zuberot | blog

iGO навигација за Android

zuberot — Mon, 25 Apr 2011 16:48:42 +0000

Сосема солидна замена за Garmin, на моменти дури и попрецизни мапи. Иако интерфејсот е ужасно лош и грд iGO за Android си ја брка работата, нема да ви троши многу батерија и што е најважно мапите лесно се инсталираат и богами ги има скоро за секаде. На торент можат да се најдат неколку верзии за Android (сите пиратски), скоро сите освен оваа што ќе ја споделам денес со вас се за екрани со мала резолуција. Оваа верзија работи одлично на Desire HD, Galaxy S, Desire или било кој друг телефон со слична резолуција. Не сум ја пробал на таблет, ако некој ја проба нека сподели искуства.

Најпрвен симнете го APK-то и инсталирајте го и не ја стартувајте апликацијата сѐ додека не ги ископирате датотеките од архивата на вашата SD картица или внатрешна меморија.

Патеката на датотеките треба да биде:

/SDCARD/iGO внатре треба да имате две папки едната “contents” и “license”

Откако ќе ги симнете мапите, само ископирајте ги во “map” и “poi” соодветните датотеки од торентот. Во архивата се наоѓаат maps&pois за Македонија.

Jupiter, штеди батерија на Ubuntu

zuberot — Sun, 03 Oct 2010 20:54:44 +0000

Капацитетот на батеријата од лаптопот значително ми опаднал со текот на времето, што е и до некаде нормална појава. Сепак фрустрирачки е кога лаптопот може да го користите само саат и пол, а претходно сте го користеле и до три часа без во близина да има двесте и двајсе .

Jupiter е првенствено направен за EeePC меѓутоа од пред некое време е достапен за сите нетбук и лаптоп компјутери. Искуствата од Jupiter се позитивни, успеав да добијам и до 40+ минути во батерија што сепак не е малку со оглед на тоа што вкупниот капацитет на батеријата е 62%. Режимите на работа на Jupiter се автоматски во зависност од тоа дали сте приклучени на електричната мрежа или не, има малку простор на конфигурација и скоро сѐ е автоматски подесено. Сепак си ја брка работата.

За да го инсталирате Jupiter на Ubuntu 9.10, 10.04 или 10.10 отворете терминал и:

sudo add-apt-repository ppa:webupd8team/jupiter
sudo apt-get update
sudo apt-get install jupiter

Миграција: Nokia контакти на Android

zuberot — Fri, 01 Oct 2010 12:46:35 +0000

Миграцијата започна, татко ми никогаш не користел телефон различен од Nokia, до сношти . Со годините тоа значи и многу контакти во именикот. Nokia не нуди сервис за синхронизација на контактите со некој надворешен сервис, како што е случај кај Android.

Процедурата е следна:

1. префрли ги сите контакти на мемориската картичка во Nokia телефонот

Отворете Contacts во Nokia
Од Options изберете Mark/Unmark -> Mark All
Од Options изберете Copy -> To Memory Card

2. спои ги сите .vcf датототеки во единствена kontakti.vcf

сега сите контакти се наоѓаат во MemoryCard/Others/Contacts
ископирајте ги сите .vcf датотеки
отворете Terminal (GNU/Linux) и извршете ја командата
cat *.vcf >> kontakti.vcf

вметни ја kontakti.vcf датотеката во твојата Google сметка

синхронизирај го Android телефонот со Google сметката
Само внесете корисничко име и лозинка, останатото ќе се направи автоматски.

Кој, кога и од каде се логирал на вашиот Facebook профил

zuberot — Sat, 18 Sep 2010 23:10:48 +0000

Да претпоставиме сценарио во кое што вашата Facebook лозинка е злоупотребена односно некој успеал на некој начин да стигне до неа, често сценарио во денешно време на слаба информираност за тоа како да не бидете актери во едно вакво сценарио. Во ред, лозинката освен вие ја знае и некој друг засега непознат, ајде да пробаме да се запознаеме со непознатиот. Тоа што денес ќе Ви го покажам, од непознатиот ќе побара освен корисничкото име и лозинка да внесе и име на компјутерот од кој што пробува да се најави и да го злоупотреби вашиот Facebook профил.

За да ја овозможите оваа опција од менито Account во вашиот Facebook профил изберете Account Settings и потоа изберете Account Security, тука сѐ што треба да направите е да ја овозможите опцијата Login Notifications и информациите за непознатиот корисник ќе ви бидат испратени на e-mail или SMS во зависност од тоа како Ви е конфигуриран системот за известувања. Толку, веќе сте на чекор пред натрапникот и ќе бидете известени за секое ново најавување на вашиот Facebook профил.

Да видиме како оди тоа на дело, кога корисникот ќе проба да се најави со вашето корисничко име и лозинка ќе треба да внеси и име на компјутерот од кое што се најавува.

Веднаш по ова на вашата e-mail адреса ќе пристигне мејл со информации за тоа кој се најавил на вашиот Facebook профил, треба да реагирате веднаш пред натрапникот да ја промени лозинката. Најавете се на вашиот профил, променета ја лозинката и повторно одете во делот за Account Security, сега тука ќе ги добиете сите компјутери кои пристапиле до вашиот Facebook профил. Информациите се доста корисни и многу лесно може непознатиот да стане познат.

Вовед во Android, 3 одлични видеа

zuberot — Sat, 11 Sep 2010 03:47:48 +0000

Трите видеа можеби се и трите основи работи што треба да ги знаете околу Android платформата пред да започнете да развивате апликации за истата. Видеата се превземени од официјалната страница на Android SDK. Видеата покрај тоа што може да ги следите на англиски, со користење на YouTube опцијата за преведување може да ги следите и на Македонски (преводот е доволно добар за да ја разберите суштината).

Првиот дел се однесува на архитектурата на целиот оперативен систем.

Вториот дел се однесува на животниот циклус на една апликација. Сѐ што треба да знаете за процесите во Андроид.

Во третиот дел ќе погледнете неколку Аpplication Programming Interface (API) кои ги содржи оперативниот систем.

Телекабел – спор интернет до крајот на октомври?

zuberot — Fri, 10 Sep 2010 18:57:36 +0000

Веќе недела дена сите корисници се жалат дека имаат проблемите околу интернетот со Телкабел (Моби, Роби), денес конечно решив повторно да си ја пробам со техничката поддршка. Откако ја поминавме процедурата име и презиме, адреса, дали светат сијаличките на модемот? оди во Control Panel? Ама немам Windows! W000t? чекај колегата е so Линуксо, дојдовме до моментот ај сега да мериме интернет брзина на SpeedTest, ајде реков.

Јас: Ете мерам овде вика 1,16 Mb/s

Техничка поддршка: Да не е 1,3Mb/s ???!!!

Јас: Ејј да, ете крена на 1,3Mb/s (тролам)

Техничка поддршка: Епа тоа ти е, толку е во моментов.

Јас: А нели 8Mb/s нешто а у?

Техничка подддршка: Во наредниот месец, месец и пол преку ден брзините ќе бидат од 1Mb/s до 2Mb/s максимум, а навечер можно е да добиете брзина и до 4Mb/s. Сепак подобро е да ви кажеме, отколку да мислите дека нешто ќе се реши за брзо време околу брзината.

Јас: А да ни пратевте некое известување нешто до корисниците да знаеме, сепак едно плаќаме а друго добиваме?

Техничка поддршка: Не сме ние задолжени за тоа, жалете се на друго место. Имајте пријатна вечер.

***Надополнување (11.09.2010 – 03:16)

Како што кажаа, брзините на вечер ќе бидат поголеми.

Android известувања на Ubuntu

zuberot — Fri, 10 Sep 2010 12:38:31 +0000

Сигурно барем еднаш сте имале потреба од вакво сценарио, настаните од телефонот кој што не се наоѓа до вас да ги добиете како известување на компјутер. Android Notifier е проект кој што започна неодамна и веќе ја извршува голем број од задачите за кој што е предвиден. За да го постигнете ефектот, потребно е да ја инсталирате Android апликацијата и нормално Ubuntu апликацијата. Конфигурацијата на двете апликации е едноставна и интуитивна, има две опции за тоа како да комуницираат апликациите Bluetooth или WiFi. Во текот на тестирањето забележав дека има некои проблеми при Bluetooth комуникацијата, грешките се пријавени и програмерите веќе работат на нивно разрешување.

Еве како изгледа Android Notifier на дело:

Pretty awesome, I know. Познавам барем двајца на кои што апликацијата и тоа како ќе им биде од корист. Ако го немаше ќе требаше да го измислиме.

Кој е најдобар Wi-Fi канал?

zuberot — Thu, 09 Sep 2010 21:48:51 +0000

Накратко, најдобар е тој што не го користи никој од комшиите. Доколку живеете во соседство каде што има многу Wi-Fi мрежи веројатноста да имате проблеми со прием на сигнал до уредите и загуба на пакети е голема доколку препуштите сѐ на предефинираните вредности од производителот на рутерот. И за ова има лек, едниот начин е рачно да ги скенирате сите мрежи да видите на кои канали работат, да анализирате и да одберите кој канал би бил соодветен за вашата мрежа (хммм ни јас не би се замарал рачно). Ако пак имате телефон со Андроид веќе пола работа сте завршиле, останува да ја инсталирате “WiFi Analyzer” да си поиграте со опциите кои ги нуди и веднаш ќе знаете на кој канал вашата мрежа нема да има проблем со останатите.

Уште на првото стартување на апликацијата ќе добиете график на кој се претставени сите мрежи со нивната јачина и канал на кој што работата, на x-оската се каналите и на y-оската сигналот. Највисоката крива е веројатно вашата мрежа по претпоставка дека сте најблиску до рутерот. На сликата каналите на сите мрежи се речиси идеално избрани, доколку имаше преклопување на кривите тогаш се можни проблеми, бидејќи можете единствено својот рутер да го конфигурирате одберете канал на кој што во следната анализа ќе имате најмалку преклопувања на кривите. Уште една фина опција кој ја нуди апликацијата е да му посочите кој е вашиот рутер, и таа самата ќе ви каже дали сте во зелена или црвена зона односно дали треба или не да го промените каналот на кој што работи рутерот, но нема да ви го каже точниот канал на кој што треба да ја поставите мрежата туку ќе исцрта ѕвездички на сите канали па сами да се одлучите што би било идеално.

Морена, септември 2010

zuberot — Thu, 09 Sep 2010 16:48:12 +0000

Тие што ме познаваат малку повеќе знаат дека десктопот мора секогаш да ми е пицикато, ако по цел ден зјапам во него тогаш тој мора да биде елегантен, инспиративен и модерен. Морена често трпи промени во изгледот, па затоа решив кога ќе имам нешто интересно да го споделам со сите. Моментално состојбата е следна:

GTK темата е “Equinox Light”, иконите се Faenza, X11 темата за покажувачот од глушецот е Pulse-Glass. GTK темата и иконите може да ги инсталирате со внесување на следните линии во терминал:

sudo add-apt-repository ppa:tiheum/equinox
sudo apt-get update
sudo apt-get install gtk2-engines-equinox
sudo apt-get install equinox-theme equinox-ubuntu-theme faenza-icon-theme

Панелот во долниот дел е Docky кој се инсталира со:

sudo apt-get install docky

Позадината е ClearBlue2

Guake – летачки терминал

zuberot — Thu, 09 Sep 2010 02:17:44 +0000

За тие што користат KDE доволно е да знаат дека се работи за апликација слична на Yakuake, а за останатите ова нека биде уште една “Terminal” апликација. Користењето на терминал во денешно време иако е минимално сепак и тоа како e потребно, особено ако добивате совет од поискусен корисник па тој најчесто ќе ви нафрли неколку “магични” команди кои треба да ги извршите. Убавината на Guake е тоа што терминалот ќе го добиете со некоја кратенка од тастатура по ваш избор (стандардна кратенка е F12), на истата кратенка ќе го сокриете без притоа да користите глушец и да кликате, дополнително нема да ви зафаќа простор во лентата со активни апликации.

За да го инсталирате Guake во Терминал внесете:

 sudo apt-get install guake

Транспаретноста, фонтот, ширината, типот на интерпретер и уште многу други опции може сами да ги подесите според своите желби и потреби, во прозорецот за опции (десен клик врз терминалот -> Preferences).

Логично би било Guake да се стартува веднаш штом се најавите на системот, бидејќи во самата апликација нема таква опција за тоа ќе мора рачно да го овозможите. Од System->Preferences изберете Startup Applications и штиклирајте го “Guake” записот.