Battirep News

காரைதீவில் முதல் முறையாக யூனானி மருத்துவ நிலையம் திறப்பு

2026-04-15T18:38:00.005+05:30

( வி.ரி.சகாதேவராஜா)

காரைதீவில் முதல் முறையாக யூனானி மருத்துவ நிலையம் இன்று (13) திங்கட்கிழமை திறந்து வைக்கப்பட்டது.

காரைதீவின் முதலாவது யூனானி மருத்துவர் திருமதி உமா ரமணன் டிலக்ஷனா இந்த நிலையத்தை திறந்து வைத்தார்.

விஷ்ணு ஆலய சிவாச்சாரியார் சிவஸ்ரீ தியாகராஜ குருக்களின் சமய கிரியைகளுடன் சுப வேளையில் இப் பிரத்தியேக நிலையம் திறந்து வைக்கப்பட்டது.

திறப்பு விழாவில் காரைதீவு பிரதேச சபையின் தவிசாளர் சு.பாஸ்கரன், முன்னாள் தவிசாளர் கி.ஜெயசிறில், ஓய்வு நிலை உதவிக் கல்விப் பணிப்பாளர் வி.ரி.சகாதேவராஜா, சட்டத்தரணி இ.ரகுபதி உள்ளிட்ட பல பிரமுகர்களும் கலந்து கொண்டனர்.

கோமாரி பாலத்தில் சோலர் பல்புகள்!

2026-04-15T18:35:09.735+05:30

( வி.ரி.சகாதேவராஜா)

அக்கரைப்பற்று - பொத்துவில் பிரதான வீதியில் உள்ள கோமாரி பாலத்தடியில் முதன்முதலாக இரண்டு சூரிய மின் விளக்குகள்( Solar powered street lamps) பொருத்தப்பட்டுள்ளன.

பொத்துவில் பிரதேச சபையின் இலங்கை தமிழ் அரசுக் கட்சி கோமாரி உறுப்பினர் த.சுபோதரன் விடுத்த வேண்டுகோளுக்கமைவாக, பொத்துவில் பிரதேச சபைத் தவிசாளர் எம்.எஸ்.எம்.முசாரப் இந்த நடவடிக்கையை மேற்கொண்டார்.

முதலைகள் பரவலாக உலாவும் இந்த கோமாரிப் பாலத்தடியில் இதுவரை காலமும் மின் விளக்குகள் இல்லாமல் இருட்டாக இருந்தது.

தற்போது இரவு வேளைகளில் இப்பாலத்தடி பகல் போல பிரகாசிக்கின்றது.

மக்கள் இச் செயற்பாட்டிற்கு வரவேற்பு தெரிவிப்பதோடு நன்றியும் கூறுகின்றனர்.

“திசைமாறிப் பயணிக்கும் மு.கா.வால் முஸ்லிம்களின் அபிலாசைகள் எட்டப்படாது” : ஊடகவியலாளர் சலீம் நினைவு நிகழ்வில் ஹசன் அலி கடும் விமர்சனம்

2026-04-15T18:33:00.001+05:30

நூருல் ஹுதா உமர்

அம்பாறை மாவட்டத்தில் முஸ்லிம் மக்களின் நீண்டநாள் அரசியல் அபிலாசைகளான கல்முனை கரையோர நிர்வாக மாவட்டத்தை பெற்றுக்கொடுக்க ஸ்ரீலங்கா முஸ்லிம் காங்கிரஸ் கட்சியால் ஒருபோதும் முடியாது என முன்னாள் இராஜாங்க அமைச்சரும், அக்கட்சியின் முன்னாள் செயலாளர் நாயகமும் ஆன எம்.ரி. ஹசன் அலி தெரிவித்துள்ளார்.

நிந்தவூரில் மறைந்த சிரேஷ்ட ஊடகவியலாளர் மர்ஹூம் ஏ.எல்.எம். சலீம் அவர்களின் நினைவாக நேற்று (11) நடைபெற்ற “அழியாத எழுத்து, மறையாத நினைவு” நிகழ்வில் கலந்துகொண்டு உரையாற்றுகையிலேயே அவர் இவ்வாறு குறிப்பிட்டார்.

மெஸ்ரோ அமைப்பின் ஏற்பாட்டில் மெஸ்ரோ அமைப்பின் ஸ்தாபக தலைவர் முன்னாள் இராஜாங்க அமைச்சர் எச்.எம்.எம். ஹரீஸ் தலைமையில், நிந்தவூர் பிரதேச சபை மண்டபத்தில் நடைபெற்ற இந்நிகழ்வில், தென்கிழக்கு பல்கலைக்கழக கலை மற்றும் கலாச்சார பீடாதிபதி பேராசிரியர் ஏ.எம். பாஸில், நிந்தவூர் பிரதேச சபை தவிசாளர் சட்டத்தரணி ஏ.எல். ரியாஸ் ஆதம், ஸ்ரீலங்கா முஸ்லிம் மீடியா போரத்தின் தலைவர் எம்.பி.எம். பைரூஸ் உள்ளிட்ட அரசியல், ஊடக மற்றும் சமூகத் துறையினரைச் சேர்ந்த பலரும் கலந்து கொண்டனர்.

தொடர்ந்து உரையாற்றிய ஹசன் அலி, ஸ்ரீலங்கா முஸ்லிம் காங்கிரஸ் தனது ஆரம்ப நோக்கத்திலிருந்து விலகி செயற்பட்டு வருவதாகக் கடுமையாக விமர்சித்தார். கட்சியின் ஸ்தாபகர் மர்ஹூம் எம்.எச்.எம். அஷ்ரப் முன்வைத்த இலக்குகள், குறிப்பாக முஸ்லிம் மக்களுக்கு தனித்துவமான நிர்வாக அங்கீகாரம் வழங்கும் கனவு, இதுவரை நடைமுறைக்கு வரவில்லை என அவர் சுட்டிக்காட்டினார்.

மேலும், தமிழ்–முஸ்லிம் நல்லுறவை வலுப்படுத்தும் முயற்சிகளில் அஷ்ரப் காட்டிய உறுதியையும், அந்த இலக்கை முன்னெடுக்க முக்கிய பங்கு வகித்தவர் மறைந்த ஊடகவியலாளர் ஏ.எல்.எம். சலீம் என்றும் அவர் நினைவுகூர்ந்தார்.

அம்பாறை மாவட்டத்தில் பெரும்பான்மையாக வாழும் முஸ்லிம் மக்களுக்கு தன்னாட்சி வாய்ந்த நிர்வாக மாவட்டம் ஒன்றை உருவாக்குவது தான் மு.கா.வின் அடிப்படை இலக்காக இருந்த போதிலும், அது இன்னும் எட்டப்படாதது கட்சியின் பலவீனமாகும் எனவும் அவர் குறிப்பிட்டார்.

இன்றைய சூழலில் பல முஸ்லிம் அரசியல் கட்சிகள் இருப்பினும், இத்தகைய அடிப்படை உரிமைகளைப் பெற முடியாத நிலை கவலைக்குரியது எனக் கூறிய அவர், முஸ்லிம் மக்களின் அடிப்படை பிரச்சினைகளுக்கு முன்னுரிமை வழங்குவது அவசியம் என்றும் வலியுறுத்தினார்.

இந்த அடிப்படை நோக்கங்களை மறந்து செயல்படும் பட்சத்தில், “முஸ்லிம் கட்சி” என்ற அடையாளத்தை ஸ்ரீலங்கா முஸ்லிம் காங்கிரஸ் இழந்து வருவதாகவும் ஹசன் அலி தெரிவித்துள்ளார்.

பாடுமீன் லயன்ஸ் கழகத்தின் 20-வது ஆண்டு நிறைவு: மட்டக்களப்பில் விழிப்புணர்வு துவிச்சக்கர வண்டி பேரணியும் கர்ப்பிணித் தாய்மார்களுக்கான உதவியும்!

2026-04-14T07:00:00.001+05:30

(கனகராஜா சரவணன்)

பாடுமீன் லயன்ஸ் கழகத்தின் 20-வது ஆண்டு நிறைவு: மட்டக்களப்பில் விழிப்புணர்வு துவிச்சக்கர வண்டி பேரணியும் கர்ப்பிணித் தாய்மார்களுக்கான உதவியும்!

மட்டக்களப்பு பாடுமீன் லயன்ஸ் ஹரிமா கழகத்தின் 20-வது ஆண்டு நிறைவினை முன்னிட்டு, இன்று (12) ஞாயிற்றுக்கிழமை பிரம்மாண்டமான துவிச்சக்கர வண்டி பேரணியும் மனிதாபிமான உதவி வழங்கும் நிகழ்வும் மட்டக்களப்பில் இடம்பெற்றன.

மட்டக்களப்பு திருப்பெருந்துறை சந்தியிலுள்ள பாரதியார் சிலைக்கு முன்பாக காலை ஆரம்பிக்கப்பட்ட இத்துவிச்சக்கர வண்டி பேரணியானது, கல்லடி மணிக் கூட்டுக் கோபுரம் வரை சென்று, அங்கிருந்து மீண்டும் மட்டக்களப்பு காந்தி பூங்காவை வந்தடைந்தது. சமூக விழிப்புணர்வை மையப்படுத்தி நடத்தப்பட்ட இப்பேரணியில் திரளானோர் கலந்துகொண்டனர்.

கழகத் தலைவர் லயன்ஸ் எஸ். மனோகரன் தலைமையில் நடைபெற்ற இந்நிகழ்வை, கழகத்தின் சிரேஸ்ட உறுப்பினர் லயன்ஸ் சடாற்சரராஜா அவர்கள் திறம்பட ஒருங்கிணைத்து வழிநடத்தினார்.

இந்நிகழ்வில் 306 D10 லயன்ஸ் கழகத்தின் ஆளுநர் லயன்ஸ் க. லொகேந்திரன் அவர்கள் பிரதம அதிதியாகக் கலந்துகொண்டு சிறப்பித்தார். விசேட அதிதிகளாக துணை ஆளுநர்களான லயன்ஸ் ஹாகீர் அகமட், லயன்ஸ் ரீ. ஆதித்தன் உள்ளிட்ட முக்கிய பிரமுகர்கள் கலந்துகொண்டனர்.

கழகத்தின் 20 ஆண்டு கால சேவையை நினைவுகூரும் வகையில், மனிதாபிமான அடிப்படையில் தெரிவு செய்யப்பட்ட கர்ப்பிணித் தாய்மார்களுக்கான உலர் உணவுப் பொதிகள் காந்தி பூங்காவில் வைத்து வழங்கி வைக்கப்பட்டன.

லயன்ஸ் கழகத்தின் முக்கிய உறுப்பினர்கள், சிவில் சமூக பிரதிநிதிகள் மற்றும் பொதுமக்கள் எனப் பலரும் கலந்து கொண்டு இந்த ஆண்டு நிறைவு விழாவினைச் சிறப்பித்தனர்.

பாரினில் இன்று பிறக்கும் பராபவ புத்தாண்டு புதுமை படைக்குமா?

2026-04-14T06:56:00.003+05:30

தமிழர் பண்பாட்டிலும் பாரம்பரியத்திலும் முக்கியத்துவம் வாய்ந்தது சித்திரைப் புத்தாண்டுப் பிறப்பு.

அது ஒவ்வொரு ஆண்டும் புதிய நம்பிக்கைகள் மற்றும் எதிர்பார்ப்புகளை விதைக்கிறது.

அந்த வகையில், விசுவாவசு ஆண்டைத் தொடர்ந்து, 60 ஆண்டு காலச் சுழற்சியின் 40வது ஆண்டான பராபவ ஆண்டு, 2026 ஏப்ரல் 14ஆம் தேதி பிறக்கிறது.

இந்த ஆண்டு வெறும் கால மாற்றத்தை மட்டுமல்லாது, மனம், சமூகம் மற்றும் உலகளாவிய அளவிலும் பல்வேறு மாற்றங்களை ஏற்படுத்தும் ஆண்டாகப் பஞ்சாங்கம் குறிப்பிடுகிறது.

பிறப்பு நேரத்தின் சிறப்பு

சித்திரை 1ஆம் தேதி காலை 8.46 மணிக்கு, சதயம் நட்சத்திரம் மற்றும் ரிஷப லக்னத்தில் பராபவ ஆண்டு பிறக்கிறது. இந்த நேரத்தில் சூரியன் மேஷ ராசிக்குள் பிரவேசிப்பதே தமிழ் புத்தாண்டின் துவக்கமாகக் கருதப்படுகிறது. இந்த கிரகநிலை, ஆண்டின் பலன்களுக்கு அடிப்படையாக அமையும் என நம்பப்படுகிறது.

பராபவ ஆண்டின் வெண்பா :

இடைக்காடர் சித்தர் ஆண்டுகளுக்கு மொழிந்த வெண்பாக்களில், பராபவ ஆண்டுக்கான வெண்பா இது

"மிக்க பராபவத்தின் மேதினியிற்

பின் மழையாம்

தக்க பசைக்கடழைக்குமே இது பலிக்காது

நான்கு வகைப்பல்லுயிர்க்கும் துன்பம்

கல்லிக்காதனவே கருது"

பொருள் :

பருவமழை தாமதமாக வரலாம்

பருவம் தவறிய மழை, வெயில் கலந்த காலநிலை

கால்நடைகளுக்கு பெரிய பாதிப்பு இருக்காது

பால் உற்பத்தி அதிகரிக்கும்

விவசாயம் சார்ந்த துறைகள் முன்னேறும்

ஆனால்…

மக்கள் வாழ்வாதாரத்தில் சில சவால்கள்

பொருளாதார ஏற்றத் தாழ்வுகள்

உலக சந்தை மாற்றங்கள்

உலகளாவிய சுழற்சிகள் ஏற்படும்.

பராபவ ஆண்டில் வரப்போகும் மாற்றங்களும், செய்ய வேண்டியவையும்:

மத்திய கிழக்கில் நடைபெறும் பதற்றங்கள் குறையலாம். ஆனால் முற்றிலும் மறையாது. புதிய தொழில்நுட்ப முன்னேற்றங்கள் அதிகரிக்கும். இணைய வழி மோசடிகள், பண ஏமாற்றங்கள் அதிகரிக்கும். அரசுத்துறைகளில் நவீன மாற்றங்கள் தோன்றும். புதிய நோய்கள், வைரஸ் தாக்குதல்கள் ஏற்படலாம். வீண் செலவுகள் அதிகரிக்கும் அபாயம், மனஅழுத்தம், குழப்பம் ஆகியவை ஏற்படும். அதனால் செலவுகளை கட்டுப்படுத்த வேண்டும். சேமிப்பை அதிகரிக்க வேண்டும். விழிப்புணர்வுடன் இருக்க வேண்டும்.

இந்த ஆண்டின் மிகப்பெரிய வரம், குரு பகவான் ராஜாவாக இருப்பது. இதனால் ஆன்மீகத்தில் நாட்டம் அதிகரிக்கும். கோயில் வழிபாடு உயரும். தியானம், தர்மம், யோகம் போன்றவை வளர்ச்சி பெறும்.

மனித மன மாற்றம்

பராபவ ஆண்டு, மனித மனத்தில் நேர்மறையான மாற்றத்தை உருவாக்கும் ஆண்டாக பார்க்கப்படுகிறது.

வஞ்சக எண்ணங்கள் குறைந்து, நல்லதை நோக்கிச் செல்லும் மனப்பாங்கு உருவாகும்.

உண்மையான உறவுகளின் மதிப்பு அதிகரிக்கும். அதேவேளை, அரசியல் நிலைத்தன்மையில் மாற்றங்கள் மற்றும் அமைதி குறையும் சூழல் உருவாகும் வாய்ப்பும் உள்ளது.

முடிவுரை

மொத்தத்தில், பராபவ சித்திரைப் புத்தாண்டு சவால்களும் வாய்ப்புகளும் கலந்த ஆண்டாக அமைகிறது. முன்னெச்சரிக்கை, சிக்கன வாழ்க்கை, ஆன்மீக நம்பிக்கை ஆகியவற்றை கடைபிடித்தால் இந்த ஆண்டை வெற்றிகரமாக சமாளிக்க முடியும். புதிய எண்ணங்களுடனும் நல்ல மனப்பாங்குடனும் இந்த புத்தாண்டை வரவேற்போம்.

இனிய தமிழ் புத்தாண்டு நல்வாழ்த்துகள்!

வித்தகர் விபுலமாமணி வி.ரி.சகாதேவராஜா

காரைதீவு

மருத்துநீர் காய்ச்சும் நிகழ்வு!

2026-04-13T21:44:00.003+05:30

முனைத்தீவு ஆலயங்களில் நிருவாகத்தினரின் ஏற்பாட்டில் பக்திபூர்வமாக நடைபெற்ற மருத்துநீர் காய்ச்சும் நிகழ்வு!

மட்டக்களப்பு, முனைத்தீவு அருள்மிகு ஸ்ரீ மாணிக்கப்பிள்ளையார் மற்றும் ஸ்ரீ பத்திரகாளியம்பாள் ஆலயங்களில் சித்திரை புத்தாண்டு கொண்டாட்டங்களை முன்னிட்டு, மருத்துநீர் காய்ச்சும் நிகழ்வு இன்று (13.04.2026) திங்கட்கிழமை பக்திபூர்வமாக நடைபெற்றது.

சித்திரை வருடப்பிறப்பை நாளை(14.04.2026)ஆம் திகதி வரவேற்கும் முகமாக, இரு ஆலயங்களினதும் நிருவாக சபையினரின் சிறப்பான ஏற்பாட்டில் இந்த மருத்துநீர் காய்ச்சும் நிகழ்வு முன்னெடுக்கப்பட்டது.

இதன்போது பாரம்பரிய முறைப்படி பல்வேறு மூலிகைத் திரவியங்கள் சேகரிக்கப்பட்டு, முறைப்படி மருத்துநீர் காய்ச்சப்பட்டது.

இந்நிகழ்வின் போது ஆலயங்களில் விசேட அபிஷேக ஆராதனைகளும், சங்கற்ப பூசைகளும் இடம்பெற்றன.

(ரஞ்சன்)

ஜெஸ்மி எம்.மூஸா எழுதிய 'அஷ்ரஃப் எனும் இலக்கியம்' ஆய்வு நூல் வெளியீட்டு விழா

2026-04-13T21:40:00.004+05:30

சா.நடனசபேசன்

இலக்கிய விமர்சகரும் சிரேஷ்ட ஊடகவியலாளரும் வருகைதரு விரிவுரையாளருமான ஜெஸ்மி எம்.மூஸா எழுதிய 'அஷ்ரஃப் எனும் இலக்கியம்' ஆய்வு நூல் வெளியீட்டு விழா மருதமுனை கலாசார மண்டபத்தில் திங்கட் கிழமை(13) மாலை நடைபெற்றது

வாழ்நாள் ஊடக சாதனையாளர் கலாபூஷணம் மர்ஹும் ஏ.எல்.எம்.சலீம் அரங்கில் இடம்பெற்ற இந்நிகழ்வு தென்கிழக்குப்பல்கலைக்கழக மொழித்துறையின் தவிசு பேராசிரியர் றமீஸ் அப்துல்லா தலைமையில் இடம்பெற்றது

தென்கிழக்குப்பல்கலைக்கழக கலை கலாசார பீடாதிபதி எம்.எம்.பாஸில் பிரதம அதிதியாகவும் வெளியீட்டுப் பிரதியை ஸ்ரீலங்கா முஸ்லிம் காங்கிரஸின் மருதமுனை அமைப்பாளர் எம்.எச்.எம்.தாஜுதீன்(சறோ) பெற்றுக்கொண்டார்.

கல்முனை வலயக் கல்விப் பணிப்பாளர் எம்.எஸ்.சஹுதுல் நஜீம் முன்னிலை அதிதியாகக் கலந்து சிறப்பித்ததுடன. நினைவுப் பிரதியினை சவூதி அரேபியா நீதி அமைச்சின் மென்பொறியியலாளர் சலீம் அக்கீல் பெற்றுக் கொண்டார் .விழாவின் தொடக்கவுரையினை கல்முனை வலயக் கல்வி அலுவலக தமிழ் மொழிக்கான பிரதிக் கல்விப் பணிப்பாளர் யூ.எல்.றியால் நிகழ்த்தியதுடன் தென்கிழக்குப் பல்கலைக்கழக மொழித்துறை சிரேஷ்ட விரிவுரையாளர் எம்.அப்துல் றஸாக் நுால் ஆய்வுரையினை நிகழ்த்தியமை குறிப்பிடத்தக்கது;

கதிர்காம பாதயாத்திரையினை புனித யாத்திரையாக வர்த்தமானி பிரகடனம் செய்ய இந்து அமைப்புகள் கூட்டாக வேண்டுகோள்! காரைதீவு கலந்துரையாடலில் ஏகோபித்த தீர்மானம்.

2026-04-13T21:10:00.002+05:30

( வி.ரி.சகாதேவராஜா)

2000 ஆண்டுகள் பழமையானதாகக் கருதப்படும் கதிர்காம பாதயாத்திரையை வர்த்தமானிப் பிரகடனம் செய்து ஒரு புனித யாத்திரையாகப் பிரகடனம் செய்ய வேண்டும் என்று வடக்கு கிழக்கில் உள்ள இந்து அமைப்புகள் நேற்று காரைதீவில் கூட்டாக இணைந்து வேண்டுகோள் விடுத்தனர்.

மேற்படி கலந்துரையாடல் நேற்று (11)

சனிக்கிழமை

அம்பாறை மாவட்ட மேலதிக அரசாங்க அதிபர் சிவ.ஜெகராஜன் தலைமையில் காரைதீவு சுவாமி விபுலாநந்தா ஞாபகார்த்த மண்டபத்தில் இடம்பெற்றது. காரைதீவு உதவி பிரதேச செயலாளர் பி.பிரணவரூபன் வரவேற்புரை நிகழ்த்தினார்.

கூட்டத்தில் பிரதேச செயலாளர்களான ஆர்.திரவியராஜ், ரி.ஜே.அதிசயராஜ் , உதவி பிரதேச செயலாளர்களான பி.பிரணவரூபன், ரி.திவாகர்.எம்.இராமக்குட்டி, தவிசாளர்களான சு.பாஸ்கரன், இ.ரூபசாந்தன்,ஏ.தர்மதாஸ ,உள்ளிட்ட பிரமுகர்கள் கலந்து சிறப்பித்தனர்.

அச்சமயம் வடக்கே செல்வச்சந்நிதி தொடக்கம் தெற்கே உகந்தை வரையிலான பிரதேச ஆலயங்கள் மற்றும் இந்து அமைப்புகளின் பிரதிநிதிகள் கலந்து கொண்டு தமது கருத்துக்களை முன் வைத்தனர்.

அனைவரும் வர்த்தமானி பிரகடனம் செய்யப்பட வேண்டும் என்று ஏகோபித்த ஆதரவை தெரிவித்தனர்.

இவைகள் அம்பாறை மாவட்ட செயலகம் ஊடாக இந்து சமய கலாசார அலுவல்கள் திணைக்களத்திற்கு அனுப்பி வைக்கப்படும். பின்னர் அமைச்சரவைக்கு அனுப்பி உரிய தீர்மானம் நகர்த்தப்படும் . கலந்து கொண்ட அனைவருக்கும் நன்றிகள்.என்று இறுதியாக மேலதிக அரசாங்க அதிபர் தெரிவித்தார்.

கூட்ட ஒருங்கிணைப்பை அம்பாறை மாவட்ட இந்து கலாச்சார உத்தியோகத்தர் கு.ஜெயராஜி மேற்கொண்டிருந்தார்.

மட்டு கரடியனாற்றில் புதையல் தோண்டிய விசேட அதிரடிப்படை அதிகாரி ஒருவர் உட்பட 4 பேர் கைது

2026-04-13T21:04:00.003+05:30

(கனகராஜா சரவணன்)

மட்டக்களப்பு கரடியனாறு பொலிஸ் பிரிவிலுள்ள பெரிய புல்லுமலை பிரதேசத்தில் புதையல் தோண்டும் நடவடிக்கையில் ஈடுபட்டுக் கொண்டிருந்த விசேட அதிரடிப்படை அதிகாரி ஒருவர் உட்பட 4 பேரை இன்று சனிக்கிழமை (11) அதிகாலையில் கைது செய்துள்ளதுடன் பூஜை பொருட்கள் மற்றும் புதையல் தோண்டும் உபகரணங்கள் மற்றும் 6 கையடக்க தொலைபேசிகளை மீட்டுள்ளதாக கரடியனாறு பொலிஸார் தெரிவித்தனர்.

பொலிசாருக்கு கிடைத்த இரகசிய தகவல் ஒன்றையடுத்து சம்பவ தினமான இன்று அதிகாலை 5.00 மணிக்கு கரடியனாறு பொலிஸ் பொறுப்பதிகாரி தலைமையிலான பொலிஸ் குழுவினர் பெரிய புல்லுமலை பிரதேசத்தில் புதையல் தோண்டும் நடவடிக்கையில் ஈடுபட்டவர்களை சுற்றி வளைத்து விசேட அதிரடிப்படை வீரர் ஒருவர் உட்பட 34 பேரை கைது செய்ததுடன் பூஜை பொருட்கள் மற்றும் புதையல் தோண்டும் உபகரணங்களை மீட்டனர்.

இதில் கைது செய்யப்பட்ட விசேட அதிரடிப்படை வீரர் வாழைச்சேனை விசேட அதிரடிப்படை முகாமில் கடமையாற்றும் வருவதுடன் விசேட நடவடிக்கைக்காக மகா ஓயா விசேட அதிரடிப்படை முகாமில் இணைக்கப்பட்டு கடமையாற்றி வந்துள்ள 36 வயதுடைய மொனரகலைச் சேர்ந்தவர் எனவும் மற்றும் உறுகாமம், தெய்யத்தகண்டி, பெரிய புல்லுமலை பகுதிகளைச் சேர்ந்த 44, 48, 48 வயதுடையவர்கள் எனவும் கைது செய்யப்பட்டவர்களை நீதிமன்றில் ஆஜர்படுத்த நடவடிக்கை எடுக்கப்பட்டு வருவதாக பொலிசார் தெரிவித்தனர்

இது தொடர்பான மேலதிக விசாரணைகளை கரடியனாறு பொலிசார் மேற்கொண்டு வருகின்றனர்.

போரதீவுப்பற்று பிரதேசசபை உள்ளூராட்சி உதவியாளர் திருமதி. சுமதி நகுலேசன் அவர்களுக்கு உணர்வுபூர்வமான விடைபெறுதல் விழா!

2026-04-13T19:58:00.001+05:30

மட்டக்களப்பு மாவட்டம்

போரதீவுப்பற்று பிரதேசசபை அலுவலகத்தில் உள்ளூராட்சி உதவியாளராகக் கடமையாற்றி வந்த திருமதி. சுமதி நகுலேசன் அவர்கள், சுமார் 27 வருட கால நீண்ட அரச சேவையிலிருந்து ஓய்வு பெற்றுச் செல்வதனை முன்னிட்டு, அவருக்கு மதிப்பளிக்கும் பிரியாவிடை நிகழ்வு நேற்று (10.04.2026) பிற்பகல் 2.00 மணிக்கு வெல்லாவெளி கலாசார மண்டபத்தில் சிறப்பாக நடைபெற்றது.

இந் நிகழ்வில், பிரதேசசபையின் தவிசாளர் வி. மதிமேனன்,செயலாளர் எஸ்.பகீரதன், பிரதேசசபை உறுப்பினர்கள், அலுவலக உத்தியோகஸ்தர்கள், மற்றும் ஊழியர்கள் எனப் பலரும் கலந்து கொண்டனர்.

திருமதி. சுமதி நகுலேசன் அவர்கள் தனது 27 வருட அரச பணியில் பல்வேறு பொறுப்புக்களைத் திறம்பட வகித்துள்ளார்.

குறிப்பாக, போரதீவுப்பற்று பிரதேச சபையின் உள்ளூராட்சி உதவியாளராக அவர் ஆற்றிய பணிகள் மக்கள் மத்தியிலும், சக ஊழியர்கள் மத்தியிலும் பெரும் வரவேற்பைப் பெற்றிருந்தன.

எதிர்வரும் (2026.04.13) ஆம் திகதி அவர் உத்தியோகபூர்வமாகப் பணியிலிருந்து ஓய்வு பெறவுள்ளார்.

பிரியாவிடை நிகழ்வின் போது, அவரது நீண்ட காலச் சேவையைப் பாராட்டி விசேட உரைகள் நிகழ்த்தப்பட்டன.

தவிசாளர் மற்றும் ஏனைய உத்தியோகஸ்தர்கள் உரையாற்றுகையில், திருமதி. நகுலேசன் அவர்களின் கடமை மீதான அர்ப்பணிப்பு, நேர்மை மற்றும் பொறுப்புணர்வு என்பன ஏனைய ஊழியர்களுக்கு முன்மாதிரியாக அமைந்ததாகக் குறிப்பிட்டனர்.

நிகழ்வின் இறுதியில், அவருக்கு பிரதேசசபை சார்பாக கௌரவங்கள் வழங்கப்பட்டதுடன், சக ஊழியர்களின் வாழ்த்துக்களுடன் விழா இனிதே நிறைவுற்றது.

(ரஞ்சன்)

“வாழும் போதே வாழ்த்துவோம்”- மட்டக்களப்பு போரதீவுப்பற்றில் சுகாதாரப் பணியாளர்களை கௌரவிக்கும் விருது விழா!

2026-04-13T19:52:00.001+05:30

மட்டக்களப்பு போரதீவுப்பற்று பிரதேசத்தில் தூய்மை மற்றும் மக்களின் ஆரோக்கியத்திற்காக அர்ப்பணிப்புடன் பணியாற்றும் சுகாதாரப் பணியாளர்களைப் பாராட்டி கௌரவிக்கும் விசேட விருது வழங்கும் நிகழ்வொன்று நேற்று(10.04.2026)ஆம் திகதி பிற்பகள் 3.30மணிக்கு போரதீவுப்பற்று பிரதேசசபையின் வெல்லாவெளி கலாசாரமண்டபத்தில் நடைபெற்றது.

“வாழும் போதே வாழ்த்துவோம்” எனும் மகுட வாசகத்துடன் முன்னெடுக்கப்படும் இந்த மனிதாபிமான நிகழ்வானது, மட்டக்களப்பு பாடுமீன் அரிமா கழகம் (Lions Club of Batticaloa Singal City) மற்றும் போரதீவுப்பற்று பிரதேச சபை ஆகியன இணைந்து ஏற்பாடு செய்துள்ளன.

நமது நகரத்தை சுத்தமாகவும், சுகாதாரமாகவும் வைத்திருப்பதில் முன்னின்று உழைக்கும் சுகாதாரப் பணியாளர்களின் சேவையை அங்கீகரிப்பதும், அவர்களைக் கௌரவிப்பதும் இந்த விழாவின் முக்கிய நோக்கமாகும்.

இந்த நிகழ்வானது Lions International District 306 D10 இன் அனுசரணையுடன் நடைபெறவுள்ளமை குறிப்பிடத்தக்கது.

கடினமான சூழலிலும் அயராது உழைக்கும் முன்களப் பணியாளர்களுக்கு சமூகத்தின் சார்பில் வழங்கப்படும் இந்த உயரிய கௌரவம், அவர்கள் மத்தியில் பெரும் நெகிழ்ச்சியையும் உற்சாகத்தையும் ஏற்படுத்தியுள்ளது.

ஊழியர்களின் பிள்ளைகளுக்கு காற்றல் உபகரணங்கள் வழங்கப்பட்டது.

இன்றைய நிகழ்வின் போது போரதீவுப்பற்று பிரதேசசபையின் தவிசாளர் வி.மதிமேனன்,பாடுபமீன் Lions Clubமட்டக்களப்புமாவட்ட ஆளுநர் Lion. K. லோகேந்திரன்,Lion P. சடாச்சர ராஜாமாவட்ட ஆளுநர் இணைப்புப்பாளர்,

மட்டக்களப்பு பாடுபமீன் லயன்ஸ் விதூசன், மற்றும் லயன்ஸ் சங்கத்தைச் சேர்ந்த நிர்வாகிகள், மற்றும்,போரதீவுப்பற்று பிரதேசசபையின் செயலாளர் எஸ்.பகீரதன், உத்தியோகஸ்தர்கள்,ஊழியர்கள்,மாணவர்கள் கலந்து கொண்டனர்.

(ரஞ்சன்)

மட்டு மண்முனையில் சிறுவன் ஒருவரை பலிகொடுத்;து புதையல் தோண்ட முற்பட்ட சம்பத்தில் கைது செய்யப்பட்ட பிரதேச செயலக பிரதம கணக்காளர்; ஓய்வு பெற்ற இராணுவ வீரர் உட்பட9 பேருக்கும் தொடர்ந்து 20 வரை விளக்கமறியல்

2026-04-13T19:48:00.001+05:30

(கனகராஜா சரவணன்)

காத்தான்குடி பொலிஸ் பிரிவிலுள்ள மண்முணை பிரதான வீதியில் ஆலயம் ஒன்றிற்கு அருகாமையில் 16 வயது சிறுவன் ஒருவரை பலிகொடுத்து புதையல் தோண்டும் நடவடிக்கையில் ஈடுபட்ட சம்பவத்தில் கைது செய்யப்பட்ட மொரட்டுவ பிரதேச செயலக பிரதம கணக்காளர் மற்றும் ஓய்வு பெற்ற இராணுவ வீரர் உட்பட 9 பேரையும் எதிர்வரும் 20 திகதிவரை விளக்கமறியலில் வைக்குமாறும் சிறுவனை சிறுவர் நன்னடத்தை பராமரிப்பு இல்லத்தில் வைக்குமாறு மட்டக்களப்பு நீதவான் நீதிமன்ற நீதவான் வெள்ளிக்கிழமை (10) உத்தரவிட்டதுடன்

கடந்த மார்ச் 31 ம் திகதி இரவு மண்முணை பிரதான வீதியிலுள்ள ஆலயம் ஒன்றிற்கு அருகாமையில் உள்ள காணி ஒன்றில் குழு ஒன்று புதையல் தோண்டும் நடவடிக்கையில் ஈடுபட்டுவருவதாக மாவட்ட குற்ற விசாரணைப் பிரிவுக்கு தகவல் ஒன்று கிடைத்தது.

இதனையடுத்து சம்பவ இடத்துக்கு சென்ற பொலிசார் மொரட்டுவ பிரதேச செயலக பிரதம கணக்காளர் மற்றும் ஓய்வு பெற்ற இராணுவ வீரர் மற்றும் மொரட்டுவ, கட்டுகஸ்தோட்டை, இங்கிராக்கொட, பொன்ற பிரதேசங்களைச் சேர்ந்த 9 பேருடன் பொலன்னறுவையைச் சோந்த 16 வயது சிறுவன் ஒருவர் உட்பட 9 பேரை கைது செய்ததுடன் பூஜை பொருட்களை மீட்டு காத்தான்குடி பொலிசாரிடம் ஒப்படைத்தனர்

இதனையடுத்து கைது செய்யப்பட்டவர்களுக்கு எதிராக கடந்த முதலாம் திகதி வழக்கு தாக்கல் செய்து மட்டக்களப்பு நீதவான் நீதிமன்ற நீதவான் முன்னிலையில் ஆஜர்படுத்திய போது கைது செய்யப்பட்ட சிறுவன் பொலன்னறுவைச் சேர்ந்தவர் எனவும் இவர் 3 தலைமுறையாக முதல் ஆண்பிள்ளை எனவும் சாதப்படி 3 நட்சத்திரங்கள் ஒன்றாக ஒரே நேரத்தில் பிறந்தவர் எனவும் இவரை பலிகொடுத்து புதையல் தோண்டுவதற்கு அழைத்துவரப்பட்டாகவும் சிறுவன் சார்பாக ஆஜரான சட்டத்தரணி முன்வைத்தார்.

அதேவேளை புதையல் தோண்டுவதில் ஈடுபட்டவர்கள் சார்பாக ஆஜராகிய சட்டத்தரணி சிறுவன் புதையல் நிலத்தில் எங்கு இருக்கின்றது என சரியாக மை போட்டு பார்க்கும் திறண் கொண்ட மந்திரவாதி என வாதங்களை முனைவை த்ததையடுத்து நீதவான் சிறுவனை சிறுவர் நன்னடத்தை பராமரிப்பு இல்லத்தில் வைக்குமாறும் ஏனையவர்களை கடந்த 10 ம் திகதிவரை விளக்கமறியலில் வைக்குமாறு உத்தரவிட்டார்

இதனை தொடர்ந்து குறித்த வழக்கு விசாரணை நீதிமன்றில் வெள்ளிக்கிழமை 10 ம் திகதி விசாரணைக்காக எடுக்கப்பட்டதையடுத்து தொடரந்து சிறுவனை சிறுவர் நன்னடத்தை பராமரிப்பு இல்லத்தில் வைக்குமாறும் ஏனையவர்கள் 8 பேரையும் எதிர்வரும் 20 வரை விளக்கமறயலில் வைக்குமாறு நீதவான் உத்தரவிட்டார்.

அதேவேளை புதையல் தோண்டும் நடவடிக்கையில் ஈடுபட்ட பிரதேசம் வரலாற்று ரீதியாக கடந்த ஆயிரம் வருடத்துக்கு முன்னர் சோழமன்னன் குலத்தைச் சோந்த நாச்சியார் மட்டக்களப்பின் நகரமாக மண்முணையை மையமாக வைத்து நெல்லிக்குளம் எனும் குளத்தை கட்டி ஆண்டு வந்துள்ளனர் இந்த மாவட்டத்தில் பல பகுதிகளில் தொல்லியல் பொருட்கள் புதையுண்டு உள்ளது இதனை தோண்டி எடுத்து தமிழ் மன்னனான சோழர் மன்னனின் வரலாற்று சுவடுகளை அழிக்கும் முகமாக தற்போது மட்டக்களப்பு மாவட்டத்தில் புதையல் தோண்டுவதற்கு படையெடுத்து வருகின்றமை குறிப்பிடத்தக்கது

ஆயுர்வேத வைத்திய துறையின் யூனானி வைத்தியத்தை காரைதீவுக்கு கொண்டு வந்தவர் இளம் வைத்தியர் திருமதி டெலக்சனா உமாரமணன் ! ஓய்வு நிலை உதவிக் கல்விப் பணிப்பாளர் வி.ரி.சகாதேவராஜா புகழாரம்

2026-04-13T19:39:00.006+05:30

( நமது நிருபர்)

ஆயுர்வேத வைத்திய துறையின் யூனானி வைத்தியத்தை காரைதீவுக்கு கொண்டு வரும் இளம் வைத்தியர் திருமதி டெலக்சனா உமாரமணன் வாழ்த்துக்களை தெரிவிப்பதாக ஓய்வு நிலை உதவிக் கல்விப் பணிப்பாளரும், சிரேஸ்ட ஊடகவியலாளருமான வி.ரி.சகாதேவராஜா தெரிவித்தார்.

இன்று (13) காரைதீவில் யூனானி வைத்திய நிலைய திறப்பு விழாவில் அதிதியாக கலந்து கொண்டு உரையாற்றிய திரு வி.ரி.சகாதேவராஜா மேலும் உரையாற்றும் போது,

முத்தமிழ் வித்தகர் சுவாமி விபுலானந்த அடிகளார் பிறந்த காரைதீவு மண்ணுக்கு மற்றுமொரு வைத்திய துறை, காலடி எடுத்து வைத்திருக்கின்றது என்று சொல்லலாம்.

உண்மையிலே இன்று மனிதர்களது வாழ்க்கை கோலங்கள்( life style) மாறி வருகின்றன. குறிப்பாக, அவர்களது நடை, உடை பாவனை அனைத்தும் உடனடி உணவு என்றும், வேறு வேறு உணவு வகைகளிலும் கவனங்கள் செலுத்தப்பட்டு வருகின்றன.

அதன் காரணமாக சமுதாயத்திலே நோய்நொடிகள் கூடுதலாக வருகின்றன.

எனவே அவர்கள் வைத்தியரை, வைத்தியசாலைகளை நாட வேண்டிய கடமைப்பாடும் இருக்கின்றது. இந்த இடத்திலே

காரைதீவை பொறுத்தவரையிலே

சுதேச வைத்தியம் அதுவும் ஆயுர்வேத வைத்தியம் என்பது காலாகாலமாக இருந்து வருகின்ற ஒன்றுதான்.

இருந்தாலும் அதற்கும் அப்பால் யூனானி மருத்துவம் என்பது சற்று வித்தியாசமான ஒன்று எமது சமுதாயத்திலே யூனானி மருத்துவம் ஒரு வித்தியாசமான மருத்துவ முறை. ஆனால் அந்த முறையையும் பயின்று துணிவோடு இன்று இந்த காரைதீவு மண்ணுக்கு முதன்முறையாக இந்த யூனானி மருத்துவத்தை அறிமுகப்படுத்துகின்றார் திருமதி டெலக்சனா உமாரமணன்.

அவர் அந்தப் பயிற்சியை கொழும்பிலே

ஒரு பட்டப்படிப்பை முடித்து, இன்று காரைதீவு பிரதான வீதியிலே, Dr. உமாசங்கரது, பல் சிகிச்சை நிலையத்துக்கு அருகிலே இந்த நிலையம் நல்லதொரு நாளிலே இன்று இந்த நிலையம் அமைக்கப்பட்டிருக்கின்றது.

யுனானி மருத்துவத்தின் சிறப்புகள் என்பது அபரிமிதமானவை, அவற்றையும் எம்மக்கள் உணர வேண்டும் என்பதற்காக இன்று டெலக்சனா உமாரமணன் இந்த இடத்திலே அதனை ஏற்படுத்தி இருக்கின்றார்.

உண்மையிலே காரைதீவு மக்கள் அவரை பற்றி பெருமைப்பட வேண்டும்.திரு சோதீஸ்வரன் அவர்களது குடும்பத்தில் முக்கியத்துவமான சிகிச்சை முறையான மருத்துவ முறைகளை முதலாவதாக தடம் பதித்திருக்கின்றார்.யூனானி மருத்துவத்திலே பட்டப் படிப்பை முடித்து திருமதி டெலக்சனா உமாரமணன் டாக்டர் ஆக இருக்கின்றார். ஆக இன்றைய தினம் தொடக்கம் காரைதீவு மண்ணுக்கு இந்த யூனானி மருத்துவத்துறை அறிமுகமாகின்றது என்ற செய்தியை சொல்லி மக்கள் !அனைவரும் இந்த இடத்துக்கு வந்து அவரது சேவையை பெற வேண்டும். அவரை நாங்கள் ஊக்குவிக்க வேண்டும், என்று அனைவரையும் அன்போடு கேட்டுக்கொள்கின்றேன் என்றார்

செந்நெல் கிராமம் 2 இல் நீண்டகாலம் பாவிக்கப்படாத பாதை மீண்டும் திறப்பு

2026-04-13T19:34:00.001+05:30

நூருல் ஹுதா உமர்

சம்மாந்துறை பிரதேச சபைக்குட்பட்ட செந்நெல் கிராமம் 2 பகுதியில் நீண்ட காலமாக பராமரிப்பின்றி புற்கள் மற்றும் புதர்களால் மூடப்பட்டு பொதுமக்கள் பயன்பாட்டிற்கு தகுதியற்ற நிலையில் இருந்த பாதை, தற்போது சீரமைக்கப்பட்டு மக்கள் பாவனைக்காக திறந்து வைக்கப்பட்டுள்ளது.

குறித்த பாதை பல ஆண்டுகளாக பயன்பாட்டிற்கு இடையூறாக இருந்ததுடன், அப்பகுதி மக்களால் பலமுறை அதிகாரிகளிடம் முறையிடப்பட்டிருந்தது. இருப்பினும், தேவையான நடவடிக்கைகள் மேற்கொள்ளப்படாத நிலையில் இருந்தது.

இந்நிலையில், சம்மாந்துறை பிரதேச சபை தவிசாளர் ஐ.எல்.எம். மாஹிர் அவர்களின் தலைமையில், அகில இலங்கை மக்கள் காங்கிரசின் பிரதேச சபை உறுப்பினர்களின் ஒத்துழைப்புடன் உடனடி சீரமைப்பு பணிகள் முன்னெடுக்கப்பட்டன. இதன் போது, பாதையில் காணப்பட்ட புதர்கள் மற்றும் புற்கள் அகற்றப்பட்டதுடன், வீதி மட்டப்படுத்தப்பட்டு மக்கள் பாதுகாப்பாகப் பயணிக்கக்கூடிய வகையில் மாற்றப்பட்டுள்ளது.

இந்த நடவடிக்கை, அப்பகுதி மக்களின் நீண்டநாள் தேவையை பூர்த்தி செய்ததோடு, பிரதேசத்தின் அடிப்படை வசதிகளை மேம்படுத்தும் முயற்சியாகவும் பாராட்டப்படுகிறது.

மேலும், இவ்வாறான அடிப்படை வசதிகளை மேம்படுத்தும் பணிகள் தொடர்ச்சியாக மேற்கொள்ளப்படும் என பிரதேச சபை தரப்பில் தெரிவிக்கப்பட்டுள்ளது.

ஞாயிறன்று வீரமுனை சுயம்புலிங்க ஸ்ரீ வழிபாட்டுப் பிள்ளையார் ஆலய மகா கும்பாபிஷேகம்: இன்று எண்ணெய்க் காப்பு ஆரம்பம்!

2026-04-11T05:44:00.004+05:30

(வி.ரி. சகாதேவராஜா)

அம்பாறை மாவட்டத்தின் வீரமுனை கிராமத்தில்

புனரமைக்கப்பட்ட சுயம்புலிங்க ஸ்ரீ வழிபாட்டுப் பிள்ளையார் ஆலயத்தின் மகா கும்பாபிஷேக பெருவிழா நாளை மறுநாள் 12ஆம் தேதி ஞாயிற்றுக்கிழமை சிறப்பாக நடைபெற உள்ளது.

நேற்று 09.04.2026 ஆம் தேதி வியாழக்கிழமை கணபதி ஹோமம் மற்றும் கர்மாரம்பம் நடைபெற்றது.

இன்று வெள்ளிக்கிழமை 10.04.2026 மற்றும் நாளை 11.04.2026 சனிக்கிழமை ஆகிய தினங்களில் காலை 8.00 மணி முதல் மாலை 3 மணி வரை எண்ணெய்க்காப்பு சாத்தும் நிகழ்வு நடைபெறுகிறது. பெரும்பாலான பக்தர்கள் இதில் பங்கேற்று வருகின்றனர்.

அனைவரையும் ஆலய தலைவர் பொன். ரமேஷ்,

செயலாளர் குமரேசன் ,

பொருளாளர் யோகேந்திரன் ஆகியோர் இணைந்து அழைப்பு விடுத்துள்ளனர்.

மகா கும்பாபிஷேக நிகழ்வு 12.04.2026 நாளை மறுநாள் ஞாயிற்றுக்கிழமை அன்று காலை 8.00 மணி முதல் 10.00 மணி வரையான சுபமுகூர்த்த வேளையில் நடைபெறவுள்ளது.

வாழைச்சேனையில் புதையல் தோண்டிய 6 பேர் விசேட அதிரடிப்படையினரால் கைது

2026-04-11T05:34:00.001+05:30

(கனகராஜா சரவணன்)

வாழைச்சேனை பொலிஸ் பிரிவிலுள்ள குகணேசபுரம் பகுதியில் புதையல் தோண்டும் நடவடிக்கையில் ஈடுபட்ட வாழைச்சேனை, நுவரெலியா, உயாங்கொட பிரதேசங்களைச் சேர்ந்த 6 பேரை இன்று வெள்ளிக்கிழமை (10) அதிகாலையில் விசேட அதிரடிப்படையினர் கைது செய்ததுடன் பூஜைப் பொருட்கள் மற்றும் புதையல் தோண்டும் உபகரணங்களை மீட்டு ஒப்படைத்துள்ளதாக வாழைச்சேனை பொலிசார் தெரிவித்தனர்.

வாழைச்சேனை கடதாசி ஆலை விசேட அதிரடிப்படை முகாமிற்கு கிடைத்த தகவல் ஒன்றினையடுத்து சம்பவதினமான இன்று அதிகாலை விசேட அதிரடிப்படையினர் குகணேசபுரம் கருங்காலிச்சோலையில் எள்ள வீடு ஒன்றின் உரிமையாளரின் காணி ஒன்றில் சம்பவ தினமான இன்று அதிகாலையில் புதையல் தோண்டும் நடவடிக்கையில் ஈடுபட்டுக் கொண்டிருந்த பகுதியை சுற்றிவளைத்து 6 பேரை கைது செய்ததுடன் பூஜைப் பொருட்கள் மற்றும் புதையல் தோண்டும் உபகரணங்களை மீட்டனர்.

இதில் கைது செய்யப்பட்டவர்கள் கருங்காலிச்சோலை, ஓட்டுமாவடி, நவகந்தேகம, மற்றும் உயாங்கொட, நுவரெலியா, பிரதேசங்களைச் சேர்ந்தவர்கள் எனவும் இவர்களை நீதிமன்றில் ஆஜர்படுத்த நடவடிக்கை எடுத்துவருவதாக பொலிசார் தெரிவித்தனர்.

சாய்ந்தமருது அல்-ஜலால் வித்தியாலயத்தில் இடம்பெற்ற "சுரகிமு ஶ்ரீ லங்கா" விழிப்புணர்வு நிகழ்வு

2026-04-11T05:31:00.005+05:30

(எம்.எஸ்.எம்.ஸாகிர்)

ஜனாதிபதி செயலகம், மின்சக்தி மற்றும் எரிசக்தி அமைச்சு ஆகியன இணைந்து Clean Sri Lanka வேலைத்திட்டத்தின் கீழ் முன்னெடுக்கப்படும் 'சுரகிமு லங்கா' (Surakimu Lanka) தேசிய வேலைத்திட்டத்தின் கீழ், மின்சாரத்தை சிக்கனமாகப் பயன்படுத்துவது குறித்த விழிப்புணர்வு நிகழ்வு சாய்ந்தமருது அல்-ஜலால் வித்தியாலயத்தில் இன்று (10) சிறப்பாக நடைபெற்றது.

பாடசாலை அதிபர் எம்.எம். ஹிர்வஹான் தலைமையில் நடைபெற்ற இந்த விசேட காலை ஆராதனை நிகழ்வில், கல்முனை பிராந்திய சிரேஷ்ட உதவி பொறியியலாளர் வீ.ரீ. சம்பந்தன் வளவாளராகக் கலந்து கொண்டார்.

இந்நிகழ்வில்,

மின்சார சேமிப்பு விழிப்புணர்வுகள் குறித்து மின்சாரத்தை வீணாக்குவதைத் தவிர்த்து, தேசத்தின் முன்னேற்றத்திற்காக எவ்வாறு பொறுப்புடன் மின்சாரத்தைப் பயன்படுத்துல் மற்றும் எதிர்வரும் விடுமுறை காலத்தில் வழங்கப்பட்ட கையேட்டினைப் பயன்படுத்தி எவ்வாறு பாடசாலை மட்ட மின்சக்தியை சேமிப்புப் போட்டியில் கலந்து கொள்ளல் என்பது தொடர்பாக மாணவர்களுக்கு விளக்கமளிக்கப்பட்டது.

அத்துடன், இரவு 7:00 மணி முதல் இரவு 10:00 மணி வரையிலான உச்ச மின் பயன்பாட்டு நேரத்தில் மின் பாவனையைக் குறைத்தல், பயன்படுத்தாத மின் இணைப்புகளைத் துண்டித்தல், மின் அழுத்தியை ஒரே நேரத்தில் பயன்படுத்தி ஆடைகளை அழுத்துதல், குளிர்சாதனப்பெட்டியை வினைத்திறனாகப் பயன்படுத்தல் போன்ற அவசியமான ஆலோசனைகள் மாணவர்களுக்கு வழங்கப்பட்டதுடன், மின்சக்தி அமைச்சினால் வெளியிடப்பட்ட மின்சக்தியை எவ்வாறு சேமித்தல் தொடர்பான ஆவணப்படமும் மாணவர்களுக்கு காட்சிப்படுத்தப்பட்டது.

பிரதி அதிபரும் Clean Sri Lanka நிகழ்ச்சித் திட்டத்தின் பாடசாலை இணைப்பாளருமான எம்.ஏ.எம். ஸிராஜ் அவர்களின் நெறிப்படுத்தலில் நடைபெற்ற இந்நிகழ்வில், உதவி அதிபர்கள், பகுதித் தலைவர்கள், ஆசிரியர்கள், கல்விசாரா ஊழியர்கள் உட்பட மாணவர்களும் கலந்து கொண்டனர்.

கல்முனை பொது சந்தை பகுதியில் பொதுச் சுகாதார பரிசோதகர்களினால் பரிசோதனை

2026-04-11T05:26:00.003+05:30

----

(எம்.என்.எம்.அப்ராஸ்)

எதிர்வரும் தமிழ்,சிங்கள புத்தாண்டை முன்னிட்டு கல்முனை பிராந்திய சுகாதார சேவைகள் பணிப்பாளர் டாக்டர் ஷகிலா இஸ்ஸதீன் அவர்களின் நெறிப்படுத்தலில் கல்முனை தெற்கு சுகாதார வைத்திய அதிகாரி ஸஹ்ரா சாரப்தீன் வழிகாட்டலில் மேற்பார்வை பொது சுகாதார பரிசோதகர் ஜே.எம். நிஜாமுதீன் தலைமையில் கல்முனை தெற்கு சுகாதார வைத்திய அதிகாரி பிரிவிற்குட்பட்ட கல்முனை பொது சந்தை பகுதியில் உணவகங்கள் மற்றும் வீதியோர மரக்கறி விற்பனை நிலையங்கள் பொது சுகாதார பரிசோதகர்களினால் இன்று (08) பரிசோதனைக்குட்படுத்தப்பட்டன.

இதன்போது மனித நுகர்வுக்குப் பொருத்தமற்ற பழுதடைந்த மரக்கறி வகைகள் ,உணவுப் பொருட்களும் கைப்பற்றப்பட்டு சுகாதார விதிமுறைகளை மீறிய விற்பனையாளர்களுக்கு நடவடிக்கை எடுக்கப்பட்டதுடன் சுகாதார விதிமுறைகள்,உணவு பாதுகாப்பு நடைமுறைகள் மற்றும் தேவையான ஆலோசனைகள் மற்றும் வழிகாட்டுதல்கள் வழங்கப்பட்டன.

பொது சுகாதார பரிசோதகர்களான எம். ஜூனைதீன், ஐ.எல்.எம் இத்ரீஸ், கே.எல். மன்சூர் , ஆர். எம். முஹ்சீன் ஆகியோர் மேற் குறித்த பரிசோதனை நடவடிக்கையில் ஈடுபட்டனர்.

விவேகானந்த தொழில்நுட்பவியல் கல்லூரியின் 14வது ஆண்டு நிறைவு விழா

2026-04-10T06:14:00.004+05:30

( வி.ரி.சகாதேவராஜா)

மட்டக்களப்பு புதுக்குடியிருப்பு விவேகானந்த தொழில்நுட்பவியல் கல்லூரியின் 14வது ஆண்டு நிறைவு விழா கல்லூரியின் நிறைவேற்றுப் பணிப்பாளர் க.பிரதீஸ்வரன் முன்னிலையில் நேற்று முன்தினம் கொண்டாடப்பட்டது.

இதனை சிறப்பிக்கும் முகமாக, கல்லூரி பயிலுனர்களுக்கிடையே Presentation, Quiz போன்ற அறிவு மற்றும் மென் திறன் போட்டிகளும், Chess மற்றும் Carrom போன்ற உள்ளரங்க திறன் விளையாட்டுகளும் இடம்பெற்றன.

இதில் புதுக்குடியிருப்பு மற்றும் கொம்மாதுறை கிளைகள் உட்பட கரடியனாறு மற்றும் காரைதீவு சமுதாயக் கல்லூரிகளிலும் பயிலும் 130-க்கும் மேற்பட்ட பயிலுனர்கள் கலந்து கொண்டனர்.

Presentation, Quiz, Chess, Carrom போன்ற நான்கு கட்டங்களாக நடைபெற்ற இப்போட்டிகளில், பயிலுனர்கள் தமது திறமைகளை சிறப்பாக வெளிப்படுத்தினர். இதன் மூலம், கல்லூரி பயிலுனர்கள் மத்தியில் மறைந்துள்ள ஆற்றல்களை வெளிப்படுத்தும் முக்கியமான சேவையை நிகழ்த்தி வருகிறது.

இறுதியாக, போட்டிகளில் கலந்து கொண்ட பயிலுனர்களுடன் கல்லூரியின் நிறைவேற்றுப் பணிப்பாளர் க.பிரதீஸ்வரன் மற்றும் நடுவர்களுடன் கலந்துரையாடல் நடைபெற்றது. இக்கலந்துரையாடலில், போட்டியாளர்கள் தமது திறமைகளை மேலும் மேம்படுத்திக்கொள்ள ஆக்கபூர்வமான கருத்துகளும் பாராட்டுகளும் வழங்கப்பட்டன.

கதிர்காம பாதயாத்திரையினை புனித யாத்திரையாகப் வர்த்தமானி பிரகடனம் செய்யக்கோரும் கலந்துரையாடல்!

2026-04-10T06:08:00.000+05:30

( வி.ரி.சகாதேவராஜா)

2000 ஆண்டுகள் பழமையானதாகக் கருதப்படும் கதிர்காம பாதயாத்திரையை வர்த்தமானிப் பிரகடனம் செய்து ஒரு புனித யாத்திரையாகப் பிரகடனம் செய்யக் கோரும் கலந்துரையாடல் ஒன்று எதிர்வரும்

சனிக்கிழமை 11.04.2025 ஆம் திகதி காலை 9.00 மணிக்கு காரைதீவில் நடைபெறவுள்ளது.

அம்பாறை மாவட்ட மேலதிக அரசாங்க அதிபர் சிவ.ஜெகராஜன் தலைமையில் இக் கூட்டம் காரைதீவு சுவாமி விபுலாநந்தா ஞாபகார்த்த மண்டபத்தில் இடம்பெறவுள்ளது.

இக்கதிர்காம பாதயாத்திரையை பிரகடனப்படுத்த மட்டக்களப்பு அம்பாறை மாவட்டத்தில் உள்ள ஆலயம் மற்றும் இந்து மன்றங்கள் அமைப்புக்கள் சார்பாக கலந்து கொண்டு கருத்துக்களை முன்வைக்கும்படி அழைப்பு விடுக்கப்பட்டுள்ளது.

ஏலவே சபரிமலை ஐயப்பன் கோவில் யாத்திரை வர்த்தமானி பிரகடனம் செய்யப்பட்டு அரச அங்கீகாரம் பெற்றுள்ளமை குறிப்பிடத்தக்கது.

எனவே கதிர்காம பாதயாத்திரை நிகழ்வானது வருடாந்தம் பல்லாயிரக்கணக்கான பக்தர்கள் பங்கேற்கும்

ஒரு சிறப்பு பொருத்திய தேசிய நிகழ்வாக காணப்படுகிறது.

இதனை அரச அங்கீகாரத்துடன் நடைபெறுவதற்கு சமகால அரசு நடவடிக்கை எடுக்க வேண்டும் என இந்து அமைப்புகள் கோரிக்கைகள் விடுத்ததற்கமைவாக இக் கலந்துரையாடலுக்கு மாவட்ட செயலகம் அழைப்பு விடுத்துள்ளது

சுகாதார அமைச்சரினால் நியமிக்கப்பட்ட கல்முனை ஆதாரவைத்தியசாலையின் புதிய வைத்தியசாலை குழுவினர் பதவியேற்பு

2026-04-10T05:56:00.000+05:30

( வி.ரி. சகாதேவராஜா)

சுகாதாரம் மற்றும் வெகுசன ஊடகத்துறை அமைச்சர் மருத்துவர் நளிந்த ஜெயதிஸ்ஸவினால் நியமிக்கப்பட்ட கல்முனை ஆதார வைத்தியசாலையின் புதிய வைத்தியசாலை குழுவினர், நேற்று (8) புதன்கிழமை, வைத்தியசாலையின் பணிப்பாளர் பணிமனையில் பதவியேற்றனர்.

சுகாதாரம் மற்றும் வெகுஜனஊடகத்துறை அமைச்சர் நளிந்த ஜெயதிஸ்ஸவினால் நியமிக்கப்பட்ட 16 உறுப்பினர்கள், கல்முனை ஆதார வைத்தியசாலை பணிப்பாளர் மருத்துவர் குணசிங்கம் சுகுணன் முன்னிலையில் பதவியேற்றனர்.

புதிய வைத்தியசாலை குழுவின் தவிசாளராக, கல்முனை மாநகர சபையின் முன்னாள் உறுப்பினரும், பிரபல சமூக செயற்பாட்டாளருமான சந்திரசேகரன் ராஜன் அமைச்சரினால் நேரடியாக நியமிக்கப்பட்டிருந்தார்.

இப் பதவியேற்பு வைபவத்தில், பிரதித் தவிசாளராக ஓய்வு நிலை உதவிக் கல்விப் பணிப்பாளர் விபுலமாமணி வி.ரி.சகாதேவராஜா மற்றும் பொருளாளராக நாவிதன்வெளி பிரதேச சபையின் தவிசாளர் இ.

ரூபசாந்தன் ஆகியோர் ஏகமனதாக தெரிவு செய்யப்பட்டனர்.

புதிய சபையின் செயலாளராக வைத்தியசாலையின் வைத்திய அதிகாரி மருத்துவர் எஸ். ராகுலன் பதவிவழியாக நியமிக்கப்பட்டுள்ளார்.

ஏனைய உறுப்பினர்களாக

வி. சந்திரன்,

செ. சுரேஷ், செ. சதீஸ்குமார் ,

ஆ .கதிரமலை , லெ. லெட்சுமிகாந்தன், ந. சௌவியதாசன்,செ. தங்கவேல் , எஸ். காந்தரூபன், கே. பிரகலாதன் , நி. நிமோஜனா, க. சிவலிங்கம்,சி. சிவராஜகுமார், கா. மகேந்திரராசா ஆகியோர் பதவியேற்றனர்.

இவர்களுக்கான, அமைச்சரின் நியமனக் கடிதங்களை பணிப்பாளர் மருத்துவர் கு.சுகுணன் உத்தியோகபூர்வமாக வழங்கி வைத்தார்.

நிகழ்வில், நிருவாக உத்தியோகத்தர் ரி.தேவஅருள், தாதிய பரிபாலகர் என்.

சசிதரன், பிரதம முகாமைத்துவ உதவியாளர் திருமதி ரோஸி சுகுமார் ஆகியோரும் சமூகமளித்திருந்தனர்.

மட்டு கல்லடியில் பிரபல கசிப்பு பெண் வியாபரி 105 போத்ல் கசிப்புடன் கைது

2026-04-10T05:46:00.002+05:30

(கனகராஜா சரவணன்)

மட்டக்களப்பு கல்லடியில் நீண்டகாலமாக கசிப்பு வியாபாரத்தின் பிரதான நிலையமாக இயங்கி கசிப்பு விற்பனை நிலையத்தை நேற்று புதன்கிழமை (8) மாலையில் முற்றுகையிட்ட பொலிசார் பெயர் போன கசிப்பு வியாபரியான பெண் ஒருவரை 105 போத்தல் கசிப்புடன் கைது செய்துள்ளதாக மட்டக்களப்பு தலைமையக பொலிசார் தெரிவித்தனர்.

மட்டக்களப்பு மாவட்ட சிரேஷ்ட பொலிஸ் அத்தியட்சகர் லலித் லீலாரத்தினவின் ஆலோசனையில் மட்டு தலைமையப பொலிஸ் நிலைய பொறுப்பதரிகாரி பிரியந்த பண்டாரவின் வழிகாட்டலில் போதை ஒழிப்பு பிரிவு பொறுப்பதிகாரி பொலிஸ் உப பரிசோதகர் சந்தன தலைமையில் சாஜன் ஜெயசிங்க, அஜித், பொலிஸ் கொஸ்தாப் பர்களான ரதன், கொடிகார, ஜெயரத்தின கொண்ட குழுவினர் சம்பவதினமான நேற்று பகல் கல்லடி வேலூர் 4ம் குறுக்கு வீதியில் வீட்டை சுற்றி உயரத்தில் மதில் அமைத்து அதில் சிசிரிகமாரக்கள் பொருத்தப்பட்டு வீட்டை முற்றுகையிட்டனர்

இதின் போது அங்கு கசிப்பு வியாபரத்தில் ஈடுபட்டுவந்த பெண்ணை கைது செய்ததுடன் 105 போத்தல் கசிப்பை மீட்டனர்

இதேவேளை காத்தான்குடி பொலிஸ் பிரிவில் உள்ள குறித்;த பெண் வீட்டினை சுற்றி உயரமாக மதில் அமைத்து சிசிரி கமராக்களை பொருத்தி நீண்டகாலமாக கசிப்பு வியாபரத்தில் ஈடுபட்டு வந்துள்ள இவர் பொலிசார் வீட்டை முற்றுகையிடும் போது சிசிரி கமராவில் பார்த்து கொண்டதும் வீட்ன் கதவை மூடி வீட்டில் யாரும் இலாததுபோல வீட்டுக்குள் இருந்து கொண்டு பொலிசார் போன பின்பு வியாபாரத்தில் ஈடுபட்டுவார். என்பதுடன் இவருக்கு எதிராக பொதுக்கள் பொலிசாரிடம் பல முறைப்பாடு செய்துள்ளமை குறிப்பிடதக்கது

மட்டக்களப்புக்கு யாழ், கொழும்பில் இருந்து தனியாக பிரயபணிப்பவர்கள் அறிமுகம் இல்லாதவர்களிடம் எதையும் வாங்கி சாப்பிடவேண்டாம் -- கிழக்கு மாகாண பெரும் குற்றத் தடுப்பு பிரிவு பொறுப்பதிகாரி ரி.மேனன்

2026-04-10T05:41:00.001+05:30

(கனகராஜா சரவணன்)

யாழ்ப்பாணம் மற்றும் கொழும்பில் இருந்து மட்டக்களப்பு அம்பாறைக்கு தனியாக பஸ்வண்டிகளில் பிரயாணிக்கும் பிரயாணிகளுக்கு மயக்கமருந்து கலந்து லெமன்பெப் பஸ்கட் வழங்கி கொள்ளைகள் இடம்பெற்று வருகின்றது எனவே தனியாக பிரயாணிப்பவர்கள் அறிமுகம் இல்லாதவர்களிடம் பிஸ்கட வாங்கி சாப்பிட வேண்டாம் என்பதுடன் பொதுமக்கள் கொள்ளையர்களிடம் அவதானமாக இருக்குமாறு கிழக்கு மாகாண பெரும் குற்றத் தடுப்பு பிரிவு பொறுப்பதிகாரி தெய்வநாயகம் மேனன் தெரிவித்தார்.

கொழும்பு மற்றும் யாழ்ப்பாணத்தில் இருந்து மட்டக்களப்பு அம்பாறை மாவட்டங்களுக்கு பிரயாணிக்கும் பஸ் வண்டிகளில் பிரயாணிகள் போல பிரயாணிக்கும் கொள்ளையர்கள் பஸ்வண்டியில் தனியாக யார் பிரயாணிக்கின்றனர் என நோட்டமிட்டு பின்னர் அவர்களுக்கு அருகில் சென்று பேச்சு கொடுத்துவிட்டு அவர்களுக்கு தமது பையில் இருந்து கவர் உடையாத மயக்க மருந்து கலந்த லெமன் பெப் பிஸ்கட்டை எடுத்து கொடுத்து வழங்குவார்கள் அதனை உடைத்து சாப்பிட்டதும் சிறிது நேரத்தில் அவர்கள் மயக்கமடைந்து விடுவார்கள்.

அதன் பின்னர் அவர்கள் அணிந்திருக்கும் காப்பு மோதிரம், சங்கிலி, போன்ற தங்க ஆபரணங்கள் மற்றும் அவர்களுது கைபையில் இருக்கும் பணம் என்பவற்றை கொள்ளையடித்து கொண்டு ஏதாவது ஒரு இடத்தில் இறங்கி விடுவார்கள் மயக்கமடைந்தவர் பின்னர் வைத்தியசாலைக்கு அனுமதிக்கப்பட்டு 3 தினங்களுக்கு பின்னர்தான் சுயநிலைக்கு வருகின்றனர்.

இவ்வாறு அண்மை காலமாக பஸ்வண்டியில் பிரயாணித்த பலரிடம் கொள்ளைகள் இடம்பெற்றுள்ள சம்பவங்கள் பொலிஸ் நிலையங்களில் முறைப்பாடு கிடைத்துள்ளது எனவே குறித்த மாவட்டங்களில் இருந்து தனியாக பிரயாணம் செய்வர்கள் அறிமுகம் இல்லாதவர்களிடம் எதையும் வாங்கி சாப்பிடகூடாது என்பதுடன் பொதுமக்கள் விழிப்பாகவும் அவதானமாகவும் செய்படவும் என அவர் தெரிவித்தார்.

மங்களகம பகுதியில் எருமை மாட்டை சுட்டுக் கொன்ற இரு இளைஞர்கள் கைது துப்பாக்கி மீட்பு

2026-04-09T06:42:00.001+05:30

(கனகராசா சரவணன்)

மங்களகம பிரதேசத்தில் எருமை மாடு ஒன்றை துப்பாகியால் சுட்டுக் கொன்ற இருவரை நேற்று செவ்வாய்க்கிழமை (8) கைது செய்ததுடன் உள்நாட்டு தயாரிப்பு துப்பாக்கி ஒன்றை மீட்டுள்ளதாக மங்களகம பொலிசார் தெரிவித்தனர்.

மட்டக்களப்பு மாவட்ட எல்லைக் கிராமமான மங்களகம பொலிஸ் பிரிவில் உள்ள பக்கியல்ல சின்னவத்தையைச் சேர்ந்த செல்லத்துரை கிருஷ்ணன் என்பவரின் பெண் எருமை மாடு ஒன்றை சம்பவ தினமான நேற்று அதிகாலையில் மங்களகம 25 வது மையில் கல் பகுதியில் வைத்து துப்பாகியால் சுட்டுக் கொன்றுள்ளனர்.

இந்த சம்பவம் தொடர்பாக விசாரணைகளை மேற்கொண்ட பொலிசார் அந்த பகுதியைச் சேர்ந்த 25 வயதுடைய இரு இளைஞர்களை கைது செய்ததுடன் அவர்களிடம் இருந்து உள்நாட்டில் தயாரிக்கப்பட்ட துப்பாக்கி ஒன்றை மீட்டனர்.

இதில் கைது செய்யப்பட்டவர்களை விசாரணையின் பின்னர் நீதிமன்றில் ஆஸர்படுத்த நடவடிக்கை முன்னெடுக்கப்பட்டுள்ளதாக பொலிசார் தெரிவித்தனர்.

உலக இஸ்லாமிய தமிழ் இலக்கிய திருச்சி மாநாட்டில் அரங்கேறிய;

2026-04-09T06:31:00.002+05:30

இலக்கிய விமர்சகரும், சிரேஷ்ட ஊடகவியலாளரும் வருகைதரு விரிவுரையாளருமான ஜெஸ்மி எம்.மூஸா எழுதிய "அஷ்ரஃப் எனும் இலக்கியம்" ஆய்வு நூல் வெளியீட்டு விழா மருதமுனை கலாசார மண்டபத்தில் எதிர்வரும் திங்கட் கிழமை(13) மாலை 3.45 மணிக்கு நடைபெறவுள்ளது

வாழ்நாள் ஊடக சாதனையாளர் கலாபூஷணம் மர்ஹும் ஏ.எல்.எம்.சலீம் அரங்கில் இடம்பெறவுள்ள இந்நிகழ்விற்கு தென்கிழக்குப்பல்கலைக்கழக மொழித்துறையின் தவிசு பேராசிரியர் றமீஸ் அப்துல்லா தலைமை தாங்கவுள்ளார்.

தென்கிழக்குப்பல்கலைக்கழக கலை கலாசார பீடாதிபதி எம்.எம்.பாஸில் பிரதம அதிதியாகக் கலந்து கொள்ளவுள்ள இந்நிகழ்வின் வெளியீட்டுப் பிரதியை ஸ்ரீலங்கா முஸ்லிம் காங்கிரஸின் மருதமுனை அமைப்பாளர் எம்.எச்.எம்.தாஜுதீன்(சறோ) பெற்றுக் கொள்ளவுள்ளார்.

கல்முனை வலயக் கல்விப் பணிப்பாளர் எம்.எஸ்.சஹுதுல் நஜீம் முன்னிலை அதிதியாகக் கலந்து கொள்ளவுள்ள இந்நிகழ்வில் இலங்கை ரூபாவாஹினி கூட்டுத்தாபன நேத்ரா அலைவரிசை தமிழ் செய்திப்பிரிவின் பிரதானி சீ.பி.எம்.சியாம் ஊடக அதிதியாகக் கலந்து கொண்டு மர்ஹும் ஏ.எல்.எம்.சலீம் நினைவலைகளை முன்வைக்கவுள்ளார். நினைவுப் பிரதியினை சவூதி அரேபிய்யா நீதி அமைச்சின் மென்பொறியியலாளர் சலீம் அக்கீல் பெற்றுக் கொள்ளவுள்ளார்.விழாவின் தொடக்கவுரையினை கல்முனை வலயக் கல்வி அலுவலக தமிழ் மொழிக்கான பிரதிக் கல்விப் பணிப்பாளர் யூ.எல்.றியால் நிகழ்த்தவுள்ளதுடன் தென்கிழக்குப் பல்கலைக்கழக மொழித்துறை சிரேஷ்ட விரிவுரையாளர் எம்.அப்துல் றஸாக் நுால் ஆய்வுரையினை நிகழ்த்துவார்.

அலிஷ் ஊடக,கலை,இலக்கிய ,சமுக சேவை வலையமைப்பின் ஏற்பாட்டில் நிகழ்வுகள் இடம்பெறவுள்ளன.

ஸ்ரீலங்கா முஸ்லிம் காங்கிரஸின் முக்கியஸ்தர்கள், கல்வியியலாளர்கள், இலக்கியவாதிகள், ஊடகவியலாளர்கள், ஸ்ரீலங்கா முஸ்லிம் காங்கிரஸ் போராளிகள் எனப் பலரும் கௌரவ-விஷேட அதிதிகளாக அழைக்கப்பட்டுள்ளனர்.