ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର

ମାଆ ତୁମେ ଆସ - ଅଜୟ କୁମାର ସେଠୀ

2025-10-02T11:41:00.005+05:30

ଅଜୟ କୁମାର ସେଠୀ

ମାଆ ତୁମେ ଆସ ଏ ଧରାଧାମକୁ

ଚଢି ଶରତ ସବାରୀ

ଖେଳୁ ବିଶ୍ଵେ ସ୍ନେହ, ଶାନ୍ତି, ମୈତ୍ରୀ, ପ୍ରୀତି

ମମତାର ରଙ୍ଗ ଧରି ॥

ପ୍ରତି ମଣିଷର ମନେ ଭରିଯାଉ

ଭାଇଚାରାର ଭାବନା

ଜୀବ ପ୍ରତି ଦୟା ପରିବେଶେ ମାୟା

ଘୁଞ୍ଚୁ କୁତ୍ସିତ ଛଳନା ॥

ତୁମେ ଦୟାକଲେ ସୃଷ୍ଟି ସୁନା ହେବ

ହଟିବ ଅମା ଅନ୍ଧାର

ପଙ୍ଗୁ ଲଙ୍ଘେ ଗିରି ମାଆ ବିଶ୍ଵେଶ୍ଵରୀ

ହସିବ ଆମ ସଂସାର ॥

ତୁମରି କରୁଣା କରିବନି ଊଣା

ମାଆ ଜଗତ ଜନନୀ

କୃପା କରୁଥିବ ଜଗତବାସୀଙ୍କୁ

ଘୋଡାଇ ପଣତକାନୀ ॥

ଅଞ୍ଜିରା, ଓହ୍ଲାଣ, ପୁରୀ

ସମ୍ପର୍କ - ୯୯୩୭୧୯୮୮୭୮

VOL.IX, ISSUE.X, OCTOBER-2025

Published By Banamallira Mahak

ଅଯୋଗ୍ୟ ବ୍ୟକ୍ତି - ସନ୍ତୋଷ ପଟ୍ଟନାୟକ

2025-10-02T11:23:00.002+05:30

ସନ୍ତୋଷ ପଟ୍ଟନାୟକ

ହିନ୍ଦୀ କହିଲେ ଦେଶଭକ୍ତ,

ସଂସ୍କୃତ କହିଲେ ଭକ୍ତ,

ଇଂରାଜୀ କହିଲେ ପଣ୍ଡିତ

ଏଇ ଚିନ୍ତାରେ ଅଛନ୍ତି ଥୋକାଏ,

ଅକାଳ କୁଷ୍ମାଣ୍ଡ, ମୂରୁଖ ।

ନ’ଜାଣି ଜନନୀ ସମ୍ମାନ,

ମାତୃଭାଷେ ନ’ରଖି ମନ,

ଶତ ଭାଷେ ବାଣ୍ଟିଲେ ଜ୍ଞାନ ,

ଶିକ୍ଷିତ ବୋଲିକି ପିଟିକି ଢୋଲ

ଅରଜନ୍ତି ଯାହା ଗଣ୍ଡେ ଦୁର୍ନାମ ।

ଶତଭାଷେ ଦେଇ ଯୁକ୍ତି-ପ୍ରତ୍ୟୁକ୍ତି,

ନଥାଏ ମାତୃଭାଷା ପ୍ରୀତି,

ଲକ୍ଷେ ଈଶ୍ଵରେ ଭିଜିଲେ ମତି,

ସମାଜ ପାଇଁ ସେ' ଅଯୋଗ୍ୟ ବ୍ୟକ୍ତି

ହେଇଥାଉ ପଛେ ସୁ'ମତି ଯତି ।

ମାତୃଭାଷା ସିନା ଅସଲ ଜ୍ଞାନ

ତା'ବିନା ଜୀବନ ହତାଶ ସମ

ପୂର୍ବଜଙ୍କ ସିଏ ଶ୍ରୁତି ସୃଜନୀ

ଧିମନ୍ତେ ବିଚାର ଏ'ମୋର ବାଣୀ

ତାକୁ ଛାଡ଼ି କିଏ ହେବ ବା ଜ୍ଞାନୀ !

ବିଦେଶୀ ଭାଷାକୁ ଶିଖିଲେ ଶିଖ

ଆପଣା ଦରବ ଆଦର ଶିଖ

ଭଲ ମନ୍ଦ ସବୁ ନିଜେ ପରଖ

ହିନ୍ଦୀ ଇଂରାଜୀକୁ ମୁରୁଛି ଟିକିଏ

ନିଜ ମାଟି ଭାଷା ମହତ ରଖ ।

ମନରେ ନଥିଲେ ଦେଶର ପ୍ରୀତି,

ଜୀବନଟା ଯିବ ଭିତ୍ତିରେ ବିତି

ମାତୃଭାଷା ହୃଦେ ରଖ ସାଇତି

ଅଭିମାନ ସିଏ ଆମ ସମ୍ପତ୍ତି

ରଖିବା ସଭିଏଁ ତାକୁ ସାଇତି ॥

ତିରିଡା, ବେଗୁନିଆପଡା, ଗଞ୍ଜାମ

ମୋ - ୭୯୮୪୨୫୯୦୮୦

VOL.IX, ISSUE.X, OCTOBER-2025

Published By Banamallira Mahak

ଆମେରିକାରେ ଆମେ ଉତ୍କଳ ବିହଙ୍ଗ - ଚନ୍ଦ୍ରା ମିଶ୍ର

2025-10-01T03:01:00.001+05:30

ଚନ୍ଦ୍ରା ମିଶ୍ର

ଆମ ଘର ସାମ୍ନାରେ ଗୋଟେ ବଡ଼ ମେପଲ୍ ଗଛ ଅଛି l ଶାଖା, ପ୍ରଶାଖା ଆଉ ପତ୍ରରେ ସେ ଗଛ ପରିପୂର୍ଣ୍ଣ ହୋଇଯାଏ ଗ୍ରୀଷ୍ମଋତୁରେ l ସବୁଦିନ ଚାଲିଲା ବେଳେ ଥରେ ଦୁଇଥର ମୁଁ ସେ ଗଛକୁ ଉପରୁ ତଳ ପର୍ଯ୍ୟନ୍ତ ଅନାଏ l ଗଛରେ ପକ୍ଷୀ ସବୁ ବସିବାର ଦେଖେ l ପିଲାଦିନୁ ପକ୍ଷୀମାନଙ୍କୁ ଦେଖଲେ ଭାବେ, ଆହା ମୁଁ ପକ୍ଷୀଟିଏ ହୁଅନ୍ତି କି ତାହାଲେ ଉଡି ପାରନ୍ତି ? ସେମାନଙ୍କର କାକଳୀ ଶୁଣି ଲାଗେ ବୋଧେ ନିଜ ଭିତରେ ସେମାନେ କଥା ହେଉଛନ୍ତି l ଶୀତଋତୁ ଆସିଲେ ସବୁ ପତ୍ର ଝଡ଼ିଯାଏ l ପୋକ ସବୁ (ଯାହା ପକ୍ଷୀ ମାନଙ୍କର ଖାଦ୍ୟ) ମରି ଯାଆନ୍ତି ଥଣ୍ଡା ଯୋଗୁଁ l ତେଣୁ ପକ୍ଷୀମାନଙ୍କ ପାଇଁ ଖାଦ୍ୟ ମିଳିବା ସମ୍ଭବ ହୁଏନି l ଶୀତ ଆସିବା ପୂର୍ବରୁ ସେମାନେ ଏଠାରୁ ଯେଉଁଠାରେ ଉଷ୍ମ ପାଗ ସେଠାକୁ ଉଡି ଯାଆନ୍ତି l ଆମେ ଜାଣିବାରେ ପକ୍ଷୀ ମାନେ ଯେଉଁଆଡେ ଯାଆନ୍ତି, ସେଇଠି ନିଜ ପାଇଁ ବସାଟିଏ ସୁନ୍ଦର ଭାବେ ଗଢନ୍ତି l ନୂଆ ଯାଗାରେ ପରିସ୍ଥିତି ସାଙ୍ଗେ ନିଜକୁ ଆରେଇ ନିଅନ୍ତି l

ହଠାତ୍ ମୁଁ ନିଜକୁ ପକ୍ଷୀଟିଏ ପରି ଭାବିଲି l ପକ୍ଷୀ ପରି ଆମେ (ମୁଁ ଆଉ ଅନେକ ଓଡ଼ିଆ ଲୋକ) ନିଜ ଦେଶ ଓଡିଶା ଛାଡି ସୁଦୂର ବିଦେଶ (ଆମେରିକା) ରେ ରହିଛୁ l ଆମେ ପକ୍ଷୀ ପରି ଖାଦ୍ୟ ପାଇଁ ବା ବାଟ ଭୁଲି ଏଠାକୁ ଆସିନାହୁଁ l ସୁଦୂର ବିଦେଶକୁ ଆମ ଓଡିଶାରୁ ସାଧବ ପୁଅମାନେ ବାଣିଜ୍ୟ ପାଇଁ ବୋଇତରେ ଯିବାର ଇତିହାସ ଅଛି l ଆମ ପରିବାର ଆଉ ପିଲାଙ୍କ ଜୀବନରେ ଅଧିକ ସୁଯୋଗ ଆଣିବା ପାଇଁ ଆମେ ଆମେରିକାକୁ ଆସିଛୁ l ନିତି ଚାଲିଵା ସମୟରେ ମୁଁ ଅନେକ କଥା ଭାବେ l ମୋର ବେଶୀ ମନେପଡେ ମୋ ପିଲାଦିନେ ଆମ ସାହିର ସାଙ୍ଗ ମାନଙ୍କ ସାଙ୍ଗେ କାଟିଥିବା ସମୟ l ଏବେବି ମୋର ପରିସ୍କାର ମନେଅଛି ଶଙ୍ଖଚିଲକୁ ଦେଖି ଆମେ ପିଲାମାନେ ଘରୁ ବାହାରକୁ ନହେଲେ ଛାତ ଉପରକୁ କେମିତି ଦୌଡ଼ି ଯାଉ l ମୁଁ ସବୁବେଳେ ଶଙ୍ଖ ଚିଲର ବଡ଼ ବଡ଼ ଡେଣାକୁ ନିରେଖି ଦେଖେ ଆଉ ତା’ପରି ଖୋଲା ଆକାଶରେ ଉଡିବାକୁ ଚାହୁଁଥିଲି l କିନ୍ତୁ ମୋ ବୁଢ଼ୀ ମା’ର ଡାକ ଶୁଣି ଘର ଭିତରକୁ ତର ତର କିନା ଆମର ଚଉଦଟି ପକା ପାହଚରୁ ଧୀରେ ଧୀରେ ଓଲ୍ହେଇ ଆସେ, ଆଉ ଭାବେ ମୁଁ ବି ଦିନେ ଉଡ଼ନ୍ତି କି ଆକାଶରେ !

ଦିନ ଗଡ଼ିଲା, ମାସ ପୁରିଲା ଆଉ ନୂଆବର୍ଷ ସବୁ ଆସି ଚାଲିଗଲେ l ମୁଁ ବଡ଼ ହୋଇଗଲି ଆମ ପରିବାରର ସୁଖ ଆଉ ଦୁଃଖ ସହିତ l ବାପାଙ୍କ ଦେହ ଭଲ ରହୁ ନଥିଲା ଆଉ ଅନେକ ଦିନରୁ ମୋ ବୋଉ ଆର ଦୁନିଆକୁ ଚାଲି ଯାଇଥିଲା l ବାପା ମୋ ବାହାଘର ସୁଧାଂଶୁ ଙ୍କ ସଂଗେ କରିଦେଲେ l ବାହାଘର ପୂର୍ବରୁ ସୁଧାଂଶୁ ତିନି ବର୍ଷ ଆମେରିକାରେ ରହି ପୋଷ୍ଟଡକ୍ କାମ କରିଥିଲେ l ତାଙ୍କଠାରୁ ମୁଁ ଆମେରିକା ବିଷୟରେ କିଛି କଥା ଶୁଣିଥିଲି l ସୁଧାଂଶୁ ମୁମ୍ବଈରେ ଚାକିରୀ କରୁଥିଲେ l ସେଠି ଆମର ଦୁଇଟି ପିଲା ହୋଇଥିଲେ l ଉଣେଇଶଶହ ସତସ୍ତରୀ ମସିହାରେ ଚାକିରୀ ପାଇଁ ସୁଧାଂଶୁ ଆମେରିକା ଆସିବାକୁ ଠିକ୍ କଲେ l ତାଙ୍କ କହିବାରେ ତାଙ୍କୁ ଚାକିରୀରେ ଅଧିକ ସୁଯୋଗ ମିଳିଵ ଆଉ ପିଲାଙ୍କର ପଢା ବି ଭଲହେବ ଆମେରିକାରେ l ମୁଁ ସେତେବେଳେ ମୁମ୍ବଈରେ ରହିବାରେ ଅଭ୍ୟସ୍ତ ହୋଇ ଯାଇଥିଲି ଯାହା ଆମ ଓଡ଼ିଶାର ରହଣୀ ଅପେକ୍ଷା ଭିନ୍ନ ଥିଲା l ମୁମ୍ବାଇର ଟ୍ରେନ୍, ବସ୍ ରେ ଯାଇ ମାର୍କେଟରୁ ଘର ପାଇଁ ସବୁ ଜିନିଷ କିଣି ଆଣିବା ଅଭ୍ୟାସ ହୋଇ ଯାଇଥିଲା l

ତେଣୁ ମୋ ମନରେ କିଛି ଦ୍ୱନ୍ଦ୍ୱ ଆସିଥିଲା l ମୋର ସାଙ୍ଗ, ନିତି ଦିନର କାର୍ଯ୍ୟ ସବୁକୁ ଛାଡି ଏତେ ଦୁରକୁ ଆସିବାକୁ ଇଛା ନ ଥିଲେ ବି ମୁଁ ନୀରବ ରହିଲି l ସେତେବେଳେ ଇଣ୍ଟରନେଟର ଯୁଗ ନଥିଲା l ମୁଁ ଆମେରିକା ବିଷୟରେ ବେଶି ଜାଣି ନ ଥିଲି l ଯା ହେଉ ମୁଁ ଖୁସିଥିଲି ଯେ ଆମେରିକାକୁ ଆମେ ଉଡ଼ାଜାହାଜରେ ଉଡି ଆସିବୁ ବୋଲି l ମୁଁ କେବେ ଉଡାଜାହାଜରେ ବସି ନ ଥିଲି l ସିନେମାରେ ଉଡ଼ାଜାହାଜର ବାହାର, ଭିତର କେତେଥର ଦେଖିଥିଲି l ଯିବାର ଦିନ ପାଖ ହେବା ସମୟରେ ଭାବୁଥିଲି କୋଉଠି ଆମେ କେମିତି ବସିବୁ ବୋଲି l ସୁଧାଂଶୁ ଆଗରୁ ଆସି କାମରେ ଯୋଗ ଦେଇଥିଲେ l ଛ ମାସ ପରେ ମୁଁ ପିଲାଙ୍କୁ ନେଇ ଏକା ଆସିଥିଲି l ପିଲାଙ୍କର ଡର, କାନ୍ଦକୁ ସମ୍ଭାଳି ବସିବା ଚୌକିର ପଟି ବାନ୍ଧିଲା ପରେ ଉଡ଼ାଜାହାଜରେ ବସିଥିବା ଲୋକମାନଙ୍କୁ ଖାଲି ଦେଖିଲି ଡରରେ l ତେଣୁ ପକ୍ଷୀ ପରି ଉଡିବାର ଭାବକୁ ଆଡେଇ କେମିତି ପିଲାଙ୍କୁ ଧରି ଆମେରିକାରେ ପହଂଚିବି ସେଇ କଥାଟି ମନରେ ବାଟଯାକ ଭାବୁଥିଲି l

ଆମେରିକାରେ ଆସି ସେପ୍ଟମ୍ବର ମାସରେ ଆମେ ପହଁଚିଲୁ l କିଛିଦିନ ପରେ ଏଠି ଶୀତ ଆରମ୍ଭ ହୋଇଗଲା l ପୁରୀ, ମୁମ୍ବଈ ପରି ସମୁଦ୍ରକୂଳ ଜାଗାରୁ ଆସି ଚିକାଗୋର ଶୀତଦିନର ବରଫ ଦେଖି ମୁଁ ପ୍ରଥମେ ଆମ ଦେଶକୁ ମନେ ପକାଇଲି l ପରେ ଭାବିଲି ଆମେରିକାରେ ରହିବା ଆମ ଭାଗ୍ୟରେ ଅଛି l ତେଣୁ ଏଠାକାର ରହିବା ଚଳଣିରେ ଅଭ୍ୟସ୍ତ ହେବା ଠିକ୍ ହେବ l କଥାରେ କହନ୍ତି “ଯେ ଦେଶ ଯାଇ ସେ ଫଳ ଖାଇ” l ତେଣୁ ଏଠାକାର ଚଳଣି, ପାଗ, ଦୋକାନ ବଜାର ସହିତ ନିଜକୁ ବ୍ୟବସ୍ଥିତ କରି ନେବାକୁ ଭାବିନେଲି l ସବୁଠାରୁ ପ୍ରଥମେ ଦେଖିଲି ଏଠି ନିଜର କାମ ସବୁ ନିଜକୁ କରିବାକୁ ହେବ l ଘର କାମ ପାଇଁ ମୁମ୍ବଈ ପରି କେହି ଆସି ସାହାଯ୍ୟ କରିବାର ଭାଗ୍ୟ ନାହିଁ l ଘର କାମ, ବାହାର କାମ, ଘାସ କାଟିବା, ଶୀତଦିନରେ ବରଫ ସଫା କରିବା ଆଉ ନିଜେ ଗାଡି ଚଳାଇ ବାହାରୁ ଘର ପାଇଁ ସଉଦା, ପରିବା ଇତ୍ୟାଦି ଆଣିବା ସବୁ କାମ ନିଜକୁ ହିଁ କରିବାକୁ ହେବ l ମୁଁ ଆଗ ଗାଡି ଚଲେଇବା ଶିଖିଲି କାରଣ ପିଲା ଦୁହିଁଙ୍କୁ ପାଠାଗାର ବା ସ୍କୁଲକୁ ନେବା ପାଇଁ ଗାଡି ଚଲାଇବା ଦରକାର ଥିଲା l

ଆମେ ଚିକାଗୋର ଉପନଗରରେ ରହୁଥିଲୁ l ତେଣୁ ସେ ଜାଗାରେ ବସ୍ ରେ ଯିବା ଆସିବାର ସୁବିଧା ନ ଥିଲା l ମତେ ଭାରି ଏକୁଟିଆ ଲାଗୁଥିଲା ସେଠାରେ l ମୋର ସବୁବେଳେ ସାଙ୍ଗମାନଙ୍କ ଆଉ ଘର କଥା ମନେ ପଡୁଥିଲା, ପିଲାମାନେ ସ୍କୁଲକୁ ଗଲାପରେ l ଆମ ଆଡ଼ ପରି ପାଖ, ପଡିଶା ଲୋକଙ୍କ ସାଙ୍ଗେ ମିଶି କଥା ହେବାର ସୁବିଧା ନଥିଲା l ଏଠାରେ ସ୍ତ୍ରୀ ଲୋକମାନେ ସମସ୍ତେ ନିଜ କାମରେ ବ୍ୟସ୍ତ ରହନ୍ତି ବା କାମକୁ ଯିବାର ଜାଣିଲି l ତେଣୁ ଗପ କରି ସମୟ କଟେଇବା ହେବନି ବୋଲି ଜାଣିଗଲି କିଛିଦିନ ଏଠାରେ ରହିବା ସମୟ ଭିତରେ l କିଛିଦିନ ପରେ ଆମ ମେଲବକ୍ସରେ ଯୋଡିଏ ମୋଟା, ମୋଟା ହଳଦିଆ ବହି ଆସି ପହଁଚିଲା l ଦିନ ସାରା ସେ ବହି ଯୋଡିକୁ ପୃଷ୍ଠା ପରେ ପୃଷ୍ଠା ହାତରେ ଧରି ଦେଖିଲି l ଜାଣିଲି ସେଇଟା ଏଠିକାର ଫୋନ୍ ବହି ଯେଉଁଥିରେ ସମସ୍ତଙ୍କର ଫୋନ ନମ୍ବର ଆଉ ଠିକଣା ଲେଖାଥିଲା l ମୁଁ ପଢିବାକୁ ଲାଗିଲି ସମସ୍ତଙ୍କ ନାଁ, ଆଉ ଦେଖିଲି ମିଶ୍ର ପଙ୍କଜ, ସାହୁ ରାମ ଶରଣ, ମହାନ୍ତି ଦିଲ୍ଲୀପ, ଦାଶ ପ୍ରଦୀପ୍ତ, ସାମଲ କରୁଣାନିଧି ଇତ୍ୟାଦି ଭାରତୀୟ ଆଉ ଓଡ଼ିଆ ନାଁ ସବୁ ଲେଖା ହୋଇଛି l ଭାବିଲି ସନ୍ଧ୍ୟାବେଳେ କିଛି ଓଡ଼ିଆ ଲୋକଙ୍କୁ ଡାକି କହିବି ଆମେ ଏଠାରେ ନୁଆ ବୋଲି l ସେମାନଙ୍କ ଠାରୁ କିଛି ପରାମର୍ଶ ମିଳିପାରେ ଏଠି କେମିତି ସମୟ କାଟିବାକୁ l ସଂନ୍ଧ୍ୟା ବେଳେ ସୁଧାଂଶୁ କାମରୁ ଆସିଲା ପରେ ତାଙ୍କୁ ମୋର ମନକଥା କହିଲି l ମୋ କଥା ଶୁଣି ସିଏ କହିଲେ ଭଲ କଥା କିନ୍ତୁ ଦେଖିବୁ, ସେମାନେ କୋଉ ସହରରେ ରହନ୍ତି ? ଖୋଜି ଖୋଜି କିଛି ଲୋକ ଆମ ସହର ପାଖରେ ରହୁଥିବାର ଜାଣିଲି l ସେ ନାଁ ଗୁଡିକୁ ହାଇଲାଇଟ୍ କରି ଗୋଟିକ ପରେ ଗୋଟିଏ ଲୋକଙ୍କୁ ବିଭିନ୍ନ ସମୟରେ ଫୋନ୍ ରେ ଡାକିଲି l କେତେ ଜଣ ଲୋକ ଆମ ପୁରୀ ଆଉ କଟକର ଥିଲେ l ସେଇ ଲୋକଙ୍କ ଭିତରୁ ସୁଧାଂଶୁଙ୍କର ଜଣେ ସାଙ୍ଗ ଆଉ ମୋର ଜଣେ ଦୂରରେ ଥିବା ବନ୍ଧୁ ବାନ୍ଧବର ଲୋକଙ୍କୁ ଜାଣିଲି l ଆମକୁ ସେମାନେ କହିଲେ ତାଙ୍କ ସଂଗେ ଶନିବାର, ଆଉ ରବିବାର ଛୁଟିଦିନରେ ଏକାଠି ହେବାକୁ l ମୁଁ ଖୁସି ହେଲି ଯେ, କିଛି ଲୋକଙ୍କ ସାଙ୍ଗେ ମିଶିବାକୁ ସୁବିଧା ମିଳିବ l

କିଛି ମାସ ଭିନ୍ନ ଭିନ୍ନ ଲୋକଙ୍କ ଘରେ ମିଶି ଖାଇବା, ପିଇବା କରି ସମୟ ଭଲରେ କଟିଲା l ଏହା ଭିତରେ ଥାଙ୍କସ୍ ଗିଭିଂଗ ଆଉ ବଡ଼ଦିନ ଛୁଟି ଆସିଲା l ସେତେବେଳେ ଆମ ସହର ଆଉ ଆଖ ପାଖରେ ମିଶି ବାରଟି ପରିବାର କୋଡିଏ ମାଇଲ ଭିତରେ ଥିଲୁ l ଭାବିଲୁ ଆମେ ଆମର ଗଣେଶ ଆଉ ସରସ୍ଵତୀ ପୂଜା ମିଶି କରିବାକୁ l ତାହାଲେ ପିଲାମାନେ ଜାଣିବେ ଆମ ଦିଅଁ ଆଉ ପର୍ବ ବିଷୟରେ l କେତେ ଥର ପାଳି କରି ଜଣ ଜଣଙ୍କ ଘରେ ପୂଜା କଲୁ l କିନ୍ତୁ ବେଶି ଲୋକ ହେବାରୁ ଭାବିଲୁ ଏଠାରେ ଥିବା ହିନ୍ଦୁ ମନ୍ଦିର ମାନଙ୍କରେ ଗୋଟେ ଦିନ ଭଡା ନେଇ କୁମାର ପୁର୍ଣିମା, ଗଣେଶ ପୂଜା, ହୋଲି, ଆଉ ସରସ୍ଵତୀ ପୂଜା କରିବାକୁ l ଭାବିଲୁ ମନ୍ଦିରରେ ପୂଜା ପାଳନ କଲେ ଅନ୍ୟମାନେ ଆମ ପର୍ବ ବିଷୟରେ ଜାଣିବେ l ପିଲାମାନେ ନାଚ ଗୀତ, ଡ୍ରାମା, ଚିତ୍ରାଙ୍କନ ଇତ୍ୟାଦି କରି ପାରିବେ l ଆମ ଓଡିଶା ରେ ପର୍ବ ଗୁଡିକ ଟିକିଏ ଭିନ୍ନ ପ୍ରକାରରେ ପାଳନ ହୁଏ l ଆମେ ଓଡ଼ିଆ ଖାଦ୍ୟ ବି ଘରେ ରୋଷେଇ କରି ପୂଜାକୁ ନେଉଥିଲୁ l ଆମେରିକାରେ ଥିବା ଅନ୍ୟ ଭାରତୀୟ ମାନେ ଯେଉଁମାନେ ମନ୍ଦିରକୁ ଆସୁଥିଲେ ସେମାନେ ବି ପ୍ରସାଦ ଖାଉଥିଲେ ଆମେ ନେଇଥିବା ଖାଦ୍ୟରୁ l ସମସ୍ତେ ଖୁସିରେ ଆମ ଖାଦ୍ୟର ପ୍ରଶଂଶା କରୁଥିଲେ l ଓଡିଶା ସ୍ତ୍ରୀ ମାନଙ୍କର ସମ୍ବଲପୁରୀ ଶାଢ଼ୀ ଆଉ ସମ୍ବଲପୁରୀ କନାରେ ତିଆରି ପୁରୁଷ ମାନଙ୍କର ପୋଷାକକୁ ବି ସମସ୍ତଙ୍କୁ ପସନ୍ଦ ଆସୁଥିଲା l ଲୋକ ମାନଙ୍କର ଆଗ୍ରହ ଦେଖି କେତେ ଓଡ଼ିଆ ଲୋକ ଟେବୁଲଟିଏ ରଖି ତା ଉପରେ ଶାଢ଼ୀ, ତାରକସି କାମର ରୂପ ଗହଣା, ପଟ୍ଟଚିତ୍ର ଇତ୍ୟାଦି ଓଡ଼ିଶାର ହସ୍ତକଳା ଜିନିଷ ବିକ୍ରୀ କରିବାକୁ ଆରମ୍ଭ କଲେ ମନ୍ଦିରରେ l ପରେ ଓଡ଼ିଆ ମାନେ ମିଶି ଜଗନ୍ନାଥ, ବଳଭଦ୍ର ଆଉ ସୁଭଦ୍ରା ମାଙ୍କ ମୂର୍ତ୍ତି ମନ୍ଦିରରେ ରଖିବାର ବ୍ୟବସ୍ଥା କଲେ ଓ ନିୟମିତ ଭାବେ ପ୍ରଭୁଙ୍କ ପୂଜା ଆରମ୍ଭ ହେଲା l

ଧୀରେ ଧୀରେ ଅନ୍ୟ ସହରରେ ଓଡ଼ିଆ ମାନେ ମିଶି ଜଗନ୍ନାଥଙ୍କ ପୂଜା ଆରମ୍ଭ କଲେ ସେଠାରେ ଥିବା ହିନ୍ଦୁ ମନ୍ଦିରରେ l ଜୁଲାଇ ମାସରେ ଜଗନ୍ନାଥଙ୍କର ରଥ ଯାତ୍ରା ମନ୍ଦିର ବାହାରେ କରିବା ବି ଆରମ୍ଭ କରାହେଉଛି l ପ୍ରଥମେ ନେଶଭିଲ୍ ରେ ଜଗନ୍ନାଥ, ବଳଭଦ୍ର, ସୁଭଦ୍ରାଙ୍କ ମୂର୍ତ୍ତି ସ୍ଥାପନ ହୋଇଥିଲା l ସେଠାରେ ରଥଯାତ୍ରା ଅତି ସୁନ୍ଦର ଭାବେ ପ୍ରଥମେ ଆରମ୍ଭ ହୋଇଥିଲା l ରଥଟଣାରେ କେବଳ ଓଡ଼ିଆ ଲୋକ ନୁହଁନ୍ତି, ଆମେରିକାର ସବୁ ଲୋକମାନେ ଯୋଗ ଦିଅନ୍ତି l ଲୋକ ମାନେ ରଥକୁ କିଛି ବାଟ ଟାଣି ନିଅନ୍ତି ଦଉଡ଼ି ଦ୍ୱାରା l ଖରାଦିନରେ ସମସ୍ତେ ବାହାରେ ରଥଯାତ୍ରାକୁ ବହୁତ ଉପଭୋଗ କରନ୍ତି l ଖରାରେ ରଥଟଣା ପରେ ଆମ ପୁରୀର ଟଂକ ତୋରାଣି ପରି ଲୁଣିଆ ପତଳା ଦହିର ଲସି ପିଅନ୍ତି ଆଉ ସାନ ଠାରୁ ବଡ଼ ପର୍ଯ୍ୟନ୍ତ ସବୁ ଲୋକମାନେ "ଜୟ ଜଗନ୍ନାଥ" କହି ରଥ ଚାରିପଟେ ଘେରି ରହନ୍ତି l ଆମ ସଂସ୍କୃତି ଅନୁସାରେ ଏବେ ଓଡିଶୀ ନାଚ ହୁଏ ରଥଟଣା ପରେ l ଓଡିଶୀ ଗୀତ ବି ବୋଲା ହୁଏ ରଥଯାତ୍ରାରେ l ଓଡିଶୀ ନାଚର ପ୍ରସାର ଏବେ ବହୁତ ହେଲାଣି l ଅନେକ ଲୋକ ବାହାରୁ ନାଚ, ଗୀତ ଦେଖିବା ପାଇଁ ଆସୁଛନ୍ତି l ବିଭିନ୍ନ ଜାଗାରେ ନାଚ, ଗୀତ ପାଇଁ ସ୍କୁଲ ଏବେ ହେଲାଣି l ବର୍ତ୍ତମାନ ବାରଟି ମନ୍ଦିରରେ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ମୂର୍ତ୍ତି ପୂଜା ପାଉଛନ୍ତି l ଆମେରିକାରେ ଲୋକମାନେ ଜାଣୁଛନ୍ତି ଆମ ଓଡିଶା ନାଚ, ଗୀତ, ଭାସ୍କର ବିଦ୍ୟାରେ କେତେ ଉନ୍ନତ l ସାରା ଆମେରିକାରେ ଲୋକମାନେ ଜାଣିଲେଣି ଆମେ କେବଳ ଉଚ୍ଚଶିକ୍ଷା ଆଉ କାମ ପାଇଁ ନୁହେଁ ବିଭିନ୍ନ କଳାରେ ନିପୁଣ ଆଉ ଅନବରତ ଏଠିକାର ସମାଜର ବିକାଶରେ ଅଂଶଦାନ କରୁଛୁ l ବିଭିନ୍ନ ସ୍କୁଲ, କଲେଜରେ ପିଲାମାନେ ଓଡିଶୀ ନାଚ ଆଉ ଗୀତର କାର୍ଯ୍ୟକ୍ରମ କରି ଲୋକ ମାନଙ୍କୁ ଆମ କଳା ବିଷୟରେ ଅଵଗତ କରାଉଛନ୍ତି l ଖୁସି ଆଉ ଗର୍ବର ବିଷୟ ଆମେରିକାରେ ଥିବା ଭାରତୀୟ ଆଉ ଅନ୍ୟଦେଶର ଲୋକମାନେ ଏବେ ଆମ କଳା, ସାହିତ୍ୟ ଓ ସଂଗୀତ ବିଷୟରେ ଜାଣିଲେଣି l ଏବେ ଜଗନ୍ନାଥଙ୍କ ପାଇଁ ସ୍ୱତନ୍ତ୍ର ମନ୍ଦିର ତିଆରି କରିବା ପାଇଁ ସବୁ ଓଡ଼ିଆମାନେ ଲାଗି ପଡିଛନ୍ତି l

ଆମେରିକାକୁ ପ୍ରଥମେ ଆସିଥିବା ବୟସ୍କ ଲୋକ ମାନେ ମିଶି ଓଷା (ଓଡିଶା ସୋସାଇଟି ଅଫ ଆମେରିକା) ସଂଗଠନ ଉଣେଇଶଶହ ଏକାଅଶୀ ମସିହାରେ ଗଢ଼ିଛନ୍ତି l ଓଷା ସଂଗଠନ ଓଡିଶା ଆଉ ଆମେରିକାର ଅନେକ ବିଭାଗରେ ଉନ୍ନତି ଆଣୁଛନ୍ତି l ପ୍ରତିବର୍ଷ ଜୁଲାଇ ମାସରେ ଗୋଟିଏ ସହରରେ ଓଷାର ବାର୍ଷିକ ସମ୍ମିଳନୀ ହେଉଛି l ସେଠାରେ ତିନି ଦିନ କାଳ ଅନେକ ଓଡ଼ିଆ ଏକାଠି ହୋଇ ଆମର କଳା, ସାହିତ୍ୟ, ବିଜ୍ଞାନ ଇତ୍ୟାଦି ଵିସୟରେ ଆଲୋଚନା କରନ୍ତି l ଉପସ୍ଥିତ ଓଡ଼ିଆମାନେ ପରସ୍ପର ଭିତରେ ଥିବା ବନ୍ଧୁତାକୁ ଦୃଢ଼ କରନ୍ତି ଆଉ ନୂଆ ଲୋକ ମାନଙ୍କୁ ସ୍ୱାଗତ କରନ୍ତି l ଛୋଟ ଛୋଟ ନାଟକ ମାଧ୍ୟମରେ ଆମ ପରମ୍ପରା, ସଂସ୍କୃତିକୁ ଆମଭିତରେ ଦୋହରାଇ ଦିଅନ୍ତି l ଏଠାରେ ଥିବା ପ୍ରତିଭାଶାଳୀ ଓଡ଼ଆ ମାନେ ତାଙ୍କର ପ୍ରତିଭା ଷ୍ଟେଜ୍ ରେ ଉପସ୍ଥିତ କରିପାରନ୍ତି l ବାହାରେ ରହି ଓଡ଼ିଆ ମାନେ ଆମେରିକା ସମାଜର ଧନ, ସମାଜର ଉନ୍ନତି ପାଇଁ ସାହାଯ୍ୟ କରିବା ସାଙ୍ଗରେ ଓଡ଼ିଶାରେ ସ୍କୁଲ, କଲେଜ, ହସ୍ପିଟାଲ ଗଢିବା, ଡାକ୍ତର, ନର୍ସ, ଶିକ୍ଷକ ମାନଙ୍କ ପାଇଁ ଉଚ୍ଚଶିକ୍ଷା ପାଇଁ ସୁବିଧା କରିବାରେ ସାହାଯ୍ୟ କରୁଛନ୍ତି l ଓଡ଼ିଶାରେ ଆଧୁନିକ ପାଠାଗାର ମାନଙ୍କର ସୁବିଧା ପାଇଁ କାର୍ଯ୍ୟ ଚାଲିଛି l ଯେତେବେଳେ ଓଡ଼ିଶାରେ ଆକସ୍ମିକ (ଫନି, ସୁନାମି, କୋଭିଡ଼ ବା ବନ୍ୟା) ଆସିଛି ସେତେବେଳେ ଓଷା ସଙ୍ଗଠନ ଆଉ ଏଠାକାର ଓଡ଼ିଆ ମାନେ ଆର୍ଥିକ ଆଉ ଅନ୍ୟ ସାହାଯ୍ୟର ହାତ ବଢ଼ାଇଛନ୍ତି l

ଏବେ ଏଠାରେ ଓଡ଼ିଆ ଭାଷାର ବିସ୍ତାର ପାଇଁ ପିଲା ମାନଙ୍କୁ ଓଡ଼ିଆ ଶିକ୍ଷା ଦିଆ ଯାଉଛି l ମୁଁ ବିଦେଶରେ ରହିଲେବି ଏଠାରେ ଅନେକ ସୁବିଧା ଓଡ଼ିଶାରେ ଥିଲା ପରି ପାଉଥିବାରୁ ନିଜକୁ ସୌଭାଗ୍ୟବତୀ ବୋଲି ଭାବୁଚି l ନୂଆ ଆସିଲା ବେଳେ ମୁଁ ବରଫକୁ ଦେଖି ଡ଼ରୁଥିଲି ଆଉ ସବୁବେଳେ ଓଡିଶାରେ ଥାଆନ୍ତି କି ବୋଲି ଭାବୁଥିଲି l ଏବେ ମୁଁ ଏଠିକାର ଚଳଣୀ, ଖାଦ୍ୟ, ସଂସ୍କୃତି ସାଙ୍ଗେ ନିଜକୁ ବ୍ୟବସ୍ଥିତ କରି ନେଇଛି l ଆମ ପାଖରେ ଥିବା ଲୋକଙ୍କ ସଂଗେ ମିଶି ତାଙ୍କୁ ଆମର ଖାଦ୍ୟ, ସଂସ୍କୃତି ସହିତ ପରିଚିତ କରାଉଛି l ମୋ ଠିକଣା ଏବେ ବିଦେଶରେ କିନ୍ତୁ ହୃଦୟରେ ବଂଚିଛି ମୋ ଦେଶର ବାସ୍ନା, ରୀତି, ନୀତି ଆଉ ମୋ ମାଟିର ବାସ୍ନା l ବିହଙ୍ଗ ପରି ଆମେ ଓଡିଶାରୁ ଉଡି ଆସି ଉତ୍କଳର ସଂସ୍କାର, ସଂସ୍କୃତିର ପର ଝାଡି ଦେଇ ଚାଲିଛୁ ଆମେରିକାରେ ବିଭିନ୍ନ ଯାଗା ଆଉ ଅନେକ ଲୋକଙ୍କ ଭିତରେ l

ଫିଲାଡେଲ୍ଫିଆ, ଯୁକ୍ତରାଷ୍ଟ୍ର ଆମେରିକା

ଦୂରଭାଷ - +୧୨୬୭୨୪୭୨୪୭୧

VOL.IX, ISSUE.X, OCTOBER-2025

Published By Banamallira Mahak

ଗଡ଼ିଆ - ଡଃ ନୀଳମାଧବ କର

2025-10-01T02:40:00.006+05:30

ଡକ୍ଟର ନୀଳମାଧବ କର

ଗଡ଼ିଆରେ ଉବୁଟୁବୁ

ମାଛ, କଙ୍କଡ଼ା, ଗେଣ୍ଡା, ସାପ, ବେଙ୍ଗ ସହ

ଗୋଳିଆ ପାଣିରେ

କାଦୁଅ, ପଙ୍କ ନେସି ହେଇ ଦେହସାରା ।

ତା’ ଭିତରେ ବାକବିତଣ୍ଡା, ଗଣ୍ଡଗୋଳ

ପାଟିମୁଣ୍ଡ, ଫଟାଫଟି, ରଗାରଗି

ଜୀବନ ସେମିତି ବୋଲି

ଧରିନେବା ହିଁ ଭୁଲ ।

ବଦଳେଇ ହେବ ସେ ଜୀବନ

ସେ ସୁଯୋଗ, ଉପାୟ ଅଛି

ଜାଣିଥିଲେ ହେଲା

ଚାହିଁଲେ ହେଲା ।

ଗୋଡ଼ ହାତ ଧୋଇ

ସଫା ସୁତୁରା

ନିରୋଳାରେ, ଆଶ୍ଵସ୍ତରେ

ନିଶ୍ୱାସ ନେବାକୁ ଇଚ୍ଛା ?

ଗଡ଼ିଆ ଧାରରେ ବସି

ଥିରି ଥିରି ପବନରେ

ଚହଲୁଥିବା ପାଣିରେ

କଇଁର ଛବି ଦେଖିବାକୁ ଇଚ୍ଛା ?

ସମ୍ଭବ, ସବୁ ସମ୍ଭବ

ନିଜ ନିଷ୍ପତ୍ତି ଭିତ୍ତିରେ, ଇଚ୍ଛାଧୀନ

ଜୀଇଁ ହେବ ନିଜ ଜୀବନ

ବାହାରି ଆସିହେବ ଗଡ଼ିଆରୁ ।

ଖାପ ଖୁଏଇ ହେବ, ପରିସ୍ଥିତିରେ,

ବୁଝିହେବ, ବଦଳେଇ ହେବ ନିଜକୁ,

ଘୁଞ୍ଚେଇ ହେବନି ସମୟ କି ଚିତ୍ରପଟ

ନିଜ ଇଚ୍ଛାମତେ ବଦଳେଇ ହେବନି ଅନ୍ୟକୁ ।

ଫେରିବା ନିଶ୍ଚିତ ଜାଣି,

ଦି ଦିନର ଯାତ୍ରୀ ପାଇଁ

ଏ ସୃଷ୍ଟିକୁ ଆବୋରିବା,

ଏ ଗଡ଼ିଆରେ ଘାଣ୍ଟି ହେବା ନିରର୍ଥକ ।

ନିରପେକ୍ଷ ଉଦାସୀନତାରେ

ଅତିଥି ପରି, ଦେଖଣାହାରୀର ଭାବନେଇ

ନିରୁତା, ନିଛକ ସତ୍ୟକୁ ଜାବୋଡ଼ି

ଅସଂଲଗ୍ନ ରହିହେବ ।

ଆବହମାନ, ପରିବର୍ତ୍ତନଶୀଳ

ଏ କୋଳାହଳ, ଏ ରୀତିନୀତି

ଭିତରେ ବି ନୀରବ ରହିହେବ

ଉପଭୋଗ କରିହେବ ନାଟକ ।

କନସଲଟାଣ୍ଟ ସାଇକିଆଟ୍ରିଷ୍ଟ

ଅନରାରୀ ପ୍ରଫେସର, ଓଲଭରହାମ୍ପଟନ ୟୁନିଭରସିଟି

ଓଲଭରହାମ୍ପଟନ, ୟୁନାଇଟେଡ କିଙ୍ଗଡମ

VOL.IX, ISSUE.X, OCTOBER-2025

Published By Banamallira Mahak

ଦେବୀ - ମୀନାକ୍ଷି ପାଢ଼ୀ

2025-10-01T02:28:00.001+05:30

ମୀନାକ୍ଷି ପାଢୀ

ଶାରଦୀୟ ଶୁଭ୍ରାକାଶେ

ଶାନ୍ତ ଘନ କୁନ୍ତଳା ଗୋ,

ଶକ୍ତି ସ୍ଵରୂପିଣୀ ଦୁର୍ଗେ

ଶାରଦେ, ଅମ୍ବିକେ ଜାଗ ।

ରକ୍ତଜବା ଚକ୍ଷୁମୟୀ

ରଞ୍ଜିତ କଳା କଜ୍ଜଳେ,

ରୁଦ୍ର ପ୍ରିୟା ରମ୍ୟା ଦୁର୍ଗେ

ରାକା ରାତ୍ରି ସମୁଜ୍ଜଳେ ।

ମଧୁର ଅଧର ହାସ୍ୟ

ମନ୍ମୟୀ ଗୋ ଯଶସ୍ଵିନୀ,

ମମ ହୃଦେ ସ୍ଥିତା ଦୁର୍ଗେ

ଘୋର ତମସା ନାଶିନୀ ।

ଦଶଭୂଜା ମୃଣ୍ମୟୀ ଗୋ

ଦୁଷ୍ଟ, ଦୁଃଖ ନିବାରିଣୀ,

ଦଶ ଦିଶା ବିହାରିଣୀ

ଦୈତ୍ୟ ମହିଷା ନାଶିନୀ ।

ସୁରସା, ସୁବକ୍ଷା, ପ୍ରେମା,

ସୁଢ଼ଳା ମନ ମୋହିନୀ,

ସୁଭିକ୍ଷା ଦାୟିନୀ ଦୁର୍ଗେ

ସ୍ଥିତପ୍ରଜ୍ଞା ସୁକାମିନୀ ।

ମହାମାୟା ଅଗ୍ନି ସ୍ଵରୂପିଣୀ

ମାତା ମଧୁମୟୀ,

ମହିଷାମର୍ଦ୍ଦିନୀ ଦେବୀ

ମାହେଶ୍ଵରୀ ସଦା ଧ୍ୟାୟୀ ।

ଶିକ୍ଷୟିତ୍ରୀ, ଚିକିଟୀ ପେଣ୍ଠ, ଗଞ୍ଜାମ

ମୋ - ୯୭୭୬୫୪୫୦୦୧

VOL.IX, ISSUE.X, OCTOBER-2025

Published By Banamallira Mahak

ପ୍ରବାସ ମାଟିରେ - ସ୍ଵର୍ଣ୍ଣଲତା ପତି

2025-10-01T02:14:00.001+05:30

ସ୍ଵର୍ଣ୍ଣଲତା ପତି

ତେର ନଈ ସାତ ଦରିଆ ସେପାରେ

ବୁଝନ୍ତା କିପରି ମାଆର ମନ,

ଧରିତ୍ରୀ ମାତାର ବିଚିତ୍ର ବୁକୁରେ

ପ୍ରବାସେ ସମର୍ପି ଆପଣା ଜନ ॥

ଭୂମିରେ ସାଗର ବିଶାଳ ଗଭୀର

ଆକାଶ ମଧ୍ୟରେ ଘନସାଗର,

ତନ୍ମଧ୍ୟରେ ଚଳେ ବ୍ୟୋମ ବିମାନଟି

ମନ ଚଳୁଥାଏ ତହୁଁ ପ୍ରଖର ॥

ବିଦେଶ ମାଟିରେ ଥାପିଦେଲେ ପାଦ

ତନୁମନେ ଜାଗିଉଠେ ପୁଲକ,

ସ୍ଥାବର ଜଙ୍ଗମ ତରୁ ପୁଷ୍ପ ତୃଣ

ନବ ସମୀରଣ ନବ ଆଲୋକ ॥

ଆଖି ମୁଦିଦେଇ ଖୋଲିବା ବେଳକୁ

ଓଲଟି ଯାଏକି ସମ୍ପୂର୍ଣ୍ଣ ଧରା,

ହେମାଳ ପବନ ଆଣେ ଶିହରଣ

ଗ୍ରୀଷମ ବରଷା ନ ଦିଏ ଧରା ॥

ପ୍ରିୟଜନେ ମିଳି ସ୍ନେହ ପ୍ରେମଗୋଳି

ସନ୍ତାପିତ ପ୍ରାଣ ହେଲା ଶୀତଳ,

ଦିନ ମାସ ଋତୁ ସୂର୍ଯ୍ୟ ଚନ୍ଦ୍ର ତାରା

ନିରେଖଇ ବସି ସଞ୍ଜ ସକାଳ ॥

କୁହେଳିକାମୁକ୍ତ ତପନ କିରଣ

ବିଞ୍ଚି ହୋଇଯାଏ ଧରଣୀ ଗାତ୍ରେ,

ସରିତ ସରସୀ ରଜତର କାନ୍ତି

ଭ୍ରମରେ ଧାମନ୍ତି ପୁଷ୍ପରୁ ପତ୍ରେ ॥

ଭ୍ରାନ୍ତ ମାନବର ପାର୍ଥିବ ଆଶାକୁ

ଅନନ୍ତ ଜୀବନ ଭ୍ରାନ୍ତିକୁ ଘେନି,

ସୃଷ୍ଟି ରହସ୍ୟର ଗାମ୍ଭୀର୍ଯ୍ୟକୁ ଘେନି

ଉଜ୍ଜ୍ୱଳ ଦିବସ ତମୋ ରଜନୀ ॥

ସନ୍ଧ୍ୟା ଆଗମନେ ଶିଶିରସିକ୍ତ ଯେ

ପ୍ରକୃତି ଶୋଭାର ନାହିଁ ଉପମା,

ସୀତାଂଶୁର ଅଂଶୁମାଳା ବକ୍ଷେ ଶୋହେ

ଜଗତ ବ୍ୟାପିନୀ ଶୁଭ୍ର ସୁଷମା ॥

ଚିର ହରିତର ବହଳ ଶାଖାରେ

କ୍ଷୁଦ୍ର ପକ୍ଷୀଙ୍କର କଳ କୂଜନ,

ନାହିଁ ତିନିଗାର ଦୀର୍ଘ ଗୁଣ୍ଡୁଚିର

ବିଚିତ୍ର ଲାଗଇ କାଉର ସ୍ଵନ ॥

ଚେରି ବେରି କୋଳି ପଥଧାରେ ମିଳି

ବିଞ୍ଚି ପଡ଼ିଅଛି ଅମୃତ ଫଳ,

ଭ୍ରମନ୍ତି ନାହିଁ ତ ପାଳିତ ପଶୁଏ

ଭକ୍ଷି ଉଡ଼ୁଥାନ୍ତି ବିହଙ୍ଗକୁଳ ॥

କ୍ଷଣେ ଭ୍ରମୁଥାଏ ଅନ୍ଧାରୁ ଆଲୋକ

ସ୍ରଷ୍ଟାଙ୍କର ସୃଷ୍ଟି ବିଚିତ୍ର ଧରା,

ଦେଶେ ବା ବିଦେଶେ ପ୍ରମାଦେ ପ୍ରବାସେ

ପ୍ରଭୁ ସାହା ଥିବେ ସରବେ ପରା ॥

ଉତ୍ତରା ଶାସନ, କୌଶଲ୍ୟା ଗଙ୍ଗ, ପିପିଲି, ପୁରୀ

Now staying at - Washington, USA

VOL.IX, ISSUE.X, OCTOBER-2025

Published By Banamallira Mahak

ଆସ ବାମଦେବ ବାମା - ପ୍ରଫୁଲ୍ଲ ଚନ୍ଦ୍ର ମିଶ୍ର

2025-10-01T01:59:00.002+05:30

ପ୍ରଫୁଲ୍ଲ ଚନ୍ଦ୍ର ମିଶ୍ର

ଶରତ ମରତ ଭୁଇଁରେ ଆଗତ ସ୍ଵାଗତ ମଙ୍ଗଳ ସଙ୍ଗୀତ

ପାର୍ବଣ ଲଗନେ ସରବେ ମଗନେ ଗାଉଛନ୍ତି ହୋଇ ମୋହିତ

ସବୁଜ ‌ବରଣା ଧରଣୀ

ଦିଶଇ ସୁନ୍ଦର ରମ୍ୟ ମନୋହର ଆସିବେ ତ ଦେବୀ ଭବାନୀ ।।

ପ୍ରଭାତୀ ଆକାଶେ ନବୀନ ତରୁଣ ଅରୁଣ ଶୀତଳ ପରଶ

ଶୁଭ୍ର ଜ୍ୟୋତି କର ହରସେ ପରସେ ପ୍ରକୃତି ବିନୋଦ ବିଳାସ

କାଶତଣ୍ତି ଶୁକ୍ଳ ଚାମର

ଅନୀଳ ଚଞ୍ଚଳ ଦୋଳାରେ ଦୋଳିତ ଆସିଛି ଶରତ ସକାଳ ।।

ଶୁଭ୍ରାଂଶୁ ଶରତେ ରଜତ ଜୋଛନା ବିଛାଇ ଶିଶିର ମୁକୁତା

ଯିବା ପରେ ରବି ରଶ୍ମୀ ପରଶରେ ମଣିମୟ ହାର ମଣ୍ଡିତା

କାଶ୍ୟପୀ ମଞ୍ଜୁଳ ବେଦୀରେ

ହୈମବତୀ ସତୀ ମଣ୍ଡିବେ ଧରିତ୍ରୀ ସାଜାଇଛି ଚିତ୍ର ଶୃଙ୍ଗାରେ ।।

ଗଙ୍ଗଶିଉଳିର କୋମଳ ଗାଲିଚା ବିଛାଇ ଚାହିଁଛି ଅଵନୀ

ହୈମବତୀ ସତୀ ଅପର୍ଣ୍ଣା ଆସନ୍ତି ସୌରଭ ପୁରିତ ମେଦିନୀ

ଅନୀତି ଦୁର୍ନୀତି ଅସୁର

ସଂହାର କରିବାପାଇଁ ମହାଦେବୀ ହେଇ ହୋଇଲେଣି ବାହାର ।।

ବିବିଧ ବାଜଣା ତୁରୀ ମହୁରୀର ଅମୀୟ ସ୍ଵରରେ ଧରଣୀ

ହର୍ଷୋତ୍ଫୁଲ୍ଲ ଉଲ୍ଲାସରେ ବିମୋହିତ ଆସୁଛନ୍ତି ବୋଲି ଭବାନୀ

ବରଦ ହସ୍ତକୁ ପ୍ରସାରି

ଆସ ମହାଦେବୀ ଦୁଃଖ ଦୈନ୍ୟ ରୂପି ବିକଟ ରାକ୍ଷସ ସଂହାରି ।।

ଘୋର ସିଂହ ପୃଷ୍ଠେ ବସି ମହାମାୟା ଆସ ଦେବୀ ଭଗବତୀ

ବିଚିତ୍ର ତୋରଣ ରତ୍ନ ସିଂହାସନ ରଖିଛି ସାଇତି ପ୍ରକୃତି

ବାମଦେବ ବାମା ଜନନୀ

ଶାନ୍ତି, ମୈତ୍ରୀ, ପ୍ରିତୀ ଅମୃତ ପରସି ପୂଣ୍ୟମୟ କରି ଧରଣୀ ।।

ମଙ୍ଗଳାଯୋଡି, ଖୋର୍ଦ୍ଧା

VOL.IX, ISSUE.X, OCTOBER-2025

Published By Banamallira Mahak

ପାଞ୍ଚଟି ଏକପଦୀ - ଏକାଦଶ ଭାଗ - ରମେଶ ମଙ୍ଗରାଜ

2025-10-01T01:50:00.003+05:30

ରମେଶ ମଙ୍ଗରାଜ

ଆଉ କେତେଦିନ ଯାତନା ଭୋଗିବି

ଆଉଟା ମନକୁ ନେଇ

ଆକତା ମାକତା ଦେହଟା ହେଲାଣି

ଆସୁନାହଁ କାହିଁ ପାଇଁ ॥

ଆକଟ ମାନୁନି ପାଞ୍ଚମନ ମୋର

ଆଖଡା କରୁଛି ମୋହ

ଆଖିରେ ତମର ଚମକ ଚାହାଣୀ

ଆକର୍ଷିତ କରେ ଦେହ ॥

ଆଦ୍ୟ ଆଷାଢର ପହିଲି ପୁଲକ

ଆନନ୍ଦ କରଇ ମନ

ଆସିଲେ ଭିଜିବା ବରଷା ସାଥିରେ

ଆଉଟି ପୀରତି ଜହ୍ନ ॥

ଆଙ୍କିଛି ମନରେ ତମ ପ୍ରୀତି ଛବି

ଆଖିରେ ତମରି ରୂପ

ଆଡେଇ ପାରୁନି ତମରି ଭାବନା

ଆଘାତେ ଲେଖୁଛି ଗପ ॥

ଆଲୋଡିତ ଏଇ ବୟସ ବେଳାରେ

ଆହତ ଦିଅନା ଆଉ

ଆଶ୍ଳେଷ ନଦେଲେ ନଦିଅ ପଛକେ

ଆହୁରି ସାଧନା ଦାଉ ॥

କବି ଓ କବିତା ଭବନ

ମହୁଲ, ଅଙ୍ଗାରପଡା, ଖୋର୍ଦ୍ଧା

ଦୂରଭାଷ - ୮୧୧୪୬୦୯୨୮୦

VOL.IX, ISSUE.X, OCTOBER-2025

Published By Banamallira Mahak

VOL.IX - ISSUE.X - OCTOBER 2025

2025-10-01T00:00:00.002+05:30

ନାରୀ ଆଉ ସମାଜ - ସନ୍ତୋଷ ପଟ୍ଟନାୟକ

2025-09-30T17:32:00.009+05:30

ସନ୍ତୋଷ ପଟ୍ଟନାୟକ

ଆମ ସଂସ୍କୃତି ଆମ ପରମ୍ପରା କାଳକ୍ରମେ ପୂର୍ଣ୍ଣ ମାତ୍ରାରେ ପାଶ୍ଚାତ୍ୟ ସଭ୍ୟତାର ଅଥଳ ଗର୍ଭରେ ବିଲୀନ ହେଇ ଯିବାକୁ ବସିଲାଣି । ଏ ସମଗ୍ର ହିନ୍ଦୁ ଭାରତୀୟମାନଙ୍କୁ ପାଶ୍ଚାତ୍ୟ ସଭ୍ୟତା ସମ୍ପୂର୍ଣ୍ଣ ଗ୍ରାସି ସାରିଲାଣି । ଆମ ଐତିହ୍ୟ ପରମ୍ପରାକୁ ସବୁ ଭୁଲି ଗଲେଣି । ତେବେ ପ୍ରଶ୍ନ ଉଠୁଛି, ଏହା କଣ ଆମ ଧର୍ମୀୟ ଭାବନାକୁ ଅସମ୍ମାନ ନୁହେଁ କି ?

କୁତ୍ସିତ କୁସଂସ୍କାର ଏ ସମାଜରେ ବ୍ୟାପିଲାଣି । ଆଗରୁ ଗୁରୁ, ପିତା-ମାତା ତାଙ୍କର ଶିଷ୍ୟ ଓ ସନ୍ତାନ ମାନଙ୍କୁ ପାଠପଢ଼ା ସହ ନୈତିକ ଚେତନାର ଜାଗରଣ ସୃଷ୍ଟି କରୁଥିଲେ । କିନ୍ତୁ ପରବର୍ତ୍ତୀ ସମୟରେ ତାହାର ପଟ ପରିବର୍ତ୍ତନ ହୋଇଛି । ପୁରାତନ ଯୁଗରେ ତିଥି-ବାର-ନକ୍ଷତ୍ର ଦେଖି ସୁଯୋଗ୍ୟ ସନ୍ତାନ ପାଇଁ ନାରୀ ପୁରୁଷ ସହବାସ ପୂର୍ବରୁ ସାତ୍ଵିକ ଭୋଜନ ସହ ସମସ୍ତ ଦେବା ଦେବୀ ଗୁରୁଜନ ମାନଙ୍କ ଆର୍ଶୀବାଦ କାମନା କରୁଥିଲେ । ଏସବୁ ବର୍ଣ୍ଣନା ବତ୍ସାୟନଙ୍କ କାମଶାସ୍ତ୍ର ସମ୍ମତ । ଶିକ୍ଷିତ ଗୃହସ୍ଥ ମାନଙ୍କ ଗ୍ରାହସ୍ଥ୍ୟ ଧର୍ମ ସେ କେଉଁ ଦିନ ନାରୀ (ସ୍ତ୍ରୀ) ସହବାସ ପୂର୍ବକ ଅନୁଚିତ୍‌ ତା'ର ବିସ୍ତୃତ ବିବରଣୀ ଦେଇଛନ୍ତି । କେତେକ ବିଶିଷ୍ଟ ସୃଷ୍ଟିକାର ମଧ୍ୟ ଏ ଧରଣର ବିଷୟ ମାନଙ୍କର ବର୍ଣ୍ଣିନା କରିଛନ୍ତି । ଆଦିକବି ସାରଳା ଦାସ ମହାଭାରତର ଦ୍ରୋଣପର୍ବରେ କାମଶାସ୍ତ୍ର ସମ୍ମତ ସୁଚିନିଷ୍ଠ ଦାମ୍ପତ୍ୟ ଜୀବନ ପାଇଁ ସହବାସ ସକାଶେ କେତେକ ନିର୍ଦ୍ଧିଷ୍ଟ ଦିନ ଧାର୍ଯ୍ୟ କରିଛନ୍ତି । କବିଙ୍କ ବର୍ଣ୍ଣନାରେ,

"ପୂର୍ଣ୍ଣମୀ ପଞ୍ଚମୀ ଦଶମୀ ତିନି ତିଥି

ୟେଥି ବୀର୍ଯ୍ୟ ଦେଲେ ହୁଅନ୍ତି ପୁତ୍ରବତୀ

ପ୍ରତୀପ, ଏକାଦଶୀ, ଚତୁର୍ଦ୍ଦଶୀ ତିଥି

ୟେଥି ବୀର୍ଯ୍ୟ ଦେଲେ ସେ

ରୋଗୀ ହୋଇ ପୁତ୍ର ଅଳ୍ପ ଆୟୁଷ ଯୁଗତି

ଦ୍ଵିତୀୟ ଦ୍ଵାଦଶୀ ତ୍ରୟୋଦଶୀ ଦିନ ତିନି

ୟେଥି ବୀର୍ଯ୍ୟ ଦେଲେ କର୍ମ ହୁଏ ହାନି

ଚଉଠି, ଷଷ୍ଠୀ, ଅଷ୍ଟମୀ ତିନି ତିଥି

ୟେଥି ବୀର୍ଯ୍ୟ ଦେଲେ ଆୟୁଷ ଧର୍ମ ଯୁଗତି

ଶଙ୍କରାନ୍ତି, ଅମାବାସ୍ୟା, ଗ୍ରହଣ ଶନି ଅନ୍ତେ

ଛୋଟା କୁବୁଜା ହୁଅନ୍ତି ୟେଥିରେ ବୀର୍ଯ୍ୟ ଦିଅନ୍ତି ।"

ତିଥି ବାର ନକ୍ଷତ୍ର ନଦେଖି ଆଜିର ସ୍ୱାମୀ ଆଉ ସ୍ତ୍ରୀ ଆମିଷ ଭୋଜନ ସହ ମଦିରା ପାନକରି ସହବାସ କରୁଛନ୍ତି । ଖାସ୍ ସେଥିପାଇଁ ଅସଞ୍ଜତ କୁସଂସ୍କାରୀ ଛୁଆ ଜନ୍ମ ବଢିଚାଲିଛି । ତା ସହିତ ଆଗରୁ ବାଲ୍ୟ ଜୀବନରୁ ଘର ଯୋଗ୍ୟା ହେବା ପର୍ଯ୍ୟନ୍ତ ମାଆ ମାନେ ଝିଅମାନଙ୍କୁ ରୀତିନୀତି ଶିକ୍ଷା ଦେଉଥିଲେ । ବିଭିନ୍ନ କାବ୍ୟ କବିତା ଶାସ୍ତ୍ର ପୁରାଣ ସେମାନଙ୍କର ଚରିତ୍ର ଗଠନ ନିମନ୍ତେ ପଢ଼ାଉଥିଲେ, ପ୍ରଣୟ ବଲ୍ଲରୀରେ କେଉଁ ପରି ଭାବରେ ନାରୀ ଗୁଣ ମାର୍ଜିତ ହେବ ତାହା ମଧ୍ୟ ଗଙ୍ଗାଧର ମେହେର ବର୍ଣ୍ଣନା କରିଥିଲେ,

"ଅବସର କେବେ ନ ଦେବୁ ନେତ୍ରକ

ପରପୁଂଷ ଅନୁକ୍ଷଣେ

ସଦର ହେଲେହେଁ ରୁହାଇ ନଦେବୁ

ନିଜ ପାଖେ ପ୍ରତିକ୍ଷଣେ...॥"

ଆଜି ୟାକୁ ମାନୁଛି କିଏ ? ନାରୀ ନିଜେ ହିଁ ନିଜର ସ୍ଥାନ ହରାଉଛି । ନାରୀ ଯେବେ ଅସତୀ ହୁଏ ସମାଜର ଅଧୋଗତି ହୁଏ । ମା କାଳୀ ସୃଷ୍ଟି ରକ୍ଷା ପାଇଁ ବିବଷା ହୋଇଥିଲେ କିନ୍ତୁ ଆଜିର ନାରୀ ସୃଷ୍ଟିର ବିନାଶ ପାଇଁ ବିବଷା ହେଉଛି । ସବୁ କ୍ଷେତ୍ରରେ ନଗ୍ନତା । ଉଦ୍ଧତପୂର୍ଣ୍ଣ ନାରୀ କାହାକୁ ମାନିବା ଅଵସ୍ଥାରେ ନାହିଁ । ପୁରୁଷ ଜାତିକୁ ଅଶ୍ଳୀଳ ଇଙ୍ଗିତରେ କରାୟତ୍ତ କରିଛି । ସତୀ ସୀତାଙ୍କୁ ରାବଣ ହରଣ କରିବା ପରେ ପ୍ରଭୁ ରାମଚନ୍ଦ୍ର ବ୍ୟସ୍ତ ବିବ୍ରତ ହୋଇ ଖୋଜିବା ସମୟରେ ସୁଗ୍ରୀବଙ୍କ ଅନୁଚର କିଛି ଗହଣା ପାଇ ତାହା ଚିହ୍ନିବାକୁ ରାମ-ଲକ୍ଷ୍ମଣଙ୍କୁ ଦେଖାଇ ପଚାରିଥିଲେ ଏହା କଣ ସତୀଙ୍କର ! ଲକ୍ଷ୍ମଣ ମନା କରି କହିଥିଲେ ମୁଁ ଜାଣି ନାହିଁ ବୋଲି । ସବୁ ଗହଣା ଦେଖାଇ ସାରିବା ପରେ ସତୀଙ୍କ ପାଦର ପାଉଁଜିକୁ ଦେଖାଇବା କ୍ଷଣି, ଲକ୍ଷ୍ମଣ କହିଥିଲେ ଏ ମୋ ସୀତା ମାତାଙ୍କର । ରାମଚନ୍ଦ୍ର କହିଲେ ଏତେ ସାରା ଗହଣା ଭିତରୁ ତୁମେ ଖାଲି ପାଦର ପାଉଁଜି ଦେଖି କେମିତି ଜାଣିଲ ? ଲକ୍ଷ୍ମଣ କହିଥିଲେ ସେ ମୋ ମାଆ ମୋର ତାଙ୍କ ପାଦପଦ୍ମରେ ନଜର ତେଣୁ ଏ ପାଉଁଜିକୁ ନିତି ଦେଖିଥାଏ । ଏଥିରୁ ସ୍ପଷ୍ଟ ଆଭାସ ମିଳେ ଦିଅର ପାଇଁ ଭାଉଜ ହେଉଛି ମାଆ ସଦୃଶ । ଆଜି ଏହାର ପଟ ପରିବର୍ତ୍ତନ । ବିବାହ ପରେ ମଧ୍ୟ ସ୍ଵାମୀ ଥାଉ ଥାଉ କିଛି ଦିନ ରହିଲା ପରେ ମଥାରୁ ସିନ୍ଦୁର ପୋଛି ଚାଲିଯାଉଛି ଅନ୍ୟ ସ୍ଵାମୀ ସହ ଆଧୁନିକ ନାରୀ ପାଶ୍ଚାତ୍ୟ ସଭ୍ୟତାରେ ନିଜକୁ ଓ ନିଜ ମର୍ଯ୍ୟାଦାକୁ ନଗ୍ନ କରି ଠିଆ ହୋଇଛି । ବିବାହ ପରେ ମଧ୍ୟ ନିଜ ସିନ୍ଦୁର, ଧର୍ମ ସବୁ ପାଦରେ ଠେଲି ଦେଉଛି । କବି ଅଭିମନ୍ୟୁ ସାମନ୍ତସିଂହାରଙ୍କ ମତରେ,

"ଜନ୍ମ ଲଭିଥାଉ ଦ୍ଵିଜ କୁଳରେ

ମାତଙ୍ଗଙ୍କୁ ଜିଣି ଥାଉ ବଳରେ

ଗଣେଶ ସମାନ ହେଉ ପଣ୍ଡିତ

କାର୍ତ୍ତିକ ସମ ହେଉ ରୂପବନ୍ତ ।

ଧନ ନାହିଁ ଯେବେ

ମନ ନାହିଁ ବାରଙ୍ଗନାର ତେବେ ॥

ସେହିପରି ଆଜିର ନାରୀ ଓ ନାରୀ ଜାତି କଣ ତାହା ସହଜେ ଅନୁମେୟ । ବହୁତ ନାରୀ ଆଜି ନଗ୍ନା ଅସଞ୍ଜତ ଅଶ୍ଳିଳ । ବିବାହ ପରେ ମଧ୍ୟ ଯୌବନର ତୀବ୍ର ଲାଳସାରେ ବଶୀଭୂତ ହୋଇ କମ୍ ବୟସର ପୁରୁଷ, ଦିଅର, ପୁଅ ଏପରିକି ଶଶୁରଙ୍କ ପ୍ରତି ଆକର୍ଷିତ ହେଉଛନ୍ତି । ଆମ ନ୍ୟାୟ ବ୍ୟବସ୍ଥା ମଧ୍ୟ ସ୍ଵୀକୃତି ଦେଇଛି ଯାହାର ଜ୍ୱଳନ୍ତ ଉଦାହରଣ ହେଉଛି ପରକୀୟା ପ୍ରୀତି ।

ମାଆ ଆଜି ନିଷ୍ପାପ କୋମଳମତି ଛୁଆଙ୍କୁ ଛାଡ଼ି ଫେରାର ! ମାଆର ଅର୍ଥକୁ ଦଳି ଚକଟି ଭୁଲି ବିକୃତ କରାଯାଉଛି ସବୁଠି । ଆଜି ନିଜ ଠାରୁ କମ୍ ଅନେକ ବୟସ ବ୍ୟବଧାନର ହିସାବକୁ ଭୃକ୍ଷେପ ନକରି ପ୍ରେମରେ ନାରୀ । ସ୍ଵାମୀ ଯଦି ପ୍ରତିବାଦୀ ତେବେ ନାରୀ ନିର୍ଯ୍ୟାତନା ଅଭିଯୋଗ ନିଶ୍ଚିତ । କି ଯୁଗ ହେଲା ! ଚତୁର୍ଥ ସ୍ତମ୍ବ ସାମ୍ବାଦିକ ମଧ୍ୟ ସେମାନଙ୍କୁ ପ୍ରୋତ୍ସାହନ ଦିଅନ୍ତି ! ତା ସହ ବଡ଼ ବଡ଼ ସଙ୍ଗୀତ ନିର୍ଦ୍ଦେଶକ ଗୀତିକାର ମଧ୍ୟ ସେମାନଙ୍କ ପାଇଁ ଗୀତ କରୁଛନ୍ତି । ଛି.. ଆମ ସମାଜ କଣ ହେଲା କେଉଁ ଆଡକୁ ଗତିକଲା !! "ନାରୀ ଆଜି ନାରୀର ଶତ୍ରୁ" ନାରୀ ଚାହିଁଲେ ସମାଜ ସୁଧୁରି ଯାଆନ୍ତା ।

ତିରିଡା, ବେଗୁନିଆପଡା, ଗଞ୍ଜାମ

ମୋ - ୭୯୮୪୨୫୯୦୮୦

VOL.IX, ISSUE.IX, SEPTEMBER-2025

Published By Banamallira Mahak

ମା ଗୋ - ସୁବଳ ଚନ୍ଦ୍ର ରାଉତରାୟ

2025-09-25T05:50:00.002+05:30

ସୁବଳ ଚନ୍ଦ୍ର ରାଉତରାୟ

ମା ଗୋ ଜନନୀ ଯୋଗିନୀ ଯୋଗମାୟା,

ମା ଗୋ ଜଗତମୋହିନୀ ଶିବଜାୟା,

ମା ଗୋ ବରଦାତ୍ରୀ ମା ଗୋ ଶୈଳ ପୁତ୍ରୀ

ତୁ ତ ଆନନ୍ଦଦାୟିନୀ ମହାମାୟା ॥

ତୁ ମା ଅଭୟ ଦାୟିନୀ ଶୁଭାଙ୍ଗିନୀ

ତୁ ମା କଳୁଷ ହାରିଣୀ ସୁଲୋଚନୀ,

ମା ଗୋ ମନ୍ଦାର ମାଳିନୀ ତ୍ରିଶୂଳଧାରିଣୀ,

କିଏ କଳି ବା ପାରିବ ତୋର ଦୟା ॥

ଦଶଭୁଜା ଦଶ ଦୋଷ ନିବାରିଣୀ

ସିଂହ ବାହିନୀ ମହିଷା ବିମର୍ଦ୍ଦିନୀ,

ତୁ ମା କାଳିକା ଚଣ୍ଡିକା ବହ୍ନିଶିଖା

ରଣରଙ୍ଗିନୀ ଭୈରବୀ ଲୋଳଜିହ୍ଵା ॥

ଭୁବନେଶ୍ୱର, ଓଡିଶା

VOL.IX, ISSUE.IX, SEPTEMBER-2025

Published By Banamallira Mahak

ଗୋଲାପୀ ଲଫାପା - ବିଶ୍ୱଜିତ ନାୟକ

2025-09-25T05:40:00.003+05:30

ବିଶ୍ୱଜିତ ନାୟକ

କେହି ଜଣେ କହିଦେଲା

ତୁମ ହାତେ ଥିଲା

ମୋ ଠିକଣାରେ

ଏକ ଗୋଲାପୀ ଲଫାପା ।

ଏମିତି ତ ତୁମ ସହ

ନିତିଦିନ ଦେଖା ହୁଏ

ଓଠରେ ପାଟିରେ ନୁହେଁ

ଆଖିରେ ଆଖିରେ କଥା ହୁଏ ।

ଆଜି ଏମିତି କଣ ଗୋଟେ

କହିବ ଯେ

ତୁମ ହାତେ ଅଛି

ଏକ ଗୋଲାପୀ ଲଫାପା ।

କଣ ଗୋଟେ ଲେଖିଥିବ

ଏହି କଥା ଭାବି

ଆଜିକାଲି ସବୁ ରାତି

ମୋର ଅନିଦ୍ରାରେ କଟୁଛି

ମନ ଭିତରେ

ଏକ ଅଜଣା ଡର

ରାଜୁତି କରୁଛି ।

ତୁଣ୍ଡପଡ଼ା, କେଦାରପୁର

ସୋରୋ, ବାଲେଶ୍ୱର

ମୋ - ୭୯୭୮୨୫୬୩୮୬

VOL.IX, ISSUE.IX, SEPTEMBER-2025

Published By Banamallira Mahak

ଜାଗ ଜାଗ ଦୁର୍ଗେ - ସୁବଳ ଚନ୍ଦ୍ର ରାଉତରାୟ

2025-09-22T08:19:00.002+05:30

ସୁବଳ ଚନ୍ଦ୍ର ରାଉତରାୟ

ଜାଗ ଜାଗ ଦୁର୍ଗେ ଜାଗ ଜଗଦମ୍ବେ,

ଜାଗ ଦୁର୍ଗତି ନାଶିନୀ ମାତଃ ଅମ୍ବେ,

ଜାଗ ଶଙ୍କରୀ ଈଶ୍ଵରୀ ମହେଶ୍ଵରୀ,

ଜାଗ ମହିଷାମର୍ଦ୍ଦିନୀ ଜାଗ ଶିବେ ॥

ଜାଗ ଦଶପ୍ରହରଣ ଧାରିଣୀ ଶର୍ବାଣୀ

ଜାଗ ସିଂହବାହିନୀ ମା ତ୍ରିଶୂଳଧାରିଣୀ,

ଜାଗ ଅନଳ ସଂଭୂତା ବିଶ୍ଵ ଜନ ମାତା,

ଜାଗ ଶକ୍ତି ସ୍ଵରୂପିଣୀ କରାଳ ଲୋଚନୀ

ଜାଗ ଦୈତ୍ୟ ଦଳିନୀ ଦିବ୍ୟପ୍ରଭେ ॥

ଦେହି ଶୌର୍ଯ୍ୟ ସୁରେଶ୍ୱରୀ ଶୌର୍ଯ୍ୟମୟୀ

ଦେହି ବିଜୟ ବିଜୟା ଦୟାମୟୀ,

ଦେହି ପରମ ଆନନ୍ଦ ପରମେଶ୍ଵରୀ ମା

ତବ ଚରଣେ ଶରଣ କରୁଶା କାରିଣୀ

ଦେହି ତାରଣ ତରଣୀ ଭାବାର୍ଣ୍ଣବେ ॥

ଭୁବନେଶ୍ୱର, ଓଡିଶା

VOL.IX, ISSUE.IX, SEPTEMBER-2025

Published By Banamallira Mahak

ଯାଃ ଦେବୀ ସର୍ବ ଭୁତେଶୁ - ବିରଞ୍ଚିନାରାୟଣ ମିଶ୍ର

2025-09-22T08:05:00.004+05:30

ବିରଞ୍ଚି ନାରାୟଣ ମିଶ୍ର

ବିନା ଆଶ୍ରେ ନ ବଞ୍ଚନ୍ତି

କବିତା ବନିତା ଲତା,

ଏହା କଣ ନୁହେଁ ନାରୀକୁ

ଦୁର୍ବଳ କି ଅବଳା କରିଦେବାର

ରୀତିମତ ଗୋଟେ ଷଡ଼ଯନ୍ତ୍ର

କିଏ ନଜାଣେ ।

ସହନଶୀଳତା ଲଜ୍ୟାଶୀଳା ଆସୂର୍ଯ୍ୟାପଶାମ

ଏମିତି କେତେ ଭୂଷଣରେ

ମୋତେ ସଜେଇ ଦେଇଚି ପୁରୁଷ

ଆଉ କେଉଁ ଅଳଙ୍କାର ମୋର ଲୋଡା ଯେ,

ଖରା ବାଜିଗଲେ ଦେହରେ କାଳେ

ଝାଉଁଳି ଯିବି କି କଳା ପଡ଼ିଯିବି

ଚତୁରତାରେ କରିଦେଇଛି ଅବଗୁଣ୍ଠନାବତୀ

କେବଳ ଲାଳସାର ଆକୁଣ୍ଠ ଉପଭୋଗ ପାଇଁ ।

ସକଳ ଦେବଗଣ ଏବେ ଲୋଡ଼ୁଛନ୍ତି ମୋତେ,

ମହିଷାସୁର ନିଧନ ପାଇଁ,

ନିଜ ନିଜର ଜ୍ୟୋତିରୁ ସୃଷ୍ଟି କରିଦେଲେ ମୋତେ

ବିନା ଅସ୍ତ୍ରେ କେମିତି ବଧିବି ମୁହିଁ ଦୁର୍ଦ୍ଦାନ୍ତ ରାକ୍ଷସ,

ଖଞ୍ଜି ଦେଲେ ମୋ ହସ୍ତରେ

ତେତ୍ରିଶ କୋଟି ଦେବତାଙ୍କ ଅସ୍ତ୍ର ।

ମିଛରେ ବାହା ବାହା ନେବା ପାଇଁ

ଗୋଟିଏ ରାକ୍ଷସ ମାରିବା ଲାଗି,

କି ଲଜ୍ୟା........

କୋଉ କାମରେ ଲାଗିଲା ସେମାନଙ୍କର ଅସ୍ତ୍ର

ତଥାପି ନିଅଁଟ ହେଲା ଯେ

ମୋତେ ବିନ୍ଧିବାକୁ ହେଲା

ମୋ ଶେଷତମ ଅସ୍ତ୍ର ।

ଯାହା ନିର୍ବୀର୍ଯ୍ୟ କରିଦେଲା ଦୁର୍ଦ୍ଧାନ୍ତ

ପୁରୁଷକାରକୁ........

ମୋ ରୂପକୁ ନେଇ କେତେ ଯୁଦ୍ଧ

କେତେ ହଣାକଟା,

ମେଢ଼ରେ ବି ମୋ ରୂପକୁ ନେଇ

କେତେ ପ୍ରତିଯୋଗିତା,

ତା ପୁଣି କ୍ଷଣିକ ପାଇଁ

ଆବାହନ ପରେ ବିସର୍ଜନ ।

ଋଷି ଦେବତା ଗୁଡ଼ାକ କୋଉ ସତ୍ ପୁରୁଷ

ଛଦ୍ମ କପଟେ ଚରିତାର୍ଥ କରନ୍ତି

ନିଜର ଲାଳସା,

ମୋତେ ଆଦରିବାକୁ ପଡ଼େ ପଥର ଭାଗ୍ୟ

କୁହୁଡି ଢାଙ୍କି ନଦୀଗର୍ଭରେ ଧର୍ଷିତା ହେବା

ମତ୍ସ୍ୟଗନ୍ଧାରୁ ଯୋଜନଗନ୍ଧା,

କି ପରମାର୍ଥ ମୋର ।

ଅଗ୍ନିସ୍ନାନରୁ ବାହାରି ଆସିଥିବା ମୋର

ଦୀର୍ଘଶ୍ୱାସରେ ଦିନେ ତରଳି ଯିବ ଏ ମିଛ

ବରଫ ଘେରା ପୃଥିବୀ,

ସେଦିନ ସଭିଏଁ ବୁଝିବେ ନାରୀ ଅବଳା ନୁହେଁ

କେବଳ ଅପେକ୍ଷା........

ମଲ୍ଲୀପୁର, ନିଆଳ, ଖୋର୍ଦ୍ଧା

ଦୂରଭାଷ : ୯୪୩୯୦୧୧୦୬୩

VOL.IX, ISSUE.IX, SEPTEMBER-2025

Published By Banamallira Mahak

ଜୀବନ ପଞ୍ଜିକା - ସୁଜାତା ରାଣୀ ଶତପଥୀ

2025-09-22T07:44:00.003+05:30

ସୁଜାତା ରାଣୀ ଶତପଥୀ

ଜୀବନ ପଞ୍ଜିକା ଲେଖାରେ ଅଧିକା

ସବୁ ଗ୍ରନ୍ଥ ମହାଗ୍ରନ୍ଥ ଠାରୁ

ପ୍ରତି ମୁହୂର୍ତ୍ତର ବିବରଣୀ ଅଛି

ଲିଖିତେ ଜନ୍ମ ପୂର୍ବରୁ ॥୧॥

ପ୍ରଭୁ ଦୟାମୟ ଭାବିଣ ବିଧେୟ

ଲେଖିଛନ୍ତି ଭାବି ଭାବି

କର୍ମ କର୍ତ୍ତବ୍ୟର ସାରାଂଶକୁ ଦେଖି

ହୋଇ ଆପେ ଅନୁଭବୀ ॥୨॥

ଜୀବନ ଅଙ୍କନ ଆକାର ପ୍ରକାର

କିଏ ନ ଜାଣେ ପୂର୍ବରୁ

ଅନୁଭବ କଲେ ସର୍ବେ ଜାଣିଥାନ୍ତି

ଅଙ୍ଗେ ନିଭାଇ ଥିବାରୁ ॥୩॥

ଏହା ଜାଣି ଜ୍ଞାନ ପ୍ରୟୋଗ କରିଲେ

ଜୀବନ ହେବ ସରସ

ଆହେ ଦୀନବନ୍ଧୁ ପ୍ରାଣ ବିନ୍ଦୁ ହୋଇ

ପାଖେ ହେଉଥାଅ ଦୃଶ୍ୟ ॥୪॥

ତୁମ ଦର୍ଶନରେ ସ୍ୱାର୍ଥକୁ ପାସୋରି

ନିଃସ୍ୱାର୍ଥକୁ କରି ସାଙ୍ଗ

ଜୀବନ ସ୍ରୋତରେ ଫସିଯିବ ନାହିଁ

ଯେତେ ଆସିଲେ ତରଙ୍ଗ ॥୫॥

ଶିକ୍ଷୟିତ୍ରୀ, ପି. ଏମ. ଶ୍ରୀ ହାଇସ୍କୁଲ

ସାନଖେମୁଣ୍ଡି, ଚୁଡାଙ୍ଗାପୁର, ଦିଗପହଣ୍ଡି, ଗଞ୍ଜାମ

VOL.IX, ISSUE.IX, SEPTEMBER-2025

Published By Banamallira Mahak

ମହାଳୟା - ସୁବଳ ଚନ୍ଦ୍ର ରାଉତରାୟ

2025-09-21T05:00:00.000+05:30

ସୁବଳ ଚନ୍ଦ୍ର ରାଉତରାୟ

ଦେବୀ ଦଶଭୁଜେ ଦୁର୍ଗେ ଦୁର୍ଗତି ନାଶିନୀ,

ଗିରିଜା ନନ୍ଦିନୀ ଗୌରୀ ଶଙ୍କର ତୋଷିଣୀ,

ଶକ୍ତି ସ୍ଵରୂପା ଶିବାନୀ,

ଅଭୟ ବର ଦାୟିନୀ

ଆସ ଧରା ଧାମେ ଆସ ଅମ୍ବିକେ ଭବାନୀ ॥

ଆସିଛି ଋତୁ ଶରଦ,

ନଭେ ନିର୍ମଳ ନୀରଦ,

ତବ ଆଗମନୀ ପାଇଁ,

ମଂଗଳ ଗୀତିକା ଗାଇ.

କାଶତଣ୍ଡୀର ଚାମର ପକାଏ ମେଦିନୀ ॥

ହେବ ଧରାବତରଣ,

ପବିତ୍ର ପର୍ବ ପାର୍ବଣ,

ହସି ଉଠିବ ଦିଗନ୍ତ,

ଦଶଦିଶ ଓ ଗଗନ,

ପୂଜିବେ ଜଗତଜନେ ଜଗଜ୍ଜନନୀ ॥

ଆଜି ଶୁଭ ମହାଳୟା,

ମା ଗୋ ମଙ୍ଗଳ ଆଳୟା,

ଦୟା କର ଦୟାମୟୀ

ଦିଅ ବିଜୟ ବିଜୟା,

ସୁଖ ଶାନ୍ତି ଭରି ଯାଉ ସାରା ଧରଣୀ ॥

ଭୁବନେଶ୍ୱର, ଓଡିଶା

VOL.IX, ISSUE.IX, SEPTEMBER-2025

Published By Banamallira Mahak

ହେ ପ୍ରଭୁ - ସୁବଳ ଚନ୍ଦ୍ର ରାଉତରାୟ

2025-09-20T19:54:00.001+05:30

ସୁବଳ ଚନ୍ଦ୍ର ରାଉତରାୟ

ହେ ପ୍ରଭୁ ପରମେଶ୍ଵର,

ଆକୁଳ ବିନତୀ କରୁଣ ପ୍ରାର୍ଥନା

କେବେ ହେବ କର୍ଣ୍ଣ ଗୋଚର ॥୦॥

ତୁମେ ଦୟାମୟ ଦୟାର ସାଗର,

ତୁମ କରୁଣାର ନାହିଁ ପଟ୍ଟାନ୍ତର,

ଆବେଗେ ହେ ହରି ହୁଏ ନିଉଛାଳି

କାହିଁ ହୁଅ ନିଦା ପଥର ॥୧॥

ଜାଣିଛି ହେ ନାଥ ଯାହା ତୁମେ କର,

ଭଲ ହେଇଥାଏ ତହିଁରେ ପ୍ରାଣୀର,

କି ମଙ୍ଗଳ ହେବ କୁହ ହେ ମାଧବ

ସହି ଏତେ ଦୁଃଖର ଭାର ॥୨॥

ଅବୋଧ ବାଳକ ପରି ଏ ଜୀବନ,

ଦିଅ ବାରେ ତା'ରେ ତୁମେ ଦିବ୍ୟଜ୍ଞାନ,

କରେ କଲବଲ ମୋହ ମାୟାଜାଲ

କାଟ ତା'ରେ ଜଗଦୀଶ୍ଵର ॥୩॥

ଭୁବନେଶ୍ୱର, ଓଡିଶା

VOL.IX, ISSUE.IX, SEPTEMBER-2025

Published By Banamallira Mahak

ସମୟ - ସୁବଳ ଚନ୍ଦ୍ର ରାଉତରାୟ

2025-09-20T08:44:00.002+05:30

ସୁବଳ ଚନ୍ଦ୍ର ରାଉତରାୟ

ସମୟ,

ସବୁ ଥିଲା ଦାନ ତୁମ୍ଭର,

ଦେଇଥିଲ ଧନ ଜନ ଯଉବନ,

ଭରି ଥିଲ ମନ ଭଣ୍ଡାର ॥

ମଧୁବନ ପରି ଜୀବନ ଥିଲା,

ଯିଏ ଆସି ଗଲା ନିଜର ହେଲା,

ଲାଗି ଗଲା ମୋହ ମହୁଲି ନିଶା,

ଇନ୍ଦ୍ରପୁରୀ ପରି ସଂସାର ॥

ଉଡି ଗଲା ଦିନ ପକ୍ଷୀଟେ ପରି,

ଡେଣାରେ ସ୍ମୃତିର ପରକୁ ଧରି,

ହେଇଗଲା ନିଃସ୍ଵ ମନର ବୟସ,

ଝରେ ଝୁରି ନୟନୁଁ ଧାର ॥

ଭୁବନେଶ୍ୱର, ଓଡିଶା

VOL.IX, ISSUE.IX, SEPTEMBER-2025

Published By Banamallira Mahak

ମୋ ପି.ଏ. - ବିଶ୍ୱଜିତ ନାୟକ

2025-09-19T22:16:00.001+05:30

ବିଶ୍ୱଜିତ ନାୟକ

ମୋର ଅଛି

ଏକ ସୁନ୍ଦରୀ ପି.ଏ.

ତା'ର ଦରମା

ଜାଣି ନାହାନ୍ତି କିଏ !

ପି.ଏ. ଅଟେ ମୋର

ଏମିତି ସୁନ୍ଦରୀ

ତାକୁ ଦେଖୁ ଦେଖୁ

ସବୁ ଚିନ୍ତା ମୋର

ଯାଏ ଅପସରି !

ଦରମା ତା'ର ବଢ଼ାଏ

ମୁଁ ବର୍ଷକୁ ଦୁଇଥର

ସେ କରୁଥାଏ ପାଗଳ

ମୋତେ ଥରକୁ ଥର !

କାମ କିଛି କରୁ କି ନକରୁ

ସେ ମୋ ପାଖରେ ଥାଉ

ସବୁକିଛି କରିନେବି ମୁଁ

ତା'ର ମୁହଁକୁ

ଟିକେ ଚାହୁଁ ଚାହୁଁ !

ତା'ର ସେ ଲାଜୁଆ ହସ

ମଖମଲି ଚାଲି

ଇଛାହୁଏ ବାରମ୍ବାର

ଦେଖିବାକୁ ତା'ର

ହସ ଖିଲିଖିଲି !

ଦିନେ ନ'ଆସିଲେ ସେ

ମନ ଲାଗେନି

କୌଣସି କାମରେ

ଦିନସାରା କଟିଯାଏ

ଖାଲି ଅଶାନ୍ତି ଅଶାନ୍ତିରେ !

ତୁଣ୍ଡପଡ଼ା, କେଦାରପୁର

ସୋରୋ, ବାଲେଶ୍ୱର

ମୋ - ୭୯୭୮୨୫୬୩୮୬

VOL.IX, ISSUE.IX, SEPTEMBER-2025

Published By Banamallira Mahak

ଭାବ ଅନୁଭବ - ସୁବଳ ଚନ୍ଦ୍ର ରାଉତରାୟ

2025-09-18T05:57:00.002+05:30

ସୁବଳ ଚନ୍ଦ୍ର ରାଉତରାୟ

ଭାବ ଅନୁଭବ ସୀମା ସରହଦ

ଘୁଂଚାଇ ଦିଅ ହେ ଯୋଜନ ଯୋଜନ,

ପାଦେ ପାଦେ ଯାଇ ଅଧୀର ହୁଏ ମୁଁ,

ବ୍ୟତିବ୍ୟସ୍ତ ହେଇଯାଏ ଏ ଜୀବନ ॥

ବିଷାଦ ବିଧୁର କାହିଁ ହେବ ମନ,

ଅସୀମ ଅନନ୍ତ ହେ ଆନନ୍ଦ ସିନ୍ଧୁ

କରେ ଯାଇଁ ତହିଁ ମୁଁ ଅବଗାହନ ॥

ସୁଖର ଦୁଃଖର ଅଗଣିତ ଊର୍ମ୍ମି

କରି ଚାଲେ ଅନାୟାସେ ଆଲିଙ୍ଗନ ॥

ଭୁବନେଶ୍ୱର, ଓଡିଶା

VOL.IX, ISSUE.IX, SEPTEMBER-2025

Published By Banamallira Mahak

ବେଳଥାଉ ଚେତ ବଞ୍ଚୁ ଉତ୍କଳ - ସନ୍ତୋଷ ପଟ୍ଟନାୟକ

2025-09-17T20:48:00.002+05:30

ସନ୍ତୋଷ ପଟ୍ଟନାୟକ

ଓଡ଼ିଆର ସ୍ପର୍ଦ୍ଧା ପାଇଁ ନିଖୋଜ ସୁବାଷ

କୁଟ ଖେଦେ ବନ୍ଧା ଏଠି ବିର୍ସାର ବାସ

କୃଷ୍ଣ ଭଞ୍ଜ ଆଜି ଏଠି ଅଖୋଜା ଅଲୋଡ଼ା

ସମୟ ତାଳରେ ଉଡ୍ର ହେଲା ଗଡ଼ଗଡ଼ା ॥

ଗଙ୍ଗାଧର ରଚି ଗଲେ ଓଡ଼ିଆ ସାହିତ୍ୟ

ତାଙ୍କରି ଦାୟଦ ଭଣେ କୋଶଳ ପାଣ୍ଡିତ୍ୟ

କିବା ପ୍ରୟୋଜନ କିସ ଏଇ ଆଭିଜାତ୍ୟ !

ତୁଚ୍ଛା ପଣ କାହୁଁ ଅଛି ଆତ୍ମିୟତା ଚିତ୍ତ ॥

ଯାହା ବଳିଦାନେ ସୃଷ୍ଟି ସ୍ଵାଭିମାନ ରାଜି

ଜାତୀୟତା ସ୍ତରେ ତାହା କାହିଁ ନାହିଁ ଆଜି

କାହିଁ ବକ୍ସି ଜୟୀ ଆଉ ଚକରା ଓ ବାଜି

କାହିଁପାଇଁ ତାଙ୍କ ଗୁଣ ପାରୁନାହଁ ଭଜି ! ॥

ସିଂହଭୂମି, ଧଳଭୂମି, ଛୋଟ ନାଗପୁର

ବସ୍ତର, ଶ୍ରୀପୁର ସିରିୟା, ଅମ୍ବିକାପୁର

ଶ୍ରୀକାକୁଲମ୍, ମଞ୍ଜୁଷା ଆଉ ଟିକାଲି

ଭୁଲିଗଲୁ କିବା ଏ ଉତ୍କଳ ଅଙ୍ଗ ବୋଲି ! ॥

ବୋଲକରା କାହିଁ ଆଜି ସାଜୁଛି ଏ ଜାତି

କି'କାରଣେ କାର୍ପଣ୍ୟତା ସାଜୁଅଛି ବାଦି

ଦେଖୁନିକି ଆଖି ତବ ଖଣ୍ଡିତ ଉତ୍କଳ

ବିଭଙ୍ଗ ଅଙ୍ଗକୁ ଘେନି ଜନନୀ ଦୁର୍ବଳ ॥

ସବୁ କଥା ଆଜି ଏଠି ହେଲାଣି ପ୍ରାଞ୍ଜଳ

ଭାବି ଭାବି ମୁଣ୍ଡ ନିତି ହୁଏ ଗୋଳମାଳ

ନିଜ ସ୍ପାର୍ଦ୍ଧା ତେଜି ଆଜି ଉଠ ଭାତୃଗଣ

ବେଳ ଥାଉ ଥାଉ ଚେତ ବଞ୍ଚୁ ଏ' ଉତ୍କଳ ॥

ତିରିଡା, ବେଗୁନିଆପଡା, ଗଞ୍ଜାମ

ମୋ - ୭୯୮୪୨୫୯୦୮୦

VOL.IX, ISSUE.IX, SEPTEMBER-2025

Published By Banamallira Mahak

ନୀଚ୍ଚ ମାନସିକତା - ବିଶ୍ୱଜିତ ନାୟକ

2025-09-17T20:27:00.005+05:30

ବିଶ୍ୱଜିତ ନାୟକ

ସଚ୍ଚୋଟ ପିଲାଟିକୁ

କେହି ଭଲ ପାଏନି

ସେ ପୁଅ ହେଉ

କି ଜ୍ୱାଇଁ ହେଉ

କାହିଁକି ନା ତା'ର ନ ଥାଏ

ପୁଳା ପୁଳା ଟଙ୍କା

ଖର୍ଚ୍ଚ କରିବାକୁ

ବିନା କାରଣରେ !

ସଚ୍ଚୋଟ ସାଙ୍ଗଟିକୁ

କେହି ନିଜର କରେନା

କାହିଁକି ନା ସେ ଦେବାକୁ

ସମର୍ଥ ହୁଏନି

ମଦ କି ମଟନ

ଏଇମିତି ଛୋଟ ଛୋଟ

କାରଣ ଅକାରଣରେ !

ସଚ୍ଚୋଟ କର୍ମଚାରୀଟିକୁ

କେହି ବି ଭଲ ପାଏନି

କାହିଁକିନା ସେ ଦେଇପାରେନି

ଖାଇବାକୁ କିମ୍ବା ପିଇବାକୁ

ତା'ର ଉପର ଅଧିନସ୍ଥ

କର୍ମଚାରୀ ମାନଙ୍କୁ

ତାଙ୍କ ମନ ମଧ୍ୟରେ

ନିଜ ପାଇଁ ଟିକେ ସ୍ଥାନ

ସଂରକ୍ଷିତ କରିବା ପାଇଁ !

ସତରେ ଏ ସମାଜରେ

ଭଲ ଲୋକ ମାନଙ୍କ ପାଇଁ

ଆଉ କଣ ସ୍ଥାନ ନାହିଁ

ସଚ୍ଚୋଟ ଲୋକ ମାନେ

କଣ ଧୀରେ ଧୀରେ

ଏଇମିତି ହଜି ଯିବେ

କେବଳ କେତେକ

ନୀଚ ଲୋକ ମାନଙ୍କର

ଛୋଟ ମାନସିକତା ପାଇଁ !

ତୁଣ୍ଡପଡ଼ା, କେଦାରପୁର

ସୋରୋ, ବାଲେଶ୍ୱର

ମୋ - ୭୯୭୮୨୫୬୩୮୬

VOL.IX, ISSUE.IX, SEPTEMBER-2025

Published By Banamallira Mahak

କଳଙ୍କିତ ଗୁରୁ - ଶିଶିର କୁମାର ସାମଲ

2025-09-16T10:06:00.004+05:30

ଶିଶିର କୁମାର ସାମଲ

ଗୁରୁ ହୋଇ ଯଦି ଜାଳିପୋଡ଼ି ଦେଲେ

ଗୁରୁ ବନିବାର ଆଶା,

କିମ୍ପାଇ ପୂଜିବା ଆଜିର ଗୁରୁଙ୍କୁ

ହେବା କାହିଁ ଲୋକହସା ।।

ଗୋଟେ ହାତେ ତାଳି ବାଜେ ନାହିଁ କବେ

ଦୋଷୀ ଚାଲିଯାଏ ଖସି,

ନିରୀହ ଛାତ୍ରୀଟି ଜଳିପୋଡ଼ି ଯାଏ

ବିଭାଗ ସାଜିଲେ ଦୋଷୀ ।।

ଦେଖିଯାଅ ଥରେ ବ୍ୟାସ ବାବୁ ତୁମେ

ଏଇ ତୁମ ଜନ୍ମ ମାଟି,

ରେବ ପରି କେତେ ଜଳି ଚାଲିଛନ୍ତି

ନିଜ ସ୍ଵପ୍ନ କରି ମାଟି ।।

ଆଇନ୍ କାନୁନ୍ ଗୋଲାମ ସାଜିଛି

ବଡ଼ବାବୁ ପାଦ ତଳେ,

ଶିକ୍ଷକଙ୍କୁ ଶିକ୍ଷା ଦେବା ପାଇଁ ଏଠି

ନୀରିହ ଜୀବନ ଟଳେ ।।

ଏବେ ବି ଚାଲିଛି ଶିକ୍ଷା ମନ୍ଦିରରେ

କୁ-ଶିକ୍ଷାର ରାଜନୀତି,

କେତେ କେତେ ସୈମ୍ୟା ବଳି ପଡ଼ୁଛନ୍ତି

ଶୁଣିଲେ ଥର‌ଇ ଛାତି ।।

ଶି‌କ୍ଷା ପରି ଏକ ପବିତ୍ର ମନ୍ଦିରେ

ଶିକ୍ଷକ ସାଜିଲେ ଦୋଷୀ,

ରେବ ପରି କେତେ ଛାତ୍ରଛାତ୍ରୀ ଗଣ

ପାଇ ଚ଼ାଲିଥିବେ ଫାଶୀ ।।

ବଦଳାଅ ବ୍ୟାସେ, ତୁମ କାହାଣୀରେ

ରେବ ଜୀବନର ଝଡ଼,

ଶିକ୍ଷକଙ୍କ ଶିକ୍ଷା ଉପଯୁକ୍ତ ହେଉ

ନେଉ ପୁଣି ନୂଆ ମୋଡ଼ ।।

କଣ୍ଟିପୁର, ବିଞ୍ଝାରପୁର, ଯାଜପୁର

ମୋ - ୭୮୯୪୦୬୦୬୬୬

VOL.IX, ISSUE.IX, SEPTEMBER-2025

Published By Banamallira Mahak

ଶରତ ଆସିଲା - ସ୍ଵର୍ଣ୍ଣଲତା ପତି

2025-09-15T21:21:00.003+05:30

ସ୍ଵର୍ଣ୍ଣଲତା ପତି

ଶରତ ଆସିଲା ମରତ ହସିଲା

ହସିଲା କୁଆଁରୀ ଜହ୍ନ,

ବାରିଦ ଭାସିଲା ଶିଶିର ଖସିଲା

ଉଲ୍ଲସିଲେ ତରୁତୃଣ ॥

ଶେଫାଳୀ ବାସିଲା ପଦ୍ମ ବିକଶିଲା

କୁମୁଦଟି ସରୋବରେ,

ଚାମର ବିଞ୍ଚିଲା ଶୁଭ୍ର କାଶତଣ୍ଡୀ

ନଈପଠା ଗୋହିରୀରେ ॥

ଦଶରା ଆସିଲା ମଣ୍ଡପ ସାଜିଲା

ପୁର ଗ୍ରାମ ନଗରୀରେ,

ଟମକ ବାଜିଲା ପୂଜାସଜ ହେଲା

ମାଆ ବିଜେ ଧରଣୀରେ ॥

ଦିଗ ନିରିମଳ କାଚକେନ୍ଦୁ ଜଳ

ତହିଁ ଖରା ଛାଇ ଖେଳ,

ସମୀର ବହିଲା ଶୀତଳତା ଘେନି

ମଧୁର ଶରତ କାଳ ॥

ଗୀତ ଶୁଭିଗଲା ବଉଳବେଣୀର

କୁଆଁର ପୁନେଇଁ ପୁଚି,

ଜୋଛନାରେ ଭରା ଜହ୍ନିଫୁଲ ତୋରା

କୁଆଁରୀ ମନଟି ନାଚି ॥

ତରୁଏ ହସିଲେ ଫୁଲଫଳ ଘେନି

ପକ୍ଷୀଏ ଗାଇଲେ ଗୀତ,

ସବୁଜିମା ଭରେ କେଦାରେ କେଦାରେ

ଶସ୍ୟରେ ହସିଲେ କ୍ଷେତ ॥

ଉତ୍ତରା ଶାସନ, କୌଶଲ୍ୟା ଗଙ୍ଗ, ପିପିଲି, ପୁରୀ

Now staying at - Washington, USA

VOL.IX, ISSUE.IX, SEPTEMBER-2025

Published By Banamallira Mahak

ପଥର - ସୁରେଶ ଚନ୍ଦ୍ର ବାୟୀ

2025-09-15T21:07:00.004+05:30

ସୁରେଶ ଚନ୍ଦ୍ର ବାୟୀ

ପଥର ମୁହିଁ ଯୁଗ ଯୁଗରୁ

ନୀରବେ ରହିଛି ଚାହିଁ,

କିଏସେ ନେବ ଜୀବନ ଦେବ

ବସିବି ଦେବତା ହୋଇ l

ବିଭିନ୍ନ ରଙ୍ଗେ ମୋ ଦେହକୁ

ସଜାଇବ ଦେବ କହି,

ମୋହର ଆଶା ପୂରଣ ହେବ

ଯେପରି ଉଛୁଳା ନଈ l

ପ୍ରତ୍ୟେକ କବି ମୋ ନାମରେ

ଲେଖୁଥିବେ ଗୁଣ ଗାଇ,

ଦୂର ଦୂରରୁ ଭକ୍ତ ଆସିବେ

ଭୋଗ ଆଉ ଅର୍ଥ ନେଇ l

ସବୁରି ମଥା ମୋ ପାଖେ ଆସି

ପଡିବେ ପାଦରେ ଶୋଇ,

ନିର୍ବିକାରରେ ତା' ଡାକରାରେ

ଆଶୀର୍ବାଦ ଦେବି ଥୋଇ l

ପୂଜା ପାଇବି ଫୁଲ ଫଳରେ

ନୀରବରେ ବସି ରହି

ହୃଦୟେ ବସା ବାନ୍ଧି ତାଙ୍କର

ଭରସା ତ ଦେବି ମୁହିଁ l

ଚଳଚଞ୍ଚଳ ମୋ ଦେହ ନାହିଁ

କହେ ନାହିଁ ଟିକେ କଥା

ତଥାପି ମୋତେ ପୂଜା ମିଳବ

ଶୁଣେ ନାହିଁ କାହା ବ୍ୟଥା l

ଦୁଃଖ ଯନ୍ତ୍ରଣା ମଣିଷ ପାଇ

ମୋ ପାଖେ ଆସିବ ଧାଇଁ,

ଜାଣେନା ସେହି ମୁଁ ତ ପଥର

ମୋ ପାଖେ କିଛି ନାହିଁ l

ମୋର ମନ୍ଦିର ଗଢ଼ାଇ ଦେବେ

ପ୍ରତ୍ୟକ୍ଷ ଦେବତା କହି,

ମୁଁ ତ ରହିବି ଅଭିଷେକରେ

ମନ୍ଦିରେ ସାଇତା ହୋଇ l

ପ୍ରବାହ ସାହିତ୍ୟ ସଂସଦ, କଣ୍ଟାବଣ

ନୀଳକଣ୍ଠପୁର, ବଡପଡା, କେନ୍ଦ୍ରାପଡା

VOL.IX, ISSUE.IX, SEPTEMBER-2025

Published By Banamallira Mahak