பேயோன்

உன்னைப் பற்றி இரு கவிதைகள்

பேயோன் — Thu, 17 May 2012 04:07:46 +0000

பிரதியும் பலிப்பும்

புன்னகைப்பதாகத்தான் நினைத்துக்கொண்டிருந்தேன்
புகைப்படத்தில் அது விழவில்லை
புகைப்படம்தானே, சிரியேன் என்கிறாய்
அதனாலென்ன, நேரில் சிரிக்கிறேனே என்றால்
‘வேண்டாம், சிரித்த மாதிரி ஒரு போட்டோ எடு’வாம்.

டபுள் பிளைண்ட்

நான் கலாயக் கலாய
நீ சிணுங்கிச் சிரிக்கிறாய்
இப்போதைக்கு
சொர்க்கமாகத்தான் இருக்கிறது
ஆனால் எந்தக் கலாசலில்
எரிமலை வெடிக்குமென
நானறியேன்
நீயாவதறிவாயா?

முதல் காதல்

பேயோன் — Tue, 01 May 2012 19:49:19 +0000

உன்னைப் பிடிக்கும் என்று
நான் சொன்ன பின்
நீ என்னோடு பேசவில்லை
கூப்பிட்டால் சாக்கு சொல்லி
மண்டப வெளியில் நழுவிக்
கூட்டத்தில் ஒளிந்தாய்
உன் மௌனப் பார்வைகள்
என் வயதுக்கெட்டாத அர்த்தங்களைச்
சொல்லி விழலுக்கிறைந்தன
மதியப் பந்தி முடிந்த பின்பு
என் சேட்டைகளைப் பற்றிய
அத்தை பாட்டி கதைப் பேச்சுகளை
வாடிய மல்லிகைப் பூக்களும்
குங்கும அரிசிகளும் சிதறிய
முரட்டுக் கம்பளத்தில் முழங்கை ஊன்றி
உள்ளங்கையில் முகம் வைத்து
ஆர்வமாய் அமர்ந்து கேட்டாய்
என்னோடு மட்டும் ஏனோ
பேச்சைக் குறைத்துக்கொண்டாய்
என் முதல் பெரிய வேதனையில்
இரு நாட்கள் இலக்கின்றிக் கழிந்தன
ஊர் திரும்பப் பிரியும் நேரம்
வந்த பின் உன்னிடம்
விடைபெறத் தேடிய எனக்கு
உன்னைக் காணவில்லை
இனி எப்போதும் ஒருபோதும்
நீ வேண்டாம் எனக்கு
என அன்று முடிவு செய்தேன்
இன்றைக்கு நான் இங்கே
இதை எழுதிக்கொண்டிருக்கிறேன்
நீ என்றைக்கு
என்ன செய்துகொண்டிருக்கிறாயோ.

இருபதாண்டுகள்

பேயோன் — Sat, 28 Apr 2012 03:54:18 +0000

இருபதாண்டுகளுக்குப் பின்பு
எங்கே, எப்படி இருப்பேன்
இருப்பேனா
என்று தெரியாது.
இருபதாண்டுகளுக்குப் பின்பும்
படிக்கப்படுவேன் என்ற
ஆசைக்கு மட்டும் அளவில்லை.