கல்விக்குயில்

தமிழகத்தில் எம்பிபிஎஸ், பிடிஎஸ் தரவரிசை பட்டியல் இன்று வெளியீடு.

2026-08-10T06:25:48.802+05:30

எம்பிபிஎஸ், பிடிஎஸ் படிப்புகளுக்கான தரவரிசை பட்டியலை சுகாதாரத்துறை அமைச்சர் அருண்ராஜ் இன்று வெளியிடுகிறார்.

தமிழகத்தில் அரசு மற்றும் தனியார் மருத்துவக் கல்லுாரிகளில் 13,999 எம்பிபிஎஸ், பிடிஎஸ் இடங்கள் உள்ளன. இந்தக் கல்லூரிகளில் உள்ள அரசு, நிர்வாக ஒதுக்கீட்டு எம்பிபிஎஸ், பிடிஎஸ் இடங்களுக்கான கலந்தாய்வை மருத்துவக் கல்வி மற்றும் ஆராய்ச்சி இயக்ககம் (டிஎம்இ) நடத்தி வருகிறது.

அதன்படி, எம்பிபிஎஸ், பிடிஎஸ் படிப்புகளுக்கான 2026-27-ம் கல்வியாண்டு மாணவர் சேர்க்கை கலந்தாய்வுக்கு ஆன்லைனில் விண்ணப்பங்கள் வரவேற்கப்பட்டன

நீட் தேர்வில் தமிழகத்தில் 61,306 பேர் தேர்ச்சி பெற்றுள்ள நிலையில், அரசு ஒதுக்கீட்டு இடங்களுக்கு 41,723 பேரும், நிர்வாக ஒதுக்கீட்டு இடங்களுக்கு 30,904 பேரும் என மொத்தம் 72,627 பேர் விண்ணப்பித்துள்ளனர்.

இந்நிலையில் இன்று பிற்பகல் 3 மணியளவில் மருத்துவக் கல்வி மற்றும் ஆராய்ச்சி இயக்ககம் (டிஎம்இ) அலுவலகத்தில் தகுதியான மாணவர்களின் தரவரிசைப் பட்டியலை சுகாதாரத்துறை அமைச்சர் அருண்ராஜ் வெளியிடுகிறார்.

நாடு முழுவதும் அரசு மருத்துவம் மற்றும் பல் மருத்துவக் கல்லூரிகளில் இருந்து 15 சதவீதம் எம்பிபிஎஸ், பிடிஎஸ் இடங்கள் அகில இந்தியஒதுக்கீட்டுக்கு ஒதுக்கப்படுகிறது. இந்த இடங்கள் மற்றும் எய்ம்ஸ், ஜிப்மர், நிகர்நிலைப் பல்கலைக்கழகங்கள், மத்தியப் பல்கலைக்கழகங்களில் உள்ள எம்பிபிஎஸ், பிடிஎஸ் இடங்களுக்கான மாணவர் சேர்க்கை கலந்தாய்வை மத்திய அரசின் சுகாதார சேவைகளுக்கான தலைமை இயக்குநரகத்தின் (டிஜிஎச்எஸ்) மருத்துவக் கலந்தாய்வு குழு (எம்சிசி) ஆன்லைனில் நடத்தி வருகிறது.அதன்படி, நடப்பாண்டுக்கான எம்பிபிஎஸ், பிடிஎஸ் படிப்புகளுக்கான அகில இந்திய கலந்தாய்வு முதல் சுற்று ஆன்லைனில் கடந்த 4-ம் தேதி தொடங்கி நடைபெற்று வருகிறது. தமிழகத்தில் அரசு மருத்துவம் மற்றும் பல் மருத்துவக் கல்லூரிகளில் மீதமுள்ள 85 சதவீத எம்பிபிஎஸ், பிடிஎஸ் இடங்கள், தனியார் கல்லூரிகளில் அரசு ஒதுக்கீடு மற்றும் நிர்வாக ஒதுக்கீட்டுக்கான இடங்களுக்கு கலந்தாய்வை மருத்துவக் கல்வி மற்றும் ஆராய்ச்சி இயக்ககம் (டிஎம்இ) நடத்துகிறது. நடப்பாண்டு முதல் சுற்று கலந்தாய்வு 13-ம் தேதி ஆன்லைனில் தொடங்கவுள்ளது.

மாற்றுத்திறனாளி மாணவர்கள்: எம்பிபிஎஸ், பிடிஎஸ் படிப்புகளில் மாநில இடஒதுக்கீட்டுக் கொள்கையின்படி மாற்றுத்திறனாளிகள், விளையாட்டு வீரர்கள், ஓய்வுபெற்ற ராணுவத்தினரின் வாரிசுகள், அரசுப் பள்ளி மாணவர்களுக்குச் சிறப்பு ஒதுக்கீடு வழங்கப்படுகிறது.

மாற்றுத்திறனாளிகள் பிரிவின் கீழ் விண்ணப்பித்தவர்கள், ராஜீவ் காந்தி அரசு பொது மருத்துவமனை, தஞ்சாவூர் அரசு மருத்துவக் கல்லூரி மருத்துவமனை, மதுரை அரசு மருத்துவக் கல்லூரி மருத்துவமனை மற்றும் கோயம்புத்தூர் அரசு மருத்துவக் கல்லூரி மருத்துவமனை ஆகிய இடங்களில் இயங்கும் மருத்துவ மதிப்பீட்டு வாரியங்களால் வழங்கப்படும் மாற்றுத்திறனாளிகள் தகுதி சான்றை ஆன்லைனில் பதிவேற்றம் செய்வதற்கான அவகாசம் ஆகஸ்ட் 11-ம் தேதி மாலை 5 மணி வரை நீட்டிக்கப்பட்டுள்ளது.

கால்நடை மருத்துவப் படிப்புக்கு பிளஸ் 2 மதிப்பெண் அடிப்படையில் சேர்க்கை: பிரதமருக்கு முதல்வர் கடிதம்.

2026-08-09T20:47:06.919+05:30

கால்நடை மருத்துவப் படிப்புக்கு பிளஸ்2 மதிப்பெண் அடிப்படையில் மாணவர் சேர்க்கை தொடர்ந்து நடைபெறுவதற்கு நடவடிக்கை எடுக்க வேண்டும் என்று பிரதமர் நரேந்திர மோடிக்கு தமிழக முதல்வர் விஜய் கடிதம் எழுதியுள்ளார்.

இதுதொடர்பாக நேற்று அவர் எழுதிய கடிதத்தில் கூறியிருப்பதாவது: இந்திய கால்நடை மருத்துவ கவுன்சில் சட்டம், 1984-ன் விதிமுறைகளின்படி, அனைத்து கால்நடை மருத்துவ கல்லூரிகளிலும் கால்நடை மருத்துவ அறிவியல் மற்றும் கால்நடை பராமரிப்பு பட்டப்படிப்பிபுக்கான மாணவர் சேர்க்கையானது, பொது நுழைவுத் தேர்வின் அடிப்படையில் மையப்படுத்தப்பட்ட கலந்தாய்வு முறை மூலம் இடங்களை ஒதுக்கீடு செய்ய வேண்டும் என இந்திய கால்நடை மருத்துவ கவுன்சில் பரிந்துரைத்துள்ளது.

அதற்கு மாற்று ஏற்பாடாக, 2026-27-ம் கல்வியாண்டு முதல் தனியாக நுழைவுத்தேர்வு நடத்த முடியாத பட்சத்தில், நீட் தேர்வின் தரவரிசை பட்டியலின் அடிப்படையில் மாணவர் சேர்க்கை நடைபெற வேண்டும் என இந்திய கால்நடை மருத்துவ கவுன்சில், மாநிலங்களுக்கு அறிவுறுத்தியுள்ளது. இந்த முன்மொழிவு, தமிழகத்துக்கு பல்வேறு கடுமையான பாதிப்புகளை ஏற்படுத்தும்.

கால்நடை மருத்துவக் கல்வி என்பது வெறும் தொழில்சார் படிப்பு மட்டுமல்ல, மாநிலத்தின் கால்நடை பராமரிப்பை வலுப்படுத்துவதற்கும், லட்சக்கணக்கான கிராமப்புற குடும்பங்களின் வாழ்வாதாரத்தை பாதுகாப்பதற்குமான நமது முயற்சிகளின் அடித்தளமாகும். இன்று கால்நடை மருத்துவ கல்வியில் சேர்க்கை பெறும் மாணவர்களே, வரும் ஆண்டுகளில் நமது விவசாயிகளுக்கும், கிராமங்கள் மற்றும் கால்நடைப் பராமரிப்புத்துறைக்கும் சேவை செய்யும் கால்நடை மருத்துவர்களாகவும் உருவெடுக்கிறார்கள்.

தமிழகம், பிளஸ்2 தேர்வில் மாணவர்கள் பெறும் மதிப்பெண்களின் அடிப்படையிலேயே தொழிற்கல்விபடிப்புகளுக்கான சேர்க்கை முறையை பல தசாப்தங்களாக பின்பற்றி வருகிறது. கால்நடை மருத்துவ படிப்புகளுக்கான சேர்க்கைக்கு நீட் தேர்வை அறிமுகப்படுத்துவது பொருத்தமானதாக இருக்காது. இத்தகைய நடைமுறை கால்நடை மருத்துவ கல்வி சேர்க்கைக்கு பாதிப்புகளை ஏற்படுத்தும்.

அதனால், இந்த விவகாரத்தில் தாங்கள் (பிரதமர்) தனிப்பட்ட முறையில் தலையிட வேண்டும். இந்திய கால்நடை மருத்துவ கவுன்சில் தனது முடிவை மறுபரிசீலனை செய்ய அறிவுறுத்துமாறும், பிளஸ்2 மதிப்பெண்களின் அடிப்படையில் கால்நடை மருத்துவ அறிவியல் மற்றும் கால்நடை பராமரிப்பு பட்டப்படிப்புக்கான சேர்க்கையை தொடரவோ அல்லது மாணவர் சேர்க்கை அளவுகோல்களை அந்தந்த மாநில அரசுகளே தீர்மானிக்கவோ அனுமதிக்க வேண்டும்.

இக்கோரிக்கையைக் கனிவுடன் பரிசீலித்து, கால்நடை மருத்துவக் கல்வியை அனைவரும் சமமாக பெறுவதை உறுதி செய்ய வேண்டும். கிராமப்புற மற்றும் சமூகரீதியாக பின்தங்கிய பின்னணியை கொண்ட மாணவர்களுக்கான வாய்ப்புகளை பாதுகாக்க வேண்டும். நமது கூட்டாட்சி அமைப்பிற்குள் மாநிலங்களின் தங்களுக்கான சட்டபூர்வ கொள்கை முடிவுகளை எடுக்கும் நிலையை உறுதிசெய்ய வேண்டும். இவ்வாறு அவர் தெரிவித்து உள்ளார்.

சுதந்திர தின விழாவை சிறப்பாக கொண்டாட வேண்டும்: பள்ளிகளுக்கு கல்வித் துறை அறிவுறுத்தல்.

2026-08-09T20:41:05.215+05:30

தமிழகத்தில் அனைத்துப் பள்ளிகளிலும் சுதந்திர தினவிழாவை சிறப்பாக கொண்டாட வேண்டும் என்று பள்ளிக்கல்வித் துறை அறிவுறுத்தியுள்ளது.

இதுகுறித்து பள்ளிக்கல்வித் துறை இயக்குநரகம் சார்பில் அனைத்து மாவட்ட முதன்மைக் கல்வி அலுவலர்களுக்கும் அனுப்பப்பட்டுள்ள சுற்றறிக்கை விவரம்: சுதந்திர தினவிழாவை அனைத்து விதமான பள்ளிகளிலும் வரும் 15-ம் தேதி சிறந்த முறையில் கொண்டாட வேண்டும். பள்ளி வளாகத்தை வண்ண காகிதங்கள், மலர்களால் அலங்காரம் செய்து தேசியக்கொடி ஏற்றி விழாவை விமர்சையாக நடத்த வேண்டும்.

இதுதவிர பெற்றோர் ஆசிரியர் கழக உறுப்பினர்கள், புரவலர்கள், சுதந்திரப் போராட்ட தியாகிகள் ஆகியோரை அழைத்து விழாவில் பங்குபெறச் செய்ய வேண்டும். இதற்கு பிளாஸ்டிக் தேசியக் கொடிகளை பயன்படுத்தக்கூடாது. அதேபோல், தேசியக் கொடியை தலைக்கீழாக அல்லது கிழிந்த கொடிகளை ஏற்றக்கூடாது. இதுசார்ந்து பள்ளிகளின் தலைமை ஆசிரியர்களுக்கு அந்தந்த மாவட்ட முதன்மைக் கல்வி அதிகாரிகள் உரிய அறிவுறுத்தல்களை வழங்கி சுதந்திர தினத்தை சிறப்பாக கொண்டாட நடவடிக்கை எடுக்க வேண்டும்.

தமிழக பட்ஜெட் 2026 - 27 கல்வி துறை முக்கிய அறிவிப்புகள்.

2026-08-05T21:08:30.024+05:30

2026 - 27ம் ஆண்டிற்கான பொது பட்ஜெட்டை, தாக்கல் செய்ய இன்று (ஆகஸ்ட் 5) காலை 10 மணிக்கு தமிழக பட்ஜெட் கூட்டத்தொடர் கூடியது. நடப்பு நிதியாண்டுக்கான பட்ஜெட்டை நிதியமைச்சர் மரிய வில்சன் தாக்கல் செய்தார்.

கல்வி துறை சார்ந்து அறிவிக்கப்பட்டுள்ள முக்கிய அம்சங்கள்:

வெற்றி மடிக்கணினித் திட்டத்திற்கு ரூ. 2 ஆயிரம் கோடி ஒதுக்கீடு

பள்ளிக் கல்வித் துறைக்கு ரூ.44,527 கோடி ஒதுக்கீடு

உயர்கல்வித் துறைக்கு ரூ.8,393 கோடி ஒதுக்கீடு

ரூ.90 கோடியில் 5 புதிய தொழிற்பயிற்சி நிலையங்கள் நிறுவப்படும்

5 லட்சம் இளைஞர்களுக்கு ஏஐ பயிற்சி

மாநிலம் முழுவதும் 10 ஒலிம்பிக் சிறப்பு மையங்கள் அமைக்க ரூ.50 கோடி ஒதுக்கீடு

சிறப்பு செயலாக்கத் துறைக்கு 17,150 கோடி ரூபாய் ஒதுக்கீடு

தொழிலாளர் நலன் மற்றும் மேம்பாட்டுத்துறைக்கு ரூ.2,022 கோடி ஒதுக்கீடு

இளைஞர் நலன் மற்றும் விளையாட்டு மேம்பாட்டு துறைக்கு ரூ.1,051 கோடி ஒதுக்கீடு

வெற்றி தொழில் முனைவோர் திட்டத்துக்கு ரூ.75 கோடி நிதி ஒதுக்கீடு

அயல்நாட்டு கல்வி உதவித் தொகை திட்டத்துக்கு ரூ.131 கோடி ஒதுக்கீடு

தமிழக பட்ஜெட் 2026! அரசு ஊழியர்களுக்கு புதிய திட்டம் அறிவிப்பு!

2026-08-05T21:06:40.365+05:30

2026 - 27ஆம் நிதியாண்டுக்கான தமிழக பட்ஜெட்டில், அரசு ஊழியர்களுக்கு புதிய மருத்துவக் காப்பீடு திட்டம் செயல்படுத்தப்படும் என்று அறிவிப்பு வெளியாகியிருக்கிறது.

2026 - 27ஆம் நிதியாண்டுக்கான தமிழக பட்ஜெட், பேரவையில் இன்று தாக்கல் செய்யப்பட்டது. தமிழக நிதியமைச்சர் தாக்கல் செய்த பட்ஜெட்டில் ஏற்கனவே செயல்படுத்தப்பட்டு வந்த திட்டங்களுக்கும், புதிய திட்டங்களுக்கும் வெற்றி என்ற வார்த்தை சேர்க்கப்பட்டுள்ளது.

பெண்கள், மாணவர்கள், இளைஞர்கள் மற்றும் பல்வேறு துறைகளுக்கும் முக்கிய அறிவிப்புகள் பட்ஜெட்டில் இடம்பெற்றுள்ளன.

தமிழக பட்ஜெட்டில் அரசு ஊழியர்களுக்கான அறிவிப்பில்,

அரசு ஊழியர்களுக்கு புதிய மருத்துவக் காப்பீடு திட்டம் கொண்டு வரப்பட்டுள்ளது.
அடிப்படை காப்பீடு திட்டம் ரூ.5 லட்சத்தில் இருந்து ரூ.7.5 லட்சமாக உயர்வு.
குறிப்பிட்ட நோய்களுக்கான காப்பீடு ரூ.12 இலட்சம் வரை வழங்கப்படும்.
அரிய நோய்களுக்கு ரூ.15 லட்சம் வரை நிதியுதவி வழங்கப்படும்.
தமிழக அரசு ஊழியர்களுக்கு 2,992 வகையான சிகிச்சைகள் மற்றும் 1,535 அங்கீகரிக்கப்பட்ட மருத்துவமனைகளுக்கு ரூ.838 கோடி ஒதுக்கீடு செய்யப்படுவதாக அறிவிக்கப்பட்டுள்ளது.

அரசு கல்வியியல் கல்லூரிகளில் பிஎட் ஆன்லைன் கலந்தாய்வு ஆக.4-ல் தொடக்கம்.

2026-08-03T21:29:02.699+05:30

அரசு மற்றும் அரசு உதவி பெறும் கல்வியியல் கல்லூரிகளில் பிஎட் படிப்பில் சேருவதற்கான ஆன்லைன் கலந்தாய்வு ஆகஸ்ட் 4-ம் தேதி (நாளை) தொடங்குகிறது.

தமிழகத்தில் 7 அரசு கல்வியியல் கல்லூரிகளும், 14 அரசு உதவி பெறும் கல்லூரிகளும் இயங்கி வருகின்றன. இக்கல்லூரிகளில் பிஎட் படிப்பில் 2,040 இடங்கள் ஒற்றைச்சாளர முறையில் பொது கலந்தாய்வு மூலம் நிரப்பப்படுகின்றன உள்ளன.

இந்நிலையில், 2026-2027-ம் கல்வி ஆண்டு மாணவர் சேர்க்கைக்கான ஆன்லைன் விண்ணப்ப பதிவு ஜூன் 19-ம் தேதி தொடங்கி ஜூலை 31-ம் தேதி முடிவடைந்தது. மொத்தம் 5,900 மாணவ-மாணவிகள் விண்ணப்பித்தனர்.

எனினும் அவர்களில் 3,036 பேர் மட்டுமே விண்ணப்பத்திற்கான கட்டணத்தை செலுத்தி விண்ணப்பத்தை முழுமை செய்திருந்தனர். அவர்களின் தரவரிசை பட்டியல் ஜூலை 31-ம் தேதி வெளியிடப்பட்டது.

தரவரிசையில் இடம்பெற்றுள்ள மாணவர்கள் விருப்பமான கல்லூரியை தேர்வுசெய்வதற்கான ஆன்லைன் கலந்தாய்வு ஆகஸ்ட் 4 முதல் 10-ம் தேதி வரை நடைபெறும் என கல்லூரி கல்வி ஆணையரகம் அறிவித்திருந்தது.

அதன்படி ஆன்லைன் கலந்தாய்வு 4-ம் தேதி (செவ்வாய்) தொடங்குகிறது. இக்கலந்தாய்வு 10-ம் தேதி முடிவடைந்ததும் மாணவர்களுக்கு கல்லூரி ஒதுக்கீட்டு ஆணை 14-ம் தேதி அன்று ஆன்லைனில் வழங்கப்படும். மாணவர்கள் தங்கள் ஆன்லைன் விண்ணப்ப ஐடி-யை பயன்படுத்தி www.twise.ac.in என்ற இணையதளத்தில் கல்லூரி ஒதுக்கீட்டு ஆணையை பதிவிறக்கம் செய்துகொள்ளலாம்.

அவர்கள் தங்களுக்கு ஒதுக்கப்பட்ட கல்வியியல் கல்லூரிகளில் ஆகஸ்ட் 17 முதல் 21-ம் தேதிக்குள் சேர்நதுவிட வேண்டும். ஏற்கனவே அறிவிக்கப்பட்டவாறு அரசு மற்றும் அரசு உதவிபெறும் கல்வியியல் கல்லூரிகளில் முதலாம் ஆண்டு மாணவர்களுக்கான வகுப்பு ஆகஸ்ட் 24-ம் தேதி தொடங்கும் என்று கல்லூரி கல்வி ஆணையரக அதிகாரிகள் தெரிவித்தனர்.

எம்பிபிஎஸ், பிடிஎஸ் அகில இந்திய கலந்தாய்வு ஆன்லைனில் நாளை தொடக்கம்

2026-08-03T07:24:54.804+05:30

எம்பிபிஎஸ், பிடிஎஸ் படிப்புகளுக்கான அகில இந்திய கலந்தாய்வு நாளை ஆன்லைனில் தொடங்குகிறது.

மாநில கலந்தாய்வு வரும் 13-ம் தேதி தொடங்கவுள்ளது. நாடு முழுவதும் அரசு மருத்துவம் மற்றும் பல் மருத்துவக் கல்லூரிகளில் இருந்து 15 சதவீதம் எம்பிபிஎஸ், பிடிஎஸ் இடங்கள் அகில இந்திய ஒதுக் கீட்டுக்கு ஒதுக்கப்படுகின்றன.

இந்த இடங்கள் மற்றும் எய்ம்ஸ், ஜிப்மர், நிகர்நிலைப் பல்கலைக்கழகங்கள், மத்திய பல்கலைக்கழகங்களில் உள்ள எம்பிபிஎஸ், பிடிஎஸ் இடங்களுக்கான மாணவர் சேர்க்கை கலந்தாய்வை மத்திய அரசின் சுகாதார சேவைகளுக்கான தலைமை இயக்குநரகத்தின் (டிஜிஎச்எஸ்) மருத்துவக் கலந்தாய்வு குழு (எம்சிசி) ஆன்லைனில் நடத்தி வருகிறது.

இந்நிலையில், எம்பிபிஎஸ், பிடிஎஸ் படிப்புகளுக்கு 2025 - 26-ம் கல்வி ஆண்டு மாணவர் சேர்க்கைக்கான அகில இந்திய கலந்தாய்வு முதல் சுற்று https://mcc.nic.in/ என்ற இணையதளம் மூலம் வரும் 4-ம் தேதி (நாளை) தொடங்கி 17-ம் தேதி வரை நடைபெறவுள்ளது.

இட ஒதுக்கீடு பெற்ற மாணவர்கள் 22-ம் தேதிக்குள் கல்லூரிகளில் சேர வேண்டும். மாணவர்களின் சான்றிதழ் சரிப்பார்ப்பு பணிகளை 23-ம் தேதிக்குள் கல்லூரி நிர்வாகம் முடிக்க வேண்டும்.

இதையடுத்து, இரண்டாம் சுற்று கலந்தாய்வு ஆக. 24-ம் தேதியும், மூன்றாம் சுற்று கலந்தாய்வு செப். 10-ம் தேதியும், இறுதி சுற்று கலந்தாய்வு செப். 27-ம் தேதியும் தொடங்கி நடைபெறுகிறது.

அதேபோல், தமிழகத்தில் அரசு மருத்துவம் மற்றும் பல் மருத்துவக் கல்லூரிகளில் மீதமுள்ள 85% எம்பிபிஎஸ், பிடிஎஸ் இடங்கள், தனியார் கல்லூரிகளில் அரசு ஒதுக்கீடு மற்றும் நிர்வாக ஒதுக்கீட்டுக்கான இடங்களுக்கு கலந்தாய்வை மருத்துவக் கல்வி மற்றும் ஆராய்ச்சி இயக்ககம் (டிஎம்இ) நடத்துகிறது.

நடப்பாண்டு முதல் சுற்று கலந்தாய்வு https: //tnmedicalselection.net/ என்ற இணையதளத்தில் வரும் 13-ம் தேதி தொடங்கி 22-ம் தேதி வரை நடைபெறவுள்ளது. 2-ம் சுற்று கலந்தாய்வு வரும் 31-ம் தேதியும், 3-ம் சுற்று கலந்தாய்வு செப்டம்பர் 16-ம் தேதியும், இறுதி சுற்று கலந்தாய்வு அக்டோபர் 3-ம் தேதியும் தொடங்கி நடைபெறவுள்ளது.

அரசு பள்ளிகளில் மாணவர் சேர்க்கை அதிகரிப்பு.

2026-08-02T08:55:14.922+05:30

அரசு தொடக்கப் பள்ளிகளில், கடந்த ஆண்டை காட்டிலும், நடப்பாண்டு மாணவர் சேர்க்கை சற்று அதிகரித்துள்ளது.

தமிழக பள்ளி கல்வித் துறையின் கீழ், 37,553 அரசு பள்ளிகள் இயங்கி வருகின்றன. அதில், 31,336 தொடக்கப் பள்ளிகள் உள்ளன.

இதற்கான மாணவர் சேர்க்கை, கடந்த மார்ச் 1ம் தேதி தொடங்கியது. நடப்பு கல்வியாண்டில், 5 லட்சம் மாணவர்களை சேர்க்க இலக்கு நிர்ணயிக்கப்பட்டது.

இந்நிலையில், அரசு தொடக்கப் பள்ளிகளில், கடந்த 28ம் தேதி நிலவரப்படி, 4 லட்சத்து, 23,955 மாணவ மாணவியர் புதிதாக சேர்ந்துள்ளனர். ஒன்றாம் வகுப்பில், 2 லட்சத்து 94,209; மழலையர் வகுப்பில் 41,231 பேர்; இரண்டாம் வகுப்பு முதல் எட்டாம் வகுப்பு வரை, 88,515 பேர் சேர்ந்துள்ளனர்.

கடந்த கல்வி ஆண்டில், 4.13 லட்சம் பேர் மட்டுமே சேர்ந்திருந்த நிலையில், இந்த கல்வியாண்டில் சேர்க்கை அதிகரித்துள்ளது.

ஆசிரியர் தேர்வு வாரியம் மூலம் விரைவில் 2 ஆயிரம் பட்டதாரி ஆசிரியர்கள் நியமனம்.

2026-08-02T08:52:39.095+05:30

ஆசிரியர் தேர்வு வாரியம் மூலம் விரைவில் 2 ஆயிரம் பட்டதாரி ஆசிரியர்கள் மற்றும் ஆசிரியர் பயிற்றுநர்களை நியமிக்க பள்ளிக்கல்வித்துறை முடிவு செய்துள்ளது. இதுதொடர்பான அறிவிப்பு ஆகஸ்ட் மாதம் வெளியாகிறது.

அரசு பள்ளிகளில் இடைநிலை ஆசிரியர்கள், தையல், ஓவியம், உடற்கல்விஉள்ளிட்ட சிறப்பு ஆசிரியர்கள், பட்டதாரி, முதுகலை பட்டதாரி ஆசிரியர்கள் டிஆர்பி எனப்படும் ஆசிரியர் தேர்வு வாரியம் மூலமாக நியமிக்கப்படுகிறார்கள்.

அதுமட்டுமின்றி வட்டார கல்வி அலுவலர், அரசு ஆசிரியர் பயிற்சி நிறுவன விரிவுரையாளர், அரசு கல்லூரி உதவி பேராசிரியர், அரசு பாலிடெக்னிக் விரிவுரையாளர் பணியிடங்களும் ஆசிரியர் தேர்வு வாரியம் வாயிலாகவே நிரப்பப்படுகி்ன்றன.

தற்போது அரசு பள்ளிகளில் 18 ஆயிரத்துக்கும் மேற்பட்ட ஆசிரியர் பணியிடங்கள் காலியாக உள்ளன. எனினும் மாணவர்களின் கல்வி பாதிக்கப்படக் கூடாது என்பதற்காக அந்த பணியிடங்களில் தொகுப்பூதியத்தில் தற்காலிக ஆசிரியர்கள் பணியமர்த்தப்பட்டு கற்பித்தல் பணிகள் தொய்வின்றிநடந்து வருகின்றன.

அரசு பள்ளிகளில் நிரந்தர ஆசிரியர்களை நியமிக்க வேண்டும் என்று கோரிக்கை அரசியல் கட்சி தலைவர்களால் தொடர்ந்து வலியுறுத்தப்பட்டு வருகிறது.

இந்நிலையில், அரசு பள்ளிகளில் டிஆர்பி மூலம் 2 ஆயிரம் பட்டதாரி ஆசிரியர்கள் மற்றும் ஆசிரியர் பயிற்றுநர்களை விரைவில் நியமிக்க பள்ளிக்கல்வித்துறை முடிவு செய்துள்ளது. இதற்கான அறிவிப்பு ஆகஸ்ட் மா்தம் வெளியாகிறது.

பட்டதாரி ஆசிரியர் தேர்வுக்கான அறிவிப்பை ஆகஸ்ட் மத்தியில் வெளியிட்டு போட்டித்தேர்வினை நவம்பர் மாதம் நடத்த டிஆர்பி திட்டமிட்டுள்ளது. பட்டதாரி ஆசிரியர் தேர்வை டெட் தாள்-2-ல் தேர்வில் தேர்ச்சி பெற்ற ஆசிரியர்கள் எழுதலாம்.

பட்டதாரி ஆசிரியர் மற்றும் ஆசிரியர் பயிற்றுநர் தேர்வை பொறுத்தவரையில் சம்பந்தப்பட்ட பாடப்பிரிவில் 150 கேள்விகளுக்கும் கட்டாய தமிழ் மொழி தகுதித்தேர்வில் 30 கேள்விகளுக்கும் விடையளிக்க வேண்டும். தமிழ் தாள் தேர்வில் குறைந்தபட்சம் 40 சதவீத மதிப்பெண் எடுக்க வேண்டும்.

தமிழ் தேர்வு மதிப்பெண் மெரிட் பட்டியலுக்கு எடுத்துக்கொள்ளப்படாது என்றாலும் இதில் தேர்ச்சி பெற்றால் மட்டுமே விண்ணப்பதாரரின் பாடத்தேர்வு விடைத்தாள் மதிப்பீடு செய்யப்படும் என்பது குறிப்பிடத்தக்கது. கடைசியாக பட்டதாரி ஆசிரியர் தேர்வானது கடந்த 2024-ம் ஆண்டு ஜனவரி மாதம் தேர்வு நடத்தப்பட்டு அதன்மூலம் 2,582 ஆசிரியர்கள் தேர்வு செய்யப்பட்டனர்.

அரசு பள்ளி மாணவர்களுக்கு குட் நியூஸ்: மதிய உணவில் விரைவில் சிக்கன் பிரியாணி..! அமைச்சர் சொன்ன தகவல்...

2026-07-29T21:30:17.953+05:30

தமிழ்நாட்டில் 37,595 அரசுப் பள்ளிகள் உள்ளன. இதில், 52 லட்சத்து 75 ஆயிரத்து 203 மாணவ-மாணவிகள் படித்து வருகிறார்கள். 2 லட்சத்து 25 ஆயிரத்து 400 ஆசிரியர்கள் பணிபுரிந்து வருகின்றனர்.

இதுதவிர, 7,289 அரசு உதவிபெறும் பள்ளிகளும், 1,046 பகுதி நிதியுதவி பெறும் பள்ளிகளும், 65 மத்திய அரசு பள்ளிகளும் உள்ளன. தமிழக அரசு பள்ளிகளில் மதிய உணவு திட்டத்தின் மூலம் சுமார் 46 லட்சத்து 7 ஆயிரம் மாணவர்கள் பயன்பெற்று வருகிறார்கள். இதில், காலை உணவு திட்டத்தின் மூலம் பயன்பெறும் 19 லட்சத்து 34 ஆயிரம் தொடக்கப் பள்ளி மாணவர்களும் அடங்குவார்கள்.

விரைவில் சிக்கன் பிரியாணி

தற்போது, அரசுப் பள்ளி மாணவர்களுக்கு மதிய உணவாக வெஜிடபிள் பிரியாணி, தக்காளி சாதம், எலுமிச்சை சாதம், புளியோதரை போன்ற கலவை சாதங்கள் வழங்கப்படுகின்றன. அத்துடன் அனைத்து நாட்களும் முட்டை வழங்கப்படுகிறது. முட்டை சாப்பிடாத குழந்தைகளுக்கு வாழைப்பழம் கொடுக்கப்படுகிறது.

இந்த நிலையில், தமிழகத்தில் புதிதாக ஆட்சி பொறுப்பேற்றுள்ள த.வெ.க. அரசு மதிய உணவில் அதிரடி மாற்றம் கொண்டுவர நடவடிக்கை மேற்கொண்டுள்ளது.

அதன்படி, விரைவில் மதிய உணவுடன் வாரம் ஒரு முறை சிக்கன் பிரியாணி வழங்க அரசு பரிசீலனை செய்து வருகிறது.

பட்ஜெட்டில் வரும் அறிவிப்பு

இதுகுறித்த தகவலை, சென்னையில் இன்று நடைபெற்ற ஆசிரியர்கள் மற்றும் ஆசிரியர்கள் அல்லாத பணியாளர் சங்கங்களின் பிரதிநிதிகளுடனான ஆலோசனை கூட்டத்தில் பங்கேற்ற பள்ளி கல்வித்துறை அமைச்சர் ராஜ்மோகன் கூறினார்.

மதிய உணவில் சிக்கன் பிரியாணி வழங்குவது குறித்து கருத்துகள் பெறப்பட்டு முதல்-அமைச்சர் ஜோசப் விஜய்யிடம் தெரிவிக்கப்பட்டுள்ளதாகவும், அவர் முடிவை அறிவிப்பார் என்றும் அவர் கூறினார்.

வாரம் ஒருமுறை

இதனால், சட்டசபையில் ஆகஸ்டு 5-ந் தேதி தாக்கல் செய்யப்படும் தமிழக பட்ஜெட்டில், அரசு பள்ளி மாணவர்களுக்கு மதிய உணவில் வாரம் ஒருமுறை சிக்கன் பிரியாணி வழங்கும் அறிவிப்பும் இடம்பெறும் என்று தெரிகிறது.

மேல்நிலை பொதுத்தேர்வு: அசல் மதிப்பெண் சான்றிதழ்கள் நாளை முதல் விநியோகம்...

2026-07-29T21:27:58.148+05:30

அரசு தேர்வுகள் இயக்ககம் வெளியிட்டுள்ள செய்திக்குறிப்பில் கூறி இருப்பதாவது:-

மார்ச் 2026 மேல்நிலை பொதுத் தேர்வெழுதிய தேர்வர்களுக்கு (மறுகூட்டல் மற்றும் மறுமதிப்பீடு முடிவு உட்பட) மேல்நிலை முதலாமாண்டு மற்றும் இரண்டாமாண்டு அசல் மதிப்பெண் சான்றிதழ்கள், மதிப்பெண் பட்டியல் நாளை முதல் வழங்கப்படும். பள்ளி மாணவர்கள் தாங்கள் பயின்ற பள்ளிகளிலும், தனித்தேர்வர்கள் தாங்கள் தேர்வெழுதிய தேர்வு மையங்களிலும் அசல் மதிப்பெண் சான்றிதழ்களை, மதிப்பெண் பட்டியலினை பெற்றுக்கொள்ளலாம்.

தேர்வு மையம்

மேலும், விவரங்களை www.dge.tn.gov. in என்ற இணையதளத்தில் அறிந்து கொள்ளலாம். தனித்தேர்வர்கள் தேர்வுக்கு விண்ணப்பிக்கும் போது சமர்ப்பித்த பத்தாம் வகுப்பு அசல் மதிப்பெண் சான்றிதழ்களை இதுவரை அவர்கள் பெற்றுக்கொள்ளாமல் இருப்பின் அவரவர் தேர்வெழுதிய தேர்வு மையத்திலேயே பெற்று கொள்ளலாம். இவ்வாறு அதில் கூறப்பட்டுள்ளது.

குறை தீர்ப்பு முகாம்களில் ஆசிரியர்கள் அளிக்கும் மனுக்கள் மீது 5 நாட்களுக்குள் தீர்வு காண உத்தரவு.

2026-07-29T21:20:12.743+05:30

குறைதீர்ப்பு முகாம்களில் ஆசிரியர்கள் அளிக்கும் மனுக்கள் மீது 5 நாட்களுக்குள் உரிய தீர்வு காண வேண்டும் என்று தொடக்கக் கல்வித்துறை உத்தரவிட்டுள்ளது.

தொடக்கக் கல்வி இயக்ககம் சார்பில் வட்டாரக் கல்வி அலுவலகங்கள் மற்றும் மாவட்டக் கல்வி அலுவலகங்களில் மாதந்தோறும் சனிக்கிழமைகளில் ஆசிரியர்களுக்கான சிறப்பு குறைதீர்ப்பு முகாம்கள் நடத்தப்பட்டு வருகின்றன. தொடக்க, நடுநிலைப் பள்ளிகளில் பணியாற்றும் ஆசிரியர்கள், ஆசிரியர் அல்லாத பணியாளர்களின் சேவைகள் தொடர்பான குறைகளை உடனுக்குடன் நிவர்த்தி செய்வதை கருத்தில்கொண்டு இந்த முகாம்கள் நடத்தப்படுகின்றன.

இதில் ஊராட்சி ஒன்றிய, நகராட்சி மற்றும் அரசுப் பள்ளிகளில் பணிபுரியும் ஆசிரியர்கள் பணிப்பதிவேடு, சிறப்பு நிலை தகுதி, ஊதியப் பலன்கள் மற்றும் மாறுதல் கோரிக்கை தொடர்பான கோரிக்கைகளை ஆசிரியர்களும், பணியாளர்களும் மனுவாக அளிப்பது வழக்கம்.

இந்நிலையில், சில மாவட்டங்களில் குறைதீர்ப்பு முகாம்கள் பெயரளவுக்கு நடத்தப்படுவதாக ஆசிரியர்கள் புகார் தெரிவித்தனர். இதுகுறித்து அவர்கள் கூறும்போது, “ஆசிரியர்களை ஒருங்கிணைத்து நடத்தாமல் ஒரு பெட்டியை வைத்து அதில் மனுக்களை செலுத்துமாறு அறிவுறுத்துகின்றனர். அவ்வாறு செலுத்தினாலும் குறைகளுக்கான தீர்வு உடனடியாக கிடைப்பதில்லை”என தெரிவித்தனர்.

இது தொடர்பாக தொடக்கக்கல்வி இயக்கக அதிகாரிகள் கூறும்போது, “ஆசிரியர்களுக்கான சிறப்பு குறைதீர் முகாம்கள் மாவட்டக் கல்வி அலுவலர், வட்டாரக் கல்வி அலுவலர் ஆகியோர் தலைமையில் அந்தந்த அலுவலகங்களில் நடத்தப்பட வேண்டும் என சம்பந்தப்பட்ட அலுவலர்களுக்கு அறிவுறுத்தப்பட்டுள்ளது.

அத்துடன், குறைதீர்ப்பு முகாம்களில் பெறப்படும் மனுக்கள் மீது ஐந்து வேலைநாட்களுக்குள் உரிய தீர்வு காணவும் உத்தரவிடப்பட்டுள்ளது. மேலும், இதற்காக ஒவ்வொரு அலுவலகத்திலும் தனியாக ஒரு பதிவேடு பராமரிக்க வேண்டும். இதன் மூலம் ஆசிரியர்களின் குறைகளுக்கு விரைந்து தீர்வு காணப்படும்” என்று தெரிவித்தனர்.

ஐஐடி-மெட்ராஸ் வழங்கும் இலவச கணிதப் பயிற்சி! மிஸ் பண்ணிடாதீங்க.

2026-07-22T20:24:39.771+05:30

நாடு முழுவதும் உள்ள மாணவர்களிடையே பகுப்பாய்வுச் சிந்தனை, படைப்பாற்றல் மற்றும் சிக்கல்களைத் தீர்க்கும் திறன்களை மேம்படுத்தும் நோக்கில் வடிவமைக்கப்பட்ட 'அவுட் ஆஃப் தி பாக்ஸ் திங்கிங்' (OOBT) எனும் இலவசக் கணிதப் பயிற்சித் திட்டத்துக்கான விண்ணப்பங்களை ஐஐடி மெட்ராஸ் வரவேற்கிறது.

ஐஐடி மெட்ராஸ் சார்பில் பிரவர்தக் டெக்னாலஜிஸ் ஃபவுண்டேஷன் (IITM Pravartak Technologies Foundation) பள்ளி மாணவர்கள், கல்லூரி மாணவர்கள், கல்வியாளர்களிடையே திறனை வளர்க்க பல்வேறு பாடத்திட்டங்களைக் கொண்டு வந்துள்ளது.

இந்த பயிற்சி ஆகஸ்ட் 7ஆம் தேதி தொடங்குகிறது. விண்ணப்பிக்க கடைசி தேதி ஆகஸ்ட் 6ஆம் தேதி என்று அறிவிக்கப்பட்டுள்ளது. கற்றலில் ஆர்வமுள்ள எவரும் இதில் இணையலாம் என்றும் அறிவிக்கப்பட்டுள்ளது.

முதல் நிலையில், மாணவர்கள் புதிர்களைத் தீர்ப்பது, தேதி எண்களின் வரிசைமாற்றம், வார நாள்களின் தொடர் வருகையை அடிப்படையாகக் கொண்ட சுவாரஸ்யமான பண்புகள், ஒற்றை-இரட்டை எண்கள், காட்சிவழி விளக்கம், விடுபட்ட இலக்கங்கள், மறைப்புக் கணிதம் ஆகியவற்றைப் பற்றிப் படிப்பார்கள்.

இப்பயிற்சித் திட்டம் நான்கு தனித்தனி நிலைகளாக நடத்தப்படுகிறது.

இதில் 5 முதல் 11-ஆம் வகுப்பு வரையிலான மாணவர்கள் இலவசமாகப் பதிவுசெய்து கொள்ளலாம்.

மாணவர்கள் வாரத்திற்கு இரண்டு மணிநேரப் பாடங்கள் வீதம், 10 வாரங்களுக்கு இணையவழியில் பயில வேண்டும்.

அவர்களுக்கு அவ்வப்போது பயிற்சிகள் (assignments) வழங்கப்படும்.

கூடுதல் விவரங்களுக்கு மாணவர்கள் https://iitmpravartak.org.in/out-of-box-thinking என்ற இணையதளத்தைப் பார்வையிடலாம்.

இது குறித்து வெளியிடப்பட்டிருக்கும் செய்திக்குறிப்பில், ஐஐடி மெட்ராஸ் இயக்குநர் வி. காமகோடி கூறியிருப்பதாவது, கணிதத்தில் புதுமையான சிந்தனையைப் பயன்படுத்துவது படைப்பாற்றலை வளர்ப்பதோடு, வழக்கமான சூத்திரங்கள் மற்றும் முறைகளுக்கு அப்பாற்பட்டு சிந்திப்பதை ஊக்குவிக்கிறது என்று கூறியிருக்கிறார்.

கணிதம் என்பது சரியான விடையைக் கண்டறிவது மட்டுமல்ல; அது பல்வேறு சிந்தனை முறைகளை ஆராய்வதும், கோட்பாடுகளை ஆழமாகப் புரிந்துகொள்வதும் ஆகும் என்றும் தெரிவிக்கப்பட்டுள்ளது.

ஐஐடி மெட்ராஸ் எடுத்திருக்கும் இலவச முன்னெடுப்பின் மூலம், தரமான கணிதக் கல்வியை ஒவ்வொரு கற்பவருக்கும் கிடைக்கச் செய்யவும், வழக்கமான முறைகளுக்கு அப்பால் சிந்திக்குமாறு நாடு முழுவதும் உள்ள மாணவர்களை ஊக்குவிக்கவும் விரும்புவதாகத் தெரிவிக்கப்பட்டுள்ளது.

தமிழக பள்ளிப் பாடத் திட்டத்தில் 'ஸ்டீம்'('STEAM) என்ற புதிய முறை அறிமுகம்.

2026-07-22T20:21:05.583+05:30

“தமிழக பள்ளி பாடத்திட்டத்தில் புதிய முயற்சியாக, 'ஸ்டீம்' என்ற கல்வி முறை அறிமுகம் செய்யப்பட உள்ளது. மாணவர்களின் புத்தகச் சுமையையும், மனச் சுமையையும் குறைக்கும் வகையிலான கல்வியே, பள்ளிகளில் இனிமேல் கற்று தரப்படும்,” என, பள்ளி கல்வித்துறை அமைச்சர் ராஜ்மோகன் தெரிவித்தார்.

தமிழக பள்ளி கல்விக்கான கலைத்திட்டம், இலக்குகள், திறன்கள் போன்றவற்றை மேம்படுத்தும் வகையில், பாடத்திட்ட உயர்மட்ட வல்லுனர் குழு மற்றும் கலைத்திட்ட வடிவமைப்பு குழு கூட்டம், சென்னை அண்ணா நுாற்றாண்டு நுாலகத்தில் நேற்று நடந்தது.

இதில், அமைச்சர் ராஜ்மோகன் பேசியதாவது:

குழந்தைகளுக்கான கல்வியாக தமிழகத்தில் கல்வி முறையை மாற்ற இருக்கிறோம். இனி குழந்தை மையக் கல்வியாக மாறுகிறது.

மனச்சுமை

அதில், கதைகளின் வழியே கணிதம் கற்று தரப்படும். புத்தகப்பை சுமை குறையும் அளவிற்கு, மாணவர்களின் மனச்சுமையும் குறையும். ஒவ்வொரு கணித வகுப்பும், கதை சொல்லல் முறையில் நடக்கப் போகிறது.

உலக நாடுகள், அறிவியல், தொழில்நுட்பம், இன்ஜினியரிங், கணிதம் போன்றவற்றை உள்ளடக்கிய, 'STEM - ஸ்டெம்' என்ற கல்வி முறையை பின்பற்றுகின்றன. நாம், 'ஸ்டெம்' முறையில் இருந்து, 'ஸ்டீம்' கல்வி முறையை நோக்கி நகர்கிறோம்.

இதில் கூடுதலாக, 'ஆர்ட்ஸ்' எனும் கலைப்பிரிவை சேர்த்துள்ளோம். அதாவது, அறிவியல், தொழில்நுட்பம், இன்ஜினியரிங், கலை மற்றும் கணிதம் பாடத்திட்டங்களை கொண்ட, 'STEAM - ஸ்டீம்' என்ற புதிய முறையை அறிமுகம் செய்கிறோம்.

கலை வாயிலாக மனிதம், பண்புகள் கற்று தரப்படும். கலையுடன் கூடிய விஞ்ஞான வகுப்புகள் நடத்தப்படும். எழுத்துகள் குறைந்து, வண்ணப்படங்கள் அதிகமாக்கப்படும். அதில், 'கியூ.ஆர்., கோடு' இருக்கும். அதை, 'ஸ்கேன்' செய்து பார்த்தால், அது வீடியோவாக மாறும். ஏ.ஐ., எனும் செயற்கை நுண்ணறிவு தொழில்நுட்பத்தின் நுணுக்கங்கள் குறித்து, மாணவர்களுக்கு கற்று கொடுக்கப்படும்.

பெண்ணுரிமை, கருணை அறிவாற்றலை முன்னிலைப்படுத்தும் கல்வி மற்றும் பெற்றோரை மதிக்கும் கல்வி கற்று தரப்படும். ஏற்கனவே, மூன்றாம் வகுப்பு வரையிலான மாணவர்களுக்கு, இது போன்ற பாடத்திட்டம் அமல்படுத்தப்பட்டது.

தலையீடு இருக்காது

தற்போது, நான்காம் வகுப்பு முதல், எட்டாம் வகுப்பு வரையிலான மாணவர்களுக்கு, இந்த பாடத்திட்டங்கள் செயல்படுத்தப்படும்.

பள்ளி மாணவர்களை அடித்து சொல்லிக் கொடுத்த காலம் போய்விட்டது. இனி ஆடிப் பாடி சொல்லிக் கொடுங்கள். மாணவர்களுக்கு 100 சதவீதம், 'மெரிட்' அடிப்படையில் மட்டும் தான் 'சீட்' வழங்கப்படும். தகுதி, திறமையை வைத்து மட்டும் தான் ஆசிரியர்கள் உள்ளே வர முடியும். இதில், அரசியல் தலையீடுக்கு இடமில்லை.

இவ்வாறு அவர் பேசினார்.

பள்ளி மாணவர்களுக்கு விண்வெளி அறிவியல்

“பள்ளி மாணவர்களுக்கு, விண்வெளி தொடர்பான அறிவியல் திறனை ஊக்குவிக்க திட்டமிட்டு உள்ளோம்,” என, 'இஸ்ரோ' எனும் இந்திய விண்வெளி ஆய்வு நிறுவன தலைவர் நாராயணன் தெரிவித்தார்.

அவர் அளித்த பேட்டி:

தமிழகத்தில் நிறைய அரசு பள்ளிகள் உள்ளன. ஆனால், பல பள்ளிகளில் அடிப்படை வசதிகள் இல்லை. பள்ளி கல்வித்துறைக்கு தேவையான அனைத்து ஒத்துழைப்பும், விண்வெளி துறை சார்பில் வழங்கப்படும். மாணவர்கள் கல்வியில் மட்டும் கவனம் செலுத்தாமல், விளையாட்டு, ஆரோக்கியம் என, அனைத்து துறைகளிலும் திறமையாளர்களாக திகழ வேண்டும். மாணவர்களிடையே நல்ல பண்பாடு, ஒழுக்க முறைகளை மேம்படுத்துவது குறித்து, பாடத்திட்ட கூட்டத்தில் ஆலோசனை செய்யப்பட்டது.

மாணவர்களை முன்னேற்றுவதற்கு, நாம் செய்த சாதனைகளையும், நாட்டின் வளர்ச்சியையும், மாணவர்களுக்கு கற்பிக்கும் வகையில் பாடத்திட்டம் உருவாக்கப்பட வேண்டும். பள்ளி மாணவர்களுக்கு, விண்வெளி தொடர்பான அறிவியல் திறனை ஊக்குவிக்கவும் திட்டமிட்டுள்ளோம்.

இவ்வாறு அவர் கூறினார்.

செய்தித்தாள் வாசிக்க நேரம்

மாணவர்களிடம் புத்தகம் வாசிக்கும் நேரம் குறைந்து, மொபைல் பார்க்கும் நேரம் அதிகமாகிவிட்டது. செய்தித்தாள் படிக்கும் பழக்கம் குறைந்துவிட்டது. மாணவர்கள் செய்தித்தாள் படிப்பது அவசியம். மாணவர்களிடம் செய்தித்தாள் வாசிப்பை ஊக்குவிக்க வேண்டும். அதற்காக, ஒவ்வொரு பள்ளியிலும் செய்தித்தாள் வாசிப்புக்கென நேரம் ஒதுக்க நடவடிக்கை எடுக்கப்படும்.

- ராஜ்மோகன், பள்ளி கல்வித்துறை.

அணில் கதை கூறிய அமைச்சர்
கூட்டத்தில் அமைச்சர் ராஜ்மோகன் பேசியதாவது:

வால் அறுந்த நிலையில், ஒரு அணில் சுற்றியதை பார்த்த சக நண்பர், இது அணில் போல இல்லை; எலி போல உள்ளது என்று கிண்டல் செய்தார். அதற்கு நான் சொன்னேன், அதன் உருவத்தை பார்த்து கிண்டல் செய்யாதே. அது தனக்கு ஏற்பட்ட ஆபத்தில் இருந்து மீண்டு வந்திருக்கலாம். குடும்பத்தை பிற விலங்குகளிடம் இருந்து காப்பாற்ற போராடி இருக்கலாம்.

அப்போது, அதன் வால் துண்டிக்கப்பட்டு இருக்கலாம். அதன் உருவத்தை பார்க்காதே, அது கடந்து வந்த பாதையை, தன்னம்பிக்கையை பார் என்றேன். எந்த பள்ளியிலும் ஆசிரியர்களோ, சக மாணவர்களோ, குழந்தைகளை உருவக் கேலி செய்து அழைக்காதீர்கள்; அது, அந்த குழந்தைகளை மனரீதியாக காயப்படுத்தும்.

இவ்வாறு அவர் பேசினார்.

கற்றல் திறனை மேம்படுத்த ஒவ்வொரு பள்ளிக்கும் தனி செயல்திட்டம் உருவாக்க உத்தரவு.

2026-07-19T21:05:39.659+05:30

பள்ளிக்கல்வித் துறை இயக்குநரகம் சார்பில், அனைத்து மாவட்ட முதன்மைக் கல்வி அலுவலர்களுக்கும் அனுப்பப்பட்டுள்ள சுற்றறிக்கையில் கூறியிருப்பதாவது: 2025-2026-ம் கல்வியாண்டு 10, 12-ம் வகுப்பு பொதுத்தேர்வு முடிவுகளின்படி பள்ளிகள் வாரியான பகுப்பாய்வு அறிக்கை எமிஸ் தளத்தில் வெளியிடப்பட்டுள்ளன.

அதைக் கொண்டு மாணவர்களின் கற்றல் மற்றும் செயல் திறனை மேம்படுத்துவதற்கான ஒரு செயல்திட்டத்தை பள்ளிகள் உருவாக்க வேண்டும். இதுதொடர்பாக அனைத்து பள்ளி தலைமையாசிரியர்களுக்கும், அந்தந்த மாவட்ட முதன்மைக் கல்வி அலுவலர்கள் உரிய அறிவுறுத்தல்களை வழங்க வேண் டும். இவ்வாறு அதில் கூறப்பட்டுள்ளது.

அரசுப் பள்ளிகளில் கலைத் திருவிழா போட்டிகள்: ஜூலை 23-ம் தேதி தொடங்குகிறது.

2026-07-19T21:03:58.765+05:30

பள்ளிக்கல்வி மற்றும் தொடக்கக் கல்வி இயக்குநரகம் சார்பில் அனைத்து மாவட்ட முதன்மைக்கல்வி அலுவலர்களுக்கும் அனுப்பப்பட்டுள்ள சுற்றறிக்கை: அரசு, அரசு உதவிப் பள்ளிகளில் பயிலும் மாணவர்கள் பயன்பெறும் வகையில் பள்ளி, வட்டாரம், மாவட்டம் மற்றும் மாநில அளவில் கலைத் திருவிழா போட்டிகள் நடத்தப்பட்டு வருகின்றன. அதன்படி நடப்பு கல்வியாண்டிலும் கலைத் திருவிழா போட்டிகள் ஜூலை 23-ம் தேதி தொடங்கி, அக்.28-ம் தேதிவரை நடத்தப்பட உள்ளன.

1, 2-ம் வகுப்பு, 3 முதல் 5-ம் வகுப்பு, 6 முதல் 8-ம் வகுப்பு, 9, 10-ம் வகுப்பு, 11, 12-ம் வகுப்பு என 5 பிரிவுகளாக வயதுக்கு ஏற்ப பிரிக்கப்பட்டு போட்டிகள் நடைபெற உள்ளன. இதில் கதை கூறுதல், வண்ணம் தீட்டுதல், மாறுவேடம், பேச்சு, திருக்குறள் ஒப்புவித்தல், மெல்லிசை, நாட்டுப்புற நடனம், பரதநாட்டியம், மணற்சிற்பம், வில்லுப்பாட்டு, கிராமிய நடனம், நகைச்சுவை,பலகுரல் பேச்சு, பம்பை, உடுக்கை, பறை, மிருதங்கம், டிரம்ஸ், வயலின், நாதஸ்வரம், கீ போர்டு இசைத்தல், பொம்மலாட்டம் உட்பட பல்வேறு வகைகளில் போட்டிகள் நடத்தப்படும்.

முதல்கட்டமாக பள்ளி அளவிலான போட்டிகள் ஜூலை 23 முதல் ஆக.14-ம் தேதி வரையும், குறுவட்ட அளவிலான போட்டிகள் ஆக.19 முதல் 21-ம் தேதி வரையும் நடைபெறும். அதைத் தொடர்ந்து வட்டார அளவிலான போட்டிகள் ஆக.11 முதல் செப்.9-ம் தேதி வரையும், மாவட்ட அளவிலான போட்டிகள் அக்.8 முதல் 15-ம் தேதி வரையும், மாநில அளவிலான போட்டிகள் அக்.7 முதல் 28-ம் தேதி வரையும் நடத்தப்படும்.

மாநில அளவிலான போட்டிகளில் வெற்றி பெறுபவர்களுக்கு ‘கலையரசன்’, ‘கலையரசி’ விருதுகள் வழங்கி கவுரவிக்கப்படும். மேலும், தரவரிசையில் முதன்மை இடத்தை பெறும் 25 மாணவர்கள் வெளிநாடுகளுக்கு கல்விச் சுற்றுலா அழைத்துச் செல்லப்படுவார்கள். இதற்கான வழிகாட்டு நெறிமுறைகளைப் பின்பற்றி போட்டிகளை சிறந்த முறையில் நடத்தி முடிக்க தேவையான பணிகளை அந்தந்த மாவட்ட முதன்மைக் கல்வி அதிகாரிகள் மேற்கொள்ள வேண்டும். இவ்வாறு அதில் கூறப்பட்டுள்ளது.

டிஎன்பிஎஸ்சி குரூப் 1 முதல்நிலைத் தேர்வு தேதி மாற்றம்.

2026-07-18T08:53:31.018+05:30

டிஎன்பிஎஸ்சி குரூப்-1 முதல்நிலைத் தேர்வு தேதி மாற்றப்பட்டுள்ளது. துணை ஆட்சியர், வணிக வரிஉதவி ஆணையர், கூட்டுறவு சங்கங்களின் துணைப் பதிவாளர், பதிவுத் துறை மாவட்டப் பதிவாளர், தொழிலாளர் நல உதவி ஆணையர் பதவிகளில் 28 காலி இடங்களை நிரப்புவதற்காக குரூப்-1 தேர்வுக்கான அறிவிப்பு கடந்த ஜூன் 23-ம் தேதிவெளியிடப்பட்டது.

இதற்கான ஆன்லைன் விண்ணப்ப பதிவு ஜூன் 30-ல் தொடங்கி நடந்து வருகிறது.

விண்ணப்பிக்க கடைசி நாள் ஜூலை 29 ஆகும். முதல்நிலைத் தேர்வு செப்.6-ம் தேதி காலை 9.30 மணி முதல் 12.30 மணி வரை நடைபெறும் என்று அறிவிக்கப்பட்டிருந்தது. இந்நிலையில், தேர்வு தேதி மாற்றப்பட்டுள்ளது.

இத்தேர்வு செப்.27-க்கு தள்ளிவைக்கப்பட்டுள்ளதாக டிஎன்பிஎஸ்சி செயலர் பனோத் ம்ருகேந்தர் லால் வெளியிட்ட செய்திக்குறிப்பில் கூறப்பட்டுள்ளது.

நீட் மறுதேர்வு முடிவுகள் வெளியீடு: விழுப்புரம் மாணவர் தேசிய அளவில் 12-வது இடம்.

2026-07-18T08:51:42.017+05:30

இளநிலை மருத்துவப் படிப்பு களுக்கான நீட் மறுதேர்வு முடிவுகள் வெளியிடப்பட்டுள்ளன. பஞ்சாப், ஹரியானா மாணவர்கள் 720-க்கு 715 மதிப்பெண்கள் எடுத்து முதலிடம் பிடித்துள்ளனர். தமிழகத்தின் விழுப்புரம் மாவட்டத்தைச் சேர்ந்த மாணவர் வேங்கடபதி வேலாயுதம் தேசிய அளவில் 12-வது இடம் பிடித்துள்ளார்.

நாடு முழுவதும் அரசு, தனியார் மருத்துவக் கல்லூரிகளின் எம்பிபிஎஸ், பிடிஎஸ், சித்தா, ஆயுர்வேதா, யுனானி, ஓமியோபதி படிப்புகள், கால்நடை மருத்துவப் படிப்பின் அகில இந்திய ஒதுக்கீட்டு இடங்கள் நீட் தேர்வில் தகுதி பெறுபவர்களைக் கொண்டு நிரப்பப்படுகின்றன. தேசியத் தேர்வுகள் முகமை (என்டிஏ) ஆண்டுதோறும் இத்தேர்வை நடத்தி வருகிறது.

அதன்படி, 2026-27-ம் கல்வி ஆண்டுக்கான நீட் தேர்வு நாடு முழுவதும் கடந்த மே 3-ம் தேதி நடைபெற்றது. தேர்வுக்கு முன்னதாகவே வினாத்தாள் கசிந்தது உறுதி செய்யப்பட்டதால், நடந்து முடிந்த நீட் தேர்வை மத்திய அரசு ரத்து செய்தது. வினாத்தாள் கசிவுக்கு காரணமானவர்கள் கைது செய்யப்பட்டனர்.

இதையடுத்து, பலத்த பாதுகாப்புடன் நீட் மறுதேர்வு ஜூன் 21-ம் தேதி நடத்தப்பட்டது. நாடு முழுவதும் 5,500 மையங்களில் தேர்வு நடைபெற்றது. 20 லட்சம்பேர் தேர்வு எழுதினர்.

தமிழகத்தில் 1.36 லட்சம் பேர் தேர்வு எழுதினர். இந்நிலையில், https://neet.nta.nic.in என்ற இணையதளத்தில் நீட் மறுதேர்வு முடிவுகளை தேசியத் தேர்வுகள் வாரியம் நேற்று முன்தினம் இரவு வெளியிட்டது. இத்தேர்வில் 11.21 லட்சம் பேர் (56 சதவீதம்) தகுதி பெற்றுள்ளனர். மாணவர்களைவிட மாணவிகளே அதிக அளவில் தேர்ச்சி பெற்றுள்ளனர். பஞ்சாப் மாநிலத்தைச் சேர்ந்த ஆர்யன் குப்தா, ஹரியானாவைச் சேர்ந்த பன்சூல் பன்சால் ஆகிய இரு மாணவர்கள் 720-க்கு 715 மதிப்பெண்கள் பெற்று தேசிய அளவில் முதலிடம் பெற்றுள்ளனர்.

விழுப்புரத்தைச் சேர்ந்த பிரபல எலும்பு முறிவு மருத்துவர் அஞ்சன் ராம்சந்திர நாத்தின் மகன் வேங்கடபதி வேலாயுதம், 720-க்கு 705 மதிப்பெண் பெற்று சாதனை படைத்துள்ளார். இவர், சென்னையில் உள்ள பிரபல தனியார் பள்ளியில் படித்து, நீட் தேர்வை எழுதினார். தமிழகத்தில் முதல் இடத்தையும், நாட்டின் தரவரிசை பட்டியலில் 12-வது இடத்தையும் பிடித்துள்ளார்.

700-க்கு மேல் 19 பேர், 690-க்கு மேல் 138 பேர், 650-க்கு மேல் 1,492 பேர், 600-க்கு மேல் 10,160 பேர், 500-க்கு மேல் 90,780 மாணவர்கள் மதிப்பெண் பெற்றுள்ளனர். பொதுப் பிரிவில் 2.91 லட்சம் பேர், ஓபிசி பிரிவில் 5.12 லட்சம் பேர், எஸ்சி பிரிவில் 1.59 லட்சம் பேர், எஸ்டி பிரிவில் 63,716 பேர், பொருளாதாரத்தில் பின்தங்கிய பொதுப் பிரிவில் 95,026 பேர், மாற்றுத் திறனாளிகள் 3,666 பேர் தேர்ச்சி பெற்றுள்ளனர்.

தமிழகத்தில் எம்பிபிஎஸ், பிடிஎஸ் படிப்புகளுக்கான மாணவர் சேர்க்கைக்கு ஆன்லைனில் விண்ணப்பிக்க வரும் 23-ம் தேதி கடைசி நாள். தற்போது நீட் தேர்வு முடிவுகள் வெளியாகியுள்ளதால், மாணவர்களின் நீட் மதிப்பெண்களை பெற்று, விண்ணப்பத்தில் சேர்க்கும் பணிநடந்து வருகிறது. அகில இந்தியக் கலந்தாய்வு தொடங்கிய பிறகு, தமிழகத்தில் கலந்தாய்வு தொடங்க உள்ளது.

டெட்: தகுதியானதா ‘தகுதித் தேர்வு’?

2026-07-15T07:49:55.246+05:30

தேசிய அளவிலான கால்பந்துப் போட்டி. மாநில அணிக்கு ஒரு முன்கள வீரர் தேவை. நான், நீ என்று ஆயிரம் வீரர்கள் ஓர் இடத்துக்காகப் போட்டியிடுகின்றனர். அணி மேலாளர், சிறு தேர்வு வைத்து அதில் அதிக மதிப்பெண் பெற்றவருக்கே மாநில அணியில் இடம் என்கிறார்.

பிறகு அணி மேலாளர் ஒரு முன்கள வீரரைத் தேர்ந்தெடுத்தார். பல போட்டிகளில் அந்த வீரர் தனது திறமையைப் பயன்படுத்தி அதிக கோல்களை ஈட்டினார். ஆண்டுகள் கழிந்தன. புதிய மேலாளர் வந்தார்.

தமது அணி வீரர்களின் திறனைப் பரிசோதிக்க முன்கள வீரரை அழைத்தார். தேசிய அளவிலான போட்டியில் சிறப்பாக விளையாடினால் அணியில் தொடரலாம். இல்லையெனில் வெளியேறலாம் என்றார் கண்டிப்புடன்.

“ஆனால், போட்டியில் நீங்கள் கோல்கீப்பராக விளையாடித் திறமையை நிரூபிக்க வேண்டும்" என்றார் மேலாளர். முன்கள வீரருக்கு அதிர்ச்சி. "எல்லா நிலைகளிலும் எனக்கு விளையாடத் தெரியும். அதுதான் குழு விளையாட்டுக்கான விதி.

முன்களத்தில் நின்று விளையாடுவது எனது சிறப்புத் தகுதி. நீங்கள் தெரிந்துகொள்ள வேண்டும் என்றால், ஒவ்வொரு நிலையிலும் சிறிது நேரம் விளையாடிக் காட்டுகிறேன்.

ஆனால், எனக்குச் சற்றும் சம்பந்தமே இல்லாத நிலையில் விளையாடி வென்றால்தான் நான் தகுதியானவர் எனச் சொல்வது எப்படி நியாயமாகும்?" என்று கேட்டார் வீரர்.

இதைத்தான் நுழைவுத்தேர்வுகளும் போட்டித் தேர்வுகளும் செய்கின்றன. நம் நாட்டில் மக்கள் தொகை அதிகம். படித்தவர்கள் அதிகரிக்கும் அளவுக்கு வேலை வாய்ப்புகளை உருவாக்கவில்லை. அதனால் தேர்வுகள் மூலம் குழப்பி வடிகட்டிவிட்டு, தகுதியுள்ளவருக்கே வாய்ப்பு எனத் தப்பிக்க முடிகிறது. இதில் தகுதித் தேர்வு முறையில் கூடுதல் பிரச்சினைகள் உள்ளன.

சிடுக்கான சிக்கல்கள்

பல காலமாக, அந்தந்த ஆண்டுகளின் நடைமுறைக்கு ஏற்ப ஆசிரியப்பணி வாய்ப்புகள் வழங்கப்பட்டன. அதன் பின் வேலைவாய்ப்பு அலுவலகப் பதிவு மூப்பு, டிஆர்பி போட்டித்தேர்வு முறை வந்தது.

கட்டாயக் கல்வி உரிமைச் சட்டம் 2009 வந்ததும் இடைநிலை வரை போட்டித்தேர்வின் பெயர் ‘டெட்’ (ஆசிரியர் தகுதித் தேர்வு) என மாற்றப்பட்டது. இப்போதுள்ள பத்தாம் வகுப்பு வரையான புத்தகங்களை வரிக்கு வரி மனப்பாடம் செய்தால்தான் டெட் தேர்வில் தேர்ச்சியடைய முடியும்.

சில ஆண்டுகளில் புத்தகங்கள் மாறிய பிறகு புதிய புத்தகத்தைப் படித்துத் தேர்வு எழுதினால்தான், ஆசிரியருக் கான தகுதி வரும் என எப்படிச் சொல்ல முடியும்? தொடக்கப் பள்ளியில் ஓர் ஆசிரியர் அனைத்துப் பாடங்களையும் நடத்துவதால், அனைத்திலும் கேள்விகளைக் கேட்கப்படலாம். அவர்களுக்கு எட்டாம் வகுப்புவரை உள்ள பாடநூலில் இருந்து கேள்விகள் எதற்கு? நடுநிலை வகுப்புகளில் ஒவ்வொரு பாடத்துக்கும், அதற்கான தனி ஆசிரியர்கள் இருக்கி றார்கள்.

அவர்களின் பாடத்தில்தானே அதிகமதிப்பெண்களுக்குக் கேள்விகள் இடம்பெற வேண்டும்? கால்பந்தாட்டம் போல அவரவர் நிலைக்கேற்ற திறன்களையும் பிறவற்றில் அடிப்படைகளையும் ஆசிரியர் தெரிந்து வைத்திருந்தால் போதுமே! அனைத்துப் பாட ஆசிரியர்களுக்கும் அறிவியல் அல்லது சமூக அறிவியலில் மட்டும் 60 மதிப்பெண்களுக்கு வினாக்கள் கேட்கப்படுவது எப்படிச் சரியாகும்?

ஒரு நிமிடத்தில் வாசித்துப் புரிந்துகொள்ளவே முடியாத அளவுக்குக் குழப்பமான கேள்விகள் கேட்கப்படுவது ஏன்? தகவல்களை வெற்று மனப்பாடம் செய்வதுதான், தொடர்ந்து ஆசிரியராக வேலை செய்யத் தகுதியா? இது குறித்து விரிவாக விவாதிக்கப்பட வேண்டும்.

ஆசிரியர் பயிற்சி முறை, பணி அழுத்தங்கள், மாணவரின் நடத்தை மாற்றங்கள், காலத்துக்கு ஏற்ற கல்விமுறை போன்று கல்வியில் ஏராளமான மாற்றங்களைச் செய்ய வேண்டியிருக் கிறது. அவைதான் அரசுப் பள்ளிகளையும் அடுத்த தலைமுறையையும் காக்கும் வழிகள்.

தீர்வுகள்

போட்டித் தேர்வு வேறு. தகுதித் தேர்வு வேறு. தகுதித்தேர்வு என்பதைச் சட்டப்படி பணியில் உள்ள ஐம்பத்தைந்து வயதுவரையிலான ஆசிரியர்கள் எழுத வேண்டும். அதற்குக் கொள்குறி வினாக்கள் மூலம் தகவல் களைக் கேட்கும் தேர்வு முறையானதே அல்ல.

அவரவர் பாடத்தில் இருந்தும் வகுப்பறை மேலாண்மையில் இருந்தும் வினாக்களுக்கு அவரவர் அனுபவத்தில் இருந்தும் விரிவாக விடை எழுதும்படித் தகுதித் தேர்வை மாநில அரசு மாற்றியமைக்க வேண்டும். உதாரணமாக,

* வகுப்பில் உட்காராமல் சுற்றிக்கொண்டே இருக்கும் மாணவரை எப்படிக் கையாளுவீர்கள்?

* வாசிக்கச் சிரமப்படும் குழந்தைகளை எப்படி வாசிக்க வைப்பீர்கள்?

* எழுத்துத் திறனை வளர்க்க என்ன செயல்பாடுகளைச் செய்யலாம்?

* மற்றவர்களை கேலி கிண்டல் செய்யும் ஒரு மாணவரை எப்படி நெறிப்படுத்தலாம்?

* ஒரு வகுப்பில் உள்ள சிறப்புக்குழந்தையிடம், மற்ற மாணவர்கள் பழகும் முறைகளைக் கூறுக.

* அடித்தால்தான் குழந்தைகளைத் திருத்த முடியும் என வாதம் செய்பவரிடம், உங்கள் கருத்துகளை எடுத்துக்கூறுங்கள்.

* சைகை மொழி, ஓவிய மொழி பற்றிய பாடத்தை மாணவர் பங்கேற்றுப் புரிந்துகொள்ள ஏற்ற செயல்பாடுகளை உருவாக்குங்கள்.

* பாடக்குறிப்பு தேவை, தேவையில்லை என விவாதம் நடைபெறுகிறது. ஏதேனும் ஒரு பக்கம் நின்று உங்கள் விவாதங்களை எழுதுங்கள்.

* பாடநூல், பாடத்திறன்களை வளர்க்க உதவியாக இருக்கிறதா? ஆய்வுரை எழுதுக.

* பொதுப் பள்ளி, அருகமைப் பள்ளி ஆகியவற்றை ஏன் நடைமுறைப்படுத்த இயலவில்லை?

இப்படியான கேள்விகள் தானே தகுதித்தேர்வில் இடம்பெற வேண்டும்.

அரசு பள்ளிகளில் கழிப்பறை வசதி உள்ளதா அறிக்கை தாக்கல் செய்ய உத்தரவு.

2026-07-13T06:52:08.456+05:30

'அரசு பள்ளிகளில் குறிப்பாக பெண்கள் பள்ளிகளில் போதிய கழிப்பறை உள்ளிட்ட அடிப்படை வசதிகள் உள்ளனவா. இல்லையெனில் பூர்த்தி செய்ய மேற்கொண்ட நடவடிக்கை குறித்து தமிழக அரசு தரப்பில் அறிக்கை தாக்கல் செய்ய வேண்டும்,' என, உயர்நீதிமன்ற மதுரை கிளை உத்தரவிட்டது.

ராமநாதபுரம் மாவட்டம் உப்பூர் திருமுருகன் தாக்கல் செய்த பொதுநல மனு:

மதுரை ஒத்தக்கடையில் அரசு மாதிரி பெண்கள் மேல்நிலைப் பள்ளி உள்ளது. போதிய கழிப்பறை வசதி இல்லை. நிரந்தர துாய்மை பணியாளர்கள் இல்லை.

பள்ளி நிர்வாகம் ஒப்பந்த அடிப்படையில் பணிபுரியும் தற்காலிக துாய்மை பணியாளர்களையே நம்பியுள்ளது. கழிப்பறைகளை சரியாக சுத்தம் செய்வதில்லை. 'சானிட்டரி நாப்கின்'களை அகற்றுவதற்கான வசதி இல்லை. சுகாதார பிரச்னைகள் உருவாகின்றன. மாணவிகளின் உடல்நலம் பாதிக்கப்படுகிறது. உடற்கல்வி ஆசிரியர்கள் பற்றாக்குறை உள்ளது.

போதிய கழிப்பறை, குடிநீர் உள்ளிட்ட அடிப்படை வசதிகளை நிறைவேற்ற வேண்டும். சுற்றுச்சுவர் அமைக்க வேண்டும். போதிய உடற்கல்வி ஆசிரியர்கள், துாய்மை பணியாளர்கள், காவலர்களை நியமிக்க தமிழக பள்ளிக் கல்வித்துறைக்கு உத்தரவிட வேண்டும்.

இவ்வாறு அவர் குறிப்பிட்டார்.

மனுதாரர் தரப்பில் வழக்கறிஞர் அழகுமணி ஆஜரானார்.

நீதிபதிகள் ஏ.டி.ஜெகதீஷ் சந்திரா, ஆர்.பூர்ணிமா அமர்வு பிறப்பித்த உத்தரவு:

அரசு பள்ளிகளில் குறிப்பாக பெண்கள் பள்ளிகளில் போதிய கழிப்பறை உள்ளிட்ட அடிப்படை வசதிகள் உள்ளனவா. போதிய துாய்மை பணியாளர்கள் உள்ளனரா. இல்லையெனில் பூர்த்தி செய்ய மேற்கொண்ட நடவடிக்கை குறித்து தமிழக பள்ளிக் கல்வித்துறை இயக்குனர் ஜூலை 30ல் அறிக்கை தாக்கல் செய்ய வேண்டும் என்றது.

புத்தகங்கள் பற்றாக்குறையா? கல்வித்துறை விளக்கம்!

2026-07-13T06:50:38.987+05:30

தமிழகத்தில் சில மாவட்டங்களில், ஒன்றாம் வகுப்பு முதல் மூன்றாம் வகுப்பு வரையிலான மாணவர்களுக்கு, புதிய பாடப்புத்தகங்கள் வழங்கவில்லை. எண்ணும் எழுத்தும் புத்தகம், ஆசிரியர் கையேடு வழங்கப்படவில்லை என புகார்கள் எழுந்தன.

இது குறித்து, பள்ளிக் கல்வித்துறை நேற்று வெளியிட்ட விளக்கம்:

பாடப்புத்தகங்கள் அச்சிடுதல் அல்லது ஆரம்ப கட்ட வினியோகத்தில், எந்தவித தாமதமும் ஏற்படவில்லை.

கல்வியாண்டு தொடங்குவதற்கு முன், பள்ளிகள் வழங்கிய மாணவர்கள் எண்ணிக்கை அடிப்படையில் புத்தகங்கள் அச்சிடப்பட்டு, பள்ளிகளுக்கு வழங்கப்பட்டன.

பள்ளிகள் திறக்கப்பட்ட பின், புதிதாக மாணவர் சேர்க்கை நடந்தது. அதன் அடிப்படையில், 80,000 கூடுதல் புத்தகங்கள் தேவைப்பட்டன.

அவற்றை அச்சிட்டு, வினியோகிக்கும் பணி, இறுதி கட்டத்தை எட்டி உள்ளது. சில பள்ளிகளில், பாடப்புத்தகங்கள் பற்றாக்குறை என்பது, கல்வியாண்டு தொடங்கிய பின் மேற்கொள்ளப்பட்ட புதிய மாணவர் சேர்க்கையே தவிர, துறையின் திட்டமிடல் குறைபாடு காரணம் அல்ல.

இவ்வாறு அதில் கூறப்பட்டுள்ளது.

உதவி பேராசிரியர் தேர்வில் குழப்பம்: மதிப்பீடு முறையை ஆய்வுக்கு உட்படுத்த வலியுறுத்தல்.

2026-07-13T06:49:45.294+05:30

உதவி பேராசிரியர் பணியிடங்களை நிரப்புவதற்கு நடந்தத் தேர்வு முடிவுகளில் பல குழப்பங்கள் மற்றும் சந்தேகங்களையும் எழுந்துள்ளதாக 'வீ தி லீடர்ஸ்' அமைப்பின் நிறுவனர் அண்ணாமலை தெரிவித்துள்ளார்.

இது தொடர்பாக அவர் வெளியிட்ட அறிக்கையில் கூறியுள்ளதாவது:

தமிழக அரசு கலை மற்றும் அறிவியல் கல்லூரிகளில், 2,708 உதவி பேராசிரியர் பணியிடங்களை நிரப்புவதற்காக, ஆசிரியர் தேர்வு வாரியம், கடந்த 2025ஆம் ஆண்டு டிசம்பர் 27 அன்று போட்டித் தேர்வை நடத்தியது. சுமார் 42,000 தேர்வாளர்கள் பங்கேற்ற இந்தத் தேர்வுகள், 48 பாடப்பிரிவுகளுக்கு நடைபெற்றன. கடந்த 25.06.2026 அன்று வெளியிடப்பட்ட இந்தத் தேர்வுகளின் முடிவுகள், பல குழப்பங்களையும், சந்தேகங்களையும் எழுப்பியுள்ளன.

பாடப்பிரிவுகளுக்கு 150 மதிப்பெண்களுக்கான தேர்வும், விளக்கவுரைக்கு 50 மதிப்பெண்களுக்கான தேர்வும் நடைமுறைப்படி நடத்தப்பட்டுள்ளன. இந்த நிலையில், தமிழ்த் துறையில், 150 மதிப்பெண்களுக்கு 111 மதிப்பெண் பெற்று முதலிடம் பிடித்த தேர்வாளருக்கு, விளக்கவுரை தேர்வில், பூஜ்ஜியம் மதிப்பெண்கள் மட்டுமே வழங்கப்பட்டுள்ளது.

இதே போல, கணினி அறிவியல் துறையில் 107/150 மதிப்பெண்கள் பெற்றவருக்கு, விளக்கவுரை தேர்வில், 1/50 மட்டுமே கிடைத்திருக்கிறது. அதே நேரத்தில், இயற்பியல் பாடப்பிரிவில், 54/150 பெற்றவர், விளக்கவுரை தேர்வில், 49/50 பெற்றிருக்கிறார்.

இப்படி, மொத்தம் 43 பாடப்பிரிவுகளில், பாட மதிப்பெண் அதிகம் பெற்றவர்களுக்கு, விளக்கவுரை தேர்வில் மிகக் குறைந்த மதிப்பெண்ணும், பாட மதிப்பெண் குறைவாகப் பெற்றவர்களுக்கு, விளக்கவுரை தேர்வில் மிக அதிக மதிப்பெண்களும் வழங்கப்பட்டுள்ளது பல கேள்விகளை எழுப்பியிருக்கிறது.

மேலும், விளக்கவுரை மதிப்பெண்களில், 8.25, 24.75 என தசம, எண்ணிலான மதிப்பெண்கள் வழங்கப்பட்டுள்ளன. இது எப்படி சாத்தியம் என்ற கேள்வியும், தேர்வாளர்கள் மத்தியில் எழுந்துள்ளது. இப்படி, தேர்வு மதிப்பீட்டு முறையின் குழப்பத்தால், பல தேர்வாளர்களின் தரவரிசையில், பல நூறு இடங்கள் மாற்றம் ஏற்பட்டுள்ளது. மேலும், இந்த மதிப்பீட்டு முறையின் வெளிப்படைத் தன்மை குறித்தும், நம்பகத்தன்மை குறித்தும் பெரும் சந்தேகம் எழுந்துள்ளது.

உதவிப் பேராசிரியர் பணிக்காக, தமிழக இளைஞர்கள் பல ஆண்டுகளாக தங்கள் கடுமையான உழைப்பை வழங்கியிருக்கிறார்கள். தேர்வு மதிப்பீட்டில் இத்தனை குழப்பங்கள் ஏற்புடையது அல்ல. எனவே, இந்த விளக்கவுரை தேர்வு மதிப்பீடு முறையை ஆய்வுக்குள்ளாக்க வேண்டும். இந்தத் தேர்வை முழுமையாக மறு மதிப்பீடு செய்ய வேண்டும் என்றும், தமிழக அரசை வலியுறுத்துகிறேன்.

மேலும், கடந்த 2024ஆம் ஆண்டு வெளியிடப்பட்ட அரசாணையில், 4000 உதவிப் பேராசிரியர் பணியிடங்களை நிரப்ப உத்தரவு பிறப்பிக்கப்பட்டது. ஆனால், 2708 பணியிடங்களுக்கு மட்டுமே தேர்வு நடைபெற்றுள்ளது. சென்னை உயர்நீதிமன்றம், கடந்த மே மாதம், 4000 பணியிடங்களையும் ஆறு மாதங்களில் நிரப்ப உத்தரவிட்டுள்ளது. எனவே, மீதமுள்ள பணியிடங்களையும் நிரப்ப தமிழக அரசு உடனடியாக நடவடிக்கை எடுக்க வேண்டும் என்றும் கேட்டுக் கொள்கிறேன்.

இவ்வாறு அந்த அறிக்கையில் அண்ணாமலை தெரிவித்துள்ளார்.

அரசு பள்ளிகளில் மாணவர் சேர்க்கை 3 ஆண்டுகளில் 7.39 லட்சம் வீழ்ச்சி - அன்புமணி ஆதங்கம்.

2026-07-13T06:46:39.092+05:30

“தமிழக அரசு பள்ளிகளில் மாணவர் சேர்க்கை 3 ஆண்டுகளில் 7.39 லட்சம் வீழ்ச்சியடைந்துள்ளது. அரசு பள்ளிகளில் ஒரு லட்சத்துக்கும் கூடுதலான வகுப்பறைகளுக்கு ஆசிரியர்கள் இல்லாத சூழலில் அரசு பள்ளிகளை எவ்வாறு மேம்படுத்த முடியும்?” என பாமக தலைவர் மருத்துவர் அன்புமணி ராமதாஸ் கேள்வி எழுப்பியுள்ளார்.

இதுகுறித்து அவர் வெளியிட்ட அறிக்கையில், ‘தமிழ்நாட்டில் தனியார் பள்ளிகளில் பயிலும் மாணவர்களின் எண்ணிக்கை கடந்த ஓராண்டில் 1.77 லட்சம் அதிகரித்திருப்பதாகவும், அதே நேரத்தில் அரசு பள்ளிகளில் பயிலும் மாணவர்களின் எண்ணிக்கை 2.07 லட்சம் வீழ்ச்சி அடைந்திருப்பதாகவும் மத்திய அரசு வெளியிட்டுள்ள புள்ளி விவரங்கள் தெரிவிக்கின்றன. இதை தமிழ்நாடு அரசு எச்சரிக்கை மணியாக எடுத்துக் கொள்ள வேண்டும்.

ஒருங்கிணைந்த மாவட்ட கல்வி தகவல் அமைப்பு வெளியிட்ட தரவுகளில் தான் இந்த புள்ளிவிவரங்கள் இடம் பெற்றுள்ளன. கைப்புண்ணுக்கு கண்ணாடி தேவையில்லை என்பதைப் போல, அரசு பள்ளிகளில் மாணவர் சேர்க்கை ஆண்டுக்கு ஆண்டு குறைந்து வருவது பாட்டாளி மக்கள் கட்சிக்கு தெரிந்த ஒன்று தான் என்பதால் இந்த புள்ளிவிவரங்கள் அதிர்ச்சியளிக்கவில்லை.

இன்னும் கேட்டால் தொடர்ந்து இரண்டாவது ஆண்டாக அரசு பள்ளிகளில் மாணவர் சேர்க்கை குறைந்து வருவதாக மத்திய அரசின் புள்ளிவிவரங்கள் தெரிவிக்கின்றன. ஆனால், உண்மையில் கடந்த 10 ஆண்டுகளாகவே சில விதிவிலக்குகளைத் தவிர இதே நிலை தான் தொடர்கிறது.

அரசு பள்ளிகளில் பயிலும் மாணவர்கள் எண்ணிக்கை கடந்த 2024-25ஆம் ஆண்டில் 45 லட்சத்து 10,612 ஆக இருந்தது. 2025-26 ஆம் ஆண்டில் இந்த எண்ணிக்கை 43.03 லட்சமாக குறைந்து விட்டது. அதாவது ஒரே ஆண்டில் அரசு பள்ளிகளில் பயிலும் மாணவர்கள் எண்ணிக்கை 2.07 லட்சம் குறைந்துள்ளது.

இதற்கு முன் 2022-23 ஆம் ஆண்டில் அரசு பள்ளிகளில் பயிலும் மாணவர்கள் எண்ணிக்கை 50 லட்சத்து 42,026 ஆக இருந்தது. அதனுடன் ஒப்பிடும் போது 3 ஆண்டுகளில் அரசு பள்ளி மாணவர்கள் எண்ணிக்கை 7.39 லட்சம் குறைந்துள்ளது

2015-16 ஆம் ஆண்டில் அரசு பள்ளிகளின் மாணவர்கள் எண்ணிக்கை 75.52 லட்சமாக இருந்தது. ஆனால், 11 ஆண்டுகளில் மாணவர் சேர்க்கை 32 லட்சத்து 49 ஆயிரம் குறைந்திருக்கிறது. அதாவது 11 ஆண்டுகளில் அரசு பள்ளிகளில் பயிலும் மாணவர்கள் எண்ணிக்கை 43.02% குறைந்துள்ளது.

அதே நேரத்தில் கடந்த ஆண்டில் மட்டும் தனியார் பள்ளிகளின் மாணவர்கள் எண்ணிக்கை 60.26 லட்சத்திலிருந்து 62.03 லட்சமாக, அதாவது 1.77 லட்சம் அதிகரித்துள்ளது. கடந்த 11 ஆண்டுகளைக் கணக்கில் கொண்டால் 36.56 லட்சமாக இருந்த தனியார் பள்ளிகளின் மாணவர்கள் எண்ணிக்கை இப்போது 62.03 லட்சமாக அதிகரித்து விட்டது. அரசு பள்ளிகளின் வீழ்ச்சியில் தான் தனியார் பள்ளிகள் வளருகின்றன. இதை நினைத்து கவலைப்படாமல் இருக்க முடியாது.

அரசு பள்ளிகளில் போதிய கட்டமைப்பு வசதிகள் இல்லாததும், ஆசிரியர்களின் எண்ணிக்கை குறைந்து வருவதும் தான் இதற்கு காரணம் ஆகும். அரசு பள்ளிகளில் ஒரு லட்சத்திற்கும் கூடுதலான வகுப்பறைகளுக்கு ஆசிரியர்கள் இல்லாத சூழலில் அரசு பள்ளிகளை எவ்வாறு மேம்படுத்த முடியும்? எவ்வாறு புத்துயிரூட்ட முடியும்? இந்த உண்மையை உணர்ந்து கொண்டு அரசு பள்ளிகளில் கட்டமைப்பை வலுப்படுத்தவும், ஆசிரியர்களின் எண்ணிக்கையை அதிகரிக்கவும் நடவடிக்கை எடுக்கப்பட வேண்டும்.’ எனத் தெரிவித்துள்ளார்

கல்விக் கட்டண விவகாரத்தில் நீதிமன்ற உத்தரவை மீறும் தனியாா் பள்ளிகள் மீது கடும் நடவடிக்கை: அமைச்சா் ராஜ்மோகன் எச்சரிக்கை.

2026-07-11T09:43:14.167+05:30

கல்விக் கட்டணங்களை அறிவிப்புப் பலகையில் வெளியிட வேண்டும் என்ற சென்னை உயா்நீதிமன்றத்தின் உத்தரவைப் பின்பற்றாத தனியாா் பள்ளிகள் மீது கடும் நடவடிக்கை எடுக்கப்படும் என பள்ளிக்கல்வித் துறை அமைச்சா் ராஜ்மோகன் எச்சரிக்கை விடுத்துள்ளாா்.

தமிழ் வளா்ச்சித் துறை சாா்பில் அறிவியல் தமிழறிஞா் மணவை முஸ்தபா பிறந்த நாள் விழா நிகழ்ச்சிகள் சென்னை ஓமந்தூராா் அரசு பன்னோக்கு மருத்துவமனை அரங்கில் வியாழக்கிழமை நடைபெற்றது. இதில், அமைச்சா் ராஜ்மோகன் கலந்துகொண்டு அந்த வளாகத்தில் அமைக்கப்பட்டிருந்த அறிவியல் தமிழ் புத்தகக் காட்சியைத் திறந்து வைத்தாா்.

இதைத் தொடா்ந்து, அவா் விழாவையொட்டி நடத்தப்பட்ட விநாடி-வினா போட்டிகளில் வெற்றி பெற்ற மாணவா்களுக்கு சான்றிதழ்களை வழங்கி பேசியதாவது:

மணவை முஸ்தபா அறிவியல் தமிழின் தந்தை என போற்றப்படுகிறாா். அறிவியல், மருத்துவம், கணினி, தொழில்நுட்பம் போன்ற பல்வேறு துறைகளில் அவா் 10 லட்சத்துக்கும் மேற்பட்ட கலைச் சொற்களை உருவாக்கி அகராதிகளைத் தொகுத்துள்ளாா் என்றாா் அவா்.

இதைத் தொடா்ந்து செய்தியாளா்களிடம் அமைச்சா் ராஜ்மோகன் கூறியதாவது:

மணவை முஸ்தபா குறித்த தகவல்களை பள்ளித் பாடத் திட்டத்தில் இடம்பெறச் செய்வது குறித்து பாடத்திட்டக் குழுவின் தலைவா், உறுப்பினா்கள் முடிவு செய்வா். மாவட்டங்களில் ஏற்கெனவே நடைபெற்று வரும் புத்தகக் காட்சியில் மாணவா்கள் பங்கேற்கும் அறிவியல் கண்காட்சியை இடம்பெறச் செய்வது குறித்து ஆலோசித்து முடிவெடுக்கப்படும். தமிழகத்தில் பள்ளி மாணவா்கள் தங்களது தாய்மொழியான தமிழில் அதிக மதிப்பெண் பெறுவதற்கான செயல்பாடுகள் மேற்கொள்ளப்படும்.

பள்ளிகளில் கட்சி நிகழ்வுகள்... அரசுப் பள்ளிகளில் எந்தக் கட்சியைச் சோ்ந்தவா்களாக இருந்தாலும் அவா்கள் கட்சி சாா்ந்த கட்சிக் கொடிகள் உள்ளிட்ட அடையாளங்களுடன் செல்வதை முற்றிலும் தவிா்க்க வேண்டும். கட்சிகள் சாா்ந்த நிகழ்ச்சிகளையும் நடத்தக் கூடாது. அதையும் மீறி நடத்தினால் கடுமையான நடவடிக்கை எடுக்கப்படும்.

தமிழகத்தில் பல பள்ளிகளில் உடற்கல்வி ஆசிரியா் பணியிடங்கள் நிரப்பப்படாமல் இருந்தன. இதுகுறித்து ஆசிரியா் தோ்வு வாரியத்துக்கு தெரிவிக்கப்பட்டு நடவடிக்கை எடுக்கப்பட்டுள்ளது. இதேபோன்று ஆசிரியா்கள், ஆய்வக உதவியாளா்கள் உள்ளிட்ட பல்வேறு காலிப் பணியிடங்கள் கண்டறியப்பட்டு அவை அரசியல் தலையீடு இல்லாமல் நிரப்பப்படும்.

மூடப்பட்ட பள்ளிகள்... கடந்த திமுக ஆட்சியில் 207 பள்ளிகள் மூடப்பட்டன. சம்பந்தப்பட்ட பள்ளிகளில் மாணவா் சோ்க்கை இல்லாவிட்டாலும் சோ்க்கைக்கான அவகாசத்தை நீட்டிக்க உத்தரவிட்டுள்ளேன். இந்தப் பள்ளிகளில் மாணவா்கள் சேரும் நிலையில், மூடப்பட்ட பள்ளிகள் உடனடியாகத் திறக்கப்படும்.

மாற்றுச் சான்றிதழ் வழங்குவதில்... தனியாா் பள்ளிகளில் கல்விக் கட்டணத்தை முறையாகச் செலுத்தவில்லை; ஆசிரியா்களை எதிா்த்துப் பேசிவிட்டனா் உள்ளிட்ட ஒழுங்கு நடவடிக்கைகள் நிலுவையில் உள்ளன; விரும்பத் தகாத செயலில் ஈடுபட்டனா் போன்ற காரணங்களுக்கான பள்ளி நிா்வாகங்கள் மாணவா்களுக்கு மாற்றுச் சான்றிதழ் (டிசி) வழங்குவதை தாமதிக்கக் கூடாது. பள்ளிகள் மனிதாபிமானத்துடன் நடந்துகொள்ள வேண்டும். சென்னை உயா்நீதிமன்றத்தின் உத்தரவின்படி தனியாா் பள்ளிகள் தங்களது கல்விக் கட்டணத்தை வெளிப்படையாக அறிவிப்பு பலகையில் வெளியிட வேண்டும். மீறும் பள்ளிகள் மீது கடும் நடவடிக்கை எடுக்கப்படும் என்றாா் அவா்.

முன்னதாக, இந்த நிகழ்ச்சியில் தமிழ் வளா்ச்சித் துறை இயக்குநா் ந.அருள் வரவேற்றாா். தொடா்ந்து, துறையின் செயலா் வ.தட்சிணாமூா்த்தி, ஓமந்தூராா் மருத்துவக் கல்லூரி மருத்துவமனை முதல்வா் டாக்டா் ஹரிஹரன், ஓமந்தூராா் பல்நோக்கு மருத்துவமனை இயக்குநா் டாக்டா் மணி, கீழ்ப்பாக்கம் அரசு மருத்துவக் கல்லூரி முதல்வா் டாக்டா் கவிதா, ஸ்டான்லி அரசு மருத்துவக் கல்லூரி முதல்வா் டாக்டா் அரவிந்த், மணவை முஸ்தபாவின் மகன் மருத்துவா் மு.செம்மல், உள்ளிட்டோா் வாழ்த்திப் பேசினா். விழாவையொட்டி அறிவியல் தமிழ்க் கல்வி! கனவு மெய்ப்படும்! என்ற தலைப்பில் அறிவியல் தமிழ்க் கருத்தரங்கம் நடைபெற்றது.

பள்ளிக் கல்வியில் தேசிய அளவில் தமிழகம் தொடா்ந்து முன்னிலை: மத்திய அரசின் ஆய்வறிக்கையில் தகவல்.

2026-07-10T07:39:20.907+05:30

பள்ளி மாணவா் சோ்க்கை, இடைநிற்றல் குறைவு, உள்கட்டமைப்பு போன்ற பள்ளிக் கல்வியின் பல்வேறு முக்கிய குறியீடுகளில் தேசிய அளவில் தமிழகம் சிறந்து விளங்குவதாக மத்திய அரசின் ஆய்வறிக்கையில் தெரிவிக்கப்பட்டுள்ளது.

இது குறித்து பள்ளிக் கல்வித் துறைச் செயலா் பி.சந்தரமோகன் வியாழக்கிழமை வெளியிட்ட செய்திக்குறிப்பு: மத்திய கல்வி அமைச்சகம் ஒருங்கிணைந்த மாவட்ட கல்வி தகவல் மேலாண்மை என்ற பெயரில் கல்வி மேலாண்மை (யுடிஐஎஸ்இ) அறிக்கையை ஆண்டுதோறும் வெளியிட்டு வருகிறது. அந்த வகையில், 2025-26-ஆம் கல்வி ஆண்டுக்கான கல்வி மேலாண்மையை அறிக்கையை அண்மையில் வெளியிட்டுள்ளது.

அந்த அறிக்கையில், பள்ளிக் கல்வியின் பல்வேறு முக்கியக் குறியீடுகளில் தமிழ்நாடு தொடா்ந்து முன்னணி மாநிலமாகத் திகழ்வது உறுதி செய்யப்பட்டுள்ளது. மாணவா் சோ்க்கை, இடை நிற்றல் குறைவு, ஆசிரியா் எண்ணிக்கை, கல்வி உள்கட்டமைப்பின் பயனுள்ள பயன்பாடு மற்றும் பத்தாம் வகுப்புக்கு பிந்தைய கல்வித் தொடா்ச்சி உள்ளிட்ட பல்வேறு துறைகளில தேசிய அளவில் தமிழகம் சிறப்பான முன்னேற்றத்தை எட்டியுள்ளது.

யுடிஐஎஸ்இ அறிக்கையின்படி தமிழகத்தில் 57,566 பள்ளிகள், 1 கோடியே 24 லட்சத்து 2,872 மாணவா்கள், 5 லட்சத்து 69,909 ஆசிரியா்கள் உள்ளனா். மாநிலத்தின் மாணவா்-ஆசிரியா் விகிதம் விகிதம் 22:1ஆக இருந்து, தேசிய சராசரியான 24:1-ஐ விட சிறப்பாக உள்ளது. மேலும், ஒரு பள்ளிக்கு சராசரியாக 215 மாணவா்கள் மற்றும் 10 ஆசிரியா்கள் இருப்பது கல்வி உள்கட்டமைப்பு திறமையாகப் பயன்படுத்தப்பட்டு வருவதை எடுத்துக் காட்டுகிறது.

தொடக்க நிலை, நடுநிலைப் பள்ளிகள் இடைநிற்றல் பூஜ்ஜியம் சதவீதமாக பதிவாகியுள்ளது. இடைநிலைக் கல்வியில் இது 6.2 சதவீதம் மட்டுமே ஆகும். இது தேசிய சராசரியான 9.5 சதவீதத்தைவிடக் குறிப்பிடத்தக்க அளவில் குறைவாகும். மொத்த சோ்க்கை விகிதத்திலும் தமிழகம் தேசிய அளவில் முன்னணியில் உள்ளது. தொடக்கநிலையில் 92.2 சதவீதம், நடுநிலைப்பள்ளிகள் 95.2 சதவீதம் இடைநிலையில் 97.4 சதவீதம், மேல்நிலைப் பள்ளிகளில் 85.1 சதவீதம் எனப் பதிவாகியுள்ளது

கல்வி உள்கட்டமைப்பின் பயன்பாட்டிலும் தமிழகம் சிறப்பாகத் திகழ்கிறது. தேசிய அளவில் ஒரு பள்ளிக்கு சராசரியாக 169 மாணவா்கள் உள்ள நிலையில், தமிழகத்தில் ஒரு பள்ளிக்கு 215 மாணவா்கள் உள்ளனா். பள்ளி இடை நிற்றல் குறைத்தல், மாணவா் சோ்க்கையை உயா்த்தல், போதுமான ஆசிரியா் எண்ணிக்கை உறுதி செய்தல், கல்வி உள்கட்டமைப்பை திறமையாகப் பயன்படுத்துதல் மற்றும் பத்தாம் வகுப்புக்குப் பிந்தைய பல்வேறு கல்வி வாய்ப்புகளை உருவாக்குதல் ஆகியவற்றில் தமிழகம் சிறந்து விளங்குகிறது.

இவ்வாறு, மாணவா்களின் முழுமையான வளா்ச்சியை நோக்கமாகக் கொண்டு தரமான கல்வி, எண்ம கல்வி உள்கட்டமைப்பு, அனைவரையும் உள்ளடக்கிய கல்வி, தொழில்நுட்பத் திறன் மேம்பாடு மற்றும் எதிா்காலத் தேவைகளுக்கேற்ற கற்றல் சூழலை உருவாக்கும் பணிகளில் தமிழக அரசு தொடா்ந்து மேற்கொண்டு வரும் முயற்சிகளுக்கு மத்திய அரசின் அறிக்கை வலுவான அங்கீகாரமாக அமைந்துள்ளது என அதில் தெரிவிக்கப்பட்டுள்ளது.