وردګ - روانې چارې او بيلابېل

طالب ورور ویشتلې خور ځان ته امن ځای لټوي

noreply@blogger.com (Unknown) — Fri, 13 Mar 2015 08:25:00 +0000

د افغانستان په مرکزي ولایت میدان وردګو کې د نجونو د ښوونځي یوه ښوونکې چې څه موده وړاندې د خپل طالب ورور له خوا ویشتل شوې، وايي په سیمه کې ژوند تېرول ورته ګران دي او حکومتي چارواکي هم د هغې د خوندیتوب لپاره ناغېړي کوي.

د دغه ولایت چارواکي دا مني چې نوموړې د خپل ورور له خوا ګواښل کیږي، خو دوی وايي چې د نوموړې د خوندیتوب لپاره یې لازم ګامونه پورته کړي دي.

ښايي ښوونکې بخت زمینه لومړنۍ مېرمنه نه وي چې په خپلو سیمو کې له زورزیاتي او تاوتریخوالي سره مخامخ کیږي، بلکې ډیرې داسې نورې مېرمنې هم شته چې ګواښل شوي، خو غږ یې تر رسنیو نه دی رسېدلی.

بخت زمینه چې د میدان وردګو ولایت د نرخ په نا امنه ولسوالۍ کې ښوونکې او د مدنی ټولنې فعاله ده وايي چې موده مخکې د خپل ورور له خوا په دې تور وویشتل شوه چې هغه ښوونځي ته له تګه نه په شا کېده، د بخت زمینې په خبره چې لا هم هغه ګواښل کیږي او دندې ته نه شي تللی.

ښوونکې بخت زمینه وايي، یو شمېر مرستندویه ټولنو ته ورغلې چې هغوی ورته د امن په کورونو کې د اوسېدلو سپارښتنه کړې، چې د دې په وینا هغه یوازینۍ څوک ده چې خپل بوډا پلار او وړو خویندو وروڼو ته یوه مړۍ ډوډۍ پیدا کوي او د امن په کورونو کې هغه اوسېدل نه غواړي.

د میدان وردګو چارواکي هم دا مني چې نوموړې د خپل طالب ورور له خوا ویشتل شوې او په تېښته بریالی شوی، خو د دغه ولایت د والي عبدالمجید خوګیاڼي په خبره چې هغوی د دغې ښوونکې د خوندیتوب لپاره له هیڅ ډول همکارۍ نه ډډه نه کوي.

د افغانستان په ډېرو لرو پرتو سیمو کې له ښځو سره د زورزیاتي پېښې ډیرې لیدل کېږي، چې یوه نیمه یې تر رسنیو لاره پیدا مومي، خو د ښځينه ښوونکو پر وړاندې تاوتریخوالی هغه څه دي چې د ډېرو ماشومانو پر ژوندانه اغېز پرې باسي، له یوې خوا دغلته ښځینه ښوونکې په نشت حساب دي او له بله پلوه ډیرې کورنۍ په ځینو سیمو کې تر هغې خپلې لوڼې ښوونځیو ته نه پرېږدي چې ښوونکې یې مېرمنې نه وي.

د وردګو پوهنتون ته ۲۰۰ زره ډالر ټول شوي

noreply@blogger.com (Unknown) — Tue, 24 Feb 2015 07:22:00 +0000

د یوې کمسارې پرمختیا په ترڅ کې د وردګ ولایت ولسي خلکو د پوهنتون جوړولو په هیله تر دې مهاله ۲ سوه زره ډالر ټول کړي دي.

یوشمېر مدني فعالان چې د پوهنتون جوړولو د جرګګۍ غړي دي، وايي د خلکو لېوالتیا تر دې کچې ده چې ځینو ښځو ددغه کار لپاره خپلې ګاڼې پلورلې دي.

د پوهنتون جوړولو عملي چارې پرون پیل شوې او په پام کې ده چې تر یوه کاله يې لږ تر لږه دوه پوهنځي جوړ کړل شي.

مصطفی سالک پرې له کابله راپور لري:

د میدان وردګو پوهنتون جوړولو منښته تېر حکومت کړې وه، خو د نا جوتو شویو لاملونو له کبله یې ودانیز کار پیل نه شو.

ولسي جرګګۍ او یوشمېر مدني فعالان د لګښت او ودانیز کار چارې پر غاړه لري، تر اوسه ۲ سوه زره ډالر ټول کړل شوې دي.

مدني فعال ولي الله شاهین چې د پوهنتون جوړولو په کار کې ښکېل دی، راته وايي چې ولس څنګه د پوهنتون جوړولو پریکړه وکړه:

"دغه پوهنتون به په دوه زره جرېبه ځمکه جوړ شي، د پوهنتون منظوري د مخکیني ولسمشر حامد کرزي د واکمنۍ پرمهال شوې وه، خو دا چې عملي کار یې وځنډول شو، د ولس خلکو وپتېیله چې دوی خپله لاس په کار شي. "

پوهنتون د یاد شوي ولایت په توپ غونډۍ دښته کې جوړېږي چې ۲ زره جریبه ځمکه ورته بیله شوې ده.

د میدان وردګو د ولس هیله ده چې تر یوه راتلونکي کاله پورې لږ تر لږه ددوو پوهنځیو کار بشپړ شي، په واندیزو چارو کې ښکېل مدني فعالان وايي د پوهنتون جوړولو ته لېوالتیا دومره ډېره ده چې ان یوشمېر ښځو ورته خپلې ګاڼې هم پلورلي دي.

د اړوندو فعالانو په وینا کتابتون،د معلوماتي ټکنالوژۍ یو بنسټ او لیلیه هم د پوهنتون برخې دي.

دغه کسان وايي چې حکومت هم د مرستې ژمنه کړې او د استادانو ګمارلو چارې یې وار له مخه پیل کړې دي.

تر دې مخکې په پنجشیر ولایت کې ولسي خلکو په خپلو مرستو سره یو ښوونځی جوړ کړی و.

وړاندې، د ميدان وردګو د سرپرست والي عبدالمجید خوږیاڼي وياند عطاء الله خوږياڼي بي بي سي ته ویلي وو، ''دغه پوهنتون چې ۲۰۰۰ جريبه ځمکه ورته بېله شوې ده د ولسمشر د لارښوونې له مخې د ودانۍ د جوړېدو چارې به يې په يوه کال کې بشپړې شي''.

په ميدان وردګو کې ٤٥٠ ښوونځيو او تعليمي مرکزونو کې ١٧٢٨٩٢زره نجونې او هلکان په زده کړو بوخت دي، چې له دې ډلې يې ٤٤٧٩١ن جونې دي.

د افغانستان په ۳۱ ولایتونو کې پوهنتون او یا د لوړو زدکړو موسسې شتون لري.

یوازې په نورستان، زابل او وردګو کې لا هم د لوړو زړده کړو امکانات نه دي برابر شوي.

وردګ ولايت د كابل په لوېديځ كې پروت دى، چې د كابل- كندهار لويه لار پكې غځېدلې ده.

دغه ولايت په ۱۳۴۳ لمريز كال كې د ځانګړي ولايت په توګه منل شوى.

‎وردګ ولايت اوس مهال اته ولسوالۍ لري (سيد آباد، جغتو، چک، دايميرداد، جلرېز، نرخ، بهسود مركز او بهسود لومړۍ حصه).

په ميدان وردګو کې ٤٥٠ ښوونځيو او تعليمي مرکزونو کې ١٧٢٨٩٢زره نجونې او هلکان په زده کړو بوخت دي، چې له دې ډلې يې ٤٤٧٩١ن جونې دي.

ددغه ولايت ٢٣١ ښوونځي ودانۍ نه لري، چې د پوهنې وزارت له خوا يې د جوړېدو ژمنه شوې ده.

محور ورځپاڼه: د ميدان وردګو ولايتي شورا د پخواني رييس د اختلاس داستان

noreply@blogger.com (Unknown) — Mon, 23 Feb 2015 14:39:00 +0000

سرچينې وايي، د ميدان وردګو ولايتي شورا پخواني رييس او د ځمکو د استملاک کمېټې مشر حضرت جانان هوتک د درنو جرمونو له څارنوالۍ سره د ۱۲۷ ميليونه افغانيو اختلاس دوسيه لري، خو د مشرانو جرګې غړي حسيب الله کليمزي د ښاغلي جانان ضمانت کړی او هغه يې ازاد کړی دی.

د ولايتي شورا غړي وايي، اوس هم هوتک او ځينې نور کسان د ولايتي شورا د اداري پلاوي په ټاکنه کې مداخله کوي، هڅې يې دا دي، چې خپل کسان رامخته کړي، څو د فساد دا ډول دوسيې وپوښي.

د ولايتي شورا ۱۵ کسان په دوو ډلو وېشل شوي، چې موقتي مشري يې د حليمې عسکري په غاړه ده. محلي چارواکي وايي، حليمې عسکري له فوايد عامې رياست څخه د ۴۵ لکه افغانيو په ارزښت د سړک پاکونې پروژه د خپل شرکت لپاره اخستې، چې دا کار هم د یوې پټې معاملې پر بنسټ شوی دی.

د ميدان وردګو ولايتي شورا د اداري پلاوي د ټاکنې پر سر له مياشتو لانجه ده. د شورا پخواني غړي او مشران هڅه کوي، چې خپل کسان اداري پلاوي ته ورمخکې کړي.

د ولايتي شورا غړي وايي، ځينې قومي مشران او د ولايتي شورا په فساد کې ښکېل پخواني غړي په دې هڅه کې دي، چې په نوې ولایتي شورا کې د نفوذ په وسیله د خپل فساد دوسيې وپوښي او هغه پيسې هضم کړي، چې په ناقانونه ډول يې د خپلې کاري دورې پر مهال تر لاسه کړې دي.

د ولايتي شورا غړي وايي، حضرت جانان هوتک د درنو جرمونو له څارنوالۍ سره د ۱۲۷ ميليونو افغانيو اختلاس دوسيه لري او هڅه کوي، چې همدا دوسيه محوه کړي.

د ولايتي شورا غړي او محلي چارواکي وايي، په دې دوسيه ټول خبر دي، چې ښاغلي هوتک د خپلې کاري دورې په اوږدو کې د ميدان-باميانو د سړک پخولو پر مهال د ځمکو د استملاک ۱۲۷ ميليونه افغانۍ خوړلې دي: (( هوتک د دولتي ځمکې له درکه هم د ځايي خلکو د ځمکو د استملاک په نوم پيسې اخستې، حال دا چې ډېری ځمکه دولتي ده. داسې ځمکه شته، چې د یو جریب نرخ يې يوميليون افغانۍ دی، خو دوی تر پنځو ميليونو افغانيو د سړک څیرمه استوګنو په نوم اخستې او خپل جيب ته يې اچولې دي.))

د يادې ولايتي شورا دوو غړو د نوم نه اخستلو په شرط محور ته اسناد ورکړل او ويې ويل، کله چې د حضرت جانان هوتک د اختلاس دوسيه د درنو جرمونو څارنوالۍ ته ورسېده، نو د شورا يوه غړي حسيب الله کليمزي، چې اوس د مشرانو جرګې غړی دی له هوتک سره معامله وکړه، د هغه ضمانت يې وکړه او پرې يې نه ښود چې زندان ته لاړ شي: ((د مشرانو جرګې غړي حسيب الله کليمزي له دې امله دا کار وکړ، چې حضرت جانان هوتک په ولايتي شورا کې له خپل نفوذ ګټه پورته کړي او رايه ورکړي، څو مشرانو جرګې ته لار پیدا کړي. په دې برخه کې د ضمانت ترڅنګ ۱۰۰ زره ډالر هم هوتک ته ورکړل شوي دي. د ولايتي شورا درې غړي پرته له دې چې خبر شي، پلورل شوي او رايه يې د حسيب الله کليمزي صندق ته تللې ده.))

د ولايتي شورا غړي وايي، په دې اړه اوس اوس خبر شوي او هڅه کوي، چې ددې معاملې اصلي کسان رسوا کړي. هغوی هم حضرت جانان هوتک او حسيب الله کليمزي ته ګوته نيسي او وايي، که دا خبر ريښتينې ثابته شي، نو به ورسره حساب وکړي.

خو حسیب الله کلیمزی دغه تورونه بې بنسټه بولي او وايي، دهېڅ دوسیې په تړاو یې د حاجی جانان ضمانت ندی کړی.

د ميدان وردګو ولايت لپاره اوس موقتي پلاوی ټاکل شوی، چې رياست يې د حليمې عسکري په غاړه دی.

يوه محلي دولتي سرچينه وايي، حليمې عسکري د ۴۵ لکه افغانيو په ارزښت د سړک پاکونې يوه پروژه له فوايد عامې وزارت نه خپل شرکت ته اخستې، چې په دې برخه کې هم د ولايتي شورا پخواني غړي حضرت جانان هوتک ور سره مرسته کړې ده، ځکه چې دوی يو ټيم جوړ کړی دی.

د ميدان وردګو ولايتي شورا ۱۵ غړي لري او په دوو ډلو وېشل شوې، هر لوری په دې هڅه کې دی، چې اداري پلاوی له خپل لوري ور بريالی کړي.

د دغو دواړو ډلو تر شاه د ولايتي شورا د پخوانيو غړيو او ځينو قومي مشرانو لاس هم دی. يوه ډله د ولايتي شورا د پخواني غړي حضرت جانان هوتک، د انسجام مشر باذل او د مشرانو جرګې غړي حسيب الله کليمزي له خوا اداره او ملاتړ کېږي او ترمنځ يې هوکړه شوې، چې له مخې يې حليمه عسکري د ولايتي شورا مشره، ميرويس اميري مرستيال او شريف الله هوتک منشي ټاکل شوي دي.

خو حضرت جانان وايي، دی ځکه پکې ښکېل دی، چې له يوه لوري يې زوی شريف الله هوتک د ولايتي شورا غړی دی او له بل لوري قومي مشر او د ولايتي شورا پخوانی غړی تېر شوی دی.

ده هغه اسناد د محور خبريال ته وښودل، چې پر بنسټ يې د ده او باذل په ګډون د ولايتي شورا يوې نهه کسيزه ډلې ژمنه کړې، چې رايه به د خپلې ډلې کسانو (حليمې عسکري، ميرويس اميري او شريف الله هوتک) ته ورکوي او که هرڅوک له دې سر غړونه وکړي، نو درې سوه زره ډالر به خپلې ډلې ته جرمانه ورکوي.

ښاغلی جانان وايي، د ځمکو د استملاک په برخه کې يې پيسې نه دي خوړلې، د څارنوالۍ دوسيه يې هواره شوې او ځينې کسانو د ده د سياسي فعاليتونو د مخنيوي په خاطر داسې موضوعاتو ته لمن وهي.

ورور خپله ښونکې خور ټپي کړې

noreply@blogger.com (Unknown) — Tue, 10 Feb 2015 07:21:00 +0000

په ميدان وردګو کې ورور خپله ښونکې خور ټپي کړې

د د میدان وردګو د والي د وياند له دفتر څخه افغان مونګ ته په رالیږل شوې خبرپاڼه مې راغلي دي:« ددې ولايت په نرخ ولسوالۍ کې تېره شپه یو تن خپله ښوونکې خورپه خپل کور کې په ډزو سره ټپي کړې ده.»

د خبرپاڼې له مخې دغه ښوونکې بخت زمینه نومیږي او د نرخ ولسوالۍ د اول خیلو په ابتدایه ښوونځي کې دنده درلوده،چې تېره شپه په خپل کور کې د نوموړی ورور عبدالمحمد له لورې د چرائي ټوپک په ډزو سره ټپي کړای شوې ده.

ويل کيږي ټپي شوي ښوونکې د میدان وردګو ولایت په مرکزي روغتون کې تر درملنې لاندې ده او روغتیایې وضعیت هم د ډاډ وړ دی .

د خبرپاڼې د معلوماتو له مخې،د یادې ښوونکې ورروعبدالمحمد په نشه یې توکو روږدی دی او د وسله والو مخالفینو سره هم له نږدې اړېکې لري،چې له پېښې وروسته له سیمې څخه په تېښته بریالی شوی دی .

دا په داسې حال کې ده چې په ډيرو پښتون ميشتو سيمو کې د ناسمو دودونو له امله د نجونو ښونځي نشته دي او په هغو سيمو کې چې شته دي ښونکې يي له ورته ستونزو او ګواښونو سره مخ دي.

محور ورځپاڼه: د میدان وردګو د پوليسو د اعاشې په قرارداد كې ستره درغلي

noreply@blogger.com (Unknown) — Mon, 09 Feb 2015 12:06:00 +0000

د افغانستان څارنوالۍ د میدان وردګو ولایت امنیه قوماندان ته د اداري فساد په یوه غټه دوسیه کې د ښکېلتیا له کبله استعلامونه استولي او وروستي راپورونه وايي، چې ددغه ولایت درې غټ امنیتي مقامات ممنوع الخروج اعلان شوي دي.

معلومات په ډاګه کوي چې دغه درغلي د پولیسو د اعاشې اباطې په اکمالاتو کې شوې. امنیې قوماندان له نوي قرار داد پرته زاړه قراردادیان رخصت کړي او خپل یو نږدې جمعیتي حاجي رسا پنجشيري ته یې پولیسو ته د خوراکي موادو د انتقال لپاره واک ورکړی دی.

د یوه قرارداد شاهدان وايي، چې د شپې مهال امنیه قوماندانۍ کې قرارداد وشو او د لوژستیک مدير ټوپک وال په دروازه کې درولي وو، چې نور قراردادیان د ننه پرېنږدي. دوی د حاجي‌جانان د شرکت کسانو ته اشاره کوي، چې وسله والو له داوطلبۍ وشړل.

په امنیه قوماندان او امنیت امر نور تورونه هم دي، ‌چې د پولیسو په تشکیلاتو کې یې خپل خپلوان ځای پر ځای کړي او د پولیسو امکانات د ځان په ګټه کاروي. امنیه قوماندان تر دوه سوه زیات کسان له ځان سره له اندرابه راوستي، امنیت امر څلویښت کسان له ځان سره ساتلي، چې زیاتره یې خپلوان، زامن او کلیوال دي.

دوی د ولسوالیو د پولیسو تشکیلات راکم کړي او سلګونه پولیس له ځان سره ګرځوي. د ولسوالیو پولیس د تشکیلاتو د کمي له وجې رخصتي نشي کولای، نو ځکه چې سخته راشي، له دندو وتښتي.

یوه سرچينه وايي، چې د اعاشې په یو قرارداد کې تر یونیم لک ډالرو رشوت اخستل شوی، چې زور یې د سربازانو تر ډوډۍ خېژي. دغه راز سرچينه ادعا کوي، چې په قوماندانۍ کې د زړو او سوځېدلو موټرو کباړ او د وسپنو خرڅلاو روان دی.

دا تورورنه یوازې په امنیه قوماندان محمد خلیل اندارابي ندي، له ده سره سم په امنیت امر مل پاسوال عبدالجمیل تتمدره يي او لوژستیک مدير ښاغلي الف هم په قراردادونو او د پولیسو په تشکیلاتو کې د لاسوهنې او خېشخورۍ تورونه پورې شوي‌ دي.

د پولیسو د تشکیلاتو پربنست د افغانستان لومړۍ درجه ولسوالۍ اساساً ۸۵ پولیس پرسونل تشکیلات باید ولري، خو د میدان وردګو په اکثرو ولسوالیو کې پولیس سربازان له اصلي تشکیلاتو لسو ترشلو کسان کم دي او په عوض یې په مرکز کې امنیه قوماندان تر۱۰۰ او امنیت امر تر۴۰ کسان د باغوان، چایدارباشي او باډیګارډانو په حیث له ځان سره ساتلي او تنخواګانې اخلي.

د حفظ مراقبت او لوژستیک ټول قراردادونه له انداربیانو سره دي، چې د امنیه قوماندان خپلوان دي.

د امنیې قوماندانۍ د حفظ مراقبت په هغه قرارداد کې چې د شپې یې داوطلبي ترسره شوه د تهیه او تدارکاتو مدیر فضل الربي هم ښکېل ګڼل شوی دی.

په دغه قرارداد کې د نه ګډون له کبله امنیت امر غصه شو، سهار وختي د داوطلبۍ ځای ته ورغی و د لوژستیک ټولې دوسیې یې بهر وغورځولې. وروسته د امنیه قوماندانۍ له خوا له نوموړي سره ژمنه وشوه، چې د دشت ټوپ د پولیسو د مرکز راتلونکی قرارداد به ده ته ورکول کېږي.

میدان وردګ یو له هغو ولایتونو دی، چې امنیت پکې خورا ترینګلی او د دې ترینګلتیا عامل د طالبانو نفوذ ګڼل کېږي، خو د امنیتي‌ شیرازې او تشکیلاتو په منځ کې درغلۍ او ناوړه معاملې ددې سبب شوې چې ولایت له سقوط سره مخ شي.

افغان خبریالان ادعا کوي، چې که په ژوره توګه وڅېړل شي، د پولیسو په منځ کې په اکثرو ولایتونو درغلۍ، فساد او غلاوې تردې زیاتې دي.

د ميدان وردګو ولايت د امنيه قومندانۍ د امنيت امر جنرال عبدالجميل دغه خبرې ردوي.

په ميدان وردګو کې له نشه يي توکو سره يو ځای وسله وال نيول شوي

noreply@blogger.com (Unknown) — Wed, 04 Feb 2015 10:14:00 +0000

په ميدان وردګو کې درې وسله وال مخالفین له نشه یې توکو، وسلو او ګڼ شمېر مهماتو سره ونیول شول

د ميدان وردګو د والي وياند وردګ ویبپاڼی ته په راليږل شوې خبرپاڼه کې ويلي دي:«د میدان وردګو ولایت په جلریز او سیداباد ولسوالیو کې تېره شپه امنیتي ځواکونو د بېلابېلو عملیاتو په ترڅ کې درې وسله وال مخالفین له نشه یې توکو ،وسلو او ګڼ شمېر مهماتو سره یو ځای ونیول .»

د جلریز ولسوالۍ په محمد نورخیل،علي خیل او قول بتون سیمو کې امنیتي ځواکونو تېره شپه د وسله والو مخالفینو د لمنځه وړلو په موخه عملیات ترسره کړل،چې په ترڅ کې درې وسله وال مخالفین مطیع الله،محیب الله او میراحمد ونیول شول.

د دغه عملیاتو په ترڅ کې نیول شوی محیب الله چې وړاندې په سیمه ییزو پولیسو کې یې دنده درلوده او له یو میل کلاشینکوف سره وسله والو مخالفینو سره یو ځای شوی وو،هم شامل دي .

د ترسره شویو عملیاتو په ترڅ کې د مطیع الله له کور څخه امنیتي ځواکونو یو میل تفنګچه،یو یوولس ډزی دوربین لرونکی توپک،۱۲۰ کیلو ګرامه بېلابېل چاودیدونکې توکې چې په بوشکو او بوریو کې ځای پر ځای شوي وو،دوه پاکټه د پوډرو توکې، دوه فیره د ۸۵ ملي متري توپ مرمۍ، یوه د لاسي بمونو پرتله،درې لاسي بمونه،درې بنډله د برېښنا لاین،درې غټې بطرۍ،دوه کارتنه وړې بطرۍ او نور مهمات هم ترلاسه کړي دي

په همدې حال کې د ملي امنیت مؤظفینو د سیداباد ولسوالۍ په ملي خیل او برات خیلو سیمو کې تېره شپه عملیات ترسره کړل،چې په ترڅ کې یو میل کلاشینکوف له څلور شاژرونو او یو یوولس ډزی ټوپک یې د مخالفینو له کورونو څخه نیولي .

دغه وسلې یې د وسله والو مخالفینو د یوه سرګروپ خالد او غړي اباسین،چې مشهور په میلاد وو،له کورونو څخه ترلاسه کړي ،خو دوی له سیمې څخه په تېښته بریالي شوي دي.

په ترسره شویو عملیاتو کې ملکي وګړو او امنیتي ځواکونو ته کوم زیان ندی اوښتی .

په سيدآباد کې ځانمرګی بريد شوی دی

noreply@blogger.com (Unknown) — Tue, 30 Dec 2014 08:00:00 +0000

د ميدان وردګو د تنګي درې په سيد اباد ولسوالۍ کې ځانمرګى بريد شوى دى.

ويل کيږي ياد بريد د ملي اردو پوستې ته نيږدې شوی دی.

د ميدان وردګو د والي د وياند له دفتر څخه افغان ځواک ته په راليږل شوې خبرپاڼه کې هم ددې بريد پخلی شوی دی.

خبرپاڼه زياتوي:« د میدان وردګو ولایت سیداباد ولسوالۍ په سيسي دوه لارې کې نن سهار شاوخوا اته نیمې بجې د ملي اردو پوستې ته څېرمه ځانمرګی برید ترسره شو.»

د خبرپانې پر بنسټ ځانمرګی برید ګر غوښتل،چې له چاودیدونکو توکو ډک کرولا ډوله موټر د ملي اردو پوستې مخې ته چاودنه ورکړي،خو د ملي اردو ځواکونو له لورې تر پیژندلو وروسته پرې ډزي شوي.

د یادو ډزو له امله بریدګر موخې ته له رسیدو وړاندې ځانته چاودنه ورکړې،چې له امله یواځې بریدګر وژل شوی دی، خو په پېښه کې د ملي اردو یو سرتېری سطحي ټپي شوی دی .

په پېښه کې نورو امنیتي منسوبینو او ملکي وګړو ته کوم زیان ندی اوښتی .

د خبرپاڼې له مخې د میدان وردګو سرپرست والي ښاغلی عبدالمجید خوږیاڼی د ملي اردو د یاد سرتېرې د مېړانې ستاینه کړې او نورو سرتېرو ته یې د خپلو دندو ترسره کولو پر مهال د پوره هوښیارتیا او زیرکتیا لارښوونه کړې.

هیره دې نه وي چې په دې دره کې تر دې مخکې هم د افغان پوځ پر تاسيساتو ورته بريدونه شوي و خو په وروستيو کې د افغان پوځ ويښتيا ددې لامل شوې څو د دې ډول ډيرو خونړيو بريدونو مخه ونيسي.

ميدان وردګو کې تازه مېوو ته مارکېټ جوړېږي

noreply@blogger.com (Unknown) — Tue, 02 Dec 2014 13:41:00 +0000

ميدانښار (پژواک، ٢٦ لړم ٩٣): په ميدان وردګو ولايت کې د ۳۷ ميليونه افغانيو په مالي لګښت د مېوې د يوه مارکېټ د جوړېدو د بنسټ ډبره کېښودل شوه.

د دغه ولايت د والي وياند عطاءالله خوږياڼي د لړم په ٢٦مه پژواک خبري اژانس ته وويل چې دغه مارکېټ له نشه يې توکو سره د مبارزې وزارت د شاوخوا ۳۷ ميليونه افغانيو په مالي لګښت جوړېږي.

هغه زياته کړه چې دغه مارکېټ د ولايت د مرکز اړوند په لس زره درې سوه متره مربع ځمکه کې په يو کال کې جوړېږي چې نن يې د يو لړ مراسمو په ترڅ کې د بنسټ ډبره کېښودل شوه.

خوږياڼي وويل چې دغه مارکېټ به ۳۲ هټۍ، دوه تشنابونه، د موټرو تمځای، د اوبو زېرمه، د ساتونکو خونې، ځانګړي بېروني تشنابونه، شنه ساحه، د وسايطو او پلي تګ لپاره پاخه سړکونه او نور اړين ملحقات ولري.

د ميدان وردګو سرپرست والي عبدالمجيد خوږياڼي په دغو مراسمو کې د نشه يې توکو پر وړاندې د مبارزې له وزارت څخه مننه وکړه چې د دوی پر وړانديز يې په دغه ولايت کې د مېوې مارکېټ جوړېدو چارې پيل کړې.

نوموړي زياته کړه، د دغه مارکېټ په جوړېدو سره به د دغه ولايت هغه مېوې چې تر دې وړاندې په بېلابېلو ځايونو کې په بې ارزښته توګه په کم قيمت پلورل کېدې، له دې وروسته به يې ارزښت ډېر او په ښه بيه به وپلورل شي‎ چې ورسره به د دغه ولايت د خلکو اقتصاد ښه شي.

ده همدا راز د ولسي جرګې او ولايتي شورا له غړو هم مننه وکړه چې د دې پروژې په ترلاسه کولو کې يې ورسره هڅې او منډې کړې دي.

له نشه يې توکو سره د مبارزې وزارت مرستيال هارون الرشيد شېرزاد وويل، ميدان وردګ يو له هغو ولايتونو دی چې نشه يې توکي نه په کې کرل کېږي او همدا لامل دی چې دوی هم دغه ولايت ته د هغو پروژو د پلې کېدو چارې ترسره کوي چې بزګرانو ته يې ګټه رسېږي.

د هغه په وينا، د مېوې د مارکېټ تر څنګ ګڼې نورې پروژې هم په پلان کې لري چې ډېر ژر به په دغه ولايت کې پيل شي.

د نرخ ولسوالۍ يو بزګر سبحان الله وايي چې په دغه ولايت کې تازه مېوې او سبزي جات په پراخه کچه ترلاسه کېږي، خو د مارکېټ د نشتوالي له امله کروندګر او بڼوال ترې سمه ګټه نه شي پورته کولى.

هغه له حکومته مننه وکړه چې د مېوې مارکېټ د جوړولو کار يې پيل کړ او هيله يې څرګنده کړه چې په راتلونکي کې د سيمې اوسېدونکي له دې څخه ډېره ګټه پورته کړي.

ورته راپورونه:

د چک د برېښنا بند او سړک جوړېدوسره به زرګونه کورنيو ته اسانتياوې برابرې شي

”د پکتيا دولتي ادارې د ښاروالۍ د صفايي پيسې په خپل وخت نه ورکوي“

ميدان وردګو کې د مخابراتي شرکتونو فعاليت د وسله والو له ګواښ سره مخ دى

کاپيسا کې د معدني اوبو فابريکې فعاليت پيل کړ

د لندن ناسته له افغانستان سره د ژمنو د تازه کېدو فرصت دى

د سرې میاشتې سره به ۲ نیم میلونه افغانۍ مرسته وسي

noreply@blogger.com (Unknown) — Tue, 21 Oct 2014 12:53:00 +0000

د میدان وردګو ولایت د نظامي او ملکي کارکوونکو له لورې د یوې ورځې تنخوا په ځانګړې کولو سره په دغه ولایت کې د سرې میاشتې ادارې سره د شاوخوا دوه نیم میلیونو افغانیو مرسته کیږي.

د میدان وردګو والي عبدالمجید خوږیاڼي په مشرۍ د بېلابېلو ادارو د مسؤلینو ترمنځ په جوړه سوې غونډه کې د سرې میاشتې رئیس محمد سلیم وردګ وړاندیز وکړ،ترڅو په دغه ولایت کې ټول نظامي او ملکي کارکوونکې دې د خپل یوې ورځې تنخوا سرې میاشتې ته ورکړي.

نوموړی زیاته کړه په دغه ولایت کې د نظامي او ملکي کارکوونکو د یوې ورځې په تنخوا به دوی وکولای سي چې له ګڼ شمېر بې وزله او اړینو کسانو د اړتیا پر مهال مرسته وکړي.

له یاد وړاندیز وروسته د ادارو د مسؤلینو له لورې پرېکړه وسوه چې په دغه ولایت کې به میشت نظامي او د ملکي ادارو ټول کارکوونکي د خپل یوې ورځې تنخوا سرې میاشتې ته ورکړي.

د میدان وردګو والي عبدالمجید خوږیاني وویل:د کارکوونکو د یوې ورځې تنخوا به د مستوفیت له لارې په شفاف ډول د سرې میاشتې بانکي حساب کې زیاتی سي.

هغه د دغه کار د لا روښانتیا په موخه یو کمیسون ته دنده وسپارله،ترڅو موضوع تعقیب کړي او د مسؤلینو ترمنځ راتلوونکې غونډې ته بشپړ معلومات ورکړي.

تردې وړاندې وړاندې د دغه ولایت نظامی او ملکي کارکوونکو د یوې ورځې تنخوا په ځانګړې کولو سره د بدخشان د ارګو ولسوالۍ زیانمنو کورنیو ته دوه نیم میلیونه او پنځه ویشت زره افغانۍ مرسته ورکړې وه.

ميدان وردګ کې ماين چاودنې پنځه پوليس ووژل

noreply@blogger.com (Unknown) — Tue, 21 Oct 2014 12:50:00 +0000

د ميدان وردګ ولايت په جلرېز ولسوالۍ كې د سړك غاړې ماين چاودنې پنځه پوليس وژلي دي.

د دې ولايت د والي وياند عطاء الله خوږياڼي كليد ته وويل، چې دا چاودنه تېر مازديګر د يادې ولسوالۍ د زېولاتو په اسماعيل خېلو په سيمه کې شوې ده.

د هغه په وينا، چاودنه په ياده سيمه کې هغه مهال د پوليسو پر موټر شوې، چې دوى غوښتل يو بل ټپي شوى سيمه ييز پوليس ولېږدوي.

طالب وياند ذبيح الله مجاهد وايي، چې دوى په جلرېز کې د عامه نظم پر پوليسو چاودنه کړې، چې له كبله يې يې يو ټانک ويجاړ او شپږ پوليس وژل شوي دي.

ميدان وردګو کې ٣٦ لوبغالي جوړېږي

noreply@blogger.com (Unknown) — Tue, 21 Oct 2014 12:46:00 +0000

ميدان ښار( پژواک ٢٥ تله ٩٣):د ميدان وردګو ولايت په مرکز او ولسواليو کې د شاوخوا ٤٦ مېليونه افغانيو په ټوليز لګښت ٣٦ لوبغالي جوړېږي.

د ميدان وردګو د والي وياند عطاالله خوږياني، پژواک خبري اژانس ته وويل،چې د واليببال،فوټبال،کرکټ او ځينې نورو لوبو دغه کوچني لوبغالي د ثبات پروګرام ( سيکا ) په مالي لګښت جوړېږي.

د هغه د معلوماتو له مخې،دغه لوبغالي په مرکز ميدان ښار او جغتو،سيداباد،نرخ او جلرېز ولسواليو کې جوړېږي او له دې ډلې تېره اونۍ په جلرېز کې د فوټبال لوبغالي کار پيل شوى دى.

خوږيانى، وايي چې د نورو يادو لوبغالو چارې به هم په نږدې راتلونکې کې پيل او په ټوليز ډول به د يادو لوبغالو کار له درېيو تر څلورو مياشتو په موده کې بشپړ شي.

ه ميدان وردګو او کاپيسا کې وسله والو ته مرګ ژوبله اوښتې

noreply@blogger.com (Unknown) — Tue, 12 Aug 2014 11:09:00 +0000

ميدانښار-محمودراقي (پژواک ٢١ زمرى٩٣): په ميدان وردګو او کاپيسا ولايتونو کې د عملياتو او نښتو پر مهال ١٥ وسله وال وژل شوي او ٢٣ نور ټپيان شوي دي.

د ميدان وردګو د والي وياند عطاالله خوږياڼي پژواک خبري اژانس ته وويل چې تېره شپه په مرکز ميدانښار د ″زيبداغ″ او د چک ولسوالۍ د ″ امبوخاک″ په سيمو کې عمليات ترسره شوي دي.

خوږياڼى وايي، چې په دغو عملياتو کې د پنځه وزيرستانيانو په ګډون اته وسله وال وژل شوي او ١١ نور ټپيان دي.

د والي د وياند په وينا، په وژل شوو کې درې طالب قوماندانان هم شامل دي، خو د هغوى د هويت په اړه يې څه ونه ويل.

بلخوا د کاپيسا امنيه قوماندان وايي، چې په تګاب ولسوالۍ کې له وسله والو سره د جګړې پر مهال اوه وسله وال وژل شوي او ١٢ تنه نور ټپيان دي.

مل پاسوال خواجه فقيراحمد صديقي پژواک ته وويل، چې له تېرې ورځې راهيسې د تګاب په ″تترخېلو″ او″ شکوټ″ سيمو کې له وسله والو سره نښتې روانې دي.

امنيه قوماندان وايي، چې اوس يې په يادو سيمو کې عمليات پيل کړي ، څو د وسله والو طالبانو له شتونه پاکې شي.

د سيمې يوه اوسېدونکي فرهاد پژواک ته وويل، د ده د معلوماتو له مخې، د تګاب ولسوالۍ په نښتو کې ملکي وګړو ته هم مرګ ژوبله اوښتې ده.

ده وويل: ((په خپله مې په يوه موټر کې وليدل، چې ټپيان يې د ولايت مرکز ته انتقالول، دا کسان ملکي وګړي وو.))

د شاه اغا په نوم د سيمې يوه بل اوسېدونکي پژواک ته وويل، چې په سيمه کې يې يوه مېرمنه وژل شوې او درې ماشومان ټپيان دي.

ده وويل: ((زموږ کلى د ملايانو د کلي په نامه يادېږي، دلته له وسله والو سره په جګړه او عملياتو کې يوه مېرمن وژل شوې او د يوه کور درې ماشومان ټپيان شوي دي.))

سيمه ييزو طالبانو پژواک ته د تګاب په جګړه کې د ملکي وګړو مرګ ژوبله تاييد کړې ، خو د کره شمېر په اړه يې څه نه وايي.

تر اوسه د کاپيسا د عامې روغتيا روغتون او ځايي امنيتي چارواکو په دغو عملياتو کې د ملکي کسانو د مرګ ژوبلې په اړه څه نه دي ويلي.

میدان وردګ: سېلاب ځپلي بېړنیو مرستو ته اړتیا لري

noreply@blogger.com (Unknown) — Tue, 12 Aug 2014 10:42:00 +0000

د میدان وردګو ولایت په نرخ ولسوالۍ کې تېره اونۍ د راوتلو سیلابونو له امله نږدې ۱۰۰۰۰ سیلاب ځپلې کسان بېړنیو مرستو ته اړتیا لري.دغه سیلابونه،چې د نرخ ولسوالۍ په شهاب الدین،اندړ،دراني اول خیل او یو شمېر نورو سیمو کې د زمري میاشتې په ۱۵ نیټه راوتلې وو،له امله یې ۱۰۹۵کورنیو ته زیانونه اوښتي . ولایت مقام نرخ ولسوالۍ ته د استول شوي څېړونکې پلاوې د معلوماتو له مخې،په یاده ولسوالۍ کې د سیلابونو له امله ۵۲ کورونه په بشپړ ډول ویجاړ

شوي خو ۶۵ نور کورونه بیا په کمه اندازه ویجاړ شوي دي . معلومات زیاتوي،د سیلابونو له امله په ټولیز ډول ۱۰۹۵ کورنۍ زیانمنې شوي،چې په زیانمنو کورنیو کې ۸۵۷۰ کسان شتون لري،چې دا مهال له ستونزو سره مخامخ دي.

همدا راز د راوتلو سیلابونو له امله ۴۸۲۱ جریبه کرنیزه ځمکه تخریب شوې او ۳۸۰۰۵۸ مېوه لرونکې او غېرې میوه لرونکې ونې هم لمنځه تللي دي . یاد پلاوی غوښنه وکړه،چې زیانمنې کورنۍ بېړنیو مرستو ته اړتیا لري. په همدې اړه په ولایت مقام کې د میدان وردګو مرستیال والي ښاغلي ذاکرحسین سلطاني په مشرۍ بېړنۍ غونډه جوړه شوه،چې په کې DRC مؤسسې مشر ګل رحمان ژمنه وکړه،چې له ۵۲ هغه کورنیو سره،چې کورونه یې په بشپړ ډول ویجاړ شوي،هرې کورنۍ سره به د اته،اته زره افغانیو نغدې مرسته وکړي . همدار از د سرې میاشتې ادارې له وړاندې ژمنه کړې وه،چې د سرپنا او نورو اړینو غېرې خوراکي توکو به برخه کې به له یادو ۵۲ زیانمنو کورنیو سره دوی هم مرسته وکړي .

خو د میدان وردګو مرستیال والې ښاغلي ذاکر حسین سلطاني یادې مرستې د زیانمنو لپاره کمې وبللې او پر ټولو مرستندویه ادارو یې غږ وکړ،چې د نرخ ولسوالۍ له سیلاب ځپلو سره بېړنۍ مرستې ترسره کړي . دا په داسې حال کې ده،چې د یادې پېښې له یو شمېر زیانمنو کورنیو سره د میدان وردګو والې ښاغلي عبدالمجید خوږیاڼی له لورې وړمه ورځ د خیمو مرسته ترسره شوه.

دخبر رالېږونکی: عطاالله خوږیاڼی، دمیدان وردګو ولایت ویاند

په نرخ کې خونړی برید شوی

noreply@blogger.com (Unknown) — Mon, 11 Aug 2014 09:09:00 +0000

نن ټکی اسیا (دوشنبه، زمري ۲۰مه، ۱۳۹۳ل): د میدان وردګو ولایت په نرخ ولسوالي کې تېره شپه د طالبانو او دولتي امنیتي ځواکونو تر منځ په نښته کې دواړه خواوې د مرګ ـ ژوبلې ادعاوې کوي.

د طالبانو ویاند ذبیح الله مجاهد وايي چې د دوی ملګرو د نرخ ولسوالي په اندړو سیمه کې تېره شپه نهه بحې په یوه پوسته برید کړی دی او لس تنه يې پکې وژلي دي.

د میدان وردګو ولایت د والي ویاند عطاء الله خوږياڼی هم مني چې د نرخ ولسوالي په اندړو سیمه کې نښته شوې ده. او په خبره… يې د ملي اردو پنځه عسکر پکې وژل شوي دي.

عطاءالله خوږياڼی وايي چې په مقابل کې يې لس تنه طالبان له منځه وړي دي.

د طالبانو ویاند ذبیح الله مجاهد وايي چې دوی په اندړو کې پوسته نیولې ده او ګڼ مهمات يې هم ترلاسه کړي دي.

مجاهد وايي چې د دوی هم خپل درې ملګري له لاسه ورکړي دي: «مجاهدينو په پوسته کې ۱۰ تنه عسکر وژلي او ګڼ نور يې ټپيان کړي دي، دغه راز يې په پوسته کې ۵ ميله شل ډزي ټوپک، ۲ راکټ لانچر او ګڼ نور مهمات د غنيمت په توګه ترلاسه کړي.

د دښمن په ډزو کې د اسلامي امارت ۳ تنه مجاهدين شهيدان شوي.»

یاده دې وي چې د چک ولسوالي په فاروقیانو کلي کې هم تېره ورځ د بې پیلوټه الوتکي په برید کې دوه تنه کوچیان ټيبان شوي دي.

د والي ویاند دا مني او وايي چې په پېښه کې يې طالبان هم له منځه وړي دي.

ترافیکې پېښې په وردک ولایت کې ۱۱ تنه مړه او ژوبل کړل

noreply@blogger.com (Unknown) — Mon, 02 Jun 2014 07:18:00 +0000

د میدان وردګ ولایت د سیداباد ولسوالۍ په دشت توپ سیمه کې نن (یکشنبه) د دوه کرولا موټرونو د ټکر له امله د دوو میرمنو او یو ماشوم په ګډون اوه تنه مړه شوي او څلور نور ټپیان دي.

د میدان وردک د والي ویندوی عطا الله خوګیاڼي د دې پېښې په اړه وویل:«دا مرګ ژوبله هغه مهال رامنځته شوه چې د دوو کرولا موټرو د جنګېدو په نتیجه کې یو ټیلر موټر، چې له غزني څخه کابل ته په لاره و، له کرولا موټرو سره ولګېد.»

ده همداراز وویل:«د یادې پېښې شهیدان د سیداباد ولسوالۍ اوسیدونکي دي.»

د یو بل خبر له مخې نن سهار د نرخ ولسوالۍ په دادل سیمه کې د و سله والو طالبانو لخوا د ځای پر ځای شوي ماین د چاودنې له کبله د حزب اسلامي د یوه قوماندان ښامار ورور ووژل شو.

همدا راز د سیداباد ولسوالۍ په بدګګ سیمه کې یو وسله وال طالب هغه مهال پر خپل ماین ووژل شو او درې ملګري یې ټپیان شول چې غوښتل یې د سړک په غاړه ماین خښ کړي.

ترخه حقیقتونه – اوله برخه / لیکوال: فضل ربي وردګ

noreply@blogger.com (Unknown) — Wed, 28 May 2014 08:32:00 +0000

د هېواد په دې تېره دوولس کلنه دوره کې (۲۰۰۱ – ۲۰۱۴) د ډېرو ناخوالو، ستونزو، کړاوونو، غمونو، ویرونو، مرګونو او زخمونو سره لاس او ګرېوان وو او په بل اړخ کې مو د امیدونو، خوشحالیو، سولییز ژوند او د یوه پرمختللي او پر خپلو پښو ولاړ افغانستان د جوړېدا هیلې په زړه کې ګرځېدې ، ولې په ریښتیا هم چې افغانانو د ډېموکراسۍ په دې مړه لسیزه کې ډېرې دودې او نادودې ولیدې او لا یې هم د نادودو او خودغرضه انسانانو له لاسه پرېوتي کاڼي پر سرونو لګي.

په دې دوولس کلنه دوره کې دانوی را ټوکېدلی نسل چې د هېواد د راتلونکې لپاره د یو ښه او روڼ برخلیک مسول بلل کېدای شي د ډېر څه شاهدان وو، څوک تر یوه حده د افغانستان په اوسني سیاست کې ورګډ او چا یې د لیرې نه یواځې نظاره کوله خو هر چا د خپلې تجربې، څېړنې او پوهې تر کچې په هېواد کې د راوانو حالاتو او ناخوالو تعبیر اخیستی، او د هماغه تعبیر پر بنیاد یې خپل ځان ته د تګ لاره سمه کړې.

زه چې د افغانستان په اوسني سیاست کې تر یو څه حده ګډ او یو ښه ناظر پاتې شوی یم د ډېرو ترخو واقعیتونو، ناخوالو، بدبینیو او هم دګوتو په شمېر پرمختګونو او مثبتو تغییراتو یو ښه شاهد یم. پدې لیکنه کې چې د ترخه حقیقتونو په نامه یې لیکم غواړم خپلو هېوادولو او د افغانستان د ځوان نسل سره هغه ناخوالې او بې خونده حقیقتونه شریک کړم چې په اګاهانه او غیر آګاهانه توګه یې زمونږ روان بهیر ته لویه ضربه وارده کړې. زما لیکنه انتقادي ده خو کوم مشخص کس او کړۍ ته نه ده متوجه، زما لیکنه انتقادي ده خو دا انتقاد یواځې د اصلاح او ترمیم لپارهدی، نه د تخریب لپاره.

د دې دورې لمړنۍتریخ حقیقت دا دی چې په دې دوره کې د ولسمشر نه نیولې بیا د یو واړه سیاستمدار تر کچې د داسې پلیتو، چاپلوسو، خودغرضه، ناپوهو او ځان غوښتونکو اشخاصو کثیفه دایره را تاو وه، چې د دې هېواد هېڅ یو خواخوږي او هغه کس ته چې لږ یې هم پدې هېواد، ملت او سیسټم زړه دردېده د پلیتې دایرې د مدار نه ورته د ننه تګ د نشت په امکان وو. دې کړیو په خپلو بېهوده کړنو او غوښتنو له یوې خوا پخپله د سیاسي مشر لرلید، ټولنیز سیاست او د هغوی شخصیت خدشداره کړی او له بلې خوا یېپه هېواد کې روان بهیر ته د زیاتو خنډونو سبب شوې. په دې لیکنه کې زه غواړم د همدې بېکاره کړیو په خصلتونو او زیانونو لنډه تبصره وکړم.

۱- سیاستمدار ته د کره مالوماتو نه او یا نیمګړي رسېدل

یو سیاستوال او ښه رهبر ته همېش د ریښتوني او کره مالوماتو ضرورت وي چې، د دې مالوماتو د رسولو لپاره صادق او ریښتوني کسان پکار دي. زما په اند د ډېموکراسۍ په دې لسیزه کې د افغانستان د سیاسیونو د پاتې راتګ یو لوی لامل د همداسې کسانو نه شتون وو او زیاتره سیاسي څېرې د داسې خودغرضه او چاپلوسه کړیو پواسطه پوښل شوې وې چې هغوی د خپلو شخصي ګټو په خاطر نه غوښتل چې د هېواد مطرح څېرې د هېواد په ځمکنیو واقعیتونو خبر کړي نو ځکه به د سیاسیونو زیاتره پرېکړې د نیمګریو او درواغجنو مالوماتو پر بنسټ پلې کېدې. په نوره نړۍ کې د کره مالوماتو د راټولولو لپاره هر کامیاب سیاستمدار د ازادو اشخاصو، د څېړنو د مرکزونو او ټولنیزو بنسټونو څخه کار اخلي او هڅه کوي تر څو د خپل سیاسي حرکت په جریان کې د صادق، بې طرفه او ازادو بنسټونو سره په اړیکه کې و اوسي.ولې په افغانستان کې په زیات تعداد سیاستوال د خپلې خوښې او فرمایشي مالوماتوپه لټه کې وو چې د داسې مالوماتو ښې سرچینې همدا چاپلوسه کړۍ کېدای شي.
۲- د سیاستمدار قضاوت یواځې د همدې کړۍ د علم او پوهې تر کچې وي

په تېره لسیزه کې زمونږ د هېواد زیاتره په سیاست کې ورګډ مشران د سیاسي بصیرت څښتنان نه وو تر څو په خپله نېږدې کړۍ کې د ښه او بد توپیر وکړي نو ځکه یې یواځې د هغه کسانو پر پوهه، خبر او علم تکیه لګوله چې د همدې سیاستوال نه د یوې سرېښناکه پوښ په څېر را تاو وو او یواځې د خپلوانفرادي ګټو په نظر کې نیولو سره د سیاستوال په مخ کې اوړېدل را وړېدل، نه د هېواد، خلکو او سیستم د ګټو په خاطر. دا په دې مانا چې په اصل کې د دې کړۍ پوهه د هماغه مشر پوهه او قضاوت بلل کېدای شي، ځکه د غلطو اشخاصو د غلطو مالوماتو پر بنسټ قضاوت کول یو غلط قضاوت دی او په ډېر تاسف سره زمونږ د هېواد خورا ډیری فیصلې د همداسې غلطو خلکو په غلطه پوههتر سره شوې چې پایلې یې بې له ناکامۍ بل څه نه وې، او له بلې خوا همدا غلط مالومات د مسایلو په وړاندې په تصمیمونو او فیصلو کې د بې مورده بدلونونو سبب ګرځېدلي چې هم د وخت او سرچینو ضایع ده او هم یې په ټولنه او د هېواد په کچه د یوه سیاستمدار اعتبار او اعتماد له منځه وړی.

۳- د سیاستمدار د لید کوچنۍ دایره

دا یو منلی حقیقت دی چې هر څومره د یو سیاستمدار نه د اشخاصو را تاو کړۍ کوچنۍ او له فکري نظره فقیره او منفي وي په همدومره کچه د هغې دید د ټولنې د مسایلو، ستونزو او پرمختګ په وړاندې کوچنی وي او بلاخره تخریبي بڼه غوره کوي، ځکه خپل ټول ځان او جهان د هماغه کړۍ تر دیده ویني چې دا د یو رهبر، مشر او سیاسي څېرې لپاره تر مرګ هم بدتره حالت دی. په داسې یو حالت کې دا پلیته کړۍ پر یو مدبر سیاستوال هم په پوره ډول غالبېږي چې هغه بیا د ګاډۍ د آس غوندې یواځې هغه څه ویني چې همدا کړۍ یې ور په ګوته کوي.

۴- د سیاسي څېرې په نظر کې سپین تور او تور سپینول

په دې کثیفه کړۍ کې د سیاسي څېرې نه د راتاو اشخاصو یوه لویه لاسته راوړنه دا وي چې، دوی د خپلې خوښې کسان او ډلې چې یواځې همدې کړۍ ته یې مادي او نورې ګټې رسېږي سپین چرګان او د هېواد خواخوږي جوړوي، او که څوک د اصلاح او ترمیم لپاره کوم ګام اخلي او د همدې پلیتې کړۍ په قدم خپل قدم نږدي او د رسول (ص) د حدیث د مصداق په توګه د چاپلوسې کړۍ مخ ته خاورې ورشیندي نو د هغې نه به ورته سمه توره بلا او په راز راز بدو مرضونو ککړ ثابت کړي. دا کار په یوه ټولنه کې د سیاسي څېرې حیثیت، باور او اعتماد له حده زیات را ټیټوي ځکه د ده ټول دار و مدار د هغو خلکو سره تړل کېږي چې د حقیقت له مخې هغه په ټولنه کې منفور او سپک خلک ثابت شوي او د بېرونیو کړیو او خلکو نظر د سیاستوال او مخور په مورد هم ده ته د ورتاو کړۍ په څېر وي، نو دلته ده چې دا پلیتې کړۍ به یو دروند، د هېواد او ولس په درد دردېدلی مشر له ځان سره پلیت او منفور کړي.

۵- د هېواد ورځني حالات د سیاستوال په موډ بیانول

دا خورا یو تریخ حقیقت دی چې کله هم د هېواد د ورځنیو مسایلو او یا هم د سیاسي تحلیل او تجزیېخبره شي نو دا چاپلوسه کړۍ به حالات په هغې ډول تبصیر او بیانوي په کوم ډول چې د سیاسي څېرې د موډ تقاضا وي او هېڅکله به د دې له وېرې چې خپله شخصي ګټه، په بې اېمانۍ ګټلی ځای ځایګۍ او خپل کاذب شخصیت له لاسه ورنکړي نو د حقایقو نه به لېرې ګرځي او په درواغو ولاړ هغه څه به بیانوي چې خپل بادار پرې خوشحاله وساتي.

۶- سیاستمدار د حقیقي شخصیت نه په یوه مجازي شخصیت اوړي

که چېرې هر سیاسي او مخور شخص خپلې ډېرې نږدې کړۍ ته چې په ټولو ورځنیو کارونو کې ورسره په تماس کې وي په وخت توجه ونکړي نو خپله د ده مقدر هم د همداسې یوې کړۍ سره تړل کېږي چې بیا نو دا مخور د یو حقیقي شخصیت نه په یو مجازي شخصیت اوړي. هغه ځکه چې د ده ټولې کړنې، روابط، ویناوې، د خلکو سره لیده کاته په درواغو، پوچو او د بې شعوره خلکو د مالوماتو پر بنسټ جوړ وي چې بیا ولس ته د ده کړنې هسې خیالي افسانې ښکاري.د دې بل نقصان دا هم دی چې خپله سیاستوال د خلکو پر منځ کې خپل سیاسي اعتبار له لاسه ورکوي او د خلکو یواځې تر خپل غرض پورې کار وي بیا نو دا سیاسي څېره د یو هېواد په کچه یو شخصیت نه بلکه د هماغه کثیفې کړۍپورې اړوند یو شخص بلل کېږي، نور څه نه.

۷- د هېواد په برخلیک ټاکونکو فیصلو کې د همدې کړۍ لوی منفي تاثیر

یو مطرح سیاستوال چې د هېواد د سرنوشت په ټاکلو کې د ده رول مهم او اړین وي، باید همېش د ټولنې د هر ډول او ګروپ خلکو سره ټینګه رابطه ولري او یواځې تر یوې وړې کړۍ پورې خپله د مالوماتو ساحه محدوده نه کړي، ځکه د هېواد برخلیک په کره او پوره مالوماتو جوړېدای شي نه په درواغجنو او پوچو مالوماتو. خو که دا مطرح سیاسي څېره هم د خپل هېواد سره پروژوي او د یو اجنبي په څېر برخورد کوي او د خپل خدای ورکړی منطق او دې لوی منسب ته د رسېدو له چانس نه صحیح استفاده و نه کړي او یواځې په همدې خوشحاله وي چې څو خوشاټر ورنه راتاو دي او د ده هرې حقه او ناحقه خبرې ته د هو په دود سر ښوروي نو بیا د دې هېواد د سرنوشت خدای مل شي او نه بیا د داسې مطرح سیاسي څېرې نه دا تمه کېدای شي چې دا هېواد به د یو روڼ برخلیک لوري ته په خوځښت راولي.

نتیجه ګیري:

پورته لیکنه د افغانستان په اوسنیو واقعیتونو یوه ښکل شوې لیکنه ده او دا به ګرانه وي چې په دې لیکنه کې د دې تریخ حقیقت ژوندي مثالونه ورکړو، ځکه د هغه ټولو ضعیفو او خودغرضه رهبرانو مثالونه په یوه لیکنه کې راوړل د امکان نه لېرې او د یو څو د نومونو ذکر کول راته د انصاف نه لېرې برېښي. ولې دا یو تریخ حقیقت دی او هر افغان ته ښه څرګند شوې چې زیاتره افغان مشران د خپلې منهوسې کړۍ لخوا یا ملامت او یا هم سلامت ګڼل شوي، او دا لیکنه یواځې یو انتقاد نه بلکه یو حقیقت دی ځکه د افغانستان ډیر شمېر رهبران یا خپله ضعیف، یا یې هم ور چاپېره کړۍ بې خونده او یا هم د ذهني استقلالیت درلودونکي نه دي پاتې شوي.

د نړۍ په هر ګوټ کې کامیاب او مطرح څېرې په یوه کړۍ، قوم، ژبې، سمت او حزب پورې تړلې څېرې نه وي، ځکه چې په هېواد کې مخور مشران د ټول هېواد مشران وي او په ده پورې د ټولو هېوادوالو ښه او بد برخلیک تړلۍ وي. دا یو منلۍ اصل دی چې واړه رهبران او سیاستوال خپل ځان او ورتاو کوچنۍ کړۍ جوړوي ولې لوی مشران، رهبران او سیاستوال د خپل هېواد او جهان د جوړولو په تکل کې وي. زمونږ مشرانو، سیاستوالو او رهبرانو همېش د خپل ولس د تغییر هڅه کړې خو هېڅکله یې د ځان د بدلېدو هڅه نه ده کړې او همدا دلیل دی چې دوی په تاریخ کې د ناکامو رهبرانو او مشرانو په نامه یاد شوي، ولې برعکس ښه او مدبر مشران او سیاستوال اول ځان د مثبت او یا هغه تغییر چې په ټولنه کې غواړي جوګه کوي او بیا په ټولنه کې د تغییر سبب ګرځي. دا خاصیت د افغانستان په اوسنیو زیاتره مشرانو کې د یو نورم په څېر ښکاري ځکه خو همېش ځان کامل او بل نیمګړۍ بولی او په خپله نېږدې کړۍ کې یې هم داسې څوک نه شته چې د ده خپل عیب ورته بیان کړي.

د ټولنې یو بل حقیقت دا هم دی چې کله رهبر او مشر ضعیف وي نو هېڅکه هم خپل ځان ته نېږدې قوي، مدبر او باتجربه اشخاص نه پرېږدي، او د ډېموکراسۍ په دې تېره لسیزه کې دا ښه څرګنده شوه چې زمونږ ضعیفو سیاستوالو د خپل ځان نه یواځې هغه کسان را تاو کړي وو چې د ده په مخ کې یې د حقیقت ویلو توان او قدرت نه درلود او تل یې حالات د خپل ضعیف رهبر په موډ بیانول. د هېواد په اوږده تاریخ کې زمونږ سیاستوال د ټیټو معیارونو او د حالاتو د موقتي کنترول پر بنسټ را ولاړ او یا هم د نورو له خوا ټاکل شوي، نه د یو مستقل عمل او ازادې مفکورې پر بنسټ. مونږ په تېره سلیزه کې ډېر کم داسې رهبران درلودل چې د خپل دید، کلک عزم او ټینګ تصمیم څښتنان وو، او که وو هم نو ډېر زر به د بېرونیو په مرسته او یا هم د یوې درباري چاپلوسې کړۍ په مټ د سیاست له میدان نه بېرون تګ ته اړ اېستل کېدل او یا هم د مرګي خولې ته ور د ننه شول.

په پای کې زه د دې څو کرښو لیکوال په دې پوره یقین لرم چې زمونږ په اوسني نظام کې د کره مالوماتو نه شتون یوه لویه ستونزه او خلا ده، ځکه تر یوې اندازې خپله رهبر نه غواړي په ځمکنیو حقایقو ځان خبر کړي او تر ډېره حده ده ته ور چاپېره سرېښناکه او مضره کړۍ نه غواړي چې خپل رهبر په کره مالوماتو سمبال شوی رهبر وي. نو، زمونږ مشرانو ته پکار دي چې نور د خود غرضه اشخاصو او کړیو له منځه را بهر شي او خپل مالومات د دې هېواد د ستونزو د صادقانه حل لپاره د مستقل، ازاد فکره او تجربه لرونکو کسانو او ارګانونو څخه را ټول کړي تر څو په ریښتیا هم د دې هېواد او خلکو په اصلي ستونزو ځان آګاه او بیا د هغې مطابق پلانونه او پالیسۍ جوړې کړي. دا به په حقیقت کې زمونږ مشران خپل ملت او خپل خالق ته ور نېږدې کړي چې بیا نو دا مجازي نه بلکه حقیقي خوشحالي او کامیابي ده او رهبر مو هم یو خیالي نه بلکه په حقایقو پوه او اګاه رهبر دی.

لیکوال: فضل ربي وردګ۱۳۹۳ کال – د غبرګولي ۶مه

د وردګو پانګه وال دي د ايسا ادارې سره...

noreply@blogger.com (Unknown) — Mon, 26 May 2014 08:53:00 +0000

د میدان وردګو پانګوال دې ژر تر ژره د ایسا ادارې سره ځانونه ثبت کړي .

د میدان وردګو والي ښاغلي عبدالمجید خوږیاڼي نن ( یکشنبه) د دغه ولایت له

پانګوالو سره د ولایت په مقام کې په جوړه شوې غونډه کې وویل: په میدان وردګو ولایت کې صنعتي پارک بنسټ ډبره کېښودل شوې،خو د دغه ولایت پانګوالو تر دا مهاله په یاد پارک کې د پانګې اچونې په موخه د ایسا ادارې سره ځانونه ندي ثبت کړي .

نوموړی زیاته کړه،د ده د معلوماتو له مخې تر دا مهاله د دغه ولایت له ثبت شویو ۶۰ پانګولو څخه یواځې ۱۰ تنو د ایسا ادارې سره ځانونه ثبت کړي او پاتې نور سره له دې،چې له ولایت مقام سره یې په ایسا ادارې کې د ځانونو د ثبت کولو ژمنه کړې وه،خو بیا یې هم دغه کار ندی ترسره کړی.

هغه پانګولو سره په خبرو کې وویل: که د دغه ولایت ملي پانګوال ژر ژره ځانونه له ایسا ادارې سره ثبت کړي،نو ایسا اداره به هم دوی ته په صنعتي پارک کې د ځمکې دویش لړۍ پیل کړي،چې په ترڅ کې به پانګوال په دغه پارک کې پانګه اچونه ترسره کړي .

د میدان وردګو ولایت ملي پانګوالو یو ځل بیا ژمنه وکړه،چې په بیړني ډول به دا ځل هغه کسان،چې ځانونه یې له ایسا ادارې سره ندي ثبت کړې،ثبت به یې کړي .

قومي مشرانو د ټاکنو په اړه د عامه پوهاوي کمپاین پیلوي

noreply@blogger.com (Unknown) — Mon, 26 May 2014 06:35:00 +0000

د میدان وردګو ولایت قومي مشرانو پرېکړه وکړه،چې سل،سل قومي مشران به د کمپاین په شکل د دغه ولایت مرکز او ټولو ولسوالیو ته ځي او ولسونه به هڅوي،ترڅو په پراخه توګه په ټاکنو کې ونډه واخلي .

دغه قومي مشرانو،چې نن (یکشنبه) یې د دغه ولایت په مقام کې د والي،امنیه قوماندان او نورو امنیتي مؤظفینو سره غونډه درلوده،غوښتنه وکړه،چې د عامه پوهاوي کمپاین کوونکو قومي مشرانو امنیت ته دې جدي پاملرنه وشي .

یادو مشرانو د خپلو خبرو پرمهال وویل: دا ځل به د میدان وردګو ولسونه په پراخه ډول په ټاکنو کې ونډه اخلي او غوښتنه کوو،چې په دغه ولایت کې دې یو سایډ هم نه تړل کیږي،بلکې د پرانستلو لارې چارې دې ورته ولټول شي. په جوړه شوې غونډه کې د میدان وردګو امنیه قوماندان عبدالخلیل انداربي د میدان وردګو والي او قومي مشرانو ته ډاډ ورکړ،چې دوی سرتېرې به د ټاکنو کمیسون د قانون سره سم د رایې ورکونې بهیر د امنیت ساتنې دنده پر غاړه ولري او نور به هیڅ ډول لاس وهنې د رایې ورکونې بهیر کې ترسره نکړي . د میدان وردګو والي ښاغلي عبدالمجید خوږیاڼي د دغه ولایت له قومي مشرانو او امنیه قوماندان له ژمنو څخه مننه وکړه او زیاته یې کړه،که ولسونه د ټاکنو کمیسون او امنیتي ارګانونو سره همکاره شي نو رڼې او شفافې ټاکنې به ترسره شي .

ده زیاته کړه،د دغه ولسونو په همکارۍ کولای شو،په دغه ولایت کې ټول سایډونه د رایې ورکوونکو پر وړاندې پرانیزو. د میدان وردګو والي همدا راز وویل: د دغه ولسونو او په ځانګړې ډول د قومي مشرانو او مخورو په همکارۍ سره به وکولای شو،چې په ډېرو کمو امکاناتو او هلو ځلو سره په دغه ولایت کې په بشپړ ډول رایې ورکونې بهیر ته زمینه برابره شي .

ده ولسونو ته ډاډ ورکړ،چې د قومي مشرانو سل کسیزه ډله،چې هرې ولسوالۍ ته د عامه پوهاوي په موخه ځي،دوی به یې په بشپړ ډول امنیت خوندي وساتي . هغه د امنیه قوماندان او نورو امنیتي منسوبینو د هلو ځلو ستاینه وکړه او د امنیتي ځواکونو دنده یې وبلله،چې د رایې ورکوونکو امنیت خوندي وساتي او له نور هر ډول کړنو څخه په جدي ډول ډډه وکړي .

د یادونې وړده،په میدان وردګو ولایت کې د ټولټاکنو خپلواک کمیسون له لورې په ۱۶۰ سایډونه په پلان کې نیول شوي،چې د رایې ورکونې بهیر به په کې ترسره شي .

وردګو کې د یو طالب قومندان په ګډون ۶ تنو ته مرګ ژوبله اوښتې

noreply@blogger.com (Unknown) — Fri, 23 May 2014 14:18:00 +0000

میدانښار (وخت- د غبرګولی لمړۍ۹۳): میدان وردګو ولایت کې د بېلابېلو پېښو په ترڅ کې د یو وسله وال طالب قوماندان په ګډون ۶تنو ته مرګ ژوبله اوښتې او څلور نور ژوندي نیول شوی .

د میدان وردګو والی ویاند عطاء الله خوږياڼي وخت خبری آژانس ته وویل چې د امنیتي ځواکونو د معلوماتو له مخې ، تېره شپه د میدان وردګو ولایت په سیداباد،دایمیرداد او نرخ ولسوالۍ کې د بېلابېلو عملیاتو او نښتو په ترڅ کې د وسله والو طالبانو د یو قوماندان په ګډون دوه تنه وژل شوي،د یوه سرتېري په ګډون څلور ملکي وګړي ټپیان شوي او څلور وسله وال طالبان ژوندي نیول شوي دي.

دی وايي د نرخ ولسوالۍ په توکرک سیمه کې امنیتي ځواکونو د عملیاتو په ترڅ کې د وسله والو طالبانو یو قوماندان حیکم،چې مشهور په فدایې وو،له یو بل ملګري سره یو ځای ووژل شو.

همدا راز د دغه عملیاتو په ترڅ کې د وسله والو طالبانو څلور کسان ژوندي نیول شوي او د دوی ۱۲ عرادې موټر سایکلونه هم تر نیولو وروسته له منځه وړي دي.

نوموړي زیاته کړه، په ورته وخت کې د دایمیرداد ولسوالۍ په فخ اینګک سیمه کې وسله والو طالبانو او ملکي وګړو ترمنځ نښته شوې،چې په ترڅ کې درې ملکي وګړې ټپیان شوي دي .

د ده په وینا بلخوا د چک ولسوالۍ په امبوخاک سیمه کې د ځای پر ځای شوي ماین د چاودنې له امله د ملي اردو یو سرتېری ټپی شوی دی .

د یادونې وړده،امنیتي ځواکونو د یادو عملیاتو او پېښو په ترڅ کې یوه اندازه وسله او مهمات هم له وسله والو طالبانو نیولي او نهه کړۍ د وسایطو ضد ماینونه یې تر کشف وروسته خنثی کړي دي .

وسله والو طالبانو تر اوسه پدې اړه رسنیو ته څه ندي ویلی.

خبریال: بشیر احمد

تصحیح: عاطف

وردګ ولايتي شورا ته د برياليو کسانو لومړى ليسټ

noreply@blogger.com (Unknown) — Fri, 23 May 2014 14:01:00 +0000

د میدان وردګو والي ښاغلي عبدالمجید خوږیاڼی وروسته له دې،چې د ټولټاکنو

خپلواک کمیسون له لورې نن سې شنبه د هېواد د ولایتي شورا ټاکنو د پایلو لومړنۍ پایلې اعلان شوې،د میدان وردګو ولایت بریالیو نوماندانو ته مبارکۍ ورکړه .

هغه د ټاکنو د خپلواک کمیسون ستاینه وکړه او زیاته یې کړه،دغه کمیسون په

رښتني ډول خپل مسؤلیت ادا کړ او د هیڅ یوه نوماند په ګټه یې کار ونکړ.

نوموړی همدا راز په ټاکنو کې د ګډون له امله د ولسونو د میړانۍ د ستاینې ترڅنګ د ملي امنیتي قواو رښتینۍ هلې ځلې وستایلې .

د میدان وردګو والي وایي که څه هم دغه پایلې وروستۍ ندي خو بیا هم د ټولټاکنو خپلواک کمیسون له لورې اعلان شویو بریالیو کسانو ته د دغه ولایت د ولسونو او ادارو په استازیتوب مبارکي ورکوم.

د ټولټاکنو خپلواک کمیسون له لوري د بریالیو نوماندنو په خپاره شوي لیست کې په پرلپسې ډول انجنیر حسیب الله کلیمزی،محمد سردار بختیاري، حاجی احمد

جعفري،سید روح الله علوي، خواني سلطاني، حسن رسولی، حلیمه عسکری ، شریف

الله هوتک، عصمت الله عاصم، حسین علی بلیغ، حاجی عبدالوحید اکبرزوی،

الحاج اختر محمد طاهری، میرویس امیری، هاجر میرزایی او نفیسه سیلۍ وردګ

شامل دي .

د یادونې وړده،له میدان وردګو ولایت ولایتي شورا ۱۵ چوکۍ لرۍ،چې د ۷

میرمنو په ګدون ۴۷ تنو ورته ځانونه نوماند کړي وو.

د ولایتي شوراګانو ټاکنو ابتدایي پایلې د مخکښو کاندیدان د ترتیب پراساس د پايلو څرنګوالى:نا تصدیق شوې پايلې د پایلو د جریان پرمختک:%۱۰۰ ۲۹ ثور ۱۳۹۳

د رأی پاڼې شمیره	د کاندید نوم	‌رأی	%
۴۱	انجنیر حسیب الله کلیمزی	۷۸۵۳	۸.۳۱
۴۵	محمد سردار بختیاری	۴۹۷۳	۵.۲۷
۱۵	حاجی احمد جعفری	۴۵۸۹	۴.۸۶
۱۴	سید روح الله علوی	۴۵۳۹	۴.۸۱
۳۳	خوانی سلطانی	۴۴۶۳	۴.۷۳
۲۰	حسن رسولی	۴۲۹۰	۴.۵۴
۱۸	حلیمه عسکری	۴۱۳۷	۴.۳۸
۱۹	شریف الله هوتک	۴۰۶۲	۴.۳۰
۲۵	عصمت الله عاصم	۳۷۹۱	۴.۰۱
۹	حسین علی بلیغ	۳۵۸۴	۳.۷۹
۳۸	حاجی عبدالوحید اکبرزوی	۳۲۷۳	۳.۴۷
۲۷	الحاج اختر محمد طاهری	۳۱۲۸	۳.۳۱
۱	میرویس امیری	۲۹۳۹	۳.۱۱
۳۹	هاجر میرزایی	۱۹۲۸	۲.۰۴
۲۸	نفیسه سیلی وردګ	۱۷۵۹	۱.۸۶

څلور وسله وال سوي او څلورنیول سوي دي

noreply@blogger.com (Unknown) — Fri, 23 May 2014 12:11:00 +0000

د امنیتي ځواکونو د معلوماتو له مخې ‎، تېره شپه د میدان وردګو ولایت په سیداباد،دایمیرداد او نرخ ولسوالۍ کې د بېلابېلو عملیاتو او نښتو په ترڅ کې د وسله والو طالبانو د یو قوماندان په ګډون دوه تنه وژل شوي،د یوه سرتېري په ګډون څلور ملکي وګړي ټپیان شوي او څلور وسله وال طالبان ژوندي نیول شوي دي.

د نرخ ولسوالۍ په توکرک سیمه کې امنیتي ځواکونو د عملیاتو په ترڅ کې د وسله والو طالبانو یو قوماندان حیکم،چې مشهور په فدایې وو،له یو بل ملګري سره یو ځای ووژل شو.

په ورته وخت کې د دایمیرداد ولسوالۍ په فخ اینګک سیمه کې وسله والو طالبانو او ملکي وګړو ترمنځ نښته شوې،چې په ترڅ کې درې ملکي وګړې ټپیان شوي دي .

بلخوا د چک ولسوالۍ په امبوخاک سیمه کې د ځای پر ځای شوي ماین د چاودنې له امله د ملي اردو یو سرتېری ټپی شوی دی .

میدان وردګ: د نهو وسله والو د مرګ ژوبلي او درو تنو د نیولو ادعاکیږي

noreply@blogger.com (Unknown) — Sat, 17 May 2014 18:57:00 +0000

د امنیتي ارګانونو د معلوماتو له مخې،د میدان وردګو ولایت په سیداباد ولسوالۍ کې د عملیاتو او په نرخ ولسوالۍ کې د حزب اسلامي او وسله والو ترمنځ د نښتې به ترڅ کې د وسله والو طالبانو د یو قوماندان په ګډون اته تنه وژل شوي او یوه میرمن ټپي شوی ده. امنیتي ځواکونو وړمه شپه د سیداباد ولسوالۍ په دواب تنګي سیمه کې عملیات ترسره کړي وو،چې په ترڅ کې د وسله والو طالبانو د یو قوماندان په ګډون پنځه تنه وژل شوي وو. همدا راز د دغه عملیاتو په ترڅ کې د وسله والو طالبانو دوه ماین جوړونکي هم د امنیتي ځواکونو له لوري ژوندي ونیول شول او یو زیات شمېر مهمات او چاودیدونکې توکې هم د امنیتي ځواکونو لاسته ورغلي دي . په همدې حال کې په نرخ ولسوالۍ کې د حزب اسلامي او وسله والو طالبانو ترمنځ نښته شوې،چې به ترڅ کې د وسله والو طالبانو د یو سرګروپ په ګډون درې تنه وزل شوي دي. همدا راز د دغه نښتې په ترڅ کې یوه میرمن هم ټپي شوی،چې روغتیایې وضعیت یې د ډاډ وړ دی . دا په داسې حال کې ده،چې د تېرې جمعې په ورځ د نرخ ولسوالۍ په دادل سیمه کې د وسله والو طالبانو له لوري د ځای پرځای شوي چاویدونکو توکو د چاودنې په ترڅ کې د حزب اسلامي درې غړي ووژل شول او همدا راز په دغه پېښه کې اوه ملکیان هم په شهادت رسیدلي وو.

میدان وردګ: طالبانو ته دلوړي شمېرې مرګ ژوبلي ادعاکیږي

noreply@blogger.com (Unknown) — Thu, 08 May 2014 06:38:00 +0000

د میدان وردګو ولایت په مرکز میدان ښار،چک او سیداباد ولسوالیو کې تېره شپه د بېلابېلو عملیاتو په ترڅ کې څلور پاکستاني او د یو عرب په ګډون څوارلس وسله وال طالبان،چې درې لوړ پوړي قوماندان هم دي وژل شوي،اوه ټپیان دي او دوه نور ژوندي نیول شوي دي .

د چک ولسوالۍ په غني خیلو سیمه کې امنیتي ځواکونو تېر ماښام عملیات ترسره کړل،چې په ترڅ کې د محمد په نوم،چې د وسله والو طالبانو لوړ پوړی قوماندان وو،له یو بل سرګروپ او د پنځه نورو ملګرو ترڅنګ یو عرب او څلور پاکستاني وسله وال طالبان سره یو ځای وژل شوي دي .

همدا راز په یادو ترسره شویو عملیاتو کې اوه وسله وال طالبان ټپیان شوي هم دي.

په ورته وخت کې په مرکز میدان ښار،چک او سیداباد ولسوالیو کې د بېلابېلو ترسره شویو عملیاتو په ترڅ کې د دل اغا په نوم د یو طالب قوماندان په ګډون درې وسله وال طالبان ووژل شول او دوه نور ژوندي ونیول شول .

په ترسره شویو عملیاتو کې،چې له وسله والو مخالفینو څخه یو زیات شمېر وسلې او مهمات هم د امنیتي ځواکونو لاسته ورغلي،ولسي وګړو او امنیتي ځواکونو ته په کې کوم زیان ندی اوښتی .

په میدان وردګو ولایت کې پنځلس زره تنو د خپلې یوې ورځې تنخوا د بدخشان

noreply@blogger.com (Unknown) — Tue, 06 May 2014 09:34:00 +0000

د میدان وردګو ولایت نظامی او ملکي ادارو د مسؤلینو له لورې پرېکړه

وشوه،چې د خپل اړونده کارکوونکو او منسوبینو د یوې ورځې تنخوا به ژر تر

ژره راټوله او د بدخشان د پېښې د قربانیانو کورنیو ته به یې ورسوي .

دغه پرېکړه،نن (دوشنبه) د میدان وردګو ولایت په مقام کې د دغه ولایت د

والي په مشرۍ په جوړه شوې غونډه کې،چې د بېلابېلو نظامي، او ملکي ادارو

مسؤلینو په کې ګډون کړی وو،وشوه .

د یادو پېښو د شهیدانو روح ته د عا وروسته د میدان وردګو والي ښاغلي

عبدالمجید خوږیاڼي د خپلو خبرو پرمهال پر یاده پېښې د ژوې خواشینۍ

څرګندولو سربیره وویل: په بدخشان کې د پېښې قربانیو شویو کورنیو سره د

بیړنۍ مرستې اړتیا لیدل کیږي .

هغه زیاته کړه،لازمه ده،چې په میدان وردګو ولایت کې هر وګړی،چې توان مندي

ولري،باید د دغه اړمنو کورنیو سره ژر تر ژره مرسته ترسره کړي .

د دې غونډې په ترڅ کې د محاکمو ریاست،څارنوالۍ،ملکي بېلابېلو ادارو،ملي

امنیت،عامه نظم،عامه ساتنې،ملي پولیسو او ملي اردو مسؤلینو پرېکړه

وکړه،چې د خپل ټولو کارکوونکو او منسوبینو څخه به چې شمېر یې پنخلس زره

تنو ته رسیږي،د هغوی د یوې ورځې تنخوا د بدخشان د پېښې قربانیانو ته

ورکړي.

د یادې مرستې د ترلاسه کولو په موخه د میدان وردګو والي ښاغلي عبدالمجید

خوږیاڼي په لارښوونه د ولایتي شورا د مرستیال حاجي محمدحضرت جانان په

مشرۍ یوه نهه کسیزه کمیټه جوړه شوه.

دغه کمیټې ته دنده وسپارل شوه،چې ژر تر ژره دې یو بانکي حساب جوړ

کړي،ترڅو د یادو ادارو له لورې ورته د دوو ورځو په ترڅ کې پیسې انتقال

شي .

همدا راز کمیټې ته دنده وسپارل شوه،چې د دغه ولایت په کلیو بانډو کې هم د

بدخشان پېښې قربانیانو سره د مرستې کولو په موخه مرستې راټولي کړي .

د دې ترڅنګ دغه کمیټه به د میدان وردګو ولایت له سوداګرو سره هم بیړنۍ

خبرې اترې وکړي او له هغوی څخه به هم د یادې پېښې قربانیانو ته مرسته را

ټوله کړي .

د کمیټې مشر او د ولایتي شورا مرستیال حاجي محمد حضرت جانان ژمنه وکړه،چې

د یادو پنځلس زره ملکي او نظامي منسوبینو او کارکوونکو سربیره په د پنځه

زرو په شاوخوا کې د ملکي وګړو او د دغه ولایت له سوداګرو څخه هم د پېښې د

قربانیانو لپاره مرستې راټولي کړي .

د میدان وردګو ولایت مقام ټینګار کوي،چې پرېکړه شوې مرسته د یوې اونۍ په

ترڅ کې راټوله او د بدخشان ولایت د پېښې قربانیانو ته یې ورسوي

امنیتي ځواکونو ۳ انجنیران د وسله والو له منګولو وژغورل

noreply@blogger.com (Unknown) — Tue, 06 May 2014 09:30:00 +0000

د میدان وردک ولایتي چارواکي وايي چې امنیتي ځواکونو په دغه ولایت کې درې تنه انجنیران، چې وسله والو سخت دریځو تښتولي ول، راخوشي کړي دي.

د وردک ولایت د والي ویندوی عطا الله خوږیاڼي نن /سې شنبه/ وویل، د یوه ساختماني شرکت ۳ انجنیران د امنیتي ځواکونو په هڅو روغ رومټ وزغورل شول.

د شیرزاد ساختماني شرکت دا درې انجینران اته ورځې وړاندې هغه مهال د میدان وردک ولایت د سید اباد ولسوالۍ په سالارو سیمه کې د دولت د وسله والو مخالفانو له لوري له موټره کښته او برمته کړای شول چې دوی غوشتل د غزني په هوایي ډګر کې د کارکولو لپاره دې ولایت ته لاړ شي.

ویل کېږيو وسله وال مخالفان په لارو له موټرو څخه هر هغه څوک چې پاکې جامې یې په تن وي او دولتي مامور یا د موسسو غړی ورته ښکاره شيو له موټره کشته کوي.

د میدان وردک د والي ویندوی عطا الله خوږیاڼی وايي، د وردک د والي په امر د برمته شویو انجنیرانو د خلاصون په هدف د عملیاتو په نتیجه کې پرون /دوشنبه/ امنیتي ځواکونو د چک ولسوالۍ په لنګر سیمه کې دا درې انجنیران خوشي کړل. د ده په وینا وسله وال مخالفان د عملیاتو له سیمې په تېښته بریالي شول.

خوشي شوي انجینر تاج محمد د ځان او خپلو ۲ نورو ملګرو روغتیایي وضعیت د ډاډ وړ وباله او د میدان وردګ له والی یې مننه وکړه چې د دوی په جدي پاملرنې د وسله والو مخالفانو له منګولو ازاد کړای شول.

د وردک د والي ویندوی وايي چې وسله والو مخالفانو له یادو انجینرانو اتلس زره امریکایي ډالر او یو کرولا موټر له ځان سره وړي دي .