Lau urteko tartea joan da, eta, besteren artean izen-aldaketarekin, abian dugu Euskal Herriko bertsolari txapelketa.

Aurreneko fasea aletu dugu denboraldiko aurreneko POTTO saioan.
Finalaurrekoak ate joka; finala, abenduaren 20an, hiri buruzagian.

Deskargatu hemen.

Kizkur eta Goroldio poz pozik datoz abesten, baina… Zer gertatzen zaio Txipiri? Badirudi triste dagoela, urtaro aldaketak dakarrena deseroso sentiarazten dio. Lagunek bere burua ulertzen lagundu dute eta jolas eta jolas, irri eta abesti, buelta eman diote egoerari.

Deskargatu hemen.

Asteburua ate joka dugu, eta ohikoa denez, agendari begirada bat botatzeko unea iritsi da. Bueltan dugu agenda tartea. Gabriel Aresti euskaltegiko ikasleak izan ditugu Bilbo Hiria irratian, eta haiek ekarritako proposamenekin astebururako plan erakargarriak ekarri dizkigute.

Deskargatu hemen.

Zaldiek trostan jarraitzen dute eta guk ere, lehengo asteko saioari segida emanez, gaurkoan beste abesti sorta bat aukeratu dugu, zaldien inguruan dauden kantuen artean. Berriro ere, hainbat eremutan arakatu dugu gure gustuko abesti kuttunen bila. Zeuen gustukoak ere izatea espero dugu.

Deskargatu hemen.

Entzun ditugun kantuok:

1. Horses (Patti Smith, 1976)
2. Viejo mundo (Camarón, 1979)
3. Zaldi emozionalak (Petti, 2020)
4. Wild Horses (Flying Burrito Brothers, 1970)
5. New Pony (Bob Dylan, 1978)
6. Sweet Baby James (James Taylor, 1970)
7. Zaldikoaren abestia (Zura, 2005)
8. Bottle of Smoke (The Pogues, 1988)
9. Horses in My Dreams (P.J. Harvey, 2000)

Euskal Idazleen Elkarteak, Antxeta Irratiak, Bilbo Hiria Irratiak eta Naiz Irratiak Mikel Antza idazlearekiko lankidetzan ekoizten dute LIBURUEN MINTZOA literatur irratsaioa. Hirugarren saioko gonbidatua Bide bihurrietan, gogoeta jauzilariak saiakera liburuaren egile Elena Martinez Rubio idazlea izan da. Horrezaz gain, Lekeitioko Aralde-berri liburu-dendako saltzaile den Sandra Irigoienek euskarara ekarritako haur eta gazte literaturako liburu sorta bat gomendatu zigun. Bide bihurrietan saiakera liburua eskuratu nahi duen entzuleak, 644 499 554 telefonoko whatsappean utzi behar du mezua. Eskatzen dutenen artean zozketan parte hartzeko, mezuaren hasieran LIBURUEN MINTZOA idatzi eta ondoren norberaren izen-abizenak eta liburuaren izena, oraingoan BIDE BIHURRIETAN.

Deskargatu hemen.

Gaurkoa bezalako egun batez zendu zen Baionan Agosti Xaho Lagarde, 1858ko urriaren 23an. Zuberoako Atharratze herrian 1811ko urriaren 10ean sortua, Xaho euskal kazetaria, idazlea, hizkuntzalaria eta politikaria izan zen. Haren pentsamoldea, ezkerreko euskal nazionalismo baten lehen aurrekaritzat hartzen da. Erromantiko sutsua zen. Euskaldunen jatorriaren eta historiaren inguruko hainbat kontakizunen asmatzaile izan zen, hala nola Aitorren kondairarena (iturria: Wikipedia). Jabi Lauzurikaren ahotik Xahoren gaineko jakingarri asko entzun ditugu.

Deskargatu hemen.

Argi astekariaren errepasoa egin dugu Maria Ortega kazetariarekin. Artikuluak hidrogenoaren inguruko itxaropen handien eta benetako aukeren arteko arrakala aztertzen ditu Xabier Letonak. Hidrogeno zuria lur azpian naturalki sortzen dena da. Munduan hura aurkitzeko lasterketa dago, eta Mantle 8 enpresak Aralar, Lokiz eta Urbasa inguruan miaketak egiteko baimena lortu du. Oraingoz, azaleko ikerketak dira, ez erauzketak; hala ere, etorkizuneko ustiapenak kezka sortu du herritarren artean.«Gosaria Buenos Airesen» artikuluan, Uxue Alberdik Camilo Ballena poeta witxiarekin izandako gosaria kontatzen du, hizkuntzaren, itzulpenaren eta mundua ulertzeko modu desberdinen inguruan hausnartzeko. Bukatzeko Vanessa Almeidari eginiko elkarrizketa ekarri du, kirolariak autista dela heldutan jakiteak bere bizitza ulertzen nola lagundu dion kontatzen du. Diagnostikoa 42 urterekin jasotzean, lehenago ez antzemateagatik amorrua sentitu zuen, baina baita lasaitasuna ere: ordura arteko zailtasunek azalpena hartu zuten.

Deskargatu hemen.

Zer hartu iraganetik, eta zer utzi etorkizunari? Galdera horiek ardatz hartuta osatu du Etxekaltek «Ez Hil Inoiz» disko berria. Hamar urteko ibilbidearen arrastoa dakarren lan honetan, kanpora begira jarri dira, ondareaz, herriarekiko loturaz eta gorabeheren artean bizirik eutsi nahi dioten horretaz kantatzeko. Soinu klasikoak sintetizadore eta doinu modernoekin uztartuta, gaur Kafe Antzokian aurkeztuko dute diskoa zuzenean, Sua taldearekin batera. Hitzorduaren atarian, lan berriaz eta egindako bideaz aritu gara Unai Irisarri taldekidearekin.

Deskargatu hemen.

Gaurko saioan intimitate pertsonaletik eta piano biluzitik abiatuta folk eta jazz eremuetara egingo dugu bidaia, beti ere ahots eta istorio indartsuen bueltan. Lehen geltokia Ibon Salaberria izango da, Siamesa bere lehen bakarkako lanarekin; musikan etenaldi luze baten ondoren itzuli da lezoarra, eta proiektu pertsonal honen bidez bere ibilbide artistikoan etapa berri bat ireki du, tonu intimo eta biluzi batekin. Ondoren, SYML eta Evgeny Grinko elkarlanean sinatutako Listless piezara joko dugu, pianoaren eta hari-zerrenda zinematikoen arteko elkargunean. Brian Fennellek eta Evgeny Grinkok sinatutako konposizio honek SYMLen minimalismo emozionala eta Grinkoren orkestrazio zabal eta zinematikoak nahasten ditu. Hortik oso gertu, baina etxeko tonu batez, Maite Larburu hernaniarraren Maizter izango da hurrengo gonbidatua. Bakarkako ibilbidean bosgarren diskoa da, berak eraikitako Musikburô estudioan etxe giroan grabatua; folk intimista eta esperimentala uztartzen ditu modu oso naturalean. Ondoren, Maddiren Amaitasuna diskoan murgilduko gara. Maddi Etxeberria Lizarrako kantariaren lehen lana da, amaiera eta maitasuna hitzak elkartuz sortu duen kontzeptuarekin; zazpi kantuko bilduma honetan gitarra akustikoa, ahots lerro erritmikoak darabiltza. Gero, itsasertzeko haizeak eta folkaren zabalera ekarriko dizkigu Annahstasiaren Tether diskoak. Kaliforniako kantugilearen lehen lana da, eta kritikek nabarmendu dute bere ahots berezi eta indartsua. Londresko Caroline kolektiboaren Caroline 2 entzungo dugu. Zortzi kideko taldearen bigarren diskoa da, lehen laneko post-rock eta folk esperimentalaren oinarriak mantendu arren soinu zabalago eta ausartago batera egiten du salto. Amaitzeko, Jeff Parker gitarra-jotzailearen The Way Out of Easy jarriko dugu, bere laukotearekin grabatutako jazz disko aparta.

Deskargatu hemen.

Hain ozen hitz egiten baduzue eztugu ezer ulertzen!  Ohartu altzarete denek aurpegi berdina jartzen dutela?  Norbaiten zain egongo dirA? Noren zain zaudete?
NORBAIT HIL DA HEMEN-EN ZAIN!
BA IRITSI GARA GU!
Egia da, oraintxe hastera doa
Ni ikustera noa
Ni ere bai
Baita ni ere
1, 2, 3…

Deskargatu hemen.