලොන්ගෙ මෝස්ට් දෙනා අර හෙඩ් ටෙලිවිෂන් එකේ යන ගෝල්ඩ් අවර්ස් ටෙලිඩ්‍රාමාස් බලනවනෙ... අනික හාෆ් හාෆ් ලැන්ග්වේජ් වලින් ස්පීක් කරන, එෆ් එම් චැනල්ස් වල අනවුන්සර්ස්ල එහෙම හරියට එහේ පොපියුලර්නෙ!

ෂා ටොප් නෙ! ඒත් ඉතින් තාම ඔය ලැන්ග්වේජ් එකේ නේම් එක කිව්වෙ නෑනෙ?

මොන නේම්ද හලෝ... මේක මම ෆස්ට්ඔෆ්ඕල් කිව්ව වගේ මික්ස් ලැන්ග්වේජ් එකක්නේ!

මට නම් බාගේ කෑලි නැත. බස, රැස, දෙස තුනම එසේම වන තරමට මගේ සතුටද වැඩිවේ. දෙස බෙදුමට විරුද්ධ නම්, ඇයි බස බෙදුමට විරුද්ධව හඬක් නොනඟන්නේ? තම රැස(ජාතිය) නොකවලම් නම් ඇයි - බස කවලම් කරගන්නේ?

තමන්ම, බසටම බලපාන පරිවර්තන කවලම් කොට ගෙන, සිංහළ හා ඉංග්‍රීසි අතර තිබෙන වෙනස නමුවක් අගට "එක" හා ක්‍රියාවක් අගට "කර" යන්න යෙදීම පමණක් යැයි කියමින් සිනා සෙන්නේ ඇයි?

මිතුරනි, වෙරෙන් ලියන්නක් නොවේ. වැරැද්දක් සිදුවෙද්දී (මා දකින ආකාරයට) පෙන්වා දීම යුතුකමකි. නැණසින් බලන්න! තතු ඇති පරිදි වටහා ගන්න!

"හිස් මොළ තියෙද්දිත් මේ වග නොතකන්නේ
ඇස් ගෙඩි දෙකට හෙණ ගහලද සිහළුන්නේ"

දිගටම මේ පිළිවෙත රැගෙන ගියොත්, එය ගසෙන් වැටී, ගොනාද ඇන සිටින සිංහළයාගේ අං පහරින් තුවාල වී ඇති පක්‍ෂාත් භාගයට පයින් ගැසීමක් වනු ඇත.
~~නොඑසේ නම් බට් එකට කික් කිරීමක් වනු ඇත! ඔබ ක්‍රොස්-බ්‍රීඩ් නොවන බව පෙන්වන්න~~

නඩුත් හාමුදුරුවන්ගෙ - බඩුත් හාමුදුරුවන්ගෙ

2008-05-11T01:01:00.001+05:30

ස්ථානය : කොළඹ විශ්ව විද්යාලය පරිගණක අධ්යයනාංශය ඉදිරිපස
දිනය : 2008-05-10
වේලාව : සවස 4.30 පමණ

දෙදෙනෙක් පාර මාරුවීම සඳහා පැමිණෙති. එක් අයෙක් පෙලිකන් පදික මාරුවේ බොත්තම තද කරයි. දෙදෙනා අදාළ සංඥා එළි දැල්වෙන තුරු බලා සිටී. විදුළි සංඥා රතු එළිය දක්වයි. පදික මාරුව ඉදිරියේ වාහන නවත්වයි. දෙදෙනා පාර මාරු වීමට සැරසෙයි. අඩියක් පමණ පාර මැදට පැමිණෙත්ම.... රතු එළියට බිය නැති පොලිස් සුඛෝපභෝගී රියකි. අනිත් රිය නවතා ඇති හේතුව නොතකමින්, රතු එළිය නොතකමින්, විදුලි වේගයෙන් පදික මාරුව හරහා ඇදී, පාරේ කෙළෙවරින් නොපෙනී යයි.

වාසනාවට.... ඈත ඇදී එන මඟ මරුවා දුටු විගස, එක් අයෙකු , අනිකාවද ඇදගෙන, පාර අයිනට පනී. තව සැණක් ප්රමාද වූයේ නම් මිනිස් ජීවිත දෙකක් , අපරීක්ෂාකාරී , අධම රියැදුරෙකු නිසා අහිමි වන්නට ඉඩ තිබුණි. පාර පැන්නේ තරුණයෙකු හා තරුණියක බැවින් එසේ නැවත පැනගත්හ. මහළු වියේ පුද්ගලයෙකු, ආබාධිතයෙකු, ඒ වෙනුවට සිටියා නම්....

පොලිස් බලය, වෙනත් මාර්ග නීති රීති කැඩීමට බලයක් ද? අපි නොදනිමු. එහෙත්, එම බලය, ජීවිත බිලිගැනීමට දෙන වරෙන්තුවක් නොවන බව මම හොඳාකාරවම දනිමි...

මහජන ආරක්ෂාව, නීතිය හා සාමය - ඔව්, මෙවැනි අමනෝඥ ක්රියා නිසා මේ තුනම බිඳ වැටෙනු ඇත.

සතියක සිදුවීම්

2008-05-09T00:30:00.002+05:30

වියුණට සටහනක් එකතු කරන්නෙ නැතුව සතියක් විතර ගතවුණා - ඉතින් මේ පන්හිඳ අතට ගන්නට ලෑස්ති වෙන්නේ පසුගිය සතිය ගැන පොඩි විස්තරයක් කරන්න...

සඳුදා

මාස හතරක් විතර ගියපු රසායන විද්‍යාව පන්තිය නැවැත්තුවා - හේතුව, ඒ පන්තියේ වෙන්නෙ ලොකු කාල නාස්තියක් කියල හැඟී යාම, ඒ වගේම දුරත් වැඩියි... බම්බලපිටියට දෙක හමාර වෙද්දි යන්න නම් දොළහටවත් ගෙදරින් යන්න ඕනෙ... එතකොට ඉතින් හත වැදෙනව... ඒ ගිහිල්ලත් කාලයෙන් බාගයක් පමණ හිනා යන්නෙ නැති විහිළු (මුලදි හිනා ගියා තමයි, ඒත් දිගින් දිගටම එකම විහිළුව කරද්දි හිනා යනව අඩුයි!) අහගෙන ඉන්න ඕනෙනෙ. ඉතින් සඳුදා ගෙදරටම වෙලා හිටියා... ඊට වැඩිය සැපක් කොයින්ද?

අඟහරුවාදා

ශ්‍රී ලංකා ජීනියස් තරඟෙට ගියා ඒ ගැන වැඩි විස්තර මෙන්න මේ සටහනින් බලා ගන්න පුළුවන්.. ඒත් ඉතින් එද්දි සිදුවුණු සිදුවීම් ගැනත් කියන්න එපෑ.. බොරැල්ලට ආපු 154 බසයෙදි තමයි මේක සිද්ද වුණේ. මේ බස් එකත් නිකන් දැන් දැන් විකුණන්න තියෙන වෙළෙඳ භාණ්ඩ වගේ.. ඒ කියන්නෙ "ටූ ඉන් වන්" ජාතියෙ එකක්...

රියැදුරු මහත්තය තමයි කොන්දොස්තර වැඩෙත් කරන්නෙ :P .. ඒ කියන්නෙ සල්ලි අරං ටිකට් "නො"දෙන එක නෙමෙයි - කෑගහන එක - "ඉස්සරහට යන්න", "පස්සට යන්න" , "උඩට නඟින්න", "ටොරින්ටන් බහින්න", ඒවගේම "ටොරින්ටන් - ඊ ළඟ හෝල්ට් දෙකේම අය මෙතනින් බැහැගන්න - ආයි නවත්තන්නෙ නෑ - පස්සෙ බනින්න එපා" මේ වගේ ඒවත් කිය කිය ඉද්දි තමයි හාමුදුරු නමක් බස් එකට ගොඩ වුණේ..

ඉතින් රියැදුරු මහත්තයත් නිකන් හිටියෙ නැහැ.. "කෝ මේ හාමුදුරුවොන්ට සීට් එක දෙන්න - ඔය දකුණු පැත්තෙ සීට් එක දෙන්න" කියල කෑගහන ගමන් , රියැදුරු අසුන පිටිපස්සෙන් අත දාල එතන වාඩි වෙලා හිටපු කාන්තාවගෙ කකුලට අනින්නත් අමතක කළේ නැහැ...

කොහොමහරි කාන්තාවො දෙන්නෙක් හිටපු අසුනක් නිසා ඒ දෙන්නම නැගිට්ට - මෙන්න හාමුදරුවො අසුන් ගන්නත් කලින් එතන හිටපු "මහත්තයෙක්" පැනල එතන වාඩි වුණා.. කොහොම හරි හාමුදුරුවො ඇවිල්ල වාඩි වෙන්න හදනකොට.. රියැදුරා හයියෙන් කෑගහනව "වම් පැත්තෙන් වාඩි වෙන්න එපා දකුණෙන් වාඩි වෙන්න" කියල.. ඉතින් හාමුදුරුවොත් බොහොම අමාරුවෙන් සෙනඟ අස්සෙන් රිංගල වාඩි වුණයි කියමු...

මෙන්න ආයිත් අර පඬුපුලේ වාඩි වුණා වගේ රියැදුරා ආයිත් කෑ ගහනව - "බලන්න මේ හාමුදුරුවොත් අපිට වද දෙනව - හාමුදුරුවො දන්නෙ නැහැ හාමුදුරුවොන්ට වාඩි වෙන්න තියෙන තැන" - ඔන්න ඔහොම කියල. මම ඉතින් කල්පනා කර කර ආව දකුණු පැත්තෙ ආසන පේළියෙත් දකුණු කොනේම වාඩි වුණේ නැත්නම් රියැදුරාට තියෙන අමාරුව මොකද්ද කියල? මොකෝ ඔලුව උඩ තියාගෙන යන එකකයැ... පාර බලාගෙන - පරිස්සමට වාහනේ එළෙව්වනං ඊට වැඩිය වටිනව නේද?

බදාදා

අදත් උදේ පාන්දරම රසායන විද්‍යා පන්තියට යන්න පිටත් වුණාම බස් එකේදි දැකපු දෙයක් තමයි මේ. මේක කලින් කියපු එකේම අනිත් පැත්ත - සමාජයේ හොඳක් දැකපු තැනක් - මේක දැකල මට අපේ සමාජය ගැන හරියට සන්තෝස හිතුන - තාම යන්තම් හරි එකමුතුව, සමගිය, සිරිත් ආදිය රැකිල තියෙනව නේද කියල.

මම බස් එකට නැග්ගෙ තලවතුගොඩින්.. මට කලින් නැග්ගෙ ගැබිණි මවක්.. බස් එක සෙනඟ පිරිල හිටපු එකක්... ඒත් ඈව දැකපු ගමන් ඉස්සරහම දකුණු පැත්තෙ වාඩිවෙලා හිටපු මහත්මයෙක් ඉක්මණට ආසනය දුන්න. ඔහොම යද්දි ඊළඟ නැවතුමෙන් (ජයවඩනගම) නැග්ග හාමුදුරුනමක්... උන්වහන්සේ නැග්ගම ඉක්මණට අර ඉස්සරහ ආසනේ වාඩිවෙලා හිටපු ගැබිණි මවත්, ඈට එහා පැත්තෙන් වාඩි වෙලා හිටපු කුඩා බිළිඳෙකු වඩා ගත් මවකුත්, ඉක්මණටම නැගී හිටියෙ හාමුදුරුවන් එපා කියද්දිම... ඒත් ඔවුන් දෙදෙන නැගිට්ට දැකපු ගමන් අනිත් පැත්තෙ වාඩි වෙලා හිටපු ආත්තම්මා කෙනෙක් ගැබිණි මවටත් ඊට පිටුපසින් වාඩි වී සිටි අක්ක කෙනෙකු අනික් මවටත් තම ආසන දුන්නා... මේක බලන් හිටපු මට දැනුණෙ අමුතු සන්තෝසයක්.

බ්‍රහස්පතින්දා

අද ටිකක් උදෙන් නැගිට්ටා - අලුතෙන් හොයා ගත්තු රසායන විද්‍යා පන්තියට යන පළමු දවස අද... ඉතින් කලින් යන්න ඕනෙ නිසා 2:45ට තියෙන පන්තියා 2:15ට විතර ගියා... මගේ පාසලේම අය හුඟක් ඉන්නවා.. ඒ නිසා මග හැරුණු වැඩ ඇත්නම් "අල්ලගන්න" පහසු වේවි :)... ඒ ඇරෙන්න කියන්න තරම් දෙයක් නම් වුණේ නැහැ.

ශ්‍රී ලංකා ජීනියස් 2008 - පළමු වටයේ අත්දැකීම්

2008-05-08T23:49:00.003+05:30

අඟහරුවාදා තමයි කොළඹ විශ්ව විද්යාලය සංවිධානය කරපු ශ්රී ලංකා ජීනියස් තරඟයේ පළමු වටයේ තරඟ... හතට කාලක් තියල එතෙන්ට ගියාට (තාත්ත වැඩට යනකොට කාර් එකෙන්ම ගියාම ලේසියිනෙ - නැත්නම් පොදු ප්රවාහන සේවෙ තමයි) පටන් ගන්න හිතුවෙ නමය විතර වෙද්දි...

කොහොම කොහොම හරි වැදගත් උදවියගෙ කතා (මට නම් ඇල්ලුවෙ එක කතාවක් විතරයි) තියල ප්රශ්න පත්රය දුන්න... එතකොට දහය හමාරයි... කිව්වෙ තොරතුරු තාක්ෂණ දැනුම මිනුම කියල... ඒත් අහපු උලව් තොරතුරු තාක්ෂණයක් නැහැ. ගණිතයෙන් ප්රශ්න අහල තිබුණ - ඒ ටික බුද්ධි පරීක්ෂාවට කියල කියමුකෝ... ඒත් ඉතින් එතන තිබුණු අමුතු තාලෙ ප්රශ්න ගැන තමයි ප්රශ්නෙ! උදාහරණ ලෙස කිහිපයක් උපුටා දක්වන්නම්...

ලක්‍ෂපාන දිය ඇල්ල පිහිටා ඇති දිස්ත්රික්කය කුමක්ද?
අඹන් ගඟ කුමන වනෝද්යානය හරහා ගලා යයිද?
Asunción අගනුවර වෙන රට කුමක්ද? (දීල තිබුණු පිළිතුරු සියල්ල ලතින් ඇමෙරිකානු රටවල්)
ලෝක සාක්ෂරතා දිනය කවදාද?
ලෝකයේ විශාලතම මාංශ භක්ෂක පක්ෂියා කවුද?
මධ්යධරණී මුහුදේ විශාලතම දූපත කුමක්ද?

මේ ඒ අතරින් ප්රශ්න කිහිපයක් පමණයි... පරිගණකයට මඳක් ආසන්න ප්රශ්න පහක් හෝ හයක් දී තිබුණද, ඒවායෙන් දෙකක්ම වැරදි බව පෙනී ගියා

එක ප්රශ්නෙක තාර්කික ද්වාර වල තාර්කික ප්රකාශනය අහල තිබුණත් පිළිතුරු සියල්ල වැරදියි - එතන සිටි එක් විශ්ව විද්යාල සිසුවෙක්ගෙන් ඇසූ විට ඔහු කීවේ, "අනේ මන්ද මල්ලි කවුද දන්නෙ" කියායි.

තවත් ප්රශ්නයක පරිගණක යතුරු පුවරුවකින් සටහන් කළ නොහැකි "Data type" එක කුමක්ද? කියල අහල තිබුණ. උත්තර වශයෙන් දීල තිබුණෙ,

Unicode
ASCII
EBCDIC
Integer යනු වෙනුයි... මේ ප්රශ්නෙත් වැරදියි.. මොකද මගේ දැනුමෙ හැටියට නම් මෙතන "Data Type" එකක් වන්නෙ Integer පමණයි... අනිත් සියල්ලම "Character Encodings" වන නිසා.

ඉතින් මෙහෙම ඉඳල ඉඳල පිළිතුරු පත්රය අවසන් වූ විට අපට ලැබුණේ කුඩා කෑම පාර්සලයකි... මා නිර්මාංශික නිසා හැකිනම් එබඳු ආහාර සපයන ලෙසට ඉල්ලූ විට ලැබුණු පිළිතුර වුණේ "අයියෝ මල්ලි ඕවයෙ කොහෙන්ද මාළු, ඔන්න ඕක කන්න" වැන්නකි.. ඉතින් බඩ ගින්නේම සිටියෙමි...

ඉන්පසු අනුග්රාහක භවතා, "මේක වෙළඳ දැන්වීමක් නෙමෙයි, ඕගොල්ලන්ට වෙළෙඳ අංශයට මඟ පෙන්වීමක් කියල හිතාගන්නකෝ"යි කියමින් ඉදිරිපත් කළ "ඈනුම් යන" වෙළඳ ප්රචාරය අවසානයේ, ආපන ශාලාවට යෑමට කියා ගිය අපට සිදුවුණේ තවත් ඇබැද්දියකි... ටිකක් ඇඟ පත ඇති "අයියා" කෙනෙක් දොර ළඟ පුටුවක් තියාගෙන වාඩිවී, "මල්ලි කොහෙද ඔය යන්නෙ? සෙටිෆිකට් එක ඕනෙ නේද? ගිහිල්ල වාඩිවෙන්න" කියලා කිව්වේය. ඇතැම් විට ඒ වෙන විටත් ශාලාවෙන් බාගයක්ම වාගේ හිස්ව තිබුණු නිසා විය හැක.

තවද බොහෝ වේලාවක් සිටීමෙන් පසු ව නම වැරදියට ලියා ඇති සහතික පතක් ලැබුණි... එය හදා ගැනීමටද පෝලිමේ ඉන්නට සිදුවිය (තවත් නම් වැරදීම් තිබුණු නිසා)...

අන්තිමේ හතේ හත වැදී ගෙදර පැමිණ හති ඇරියෙමි.

අලුත් තැනකට... rajith.org

2008-05-04T09:57:00.001+05:30

අද උදේ පාන්දරම "rajith.org" ඩොමේන් එක ගත්තා...

ගූගල් චෙක්අවුට් වලින් ගත්තු නිසා හරිම ලේසියෙන් කළමනාකරණය කරගන්නත් පුළුවන් ... පැය බාගයක් ඇතුළත ඔක්කොම ටික හරියට හදා ගෙන, ගූගල් ඇප්ස් පිහිටුවා ගෙන, විද්‍යුත් තැපෑලත් හදාගත්ත... දැන් ඉතින් මට rajith at rajith dot org ලිපිනයට ලියුම් එවන්නත් පුළුවන් :D

ස්ක්රයිබ්ෆයර් භාවිතය

2008-05-02T17:59:00.001+05:30

අද මට මල්ලි කියපු නිසාම හිතුණ ස්ක්රයිබ්ෆයර් භාවිතයෙන් වියුණු සටහනක් ලියල අත්හදා බලන්න.. ඔන්න ඒ නිසාම වැඩේ හරියනවද, කොහොමද කියල බලන්න එහෙම මේ සටහන එකතු කරනව...
පහසුවෙන්ම පින්තූරයක් එක් කරන්නත් පුළුවන්..

ඒ වගේම යූ-ටියුබ් වීඩියෝ එකක්...

තවත් පහසුකමක් තමයි, පහසුවෙන්ම සැකසීම් (edits) කරන්නත් පුළුවන් වීම... පරණ සටහනකට වුණත්

දරු ඵල ලබන හැටි

2008-04-27T19:50:00.004+05:30

මම සතිඅන්ත පුවත් පතක දුටු වෙළෙඳ දැන්වීමක කොටසක තමයි මේදේ කියල දීල තිබුණෙ.. බොහොම අමාරුවෙන් හිනාව නවත්තගන්න හැදුවත් ඒක හරි ගියෙත් නැහැ.. මට පුදුමෙ මේ මිනිස්සු මේව පත්තරවලත් දාන එකනෙ..

ඔන්න එහෙනම් එම කොටස හැමෝටම බලාගන්න මෙතන පල කරන්නම්..

මුලින්ම තිබුණ මෙන්න මෙහෙම..
හැර ගිය පෙම්වතිය පෙම්වතා, බිරිඳ සැමියා දෙපා මුලට ගෙන්වා ගන්න... ඔන්න ඔය විදියට.. හැබැයි අන්තිමට තමයි බළල මල්ලෙන් එළියට පැනල තිබුණෙ..

"දරු ඵල ලබා ගැනීම සඳහා රහසිගතව මා හමුවන්න" :P උප්පැන්නෙට දාන්න කපු මහත්තයගෙ නමත් අහගෙන තමයි එන්න වෙන්නෙ...