مترو.com

المشير وعنان

2011-11-25T14:38:00.000+02:00

اضغط علي الصورة للتكبير

حموده محمد محمد , مرشح مجلس الشعب 2011 ببورسعيد رقم 4 رمز الشمعدان

2011-11-15T03:40:00.007+02:00

ملحوظة: يوجد فيديو بالاسفل
خطاب مفتوح الي اهلي وعشيرتي اهالي بورسعيد

السلام عليكم ورحمة الله

انا/ حموده محمد محمد

ابن مدينتكم وامين عام حزب الجبهة ببورسعيد والمرشح لعضوية مجلس الشعب عمال مستقل

اعرفكم بنفسى

1- ¬بداية العمل السياسى بالتصادم مع النظام الظالم السابق وجهرى بالحق , نكلت بى امن الدولة واعتُقلت عام 90 وبعدها

2- ¬منسق حركة كفاية فى بورسعيد وكان لى دور فى معارضة النظام فى وقت كثر فية الجبناء والمتزلفين ومدعى البطولة والمسبحين بحمد النظام والمتشدقين اليوم كذبا وزورا بالمعارضة

3- من المؤسسين للجمعية الوطنية للتغير ببورسعيد التى ساعدت على حشد واعداد الشعب للثورة على النظام البائد

4- من المؤسسين لحزب الجبهة الديمقراطية عام 2006 الى الان والذى جعلت مقرة عريناً وحصناً للثورة فى بورسعيد وملتقى كل القوى السياسية بها حتى تم إلقاء القبض علىّ من مقرة يوم 25 يناير فى سابقة لم تحدث من قبل

- هذا تاريخى الذى افتخر به ويجعلنى عازماً على خوض الانتخابات ..... لن اعطى وعوداً لن تتحقق واحلاماً وردية ليس لها اساس ..... كل ما اوعدكم به ان اكون خادمكم الساعى بما يرضى الله فى مصالحكم بكل شرف ونزاهة

بالله هل يستوى من كان مضحياً ومخلصاً لمبادئة بمن لم يكن له تاريخ او صوت قبل الثوره يذكر

هل يستوى من ضحى بنفسه وماله وفُصل من عمله وحُرم من قوت اولاده على يد امن الدولة بغيرى فى الوقت الذى لم يجرؤ احدهم على المجاهرة بكلمة الحق ولا التلفظ حتى بقول

انا رجل فقير لم احصل على اراضى او مميزات من النظام كنت ولازلت متفانياُ من اجل بلدى لم اطلب شى فى وقت عرض المغريات لم اساوم كغيرى فى وقت توزيع العطايا والمصالح .

استحلفكم بالله العظيم الذى انتم ملاقوه عندما تقررون منح اصواتكم ان تتذكروا قوله تعالى ( واقيموا الشهادة لله ) كونوا مع الحق واهله

النائب الحق هو من يخشى الله ويتقيه و ليس فى تاريخة كله ما يشينه, لايسعى الى مصالحه ويترك مصالح اهله وبلده ,لا اتهم احد ولا أزايد على احد ولكن الرجال مواقف وتاريخ يشهد لهم او عليهم ...حكموا عقولكم وضمائركم واعلموا ان اصواتكم امانة انتم مسؤلون عنها امام الله, يقول تعالى ( واقيموا الشهادة لله ) اعطوا اصواتكم لمن تعلمون تاريخه وماذا قدم ومن كان ثائر حق على الظالمين ومن كان موالياُ صامتاُ صمت القبور لايقول حقا ولايجاهر بانكار على الاوضاع الظالمة ولم يتكلم ولم يرتدى رداء البطولة الا بعد الثورة, اسالوا كل من يترشح اين كان وماذا فعل فى وجة الظلم ان اجابكم بصدق وكان تاريخه يتحدث بذلك فهو الرجل الثائر الحق المخلص الصادق وان لم يفعل فاعلموا من المتسلق والساعى الى الشهرة والمجد على حسابكم والمتلاعب بمصالحكم من اجل مصلحته الشخصية

برنامجي كالآتي:

1- اعادة الامن الي الشارع والقضاء علي كل أشكال البلطجة و ذلك لا يأتي الا بالتنمية الاقتصادية والقضاء علي البطالة وهي مفتاح حل أغلب المشاكل في المجتمع

2- اعادة بورسعيد الي سالف عهدها وتطوير القوانين المتحكمة في الجمارك بحيث يتم اعادة توزيع الثروة بطريقة عادلة علي شعب بورسعيد

3- العمل علي تحديد المقدم المدفوع لاسكان المحافظة بحيث يكون في متناول الجميع وقابل للتقسيط والعمل علي إعفاء غير القادرين علي سداد الايجارات من صندوق خدمات المحافظة

4- العمل علي تنشيط السياحة الصيفية من اجل توفير فرص عمل جديدة ومصيف في متناول محدودي الدخل باشراف المكتب التنفيذي لمحافظة بورسعيد

5- تطوير وتطهير بحيرة المنزلة بحيث نتمكن من الوصول الي الاكتفاء الذاتي من الاسماك واستيراد انواع الاسماك الحية التي يصلح ضخها في البحيرة بعد التطهير والتطوير والاستعانة بخبرات الدول التي سبقتنا في هذا المجال ومنها تركيا

6- القضاء علي فساد المحليات الذي يعوق كل تقدم واعادة توزيع الاراضي الزراعية بصورة عادلة

وكل ذلك لتوفير لقمة عيش بكرامة , ورعاية صحية في متناول الجميع , وتنمية عادلة في كل شبر من محافظة بورسعيد

اخوانى اعطاكم الله امانة هى اصواتكم فلا تضيعوها في غير اهلها ثقتى فيكم كبيرة وراضى بها

حمودة محمد محمد / عمال مستقل رقم (4) رمز الشمعدان

hamodamohamed49@yahoo.com

FACEBOOK: http://www.facebook.com/hamodamoh

موبايل:01224413457

ارضى:066/3649820

أخي ...لقد جاوز العسكر المدي

2011-10-05T13:21:00.000+02:00

سمو المشير طنطاوي ...طال عمرك

مجلسنا العسكري الحنين وجيشنا الطيب ابو عصاية

دلوقتي اللعب بقي علي المكشوف والحمد لله

يعني اغلب الحقائق وضحت واللي مش شايفها يبقي اعمي... يا اما عامل نفسه اعمي

ومن الاخر ... الجيش دلوقتي لما بيضرب متظاهرين سلميين بقي عادي لا بيعتذر ولا بيعمل اي حاجه وكأنه حق طبيعي ليه

وبقي عادي برضه انه يستعين بصديق ... امثال البلطجية وسوسن قصدي زبايدر وشلة العيال السيس دول

احلي حاجة دلوقتي ان كل التيارات بلا استثناء خدت خازوق كبير.....وطلع اللي متغطي بالمجلس عريان

اتفرج علي التيارات الدينية بما فيهم الاخوان اللي كانوا دايما في صف المجلس.....مفيش حد راضي باللي بيحصل

غير مين ........ غير شوية المشايخ اللي كانوا زمان بيطبلوا لمبارك ...دلوقتي بيطبلوا لطنطاوي .....

اول سابقة بالنسبالي مع الجيش ..... هي اول مرة الجيش يضرب فيها ناس في تظاهر سلمي فجر يوم 26 فبراير

ساعتها لما قولنا ان الجيش ضربنا ..... الناس كدبونا و اهانونا

شهادتي كشاهد عيان مضروب من القوات المسلحة

وساعتها المجلس نزل اعتذار وكان فيه جملته الشهيرة " رصيدنا عندكم يكفي"

ومن ساعتها بالتدريج بقي استخدام القوة شيء عادي

ومهاجمة مكتب الجزيرة مباشر مرتين

ومحاكمات عسكرية لنشطاء

ومصادرة صحف

وشهادة المشير المخزية

والتباطؤ في كل شيء سواء محاكمات او قوانين

والتعتيم علي الكثير من الحقائق

والتخلي عن المطالبة بدم شهدائنا علي الحدود

وتفعيل الطوارئ بشكل اوسع

واخيرا الاستخدام المفرط للقوة مع معتصمين ماسبيرو , وكأني شايف كلاب العادلي مش افراد الجيش

ده الي جانب الفشل الذريع في ادارة البلاد وعدم حدوث اي تقدم ملموس في اي شيء

وجايبينلنا خيال مآته وعاملينله مجلس وزراء

سمو المشير طنطاوي يقال ان فيه حوالي 9000 فرد في مصر مرتباتهم شهريا مليون جنيه فأعلي

وتم عرض قانون الحد الاقصي للاجور علي سموك يا طويل العمر , ولكن حتي الان لم يخرج للنور

اذا كان تفعيل القانون بيأثر علي راتب سموك وباقي اعضاء المجلس الموقر ..... فبلاش منه ..... طز فينا

معملناش الثورة علشان يبقي فيه حدود لاي شيء..... معملناهاش علشان نرضي بحلول وسط

معملنهاش علشان نغير اشخاص...... معملناهاش علشان نرضي بقليلنا واللي يرميهولنا سعادة البيه

بس للاسف فيه ناس الاستعباد والمطاطية بقت في دمها...... واي حد بيمسك رئاسة البلاد اياً كان هيخلوه اله واب روحي

لو سكتنا ورضينا بالذل تاني يبقي خساره فينا اي نسمة حرية وكرامة

معاناة طبيب أسنان في مستشفي حكومي

2011-09-18T05:22:00.000+02:00

مكنتش عاوز اكتب بس فاض بيا بقي

مش عارف الاقيها منين ولا منين

بعيدا عن المرتب الحقير اللي مبيجيبش تمن السجاير

باقول مفيش مشكلة , واعتبر نفسي باشتغل للناس واجري علي الله

لكن الاسوأ من كده حاجات تانيه كتير باواجهها كل يوم باروح فيه المستشفي

اولا : العيان المتفزلك

كل عيان جاي بيتفزلك , وعامل نفسه ابو العريف

جاي مشخص حالته ورافض حتي النصيحة

يجيلي واحد اكشف عليه , الاقي فيه خراج تحت الضرس

اقوله: طيب يا حج هتاخد دوا 3 ايام وتيجي

يقولي لا انا عاوز اخلع

اقوله يا حج مش هينفع فيه خراج

يقولي بكل فزلكة , لا لا مفيش خراج ولا حاجة

ساعتها دمي يفور

والله ما هينفع يا حج فيه خراج

الاقيه مصمم يخلع,

طبعا لازم اتعصب واتنرفز وارزع الادوات واسيبه وامشي

ده حاله من حالات الفزلكة

في حالات تانيه زي اللي واخد دوا سيوله دم وعاوز يخلع واقوله مينفعش وزي اللي قبله

وزي كتير اوي بييجوا معاهم ابنهم عنده 3 او 4 سنين ومصمم يخلعله ضرس, اقعد نص ساعة اقنعه انه لسه صغير ومينفعش يخلع دلوقتي

ده غير اللي ضغطه عالي او السكر عالي , حاجه تجيب الضغط والسكر

ثانيا : العيان الخايف من الفال الوحش والحسد

تخيل, عيان خايف الطبيب يحسده

اه والله

مثلا , عيان جه قعد علي الكرسي

قبل ما اشتغل باسأله عنده اي امراض ضغط , سكر, كبد او بياخد اي ادوية

المهم تلاقي رده كأنه بيقولك انت بتفَوِل عليا( بتفول عليا جايه من الفأل السيء)

تلاقيه بيرد لا معنديش حاجه الحمد لله ربنا يحفظنا وعنيه بتبصلك بشرار طالع منها

ثالثا : اخفاء المرض

عيانين كتييير مابيرضوش يقولوا عندهم مرض لسبب مش عارفه لغاية دلوقتي

وتكتشف بالصدفة , مثلا تلاقي بعد الخلع نزيف مابيقفش

وساعات بتعرف بالخبرة من شكله او اعراض ظاهره عليه

رابعا : العيان المقزز

طبعا فيه عيانين كتير بييجوا ينضفوا سنانهم من الجير مع اختلاف كميته وكثافته وشكله

اتعودت اني ما اقرفش , واعصر علي نفسي ليمونة واستحمل كمان الريحة

لكن مش لدرجة ان ميبقاش فيه احساس بان انا مدرستش الطب علشان انضف بقايا الاكل

تلاقي عيان جايلك عنده جير وعاوز ينضفه , ولسه واكل حالا قبل ما يدخلك

فبأضر اديله علاج واقوله اغسل سنانك كويس 3 ايام وتعالي انضفلك الجير

تلاقيه متضايق وانتو مش راضيين تعملولي حاجه وانتو مش عارف ايه

وانا مش عاوز اجرحه بكلامي واقوله انت اللي معفن ومش مراعي ان فيه بني ادم هيفتح بقك

خامسا: العيان المستبيَع

تلاقي ضرسه مسوس تسوس بسيط بيوجعه مع الساقع والمسكر بس, وهو مصمم يخلعه

ياعم يهديك يرضيك حرااام , الضرس كويس , مفيييييش

اكتشفت انها ثقافة منتشرة في الشعب المصري

حتي بيعملوا كده مع اولادهم, جاي يخلعله ضرس دائم وهو عنده 12 سنه ومصمم برضه يخلع

سادسا : العيان الاووفر

ده بيبقي خايف من خياله, من غير ما المسه بيتوجع, بيطلع عين اللي جابوني

ده غير انه كل شويه يبعدني بايده, وساعات بيخليني أشك نفسي او اعور نفسي بسببهم

سابعا : الاطفال

وآه من الأطفال, بجد نفسي ما اشتغلش اطفال تاني ابداً ابداً

غير كل اللي فات ده

طبعا الشغل الحلمنتيشي اللي بينقل امراض , وللاسف مليش دخل فيه , ولكن ضمير الواحد بيعذبه بس هيعمل ايه , الوزارة منفضة

غير الحاجات اللي ساعات بتطرطش علي وشي او هدومي ايا كان نوع السائل "دم - لعاب - مزيج - قطع جير" يعني كولكشن جميل

غير طبعا الادوات والكراسي الكهنة , اما مبتتحركش او مفيش اضاءة , او مبتشغلش اي حاجه, او مفيهاش ميه, وانت لازم تتأقلم مع ظروف عملك

وفي الاخر العيان مابيقدرش اي حاجه من اللي بنستحملها علشانه, ولا الوزارة المحترمة بتقدر

حسبي الله ونعم الوكيل

أهلا بالإرهاب

2011-09-18T03:54:00.000+02:00

الشيخ توفيق العفني

واحد من الاعضاء المتميزين في الجماعة الاسلامية ببورسعيد

لن اصف المشهد المرعب لزفة استقباله , فهذا لا يعنيني خصوصا انه بعد اعتقال دام 18 عاما

ولكن.....

منذ عدة ايام , بجانب مسجد علي بن ابي طالب بحي الزهور, المسجد الذي يسيطر عليه الشيخ واعوانه

سرادقين, سرادق للرجال وسرادق للنساء , حفل زفاف ابنة الشيخ تقريبا , وهذا ايضا لا يعنيني

ولكن.......

سمعت دوي اطلاق نار شديد ومستمر, ذهبت لأري ما يحدث

فوجدت اثنين ملتحين يحمل كل منهم بندقية آلي ويضربون الطلقات في الهواء بشكل مستمر , ومعهم من الذخيرة ما يكفي لتغيير الخزنة فوريا وبشكل مستمر

استمرت المهزلة لفترة قرابة النصف ساعة

والاغرب من ذلك هو ان قسم شرطة الزهور يبعد عن الحدث باقل من 500 متر تقريبا

فما معني ذلك ؟ والي اين نتجه؟؟؟

الإسلام و العلمانية ... بقلم: حموده محمد محمد

2011-08-28T21:52:00.000+02:00

أيها الساده ان الاسلام دين حي يستطيع ان يهضم كل الافكار ويستفيد منها و يطوعها ويتفاهم معاها بل يلتحم بها ويكلمها بلغتها لان عبقرية الاسلام في انفتاحه علي كل الثقافات بدون انفعال و لا تعصب ولا انغلاق والاسلام لا يهاب من اي فكر فهو قادر علي محاورة الجميع بثقه واقتدار

ايها الساده عندما قرأت حديث للنبي صلي الله عليه وسلم يقول فيه ((اعمل لدنياك كأنك تعيش ابدا واعمل لأخرتك كأنك تموت غداً )) فوجدت هذا الحديث العجيب قد جمع بين الفكر العلماني وبين الفكر الاسلامي في عبقريه منقطعة النظير لان حقيقة الفكر العلماني لا يؤمن الا بالعلم الذي يتعايش معه و فيه متطلبات حياته و يتخد العلم والعلوم قبلة له ويعمل من اجلها ويعيش كأنه يعيش ابدا ولا يفكر في الموت ابدا اما الاسلام الرباني يري ان الدنيا ذائله وان الاخرة هي الحياة الحقيقيه ويتذكر الموت دائماً ويعمل له حساب وعبقرية الاسلام هنا انه جمع بين الاثنين ويلتحم بالواقع ويتفهمه وهذه هي رحابة الاسلام لا يصطدم ابداً مع الحضارات لانه يصنع الحضارات بفكر واعي مستنير لا يكره احد علي فكره ولا علي دين لان الاسلام في حقيقته دين حوار ودين عقل ودين منطق ودين تفاهم ودين سماحه والاسلام يأمرنا ان نأخد بعلوم العصر لنتطور ونطور صناعتنا وزراعتنا لنكون اكثر تقدماً وحضاره ان هذا العصر هو عصر العلم وينبغي علينا ان نتفهم هذا الواقع الذي نعيشه

ايها الساده ان امتنا العربيه والاسلاميه تملك جهازاً للمناعه لا يوجد مثله لغيرها وهذا الجهاز العظيم هو الايمان بالله الواحد وهو ينبوع القوة لامتنا المؤمنه ايها الساده اقول للذين يخافون علي الاسلام من الافكار ينبغي ان يخاف اصحاب الافكار من الاسلام لان الاسلام ليس فكراً لكنه دين من عند الله ومحفوظ بحفظ الله له

اقول للجميع ان المستقبل القادم هو لنا ان شاء الله مهما طال الوقت لان الحق قادم وهو حق مكتوب مهما طال الصراع ان بحور السياسه تتغير في اليوم ألف مره والاعداء يصبحون في لحظة حلفاء فلنأخد من الدين وناخذ من العلم ما يعيننا علي هذا الزمان العجيب والذي يتصور تناقضاً بين الدين و العلم لا يعرف شيئاً عن الدين ولا يعرف شيئاً عن العلم

بسم الله الرحمن الرحيم (( فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الْأَرْضِ ))صدق الله العظيم

تعرف علي اسلحة عدوك 1: نظام القبة الحديدية الاسرائيلي للدفاع ضد الصواريخ

2011-08-20T16:20:00.000+02:00

اضغط علي الصورة لرؤيتها بالحجم الكامل

القبة الحديدية

هو نظام دفاع جوي اسرائيلي لحماية اسرائيل من الصواريخ قصيرة المدي

النظام مكون من 3 وحدات متنقلة تعمل مع بعضها البعض (كما بالصورة)

1-وحدة اطلاق صواريخ

2-وحدة التحكم وادارة المعركة

3-وحدة الرادار لكشف الصواريخ وتعقبها

------------------------

عندما يطلق صاروخ, تكتشفة وحدة الرادار, وتحدد مساره ومكان سقوطه

ثم تقوم بارسال البيانات الي وحدة التحكم, فيقوم الجنود في وحدة التحكم بتحديد اذا كان مكان سقوطها مكان مأهول وسيتسبب في خسائر ام لا

اذا كان مكان سقوط الصاروخ مهم, تعطي وحدة التحكم الامر في ثواني بتدمير الصاروخ

فتقوم وحدة اطلاق الصواريخ بارسال صاروخ بناء علي البيانات المتاحة من الرادار عن مسار الصاروخ المقصود تدميره

ثم تقوم بتدميره في منطقة معزولة حتي تمنع سقوط اي شظايا جانبية

-----------------------------

مزايا النظام

متنقل

يعمل في كل ظروف الطقس الصعبة

يمكنه مواجهة صواريخ متعدد في نفس الوقت

----------------------------

النظام اثبت فشله

فليس بالدقة المتوقعه, واي تغيير في سرعة الصاروخ او اتجاه الرياح بعد عمل المعادلة التي نتج عنها تحديد مكان سقوطه, سيؤدي ان يصل الصاروخ المضاد الي مكان غير صحيح

ففي هجوم من كتاب القسام وسرايا القدس, تصدي النظام ل 5 صواريخ فقط من اصل 30

http://www.aawsat.com/details.asp?section=4&article=616506&issueno=11821

بالصور : الاعلامية آيتن الموجي تستهزيء من الاعلامية بثينة كامل علي الفيسبوك مع أصدقائها

2011-08-18T07:52:00.000+02:00

اضغط علي الصورة لمشاهدتها بالحجم الطبيعي

---------------------------------------------------------------

--------------------------------------------------------------

من علي صفحة الاعلامية أيتن الموجي علي الفيسبوك
أيتن الموجي تستهزي من الاعلامية المناضلة الشريفة بثينة كامل ومن فكرة ترشحها لرئاسة الجمهورية
وتتبادل السخرية والاستهزاء مع اصدقائها علي صفحتها الشخصية
ثم يكتب لها علي صفحتها صديق لها واسمه Fahd Zahary
"بثينة كامل أشرف من 1000 واحدة عاهرة مثلك يا أيتن. يكفي سمعتها الطيبة بينما سمعتك الملوثة تملآ ماسبيرو"
ويذكر ان أيتن عامر مذيعة بالتليفزيون المصري وضد الثورة المصرية وذلك يتبين من كمية الاستهزاء بالثورة والناشطين ودعمها للرئيس المخلوع عبر كتاباتها علي صفحتها الشخصيةعلي الفيسبوك

تأملات صائم ....بقلم : حموده محمد محمد

2011-08-13T14:24:00.000+02:00

نظره الي الدين بمفهوم اعمق واشمل

ان حقيقة الدين هو الحنين القديم الي الفطره التي فطرنا الله عليها

و هي الاصل الاصيل الذي جئنا منهٌ

والنعيم الرباني الذي يملأ جوارحنا حنيناً وشوقاً إليه

ويزداد هذا الحنين عندما نصطدم بواقعنا الأليم الذي نعيشه في هذا العالم فنشعر بغربه ويُتم واننا مجرد زوار غرباء في هذا العالم

فنحن امام خيارين اما ان ننخرط في هذا الواقع ونتورط وننحدر واما ان نعيش غرباء حتي يقضي الله امراً كان مفعولاً

ايها الساده من عظمة الايمان انهٌ يشعرك انك لست وحدك

وانما انت في مَعية الله

وتشعر بأُنس خفي لأن هناك يد خفيه تنتشلك وقوة عليا سوف تلهمك وإله عظيم قادر سوف يدركك ويحميك

عندما تصل إلي هذه الحقيقة فاعلم انك علي الحق

لأن ديننا ليس كما يصوره البعض علي انه قشور وتفاصيل وخلافات وامور ثانوية وجدل

ليفتحوا الباب امام محترفي التنطع في الدين وهواة التعصب والهوس ليفرضوا علي الناس تديناً سطحياً بعيداً عن جوهر الاسلام وعن روح الاسلام الذي يدعو الي الحب والرحمه والموده والتقوي و سعة الصدر وتدبر معاني النصوص وقراءة القرآن بالقلب وبالروح وبالفطرة السليمة

والقرآن ليس الغازاً وطلاسم غير مفهومه بل هو نورٌ لمن اراد الله لهُ النور وهو عمي لمن اراد الله لهُ العمي

ان المسلم ايها الساده مطلوب منه الايمان بالله الواحد والاستقامة علي هذا الايمان والتمسك بمكارم الاخلاق وان تحب للناس ما تحبه لنفسك وتعاملهم بالموده وبالحب وبالعمل الصالح ولتكن رسالتك في الحياه نشر الخير للجميع

الاسلام يعلمنا اننا لا نحمل سيفاً الا للدفاع عن كل مظلوم في هذا العالم ويعلمنا ان ننشر السلام والعدل والحب بين الناس

ايها الساده ما احوجنا اليوم وبشده الي فقيه مسلم مستنير يفهم الواقع الذي نعيشه و يعيد للمسلمين عقلانية الاسلام ومرونته ورحمته وتقديره للظروف التي تمر بها امتنا في هذه الايام

الاسلام ايها الساده اوله رحمه واخره حمد و اوسطه محبه ورحمه

ايها الساده علي ماذا نختلف علي ماء الوضوء وعلي وضع الايدي اثناء الصلاة وعلي حكم النقاب وحكم الغناء وحكم التصوير وعلي اللحيه وعلي الآذان وعلي وعلي وعلي وعلي والتشكيك في كل شئ فتظهر طوائف وخلافات واحقاد وعداوات وفي النهايه تصبح أمتنا أمة شراذم متناثره

فتضيع امتنا ونحن في غفله وفي خلاف حتي تتداعى علينا الامم ونصنع بأيدينا لأعدائنا ما يعجزون علي صنعه

ايها السادة هل ارسلتم النظر لأبعد من اقدامكم

افيقوا يرحمكم الله

ان وحدة امتنا اليوم والعمل عليها عبادة لله الواحد

ان ديننا لا يدعو لاكراه الناس

وانما يهدي الناس الي فطرة الله

وهو دعوه وليس انقلاباً

يدعو الي الحوار رفيع المستوي

ايها الساده لا تصدقوا البلاهاء

ولا تتخذوا مرضي القلوب أئمة ورواد

ان راية الاسلام امانه لايحملها ولا ينالها الا كل صاحب قلب تقي ورحيم وعالم بالله ومتوكلاً عليه

ايها السادة كل عام وانتم بخير

الداخلية بتلبسنا السلطانية, ايوالله

2011-07-15T13:42:00.000+02:00

تخيل حركة التنقلات والاحالة للمعاش اللي حصلت في الداخلية, تديك احساس بان الناس دي مش بتهزر

وفجأة تكتشف انك بتتأرطس

اكثر من 500 لواء تم احالتهم للمعاش......الحقيقة بقي ان اغلبهم كانوا عمداء وتم ترقيتهم للواء واحالتهم للمعاش, يعني نوع من التكريم ومعاش اكبر

تكتشف ان الناس اللي تم نقلهم راحوا لأماكن هياخدوا فيها مرتبات اكبر زي اكاديمية الشرطة وشرطة الكهرباء وغيرها

الله, دول بيكافؤهم

داحنا بجد بنتأرطس

ده غير القناصة اللي بينكروا وجودهم, مع ان فيه في كل قطاع 5او 6 ضباط قناصة , ده غير قطاع مكافحة الارهاب الدولي اللي مليان قناصة

واللواء محسن الفنجري بيكمل التمثيلية وبيشخط فينا ويهددنا علي اساس انه عمل اللي يرضينا

الاوسخ بقي هو رجل الشارع العادي اللي لو قعدت تفهم فيه مش هيفهم غير انك بتوقف حال البلد بالاعتصامات

بجد بلد بقت تقرف

تمويل الاحزاب الليبرالية والاحزاب الدينية, مجرد سؤال؟؟؟؟

2011-07-15T04:36:00.001+02:00

سؤال بجد نفسي لتفسير, طبعا من المشاع انه يتم تمويل الاحزاب والحركات الليبرالية من الخارج لنشر الفكر الليبرالي (الماسوني الكافر) في مصر

طيب لما يبقي حزب الجبهة الديمقراطية الليبرالي في بورسعيد مقره مجرد شقة دور ارضي مش كاملة وايجارها 600 جنيه شهريا وبنجيب فلوس بالعافية علشان نعمل دعاية بسيطة

وحزب النور السلفي مقره في شقة دور اول في برج يطل علي قناة السويس تمليك سعرها 3 مليون جنيه

وحزب الحرية والعدالة برده شقة كبيرة في برج علي شارع رئيسي قريب من حزب النور ثمنها لا يقل عن 2 مليون (وللامانة لا اعلم اذا كانت ايجار او تمليك)

حد يفسرهالي لاني من ساعة ما شفت المقر وانا هتجنن

كاريكاتير عصام شرف والمجلس العسكري 3

2011-07-05T08:02:00.000+02:00

الدكتور عصام شرف رئيس مجلس الوزراء

هذا ليس اهانة لشخصك ولكن وللأسف هذا هو دورك الآن

وهذا الدور ليس هو المنتظر من سيادة رئيس الوزراء الذي تم اختيارة ومبايعته في ميدان التحرير.

مر علي انتهاء الثورة قرابة الخمسة أشهر وللأسف لم نشعر بأنك فعلا هذا الثائر الذي خرج من ميدان التحرير فلم تحقق من مطالب ميدان التحرير غير ما يوافق عليه سيادة المشير

وبالطبع سيكون رد أي مسئول في موقفك اننا لا نعلم كم الضغوط التي تتعرض لها

ولكن اسمحلي, هذا هو رد أي مسئول قبل الثورة, لقد قمنا بالثورة حتي لا يرد الي مسامعنا هذا الرد مرة أخري, لقد قمنا بالثورة لكي يشركنا المسئولين في معرفة الحقائق والضغوط والعوائق

موقفك الآن لا يتناسب بأي شكل مع ما رأيناه منك من تواضع عندما ذهبت مع الأسرة لتأكل "الفول والطعمية" من مطعم عام

ولا ما رأيناه من انسانية عندما قمت بالنزول من سيارتك لتطلب الاسعاف لمواطن تعرض لحادث طريق

فهذا الاحساس بالشارع المصري لا يتناسب بأي شكل مع قراراتك الفترة الماضية التي لم تشبع علي الأقل غريزة الانتقام لدي أهالي الشهداء ومصابي الثورة

أمام سيادتك الآن خيارين للحفاظ علي ماتبقي من صورتك المشرقة في أذهان المصريين

اما ان تعلن صراحة الضغوط التي تتعرض لها من أعلي والتي تعيقك عن تنفيذ ما ننتظره ووقتها ستجدنا جميعا ندعمك

او ان تستقيل وتعود الي ميدان التحرير وسط الثوار

كاريكاتير عصام شرف والمجلس العسكري 2

2011-07-04T05:41:00.000+02:00

كاريكاتير عصام شرف والمجلس العسكري 1

2011-07-02T15:52:00.003+02:00

الحرب علي الاسلام بين الحقيقه والخيال...بقلم : حموده محمد محمد

2011-07-02T12:51:00.000+02:00

عندما يحشد الكثيرين افكار تحض علي كراهية الاسلام

وتكتب الاقلام المأجوره لتملئ العقول بتشويه الاسلام وطمس صورته في وجدان وضمير الفرد والمجتمع حتي يصبح الاسلام عباره عن عدو للحضاره والتقدم

ولذلك ينبغي ضربه وعزله وتصفيته لان المصلحه العامه تقتضي ذلك فيصبح الاسلام مقيدا ومعتقلا ومتهما .

اقول للاقلام المأجوره والايدي العميله والنفوس المريضه القذره التي باعت نفسها للفكر الماسوني

والفكر الصهيوني

ويساعدهم علي ذلك للاسف تصرفات بعض الدعاه

الذين يقولون عن الديمقراطيه ضد الاسلام والحريه ضد الاسلام فيسيؤا الي الاسلام

ويظهروه دين ارهاب وتعصب وانغلاق والاسلام برئ من هؤلاء وهؤلاء

ان الاسلام ببساطه ايها الساده يدعوا اصحابه الي الصدق والامانه والشجاعه والسخاء والرحمه

والغيره والتواضع والوفاء والحياء والعفه والحلم والصبر والعدل والاحسان

وبر الوالدين وصلة الارحام و اكرام الجار والتسامح مع المخالفين

والايثار والتعاون وتوقير الكبير ورحمة الصغير ورعاية اليتيم واطعام المسكين

واعطاء الحقوق لاصحابها

وهذا هو جوهر الاسلام .

واخلاق الاسلام تتميز بعمومها

فليس فيها تمييز بين شعب وشعب وبين فئه وفئه لان فيها توازن رباني فتعطي الحقوق لاصحابها .

فعلي المسلمون ان يفهموا الاسلام بهذه الروح وبهذا المعني

ايها الساده لا ينبغي ان نفرض علي الاسلام فكر مفكر

ولا ثقافه غربيه ولا ثقافه شرقيه

ان الثقافات تتغير وتتطور والافكار تتغير وتتطور

ويبقي الاسلام لكل العصور

لانه لا يخاطب العقل وحده

ولا القلب وحده

بل يخاطب الكيان الانساني كله في وقت واحد

فلا يكتفي بخطاب القلب والضمير كما هو معهود في كتب اللاهوت قبل الاسلام

ولا هو يخاطب الفكر والعقل وحده كما هو شأن الفلسفه

انما هو يخاطب الذات البشريه بكل مقاوماتها وابعادها

لذلك جاء الاسلام يصحح العقائد والتصورات ويكرم الانسان ويرعي حقوقه

ويأمر بعبادة الله وتقواه ويأمر بتذكية النفس وتكوين الاسره

وانصاف المرأه وتكريمها

ويدعو الي اقامة دولة العدل

ويدعو لاقامة عالم انساني متعاون ومتساوي

ويأمر بالحفاظ علي كرامة الانسان

ويقبل الاسلام كل الاديان المخالفه وهذا اصل من اصول الاسلام

فالاسلام مظله لجميع الاديان ونموذج فريد للتعايش

لانه دين رحب شديد الرحابه وضد الاكراه

انا اعلم ان العقليه المتصهينه والعقليه المتشدده لا تفهم هذا الكلام

ولا تؤمن به ولها قله من الناس تصفق لها

ايها الساده ان الطبخه اعدت بفن ومهاره شديده وخبيثه .

ان التاريخ الان لن يكتبه هؤلاء المتأمرون ولا الدعاه الجاهلون

التاريخ صناعة الله فيه تدابيره ولله فيها شأن

وكل ما يجري علي مراد خالق الكون

وليس علي مراد العملاء والجهلاء

واقول لهم انتم مستدرجون الي حدتفكم من حيث لا تعلمون

لقد مكر الله بكم لانكم ماكرون

واعلموا ان الله هو خير الماكرين

ان المسرح السياسي الان يظهر فيه ممثلون جدد كثيرون

لا نعرفهم ولا ضمان لمواقفهم

وهذا هو مسرح التاريخ الان يتغير في كل لحظه

والظروف تتغير في كل لحظه

ولذلك الكل يتعجل اغتنام الفرصه

وللاسف المخلصون في هذا الوطن والدعاه الحقيقيون في نوم عميق

ولكن....... لتلك الامة صحوة

"ولو ان قرانا سيرت به الجبال او قطعت به الارض او كلم به الموتي بل لله الأمر جميعا "

صدق الله العظيم

الشريعه لم تنزل للحاكم فقط ولا الحكومه ولكن ...بقلم :حموده محمد محمد

2011-06-21T17:52:00.000+02:00

ذهبت اليوم لاداء صلاة الجمعه وخطيب الجمعه رجل ملتحي وكان موضوع الخطبه هي التطبيق الفوري للشريعه الاسلاميه في مصر فتعجبت من هذا الخطيب عندما يقول لابد ان تفرض الان

وكأن هذا الرجل لا يعيش في مصر ولا يتعايش مع فقه الواقع الذي نعيشه في هذه الايام.

ايها الساده ان شريعة الله نزلت الي كل مسلم ليطبقها اولا علي نفسه

وفي بيته وفي سلوكه بين اهله وجيرانه ومجتمعه

فكل مسلم مسئول عن رعيته وله دولته التي يحكمها

((..والايات جائت في القرآن لكل الناس حاكم ومحكوم ((ومن لم يحكم بما انزل الله

وجاء القرآن بتغيير النفس اولا قبل تغيير الاخرين

((ان الله لايغير ما بقوم حتي يغيروا ..))

فاقامة الشريعه في الانسان اولا

وهي شرط حتي يستقيم المجتمع كله

ان فرض الشريعه في مجتمع غير سوى ودون تجاوب من القاعده العريضه للشعب ودون عزيمه من كل فرد لن نصل الي شئ

ولن يكون هناك تغيير حقيقي

التطبيق الحقيقي للشريعه تكون علي الانسان نفسه اولا وفي سلوكه وفي بيته وفي مجتمعه

تمهلوا ايها الدعاه فالشريعه ليست انفعال

بل هي مطلب حقيقي ينبغي ان تصدق فيه النيه وتتوفر البيئه الصالحه لهذه الشريعه وتستوعبها القاعده مع القمه بالتروي والتدرج فنحن ايها الساده في عصر شيوع البلوي

وهذا العصر له احكامه ؟

ودراسة الامور وحسن الفهم عن الله واجب

ودراسة المرحله فرض حتي لا نقع فيما وقع فيه غيرنا من ظلم وتخبط

ايها الساده الشريعه ليست حدود فقط

الشريعه عداله ورحمه فالعلم والعمل والقراءه شريعه

ومكارم الاخلاق شريعه

ان الشريعه قانون للرحمه وقانون للحب والمساواه وقبول الآخر والعدل والانصاف

فاين ما وجد العدل بكل اشكاله وجدت الشريعه بكل اشكالها

ان الشريعه لا وجود فيها للاكراه ولا العنف ولا المذايدات السياسيه

ولا مكان فيها للهوي ولا يصح فيها الا الصحيح

ايها الساده نحن الان بعد ثوره 25 يناير المباركه

وفي هذه الظروف الصعبه التي نمشي فيها علي الالغام من حيث لا ندري بمكر الماكرين وتآمر المتأمرين

والاعداء حولنا كبارهم وصغارهم كثيرون ويخططون لخرابنا

فلنفكر كثيرا كثيرا في كل ما نقول وما نفعل

اقول لكل الجماعات الاسلاميه في مصر

هذه فرصتكم التي لم ولن تتكرر في تطبيق الشريعه علي انفسكم اولا

وخصوصا في الدعوه الي الله

((ادعو الي سبيل ربك بالحكمه والموعظة الحسنه وجادلهم بالتي هي احسن ))

فلا عنف ولا فرض رأي بالقوه

الله يوصينا بهذا

((واتبعو احسن ما انزل اليكم من ربكم ))

ولنا في رسول الله اسوة حسنه اذ يقول:((تعافوا الحدود فيما بينكم فما بلغني منها فقد وجب تنفيذه ..))رحمة ويسر من نبي الرحمه في كراهية تنفيذ الحدود وايثار العفو والرحمه

هذا هو روح الاسلام دين المحبه والمغفره والعفو عند المقدره

فلنكن مسلمين رحماء متسامحين ربانيين نسير علي نور من الله

الاسلام دين حركه ودين فعل وتتطور مع مقتضيات العصر والاجتهاد لمواجهه التحديات وفهم المتغييرات

فالدين في حقيقته دين عقل واقناع ومنطق

ان الاسلام يحثنا علي الاجتهاد واالتحديث وينهانا عن الجمود الذي يسئ الي معني الاسلام ومعدنه النفيس النادر

ان الجمود في الفكر الاسلامي يسجن الاسلام في زنزانة التعصب

اننا نحتاج الان الي فكر جديد والي اجتهاد جديد وفلسفه اسلاميه جديده وفكر اسلامي نشط يواكب هذا العصر

نريد رحابة الصدر دون اتهامات ودون مزايدات ودون ان نكفر الرأي المخالف فنحن في مصر بلد السماحه والوداعه والاعتدال واللين والقدوه الطيبه

الم يصبر النبي عليه الصلاة و السلام ثلاثة عشر سنه علي اذي اهل مكه وعداوتهم ولا يرد عليهم

وكل هذه مبادئ ثابته في اصل الدعوه

ان المسيره الشريفه للاسلام من اربعة عشر قرنا تحثنا علي احترام العقل والتجديد والتطوير نحو الافضل والاحسن والحض علي العلم والعمل ومكارم الاخلاق والوسطيه في كل شئ في الحياه وفي الفكر والاجتهاد

اقول للجميع ولا استثني احد

اصلح ذاتك اولا

وابتعدوا عن كرسي الفتاوي

حتي تنجو من نفسك اولا

المهمه القذره للقضاء علي الثوره ورسم العالم العربي من جديد ... بقلم : حموده محمد محمد

2011-06-21T04:52:00.000+02:00

هل لنا دور فيما يجري في بلادنا ..!!؟؟

لا شك في ان الاحداث التي تمر بها منطقة الشرق الاوسط وخصوصا في عالمنا العربي فاقت كل التوقعات

ودمرت بقصد وبغير قصد الاجندات المرسومه لبلادنا ومن خلال القوي المهيمنه علي العالم

وخصوصا القوي الصهيونيه التي كانت تعتمد اعتمادا كليا علي حكامنا الاغبياء

وجعلتهم يربطون مصير حكمهم بالسمع والطاعه العمياء فولاء هؤلاء الحكام للكرسي وليست للوطن .

الذي يحير هذه القوي الان هو كيف يسيطروا علي مستودع الطاقه والكنوز والمصالح وفرض اجندات جديده

وارجو ان يدرك المسؤلون الان وشبابنا هذه الحقائق جيدا وان يحسبوا حسابهم

ان القوي الكبري في هذا العالم ليسوا ابرياء وليسوا محايدين ولا يريدون لنا الخير

فهم في احيان كثيره مع الشيطان علينا هكذا علمتنا التجارب وعلمنا التاريخ

ان الزوابع الاعلاميه في هذه الفترة الحرجه من مرحلة التحول وطوفان الاعلام يحاولوا ان يشوهوا صورة الثوره بحرفيه شديده

ليمهدوا وجدان الشعب للعدوان الذي يدبرونه عليها

وقد وقع اختيار هذه القوي علي بيئه خصبه من الاعلاميين

وبعض الرموز

وبعض رجال الاعمال

وبعض الشباب

وبعض الحركات

ليقوموا بالمهمه القذره

لانهم فعلا الايدي القذره المؤهله والمناسبه في هذه الايام

فنحن في الحقيقه ايها الساده نتعامل مع وحوش في ثوب دعاة التحضر والتنوير

ان الحفاظ علي الثوره هدف وطني شريف

وضرورة التنسيق وحشد الامكانيات والتنسيق لجميع الاحتمالات

والوقفه الشجاعه لمواجهة المصير

ان التاريخ يقول لنا ان المنتصر دائما ليس الاكثر عتادا ولا عده

اننا لا نعلن حربا علي احد

ولكن لن نقف مكتوفي الايدي امام اي عدوان علي الثوره

اننا يهددنا خطر واحد ويجمعنا مصير واحد

ان جمع شمل البيت المصري هو الخطوه الاولي لانجاح الثوره

ان الكبار الان حينما يشعرون بالخطر يقترب منهم سيغيروا مواقفهم

فاذا ادركنا هذه الحقيقه سننجوا جميعا

ان الاوان لرأب الصدع وجمع الصف

فعندنا من الاعداء ما يكفينا وزياده

وان غدا لناظره قريب

وحسبي الله ونعمه الوكيل

بالفيديو : هذا ما جناه الاخوان

2011-05-28T07:14:00.000+02:00

الاخوان في الفتره الاخيرة قالوا شويه تصريحات وعملوا شويه حاجات بصراحة مش عارف اقول ايه ولا ايه

توقعت من فتره ان يزداد الاخوان راديكالية تقترب اكثر من الحركة السلفية او الوهابية ولكن رأيي رفضه اغلب من عرفوه

ولكن دلوقتي ادينا بنشوف الحقيقه المتوقعه

بتزداد راديكالية الاخوان يوم بعد يوم لدرجة ان ظهر مصطلح السلفخوان وتم وضعهم في نفس البوتقة مع السلفيين

واصبح الفارق بينهم حاجتين : اللحية للسلفيين ,والدهاء للاخوان المسلمين

------------------------

بالنسبة لثورة الغضب الثانية استخدم السلفخوان نفس طريقتهم ايام الاستفتاء

فقالوا عنا الليبراليين العلمانيين الشيوعيين الكفرة اللي عاوزين نخرب البلد

ده غير انهم وصلولهم فكرة ان احنا نازلين لاعتراضنا عن الاستفتاء علشان يقولوا للناس شوفوا اهو مش عاجبهم الديمقراطية

واحلي حاجه ان كل مسمي من دول معناه مختلف عن التانيين ان لم يكن متناقض

وهم عارفين ان الشعب المصري الطيب لما بيسمع الكام مصطلح اللي مش فاهمينهم دول هيكشوا ويخافوا ويحسوا ان البلد بتضيع

ولكن المره دي الحمد لله خابت ظنونهم كلها بداية من اعداد الثوار الي التنظيم والحماية

اللي خلاهم سقطوا من نظري اكثر هو تغييرهم لما كتبوا قبل 27 مايو

وده هنشوفه في فيديو تحت

--------------------------

اما بالنسبة لازدياد راديكالية الاخوان

فهنلاقي صبحي صالح طالع يقول انهم لا يعترفون بمسلم ليبرالي ومسلم علماني

واضح ان المسلم لازم يكون اخواني :(

تلاقيه طالع في لقاء تاني بيأمر شباب الجماعه الغلبان بعدم الزواج غير من الاخوات في الجماعه وده برده هنشوفه في فيديو تحت

وقال ايه ده من الدين

علشان يزيدوا عدداً ويصلوا الي النصر

النصر علي مين, علي المصريين اللي زيك

عاوزين تعملوا دوله داخل الدولة

يا اخي ده الدين محلل الزواج من الكتابية

وانت مش عاوزهم يتجوزوا من بره الجماعه حتي لو كانت انسانه متدينه

بيتهيألي عيب اوي اللي بيحصل ده

انتوا نسيتوا نفسكوا لما قبل ثورة 25 يناير لما قلتوا مش هتشاركوا

وكانت المشاركة في البداية من بعض الافراد

ولما اكتشفتوا انها ثوره بجد نزلتوا

الاخوان قبل وبعد الثورة

واخيرا يأتي الشيخ وجدي غنيم يقول ان الديمقراطية حرام وبرده بالفيديو تحت

وان الشوري هي اللي حلال

وما الفرق يا شيخ وجدي ياعلامه يا ابو دم خفيف بين الديمقراطية والشوري

لا ويقولك مفيش حاجه اسمها معارضه في الاسلام

لا ياشيخ ,امال انتوا كنتوا ايه ايام مبارك,

اقولك كنتوا ايه ايام مبارك

كنتوا ماشيين بمبدأ مصلحتك اولا ,وصفقاتكم مع الحكومة مش خافية عن عين حد

يا اخي عيب بقي , بطلوا تتكلموا باسم الاسلام

للاسف بعض الطيبين من الشعب المصري كانوا فاكرين انكم معتدلين ولكن

تخيلوا كده الاخوان بيحكمونا

نيجي نعترض علي حاجه يقولك المعارضه حرام

والديمقراطية حرام

وممنوع النزول للمظاهرات

مع اعطاء المزايا لاعضاء الجماعه المخلصين

كده بالضبط كاننا رجعنا لايام الحزب الوطني المنحل

بس الفرق اننا هنتحكم باسم الدين

وديكتاتور متدين

اه وبالمناسبة ,حوار ابو الفتوح اللي عاوز يترشح للرئاسة "غصب عنكم" فبجد مش هيدخل علي عيل عبيط

ستظل الليبرالية هي اللي بتحمي الوطن من راديكالية اليمين واليسار

نيجي للفيديوهات

بنت ب100 راجل - حوار أسماء محفوظ مع نائب وزير الدفاع الامريكي

2011-05-06T01:22:00.000+02:00

أسماء محفوظ ...بنت ب100 راجل

لا بتخاف ولا بتجامل ولا بتمثل

اقرأوا علي لسانها الحوار اللي دار بينها وبين نائب وزير الدفاع الامريكي في السفارة الأمريكية

علشان تعرفوا ان فيه بنات في مصر ب100 راجل من اللي قاعدين علي المكاتب ومن اللي مرشحين نفسهم للرئاسة زي عمرو موسي اللي مابينطقش ويوم ما ينطق بيشجب ويدين

علشان تعرفوا ان ممكن مرأة تبقي رئيسة لمصر أحسن من الرجالة

مش زي ما الناس بتقول مينفعش لأن المرأة عاطفتها مسيطرة عليها

الحوار كما ارسلته أسماء محفوظ

أسماء محفوظ : مساعد وزير الدفاع الامريكي مشي مش طااااااايقني

أسماء محفوظ : اللي عانينا منه السنين اللي فاتت كان بسبب امريكا وان هما اللي صنعو الحكام العرب وصنعو دكتاتوريتهم وكانو بيدعموهم من اجل مصالحهم وان سواء اختلفنا او اتفقنا ان امريكا عدوة او صديقة ... فاننا اكيد هنتفق ان امريكا صديقة حميمة لعدوة مصر والوطن العربي (اسرائيل) وان امريكا ولا جاية عشان حقوق الانسان ولا جاية عشان مصلحة مصر ... وانهم جايين عشان يشوفو هيستيفدو ازاي من الوضع الحالي

أسماء محفوظ :مش هنسمح انكو تفرضو سيطرتكو علينا تاني ولا حتى على الجيش وملكمش دعوة بالشئون الداخلية احنا ادرى بيا ونعرف ازاي نتعامل معاها كويس وان لو انتو مهتمين اووي بحقوق الانسان فين دوركو من سوريا واليمن وليبيا؟؟ وان ده اللي المفروض نتكلم عنه عشان مصر بتمثل الوطن العربي وان منيين بيقولو حقوق انسان ودمقراطية وهما اخر ناس بيطبقوها .. وان اللي حصل مع بن لادن ضد الانسانية سواء اختلفنا او اتفقنا انه ارهابي .. و ان طالما هما حللو لنفسهم دم بن لادن من غير محاكمة ميزعلوش لو حد اغتالهم تحت مسمى انهم ارهابين وبرضو من غير محاكمة قلتله ان الشعوب العربية اثبتت ان القوة للشعوب وان محدش هيقدر تاني يتحكم في العرب على انهم عبيد واننا احرار ولينا حقوق وهنحارب من اجلها

أسماء محفوظ : امريكا صنعت وهم بن لادن عشان تصنع فزاعة الاسلام ومبارك كان بيطبق نفس السياسة ودلوقتي الاعلام بيطبق نفس الفزاعة تجاه الاسلامين وان الاسلام اكتر الاديان سلام وفيها عدل وحرية وان مفيش حاجة في الاسلام دولة اسلامية لكن دولة مدنية بمرجعية اسلامية وان مش مسموح العنف فيه وان كل تمثيليات الفتن اللي في الاعلام لا تعبر ولا عن السلف ولا عن الاخوان ولا عن اي اسلامي وكل ده فزاعات اخترعها الاعلام المصري والامريكي اخيرا قلتله اهم رسالة توجها لحكومتك اننا دشعب قوي في دولة قوية ومش هنسمح لحد انه يسيطر علينا او يتحكم في سياستنا وان مصر مسئولة عن العرب هو اتفق معايا ان سياسة امريكا كلها اخطاء ومحدش يقدر ينكر انهم بيدافعو عن مصالحهم وان قتل بن لادن كان انتقام للي عمله في 11 سبتمبر وقال انهم جايين دلوقتي نتيجة للتغير سياستهم بانهم هيسمعو للشعب زي ما بيسمعو للحكومة وانهم هيحاولو يوازنو بين مصالحهم ومصالحنا وان اللي بقوله مش شرط يكون بيعبر عن كل المصريين عشان كان في ناس تانية معايا رايهم مختلف عني فاخد كلامهم حجة لافعالهم

وقال انه مش هيقدر يساعدنا غصب عننا فطالما احنا مش عايزين مساعدتهم فاحنا احرار بيقول ان قتل بن لادن بعد الثورات العربية جت صدفة ومكنتش مدبرة بس بيحور في كلامه ومش واضح واغلب الاسئلة علق بكلمتين عليها واضح فعلا انهم لسة متفقوش على سياستهم الجاية مع المصريين اللي ضايقني اووووي ان كان معانا ناس كانوا مصميين انهم يشرحلهم وضع مصر الداخلي ايه وبيقولوهم يضغطو على الجيش عشان يعملو اللي في صالح الديمقراطية وضايقني كمان انهم مصممين يقولو ان الخوف الاكبر في مصر من السلفيين والاسلاميين ومصميين يقولو ان مصالح مصر اهم من كلامنا عن الوطن العربي وهما مش من الائتلاف ناشطيين في المجتمع المدني لو مكنتش قلت اللي جوايا نحيتهم كان ممكن اموت بحسرتي بس حاسة انا محتاجين بجد مجهود كبيير عشان نخلي الوطن العربي يقوم على رجله اللي جاي مش سهل

كان بيكتب كل كلمة بقولها بس كان قالب وشه"

لازم دور الأزهر يرجع حالاً وبقوة....ولا ايه؟

2011-04-24T11:01:00.002+02:00

بقت مهزلة يا جماعة

كل شوية يطلع واحد بفتوي مستفزة

والواحد ده غالباً ما بيكون الشيخ ابو اسحاق الحويني

للأسف فاكرين ان كل ما بقوا متشددين أكثر في أحكامهم كل ما قربوا من ربنا أكثر وقربوا من الاسلام الصحيح

لا والف لا طبعا

احنا كمصريين طول عمرنا بنحب الاسلام الوسطي

لكن للأسف مشايخ السلفية نفسهم يقلبوا مصر للسعودية

وفاكرين ان السعودية مثال يحتذي به في تطبيق الاسلام

بأمارة الاطباء اللي اتجلدوا 150 جلده واعتبروها حد من حدود الله

احنا اسلامنا معتدل وهيفضل كده

وعلشان يفضل كده لازم دور الازهر يرجع تاني وبقوة

ويصدر قرار او قانون بمنع اي حد خارج مؤسسة الازهر باصدار فتاوي

مهو الفتاوي خلاص بقت لعبة في ايد اي حد

الشيخ الحويني مثلا طلع فتوي بأن العلم للرجال فقط

وفتوي اخري بتحريم بيع البيض والرنجة يوم شم النسيم

وفتوي اخري بأن الديمقراطية حرام وان الشعب يبقي مصدر السلطات ده حرام وان لازم نرجع يبقي لينا امير مؤمنين ونبايعة ونلتزم طاعته

عيب بقي

انتوا بجد سبب تخلفنا وسبب اننا بقينا ملطشة

انتوا بتشوهوا صورة الاسلام

يعني بذمتك يا شيخ لو واحده اجنبية عاوزة تعتنق الاسلام وسمعتك بتقول ان العلم للرجال والديمقراطية حرام هتقول علي الاسلام ايه؟؟؟

ياريت في اقرب وقت يصدر قانون يجرم اصدار فتاوي خارج مؤسسة الازهر علشان ننقذ مايمكن انقاذه

وأدي فتوي تحريم بيع البيض والرنجة وشم الهوا يوم شم النسيم

وأدي كمان فتوي العلم للرجال فقط

المسيحيين والمسلمين في مصر - تعالوا نتكلم بصراحة

2011-04-21T15:36:00.000+02:00

في البداية أحب أوضح ان انا مسلم فكلامي هيكون أغلبه عن الكلام اللي باسمعه من بعض المسلمين عن المسيحيين

انا شايف بصراحة ان احنا لما نيجي نحاول نتعامل مع أي فتنة طائفية في مصر كل اللي بنعمله بنتعامل معاها علي اساس الافعال لا الافكار

مع ان الافكار هي الاهم

وبحس كمان ان اللي بيتعمل تمثيل مش حقيقة يعني عاوزين بس نبان ان احنا أيد واحده مع ان من جوانا مش بنبقي كده

بمعني ايه؟؟؟

بمعني ان المفروض ان يبقي فيه حوار مستمر بين المسلمين والمسيحين , حوار صريح بكل الافكار اللي بتيجي في دماغ كل واحد تجاه الآخر

يعني انا مثلا هأقول بعض المواقف اللي مريت بيها مع افكار بعض المسلمين تجاه المسيحيين

ايام المدرسه مثلا

كان صديقي في المدرسه وقاعد معايا في نفس الديسك مسيحي

ساعات كنا ناكل من اكل بعض

فجه واحد زميلنا خدني مره علي جنب وقاللي متبقاش تاكل من أكل المسيحيين

قلتله ليه

قاللي : أصلهم بيصلبوا عليه وبيقروا عليه كلام من بتاعهم

قولتله والله انا ماعرفش اللي بتقوله ده صح ولا غلط بس في كل الاحوال لو اكلت من اكلهم مش حرام ومش هيضرني

قالي خلاص انا قولتلك وانت حر

أهي فكره زي دي نفسي اعرف ايه اصلها

وحتي لو كانوا بيعملوا كده فعلا ايه المشكلة يعني, هم يعني بيحطوا سم في الاكل, مش احسن من الاكل المسرطن اللي كنا بناكلوا

موقف تاني

مره كنت واقف في كليتي في القصر العيني

وبعدين جه راجل وقالي لو سمحت انا محتاج حد يتبرع بالدم لبنتي عاملة ولادة قيصرية

قولتله تمام انا هاجي اتبرعلها

المهم اتبرعت والراجل شكرني واحنا بنخلص الاجراءات عرفت ان اللي اتبرعتلها مسيحية

بصراحة ساعتها حسيت بالوحده الوطنية بجد

فحكيت لواحد صاحبي عن اللي حصل وان احنا اهو أيد واحده وبيجري في عروقنا دم بعض

فقالي انت تعرف ان هم محرمين دمهم علي المسلمين

قلتلوا ازاي

قاللي بيعتبروا دمهم مقدس فمينفعش يعطوه لمسلم

قلتله مين قالك الكلام ده

قاللي سمعت

وانا برده مش مقتنع بالكلام ده ومش عارف مين اللي طلعه

برده مش فاكر مين قاللي ان المسيحين بيكرهونا وبيعملولنا حاجات زي اعمال للأذية وعلشان كده ماتسكنش جنب مسيحي

وطبعا الشائع يقولك ما تتعاملش معاه ده مسيحي ابن كذا

مره سألت واحد انت ليه بتقول عليهم كده

قالي انا مره كنت طالع عمارتنا وسمع المسيحيين أصحاب المحل اللي جنب العماره بيقول "ده مسلم ابن كذا" ومن ساعتها مبقتش حتي بأرمي عليهم السلام

ومرة اتكلمت مع صديق مسيحي وقلتله انتوا حاسيين بتمييز في معاملتكم؟؟؟

قالي طبعا واللي مضايقنا أوي نظرة شباب المسلمين للبنات المسيحيين لانهم بشعرهم

قلتلوا علي فكره دي نظرة تجاه اي واحده بشعرها مش شرط المسيحية

دي يمكن بعض المواقف والأفكار اللي انا اتعرضتلها واللي أكيد بتحصل بصورة يومية أو بتدور في دماغنا ومخليانا مش صافيين ناحية بعض

الحل هو الحوار المفتوح الصريح بين المسلمين والمسيحيين وخاصة الشباب

ومنكتفيش كل مرة في حل المشاكل حل ظاهري

الليبرالية والإسلام

2011-04-17T09:34:00.000+02:00

أنا حبيت بس اوضح معني الليبرالية لناس كتير فاكراها كفر وحرام وحاجات غريبة

الليرالية هي الحرية ولكن ليست الحرية المطلقة

الليبرالية هي حرية الفرد وحرية الملكية الفردية والمحافظة علي حقوق الانسان

والحرية المذكورة هي الحرية في حدود تقاليد المجتمع

يعني الليبرالية في مصر تختلف تماما مع الليبرالية في اوروبا وامريكا

وعمرهم ما هيكونوا نسخة واحده

والاسلام يكفل حرية الاعتقاد وحرية الفكر وحرية التملك ولا يتعدي علي حقوق الانسان فبالتالي الاسلام لا يتناقض مع الليبرالية

الليبرالية مش زي ما قال الشيخ حازم شومان "ان اختك وامك ماتلبسش حجاب"

لا يا شيخ

الليبرالية هي ان اللي عاوزه تلبس حجاب تلبس واللي مش عاوزه تلبس ماتلبسش

كل واحده حرة وربنا اللي هيحاسبها مش احنا

أغلب اللي كانوا في ميدان التحرير من اول الثورة كانوا ليبراليين

هل حد لاحظ عليهم اي افعال مشينة ؟ لأ طبعاً

الحاجة الوحيدة اللي ممكن تتكلم عليها في الليبرالية وعلاقتها بالإسلام هي الفكر الاسلامي الليبرالي وه ده اللي كان عامل جدل

ومن مشاهير الفكر ده الشيخ جمال البنا والقمني وفتاويهم المثيرة للجدل

ولكن....ليه نرفض الفكرة كلها بسبب جزء صغير منها

ليه ما نعملش احنا الليبرالية الاسلامية أو العربية اللي نبقي راضيين عنها

ليه لازم نستنسخ كل حاجه من الغرب وبالتالي بنرفضها لمجرد انها جايه من الغرب

عموما اتمني ان معني الليبرالية الصح يكون وصل واتمني ان مشايخنا لما مايكونوش عارفين معني صحيح لحاجة يقولوا مانعرفش مش يشوهوا صورة اشخاص بسبب عدم معرفتهم زي ما الشيخ شومان عمل مع دكتور البرادعي وبعدها اعتذر

مبروك علينا الخاذوق الحلو ده يا مصريين

2011-04-10T16:16:00.000+02:00

الف الف مبروك علينا كلنا الخاذوق الحلو ده

ونشكر المجلس العسكري علي مساعدته للمخلوع علي اعداد مثل هذا الخاذوق

ونشكر برده الناس اللي كانت عاوزه الثورة تخلص بسرعة وننجز علشان تشوف شغلها

ونشكر الناس اللي قالوا نعم للاستقرار "من يوم الاستفتاء وانا ريحة الاستقرار مش عارفة تروح من مناخيري"

ونشكر الناس اللي بتدافع عن المجلس العسكري كل ما نتهمه بالتباطوء وتقولنا سيبوه يشوف شغله

أهو شاف شغله علي اعلي مستوي

وجمال رايح جاي براحته خالص ينقل في الفلوس ويهربها واحنا متأرطسين

ودلوقتي ايه

دلوقتي هتلاقوا المخلوع يعيني طلع شريف

وهيعيش دور المظلوم علي قفانا

ولا هنطول مليم

ما احنا شعب أهبل يوم ما وافقنا ان المجلس العسكري يحكمنا بيقادة مين ههههه بقيادة طنطاوي

ازاي تتخيلوا ان طنطاوي هيساعدنا في ادانة مبارك بأي شكل

معقول يساعد في ادانة القائد بتاعه

طيب دلوقتي بقي احنا بنطالب بمحاكمته فورا بتهمة الخيانة العظمي نتيجة لقتل المتظاهرين

ومفيش تباطوء

والمجلس العسكري يمشي حالاً

ويمسك البلد مجلس رئاسي يرجعلنا حقنا بقي

آآآآآآه يا بلد

تعالوا نحاول نقرأ ونفهم رسالة القوات المسلحة رقم 34

2011-04-09T06:15:00.005+02:00

أول حاجة اللي حصل ده ملوش أي مبررات أياً كان هدفه

بالفيديو: الامن المركزي والقوات المسلحة تفض اعتصام ميدان التحرير بالقوة واطلاق النار

وان كان علي الرصيد بتاعكم فنفذ بقاله ييجي شهر نتيجة للتباطؤ في تنفيذ مطالب الثورة

وجيمي قاعد يتفسح مابين كايرو وشرم ينقل في فلوس ومبارك قاعد في (الإقامة الجبرية) الفظيعة اللي في شرم

بذمتكم ينفع الراجل يقعد في مكان غير آدمي بالمنظر ده

هم يضحك وهم يبكي

المهم نقرأ بقي بيان القوات المسلحة واحده واحده

أولا انا أول مره اعرف ان كلمة "فلول" دي في قاموس القوات المسلحة وممكن تنزل في بيان رسمي

ثانيا لما الحزب الوطني وحش اوي كده وليه فلول ما حليتوهوش ليه وده كان مطلب من مطالب الثورة, ولا قلتوا تسيبوه علشان يوم ما تتزنقوا تلاقوا حجة

ثالثا وده أهم حاجه

بيقولك انهم هيفضلوا ورا فلول النظام

وبيقولك كمان انهم كانوا بيدوروا علي "ابراهيم" ههههههه

ده معناه انه انذار لينا ان اي اعتصام مش هيعجب القوات المسلحة هيدوروا فيه علي الفلول وعلي " ابراهيم" واللي حصل هيحصل تاني

انا لغاية دلوقتي مش متخيل اللي حصل كان مشهد مروع غير متناسب علي الاطلاق مع هدفكم اللي هو " الفلول و ابراهيم" ومش متخيل كمان ان القوات المسلحة تنزل بيان الساعة 5 ونص الفجر

واضح انهم حسوا ان الموقف كبر واللي عملوه اتصور وفيديوهات الجريمة نزلت وكله بقي شايف علي الطبيعة فمحدش هيعرف يقول اننا بنعمل فتنه وبنتبلي علي الجيش زي المره اللي فاتت اللي في اللينك ده

شهادتي كشاهد عيان مضروب من القوات المسلحة
وياريت يا جماعه نفهم اننا لو هتفنا ضد طنطاوي مش معناه اننا بنهتف ضد الجيش كله
ومتوقع ان هتحصل اعمال تخريبية علشان يبقي اللي اتضربوا دول خارجين عن القانون
عيب بقي عيب قوي احنا خلصنا من مبارك وشلته واعلامه تعملوا انتوا زيه

بالفيديو: الامن المركزي والقوات المسلحة تفض اعتصام ميدان التحرير بالقوة واطلاق النار

2011-04-09T04:24:00.005+02:00

قامت قوات من الشرطة العسكرية والقوات المسلحة في الساعة الثالثة صباح السبت 9-4-2011 بمحاصرة المعتصمين بميدان التحرير ومعم سيارات اسعاف
ثم قاموا بتطويقهم وبدأ في ضرب نيران حية وطلقات مطاطية وصعقهم بالصواعق الكهربية
وتتوارد الانباء عن وجود اصابات من جانب المعتصمين و كر وفر ثم مطاردات في التحرير والشوارع المؤدية له
ووردت انباء أيضاً عن اعتقال افراد القوات المسلحة المعتصمين مع المواطنين ولم يرد تأكيد بإعتقال مواطنين
عن شبكة رصد وشبكة وعي الاخبارية

بالفيديو: الامن المركزي والقوات المسلحة تفض اعتصام ميدان التحرير بالقوة واطلاق النار
جميع فيديوهات هجوم الجيش القوات المسلحة علي التحرير
#Tahrir #Apr8 #Jan25 #Egypt