Battirep News

மட்டக்களப்பு – திருப்பழுகாமத்தில் இரத்ததான முகாம்!

2026-10-26T06:14:42.251+05:30

(எஸ்.ரஞ்சன்)

“ஒரு துளி இரத்தம் – ஒரு உயிரின் நம்பிக்கை” எனும் தொனிப்பொருளில் ஏற்பாடு செய்யப்பட்ட ,

மட்டக்களப்பு, போரதீவுப்பற்று பிரதேசத்தின் திருப்பழுகாமத்தில், சூட்டிங் ஸ்டார் விளையாட்டுக்கழகத்தின் ஏற்பாட்டில் இரத்ததான முகாம் நேற்று (25.10.2026)ஆம் திகதி ஞாயிற்றுக்கிழமை நடைபெற்றது.

திருப்பழுகாமம் பிரதேச வைத்தியசாலையில் நேற்று 9 மணிக்கு ஆரம்பமான இம்முகாம், “ஒரு துளி இரத்தம் – ஒரு உயிரின் நம்பிக்கை” எனும் தொனிப்பொருளில் முன்னெடுக்கப்பட்டது.

இரத்ததானத்தின் முக்கியத்துவத்தை வலியுறுத்தி ஏற்பாடு செய்யப்பட்ட இம்முகாமில், "சூட்டிங் ஸ்டார்" விளையாட்டுக்கழக உறுப்பினர்கள், இளைஞர், யுவதிகள் மற்றும் பொதுமக்கள் எனப் பலரும் ஆர்வத்துடன் கலந்துகொண்டு இரத்ததானம் செய்தனர்.

மட்டக்களப்பு போதனா வைத்தியசாலையின் இரத்த வங்கியைச் சேர்ந்த வைத்தியர் ஆர். சஞ்ஜிதா தலைமையிலான வைத்தியசாலைக் குழுவினர் இரத்ததான நடவடிக்கைகளை முன்னெடுத்தனர்.

குறிப்பாக, திருப்பழுகாமம் சூட்டிங் ஸ்டார் விளையாட்டுக்கழகமானது ஒவ்வொரு வருடமும் இவ்வாறான இரத்ததான முகாம்களைத் தொடர்ச்சியாக ஏற்பாடு செய்து வருகின்றமை குறிப்பிடத்தக்கது.

உயிர்களைக் காக்கும் உன்னதப் பணியில் இளைஞர்களையும் பொதுமக்களையும் ஒன்றிணைத்து, சமூக நலனையும் மனிதநேயத்தையும் முன்னிறுத்தும் இத்தகைய செயற்பாடுகள் பாராட்டத்தக்கவையாகும்.

இந்தியாவில் உள்ள அகதிகளை மீளக் கொண்டு வருவதாக ஒரு திட்டமில்லாமல் கனடாவில் இரு அமைப்புக்கள் வசூலிக்கப்பட்டு வரும்; பணம் உடன் நிறுத்த வேண்டும் --ஈரோஸ் கட்சியின் தலைவர் இராஜநாதன் பிரபாகரன்--

2026-10-26T06:02:16.666+05:30

(கனகராஜா சரவணன்)

கனடாவில் இந்தியாவில் அகதிகளாக இருக்கும் இலங்கை தமிழ் மக்களை மீள இலங்கைக்கு கொண்டு வருவதாக கனடியன் பேரவை அமைப்பு மற்றும் ஜ.எம்.எஸ் என்ற அமைப்பு அதற்கான திட்டம் இல்லாது இரு நாட்டு அரசுகளுடன் பேசாது ஒரு உத்தரவாதம் இன்றி மக்களிடம் வசூலித்து வருகின்றனர் எனவே இந்த அமைப்புகள் பணம் வசூலிப்பதை உடன் நிறுத்த வேண்டும் வசூலித்த பணம் எவ்வளவு என உடன் அறிவிக்க வேண்டும். என ஈரோஸ் கட்சியின் தலைவர் இராஜநாதன் பிரபாகரன் தெரிவித்தார்.

மட்டக்களப்பு வொய்ஸ் ஒப் மீடியாவில் நேற்று சனிக்கிழமை (24) இடம்பெற்ற ஊடக மாநாட்டில் அவர் இவ்வாறு தெரிவித்தார்.

இந்தியாவில் அகதிகளாக இருக்கும் இலங்கை தமிழ் மக்களை மீள இலங்கைக்கு கொண்டு வருவதாக கனடாவில் கனடியன் பேரவை அமைப்பு மற்றும் ஜ.எம்.எஸ் என்ற அமைப்பு பணம் வசூலித்து வருவது தொடர்பாக சில சர்ச்சைகள் இடம்பெற்று வருகின்றது.

இது தொடர்பாக இந்தியா திருச்சி மற்றும் புலால் முகாம்களில் உள்ள மக்கள் தாங்கள் தாய் நாட்டுக்கு வரப்போகின்றோம் அதற்கான ஆயத்தங்கள் செய்து தருமாறு என்னுடன் தொடர்பு கொண்டு கோரியுள்ளனர் இதற்கமைய எதிர்வரும் மாதம் இந்தியாவுக்கு குழு ஒன்றுடன் செல்லவுள்ளேன் அப்போது அனைத்து முகாம்களுக்கும் விஜயம் மேற்கொள்ளவுள்ளேன்

இந்த நிலையில் கனடியன் பேரவை அமைப்பு மற்றும் ஜ.எம்.எஸ் என்ற அமைப்பும் பாதயாத்திரையாக சென்று பணம் வசூலிக்கின்றனர் இது கனடாவில் மாத்திரம் அல்ல பல ஐரோப்பிய நாடுகளில் இவ்வாறு பணம் வசூலித்து வருகின்றனர்

இந்த அமைப்புகள் பணம் வசூலிப்பதை பாராட்டுகின்றோம் இந்தியாவில் அகதிகளாக இருக்கும் மக்களை மீளக் குடியமர்த்துவது நல்ல விஷயம் ஆனால் அதற்கான திட்டமிடல் இருக்கிறது அந்த திட்டத்தை வெளிப்படுத்தியதா? இலங்கை அரசுடன் அல்லது இந்திய அரசுடன் பேசினார்களா ? யார் உத்தரவாதம் தந்தார்கள் ? இவைகள் எதுவும் இல்லாமல் எப்படி பணம் வசூலிப்பார்கள்.

கடந்த காலத்தில் புலம்பெயர் நாடுகளில் உள்ள தமிழ் மக்கள் போராட்டத்தை ஆதரித்து கஷ்டப்பட்டு உழைத்து கொடுத்து இன்று கடனாளியாக எத்தனையோ பேர் கடன் கட்ட முடியாது இரண்டு அல்லது மூன்று தொழில்களை செய்து கஷ்டப்பட்டுக் கொண்டிருக்கிறார்கள்

இவ்வாறான நிலையில் முதலாவது அந்த மக்கள் வர விரும்ப வேண்டும் அவர்களை கொண்டு வந்தால் அவர்களுக்கான காணி, வீடுகள், வாழ்வாதாரம், இருப்பிடத்தை உறுதிப்படுத்த வேண்டும், அந்த புலம் பெயர்ந்த மக்களை மீளக் கொண்டு வந்து குடியேற்றுவதற்கான சட்டதிட்டம் நிறைய இருக்கிறது இவ்வாறு பல பிரச்சனை இருக்கிறது
இவ்வாறான நிலையில் இரண்டு நாட்டு அரசாங்கங்களுடன் கலந்து உரையாடாமல் எவ்வாறு பணம் வசூலிப்பீர்கள் எனவே பணம் வசூலிப்பதை உடன் நிறுத்தப்பட வேண்டும் என்பதுடன் கனடாவில் உள்ள புலம்பெயர் தமிழர்கள் மாத்திரம் அல்ல ஐரோப்பிய நாடுகளில் உள்ள தமிழ் மக்களும் விழிப்பாக இருக்க வேண்டும்.;

இந்த அகதிகளை மீளக் குடியேற்றுவது தொடர்பில் நாங்கள் புலம்பெயர் தேசத்தில் உள்ளவர்கள் உட்பட ஒரு குழுவை ஏற்படுத்தி ஆலோசனைகளை பெற்று முன்னெடுத்துக் கொண்டு வருகிறோம். என்பதுடன் அடுத்த மாதம் என்னுடன் குழு ஒன்று இந்தியாவுக்கு பயணமாகிறது அங்கு அனைத்து அகதி முகாம்களுக்கு சென்று பார்வையிட்டு அவர்களின் விருப்பு வெறுப்புகளை தெரிந்து கொண்ட பின்னர் இலங்கை அரசுடன் இந்திய அரசுடன் பேசமுடியும்.

எனவே இந்தியாவில் உள்ள அகதிகளை மீள கொண்டு வந்து குடியேற்றுவது தொடர்பாக எல்லோரும் ஒன்றிணைந்து செயற்பட கனடியன் பேரவை அமைப்பு மற்றும் ஜ.எம்.எஸ் என்ற அமைப்பு என்னுடன் தொடர்பு கொள்ளவும்.

அதேவேளை ஐரோப்பிய நாடுகளில் உள்ள இலங்கை வாழ் மக்களின் இலங்கை கடவுச்சீட்டு காலாவதியான மற்றும் புதிய பாஸ் போட்டுக்களை பெறுவதற்காக அந்தந்த நாடுகளில் உள்ள இலங்கை தூதரகங்களுக்கு சென்று பாஸ்போட்டை புதிப்பித்து பெற்றுக் கொள்ள குறைந்தது 6 மாதம் தொடக்கம் 2 வருட காலம் நீடிக்கின்றனர்.

அது மட்டுமல்ல அதற்கான கட்டணங்கள் அதிகரிக்கின்றது இதனால் அவசர தேவைக்காக அந்த மக்கள் இலங்கைக்கு திரும்ப முடியாத நிலையில் உள்ளனர் எனவே இந்த ஆட்சி காலத்தில் இப்படியான செயல்பாடு வரவேற்கதக்கது அல்ல.

இந்த நாட்டுக்கு நல்ல ஒரு ஜனாதிபதி கிடைத்திருக்கிறார் அவர் ஒரு புனிதமான பயணம் மேற்கொண்டு வருகின்றார் இந்த ஆட்சியை வீழ்த்துவதற்கு கொஞ்ச தேரர்கள் உண்ணாவிரதம் இருப்பது மட்டுமல்ல அவருக்கு பொம்மை ஒன்றை ஓடவைத்து சூனியம் செய்கின்றனர் இது அனைத்து எதிர் கட்சிகளின் சதி

இந்த எதிர்க்கட்சி யார் என்றால் கொள்ளையடித்து, கொலை செய்து, சிறுநீரகத்தை விற்று, கண்ணை பிடுங்கி விற்று, சடலங்களை முதலைக்கு உணவாக போட்ட இந்த கூட்டம் தான் இந்த சதி எனவே எந்த சூனியமே சதியே ஜனாதிபதி அனுரா குமார திஸாநாயக்க விடம் பலிக்காது இன்னும் 20 வருடம் அலர் ஆட்சி செய்வார் எனவே இந்த சிறுபிள்ளை தனமான செயலை விட்டுவிட்டு அவருடன் ஒன்றினைந்து பயணித்தால் 10 வருடத்தில் இலங்கையை சிங்கப்பூர் போல கொண்டு வரலாம்.

ஜனாதிபதி ஆட்சியை பொறுப்பேற்றதும் நாட்டை சூறையாடிய கள்வர் கூட்டம் சிறையில் அடைக்கப்பட்டனர் இவர்களுடன் தொடர்புபட்டவர்கள் சங்கிலி கோர்வை மாதிரி பின்னால் இருக்கின்றனர் இது சிங்கள பகுதியில் நடக்கின்றது இந்த கைதுகள் வடக்கு கிழக்கில் 3 மாதத்தில் வந்துவிடும் எனவே அடித்த கொள்ளைகள், கொலைகள், சுத்துமாத்து எல்லா பட்டியல் வைத்திருக்கின்றனர் ஆகவே சிறைக்கு போவதற்கு பெட்டி படுக்கையை கட்டிக் கொண்டு தயாராகுங்கள்

அதேவேளை நாடாளுமன்ற உறுப்பினர் இரா.சாணக்கியன் கடந்த தேர்தலின் போது 60 கோடி வாங்கியதாக தெரிவிக்கப்படும் குற்றச்சாட்டு தொடர்பாக அரசாங்கம் விசாரணை ஒன்றை மேற்கொண்டு தெளிவுபடுத்த வேண்டும் என்றார்.

ஹாஜியானி சித்தி ஜெஸீனா நிஸ்றீனின் ‘சங்கையின் ஒலி’ கவிதைத் தொகுப்பு நூல் வெளியீடு!

2026-10-26T05:56:56.567+05:30

நூருல் ஹுதா உமர்

ஹாஜியானி சித்தி ஜெஸீனா நிஸ்றீன் எழுதிய ‘சங்கையின் ஒலி’ கவிதைத் தொகுப்பு நூல் வெளியீட்டு விழா இன்று (25) ஞாயிற்றுக்கிழமை மாலை சாய்ந்தமருது பொலிவேரியன் கிராமத்தில் அமைந்துள்ள கலாசார மத்திய நிலையத்தில் நடைபெற்றது.

முன்னாள் அதிபரும் முன்னாள் கோட்டக் கல்வி அதிகாரியுமான கலாபூஷணம் ஏ. பீர்முகம்மது (இரண்டாம் விசுவாமித்திரன்) தலைமையில் நடைபெற்ற இந்நிகழ்வில், கல்முனை பிராந்திய சுகாதார சேவைகள் பணிப்பாளர் டாக்டர் ஸகீலா இஸ்ஸதீன் பிரதம அதிதியாகக் கலந்து சிறப்பித்தார்.

கௌரவ அதிதிகளாக கிழக்கு மாகாண பண்பாட்டலுவல்கள் திணைக்களத்தின் சிரேஷ்ட கலாசார உத்தியோகத்தர் ஏ.எல். தௌபீக், சாய்ந்தமருது பிரதேச செயலக கலாசார அபிவிருத்தி உத்தியோகத்தர் எம்.எம். றஷ்மி மூஸா ஆகியோர் கலந்து கொண்டனர்.

விசேட அதிதிகளாக சாய்ந்தமருது கலாசார மத்திய நிலையப் பொறுப்பதிகாரியும் கலாசார மேம்பாட்டு உத்தியோகத்தருமான ஏ.பி. நௌஷாத் கலந்து சிறப்பித்தார்.

நூலாசிரியர் ஹாஜியானி சித்தி ஜெஸீனா நிஸ்றீன், தனது கவிதைத் தொகுப்பு நூலை தனது தாயான ஹாஜியானி ஜெமீலா கரீம் அவர்களுக்குச் சமர்ப்பணம் செய்தார்.

நூலின் முதன்மைப் பிரதிகளை ஸ்ரீலங்கா முஸ்லிம் காங்கிரஸின் உச்சபீட உறுப்பினரும் இளைஞர் அமைப்பாளருமான எம்.எம்.எம். பாமி, ஓய்வுபெற்ற பொறியியலாளர் அல்ஹாஜ் எம்.ஐ.எம். அப்துல் ஸலாம் மற்றும் ஓய்வுபெற்ற சிரேஷ்ட பொதுச் சுகாதாரப் பரிசோதகர் அல்ஹாஜ் சி.பி.எம். ஹனீபா ஆகியோர் பெற்றுக்கொண்டனர்.

நிகழ்வில் ஒலுவில் தென்கிழக்குப் பல்கலைக்கழக தமிழ்த்துறை சிரேஷ்ட தலைமை பேராசிரியர் றமீஸ் அப்துல்லாஹ் மற்றும் தென்கிழக்குப் பல்கலைக்கழக தமிழ்த்துறை முதுநிலை விரிவுரையாளர் எம். அப்துல் றஸாக் ஆகியோர் சிறப்புரையாற்றினர்.

ஸ்ரீலங்கா பென் கிளப்பின் தலைவியும் கலாபூஷணமுமான சித்தி மஷுறா சுஹுர்தீன் நூல் தொடர்பான இரசனைக் குறிப்பை வழங்கினார். அம்பாறை மாவட்ட கலாசார அதிகாரசபையின் பிரதித் தலைவரும் மருதம் கலைக்கூடல் மன்றத்தின் தலைவருமான அஸ்வான் சக்காப் மௌலானா வாழ்த்துரை வழங்கினார்.

இந்நூல் வெளியீட்டு விழா கவிதை இலக்கியத்தையும் படைப்பாற்றலையும் ஊக்குவிக்கும் நிகழ்வாக அமைந்ததுடன், இலக்கிய ஆர்வலர்கள், கல்வியாளர்கள், கலாசாரத் துறை சார்ந்தோர் மற்றும் சமூகப் பிரமுகர்களின் பங்கேற்புடன் சிறப்பாக நடைபெற்றது.

துறைநீலாவணை லயன்ஸ்டார் விளையாட்டுக்கழகத்தின் 26 ஆவது ஆண்டு நிறைவு விழா

2026-10-25T21:23:13.735+05:30

மட்டக்களப்பு துறைநீலாவணை லயன்ஸ்டார் விளையாட்டுக்கழகத்தின் 26 ஆவது ஆண்டு நிறைவு விழாவினை முன்னிட்டு மாபெரும் கிறிக்கட் மென்பந்து சுற்றுப்போட்டியின் இறுதிப்போட்டி கழகத் தலைவர் தம்பிமுத்து ரூபகுமார் தலைமையில் 25 ஆம் திகதி ஞாயிற்றுக்கிழமை துறைநீலாவணைப் பொது விளையாட்டு மைதானத்தில் இடம்பெற்றது.

இப்போட்டிக்கு மட்டக்களப்பு அம்பாரை மாவட்டங்களைச் சேர்ந்த சுமார் 40 விளையாட்டுக் கழகங்கள் பங்குபற்றியிருந்ததுடன் இறுதிப்போட்டிக்கு களுதாவளை கெனடிக் விளையாட்டுக் கழகமும், மகீழுர் பயனியர் விளையாட்டுக் கழகமும் தெரிவாகியது. இதில் களுதாவளை கெனடிக்விளையாட்டுக்கழகம் சம்பியனாகத் தெரிவாகியது.

இந்நிகழ்வில் அதிதிகளாக மண்முனை தென்எருவில் பற்றுப் பிரதேசசபையின் தவிசாளர் மே.வினோராஜ்; ,தில்லையம்பலப்பிள்ளையார் ஆலயத் தலைவர் ஓய்வுநிலை அதிபர் மு.இராஜகோபால் ,சிறி முத்துமாரியம்மன் ஆலயத் தலைவர் சா.புஸ்பராசா, ஊடகவியலாளரும் ஆசிரியருமான சா.நடனசபேசன் மற்றும் கழக வீரர்கள் கலந்து சிறப்பித்தனர்.

இப்போட்டிக்கான அனுசரணையினை ஏ.துசாந் ,பி.சுகீர்தன், கே.அசோக், எஸ்.துசாபரன் ஆகியோர்கள் வழங்கியிருந்தமை குறிப்பிடத்தக்கது.

தீபாவளிச்சிறப்பு வில்லுப்பாட்டுக்கான கலந்துரையாடல்

2026-10-25T19:50:06.513+05:30

( வி.ரி.சகாதேவராஜா)

தீபாவளி சிறப்பை கொண்டாடுமுகமாக, கல்முனை எழுத்தாளர் ஒருங்கிணைப்பு மையம் வில்லுப்பாட்டு ஒன்றை நடத்த கலந்துரையாடல் ஒன்றை மேற்கொண்டது.

குறித்த கலந்துரையாடல் கல்முனை நெற் ஊடக வலையமைப்பின் தலைமையகத்தில், வலையமைப்பின் ஆலோசகர் வி.ரி. சகாதேவராஜா தலைமையில் நேற்று (24) சனிக்கிழமை நடைபெற்றது.

முன்னதாக ஒருங்கிணைப்பு மைய செயலாளர் கா. சாந்தகுமார் வரவேற்புரை நிகழ்த்த, திட்ட இணைப்பாளர் பி.சந்திரமோகன் திட்டம் பற்றி விளக்கினார் .

தொடர்ந்து பிரபல எழுத்தாளர்களான கலாபூஷணம் அக்கரைப் பாக்கியன், கலாபூஷணம் டேவிட் ஆகியோர் வில்லுப்பாட்டு தொடர்பாக விளக்கமளித்தனர்.

எழுத்தாளர் ஒருங்கிணைப்பு மைய உறுப்பினர்களும் கருத்துக்களை தெரிவித்தனர்.

அதன்படி, எதிர்வரும் 04 ஆம் திகதி காலை பெரிய நீலா வணையில் ஒளிப்பதிவு செய்வதற்கு ஸ்தாபகர் பு.கேதீஸ் நடவடிக்கை எடுத்துள்ளார்.

இதேவேளை, ஜனவரி பிற் பகுதியில் இலக்கிய ஆர்வலர்களுக்கு இரண்டாம் கட்டப்பயிற்சி பட்டறை ஒன்றை நடத்தவும் தீர்மானிக்கப்பட்டது.

மட்டக்களப்பு வாவியில் முதன் முதலாக மிதக்கும் உணவக படகுச் சேவை லியா கபே ஹோட்டல் ஆரம்பித்து வைப்பு

2026-10-25T19:47:56.983+05:30

(கனகராஜா சரவணன்)

இலங்கையின் இரண்டாவது நீளமான மட்டக்களப்பு வாவியில் மிதக்கும் உணவகம் ஒன்றை கல்லடியில் அமைந்துள்ள லியா கபே ஹோட்டல் உல்லாச துறையை ஊக்குவிக்கும் முகமாக முதன் முதலாக அறிமுகப்படுத்தி நேற்று சனிக்கிழமை (24) சம்பிரதாய பூர்வமாக நாடாளுமன்ற உறுப்பினர் ஞா.சிறிநேசன் மற்றும் மாநகரசபை முதல்வர் சிவம் பாக்கியநாதன் இணைந்து நாடா வெட்டி ஆரம்பித்து வைத்தனர்.

கல்லடி பாலத்துக்கு அருகில் அமைந்துள்ள லியா கபே ஹோட்டல் உரிமையாளர் சரண்ராஜ் உல்லாச பயணிகளை கவரும் திட்டத்தில் மட்டக்களப்பு வாவியில் மிதக்கும் உணவகமான படகு சேவை ஒன்றை ஆரம்பித்து வைக்கும் நிகழ்வு நேற்று சனிக்கிழமை இடம்பெற்றது

இந்த நிகழ்வில் அதிதிகளாக நாடாளுமன்ற உறுப்பினர் ஞா.சிறிநேசன் மற்றும் மாநகரசபை முதல்வர் சிவம் பாக்கியநாதன், பிரதி முதல்வர், வர்த்தகர்கள், மாநகர சபை உறுப்பினர்கள், மட்டக்களப்பு கடற்றொழில் நீரியல் வள திணைக்கள பணிப்பாளர், மாவட்ட சுற்றுலாத்துறை பணிப்பாளர் உட்பட பலர் கலந்து கொண்டு மிதக்கும் உணவகமான படகு சேவையை சம்பிரதாய பூர்வமாக நாடா வெட்டி திறந்து வைத்து ஆரம்பித்தனர்.

இந்த மிதக்கும் உணவக படகில் 40 பேர் பயணித்து கொண்டு உணவு உண்ண முடியும் என்பதுடன் இங்கு மதுபானம் புகைத்தல் தடை விதிக்கப்பட்டுள்ளது டன் வெளியில் இருந்து உணவுகளை எடுத்து வர முடியாது எனவும் பல கட்டுப்பாட்டின் கீழ் இந்த மிதக்கும் உணவு படகு சேவை இடம்பெறும் எனவும் அதன் உரிமையாளர் தெரிவித்தார்.

1990ஆம் ஆண்டுக்குப் பின்னர் சொந்த இடத்தில் மீண்டும் அமையும் காங்கேசன்துறை தபால் நிலையம்

2026-10-25T19:46:17.861+05:30

(கனகராஜா சரவணன்)

யாழ்ப்பாணம், காங்கேசன்துறையில் 1990ஆம் ஆண்டுக்குப் பின்னர் மீண்டும் அதன் சொந்த இடத்தில் புதிய தபால் நிலையத்தை நிர்மாணிப்பதற்கான அடிக்கல் நாட்டும் நிகழ்வு இன்று (25) நடைபெற்றது.

இலங்கையில் நிலவிய உள்நாட்டுப் போர் காரணமாக 1990ஆம் ஆண்டு வலிகாமம் வடக்குப் பகுதியிலிருந்து மக்கள் இடம்பெயர்ந்ததையடுத்து, காங்கேசன்துறை தபால் நிலையத்தின் செயற்பாடுகளும் அதன் சொந்த இடத்திலிருந்து வேறு இடத்திற்கு மாற்றப்பட்டன.

பின்னர், அப்பகுதியில் மக்கள் மீள்குடியேற அனுமதிக்கப்பட்டதையடுத்து, தபால் நிலையம் தனியார் கட்டடமொன்றில் தற்காலிகமாக இயங்கி வந்தது.

இந்நிலையில், காங்கேசன்துறை உப தபாலகம் அமைந்திருந்த பகுதியில் 32.09 மில்லியன் ரூபாய் செலவில் புதிய தபால் நிலையத்தை நிர்மாணிப்பதற்கான அடிக்கல் இன்று நாட்டப்பட்டது.

இதற்கான கட்டுமானப் பணிகளை எதிர்வரும் மே மாதம் 10ஆம் திகதிக்கு முன்னர் நிறைவு செய்யத் திட்டமிடப்பட்டுள்ளது.

சுகாதாரம் மற்றும் வெகுஜன ஊடக அமைச்சர் வைத்தியர் நளிந்த ஜயதிஸ்ஸ பங்கேற்புடன் நடைபெற்ற இந்நிகழ்வில், கடற்றொழில், நீரியல் மற்றும் கடல்வளங்கள் அமைச்சர் இராமலிங்கம் சந்திரசேகர், தேசிய மக்கள் சக்தியின் நாடாளுமன்ற உறுப்பினர் ச. பவானந்தராஜா, மாவட்ட மற்றும் பிரதேச மட்ட அரச அதிகாரிகள், அலுவலகங்களின் இணைப்பாளர்கள், பிரதேச சபைத் தவிசாளர், உள்ளூராட்சி மன்ற உறுப்பினர்கள், அரசியல் பிரதிநிதிகள் மற்றும் தேசிய மக்கள் சக்தியின் உறுப்பினர்கள் உள்ளிட்ட பலரும் கலந்துகொண்டனர்.

நாய்களை பதிவு செய்யாத உரிமையாளர்களுக்கு எதிராக 10,000 ரூபா அபராதம்!

2026-10-25T19:44:51.980+05:30

நாய்களை பதிவு செய்யாத உரிமையாளர்களுக்கு எதிராக 10,000 ரூபா அபராதம்! உள்ளூராட்சி நிறுவனங்கள் ஊடாக பதிவு செய்ய நடவடிக்கை!

விசர்நாய்க்கடி நோயை ஒழித்தல் மற்றும் நாய்களை பதிவு செய்வதற்கான சட்டமூலம் நிறைவேற்றபட்ட பின்னர் நாய்களை பதிவு செய்யாத உரிமையாளர்களுக்கு எதிராக 10,000 ரூபா அபராதம் விதிக்கப்படும் எனவும், நாய்களை உள்ளூராட்சி நிறுவனங்கள் ஊடாக பதிவு செய்ய நடவடிக்கைகள் முன்னெடுக்கப்படும் எனவும், நாய்களை பதிவு செய்வதற்கு முன்பு விசர்நாய்கடி ஊசி ஏற்றப்பட வேண்டும் என

-பொதுநிர்வாக, மாகாண சபை மற்றும் உள்ளூராட்சி அமைச்சு தெரிவித்துள்ளது.

கல்முனையில் யானையின் அட்டகாசம் ! ——-

2026-10-25T19:44:15.736+05:30

( எம்.என்.எம். அப்ராஸ்)

அம்பாறை மாவட்டம்,கல்முனை பகுதியில் பொது மக்கள் வசிக்கும் பகுதியில் இன்று (25) அதிகாலை காட்டு யானைகளின் அட்டகாசத்தினால் வீட்டு மதில்கள் மற்றும் களஞ்சிய சாலை என்பன சேதப்படுத்தப்பட்டுள்ளது.

கல்முனை பிரதான வீதியில் அமைந்துள்ள லங்கா சதோசவின்(Lanka Sathosa)அலியார் வீதியில் உள்ள களஞ்சியம் மற்றும் அதன் அருகில் உள்ள வீட்டு கேற், மதில் என்பவற்றை இன்று அதிகாலை காட்டு யானைகள் இரண்டு உடைத்து சேதப்படுத்தியது.

யானைகளின் அட்டகாசத்தினால் வீட்டில் தங்கியிருந்த மக்கள் தெய்வாதீனமாக உயிர் தப்பியுள்ளனர்.

இதனால் குறித்த பிரதேசத்தில் இரவு நேரங்களில் அச்சம் நிலவிவருவதாக பிரதேச மக்கள் தெரிவிக்கின்றனர்.

பொது மக்கள் வசிக்கும் பகுதியில் அண்மைக் நாட்களில் இரவு வேளைகளில் ஊடுருவும் காட்டு யானைகள் அயலிலுள்ள வயல் வெளிகளில் கடந்த சில நாட்களாக சஞ்சரித்து காணப்படும் நிலையில் யானைகள் குறித்த பொது மக்கள் வசிக்கும் பகுதியில் வந்து சேதம் விளைவித்து வந்ததாக பொது மக்கள் தெரிவிக்கினறனர்.

யானைகளின் வருகையினை மக்கள் குடியிருப்பு பகுதிகளில் வருகை தருவதை கட்டுப் கட்டுப்படுத்துமாறு பொது மக்கள் உரியவர்களிடம் கோரிக்கை விடுக்கின்றனர்.

காட்டு யானைகள் அட்டகாசம்- நயினாகாட்டில் ஒருவர் உயிரிழப்பு- சதோச களஞ்சியம் சேதம். மாவடிப்பள்ளி, சம்மாந்துறை, கல்முனை பகுதிகளில் தொடரும் யானைகளின் அச்சுறுத்தல் – மக்கள் பீதி

2026-10-25T19:41:56.708+05:30

[அம்பாறை நிருபர் - பாறுக் ஷிஹான்]

அம்பாறை மாவட்டத்தின் பல்வேறு பகுதிகளில் நெல் அறுவடை நிறைவடைந்துள்ள நிலையில், மாவடிப்பள்ளி, சம்மாந்துறை, காரைதீவு, நிந்தவூர், சாய்ந்தமருது மற்றும் கல்முனை உள்ளிட்ட பகுதிகளில் காட்டு யானைகளின் நடமாட்டம் வெகுவாக அதிகரித்துள்ளது. இதன் காரணமாக அப்பகுதி பொதுமக்கள் அச்சத்திலும் பீதியிலும் ஆழ்ந்துள்ளனர்.

குறிப்பாக இரவு நேரங்களில் பிரதான வீதிகள் மற்றும் குடியிருப்புப் பகுதிகளுக்குள் யானைகள் ஊடுருவுவதால், மனித உயிர்களுக்கும் சொத்துக்களுக்கும் கடும் அச்சுறுத்தல் ஏற்பட்டுள்ளது.

யானை தாக்குதலில் குடும்பஸ்தர் பலி

இறக்காமம் 07 – நயினாகாடு பகுதியில் நேற்று இரவு இடம்பெற்ற காட்டு யானை தாக்குதலில் நிந்தவூர், கோவில் வீதி, 19ஆம் பிரிவைச் சேர்ந்த 38 வயதுடைய மீரா
தஸ்லிம் என்பவர் பரிதாபமாக உயிரிழந்துள்ளார்.

ஹோட்டல் ஒன்றில் கூலித் தொழிலாளியாகப் பணியாற்றி வந்த இவர், நேற்றைய தினம் மோட்டார் சைக்கிளில் வீடு திரும்பிக்கொண்டிருந்தபோது திடீரென எதிரே வந்த காட்டு யானையைக் கண்டு தப்பியோட முயன்றுள்ளார். இதன்போது நிலத்தில் இடறி விழுந்த அவரை யானை மிதித்ததில், அவர் சம்பவ இடத்திலேயே உயிரிழந்துள்ளதாக தெரிவிக்கப்படுகின்றது.

சடலம் பிரேத பரிசோதனைக்காக அம்பாறை மாவட்ட பொது வைத்தியசாலையில் ஒப்படைக்கப்பட்டுள்ளதாக இறக்காமம் பொலிஸார் தெரிவித்தனர்.

சிகிச்சை பலனின்றி உயிரிழந்த காட்டு யானை

இதேவேளை, சம்மாந்துறை பிரதேச செயலாளர் பிரிவுக்குட்பட்ட சேகப்பற்று வயல் பகுதியில் கடந்த இரண்டு நாட்களாக நோய்வாய்ப்பட்ட நிலையில் காணப்பட்ட காட்டு யானையொன்று, வனவிலங்கு அதிகாரிகளின் தீவிர சிகிச்சைகளுக்கு மத்தியிலும் நேற்று (24) சனிக்கிழமை சிகிச்சை பலனின்றி உயிரிழந்துள்ளது.

குடியிருப்புகளுக்குள் புகுந்து தொடரும் சேதங்கள்

நேற்று இரவு சம்மாந்துறை முஸ்லிம் மத்திய மகா வித்தியாலயம் மற்றும் அதனை அண்டிய வீதிகளில் காட்டு யானைகள் சுதந்திரமாக உலாவந்துள்ளன.

அத்துடன், இன்று அதிகாலை வேளையில் கல்முனை லங்கா சதோச களஞ்சியத்தின் முன்பக்கக் கதவை உடைத்து சேதப்படுத்திய யானைகள், அங்கிருந்த பொருட்களையும் நாசமாக்கியுள்ளன. மேலும், அதனை அண்டியுள்ள வீடொன்றின் சுற்றுமதிலையும் உடைத்து அட்டகாசத்தில் ஈடுபட்டுள்ளன.

உடனடி நடவடிக்கை எடுக்க மக்கள் கோரிக்கை

அம்பாறை மாவட்டம், சம்மாந்துறை பகுதியில் தொழுகைக்காகப் பள்ளிவாசலுக்குச் சென்ற 67 வயதுடைய முஅத்தின் ஒருவரைக் காட்டு யானை தாக்கியதில், அவர் மயிரிழையில் உயிர் தப்பியுள்ளார்.

சம்மாந்துறை ஸபூர் பள்ளிவாசலில் நேற்று (24) சனிக்கிழமை அதிகாலை 4.25 மணியளவில் இச்சம்பவம் இடம்பெற்றுள்ளது.

சம்மாந்துறை பகுதியைச் சேர்ந்த கலந்தர்லெப்பை அலியார் என்ற முஅத்தினே இவ்வாறு காட்டு யானையின் தாக்குதலுக்கு உள்ளாகியுள்ளார். இதன்போது, அவரது துவிச்சக்கர வண்டி பகுதியளவில் சேதமடைந்துள்ளதுடன், அவர் சிகிச்சைக்காக சம்மாந்துறை ஆதார வைத்தியசாலையில் அனுமதிக்கப்பட்டுள்ளார்.

கடந்த மூன்று வருடங்களாக குறித்த பள்ளிவாசலில் முஅத்தினாகக் கடமையாற்றி வரும் அலியார், பள்ளிவாசலுக்குச் சென்றுகொண்டிருந்தபோதே இச்சம்பவம் இடம்பெற்றுள்ளது.

அம்பாறை மாவட்டத்தில் தொடரும் இந்த யானை அச்சுறுத்தலுக்கு நிரந்தரத் தீர்வு காணும் வகையில், வனவிலங்கு திணைக்களமும் உரிய அதிகாரிகளும் உடனடியாகச் தலையிட வேண்டும் எனப் பொதுமக்கள் கோரிக்கை விடுக்கின்றனர்.

யானைகள் அதிகமாக நடமாடும் எல்லைப் பகுதிகளை அடையாளம் கண்டு, புதிய யானை வேலிகளை அமைப்பதுடன், ஏற்கனவே பழுதடைந்துள்ள யானை வேலிகளை அவசரமாகச் சீரமைத்து, மக்களின் உயிருக்கும் உடமைகளுக்கும் பாதுகாப்பை உறுதி செய்ய வேண்டும் எனப் அப்பகுதி மக்கள் வலியுறுத்துகின்றனர்.

மூத்த ஊடகவியலாளரின் புதல்வர் இலங்கை ஆசிரியர் கல்வியலாளர் சேவைக்கு தெரிவு

2026-10-25T09:50:46.652+05:30

சா.நடனசபேசன்

பட்டிருப்பு கல்வி வலயத்திலுள்ள எருவில் கண்ணகி மகாவித்தியாலய அதிபராகப் பணியாற்றும் பேரின்பராசா ரேகாசலன் இலங்கை ஆசிரியர் கல்வியியலாளர் சேவைக்கு ஆட்சேர்ப்பு செய்வதற்காக நடாத்தப்பட்ட திறந்த(OPEN) போட்டிப் பரீட்சை மற்றும் நேர்முகப் பரீட்சை என்பவற்றில் சித்தியடைந்து, இச் சேவைக்குத் தெரிவாகியுள்ளார்.

துறைநீலாவணைக் கிராமத்தின் மூத்த ஊடகவியலாளரும், ஓய்வுநிலை அதிபருமான பேரின்பராசா மற்றும் குமுதினி தம்பதியினரின் மூத்த புதல்வராவார்.

துறைநீலாவணை மகாவித்தியாலயத்தின் பழைய மாணவரான இவர் பாடசாலைப் பருவத்திலேயே தரம் ஐந்து புலமைப்பரிசில் பரீட்சையில் அதி கூடிய புள்ளிகளைப் பெற்று பட்டிருப்பு கல்வி வலயத்திற்குப் பெருமை சேர்த்தவர் .

உயர் கல்வியிலும் சிறந்து விளங்கும் இவர், கிழக்குப் பல்கலைக்கழக நுண்கலைத் துறை சிறப்பு பட்டதாரியாகவும், இதே பல்கலைக் கழகத்தின் கல்வியியல் முதுமாணிப் ( M.Ed ) பட்டதாரியும் உள்ளதுடன், இலங்கை திறந்த பல்கலைக் கழகத்தில் பட்டப் பின் கல்வி டிப்ளோமாவையும் பூர்த்தி செய்துள்ளார்.

இலங்கை அதிபர் சேவைக்கு ஆட்சேர்ப்பு செய்வதற்காக நடாத்தப்பட்ட போட்டிப் பரிட்சையில் சித்தியடைந்து இச் சேவைக்கு தெரிவாகி களுதாவளை தேசிய பாடசாலையில் பிரதி அதிபராகவும், பின்னர் இப் பாடசாலையின் பொறுப்பு அதிபராகவும் கடமையாற்றி தற்போது எருவில் கண்ணகி மகாவித்தியாலயத்தின் அதிபராக கடமையாற்றி வரும் நிலையில் தனது விடாமுயற்சியின் காரணமாக இலங்கை ஆசிரியர் கல்வியியலாளர் சேவைக்கு தெரிவாகியுள்ளார். மேலும் இவர் அகில இலங்கை சமாதான நீதிவானாகவும் உள்ளமை குறிப்பிடத்தக்கது.

மட்டக்களப்பு ஏறாவூர் விபுலானந்தா வித்தியாலய பாடசாலைக்குள் புகுந்த யானைகள்! மயிரிழையில் உயிர் தப்பிய மாணவர்கள்!

2026-10-25T06:15:31.415+05:30

(ஆ.நிதாகரன் ) மட்டக்களப்பு, ஏறாவூர் ஐந்தாம் குறிச்சி விபுலானந்தா பாடசாலையின் மதில் சுவரை உடைத்துக்கொண்டு உள்நுழைந்த யானைக் கூட்டத்தின் அச்சுறுத்தலில் இருந்து, அங்கு இரவு நேர வகுப்புகளில் ஈடுபட்டிருந்த மாணவர்கள் மயிரிழையில் உயிர் தப்பியுள்ளனர்.

குப்பை மேட்டை நோக்கி வந்த யானைகள்!

நேற்று இரவு சுமார் 8 மணியளவில், ஏறாவூர் நகர சபையின் நிர்வாகத்தின் கீழ் பராமரிக்கப்படும் குப்பை மேட்டுப் பகுதியை நோக்கி வந்த யானைக் கூட்டம், அருகிலுள்ள ஏறாவூர் ஐந்தாம் குறிச்சி விபுலானந்தா வித்தியாலய பாடசாலையின் மதில் சுவரை உடைத்துக்கொண்டு பாடசாலை வளாகத்திற்குள் நுழைந்துள்ளது.

இதன்போது, பாடசாலையில் இரவு நேர வகுப்புகளில் கற்றல் நடவடிக்கைகளில் ஈடுபட்டுக்கொண்டிருந்த மாணவர்கள், யானைகளின் அச்சுறுத்தலில் இருந்து மயிரிழையில் உயிர் தப்பியதாகப் பாடசாலை அதிபர் தெரிவித்துள்ளார்.

பாடசாலைகள், ஆலயங்கள், குடியிருப்புகளுக்கு அச்சுறுத்தல்!

ஏறாவூர் நகர சபையினால் நிர்வகிக்கப்படும் குப்பை மேட்டுப் பகுதியை நோக்கி யானைகள் வருவதால், அப்பகுதியிலுள்ள பாடசாலைகள், ஆலயங்கள் மற்றும் குடியிருப்புப் பகுதிகளுக்குள் அவை தொடர்ந்து நுழைந்து, சொத்துக்களுக்குச் சேதம் விளைவித்து வருவதாகக் குற்றச்சாட்டுகள் முன்வைக்கப்படுகின்றன.

இந்நிலையில், யானைகளின் நடமாட்டத்தைக் கட்டுப்படுத்த உரிய நடவடிக்கைகள் எடுக்கப்படாவிட்டால், மாணவர்களின் உயிருக்கும் பொதுமக்களின் உயிருக்கும் ஆபத்து ஏற்படக்கூடும் என்ற அச்சம் எழுந்துள்ளது.

“யானைகளால் மாணவர்களுக்கோ பொதுமக்களுக்கோ உயிராபத்து ஏற்பட்டால் அதற்குப் பொறுப்பேற்பது யார்?” எனச் சம்பவ இடத்திற்குச் சென்ற ஏறாவூர் பற்று பிரதேச சபை உறுப்பினர் செ. நிலாந்தன் கேள்வி எழுப்பினார்.

மேலும், குப்பை மேட்டுப் பகுதியை நோக்கிப் படையெடுக்கும் யானைகள் ஏறாவூர் நகருக்குள்ளும் குடியிருப்புப் பகுதிகளுக்குள்ளும் நுழைந்து மக்களைத் தாக்கினால், அதற்கான பொறுப்பை யார் ஏற்றுக்கொள்வார்கள் என்றும் அவர் கேள்வி எழுப்பினார்.

அதிகாரிகள் நடவடிக்கை எடுப்பதாக உறுதி!

சம்பவ இடத்திற்குச் சென்ற ஏறாவூர் நகர சபையின் பிரதித் தவிசாளர் கஜேந்திரன் மற்றும் ஏறாவூர் பற்று பிரதேச சபை உறுப்பினர் செ. நிலாந்தன் ஆகியோர், யானைகளின் அச்சுறுத்தல் தொடர்பாகப் பாராளுமன்ற உறுப்பினர்கள் மற்றும் சம்பந்தப்பட்ட அதிகாரிகளுடன் கலந்துரையாடி உரிய நடவடிக்கைகளை முன்னெடுப்பதாக உறுதியளித்தனர்.

மக்களின் உயிரைப் பாதுகாக்க உடனடி நடவடிக்கை அவசியம்!

பாடசாலை மதில் சுவர் உடைக்கப்பட்டு, மாணவர்கள் உயிராபத்தை எதிர்கொண்டுள்ள இச்சம்பவம், ஏறாவூர் பகுதியில் யானைகளின் நடமாட்டத்தைக் கட்டுப்படுத்துவதற்கான அவசரத் தேவையை மீண்டும் உணர்த்தியுள்ளது.

குப்பை மேட்டை பராமரிக்கும் ஏறாவூர் நகர சபை நிர்வாகம், யானைகளின் நடமாட்டத்தைக் கட்டுப்படுத்த உடனடி நடவடிக்கைகளை எடுத்து பாடசாலைகள், ஆலயங்கள், குடியிருப்புகளின் பாதுகாப்பை உறுதிப்படுத்த வேண்டும். விடயங்களில் அத்துடன் சம்பந்தப்பட்ட அதிகாரிகள் உடனடியாகத் தலையிட்டு, நிரந்தரத் தீர்வொன்றை வழங்க வேண்டுமெனப் தெரிவித்தார்.

6 ஆண்டுகள் சேவையாற்றிய அபிவிருத்தி உத்தியோகத்தர்களின் எதிர்காலம் என்ன? —சாணக்கியன் கேள்வி!

2026-10-25T05:33:32.974+05:30

ஆசிரியர் நியமனத்தில் வெளிப்படைத்தன்மை எங்கே? 6 ஆண்டுகள் சேவையாற்றியஅபிவிருத்தி உத்தியோகத்தர்களின் எதிர்காலம் என்ன? — பாராளுமன்றத்தில்

சாணக்கியன் கேள்வி!

23,800 ஆசிரியர்களை நியமிப்பதாக அறிவித்துவிட்டு 17,688 பேருக்கு

மாத்திரம் நேர்முகப் பரீட்சைக்கு அழைப்பு விடுக்கப்பட்டதன் காரணம் என்ன?

— தெரிவுப் பட்டியலை வெளியிடக் கோரிக்கை

23.10.2026 | பாராளுமன்ற கேள்வி பதிலின் போது.

ஆசிரியர் சேவைக்கான புதிய நியமனங்களின் வெளிப்படைத்தன்மை, தெரிவு

நடைமுறைகள் மற்றும் கடந்த ஆறு ஆண்டுகளாகப் பாடசாலைகளில் கற்பித்தல்

நடவடிக்கைகளில் ஈடுபட்டு வரும் அபிவிருத்தி உத்தியோகத்தர்களின்

எதிர்காலம் தொடர்பில் பாராளுமன்றம் உரிய கவனம் செலுத்த வேண்டும் என

இலங்கைத் தமிழரசுக் கட்சியின் மட்டக்களப்பு மாவட்ட நாடாளுமன்ற உறுப்பினர்

இரா. சாணக்கியன் வலியுறுத்தியுள்ளார்.

(23.10.2026) பாராளுமன்றத்தில் இடம்பெற்ற கேள்வி–பதில்

அமர்வின்போது, ஆசிரியர் சேவைக்கு புதிய நியமனங்களை வழங்கும் நடைமுறையில்

காணப்படும் தெளிவின்மைகள் மற்றும் நீண்டகாலமாகக் கற்பித்தல் பணிகளில்

ஈடுபட்டு வரும் அபிவிருத்தி உத்தியோகத்தர்களின் சேவைப் பாதுகாப்பு

தொடர்பான பல்வேறு கேள்விகளை அவர் முன்வைத்தார்.

23,800 ஆசிரியர் நியமனங்கள்; நேர்முகப் பரீட்சைக்கு 17,688 பேருக்கு மாத்திரமா?

ஆசிரியர் சேவைக்கு புதிதாக 23,800 பேரை இணைத்துக்கொள்ளப் போவதாக

ஆரம்பத்தில் அறிவிக்கப்பட்டிருந்தபோதிலும், தற்போது 17,688 பேருக்கு

மாத்திரமே நேர்முகப் பரீட்சைக்காக உத்தியோகபூர்வமாக

அறிவிக்கப்பட்டுள்ளதாக இரா. சாணக்கியன் சுட்டிக்காட்டினார்.

ஆரம்பத்தில் அறிவிக்கப்பட்ட எண்ணிக்கைக்கும் தற்போது நேர்முகப்

பரீட்சைக்காக அழைக்கப்பட்டுள்ளவர்களின் எண்ணிக்கைக்கும் இடையில்

குறிப்பிடத்தக்க வேறுபாடு காணப்படுகின்றது. இந்த வேறுபாட்டுக்கான காரணம்

என்ன என்பது தொடர்பில் தெளிவான விளக்கம் வழங்கப்பட வேண்டுமென அவர்வலியுறுத்தினார்.

மேலும், ஆசிரியர் நியமனங்களுக்கான தெரிவு நடைமுறையில் பின்பற்றப்படும்

மதிப்பீட்டுப் புள்ளிகள், தகைமைக்கான அளவுகோல்கள், பாடப் பின்னணி மற்றும்

ஏனைய தெரிவு நிபந்தனைகள் என்ன என்பதையும் அரசாங்கம் வெளிப்படையாக

அறிவிக்க வேண்டும் எனக் கோரினார்.

தெரிவு செய்யப்பட்டவர்களின் பெயர்ப்பட்டியல் வெளியிடப்படுமா, அவ்வாறு

வெளியிடப்படுமாயின் அது எப்போது வெளியிடப்படும் என்ற கேள்விகளையும் அவர்

முன்வைத்தார். ஆசிரியர் நியமனங்கள் தொடர்பில் எந்தவிதமான

சந்தேகங்களுக்கும் இடமளிக்காமல், தெரிவு நடைமுறைகள் வெளிப்படையான

முறையில் முன்னெடுக்கப்பட வேண்டும் என்பதே இதன் முக்கியத்துவம் என அவர்சுட்டிக்காட்டினார்.

ஆறு ஆண்டுகளாகக் கற்பித்த அபிவிருத்தி உத்தியோகத்தர்களின் எதிர்காலம் என்ன?

பாடசாலைகளில் கடந்த ஆறு ஆண்டுகளாகத் தொடர்ச்சியாகக் கற்பித்தல்

நடவடிக்கைகளில் ஈடுபட்டு வரும் அபிவிருத்தி உத்தியோகத்தர்களின் நிலைமைதொடர்பிலும் இரா. சாணக்கியன் தீவிர கவனம் செலுத்தினார்.

ஜனாதிபதி செயலகத்தின் ஊடாக அண்மையில் பாடசாலைகளுக்கு இணைக்கப்பட்டஅபிவிருத்தி உத்தியோகத்தர்கள், பாடசாலைகளின் கல்வி நடவடிக்கைகளைமுன்னெடுப்பதில் பங்களிப்பு வழங்கி வருகின்றனர். இவர்களின் சேவைக்காலத்தைக் கணக்கில் எடுத்துக்கொள்வது தொடர்பில் ஜனாதிபதி வாக்குறுதிவழங்கியிருந்தபோதிலும், அந்த வாக்குறுதி இதுவரையில்நடைமுறைப்படுத்தப்படவில்லை என அவர் சுட்டிக்காட்டினார்.

ஆறு ஆண்டுகளாகப் பாடசாலைகளில் ஆசிரியர்களைப் போன்று கற்பித்தல் பணிகளில்ஈடுபட்டு, கல்வி நடவடிக்கைகளின் தொடர்ச்சிக்கு முக்கிய பங்களிப்பைவழங்கியுள்ள இந்த உத்தியோகத்தர்களின் சேவையைப் பெற்றுக்கொண்ட பின்னர்,அவர்களைப் பணியிலிருந்து வெளியேற்றுவது எந்த வகையில் நியாயமானதாக அமையும்

என அவர் கேள்வி எழுப்பினார்.

இவர்களின் நீண்டகால சேவையை மதித்து, நிரந்தர ஆசிரியர் சேவைக்குள்

உள்வாங்குவதற்கான திட்டம் என்ன என்பதையும் அரசாங்கம் தெளிவுபடுத்த

வேண்டும் என அவர் வலியுறுத்தினார்.

ஜனாதிபதியின் வாக்குறுதி எப்போது நிறைவேற்றப்படும்?

அபிவிருத்தி உத்தியோகத்தர்களின் சேவைக் காலத்தைக் கணக்கில்

எடுத்துக்கொள்வது தொடர்பில் ஜனாதிபதி வழங்கிய வாக்குறுதி இன்னமும்

நிறைவேற்றப்படாததற்கான காரணம் என்ன என்றும் இரா. சாணக்கியன் கேள்விஎழுப்பினார்.

அத்துடன், ஏனைய வாக்குறுதிகள் எப்போது நடைமுறைப்படுத்தப்படும்,

எதிர்வரும் ஜனவரி மாதத்தில் இவர்களின் சேவை நிலைமையை மாற்றுவதற்கானதிட்டம் உள்ளதா அல்லது கற்பித்தல் நடவடிக்கைகளிலிருந்து அவர்களைவெளியேற்றுவதற்கான நடவடிக்கைகள் முன்னெடுக்கப்படவுள்ளனவா என்பதையும் அவர்தெளிவுபடுத்துமாறு கோரினார்.

நீண்டகாலமாகக் கல்வித்துறையில் சேவையாற்றி வரும் இந்த உத்தியோகத்தர்களின்தொழில் பாதுகாப்பை அரசாங்கம் எவ்வாறு உறுதிப்படுத்தப் போகின்றது என்பதும்முக்கியமான கேள்வியாகும் என அவர் சுட்டிக்காட்டினார்.

கல்வி அமைச்சரிடமிருந்து விரிவான பதில் கோரிக்கை

சபாநாயகரை நோக்கி உரையாற்றிய இரா. சாணக்கியன், அபிவிருத்தி

உத்தியோகத்தர்களின் சேவையை மதித்து, அவர்களுக்கு நிரந்தரமானதும்

நியாயமானதுமான தீர்வொன்றைப் பெற்றுக்கொடுக்க அரசாங்கம் தயாராக

இல்லாவிட்டால், இந்த விவகாரம் தொடர்பில் அடுத்தகட்டமாக எடுக்கப்படவுள்ளநடவடிக்கைகள் என்ன என்பதையும் தெளிவுபடுத்த வேண்டும் எனக்கேட்டுக்கொண்டார்.

குறிப்பாக, இந்தப் பிரச்சினைக்குத் தீர்வு காண்பதற்கான காலக்கெடு என்ன

என்பதையும் கல்வி அமைச்சரிடமிருந்து விரிவான பதிலாகப் பெற்றுத்தருமாறுஅவர் கோரிக்கை விடுத்தார்.

மேலதிகக் கேள்வி: வடக்கு, கிழக்கில் ஆசிரியர் வெற்றிடங்கள் தொடர்கின்றன!

தொடர்ந்து மேலதிகக் கேள்வியை முன்வைத்த இரா. சாணக்கியன், ஆசிரியர்

சேவையில் நிலவும் பிரச்சினைகள் தொடர்பில் ஏற்கனவே பலமுறை

கலந்துரையாடப்பட்டுள்ளதாகக் குறிப்பிட்டார்.

பாடசாலைகளில் பணியாற்றும் அபிவிருத்தி உத்தியோகத்தர்களுக்கு வழங்கப்படும்பாடநேரம் மற்றும் சேவை நேரம் தொடர்பிலும் பிரச்சினைகள் காணப்படுவதாக அவர்

சுட்டிக்காட்டினார். இவர்களின் பணிநிலைமை, சேவை உரிமைகள் மற்றும்

எதிர்காலம் தொடர்பான சிக்கல்களுக்கும் உரிய தீர்வு காணப்பட வேண்டியதன்அவசியத்தை அவர் வலியுறுத்தினார்.

இதன்போது, வடக்கு மாகாணத்தில் 1,886 ஆசிரியர் வெற்றிடங்களும் கிழக்கு

மாகாணத்தில் 2,267 ஆசிரியர் வெற்றிடங்களும் காணப்படுவதாகப் பிரதமர்

குறிப்பிட்டிருந்ததை அவர் எடுத்துரைத்தார்.

குறிப்பாக, கிழக்கு மாகாணத்தில் அடிப்படைப் பாடங்களுக்கான ஆசிரியர்

வெற்றிடங்கள் காணப்படுவது கவலைக்குரிய விடயமாகும் எனச் சுட்டிக்காட்டிய

அவர், இந்த வெற்றிடங்களை நிரப்புவதோடு, நீண்டகாலமாகப் பாடசாலைகளில்கற்பித்தல் பணிகளில் ஈடுபட்டு வரும் அபிவிருத்தி உத்தியோகத்தர்களின்பிரச்சினைகளுக்கும் தீர்வு காணப்பட வேண்டும் என வலியுறுத்தினார்.

ஆசிரியர் பற்றாக்குறைக்கும் அபிவிருத்தி உத்தியோகத்தர்களின்

பிரச்சினைக்கும் தீர்வு அவசியம்!

வடக்கு மற்றும் கிழக்கு மாகாணங்களில் நிலவும் ஆசிரியர் பற்றாக்குறையை

நிவர்த்தி செய்வதற்கான நடவடிக்கைகளுடன், ஏற்கனவே பாடசாலைகளில் கல்விநடவடிக்கைகளுக்குப் பங்களிப்பு வழங்கி வரும் அபிவிருத்தி

உத்தியோகத்தர்களின் சேவையையும் உரிய முறையில் மதிப்பிட வேண்டிய தேவைகாணப்படுகின்றது.

ஒருபுறம் ஆசிரியர் வெற்றிடங்கள் தொடர்கின்ற நிலையில், மறுபுறம் ஆறு

ஆண்டுகளாகக் கற்பித்தல் பணிகளில் ஈடுபட்டுள்ள அபிவிருத்தி

உத்தியோகத்தர்களின் எதிர்காலம் தொடர்பில் தெளிவான தீர்வு இல்லாத நிலைமை

நீடிப்பது தொடர்பில் அரசாங்கம் பொறுப்புடன் செயற்பட வேண்டும் என்பதே இரா.சாணக்கியன் பாராளுமன்றத்தில் முன்வைத்த கேள்விகளின் முக்கிய

சாராம்சமாகும்.

சம்மாந்துறை நெல் வயலில் விழுந்து உயிரிழந்த காட்டு யானை-பிரேதப் பரிசோதனை திங்கட்கிழமைக்கு ஒத்திவைப்பு

2026-10-25T05:15:05.262+05:30

[அம்பாறை நிருபர் - பாறுக் ஷிஹான்]

அம்பாறை மாவட்டம், சம்மாந்துறை பகுதியில் நெல் வயலில் விழுந்து அவதிப்பட்டு வந்த காட்டு யானை சிகிச்சைப் பலனின்றி உயிரிழந்துள்ளதாக வனவிலங்கு அதிகாரிகள் தெரிவித்துள்ளனர்.

கிழக்கு வனவிலங்கு மண்டலத்தின் அம்பாறை வனவிலங்கு அலுவலகத்தின் கீழ் இயங்கும் வளத்தாப்பிட்டி களப் பாதுகாப்பு அரணின் சம்மாந்துறை பிரிவு எண் 4-இல் உள்ள பகுதியில்இ கடந்த 21 ஆம் திகதி காலை காட்டு யானையொன்று நெல் வயலில் வீழ்ந்துள்ளது.

தொடர்ந்து, குறித்த யானைக்கு வனவிலங்கு கால்நடை மருத்துவர்கள் மற்றும் அதிகாரிகளால் தொடர்ச்சியான சிகிச்சைகளும் பராமரிப்புகளும் அளிக்கப்பட்டு வந்த நிலையில், இன்று(24) அதிகாலை சுமார் 2.00 மணியளவில் அந்த யானை பரிதாபமாக உயிரிழந்தது.உயிரிழந்த காட்டு யானையானது சுமார் 15 வயதுடைய ஆண் யானை என வனவிலங்கு அதிகாரிகள் உறுதிப்படுத்தியுள்ளனர்.

இக்காட்டு யானை வீழ்ந்துள்ளமைக்கான காரணம் குறித்துக் கருத்துத் தெரிவித்த கிழக்கு வனவிலங்கு கால்நடை மருத்துவர் நிஹால் புஷ்பகுமார குப்பைகளை உட்கொண்டதனால் ஏற்பட்ட கடுமையான நோய் நிலையே யானையின் இந்த நிலைக்குக் காரணம் என்று தெரிவித்தார்.

வலத்தபிட்டிய வனவிலங்கு சரணாலயப் பாதுகாப்பு அலுவலகத்தின் களக் காவலர் அஜித் குணரத்ன தலைமையிலான குழுவினர், யானையைக் காப்பாற்றுவதற்காகவும் அதற்குத் தேவையான உணவுகளை வழங்குவதற்காகவும் இரவும் பகலாகத் தீவிர முயற்சிகளை மேற்கொண்ட போதிலும், அதனை மீட்க முடியாமல் போனது துரதிர்ஷ்டவசமானது.

யானை இன்று அதிகாலை உயிரிழந்த போதிலும், அதன் உடற்கூற்றுப் பரிசோதனை (பிரேதப் பரிசோதனை) வரும் திங்கட்கிழமை வரை ஒத்திவைக்கப்பட்டுள்ளது. வனவிலங்கு கால்நடை மருத்துவர்கள் சனி மற்றும் ஞாயிற்றுக்கிழமைகளில் விடுப்பு எடுத்தமையே இந்தத் தாமதத்திற்குக் காரணம் எனத் தெரிவிக்கப்பட்டுள்ளது.

கிழக்கு பல்கலைக்கழகத்தில் 3 சிற்றுண்டிச்சாலைகளுக்கு ஒரு இலட்சத்து 50 ஆயிரம் அபராதம் 2 சிற்றுண்டிச்சாலைகளை 14 நாட்கள் பூட்டுமாறு நீதிமன்றம் உத்தரவு--

2026-10-24T05:49:22.922+05:30

(கனகராஜா சரவணன்)

கிழக்கு பல்கலைக்கழக வளாகத்தில் சுகாதார விதிமுறைகளை பின்பற்றாத 3 சிற்றுண்டிச்சாலைகளுக்கு எதிராக செங்கலடி சுகாதார வைத்திய அதிகாரி அலுவலக பொதுச் சுகாதார பரிசோதகர்களினால் 8 வழக்குகள் தாக்கல் செய்யப்பட்டதையடுத்து 1 இலட்சத்து 50 ஆயிரம் ரூபா தண்டப்பணமாக செலுத்துமாறும் 2 சிறு;றுண்டிச்சாலைகளை 14 நாட்கள் தற்காலிகமாக பூட்டு மாறு ஏறாவூர் நீதவான் நீதிமன்ற நீதவான் நேற்று வெள்ளிக்கிழமை (23) உத்தரவிட்டு கட்டளை பிறப்பித்தார்

குறித்த சிற்றுண்டிசாலைகளை செங்கலடி சுகாதார அதிகாரிகள் பணிமனை பொதுச் சுகாதார பரிசோதகர்கள் சென்று பரிசோதனை நடவடிக்கையில் சுகாதார நடைமுறைகளை பின்பற்றுமாறு பலமுறை அறிவித்தல் வழங்கப்பட்டது.

இந்த சுகாதார விதிமுறைகளை பின்பற்றாத கிழக்கு பல்கலைக்கழக வளாகத்தில் உள்ள 3 சிற்றுண்டிச்சாலைகளுக்கு எதிராக பொதுச் சுகாதார பரிசோதகர்களினால் ஏறாவூர் நீதவான் நீதிமன்றத்தில் 8 வழக்குகள் தாக்கல் செய்தனர்

இந்த நிலையில் நேற்று வெள்ளிக்கிழமை திறந்த நீதிமன்றில் நீதவான் குறித்த வழக்குகளை விசாரணைக்கு எடுத்து கொண்ட போது 3 சிற்றுண்டிசாலைகளையும் ஒலு இலட்சத்து 50 ஆயிரம் ரூபா தண்டப்பணமாக செலுத்துமாறும் 2 சிறு;றுண்டிச்சாலைகளை 14 நாட்கள் தற்காலிகமாக பூட்டி சுகாதர பரிசோதகர்கள் சிபார்சு செய்த திருத்த வேலைகளை செய்யுமாறு நீதவான் உத்தரவிட்டு கட்டளை பிறப்பித்தார்.

இலங்கையில் தொழில்நுட்ப ஒத்துழைப்பை உருவாக்குதல் ஐஐடி மெட்ராஸ் பிரவர்தக் டெக்னாலஜிஸ் ஃபவுண்டேஷன் மற்றும் டயலாக் ஆக்சியாட்டா இடையே புரிந்துணர்வு ஒப்பந்தம் கைச்சாத்து--

2026-10-24T05:47:10.942+05:30

(கனகராஜா சரவணன்)

ஐஐடி மெட்ராஸ் பிரவர்தக் டெக்னாலஜிஸ் ஃபவுண்டேஷன் மற்றும் டயலாக் ஆக்சியாட்டா இடையிலான புரிந்துணர்வு ஒப்பந்தத்தில் இந்திய உயர்ஸ்தானிகர் சந்தோஷ் ஜா முன்னிலையில், நேற்று வியாழக்கிழமை 22 (ஆழரு) கையெழுத்திட்டனர்.

இந்தப் புரிந்துணர்வு ஒப்பந்தம், சர்வதேச ஆராய்ச்சி மற்றும் தொழில்நுட்ப நிபுணத்துவத்தை இலங்கைத் தொழில் மற்றும் பல்கலைக்கழகங்களுடன் இணைக்கும் நோக்கில், ஒத்துழைப்பிற்கான ஒரு கட்டமைப்பை நிறுவுகிறது.

இந்தப் பங்களிப்பு, புத்தாக்கம் மற்றும் அடைகாத்தல், பயன்பாட்டு ஆராய்ச்சி மற்றும் பல்கலைக்கழக ஆய்வகங்கள், செயற்கை நுண்ணறிவு மற்றும் மனிதனை மையமாகக் கொண்ட தீர்வுகள், தொழில் திறன்கள் மற்றும் திறமை மேம்பாடு, மற்றும் சர்வதேச அறிவுப் பகிர்வு ஆகிய ஐந்து முக்கியப் பகுதிகளை ஆராயும்.

ஐஐடி மெட்ராஸ் பிரவர்தக் டெக்னாலஜிஸ் ஃபவுண்டேஷனின் தலைமைச் செயல் அதிகாரி டாக்டர் எம். ஜே. சங்கர் ராமன் அவர்களும், டயலாக் ஆக்சியாட்டா பிஎல்சி குழுமத்தின் தலைமைச் செயல் அதிகாரியும் நிர்வாக இயக்குனருமான திரு. சுபுன் வீரசிங்க அவர்களும் புரிந்துணர்வு ஒப்பந்தத்தில் கையெழுத்திட்டனர்.

இதன் போது இந்திய உயர்ஸ்தானிகர், டயலாக் ஆக்சியாட்டாவின் சிரேஷ்ட தலைவர்களுடன் தொழில்நுட்பம், வர்த்தகம், விநியோகச் சங்கிலிகள் மற்றும் நம்பகமான கூட்டாண்மை குறித்து கலந்துரையாடிய போது அவர் இந்த புரிந்துணர்வு ஒப்பந்தத்தில் கையெழுத்திட்டது, இந்தியாவுக்கும் இலங்கைக்கும் இடையிலான தொழில்நுட்ப மற்றும் ஆராய்ச்சி மற்றும் மேம்பாட்டுக் கூட்டாண்மையை மேலும் வலுப்படுத்தும் என தெரிவித்தார்.

மட்டக்களப்பின் புலமைத்துவ ஊற்றுக் கண்கள்! மட்டக்களப்பு தமிழ்ச் சங்கத்தின் தொடர் நிகழ்வு ஆரம்பம்!

2026-10-24T05:44:57.180+05:30

மட்டக்களப்புத் தமிழ்ச் சங்க புலமைத்துவ குழுவின் "மட்டக்களப்பின் புலமைத்

துவ ஊற்றுக் கண்கள் ", பேசப்படாத பக்கங்கள் தொடர் - 1 நிகழ்வானது முதல் முறையாக மட்டக்களப்புத் தமிழ்ச் சங்கத் தலைவர் சைவப்புரவலர் வி.ரஞ்சிதமூர்த்தி தலைமையில் 18.10.2026 ஞாயிற்றுக்கிழமை மாலை 5.30 மணிக்கு தலைவரின் காரியாலய அவைக்கூடத்தில் இடம்பெற்றது.

இந்நிகழ்வில் “பண்டிதர்.ச. பூபாலபிள்ளை” (1856- 1921) அவர்களைப்பற்றி மட்டக்களப்புத் தமிழ்ச்சங்கத்தின் காப்பாளரும் கிழக்கு பல்கலைக்கழகத்தின் வேந்தருமாகிய பேராசிரியர் சி .மௌனகுரு சிறப்புரை நிகழ்த்தினார்.

மட்டக்களப்புத்தமிழ்ச்சங்கத் தலைவர் சைவப்புரவலர் ரஞ்சிதமூர்த்தி பேசுகையில், மட்டக்களப்புத் தமிழ்ச்சங்கமானது தமிழுக்கும் சமயத்திற்கும் பெருந்தொண்டாற்றிய பெரியார்களின் பேசப்படாத வரலாற்றுப் பக்கங்களை வெளிச்சத்திற்குக் கொண்டுவரும் உயரிய நோக்கில் வாராந்தம் நடைபெறும் வரலாற்றுச் சிறப்புமிக்க உரைநிகழ்வுத் தொடரை இன்று முதன்முறையாக ஆரம்பித்து வைக்கின்றது என்றும் ஒரு சமூகத்தின் பெருமை அதன் செல்வச் செழிப்பில் மட்டும் தங்கியிருப்பதில்லை;

அந்தச் சமூகம் உருவாக்கிய அறிவாளர்களிலும், ஆற்றிய இலக்கியத் தொண்டுகளிலும், பேணிப் பாதுகாத்த பண்பாட்டு மரபுகளிலுமே, அதன் உண்மையான பெருமை பொதிந்திருக்கின்றது என்றும் குறிப்பிட்டார்.

அத்தகைய பெருமைமிக்க, வரலாற்றைக் கொண்ட மட்டக்களப்பு மண்ணில், தமிழுக்கும், சைவத்திற்கும், கல்விக்கும் அரும்பெரும் தொண்டாற்றிய, புலமைமிகு ஆளுமை ஒருவரின் வாழ்வையும், பணிகளையும், நினைவுகூரும் இச்சிறப்புமிக்க நிகழ்வுக்குத் தலைமை தாங்கி உரையாற்றுவதில் பெருமகிழ்ச்சியடைகின்றேன் எனவும் கூறினார்.

வேந்தர் மௌனகுரு, பண்டிதர் செ.பூபாலபிள்ளை அவர்களின் கல்வி இலக்கியம் சமயம் சமூகம் என பல்வேறுபட்ட புலமை ஊற்றுக்களை தேடித்தொகுத்து தந்திருந்தார். பண்டிதர் ச.பூபாலபிள்ளை அவரது செயற்பாடுகள் எவ்வாறு மறைக்கப்பட்டிருந்தது. இவ்வளவு காலமும் பண்டிதர் ச.பூபாலபிள்ளை அவரைப் பற்றி பேசப்டாத நிறைய விடயங்களை முன் வைத்திருந்தார். முத்தமிழ் வித்தகர் சுவாமி விபுலானந்தருக்கு முந்தைய காலத்தில் வாழ்ந்த பண்டிதர் ச.பூபாலபிள்ளை அவரது கல்விப்பணி கலைப்பணி சமயப்பணி பற்றி ஆளமாக ஆராந்து சுருக்கமாகவும் துல்லியமாகவும் அவையோர் விளங்கத்தக்க வகையில் தெளிவுபடுத்தினார்.

அவ்வகையில் பண்டிதர் ச.பூபாலபிள்ளை அவரது புலமைஊற்றுகள் மெல்ல மெல்ல அவையோருக்கு தெரிய தொடங்கியது. அந்த வகையில் சமயத்துக்கு இலக்கியத்துக்கும் பெரும் பங்காற்றி இருந்தமையும் தமிழ் சமூகத்தின் வழிவந்த பன்முகப்பட்ட தமிழ் மரபு ஆளுமை பற்றி அவையோருக்கு தெளிவுபடுத்தினார். பண்டிதர் ச.பூபாலபிள்ளை அவர்கள் சமூகத்திற்கான ஒரு மிகச் சிறந்த ஆளுமையாக நாம் நோக்க முடியும் என்ற எண்ணக்கருவை பேராசிரியர்

சி .மௌனகுருவினது உரை மிகவும் தெளிவாக உணர்த்திநின்றமை அறியக்கூடியதாய் அமைந்தது.

பண்டிதர் ச.பூபாலபிள்ளை அவர்களின் பிறப்பு, இறப்பு அவரின் கலைத்துவமான செயற்பாடுகள் வாழ்வியல் கோலங்கள் போன்ற இன்னோரென்ன விடயங்களை பல்பரிமாண முறையில் மிகச்சுருக்கமாகவும் தெளிவாகவும்

பேராசிரியர் சி .மௌனகுரு அவர்களால் தெட்டத் தெளிவாக குறிப்பிட்ட நேரத்துக்குள் எடுத்துக்காட்டி இருந்தார்.

தொடர்ந்து பண்டிதர் ச.பூபாலபிள்ளை அவர்களின் தமிழ்ப்பணி பற்றியும் அவரது வாழ்வியல் பற்றிய பல்வேறு விடயங்கள் அவையோரால் கலந்துரையாடப்பட்டன. அவையோரால் பண்டிதர் ச.பூபாலபிள்ளை அவர்களைப்பற்றி வினவப்பட்ட வினாக்களுக்கு பேராசிரியர் சி .மௌனகுரு அவர்கள் மிகத் தெளிவான விளக்கமளித்தார்.

மட்டக்களப்புத் தமிழ்ச்சங்கத்தின் பொதுச்செயலாளர் சட்டத்தரணி மு.கணேசராசா நன்றியுரையாற்றினார்.

வித்தகர் விபுலமாமணி வி.ரி.சகாதேவராஜா.

ஓய்வு நிலை உதவிக் கல்விப் பணிப்பாளர் & சிரேஸ்ட ஊடகவியலாளர்

காரைதீவு

கல்முனை கடற்கரை பள்ளிவாசல் 205வது கொடியேற்று விழா: தற்காலிக கடைகளுக்கான ஏலம் ஒக்டோபர் 30ஆம் திகதி ஆரம்பம்

2026-10-24T05:41:38.709+05:30

நூருல் ஹுதா உமர்

கல்முனை கடற்கரை பள்ளிவாசல் நாஹூர் ஆண்டகை தர்ஹா ஷரீஃபின் 205வது வருட கொடியேற்று விழாவும் 470வது வருட மணாகிப் நிகழ்வும் எதிர்வரும் 2026 நவம்பர் 10ஆம் திகதி செவ்வாய்க்கிழமை ஆரம்பமாகவுள்ளன.

இவ்விழாவை முன்னிட்டு, வியாபார நடவடிக்கைகளுக்காக அமைக்கப்படவுள்ள தற்காலிக கடைகளுக்கான ஏல நிகழ்வு ஒக்டோபர் 30ஆம் திகதி முதல் மூன்று நாட்களுக்கு நடைபெறவுள்ளதாக ஏற்பாட்டாளர்கள் அறிவித்துள்ளனர்.

இதன்படி, ஒக்டோபர் 30ஆம் திகதி வெள்ளிக்கிழமை இனிப்பு மற்றும் புல்தோஷ் கடைகளுக்கான ஏலம் இடம்பெறவுள்ளது. தொடர்ந்து, ஒக்டோபர் 31ஆம் திகதி சனிக்கிழமை மற்றும் நவம்பர் 1ஆம் திகதி ஞாயிற்றுக்கிழமை ஆகிய தினங்களில் ஏனைய கடைகளுக்கான ஏலங்கள் நடைபெறவுள்ளன.

ஏலத்தில் கலந்துகொள்ள விரும்புவோர் நேரடியாக வருகை தந்து ஏலத்தில் பங்கேற்று கடைகளைப் பெற்றுக்கொள்ள வேண்டும். ஏலத்தில் கடைகளைப் பெற்றுக்கொள்பவர்கள், கடைகளுக்கான மொத்த வாடகையையும் முழுமையாகச் செலுத்த வேண்டும். அத்துடன், ஏலத்தொகையைச் செலுத்தி வாடகை ஒப்பந்தத்தைப் பூர்த்தி செய்த பின்னரே கடைகளை அமைப்பதற்கான அனுமதி வழங்கப்படும் என அறிவிக்கப்பட்டுள்ளது.

மேலும், மார்க்கத்திற்கு முரணான வியாபார நடவடிக்கைகள் முற்றாகத் தடை செய்யப்பட்டுள்ளதுடன், கடந்த காலங்களில் கடைகளைப் பெற்று முறைகேடாக நடந்துகொண்டவர்களுக்கு இம்முறை கடைகள் வழங்கப்படமாட்டாது என்றும் தெரிவிக்கப்பட்டுள்ளது. அதேவேளை, ஒருவருக்கு ஒன்றுக்கு மேற்பட்ட கடைகளுக்கான இடம் வழங்கப்படமாட்டாது எனவும் ஏற்பாட்டாளர்கள் குறிப்பிட்டுள்ளனர்.

ஏல நிகழ்வு மற்றும் கடைகளைப் பெற்றுக்கொள்வது தொடர்பான மேலதிக விபரங்களுக்கு 0775150860 அல்லது 0772912122 ஆகிய தொலைபேசி இலக்கங்களுடன் தொடர்புகொள்ளுமாறு கேட்டுக்கொள்ளப்பட்டுள்ளது.

இவ்வறிவித்தலை கல்முனை முஹ்யித்தீன் ஜும்ஆ பெரிய பள்ளிவாசல் மற்றும் கடற்கரை பள்ளிவாசல் நாகூர் ஆண்டகை தர்ஹா ஷரீஃப் நம்பிக்கையாளர் சபை வெளியிட்டுள்ளது.

இந்திய நாட்டினால் பரிந்துரை செய்யட்ட சூறாவளி - முரசு

2026-10-23T20:28:20.226+05:30

தென்கிழக்கு (Southeast) மற்றும் கிழக்கு-மத்திய (Eastcentral) வங்காள விரிகுடா கடல் பிராந்தியத்திற்கு மேலாக நேற்றைய தினம் (22.10.2026) காணப்பட்ட மேலடுக்கு காற்று சுழற்சியின் (Upper-air Cyclonic Circulation) தாக்கத்தினால் கிழக்கு-மத்திய மற்றும் தென்கிழக்கு வங்காள விரிகுடா கடல் பிராந்தியத்தில் இன்று (23.10.2026) ஒரு தாழமுக்க பகுதி (Low Pressure area) உருவாகி உள்ளது.

இது அதே பிராந்தியத்தில் தொடர்ந்து நீடித்து, நாளைய தினம் (24.10.2026) ஒரு தாழமுக்கமாக *(Depression)* தீவிரமடையும்.

அதன்பின்னர் இந்த தாழமுக்கமானது மேற்கு-வட மேற்கு திசையில் நகர்ந்து, எதிர்வரும் 25ஆம் திகதி ஆழ்ந்த தாழமுக்கமாக *(Deep Depression)* மேலும் வலுவடையும்.

அதன்பின்னர் இந்த ஆழ்ந்த தாழமுக்கமானது மேற்கு-மத்திய வங்காள விரிகுடா கடல் பிராந்தியத்திற்கு மேலாக எதிர்வரும் 26ஆம் திகதி காலை ஒரு சூறாவளியாக *(Cyclonic Storm)* மேலும் வலுவடையும் என எதிர்பார்க்கப்படுகின்றது.

*இந்த ஆழ்ந்த தாழமுக்கமானது சூறாவளியாக வலுவடையும் பொழுது இதற்கு இந்திய நாட்டினால் பரிந்துரை செய்யப்பட்ட "முரசு" (Murasu) எனம் பெயர் இதற்கு RSMC-New Delhi (Regional Specialized Meteorological Centre) இனால் வழங்கப்படும்.

பின்னர் இந்த சூறாவளியானது தொடர்ந்து வலுவடைந்து, அதனை அடுத்து வரும் 02 நாட்களில் மேற்கு-வட மேற்கு திசையில் நகர்ந்து, வடக்கு ஆந்திர பிரதேசம் (North Andhra Presesh) மற்றும் அததனை சூழவுள்ள தெற்கு ஒடிசா (South Odisha) மாநிலத்தை நோக்கி நகரும் என எதிர்பார்க்கப்படுகின்றது.

க.சூரியகுமாரன்,

ஓய்வு பெற்ற சிரேஷ்ட வானிலை அதிகாரி.

மட்டக்களப்பு பெரியபோரதீவு ஸ்ரீ பத்திரகாளியம்மன் ஆலய வருடாந்த மகா சக்திப் பெருவிழா- ஆயிரக்கணக்கான பக்தர்கள் பங்கேற்பில் தீமிதிப்பு!

2026-10-23T05:59:04.218+05:30

கிழக்கிலங்கையின் வரலாற்றுச் சிறப்புமிக்க வழிபாட்டுத் தலங்களில் ஒன்றான மட்டக்களப்பு பெரியபோரதீவு அருள்மிகு ஸ்ரீ பத்திரகாளியம்மன் ஆலயத்தின் 2026ஆம் ஆண்டுக்கான வருடாந்த திருச்சடங்கு மகா சக்திப் பெருவிழாவின் இறுதி நாள் தீமிதிப்பு நிகழ்வு இன்று (21.10.2026) புதன்கிழமை காலை பக்தி பூர்வமாக நடைபெற்றது.

பக்தர்களால் இலங்கையின் மதுரை மீனாட்சி ஆலயம் எனப் போற்றப்படும் இவ்வாலயத்தின் வருடாந்த மகா சக்திப் பெருவிழா, கடந்த 10.10.2026ஆம் திகதி சனிக்கிழமை காலை கொடியேற்றத்துடன் ஆரம்பமானது.

அன்றைய தினம் இரவு திருக்கதவு திறத்தல் மற்றும் அம்மன் எழுந்தருளல் நிகழ்வுகள் இடம்பெற்றதுடன், ஆலயப் பரிவார மூர்த்திகளுக்கும் விசேட பூசை வழிபாடுகள் முன்னெடுக்கப்பட்டன.

தொடர்ந்து நடைபெற்றுவந்த திருவிழாவில் தினமும் பல்வேறு விசேட பூசைகள் மற்றும் பாரம்பரியச் சடங்குகள் இடம்பெற்றன.

இதன் ஒரு பகுதியாக, நேற்று (20.10.2026)ஆம் திகதி சக்தி மகா யாகம் உள்ளிட்ட சமய நிகழ்வுகள் நடைபெற்றதுடன், நோர்ப்பு நெல் குத்துதல், நோர்ப்புக் கட்டுதல், ஊர்காவல், மதுக்கொடுத்தல், பலிபூசை மற்றும் தீமூட்டுதல் போன்ற பாரம்பரியச் சடங்குகளும் இடம்பெற்றன.

திருவிழாவின் முக்கிய நிகழ்வான தீமிதிப்பு இன்று(21.10.2026)ஆம் திகதி காலை 7.00 மணியளவில் நடைபெற்றது.

இதன்போது தேவாதிகளும் பக்தர்களும் தீமிதித்து தங்களது நேர்த்திக்கடன்களை நிறைவேற்றினர்.

பெரியபோரதீவு மற்றும் அதனைச் சூழவுள்ள பிரதேசங்களைச் சேர்ந்த பக்தர்களுடன், இலங்கையின் பல்வேறு பகுதிகளிலிருந்தும் வருகைதந்த ஆயிரக்கணக்கான பக்தர்கள் இந்நிகழ்வில் கலந்துகொண்டு அம்மனைத் தரிசித்தனர்.

பக்தி உணர்வும் ஆன்மீக எழுச்சியும் நிறைந்த இந்நிகழ்வு, ஆலயத்தின் பாரம்பரிய சமய மரபுகளையும் பக்தர்களின் ஆழ்ந்த நம்பிக்கையையும் வெளிப்படுத்தும் வகையில் அமைந்தது.

இதனைத் தொடர்ந்து, இன்று நடைபெற்ற கொடியிறக்க நிகழ்வுடன் வருடாந்த திருச்சடங்கு மகா சக்திப் பெருவிழா நிறைவுபெற்றது.

வரலாற்று மற்றும் ஆன்மீகச் சிறப்புமிக்க இத்திருவிழாவைச் சிறப்பாக நடத்துவதற்கான ஏற்பாடுகளை ஆலய நிர்வாகத்தினரும் தொண்டர்களும் இணைந்து முன்னெடுத்திருந்தனர்.

திருவிழாவில் கலந்துகொண்ட பக்தர்களுக்குத் தேவையான அடிப்படை வசதிகளும் ஏற்பாடு செய்யப்பட்டிருந்தன.

கிழக்கிலங்கையின் முக்கிய சக்தித் தலங்களில் ஒன்றாக விளங்கும் பெரியபோரதீவு ஸ்ரீ பத்திரகாளியம்மன் ஆலயத்தின் வருடாந்த திருச்சடங்கு, ஆயிரக்கணக்கான பக்தர்களின் பங்கேற்புடன் பக்தி எழுச்சியோடு நடைபெற்றமை குறிப்பிடத்தக்கது.

(எஸ்.ரஞ்சன்)

மட்டக்களப்பில் ஆயுர்வேத வைத்திய அதிகாரிகளுக்கான தொழுநோய் தொடர்பான விழிப்புணர்வு நிகழ்வு

2026-10-23T05:53:52.558+05:30

மட்டக்களப்பு மாவட்ட பிராந்திய சுகாதார சேவைகள் பணிமனைப் பிரிவின் கீழ் கடமையாற்றும் ஆயுர்வேத வைத்திய அதிகாரிகளுக்கான தொழுநோய் தொடர்பான விழிப்புணர்வுச் செயலமர்வு மட்டக்களப்பு மாவட்ட பிராந்திய சுகாதார சேவைகள் பணிப்பாளரும் மட்டக்களப்பு போதனா வைத்தியசாலையின் பணிப்பாளருமான வைத்திய கலாநிதி ஆர்.முரளீஸ்வரன் தலைமையில் கிழக்கு மாகாண ஆயுர்வேத ஆணையாளர் வைத்தியர் எம்.ஏ. நபில் பங்குபற்றுதலுடன் மட்டக்களப்பு மார்பு நோய் சிகிச்சை நிலையத்தின் மாநாட்டு மண்டபத்தில் (22) நடைபெற்றது.

மாவட்ட தொழுநோய்த் தடுப்புப் பிரிவின் பொறுப்பதிகாரி வைத்தியர் திருமதி லுபோஜிதா கமல்ராஜ் ஏற்பாட்டில் பொது சுகாதாரப் பரிசோதகர் எஸ். தீபக்குமாரனின் ஒருங்கிணைப்பில் நடைபெற்ற இச்செயலமர்வில் தொழுநோய் தொடர்பான விழிப்புணர்வு வழங்கப்பட்டது.

இந்நிகழ்வின் வளவாளராகக் கலந்துகொண்ட மட்டக்களப்பு போதனா வைத்தியசாலையின் தோல்நோய் வைத்திய நிபுணர் தனுஷா பாலேந்திரன் தொழுநோயின் அறிகுறிகள், நோய் பரவும் விதம், அதனால் ஏற்படக்கூடிய பாதிப்புகள் மற்றும் சிகிச்சை முறைகள் தொடர்பான விளக்கங்களை வழங்கினார்.

இதன் போது கருத்து தெரிவித்த தொழுநோய்த் தடுப்புப் பிரிவின் பொறுப்பதிகாரி லுபோஜிதா கமல்ராஜ் அவர்கள் நாடளாவிய ரீதியில் தொழுநோயாளர்கள் அதிகளவில் காணப்படும் மாவட்டங்களில் மட்டக்களப்பு மாவட்டம் காணப்படுவதாக சுட்டிக்காட்டியதுடன் தொழுநோயை முற்றாகக் குணப்படுத்த முடியும் ஆரம்ப நிலையிலேயே உரிய சிகிச்சையைப் பெற்றுக்கொள்வதன் மூலம் நோயினால் ஏற்படும் பாதிப்புகளைக் குறைக்கவும், அவயவ இழப்புகளைத் தவிர்க்கவும் முடியும் என சுட்டிக் காட்டினார்.

இதன் போது தொழுநோயின் இயல்புகள், நோயினால் உடலில் ஏற்படும் மாற்றங்கள், நோய்த்தொற்றினால் ஏற்படக்கூடிய பாதிப்புகள் மற்றும் ஆரம்பகால சிகிச்சையின் முக்கியத்துவம் தொடர்பாகவும் இதன்போது விளக்கமளிக்கப்பட்டது.

இந்திய அரசின் நிதியுதவியுடன் காலியில் அமைக்கப்பட்ட 22-வது மாதிரி கிராமம் பயனாளிகளிடம் ஒப்படைப்பு--

2026-10-23T05:50:39.843+05:30

(கனகராஜா சரவணன்)

இந்திய அரசின் நிதியுதவியுடன் காலி மாவட்டத்தில் 'திடுலா' (Didula)

மாதிரி கிராமத்தில் நிர்மானிக்கப்பட்ட 24 வீடுகள் நேற்று வியாழக்கிழமை (22) இலங்கைக்கான இந்திய உயர்ஸ்தானிகர் திரு. சந்தோஷ் ஜா மற்றும் வீடமைப்பு, கட்டுமானம் மற்றும் நீர் வழங்கல் அமைச்சர் டாக்டர் எச். எம். சுசில் ரணசிங்க ஆகியோர் இணைந்து, திறந்து வைத்து, பயனாளிகளிடம் ஒப்படைத்தனர்.

இந்த மாதிரி கிராம வீடமைப்புத் திட்டம், இந்திய அரசின் நிதியுதவியுடன், இலங்கையின் வீடமைப்பு, கட்டுமானம் மற்றும் நீர் வழங்கல் அமைச்சகத்துடன் இணைந்து நாட்டின் அனைத்து 25 மாவட்டங்களிலும் செயல்படுத்தப்பட்டு வருகிறது. இதற்கான புரிந்துணர்வு ஒப்பந்தம் 2017 அக்டோபரில் இந்தியா மற்றும் இலங்கை அரசாங்கங்களுக்கு இடையே கையெழுத்தானது.

இத்திட்டத்தின் கீழ், இலங்கையில் குறைந்த வருமானம் கொண்ட 600 குடும்பங்களுக்கு வீடுகள் வழங்கப்படுகின்றன. ஒவ்வொரு மாவட்டத்திலும் தலா 24 வீடுகளைக் கொண்ட மாதிரி கிராமங்கள் அமைக்கப்படுகின்றன இதற்கான பயனாளிகள் அந்தந்த மாவட்ட வீடமைப்பு குழுக்களால் தேர்ந்தெடுக்கப்படுகின்றனர்.

இவ்வாறு இந்தத் திட்டத்தின் கீழ், ஏற்கனவே மட்டக்களப்பு, வவுனியா, யாழ்ப்பாணம், கண்டி, கம்பஹா, அனுராதபுரம், பதுளை, மாத்தளை, புத்தளம், கொழும்பு, திருகோணமலை, மொனராகலை, கிளிநொச்சி, மன்னார், முல்லைத்தீவு, இரத்தினபுரி, அம்பாறை, குருநாகல், கேகாலை, களுத்துறை மற்றும் பொலன்னறுவை ஆகிய 21 மாவட்டங்களில் மாதிரி கிராமங்கள் திறந்து வைக்கப்பட்டு, பயனாளிகளிடம் ஒப்படைக்கப்பட்டுள்ளன.

இத்திட்டத்தின் பணிகள் சுமார் 98.6 வீதம் நிறைவடைந்துள்ள நிலையில், மீதமுள்ள மூன்று மாதிரி கிராமங்களும் விரைவில் திறந்து வைக்கப்பட்டு பயனாளிகளிடம் ஒப்படைக்கப்படவுள்ளது.

இந்தத் திறப்பு விழாவில், அந்தந்த மாவட்டத்தைச் சேர்ந்த நாடாளுமன்ற உறுப்பினர்கள், தேசிய வீடமைப்பு அபிவிருத்தி அதிகார சபையின் தலைவர் மற்றும் உயர் அதிகாரிகள், மற்றும் காலி மாவட்ட நிர்வாக அதிகாரிகள் ஆகியோர் கலந்து கொண்டமை குறிப்பிடத்தக்கது.

துவிச்சக்கர வண்டி சவாரி முதியோர் வரவேற்பும் கௌரவிப்பு நிகழ்வும்

2026-10-23T05:47:54.487+05:30

(க வி.ரி.சகாதேவராஜா)

இலங்கையின் கரையோர பிரதேசங்களை உள்ளடக்கிய வகையில் 31 நாட்களை இலக்காகக் கொண்டு துவிச்சக்கரப் பயணத்தை மேற்கொண்டு வரும் முதியோர்களை வரவேற்று கௌரவிக்கும் நிகழ்வானது பிரதேச செயலாளர் உ. உதய ஸ்ரீதரின் வழிகாட்டலில், நிருவாக உத்தியோகத்தர் கே. கருணாநிதி தலைமையில், முதியோர் அபிவிருத்தி உத்தியோகத்தர் வே. பத்மினியின் ஒழுங்குபடுத்தலில் நேற்று புதன்கிழமை மாலை (21.10.2026) பிரதேச செயலக ஒன்றுகூடல் மண்டபத்தில் இடம்பெற்றது.

தேசிய முதியோர் செயலகத்தினால் ஏற்பாடு செய்யப்பட்டுள்ள இந்த விழிப்புணர்வுப் பேரணியானது, இலங்கையில் முதியவர்களின் பாதுகாப்பை உறுதிப்படுத்துவதையும் அவர்கள் மீதான விழிப்புணர்வை ஏற்படுத்துவதையும் நோக்கமாகக் கொண்டு இந்த கரையோர பவனி வெற்றிகரமாக முன்னெடுக்கப்பட்டு வருகிறது.

மேலும் முதியோர்களின் பாதுகாப்பை உறுதிப்படுத்தவும், அவர்களுக்குத் தேவையான உதவிகளை உடனடியாகப் பெற்றுக்கொள்ளவும் அரசினால் அறிமுகப்படுத்தப்பட்டுள்ள '1890' என்ற அவசர தொலைபேசி இலக்கத்தை பொதுமக்களிடையே கொண்டு சேர்ப்பதே இதன் முதன்மை நோக்கமாகும்.

இந்நிகழ்வில் சிறுவர் உரிமை மேம்பாட்டு உத்தியோகத்தர் எம். புவிதரன், சமூக அபிவிருத்தி உத்தியோகத்தர் தெ. உதயசுதன், அலுவலக உத்தியோகத்தர்கள் மற்றும் பிரதேச செயலத்திற்கு உட்பட்ட முதியோர் சங்க உறுப்பினர்கள் என பலரும் கலந்து சிறப்பித்தனர்.

நெல் வயலில் விழுந்து உயிருக்குப் போராடும் 15 வயது காட்டு யானை குப்பைகளை உண்டு பொலித்தீன் மனிதக் கழிவுகளால் உடல்நலக்குறைவு ஏற்பட்டு வீழ்ந்த சோகம்

2026-10-23T05:45:34.614+05:30

பாறுக் ஷிஹான்

கிழக்கு வனவிலங்கு மண்டலம் அம்பாறை வனவிலங்கு அலுவலகத்தின் கீழ் உள்ள வளத்தாப்பிட்டி களப் பாதுகாப்புப் படைப் பகுதியின் சம்மாந்துறை பிரிவு எண் 4 இல் அமைந்துள்ள நெல் வயலில் நேற்று (21) காலையில் காட்டு யானை ஒன்று எழ முடியாமல் விழுந்த நிலையில் கண்டுபிடிக்கப்பட்டது.

இந்நிலையில் வனவிலங்கு அதிகாரிகளின் தகவல்படி சுமார் 15 வயதுடைய ஆண் யானை ஒன்றே இவ்வாறு நெல் வயலின் நடுவே பலவீனமடைந்து வீழ்ந்துள்ளதாக ஆரம்ப விசாரணையில் இருந்து தெரிய வந்துள்ளது.

மனிதர்களால் வீசப்படும் கழிவுகள் மற்றும் குப்பைகளை உண்டதன் காரணமாக ஏற்பட்ட கடுமையான செரிமானக் கோளாறு மற்றும் உடல்நலக் குறைவு காரணமாகவே இந்த யானை சுயநினைவிழக்கும் நிலைக்குத் தள்ளப்பட்டு வயலில் விழுந்துள்ளதாக வனவிலங்கு அதிகாரிகள் உறுதிப்படுத்தியுள்ளனர்.

சம்பவ இடத்திற்குச் சென்ற வனவிலங்கு அதிகாரிகள் யானையின் வாயினுள் சிக்கியிருந்த ஆபத்தான பொலித்தீன் கழிவுகளைக் குச்சி ஒன்றின் உதவியுடன் மிகவும் நுணுக்கமாக அகற்றியுள்ளனர். தொடர்ந்து பலவீனமாக இருக்கும் அந்த யானைக்குப் புத்துணர்ச்சியூட்டும் வகையில் பழங்கள் உணவாக வழங்கப்பட்டு வருகின்றன.

மேலும் குறித்த யானைக்கு வனவிலங்கு சுகாதாரப் பிரிவினரால் அவசர மருத்துவச் சிகிச்சைகள் முன்னெடுக்கப்படவுள்ளதாகவும் யானையை மீண்டும் முழுமையாகக் குணப்படுத்தி இயல்பு நிலைக்குக் கொண்டுவர தீவிர நடவடிக்கைகள் எடுக்கப்பட்டு வருவதாகவும் அதிகாரிகள் தெரிவித்துள்ளனர்.

நிந்தவூர் பிரதேச சபையின் 13ஆவது சபைக் கூட்டம்!

2026-10-23T05:43:50.193+05:30

நூருல் ஹுதா உமர்

நிந்தவூர் பிரதேச சபையின் 5ஆவது சபையின் 13ஆவது சபைக் கூட்டம் (21.10.2026) சபையின் தவிசாளர் சட்டத்தரணி ஏ.எல். றியாஸ் ஆதம் அவர்களின் தலைமையில் நிந்தவூர் பிரதேச சபையின் சபா மண்டபத்தில் நடைபெற்றது.

இதன்போது, எதிர்வரும் மழைக்காலத்தில் ஏற்படக்கூடிய வெள்ளம் மற்றும் ஏனைய இயற்கை அனர்த்தங்களிலிருந்து பிரதேச மக்களைப் பாதுகாப்பதற்கான முன்னேற்பாட்டு நடவடிக்கைகள் குறித்து விசேட கவனம் செலுத்தப்பட்டது.

குறிப்பாக, வடிகால்கள் மற்றும் நீர்வழிப் பாதைகளை விரைவாக துப்புரவு செய்தல், மழைநீர் தேங்கக்கூடிய இடங்களை அடையாளம் காணுதல், நீர் வடிந்தோடுவதற்கு இடையூறாக உள்ள தடைகளை அகற்றுதல், தாழ்நிலப் பகுதிகளில் வெள்ள அபாயத்தைக் குறைத்தல் மற்றும் அவசரநிலைகளில் விரைவான நடவடிக்கைகளை மேற்கொள்வதற்கான ஏற்பாடுகள் தொடர்பில் கலந்துரையாடப்பட்டன.

மேலும், சம்பந்தப்பட்ட அரச நிறுவனங்கள், அமைப்புக்கள் மற்றும் துறை சார்ந்தவர்களுடன் ஒருங்கிணைந்து அனர்த்த அபாயங்களைக் குறைப்பதற்கும், பொதுமக்களின் பாதுகாப்பை உறுதிப்படுத்துவதற்கும் தேவையான முன்னெச்சரிக்கை நடவடிக்கைகளைத் திட்டமிட்ட அடிப்படையில் முன்னெடுப்பதன் அவசியமும் வலியுறுத்தப்பட்டது.

மேலும், பிரதேச மக்களின் தேவைகள் மற்றும் நலன்களை முன்னிறுத்தி, சபையின் எதிர்கால செயற்பாடுகள் மற்றும் அபிவிருத்தித் திட்டங்கள் தொடர்பிலும் உறுப்பினர்களின் கருத்துக்கள் பரிமாறப்பட்டன.
இக்கூட்டத்தில் பிரதேச சபை உறுப்பினர்கள் மற்றும் உத்தியோகத்தர்கள் கலந்துகொண்டிருந்தனர்.