Dirixido no 2024 por Johan Grimonprez, quen mistura política, historia e jazz dun xeito realmente orixinal. O filme céntrase na crise do Congo trala súa independencia de Bélxica en 1960 e no asasinato do líder independentista Patrice Lumumba. O fío condutor de todo esto é o jazz, onde moitas das súas figuras aparecen conectadas á historia política do momento, e como algúns deles foron utilizados como instrumentos de diplomacia cultural e como outros se implicaron activamente nas protestas pola situación do Congo.
  Unha historia apaixoante que mereceu unha nominación ao Oscar como mellor filme documental e acadou o Premio especial do Xurado en Sundance 2024.

A segunda proposta do mes será o mércores 23 cun filme dunha das nosas directoras máis talentosas e internacionais: Isabel Coixet, quen adapta a novela de Michela Murgia “Tre Ciotale” para debutar como directora no cinema italiano.

  As proxeccións serán ás 20:30 no Salón García. As entradas para ambas serán de balde para socios/as. A do venres 18 terá un coste reducido para o resto do público de 2,5€, por pertencer á programación da Filmoteca de Galicia. A do mércores 23 custará 4€ para os non socios, agás parados e estudantes que abonarán só 2,5€.

Se queredes saber máis dos filmes que proxectamos, podedes suscribiros as nosas canles de Telegram (https://t.me/Adegacineclube) ou WhatsApp (https://whatsapp.com/channel/0029VbCYeNW2ZjCfdp0Unt34), onde poderedes ler ou visionar contido extra, facer preguntas, votar os filmes, ou simplemente consultar dúbidas.

Para nós é moi importante que dalgún xeito nos fagades chegar a vosa opinión dos filmes proxectados, para saber cando o noso criterio foi acertado e cando non, mediante algo tan sinxelo coma un clic na enquisa que tódolos días de proxección facemos na nosas canles de Telegram e WhatsApp.

A primeira delas, “La cueva de los sueños olvidados” ademais nos fala de pioneiros, de xente que deixou un legado que outros recolleron e continuaron, é dicir, que tamén podería estar falando de nós mesmos como cineclube, que recollemos esa testemuña dun extraordinario grupo de persoas que nos albores da democracia imaxinaron e soñaron con traer a esta vila as mellores obras dos que fabrican eses soños colectivos que chamamos filmes.

En “La cueva de los sueños olvidados” o gran director alemán Werner Herzog ábrenos a porta a un dos lugares máis misteriosos e conmovedores da humanidade. Unha viaxe silenciosa e chea de beleza á cova Chauvet, (similar a Altamira) onde as primeiras mans que pintaron o mundo aínda parecen respirar nas paredes. Herzog, sempre atento ao que latexa baixo a superficie, descende aquí ao corazón desta cova francesa para filmar o que quizais sexa o primeiro relato cinematográfico da humanidade. O director non se limita a documentar: interroga, escoita, deixa que a pedra fale. É unha película que nos lembra que a arte naceu moito antes de que existise a palabra “arte”.

O pase será este venres 5. Será de balde para os nosos socios/as, 2,5€ para estudantes e desempregados e 4€ polo resto do público.

O mércores 17 proxectaremos outro documental, esta vez galego: “360 curvas”, que son as curvas que separan a Fonsagrada de Lugo. Un filme a cabalo entre dous tempos non tan afastados, que nos fala dunha comunidade que negouse a esmorecer, aínda que estivo a piques de facelo.
Algo que tamén de certo xeito funciona como metáfora deste cineclube.

O pase será de balde para socios/as e prezo reducido de 2,5€ para o resto do público por tratarse dunha nova colaboración coa Filmoteca de Galicia.

O venres 19 non haberá filme algún, pero á vez estarán dalgún xeito os case 1700 proxectados na historia do cineclube, pois será o día da inauguración da nosa exposición. “Unha ollada compartida. O reflexo dunha vila.” Non vola podedes perder!

E poñeremos fin ao mes e daremos a benvida a un verán xa ca vista posta na vindeira Semana de Cine o venres 26 con “Maspalomas”. Un relato luminoso, cheo desa melancolía suave que só aparece nos veráns que nos cambian sen facer ruído. A película observa os seus personaxes con tenrura e honestidade, deixando que os encontros, os desexos e as feridas pequenas constrúan unha historia que se move entre a luz e a sombra, como a propia illa.

Para este filme o pase será de balde para todo o mundo ata completar aforo por ser unha nova colaboración co CIM de Vilagarcía polo día do orgullo LGTBIQ+.

Agardamos que todas estas propostas vos acompañen, vos sorprendan e, sobre todo, vos dean ganas de seguir mirando o mundo con curiosidade e con renovadas forzas para seguir soñando.

Nós seguiremos aquí quizais outros 50 anos. Quén sabe…

O primeiro deles será o filme da década dos 2000 elexido polos socios dentro das proxeccións históricas do cineclube e os outros tres formarán parte dun ciclo de cine galego.

As proxeccións viran repartidas entre mércores e venres.

Este mércores 6 será a quenda da película danesa do 2002 “Te quiero para siempre” (Elsker dig for evigt) de Susanne Bier, un dos mellores filmes desta excelente directora e unha das obras máis representativas do movemento Dogma, coa que déronse a coñecer internacionalmente o carismático e prolífico actor Mads Mikkelsen e a propia Susanne Bier.O filme aborda a complexidade das relacións humanas, onde teñen cabida o amor, o dolor, a lealtade e un sinfín de emocións e decisións que non teñen resposta nin solución sinxela. Sen dúbida, trátase dun filme intenso onde os seus protagonistas viven e actúan a corazón aberto, como ben indica o seu título en inglés (Open hearts). O pase será de balde para os socios/as, un prezo reducido de 2,5€ para estudiantes e desempregados e 4e para o resto do público.

O venres 15 proxectaremos a gran triunfadora do cine galego deste último ano, o filme de Ángeles Huerta con guión de Pepe Coira “Antes de Nós” que acadou trece premios Mestres Mateo. Esta será unha proxección en colaboración coa concellería de cultura e coa Filmoteca de Galicia, polo que o pase será de balde para todo o mundo ata completar aforo.

O seguinte alto no camiño será o mércores 20 coa mediometraxe documental “Altas luces” (2026), dirixido por Pilar Abades, Sabela Iglesias e Adriana P. Villanueva, explora a relación entre a fotografía, a mirada e o xénero, afondando na construción da representación do corpo feminino ao longo da historia. Esta será unha nova colaboración do cineclube con Festivala. O pase e coloquio posterior de balde para todo o mundo. 

E remataremos este ciclo de cinema galego o venres 29 co filme de 2024, escrito e dirixido por Alejandro Enríquez “Rapa, xente ao monte” un documental sobre a ameaza a que se enfrenta o cabalo galego de monte. O pase será de balde para os socios/as e terá un coste reducido de 2,5€ para o resto do público por tratarse dun filme en colaboración coa Filmoteca de Galicia.

Queremos que non vos perdades nada das actividades que estamos realizando con motivo do 50 aniversaro do Cineclube Ádega por iso vos iremos informando de todo o que se coce.

É moi sinxelo accede dende este enlace Canle Cineclube Ádega ou escanea o código QR.

Comezaremos o día 8 coa nova película de Jim Jarmusch, “Father Mother Sister Brother” (2025), que tras seis anos de silencio voltou pola porta grande levándose o León de Ouro no último Festival de Venecia. Con esta obra Jarmusch volve a propoñernos un novo filme por episodios, como xa fixera entre fináis dos oitenta e principios dos noventa con obras coma Mystery Train, Noite na tierra ou as coleccións de curtas Coffee and cigarettes. Neste filme tamén volve a contar con Adam Driver e recupera a Tom Waits, ademáis de actrices tan consagradas como Cate Blanchett e Charlotte Rampling. Jarmusch encargouse da dirección, guion e banda sonora.  A película está dividida en tres episodios ao redor dun mesmo feito: o reencontro dos membros dunha familia.  

A seguinte proposta chegará o mércores 15. “Ju Dou Semilla de crisantemo” (1990). Forma parte dos actos do 50º Aniversario, xa que resultou a gañadora entre as películas dos 90 que xa foran proxectadas noutras etapas do cineclube. Filme, por certo, moi ben escollido xa que trátase dunha das mellores obras do gran director chinés Zhang Yimou. Protagonizada pola que fora a súa esposa e musa Gong Li, trátase dun melodrama ambientado na China rural dos anos vinte do pasado século.

E remataremos o mes o mércores 22 co novo documental de José Luis Guerín “Historias del buen valle” (2025), gañador do Premio especial do Xurado no Festival de San Sebastián. Trátase dunha ollada hunanista sobre Valbona, un barrio do extrarradio barcelonés, que serve de ponte entre o mundo urbano e o rural, onde conviven os primeiros emigrantes cos recén chegados, facendo de Valbona unha auténtica aldea global. 

O venres 13 será a quenda do filme que representará a década dos 80 na historia do cineclube, “Lenny” dirixida por Bob Fosse e interpretada maxistralmente por Dustin Hoffman. Lenny é o filme co seu director fixo entre os espléndidos musicais Cabaret e All that Jazz, polo que trátase dun filme feito nos anos 70 pero proxectado no cinecluble na década dos 80. Estivo nomeada a 6 Oscars incluidos mellor película, director, actor e actriz principais.

Remataremos o mes o venres 27 co comezo dunha nova etapa colaborativa coa Filmoteca de Galicia. E para comezar a primavera cun sorriso proxectaremos a comedia francesa de 2024 “Tres amigas”, dirixida por Emmanuel Mouret.

Por unha banda este venres día 6 proxectaremos a película chinesa de 2024 Black dog

Trátase dun neowestern ambientado nunha cidade semiderruida e fantasmagórica pola que deambulan xaurías de cans ferais, que foron abandonados cando os que foran seus donos deixaron a súa antiga cidade industrial nos límites do Deserto do Gobi para mudarse ás cidades modernas na nova China.

E a esa cidade fantasmal, case marciana, coma saída dun Mad Max ateigado de cans, é á que retorna o protagonista tras cumprir unha longa pena de prisión nos días previos aos Xogos Olímpicos de Beijing.  Black dog foi considerada como mellor película na sección Un Certain Regard do Festival de Cannes, tamén está nomeada como mellor filme extranxeiro nos premios César e na Seminci acadou os premios de mellor director e mellor fotografía.
 

O mércores 18 será a quenda da coproducción irano-franco-luxemburguesa de 2025 “Un simple accidente”

Escrita e dirixida por Jafar Panahi, saltándose como de costume un dos seus innumerables arrestos domiciliarios. O filme é unha demoledora fábula en clave de thiller dramático sobre o Irán actual e tamén da propia vida do director. 

A cinta resultou gañadora de incontables premios; entre outros alzouse coa Palma de Ouro en Cannes, mellor director polo Círculo de Críticos de New York, mellor guión pola Asociación de Críticos de Los Ángeles e nomeada aos Oscars deste ano como mellor filme internacional e mellor guión orixinal.

Conversas sobre cine, libros, series e cultura audiovisual co Cineclube Ádega, Planeta Mozo, Sara García (@meigaris) e Fiona Lemos.

Abrimos un novo espazo de conversa cultural na Libraría Planeta Mozo (Vilagarcía de Arousa): Planeta Ádega: Órbitas de Cine e Libros, un podcast en directo para falar sen présa de cine, libros, series, adaptacións e cultura audiovisual.

A proposta nace como un diálogo aberto entre páxinas e pantallas, pensado para escoitar, opinar e compartir arredor das historias que nos acompañan.

Participan:

Un membro do Cineclube Ádega (Xavier Marqués)

Un membro de Planeta Mozo (Àlvaro)

Unha bookstagrammer (Sara @meigaris)

The one and only Fiona Lemos

Un diálogo aberto entre páxinas e pantallas, pensado para escoitar, opinar e compartir

Entrada libre ata completar aforo

A estrea na comarca de Decorado e a presenza da súa produtora Chelo Loureiro, recentemente recoñecida coa Medalla ás Belas Artes, marcarán o inicio dun ano de celebración da cultura cinematográfica. 

O evento incluirá a proxección da película que de xeito prácticamente unánime foi considerado o mellor filme de animación español do ano, e un dos mellores da tempada en calquer término, e a presentación dun ano tan especial para o cineclube.

Por outra banda, presentarase a imaxe especial do Cine Clube Ádega para este ano de conmemoración, deseñada polo artista vilagarcián Manuel Chazo.

Intervirán no acto representantes do Cineclube Ádega, a Concellería de Cultura e o alcalde do Concello de Vilagarcía, poñendo en valor o papel fundamental das asociacións culturais na construción dunha cidade viva, crítica e participativa.

Con esta cita, o Cineclube Ádega reafirma o seu compromiso coa difusión do cinema, co  público e coa defensa da cultura como espazo compartido, abrindo un ano que quere ser non só conmemorativo, senón tamén participativo e colectivo.