Shoiab Safdar's Urdu Blog

اپنا AI لیگل ریسرچ اسسٹنٹ بنائیں ⚖️🤖

noreply@blogger.com (Shoiab Safdar Ghumman) — Wed, 26 Aug 2026 00:36:39 +0500

پاکستانی کیس لا پر تحقیق کرتے وقت متعلقہ فیصلوں کی تلاش، درجہ بندی اور قانونی نکات کی ترتیب خاصا وقت لے سکتی ہے۔ Pakistan Case Law MCP کو Claude یا Manus.ai جیسے AI ٹول سے منسلک کرکے اس کام کو کافی حد تک تیز اور منظم کیا جا سکتا ہے۔

اگر آپ وکیل، قانون کے طالب علم یا قانونی محقق ہیں تو درج ذیل طریقے سے اپنا AI Legal Research Assistant تیار کر سکتے ہیں۔

1۔ Pakistan Case Law MCP منسلک کریں

اپنے موبائل، کمپیوٹر یا لیپ ٹاپ پر Claude یا Manus.ai کھولیں اور اسے یہ prompt دیں:

Setup Prompt

Set up and configure the Pakistan Case Law MCP server available at:

www.pakistancaselaw.com/mcp

First, inspect the MCP endpoint and review its available instructions and tools.

Configure the MCP connection correctly for my current device and application. Verify that the connection is working by listing or testing the available Pakistan Case Law research tools.

Do not claim that the setup is successful unless the MCP server is actually connected and responding.

If automatic configuration is not possible, provide exact step-by-step instructions for configuring it on my current device and application.

AI کی جانب سے صرف یہ کہنا کافی نہیں کہ MCP configure ہوگیا ہے۔ اس سے دستیاب research tools کی فہرست یا کسی tool کا عملی test بھی کروائیں۔ جب یہ تصدیق ہوجائے کہ سرور واقعی connected اور responsive ہے تو قانونی تحقیق شروع کی جا سکتی ہے۔

2۔ کسی قانونی نکتے پر جامع تحقیق کروائیں

صرف یہ لکھ دینا:

Research through Pakistan Case Law MCP

عموماً کافی نہیں ہوگا۔ بہتر اور زیادہ منظم نتائج کے لیے درج ذیل prompt استعمال کریں:

Legal Research Prompt

Research the following legal issue comprehensively through the Pakistan Case Law MCP.
Use the MCP tools to search for the most relevant judgments of the Supreme Court of Pakistan, Federal Shariat Court, High Courts, and any other relevant Pakistani courts or tribunals, where applicable.
Identify leading, landmark, and recent judgments. Include authorities that support the proposition as well as those that contradict it. Where a judgment is based on materially different facts, explain how it may be distinguished.
For every important legal proposition, provide:
1. Case title
2. Court
3. Date or year of decision
4. Reported citation, if available
5. Relevant statutory provision
6. Legal principle laid down by the court
Do not invent or guess any case, citation, quotation, statutory provision, or legal proposition. Clearly identify anything that could not be verified through the MCP source.
Organize the research under the following headings:
1. Legal Issue
2. Relevant Statutory Provisions
3. Governing Legal Principles
4. Leading and Landmark Judgments
5. Recent Judgments
6. Cases Supporting the Proposition
7. Contrary or Distinguishable Authorities
8. Application of Law to the Given Facts
9. Conclusion
10. List of Authorities for Verification

LEGAL ISSUE / FACTS:

[یہاں مقدمے کے متعلقہ حقائق، قانونی نکتہ، متعلقہ دفعات اور اپنا مخصوص سوال تفصیل سے لکھیں]

بہتر نتائج کے لیے سوال کیسے لکھیں؟

AI کو محض ایک یا دو الفاظ پر مشتمل قانونی سوال نہ دیں۔ مقدمے کے ضروری حقائق، متعلقہ دفعات اور وہ مخصوص قانونی نکتہ بھی لکھیں جس پر آپ عدالتی نظائر چاہتے ہیں۔

مثلاً صرف یہ پوچھنے کے بجائے:

Does section 7 ATA apply?

یہ معلومات بھی شامل کریں:

- مبینہ واقعے کے ضروری حقائق

- جرم کی نوعیت اور طریقۂ ارتکاب

- متعلقہ PPC اور ATA دفعات

- وقوعہ کا مبینہ مقصد

- وہ مخصوص سوال جس پر عدالتی نظائر درکار ہیں

حقائق جتنے واضح ہوں گے، AI کے لیے متعلقہ اور قابلِ اطلاق فیصلے تلاش کرنا اتنا ہی آسان ہوگا۔

ضروری قانونی احتیاط

AI اور MCP وکیل یا قانونی محقق کے معاون ہیں، ان کا متبادل نہیں۔

ان کی مدد سے تحقیق تیز اور منظم ہو سکتی ہے، لیکن کسی بھی citation، quotation، statutory provision یا legal proposition کو عدالت، قانونی رائے، درخواست، تحریری دلائل یا کسی دوسرے پیشہ ورانہ کام میں استعمال کرنے سے پہلے اصل عدالتی فیصلے اور مستند قانونی متن سے لازماً verify کریں۔

خصوصاً یہ ترتیب ہمیشہ یاد رکھیں:

> Search with AI → Analyse with AI → Verify from the original judgment → Then cite.

ٹیکنالوجی تحقیق میں لگنے والا وقت کم کر سکتی ہے، لیکن قانونی نکتے کو سمجھنے، نظیر کے درست اطلاق اور citation کی حتمی تصدیق کی ذمہ داری قانونی ماہر ہی کی رہتی ہے۔

میرا پاکستان، میرے آنگن کا گلدستہ

noreply@blogger.com (Shoiab Safdar Ghumman) — Fri, 14 Aug 2026 22:51:39 +0500

آج 14 اگست ہے—یومِ آزادی۔

ایک ایسا دن جسے ہم عموماً پاکستان کی آزادی کا دن کہتے ہیں، مگر شاید اسے ایک نئی مملکت کے وجود میں آنے کا دن کہنا زیادہ معنی خیز ہے۔ پاکستان کسی پہلے سے موجود ملک کی محض آزادی کا نام نہیں تھا؛ یہ برصغیر کے نقشے پر ایک نئی ریاست کے ظہور کا دن تھا۔

اکثر اس سارے تاریخی عمل کو صرف تقسیمِ ہند کے عنوان سے بیان کر دیا جاتا ہے، حالانکہ تاریخ شاید اس سے کہیں زیادہ پیچیدہ ہے۔ جب انگریز اس خطے میں آئے تو پورا برصغیر کسی ایک مضبوط، متحد سیاسی اکائی کی صورت میں موجود نہیں تھا۔ یہاں مختلف ریاستیں، سلطنتیں، نوابیاں، رجواڑے اور مقامی حکومتیں تھیں۔ برطانوی اقتدار نے انہیں مختلف ادوار اور مختلف طریقوں سے اپنے زیرِ نگیں کیا اور رفتہ رفتہ ایک وسیع نوآبادیاتی نظام قائم ہوا۔

پھر وقت بدلا۔

دو عالمی جنگوں نے برطانیہ سمیت یورپ کی بڑی طاقتوں کو کمزور کیا۔ نوآبادیاتی نظام کی گرفت ڈھیلی ہونے لگی اور بالآخر برصغیر بھی اس تسلط سے نکلا۔ اسی تاریخی اتھل پتھل کے درمیان پاکستان دنیا کے نقشے پر ایک مسلم اکثریتی آزاد مملکت کی حیثیت سے وجود میں آیا۔

لیکن پاکستان صرف ایک مذہبی یا جغرافیائی شناخت کا نام نہیں۔

یہ کئی زبانوں، ثقافتوں، تہذیبوں، نسلوں، علاقوں اور برادریوں سے مل کر بننے والی ایک ریاست ہے۔ ہر خطہ اپنا رنگ رکھتا ہے، ہر زبان اپنی مٹھاس، ہر ثقافت اپنی خوشبو اور ہر برادری اپنی ایک الگ پہچان۔

یوں سوچیں تو پاکستان ایک گلدستے کی مانند ہے۔

اور گلدستے سے یاد آیا کہ آج میرے گھر کے صحن میں بھی کچھ پھول کھلے ہوئے ہیں۔ انہی میں سے چند کی تصاویر آپ کے ساتھ شیئر کر رہا ہوں۔

یہ سب پھول ایک جیسے نہیں۔

کسی کا رنگ شوخ ہے، کسی کا ہلکا۔

کچھ اپنی خوشبو سے متوجہ کرتے ہیں، کچھ اپنے رنگوں سے۔

اور کچھ ایسے پودے بھی ہیں جن کے پھول شاید زیادہ خوشبودار نہ ہوں، مگر ان کے پتوں کو چھوئیں تو ایک الگ ہی مہک فضا میں پھیل جاتی ہے۔

میرے صحن کے اس چھوٹے سے گلدستے میں کچھ ایسے پودے بھی موجود ہیں جو آج کی تصاویر میں دکھائی نہیں دیں گے۔ وجہ صرف اتنی ہے کہ آج ان پر کوئی پھول نہیں کھلا تھا۔

مگر پھول نہ ہونے سے ان کا وجود ختم نہیں ہو جاتا۔

وہ وہیں ہیں۔

اسی آنگن کا حصہ۔

اسی مٹی میں اپنی جڑیں جمائے ہوئے۔

کچھ پودے سخت جان ہیں؛ دھوپ، گرمی اور موسم کی سختیاں آسانی سے سہہ لیتے ہیں۔ کچھ بہت نازک ہیں، ذرا سی بے توجہی انہیں مرجھا دیتی ہے۔ کچھ اپنی خوبصورتی کے ساتھ کانٹے بھی رکھتے ہیں۔

مگر میں ان کانٹوں کی وجہ سے انہیں اپنے آنگن سے نکال نہیں دیتا۔

کیونکہ وہ بھی اسی گلدستے کا حصہ ہیں۔

ان کا رنگ، ان کی ساخت، ان کا الگ ہونا ہی تو اس گلدستے کی خوبصورتی ہے۔

شاید پاکستان بھی ایسا ہی ہے۔

ہم سب ایک جیسے نہیں ہیں—اور شاید ہمیں ایک جیسا ہونا بھی نہیں چاہیے۔

ہماری زبانیں مختلف ہیں، ثقافتیں مختلف ہیں، رہن سہن مختلف ہے، خیالات اور ترجیحات بھی مختلف ہو سکتی ہیں۔ کسی کی آواز بلند ہے، کوئی خاموش ہے۔ کوئی رنگوں میں نمایاں ہے، کوئی بظاہر پس منظر میں؛ کسی کی شخصیت پھول جیسی ہے اور کسی کے مزاج میں کچھ کانٹے بھی ہیں۔

مگر ہم سب کی جڑیں اسی آنگن کی مٹی میں ہیں۔

اور جس طرح میرے صحن کے مختلف پھول، پودے، خوشبوئیں اور کانٹے مل کر اسے خوبصورت بناتے ہیں، اسی طرح پاکستان کی اصل خوبصورتی بھی شاید ہماری یکسانیت میں نہیں، ہمارے تنوع میں ہے۔

اختلاف، مختلف ہونا یا الگ شناخت رکھنا اس گلدستے کی کمزوری نہیں—اگر ہم ایک دوسرے کے وجود کی جگہ باقی رکھیں تو یہی فرق اس کی سب سے بڑی خوبصورتی بن سکتا ہے۔

میرے آنگن کے پھولوں کی طرح،

ہم بھی الگ الگ رنگ رکھتے ہوئے

ایک ہی گلدستے کی زینت ہیں۔

یہ گلدستہ ہمارا پاکستان ہے۔

یومِ آزادی مبارک۔ 🇵🇰

تبدیلی کی خواہش اور ریاستی نظام کی دیواریں

noreply@blogger.com (Shoiab Safdar Ghumman) — Sun, 26 Jul 2026 22:20:19 +0500

ہندوستان کے چیف جسٹس نے توہین آمیز انداز میں ایک نوجوان کو "کاکروچ" کہا، اور وہاں کی نئی نسل نے اسی طنزیہ اور توہین آمیز لفظ کو ردِعمل کے طور پر اپنی اجتماعی شناخت اور ایک پلیٹ فارم کی علامت بنا لیا۔ اس پلیٹ فارم کی پہلی بڑی تحریک اپنے مستقبل کے تحفظ کے لیے تعلیم جیسے اہم مسئلے پر چلی۔ جنتر منتر، دہلی میں پیپر آؤٹ ہونے کے معاملے پر جوابدہی کے مطالبے کو اہمیت دلانے اور حکمران طبقے کو پیغام دینے کے لیے وزیرِ تعلیم کے استعفے کا مطالبہ کیا، اور یہ منتر چل گیا۔

حکمران جماعت ایک (متعصب) مذہبی گروہ پر مشتمل ہے، لہٰذا اس کی مخالفت کے لیے ایک متضاد نظریاتی گروہ درکار ہے۔ بظاہر آپ کہہ سکتے ہیں کہ سیکولر طبقہ ان کا مخالف ہے، مگر وہاں مکمل سیکولر طبقے کے بجائے اکثریت ایسے لوگوں کی نظر آئی جو سوشلسٹ خیالات سے متاثر ہیں۔

میں نے بھارت کے بارے میں کتابوں، انٹرنیٹ، یوٹیوب اور دیگر ویب سائٹس کے ذریعے وہاں کے لوگوں کو پڑھا اور سنا ہے۔ زمینی سطح پر جائزہ لینے کا کبھی موقع نہیں ملا، اور شاید ایسا ممکن بھی نہ ہو۔ لیکن اس کے باوجود میرا قوی قیاس اور احساس یہی ہے کہ یہ کامیاب احتجاج ممکن ہے بی جے پی کو کمزور کر دے، مگر سیکولر ہندوستان کی طرف واپسی فی الحال ممکن دکھائی نہیں دیتی۔ وجہ یہ ہے کہ وہاں کے نظام میں اس وقت تقریباً تمام اہم ریاستوں اور اداروں میں بی جے پی اپنے لوگ داخل کر چکی ہے۔

سوشل میڈیا کی یہ نسل بہت زیادہ outspoken ہے، اس لیے پاکستان اور ہندوستان جیسے ممالک میں ان کے لیے ریاستی نظام کا حصہ بننا، خصوصاً جب سرکاری اداروں میں ملازمت کے مواقع آئیں، آسان نہیں ہوگا۔ تبدیلی کے لیے اولین اہمیت اس بات کی ہے کہ آپ ان حلقوں اور جگہوں پر موجود ہوں جہاں طاقت ہے، جہاں فیصلے ہوتے ہیں، جہاں پالیسیاں بنتی ہیں، تبدیل کی جاتی ہیں اور ان پر عمل درآمد کا فیصلہ ہوتا ہے۔ مگر کئی معاشروں میں جب آپ کی پروفائل اور خیالات ہی آپ کی شناخت بن جائیں تو ریاستی نظام میں داخل ہونے کے مواقع محدود ہو سکتے ہیں۔ یوں تبدیلی کا جذبہ رکھنے والے بہت سے لوگ فیصلہ سازی کے مراکز تک پہنچنے سے پہلے ہی دوڑ سے باہر ہو جاتے ہیں۔

تین دوست لاء فرم سے عدلیہ تک

noreply@blogger.com (Shoiab Safdar Ghumman) — Sat, 15 Nov 2025 14:14:00 +0500

آفریدی، شاہ اینڈ من اللہ‘‘ وہ لا فرم جس کے تین پارٹنر پشاور، لاہور اور اسلام آباد میں اپنے اپنے ہنر کا سکہ منواتے تھے۔ قسمت نے ایسی کروٹ لی کہ تینوں پہلے ہائی کورٹ کے جج بنے، پھر سپریم کورٹ تک جا پہنچے۔ دلچسپ بات یہ ہے کہ ان میں سے دو شاہ اور اللہ عہدے سے سبکدوشی کا راستہ اختیار کر چکے ہیں، جبکہ تیسرے ساتھی آفریدی، اس وقت ملک کے چیف جسٹس ہیں۔ جن کا وزیراعظم نے موجودہ ترمیم کے سلسلے میں شکریہ بھی ادا کیا ہے۔

اصل نام تو ظاہر ہے آپ کے ذہن میں پہلے ہی موجود ہوں گے۔

بس نجانے کیوں اس موقع پر فلم تھری ایڈیٹس کا راجو یاد آ رہا ہے اس نے کہا تھا:

“جب دوست فیل ہوتا ہے تو دکھ ہوتا ہے… لیکن جب دوست ٹاپ کرتا ہے تو اور زیادہ دکھ ہوتا ہے!”

نوٹ: اب یہ فرم نہیں رہی کیونکہ یہ Zia & Shah Legal Consultants بن گئی تھی۔

ویسے اگر پرانی فرم کے ناموں کی ترتیب مختلف ہوتی جیسے من اللہ یا شاہ کا نام شروع میں ہوتا تو کیا وہ چیف جسٹس ہوتا؟

اسرائیل، قطر و حماس

noreply@blogger.com (Shoiab Safdar Ghumman) — Tue, 9 Sep 2025 20:35:00 +0500

قطر سمیت مشرقِ وسطیٰ کے بیشتر ممالک نے اپنی حفاظت کی ذمہ داری امریکہ کے کاندھوں پر ڈال رکھی ہے۔ کہا جاتا ہے کہ مشرقِ وسطیٰ میں موجود تقریباً پچاس ہزار امریکی فوجیوں میں سے دس ہزار کے قریب قطر میں تعینات ہیں۔ اس ضمن میں قطر سالانہ تقریباً تین سو ملین ڈالر کے اخراجات برداشت کرتا ہے، اور یہ رقم دیگر دفاعی معاہدوں، جن کی مالیت 38 ارب ڈالر ہے، کے علاوہ ہے۔

آج کا اسرائیلی حملہ قطر اور دیگر خلیجی ممالک کی اس تلخ حقیقت کو واضح کرتا ہے کہ کرائے کا محافظ صرف اپنی اجرت تک ہی وفادار رہتا ہے۔ کسی ملک، ملت اور اس کی عزت و ناموس کی حفاظت اس کا مقصد نہیں ہوتی۔ اسی لیے کہا گیا ہے کہ

"جنديٌّ بالأجرة لا يموت في سبيلك"

"کرائے کا سپاہی تمہاری خاطر جان نہیں دیتا"۔

اگر یہ حملہ قطر کی مرضی سے ہوا تھا، تو اس کا مطلب ہے کہ قطر اپنی خودمختاری گروی رکھ چکا ہے۔ اس ہزیمت کا احساس بحیثیت پاکستانی ہم تب محسوس کر چکے ہیں جب امریکہ اسامہ بن لادن کے تعاقب میں ایبٹ آباد تک آ پہنچا تھا۔ اور اگر یہ حملہ قطر کی مرضی کے بغیر صرف امریکہ کی آشیرباد سے ہوا ہے، تو اہلِ قطر اور دیگر ممالک جہاں امریکی فوج "تحفظ" کے نام پر موجود ہے، انہیں سوچنا چاہیے کہ وہ محفوظ ہیں یا قید؟ اور حفاظت کے نام پر وہ کب تک مقید رہنا چاہتے ہیں؟

شکاری

noreply@blogger.com (Shoiab Safdar Ghumman) — Tue, 2 Sep 2025 12:38:00 +0500

شکاری کو محافظ سمجھنا سب سے بڑی نادانی ہے؛ وہ آپ پر قربان نہیں جاتا، بلکہ آپ کو قربان کر جاتا ہے۔

دیر یا انکار؟

noreply@blogger.com (Shoiab Safdar Ghumman) — Tue, 2 Sep 2025 00:35:00 +0500

کوئی کہتا ہے کہ دیر سویر تو ہوتی رہتی ہے، انکار نہیں ہونا چاہیے، دیر آید درست آید۔ اس کے برعکس ایک وکیل کہتا ہے کہ اگر دیر ہو گئی تو پھر کوئی فائدہ نہیں، کیونکہ 'انصاف میں تاخیر، انصاف کا قتل ہے۔' یہ حقیقت ہے کہ کسی بھی بات کا اثر اُس کے سیاق و سباق سے ہی سمجھا جا سکتا ہے۔ وقت اور موقع کی اہمیت اپنی جگہ ہے۔

مثال کے طور پر، اگر ایک ڈاکٹر مریض سے کہے کہ 'آپ نے دیر کر دی'، تو اس کا مطلب یہ ہے کہ اب کچھ نہیں ہو سکتا، یعنی علاج سے انکار ہو گیا اور یہ انکار دیر کی وجہ سے ہوا۔ اسی طرح، اگر آپ کی ٹرین یا گاڑی نکل جائے، تو سفر تو نہیں رکتا اور نہ منزل کا فاصلہ بڑھتا ہے، بس آپ کا وقت بڑھ جاتا ہے۔ اب اگلی سواری پر مزید فاصلہ طے ہو گا، اور اگلی سواری ملنے میں دیر لگے گی۔ یہ انتظار ہے، انکار نہیں۔

آسمان سے برستا پانی

noreply@blogger.com (Shoiab Safdar Ghumman) — Sat, 30 Aug 2025 19:01:00 +0500

بارش سیلاب لاتی ہے تو ہریالی بھی لاتی ہے۔ مگر یہ اس پر منحصر ہے کہ بارش کس زمین پر برسی ہے۔ جب زمین نم ہوتی ہے تو اس کی زرخیزی کا در کھل جاتا ہے۔ پکی زمینیں، جن پر پتھر یا پکے مکانات ہوں، پانی میں ڈوب کر تباہ ہو جاتی ہیں لیکن جہاں پانی کو زمین میں جذب ہونے کا راستہ ملے، وہاں سے ہریالی پھوٹتی ہے اور ایک خوشگوار و دلکش منظر دیکھنے کو ملتا ہے۔ تھر کے ریتیلے پہاڑ اس کی بہترین مثال ہیں جنہوں نے آسمان سے برسنے والے پانی کے بعد ایک سبز قالین بچھا لیا ہے۔ یہ مناظر تھر کی چند روز قبل کی واپسی پر بنائی گئی ایک چند سیکنڈ کی ویڈیو سے لیے گئے ہیں۔

میٹرک کے دوستوں کے ساتھ ایک بیٹھک

noreply@blogger.com (Shoiab Safdar Ghumman) — Sun, 24 Aug 2025 21:18:00 +0500

لڑکپن کی یاری اور جوانی کا پیار—دونوں ساری عمر نہیں بھولتے، یہ ہم نے ہمیشہ سنا ہے۔ جوانی میں تو کبھی پیار نہ ہوا، البتہ لڑکپن کے دوست آج بھی رابطے میں ہیں، اور ایک آدھ سال بعد بیٹھک بھی ہو جاتی ہے۔

اسکول اور کالج کی دوستی کی سب سے دلچسپ بات یہ ہے کہ یہ اُس وقت کا تعلق ہوتا ہے جب زندگی کی جدوجہد ابھی شروع نہیں ہوئی ہوتی، اور نہ ہی دنیاداری کا کوئی خاص علم یا فہم ہوتا ہے۔ اسی لیے یہ رشتہ خالص اور اصل ہوتا ہے، بے غرضی کا۔

اُس دور کے دوست آج زندگی کے مختلف شعبہ ہائے زندگی سے وابستہ ہیں—انگریزی میں کہیں تو بالکل "Diversified"۔ لیکن حقیقت یہ ہے کہ اُس وقت کا دوست صرف دوست ہوتا ہے: نہ کامیاب نہ ناکام، نہ اچھا نہ برا۔ اُسے پرکھا نہیں جاتا، آزمایا نہیں جاتا، بس دل میں سنبھال کر رکھا جاتا ہے۔

سیاست، عدالت اور تضاد

noreply@blogger.com (Shoiab Safdar Ghumman) — Thu, 21 Aug 2025 17:27:00 +0500

جو لوگ پہلے سپریم کورٹ کو 'اسٹیبلشمنٹ کی عدالت' قرار دیتے تھے، وہی آج اپنے حق میں فیصلہ آنے پر اسے کسی ڈیل کا نتیجہ نہیں سمجھتے۔ یہی نہیں، وہ بیرسٹر گوہر کے اس بیان کو بھی کسی ڈیل کا حصہ ماننے کو تیار نہیں، جس میں انہوں نے کہا تھا کہ: ”ہم فرشتے نہیں، 9 مئی ایک غلطی تھی جس کی ہم سب نے مذمت کی۔“ دلچسپ امر یہ ہے کہ یہی لوگ جب آئی ایس پی آر کے اس بیان پر کہ سید نے وڑائچ کو کوئی انٹرویو نہیں دیا پر سینہ تان کر کہتے ہیں کہ ”دیکھا! ہمارا کپتان نہیں مانا۔“ وہ خود کو سچا اور مکمل سچائی پر یقین رکھنے والا سمجھتے ہیں۔

ہم نے دیکھا ہے کہ فوجداری مقدمات میں، چاہے وہ ضلعی عدالت میں ہوں یا انسدادِ دہشت گردی کی عدالت میں، جب مدعی فریق اپنا بیان تبدیل کرتا ہے تو وہ عموماً دو میں سے ایک ہی بات کرتا ہے: یا تو یہ کہ ”یہ مجرم نہیں“ یا پھر یہ کہ ”ہم نے اللہ کی رضا کی خاطر معاف کیا“۔ حالانکہ حقیقت میں سب جانتے ہیں کہ ایک ڈیل ہو چکی ہوتی ہے، مگر اس حقیقت سے انکار کی اداکاری کی جاتی ہے اور جان بوجھ کر انجان بنا جاتا ہے۔ نہیں نہیں یہ نہیں کہا جا رہا کہ یہاں ایسا ہوا ہے۔

وڑائچ صاحب ایک قدآور صحافی ہیں، انہیں مزید شہرت کا کوئی لالچ نہیں ہونا چاہیے۔ اور نیازی صاحب ابھی تک باہر نہیں آئے، وہ آنا چاہتے ہیں مگر جن پر انہیں باہر لانے کی ذمہ داری ہے وہ لانا نہیں چاہتے شاید، وہ بونے اپنا قد لمبا ہوتا دیکھنا چاہتے ہیں۔ باقی جو لوگ اقتدار میں ہیں، ان کے بارے میں بس اتنا کہنا کافی ہے کہ:

Power is, and will remain, in the hands of the powerful, who ultimately decide who will be its next inheritor.

جو ٹھہرے ہیں تو شاید دل میں کچھ ہے

جو چل پڑیں گے تو یہ بھی نہ ہوگا

برسات کے کیڑے

noreply@blogger.com (Shoiab Safdar Ghumman) — Wed, 20 Aug 2025 12:32:00 +0500

"برسات کا یہ کیڑا، جو دیمک سے دیملی بنتا ہے، شاید یہ گمان کرتا ہے کہ اندھیروں میں لکڑیاں چاٹ کر بہت جی لیا… اب پر نکل آئے ہیں تو کیوں نہ پروانے کہلائیں، اور شمع پر نثار ہو کر اپنے انجام کو امر کر جائیں!"

کتنے پروانے جلے راز یہ پانے کےلیے

شمع جلنے کے لئیے ہے یا جلانے کے

🌊 سیلاب اور حکمرانوں کی کارکردگی

noreply@blogger.com (Shoiab Safdar Ghumman) — Wed, 20 Aug 2025 06:15:00 +0500

آسمان سے برستا پانی ہر سال نئی آزمائش لے کر آتا ہے۔ کبھی پنجاب، کبھی خیبرپختونخوا اور اب سندھ کے حکمرانوں کی کارکردگی اس سیلابی ریلے میں بہہ کر رہ جاتی ہے۔ تینوں صوبوں کے وزرائے اعلیٰ اپنی ناقص کارکردگی کو امدادی سامان اور فوٹو سیشنز کے ذریعے کیش کرنے کی کوشش کرتے ہیں، لیکن حقیقت سب کے سامنے ہے۔

اصل سوال یہ ہے کہ بارش بذاتِ خود تباہی نہیں لاتی۔ پانی کی یہ بارش قدرت کا تحفہ ہے، مگر تباہی اس وقت آتی ہے جب زمین پر بیٹھے حکمران اپنی ذمہ داری پوری نہیں کرتے۔ وہ بروقت ان تجاوزات کو ختم نہیں کرتے جو پانی کے قدرتی بہاؤ میں رکاوٹ بنتی ہیں۔ یہی رکاوٹیں بستیوں کو اجاڑ دیتی ہیں، کھیت کھلیان ڈبو دیتی ہیں اور انسانی جانیں نگل لیتی ہیں۔

مزید برآں، وہ درخت جو زمین کو مضبوطی اور توازن فراہم کرتے ہیں، ان کی حفاظت بھی نہیں کی جاتی۔ کہاوت ہے: "پانی درختوں کو نہیں مارتا، پتھروں کو بہا لے جاتا ہے۔" لیکن یہاں معاملہ الٹ

ہے—حکمرانوں کی غفلت درختوں کو کاٹ دیتی ہے اور بستیوں کو کمزور کر دیتی ہے۔

المیہ یہ بھی ہے کہ وزرائے اعلیٰ کی کارکردگی سب کے سامنے کھلنے کے باوجود سیاسی کارکن اپنی جماعت کے سربراہ پر سوال اٹھانے کے بجائے مخالف جماعت کو نشانہ بناتے ہیں۔ حالانکہ سب سے پہلا سوال اپنی قیادت سے ہونا چاہیے: آخر کیوں ہر سال بارش اور سیلاب کی تباہ کاریوں کے سامنے یہ نااہلی اور بے بسی دکھائی دیتی ہے؟

مہنگائی و پھل

noreply@blogger.com (Shoiab Safdar Ghumman) — Mon, 4 Aug 2025 20:31:00 +0500

🍎 سیب دل کی نالیوں کو صاف رکھنے اور کولیسٹرول کم کرنے میں مدد دیتا ہے۔

🍌 کیلا جسم کو پوٹاشیئم فراہم کرتا ہے، جو ہڈیوں کو کیلشیم کے ضیاع سے بچاتا ہے۔

🍈 امرود فائبر سے بھرپور ہوتا ہے، جو ہاضمہ بہتر کرتا ہے اور قبض کو دور رکھتا ہے۔

🥭 آم میں وٹامن B6 اور اینٹی آکسیڈنٹس ہوتے ہیں، جو دماغی صحت اور نیورونز کی کارکردگی کو بہتر بناتے ہیں۔

🍑 آڑو میں موجود اینٹی آکسیڈنٹس اور وٹامن C جسم کو فری ریڈیکلز سے لڑنے میں مدد دیتے ہیں۔

🍇 انگور پانی اور پوٹاشیئم سے بھرپور ہوتا ہے، جو گردوں کو صاف رکھنے اور انہیں بہتر طور پر کام کرنے میں مدد دیتا ہے۔

اور مہنگائی.. یہ سب کھانے نہیں دیتی!

😤😆

نو عمر آفیسر

noreply@blogger.com (Shoiab Safdar Ghumman) — Sat, 2 Aug 2025 22:25:00 +0500

آفسری ایک خطرناک بیماری ہے۔ یہ کسی کو بھی لاحق ہو سکتی ہے، لیکن اس کا سب سے تباہ کن اثر اُس وقت دیکھنے کو ملتا ہے جب ایک نو عمر افسر کے ماتحت کوئی ایسا شخص آ جائے جو عمر میں اس کے باپ کے برابر ہو اور ہر بات پر "جی سر، جی سر" کہنے پر مجبور ہو۔

ایسے میں کم عمر افسر اپنے سے کئی گنا تجربہ رکھنے والے بزرگ ماتحت کو محض ایک "چاکر" سمجھنے لگتا ہے۔ سوچیے، اس رویے کا نفسیاتی اثر اس بزرگ ملازم پر جو ہو گا سو ہو گا مگر اس نو عمر آفیسر پر جو اثر ہوتا ہے، وہ شاید زیادہ گہرا، دیرپا اور تباہ کن ہوتا ہے — جو اسے انسانیت، شائستگی اور ادارہ جاتی حکمت و احترام سے محروم کر دیتا ہے۔

اپنی زندگی میں ہم نے خود یہ منظر بارہا دیکھا — کسی کم عقل نو عمر "مالک" کے ہاتھوں اُن ملازمین کو بے توقیر ہوتے دیکھا جنہوں نے اپنی پوری عمر محنت، دیانت اور تجربے سے نظام چلایا تھا۔

آج کے دور میں عمر اور تجربہ، طاقت اور اختیار کے مقابلے میں اکثر بے وقعت نظر آتے ہیں۔

تخت یا تختہ

noreply@blogger.com (Shoiab Safdar Ghumman) — Wed, 9 Jul 2025 20:37:00 +0500

سیاستدان ملزم ہو تو جیل کاٹنا بہادری نہیں مجبوری ہوتی ہے ڈیل کرنے والے وہ نہیں ہوتے جو اسے اندر ڈالتے ہیں وہ ہوتے ہیں جو اسے اندر رکھ نہیں سکتے۔ ایسی مجبوری بہادری نہیں ہوتی کمزوری ہوتی ہے۔ سیاسی قیدی اگر طاقتور ہو تو وہ قیدی نہیں ہوتا۔ ہر قید سے بھاگ جانے والا مفرور و بگھوڑا ہوتا ہے تحت و تختہ، تاج و زندان میں سے ایک کا چناؤ
طاقت و کمزور کے درمیان ہوتا ہے۔

#شغل #رائے

شاہ دولہ کے چوہوں جیسے

noreply@blogger.com (Shoiab Safdar Ghumman) — Mon, 7 Aug 2023 21:10:00 +0500

مائیکرو سیفلی پیدائش کے دوران لگے والی ایک ایسی بیماری ہے جس کی بناء پر نومولود کے دماغ کی پرورش رک جاتی ہے۔ گجرات کے ایک بزرگ شاہ دولے کا مزار ایسے بچوں کی پناہ گاہ ہے۔ اس بناء پر ان بچوں کو شاہ دولہ کے چوہے کہا جاتا ہے کہ سر و دماغ چھوٹا رہ جانے سے چہرہ بہت باریک و پتلا ہوتا ہے۔ ایک قیاس والا الزام یہ بھی افواہ کی صورت میں مشہور ہے کہ یہاں اولاد کی منٹ قبول ہونے پر جو پہلی اولاد یہاں چھوڑ کر جاتی ہے وہ مکمل تندرست ہوتی ہے مگر مکینیکل طریقے سے سر کو کسی سانچے نما شے میں قید کر کے دماغ کی پرورش روک دی جاتی ہے اور آکسیجن کی کمی سے سر و دماغ کی ساخت چھوٹی رہ جاتی ہے۔
شاہ دولہ کے چوہے اس اعتبار سے آسانی سے پہچانے جاتے ہیں کہ ان کے سر و دماغ کی ساخت چھوٹی ہوتی ہے۔ اگر دماغ کی بڑھوتی رک جائے تو دولہ شاہ کے چوہے تخلیق ہوتے ہیں تو اگر سوچ کی بڑھوتی کو کسی خاص سیاسی لیڈر کی محبت میں قید کر دیا جائے، کسی مخصوص مذہبی رنگ میں مقید کر دیا جائے، کسی لسانی تعصب کے سانچے میں باندھ دیا جائے تو کیا وہ بھی ایک طرح کے دولے شاہ کے چوہوں کے مقابلے کا گروہ نہیں بن جائے گا؟
کیا ہم ہم میں سے اکثر اپنے منفرد انداز کے دولے شاہ کے چوہے نہیں ہیں؟ غور کریں؟ کیا ہم نے اپنے شعور کی پرورش کو روک نہیں دیا؟ کیا ہم نے اپنی پسند سے متضاد سچائیوں کو نہ ماننے کے لئے تاویلیں نہیں جمع کر رکھیں؟ کیا ہمیں صرف اپنی پسند کا سچ سننے کی عادت نہیں ہو گی؟
کچھ دھیان تو دیں؟

پاک بیتی

noreply@blogger.com (Shoiab Safdar Ghumman) — Wed, 24 May 2023 00:32:00 +0500

شیری مزاری پارٹی چھوڑ گئی وجہ بیٹی، شاہ محمود قریشی اور پرویز الٰہی اب تک پارٹی کا حصہ ہیں وجہ ان کے بیٹے۔ جو پارٹی میں ہیں وہ محدود ہیں، یا تو جیل تک یا پھر گھر تک۔

کسی نے کہاں جنہوں نے electable پارٹی کو دیئے تھے اب وہ ہی انہیں نکال رہے ہیں۔ پانچ چھ سال پہلے پی ٹی آئی کے لئے جو ن۔لیگ کے ساتھ کیا گیا تھا وہ اب پی ٹی آئی کے ساتھ ہو رہا ہے۔ فرق یہ ہے پہلے نیازی صاحب لاڈلے تھے تو گود لیئے گئے تھے جنہوں نے گود لیا یہ جب ان کے ہی سر چڑھے تو پہلے انہوں نے عاق کیا اب در بدر کرنے کا ارادہ ہے۔ اول اول دربدر کرنے کا ارادہ نہ تھا مگر اس گھمنڈ نے ہی مروایا جس کی بنا پر یہ بد تمیزی کا شکار تھے۔

اچھے بچے بنو تو تحت عطا کرنے والے بد تمیزی کرنے پر تختہ دار پر بھی چڑھا دیتے ہیں۔ پہلے بھی ایک کو وزیراعظم بنانے کو ملک دولخت کیا تھا مگر پھر بگڑنے پر سزا موت سنا دی۔ پہلے بھی ایک کو شہر کا بھائی بنایا تھا پھر آوارہ ہونے پر اسے اپنی ہی بنائی پارٹی سے بے دخل کر کے عبرت کا نشان بنا دیا۔ پہلے بھی ایک کو اہل بتاتے تھا مگر ڈسنے کی تیاری دیکھ کر نااہل قرار دیا۔ اب والا کیسے بچے گا؟

طاقتور اس وقت تک طاقتور ہیں جب تک اقتدار میں رہنے والا اس کا احسان مند رہے۔ صاحب اقتدار ہونے کا احساس اصل اقتدار ملنے سے ذیادہ پرفریب ہوتا ہے۔ احساس میں مبتلا احسان کی گرفت میں رہتا ہے۔ بادشاہ گر ہونا بادشاہ ہونے سے ذیادہ بہتر ہیں۔ وہ بادشاہ گر ہیں اب تک۔ آپ مانے یا نہ مانے وہ ثابت کر رہے ہیں۔

کوفے والے ہر جگہ آباد ہیں۔ مشکل وقت آئے تو پہچانے جاتے ہیں۔ اقتدار میں شریک ہی بعد میں ملزم ٹھہرنے پر سلطانی گواہ بنتے ہیں۔ ان کا سلطانی گواہ بنانا تو ان کی فطرت ہے جیسے اقتدار ملتے ہی اپنا اصل چہرہ آشکار کرنا جناب کا ایک فطری عمل تھا۔ اگر جناب اقتدار کو پانے و اقتدار میں رہنے کو سب کچھ کر سکتے ہیں تو مخالف کو ایسا کرنے پر اب طعنہ دینا بھی منافقت ہے۔

انصاف یا رعایت

noreply@blogger.com (Shoiab Safdar Ghumman) — Mon, 10 Apr 2023 15:26:00 +0500

اپنے کام کی وجہ سے عدا لت کے فیصلے ا ور جج کا رویہ دونو ں مدنظر رہتے ہیں۔ میرا یہ خیال پختہ ہو چکا ہے کہ ججز کی اکثریت میں گناہ گار کو سزا سنائے جانے کے لئے جو قوت و حوصلہ درکار ہے وہ ناپید ہے۔ جورسپروڈنس (علم قانون )کی روح سے عدالتیں فوجداری مقدمات میں انصاف کرنے کی پابند ہیں، مگر ملکی عدالتوں میں بیٹھے ججز اور ان کے سامنے پیش ہونے والوں وکلاء انصاف نہیں relief (رعایت) کے شوقین ہیں۔ ایک لمحے کو سوچیں! ملزم جو شواہد سے مجرم ثابت ہوتا ہو کو اگر مقدمہ کے آخر میں رعایت کے تحت بریت ملے تو ملنے والی رعایت کیا معاشر ے و عام آدمی سے دشمنی نہیں؟ سزا کی ججمنٹ لکھنا صرف جج کے حوصلہ و قو ت کی ہی نہیں قابلیت کی بھی محتاج ہے۔

سندھ ہائی کو رٹ نے مقدمات کے جلد ٹرائل کو یقینی بنانے کو ایک point system بنایا ہے جس کا دباو ججز پر ہوتا ہے۔ ممکن ہے میری رائے غلط ہو مگر محسوس ہوتا ہے مہینے کے اختتام پر آنے والے فیّصلے انصاف کم اور “رعایت “ کا سبب ذیادہ بنتے ہیں۔ ججز کی خود کو بھی رعا یت دیتے ہیں اور “مجرم” کو بھی۔ مگرکیا یہ رعایت معاشرے کے لئے سود مند ہے؟ منصف دنیا کے کسی کونے کا ہو وہ ملزم کو حاصل قانونی حقوق اور عام آدمی کی حفاظت کی ذمہ داری کے درمیان توازن رکھنے کے د رمیان دباو کا شکار رہتا ہے اور اس ہی دباو کی وجہ سے ججز کی اکثریت فیصلے سنانے کے بعد افسوس کا شکار ضرور ہوتے ہے۔بے انصافی کا بوجھ بڑا بھاری بوجھ ہے۔ ناانصافی صرف یہ نہیں کہ ملزم کو “ رعایت” کے تحت بری کر دیا جائے بلکہ اس کی بنتی ممکنہ سزا سے ذیادہ سزا دینا بھی ناانصافی ہے جو یقینا ذیادہ سنگین ہے۔

منصف کا توازن قائم رکھنا ہی اصل عدل ہے۔ میزان عدل کے دونوں پلڑے برابر ہو تو ہی نتیجہ انصاف پر مبنی ہوتا ہے۔

وقت

noreply@blogger.com (Shoiab Safdar Ghumman) — Thu, 16 Feb 2023 21:20:00 +0500

"ایک دور تھا سر پر اتنے بال تھے کہ بالوں میں کنگھی ٹوٹتی تھی اب یہ حال ہے کہ کنگھی میں بال ٹوٹتے ہیں۔ ایک یہ دور ہے کہ کوئی واجبی صورت دوشیزہ بھی متوجہ نہیں ہوتی ایک دور تھا مرد و زن دونوں سے بڑی محنت خود کو بچانا پڑتا تھا"

ملزم ظہیر، یوتھیاپا اور لبرلز

noreply@blogger.com (Shoiab Safdar Ghumman) — Tue, 26 Jul 2022 19:25:00 +0500

ہمیں اپنے زمانہ طالب علمی اور پھر دور وکالت میں کبھی یہ خیال ہی نہیں آیا کہ نوکری کی جائے شادی کے بعد ہم میں یہ خواہش پیدا ہوئی کہ جج بنا جائے مگر وہ نہ بنے سکے البتہ سرکاری وکیل بن گئے۔ نوکری لگنے کے بعد معلوم ہوا وکالت میں آزادی و انکم نوکری سے ذیادہ ہے کہ مئی 2014 میں جتنی ہماری اوسط انکم تھی اگست 2020 کو ہماری تنخواہ اتنی ہوئی، کل ملا کرچھ سال بعد!!

جج کے امتحانات کی تیاری ہم ملیر کورٹ (کراچی) کی لائبریری میں یا پھر اپنے آفس میں کرتے تھے۔ لائبریری میں آٹھ سے بارہ افراد کا گروپ تھا جن میں ایک فرد ابھی وکالت کر رہا ہے ، ایک سرکاری وکیل یعنی کہ میں و باقی سب ججز ہیں۔ ہمیں سب سے خوش قسمت وہ وکلالت والا لگتا ہے ۔

دوران اسٹیڈی مختلف نوعیت کے قانونی معاملات کو بشکل کہانی ان پر تبادلہ خیال کرتے تھے۔ تبہی ایک بار نیا نیا سندھ میں پاس ہونے والا کم عمری کی شادی والا قانون بھی زیر بحث آیا دوران بحث یہ دلچسپ نقطہ سامنے رکھا گیا کہ کیا ہو اگر ایک سولہ اور آٹھارہ سال کے درمیانی عمر کی لڑکی سندھ سے نکل کے پنجاب میں جا کے کورٹ میرج کر لے، کیونکہ یہ عمل یہاں سندھ میں نکاح خواہ اور دولہے کے لئے تو قابل گرفت ہے مگر پنجاب میں یہ جرم ہی نہیں ہے کہ وہاں سولہ سال سے اوپر کی لڑکی کی شادی قانونًا درست ہے۔ اس وقت اندازہ نہیں تھا نو سال بعد اس طرح کا ایک اصل مقدمہ ملک میں اس قدر مشہور ہو گا کہ ہر فرد اس کیس کے تمام کرداروں کے نام تک واقف ہو گا۔ یہ کیس اس کی کم عمر مبینہ مغویہ کے نام سے ہی مشہور ہے ہر یو ٹیوبر، شوشل میڈیا صارف اور روایتی میڈیا اس کیس کا ذکر کرتے ہوئے اس کم عمر مغویہ کا نام لیتے ہیں جبکہ قانون ایسے کیسوں میں “مظلومہ" یعنی victim کا نام پریس میں لینے سے منع کرتا ہے اور اسے قابل سزا عمل بتاتا ہے مطلب کہ جرم۔ اس بات پر بحث ممکن ہے کہ آیا واقعی کم عمر مبینہ مغویہ "مظلومہ" ہے یا نہیں اور اول اول اس نے خود جب میڈیا پر انٹرویو دیئے اب اس کے بعد بھی یہ قانون لاگو ہو گا یا نہیں۔ میری ذاتی رائے ہے قانون تو لاگو ہوتا ہے کیونکہ اس سلسلے میں کسی قسم کی چونکہ چونانچے والی کوئی شرط نہیں ہے قانون میں۔

جب کم عمری کی شادی کے اس قانون کے سلسلے میں مشاورت اور ورکشاپ ہو رہی تھیں تو ایک ایسی ہی ورکشاپ میں ہم نے سوال کیا آج آپ قانون تو پاس کروا رہے ہیں کہ کم عمر دلہن کے والدین، دولہے اور نکاح خواح کو سزا دی جائے گی مگر وہ جو نکاح ہوا ہے اسے تو آئینی و قانونی تحفظ حاصل ہے اس کا کیا کریں گے دولہا سزا کاٹ کر واپس آتا ہے تو وہ خاندان کی مرضی یا عدالت میں حق زناشوئی کا کیس کرے گا تب متعلقہ عدالت کیا کرے گی اس پر بھی اسی قانون سازی میں حل نکالیں نیز یہ بھی کہا تھا کہ چلیں والدین کم عمر لڑکی کی شادی کرتے ہیں تو سزاوار ہوئے مگر ایک کم عمر لڑکی اپنی مرضی سے کورٹ میرج کرتی ہے تو کیا ہو گا اس کا بھی قانونی حل نکالیں۔ مگر کسی نے اس طرف توجہ نہ دی۔ دوسری تجویز تو چند منتظمین کوبری لگی خاص ایک ظاہری لبرل کو ان سے ورکشاپ کے بعد کی ہائی ٹی پر خوشگوار انداز میں تلخ باتیں بھی ہوئیں تھیں اس تجویز کی بناء پر کیونکہ وہ اسی ہفتے ایک کورٹ میرج کی پٹیشن میں سندھ ہائی کورٹ میں پیش ہوئیں تھیں کم عمر جوڑے کی حمایت میں۔

یہ قوم یا ہجوم کسی سیاسی ، لسانی، مذہبی، مسلکی اور سوشل ایشو پر جذباتی بھی بہت ہے اور سخت بھی۔ کسی بھی موقف پر جذباتی انداز میں ڈٹ جانے کا نتیجہ عدم برداشت اور بدتمیزی ہی نکلتا ہے۔ جو رویوں میں پختہ ہوتا جا رہا ہے خاص کر جب یہ خیال ہو کہ پکڑ نہیں ہو گی۔ ایسا ہی اس کیس میں بھی ہے اس کیس کو رپورٹ کرنے والے اور اس رپورٹ کو فالو کرنے والے دونوں اخلاقیات سے عاری رپورٹنگ کرتے ہیں ۔ ساتھ ہی دونوں طرف کے احباب جھوٹ کی آمیزش بھی کرتے ہیں جانے انجانے میں۔ فرد کو اپنے موقف پر ڈٹ جانا چاہئے اول جب وہ درست ہو دوئم جب اس سے کسی فرد کو اور خاص کر پورے معاشرے کو نقصان نہ پہنچتا ہو مگر ہم اپنی انا کی تسکین کے لئے یہ سب کرتے ہیں تو یہ تباہی ہے۔

لڑکی کے باپ یا فیملی کی سختی کی تو سمجھ آتی ہے اپنے مسلکی و سوشل بیک گراونڈ کی وجہ سے۔ وکالت کے دوران ہر پانچ میں سے ایک کورٹ میرج میں ہمیں لڑکی کی ایسی ہی فیملی سے واسطہ پڑتا تھا اور نتیجہ لڑکی اپنے خاندان سے مزید دور ہو جاتی تھی یوں راوبط دوبارہ بننے کے امکانات خاتم ہو جاتے ہیں۔ سو فیصد کیسوں میں جو لڑکی کورٹ میرج کے لئے گھر چھوڑتی ہے اس کی فیملی کی کسی ناں کسی خاتون (فیمیل ممبر) کو معاملات کا پہلے سے علم ہوتا ہے وہ کوئی بھی رشتہ ہو سکتا ہے۔ ہم نے ایک کورٹ میرج کروائی جس میں لڑکی کی فیملی لڑکے کی فیملی سے کئی گناہ طاقتور تھی اور معاشی طور پر مضبوط بھی۔ ابتداء میں باپ اور دیگر فیملی ممبر نے مخالفت کی مگر ملک سے باہر رہنے والے لڑکی کے بھائی نے ہم سے رابطہ کیا ملاقات ہوئی ، جوڑے کی ملاقات اپنے دفتر میں کروائی طے پایا لڑکی واپس آئے چونکہ خاندان کے باہر کے لوگوں کو علم نہیں لہذا ہم اس سلسلے میں ابتداء سے رخصتی تک کے تمام لوازمات کرتے ہیں کہ معاشرے میں عزت قائم رہے لڑکی لڑکا خوفزدہ تھے۔ ان کی ویڈیو بیانات و دیگر کاروائی کر کے واپس اپنے خاندانوں میں بھیجا گیا۔ پھر رشتہ مانگنے سے لے کر نکاح و رخصتی تک کے تمام ضروریات انہوں نے مکمل کی یہ دونوں خاندانوں و جوڑے کے لئے اچھا ہوا۔ شادی کے لئے یقینًا ہمارے معاشرے میں خاندانوں کا رضامند ہونا لازم ہے مگر وہ جو الگ خاندان بنانے کی بنیاد بنے گے انہیں بھی اہمیت دی جائے تو بہتر نتائج آئیں گے۔

عدالتی و قانونی نقطہ نظر سے دیکھیں تو بات سیدھی سی ہے میاں بیوی راضی تو کیا کرے گا قاضی۔ یہاں قاضی نکاح والا سمجھ لیں یا انصاف کرنے والا دونوں ٹھیک ہیں۔ لڑکی جس کے حق میں بیان دے گی وہ ہی کامیاب ہو گا۔ لڑکی کو کراچی لانے کا مقصد اسے ظہیر سے دور کرنا ہے مگر کیا ایسے میں وہ اپنے باپ کاظمی صاحب کے قریب ہو جائے گی؟

ہم اپنی خواہش و مرضی کو درست و ٹھیک بات پر فوقیت دیتے ہیں ۔ خواہش، مرضی و مفاد تو بدلتا رہتا ہے مگر حق و سچ دائمی ہے۔ انا کی جیت میں رشتے کچلے جاتے ہیں کچلے جا رہے ہیں اور ایسے معاملات میں ہم پارٹی بن کر کسی ایک کا ساتھ نہیں دے رہے بلکہ ان کے درمیان جو خونی رشتہ رکھتے ہیں میں مزید دوریاں پیدا کر رہے ہیں۔ قانون میں ایسے کیسوں کی "مظلومہ" کے نام کی پریس میں ممانعت کافی نہیں بلکہ خاندانوں کے نام اور مقدمات کی کوریج پر بھی پابندی ہونی چاہئے۔ تب ہی انصاف ہو پائے گا ورنہ سیاسی کیسوں کی طرح ایسے معاملات میں بھی پہلا قتل سچ و انصاف کا ہو گا۔

فیصلہ

noreply@blogger.com (Shoiab Safdar Ghumman) — Tue, 17 May 2022 23:19:00 +0500

عدالتیں سائلین کی مرضی کے فیصلے کرنے کو نہیں بلکہ جو انہیں عین انصاف لگے اپنی قانونی سمجھ بوجھ کے تحت آزادانہ فیصلے دینے کو ہیں۔

جج کی مرضی و خواہش ممکن ہے کبھی انصاف کے متضاد ہو مگر وہ پابند ہے کہ قانون و حقائق (جو عدالت کے سامنے ہوں) کے مطابق فیصلہ دے۔ تاریخ بہت ظالم ہے یہ آگاہ کر دیتی ہے کون سا فیصلہ انصاف کے مطابق تھا اور کون سا خواہش کے زیر اثر۔ یوں پردہ فاش ہوتا ہے کون سا منصف ایماندار تھا اور کون سا قاضی بے ایمان۔

کسی سائل کا فیصلے کو ناانصافی کہنا اسے غلط فیصلہ نہیں بناتا۔

اقتدار کا نشہ

noreply@blogger.com (Shoiab Safdar Ghumman) — Mon, 16 Aug 2021 22:21:00 +0500

نشہ فرد کی عقل کو ماند ہی نہیں کرتا بلکہ اکثر اس کی سمجھ بوجھ کو بھی مکمل طور پر "متاثر" کرتا ہے۔ مدہوشی میں کیئے گئے فیصلے کبھی بھی ہوش مندی میں کئے گئے فیصلوں جیسے بہتر نہیں ہوتے۔ اقتدار کی غلام گردشوں کا حصہ ہنا بھی ایک قسم کا نشہ ہے جوالگ ہی مدہوشی کا سبب بنتا ہے۔ تخت سے جڑے رہنے کی خواہش اور اپنی طاقت کو بڑھانے کا شوق! فرد کو قانون کی لاقانونیت کے لئے پر اکساتا ہے۔ تاریخ ایسے افراد کو ولن بتاتی ہے جبکہ وہ جو بنتی تاریخ میں جی رہے ہوتے ہیں اس وقٹ خود کو مسیحا سمجھ رہے ہوتے ہیں۔

متواسط طبقہ اور مہنگا ازاربند

noreply@blogger.com (Shoiab Safdar Ghumman) — Sun, 2 May 2021 22:57:00 +0500

ہم میں سے ہر ایک ہر معاملے کو اپنے نقطہ نظر سے دیکھنے کا عادی ہے اس کی وجہ اس کا اپنا خاص ماحول جس میں اس نے نشوونما پائی یا وہ طبقہ جس سے وہ تعلق رکھتا ہے۔ فرد کی معاشی حیثیت بھی اس کے ماحول و تعلق کو ظاہر کرتی ہے۔ کسی کے لئے پچاس ہزار ایک ماہ کے لئے کافی ہیں اور کوئی اس میں بمشکل ایک ہفتہ "گزارا" کر پاتا ہے۔

جب ہم نے اپنی وکالت شروع کی یعنی اپنے سینئر سے الگ ہوئے تو ایک پہلا مسئلہ جس سے ہمارا واسطہ پڑا وہ سائل سے معاوضے کا تعین تھا۔ جس لاء فرم سے ہم نے وکالت سیکھنے کی ابتداء کی تھی وہ ایک اونچے طبقے سے تعلق رکھتی تھی لہذا میرے ریفرنس کے افراد کے لئے اس حیثیت کی فیس ادا کرنا ممکن نہ تھا۔ وکالت کے آغاز میں اس بات کی تو سمجھ آ گئی کہ معاوضہ طلب کرتے وقت صرف مسئلہ کی پچیدگی ہی نہیں بلکہ سائل کی قوت خرید کو بھی مد نظر رکھنا ہوتا ہے۔

متواسط طبقے کے سائل سے جس ضمانت کے ہم چالیس ہزار طلب کرتے تھے چند ہمارے دوست وہ کام بیس ہزار میں اور کچھ سینئر وکلاء اسے طرز کی ضمانت کے ڈیڑھ سے تین لاکھ روپے فیس کی مد میں لیتے تھے۔ فرق ٹریٹمنٹ کا ہوتا تھا بس۔ قانون و دلائل میں کیا فرق ہونا ہے بشرطیکہ وکیل محنتی ہو۔ وہ کہتے ہے ناں ایک امیرزادے کے ہاتھوں قتل ہو گیا تو اس کا باپ ایک وکیل کے پاس اپنا کیس لے کر گیا معاملات طے ہو رہے تھے تو امیرزادے کا باپ وکیل کی "کم" فیس کی بناء پر بددل ہو گیا کہ جو اس قدر کم معاوضہ مانگ رہا ہے اس نے کیا مقدمہ لڑنا ہے لہذا وہ ایک دوسرے وکیل کے پاس کیس لے گیا بھاری معاوضہ دینے کے بعد بھی اس کے بیٹے کو سزا ہو گئی۔ کچھ عرصے بعد باپ کی ملاقات پہلے والے وکیل سے ہوئی تو اس نے بچے کے مقدمے بارے پوچھا تو باپ نے آگاہ کیا کہ اسےسزا ہو گئی ہے جس پر وکیل صاحب بولے " دیکھ لیں جو کام آپ نے پندرہ لاکھ میں کروایا وہ میں تین میں کردیتا"۔

یہ قیمت یا معاوضہ کا فرق وکالت ہی نہیں بلکہ ہر شعبہ زندگی میں نام (جسے آپ برانڈ کہہ لیں) اور ٹریٹمنٹ (اسے آپ پریزنٹیشن یا سہولت کہہ لیں) کی وجہ سے ہوتا ہے۔ میرے والد جب اپنی نوکری سے ریٹائر ہوئے تو باقی پاکستانیوں کی طرح انہوں نے بھی ریٹائزمنٹ کے بعد حج کا رادہ کر رکھا تھا۔ حج ایک مشقت والی عبادت ہے لہذا اس مشقت کو کم کرنے کے لئے انہوں نے سرکاری کے بجائے پرائیویٹ سیکٹر سے حج پر جانے کا پروگرام بنایا 2016 میں جب سرکار پونے چار لاکھ کا حج کروا رہی ی میرے والدین نے جو پیکج لیا وہ ساڑھے سات لاکھ فی کس والا تھا حرم و مدینہ میں قریب رہائش و دیگر سہولیات کی بنا پر ان کا حج با آسانی ہوا۔ تب ہمیں معلوم ہوا کہ مولانا طارق جمیل صاحب پندرہ لاکھ فی کس کے حساب سے حج کا پیکج دے رہے ہیں۔

باندھنے میں سہل، کھولنے میں رواں۔۔۔۔ ٹی جے ناڑے
— حُسین (@Jafar_Hussein) April 29, 2021

ہر طبقے کے اپنے برانڈ ہوتے ہیں ہر شعبہ میں۔ ان کی اپنی شرائط ہوتی ہیں۔ میرے جیسے متواسط طبقے کے بندے کو کبھی بھی بڑے نام (برانڈ) کی خریداری بارے میں نہیں سوچنا چاہئے۔ ایم ٹی جے برانڈ ابھی کا نہیں ہے شروع سے ہی اوپری طبقے کا برانڈ ہے۔ ان کے پیروکار ابتداء سے ہی "بڑے نام" رہے ہیں۔ بڑے برانڈ آہستہ آہستہ ہر شعبہ میں داخل ہونے کی کوشش کرتے ہیں ان پر تنقید یا ان کی حمایت کرتے واقت احتیاط کریں کیونکہ کہیں آپ کے اپنے نظریات اور کہیں آُپ کا اپنا طبقہ اس تنقید یا حمایت کا نشانہ بن سکتا ہے۔ چالیس والا آزار بند سو روپے میں یا چار سو والی ٹوپی پندرہ سو میں ہرگز مہنگی نہیں بس وہ آپ کے لئے نہیں ہے کیونکہ آپ کی کلاس دوسری ہے۔

انتقال و شخصیت

noreply@blogger.com (Shoiab Safdar Ghumman) — Wed, 27 Jan 2021 10:14:00 +0500

زمین کے انتقال کے بعد آپ اس کے مالک بنتے ہیں اور اپنے انتقال کے بعد آپ زمین کی ملکیت بنتے ہیں۔

اس درمیاںی وقفے آپ کا کردار دراصل آپ کی اصل شخصیت ہے۔

گورک ہل کا سفر

noreply@blogger.com (Shoiab Safdar Ghumman) — Sun, 19 Jul 2020 16:17:00 +0500

کورونا سیزن یا لاک ڈاؤن میں جہاں سارا پاکستان کرونا سے لڑنے کو گھر میں بیٹھ کر “کرونا خلاف” جنگ میں مصرو ف تھا وہاں دوسری طرف ہم روازنہ کی بنیاد پر نوکری پر موجود ہوتےتھے۔ ایسے میں دوستوں کا گورک ہل کا پروگرام تازہ ہوا کا جھونکا لگا۔

کراچی سے چار سو کلومیٹر دور یہ علاقہ سندھ کا “مری” و “ناردن ایریا” کہلاتا ہے۔ ہم نے اب تک اصل مری و ناردن ایریا نہیں دیکھا لہذا ہمارے جیسے کے لئے یہ “شارٹ کورس” تھا کہ تھوڑا تھوڑا جان لیں سب بارے اور پھر بھی معلوم کچھ بھی نہ ہو۔

کراچی سے دادو تین گھنٹے میں اور پھر دادو شہر سے واہی پاندی قریب چالیس منٹ کا سفر طے کرنے کے بعد معلوم ہوا گورک ہل (پہاڑی) تک مزید تین گھنٹے درکار ہونگے۔

واہی پاندی، ضلع دادو کے تعلقہ جوہی کا وہ مقام ہے جہاں سے آگے ہم اپنی گاڑی میں سفر نہیں کرسکتے تھے یہاں سے جیپ اوپر جانے و آنے کے لئے پانچ سے چھ ہزار میں ملتی ہے اور ڈرائیور رات اوپر رکنے کو راضی ہوتے ہیں۔

واہی پاندی کو واہی پاندی کہنے کی کیا وجہ ہے؟ ہم نے یہ جانا کہ کسی پاندی نام کے فرد نے کھیتی باڑی کے لئے ایک نہر بنائی اور کاشت کاری شروع کی ۔ واہی مطلب کھیتی کا کام بھی ہے۔ یوں پاندی صاحب کا نام تاریخ میں زندہ رہا اپنی کاشت کاری کے لئے کی گئی جدوجہد کی وجہ سے۔ ویسے کراچی میں ایک جگہ لالوکھیت ہے شہر کی ترقی نے کھیت ختم کر دیا اور لالو کا علم نہیں کہاں چلا گیا مگر لالو کے کھیتوں نے اسے اب تک زندہ رکھا ہوا ہے۔

جوہی تعلقہ کا نام یاد رکھنا ہمارے لئے یوں مشکل نہ تھا کہ جوہی چاولہ ہمارے کئی جاننے والوں کی پسندیدہ اداکارہ رہی ہے اگرچہ اس کا اس تعلقہ سے کوئی لینا دینا نہیں۔ جوہی کسی دور میں (مطلب انگریزی دور حکومت میں) ضلع کراچی کا حصہ رہا ہے اور بدھ ازم کا اسٹوپا (عبادت گاہ) بھی یہاں ہے۔ تھر کے بعد شاید یہ ہی بدھ عقیدے

کے لوگوں کے اثر میں رہنے والا ایک اہم علاقہ رہا ہے سندھ میں۔

بہرحال واہی پاندی سے ستر کلومیٹر کا سفر ہے طے کر کے گورک کی پہاڑی کی چوٹی پر پہنچنا ایک الگ ہی ایڈوانچر تھا۔یہ ایک دس سال سے زیرتعمیر روڈ ہے۔اس پرخطر راستے پر گاڑی چلانا ایک مہارت ہے جو ان جیپ ڈرائیوروں کا ہی خاصا ہے۔ ایک غلطی آُپ کو اوپر سے نیچے ہی نہیں لاتی بلکہ نیچے سے اوپر بھی پہنچا سکتی ہے۔راستہ پر خطر ہی نہیں تھا بلکہ سحرانگیز بھی ہے۔ “حسن سحرانگیز ہو تو پر خطر بن جاتا ہے” ممکن ہے یہ جملہ صرف کسی دوشیزہ کے حسن کی تعریف کے لئے استعمال کیا گیا ہو مگر ہمیں اس سفر میں نظر آنے والے فطری حسن پر بھی سچا معلوم ہوتا ہے۔

زمین (واہی پاندی) پر 44 دگڑی کے بعد اوپر (کورک ہل) پر بارہ سے پندرہ درجہ حرارت ایک حیران کر دینے والا مامعلہ ہے۔ سمندر سے قریب چھ ہزار فٹ پر واقعہ یہ مقام جولائی میں ہم کراچی والوں کو دسمبر کی سردی کا لطف دیتا محسوس ہوتا ہے۔ کوہ کیر تھر کے پہاڑی سلسلے پر یہ مقام ایک عمدہ تفریح مرکز بن سکتا ہے۔ سندھ سرکار نے اوپر اچھے انتظامات کر رکھے ہیں یہاں تمام سہولیات و انتظامات سرکار کے ہیں اگر کوئی پرائیویٹ پارٹی منتظم بھی ہے تو اس کے پاس ٹھیکہ ہے کیونکہ یہاں تمام املاک سرکاری ہیں۔اگرچہ راستہ زیرتعمیر ہے اور اوپر تک کا سفر دشوار ہے مگر چوٹی پر رہائش و کے اچھےانتظامات ہیں ، کیمپنگ بھی کی جا سکتی ہے۔ موٹرسائیکل پر دل والے اوپر پہنچے ہوئے تھے۔ کورونا سیزن کی وجہ سے لوگوں کی کم تعداد تھِی۔

کوہ کیرتھر کا پہاڑی سلسلہ سندھ و بلوچستان کی سرحدی لکیر بھی ہے۔گورک ہل کو گورک ہل کہنے کی دو ممکنہ وجوہات بیان کی جاتی ہیں ، ایک یہ کہ کورک کے معنی چیتے و خطرناک جانور کے ہیں اور یہاں کسی دور میں کافی خطرناک جانور ہوتے تھے دوسری وجہ کورک ناتھ نامی بدھ مذہب کا پیروکار بتایا جاتا ہے جو یہاں اپنی عبادت کرتا تھا۔

سورج غروب ہونے سے پندرہ منٹ قبل ہم اوپر زیروپوائنٹ پر پہنچ ےاو ر ہم نے یوں سورج غروب ہوتا دیکھا کہ سورج کسی پہاڑی کے پیچھے نہیں چھپا بلکہ آسمان پر ایک لال داری سی سطح چھوڑتا ہوا مدہم ہوتا ہوا غائب ہو ا اور بعد میں وہ لالی بھی آہستہ آہستہ غائب ہو گئی۔ رات ہم نے استادامیرخان کی گائیکی کے سرور میں مدہوش ہوئے اور صبح کراچی واپس روانہ ہوئے۔

ایک یادگار سفر تھا یہ!!! ہمارا شارٹ کورس فطرت کی حسن بارے آگاہی کا۔