கல்விக்குயில்

அரசு ஊழியர்களுக்கு நாளையே இந்த மாத சம்பளம் வழங்கப்படும்; தமிழக அரசு.

2026-09-24T21:00:43.697+05:30

வங்கிகள் வேலைநிறுத்தம் காரணமாக, அரசு ஊழியர்களுக்கு முன்கூட்டியே இந்த மாத சம்பளம் வழங்கப்படும் என்று தமிழக அரசு அறிவித்துள்ளது.

5 நாள் வேலை நடைமுறை உள்பட பல்வேறு கோரிக்கைகளை வலியுறுத்தி அனைத்து வங்கி ஊழியர் சங்கங்கள் கூட்டமைப்பு சார்பில் வரும் 28ம் தேதி முதல் 30ம் தேதி வரை வங்கி அதிகாரிகள் மற்றும் ஊழியர்கள் வேலைநிறுத்தத்தை அறிவித்துள்ளனர். மேலும், 26 மற்றும் 27ம் தேதிகள் சனி மற்றும் ஞாயிற்றுக்கிழமை வருவதால், தொடர்ந்து 5 நாட்கள் வங்கிச் சேவைகள் பாதிக்கப்படும் நிலை உருவாகியுள்ளது.

இந்த நிலையில், வங்கிகள் வேலைநிறுத்தம் காரணமாக, அரசு ஊழியர்கள் பாதிக்கப்படாமல் இருக்க முன்கூட்டியே இந்த மாத சம்பளம் வழங்கப்படும் என்று தமிழக அரசு அறிவித்துள்ளது. அதாவது, நாளை (செப்.,25) அரசு ஊழியர்களுக்கு சம்பளம் வழங்குவதாக தமிழக அரசு அரசாணை வெளியிட்டுள்ளது.

ஏற்கனவே, மத்திய அரசு ஊழியர்கள் மற்றும் பென்ஷன்தாரர்களுக்கான தொகையை நாளை விடுவிக்கக்கோரி மத்திய நிதியமைச்சகம் உத்தரவை பிறப்பித்துள்ளது.

உதவி பேராசிரியர் தேர்வில் குளறுபடி: தேர்வர்கள் புகார்.

2026-09-24T06:56:25.039+05:30

ஆசிரியர் தேர்வு வாரியம் நடத்திய, உதவி பேராசிரியர் தேர்வில், பல்வேறு குளறுபடிகள் நடந்துள்ளன' என, தேர்வர்கள் குற்றஞ்சாட்டி உள்ளனர்.

கல்லுாரி உதவி பேராசிரியர்கள் தேர்வர்களின் கூட்டமைப்பு சார்பில், கவுரவ விரிவுரையாளர் வெண்ணிலா அளித்த பேட்டி:

தமிழ்நாடு ஆசிரியர் தேர்வு வாரியமான, டி.ஆர்.பி., சார்பில், 2,708 உதவி பேராசிரியர்களை நியமனம் செய்வதற்கான போட்டித் தேர்வு, கடந்த ஆண்டு, டிசம்பர் மாதம் நடத்தப்பட்டது.

இத்தேர்வை, 42 ஆயிரத்துக்கும் அதிகமானோர் எழுதினர். தேர்வில், பொது அறிவு பகுதியில், 300 வார்த்தைகளுக்குள் விடையளிக்க வேண்டும் என, வினா கேட்கப்பட்டது.

ஆனால், அதன் விடைக்குறிப்பு, 700 வார்த்தைக்கு வழங்கப்பட்டுள்ளது. விடைக்குறிப்பு அடிப்படையிலேயே, விடைத்தாள் திருத்தம் செய்யப்பட்டுள்ளது. அப்படி இருக்கும் போது, பலருக்கு அதில் மதிப்பெண் குறைக்கப்பட்டுள்ளது.

கல்லுாரி உதவி பேராசிரியர், பொது அறிவில் சிறந்தவர்களாக இருக்க வேண்டும் என்பதற்காகவே, விரிந்துரைக்கும் வகையில் வினா கேட்கப்பட்டது.

ஆனால், அதில், பூஜ்ஜியம் மதிப்பெண் பெற்றவர்களும், தகுதி உடையவர்களாக தேர்வு செய்யப்பட்டு உள்ளனர். இது, மிகப்பெரிய குளறுபடி. இது போல, ஆரம்பம் முதலேயே பல்வேறு குளறுபடிகள் நடந்துள்ளன. முதல்வர் விஜய், இவ்விவகாரத்தில் உரிய நடவடிக்கை எடுக்க வேண்டும்.

இவ்வாறு அவர் கூறினார்.

நீட் சீா்திருத்தம்: செப்டம்பா் இறுதியில் அறிக்கை சமா்ப்பிக்கும் உயா்நிலை பணிக் குழு: உச்சநீதிமன்றத்தில் மத்திய அரசு தகவல்.

2026-09-19T07:17:06.666+05:30

‘நீட் உள்ளிட்ட பொதுத் தோ்வுகள் சீா்திருத்தம் தொடா்பாக ஆராய அமைக்கப்பட்ட உயா்நிலை பணிக் குழு இந்த மாத இறுதியில் முதல் இடைக்கால அறிக்கையை சமா்ப்பிக்க வாய்ப்புள்ளது’ என்று உச்சநீதிமன்றத்தில் மத்திய அரசுத் தரப்பில் வெள்ளிக்கிழமை தெரிவிக்கப்பட்டது.

இளநிலை மருத்துவப் படிப்புகளுக்கான நீட், ஜேஇஇ முதல்நிலை தோ்வு, க்யூட் இளநிலை, முதுநிலை தோ்வுகள் உள்ளிட்டவை தேசிய தோ்வு முகமையால் (என்டிஏ) நடத்தப்படுகின்றன. கடந்த மே 3-ஆம் தேதி நடத்தப்பட்ட நீட் தோ்வு வினாத்தாள் முன்கூட்டியே வெளியானது பெரும் சா்ச்சையானது. அதைத் தொடா்ந்து, நாடு முழுவதும் 23 லட்சம் போ் எழுதிய நீட் தோ்வு ரத்து செய்யப்பட்டு, கடந்த ஜூன் 21-ஆம் தேதி மறுதோ்வு நடத்தப்பட்டது. தொடா்ந்து, என்டிஏ சாா்பில் நடத்தப்பட்ட உதவிப் பேராசிரியா் தகுதித் தோ்வு மற்றும் மத்திய அரசின் உதவித் தொகையுடன் ஆராய்ச்சிப் படிப்பை மேற்கொள்வதற்கான நெட் (தேசிய அளவிலான தகுதித் தோ்வு) தோ்விலும் குளறுபடிகள் நிகழ்ந்தன.

இதைத் தொடா்ந்து, தோ்வு நடைமுறைகளை வலுப்படுத்தவும், என்டிஏ அமைப்பை மறுசீரமைக்கவும் எதிா்க்கட்சிகள் தொடா்ந்து வலியுறுத்தின. நாடாளுமன்றத்திலும் எதிா்க்கட்சிகள் இந்தக் கோரிக்கைகளை முன்னிறுத்தி அமளியில் ஈடுபட்டதால், மழைக்கால கூட்டத் தொடா் முடங்கியது. கரப்பான் பூச்சி ஜனதா கட்சி (சிஜேபி) தலைமையில் மாணவா்கள் மற்றும் இளைஞா்கள் தில்லியில் தொடா் போராட்டத்தில் ஈடுபட்டனா். இதனால், மத்திய கல்வி அமைச்சராக இருந்த தா்மேந்திர பிரதான் பதவி விலகினாா்.

அதைத் தொடா்ந்து, என்டிஏ அமைப்பால் நடத்தப்படும் தோ்வுகளில் மேற்கொள்ள வேண்டிய சீா்திருத்தங்கள் குறித்து அரசுக்குப் பரிந்துரைகளை வழங்க நந்தன் நிலேகணி தலைமையில் இந்த உயா்நிலை பணிக் குழுவை மத்திய அரசு அமைத்தது. இதில், இஸ்ரோ முன்னாள் தலைவா் எஸ்.சோமநாத், புலனாய்வுத் துறை முன்னாள் இயக்குநா் தபன்குமாா் டேகா, சென்னை ஐஐடி இயக்குநா் வி.காமகோடி, கல்வித் துறை முன்னாள் செயலா் அனிதா கா்வால், தளவாடங்கள்-நிா்வாகத் துறை நிபுணா் அம்ருத்லால் மீனா ஆகியோா் உறுப்பினா்களாக இடம்பெற்றுள்ளனா்.

இதனிடையே, நீட் தோ்வு மற்றும் என்டிஏ சீா்திருத்தம் தொடா்பாக அகில இந்திய மருத்துவச் சங்கம் சாா்பில் தாக்கல் செய்யப்பட்ட மனு உள்பட பல்வேறு மனுக்கள் உச்சநீதிமன்ற நீதிபதிகள் பி.எஸ். நரசிம்மா, அலோக் ஆராதே ஆகியோா் அடங்கிய அமா்வில் வெள்ளிக்கிழமை விசாரணைக்கு வந்தன.

மனுக்களை விசாரித்த நீதிபதிகள், நீட் தோ்வு மற்றும் என்டிஏ சீா்திருத்தம் தொடா்பாக இதுவரை எடுக்கப்பட்ட நடவடிக்கைகள் தொடா்பாக பிரமாணப் பத்திரம் தாக்கல் செய்யுமாறு, நந்தன் நிலேகணி தலைமையிலான உயா்நிலை பணிக் குழுவுக்கு உதவிவரும் மத்திய பணியாளா் மற்றும் பயிற்சித் துறை இணைச் செயலரை அறிவுறுத்தினா்.

அப்போது மத்திய அரசுத் தரப்பில் ஆஜரான சொலிசிட்டா் ஜெனரல் துஷாா் மேத்தா, ‘உயா்நிலை பணிக் குழு பல்வேறு தரப்பினரிடம் கருத்துகள் மற்றும் ஆலோசனைகளைப் பெற்று ஆராய்ந்து வருகிறது. இஸ்ரோ முன்னாள் தலைவா் கே. ராதாகிருஷ்ணன் தலைமையில் அமைக்கப்பட்ட முந்தைய உயா்நிலைக் குழு உறுப்பினா்களுடனும், உயா்நிலை பணிக் குழு ஆலோசனை ஆலோசனை மேற்கொண்டுள்ளது. எனவே, இம் மாத இறுதியில் முதல் இடைக்கால அறிக்கையை உயா்நிலை பணிக் குழு சமா்ப்பிக்க வாய்ப்புள்ளது’ என்றாா்.

நேரில் ஆய்வு: இதைக் கேட்ட நீதிபதிகள், ‘நீட் தோ்வை நடத்துவதற்கான ஒட்டுமொத்த செயல்முறைகளையும் நிறுவனமயமாக்குவதற்கான முயற்சியை அரசு மேற்கொள்ள வேண்டும். அனைத்து செயல்முறைகளும் நிலைத்தன்மை உடையதாக இருப்பது முக்கியம். அதாவது, நிரந்தர அமைப்பு, நிரந்தரப் பணியாளா்கள், நிரந்தர செயல்பாட்டுப் பிரிவுகள் இருப்பது அவசியம். மிகக் குறைந்த எண்ணிக்கையிலேயே அயலகப் பணி அடிப்படையில் பணியாளா்கள் நியமிக்கப்பட வேண்டும். அப்போதுதான், நிரந்தர கட்டமைப்பு உருவாகும். தேசிய தோ்வுகள் முகமை (என்டிஏ) முதல் தோ்வு நடைமுறை வரை புதிய வசதிகளுடன் மேம்படுத்தப்படுவதைக் காண விரும்புகிறோம்.

குறிப்பாக, தில்லி மின்டோ சாலையில் உள்ள என்டிஏ அலுவலகத்துக்கு நீதிபதிகள் நேரில் சென்று என்டிஏ அமைப்பு எவ்வாறு செயல்படுகிறது என்பதைப் பாா்வையிட்டு, அதன் மனித வளம் மற்றும் பிற செயல்பாடுகளையும் ஆய்வு செய்வோம்’ என்றனா்.

அப்போது, ‘நீட் தோ்வை நடத்துவதற்கு நிரந்தரக் கட்டமைப்பு உறுதிப்படுத்தப்பட்டிருக்கிறது. அதே நேரம், மனிதவளத்தைப் பொருத்தவரை தற்போதைக்கு பகுதியாக உறுதிப்படுத்தப்பட்டுள்ளது’ என்று துஷாா் மேத்தா குறிப்பிட்டாா்.

அதைத் தொடா்ந்து விசாரணையை நீதிபதிகள் ஒத்திவைத்தனா்.

மாணவியருக்கு பாலியல் தொல்லை; அரசு பள்ளி ஆசிரியர் 'போக்சோ' வில் கைது.

2026-09-19T07:14:04.551+05:30

மாணவியருக்கு பாலியல் தொந்தரவு கொடுத்த, ஓவிய ஆசிரியரை போக்சோ சட்டத்தின் கீழ், உடுமலை மகளிர் போலீசார் கைது செய்து, சிறையில் அடைத்தனர்.

திருப்பூர் மாவட்டம், மடத்துக்குளம் தாலுகாவில் உள்ள ஒரு அரசு மேல்நிலைப்பள்ளியில், திருப்பூர் மாவட்ட குழந்தைகள் பாதுகாப்பு அலகு சார்பில், கடந்த, ஜூன் மாதம், பாலியல் புகார்கள் குறித்த விழிப்புணர்வு கூட்டம் நடந்துள்ளது. அதில், அங்கு பயிலும் மாணவியர், ஓவிய ஆசிரியர் மதன் குமார், பாலியல் தொல்லை கொடுப்பதாக தெரிவித்துள்ளனர்.

அப்போது, தலைமையாசிரியர், அவரிடம் மன்னிப்பு கடிதம் எழுதி வாங்கியுள்ளார். இந்நிலையில், கடந்த, 10ம் தேதி நடந்த வகுப்பு கூட்டத்தின் போது, மாணவியர், மீண்டும் சம்பந்தப்பட்ட ஓவிய ஆசிரியர், பாலியல் தொல்லை தருவதாக தெரிவித்துள்ளனர்.

இது குறித்து தலைமை ஆசிரியர் மாரியப்பன், மாவட்ட முதன்மை கல்வி அலுவலருக்கு புகார் தெரிவித்தார். இது தொடர்பாக, 15ம் தேதி, குழந்தைகள் பாதுகாப்பு அலுவலர்கள், சிறப்பு சிறார் காவல் அலகு அலுவலர்கள், பள்ளிக்கு நேரில் வந்து, மாணவியரிடம் தனித்தனியாக விசாரணை நடத்தினர்.

அதில், ஓவிய ஆசிரியர் மதன்குமார், மாணவியருக்கு பாலியல் தொல்லை அளித்தது உறுதி செய்யப்பட்டது. இதனையடுத்து, தலைமை ஆசிரியர் மற்றும் சிறப்பு குழுவினர் அளித்த புகாரின் பேரில், உடுமலை அனைத்து மகளிர் போலீசார் வழக்குப்பதிவு செய்து, ஓவிய ஆசிரியர் மதன்குமாரை கைது செய்து சிறையில் அடைத்தனர்.

வேளாண் பல்கலை.யில் முனைவர் படிப்பு சேர்க்கை தொடக்கம்.

2026-09-19T07:12:16.663+05:30

கோவையில் உள்ள வேளாண்மைப் பல்கலைக்கழகம் வெளியிட்டுள்ள செய்திக்குறிப்பு: வேளாண்மைப் பல்கலைக்கழகம் வேளாண்மை, தோட்டக்கலை, வேளாண் பொறியியல், வனவியல், வேளாண் உயிரித் தொழில்நுட்பம், சமூக அறிவியல், உணவுத் தொழில்நுட்பம், வேளாண் வணிகம், சுற்றுச்சூழல் அறிவியல் மற்றும் வேளாண் அறிவியலின் பிறதுறைகள் உள்ளிட்ட 30 பிரிவு களில் முனைவர் பட்டப்படிப்பை வழங்குகிறது.

இதன்படி 2026–27 கல்வியாண்டுக்கான இணையவழி மாணவர் சேர்க்கை விண்ணப்பப் பதிவு தொடங்கியுள்ளது. தகுதியுடைய விண்ணப்பதாரர்கள் https:/admissionsatpgschool.tnau.ac.in/ இணையதளம் மூலம் அக்.23க்குள் விண்ணப்பிக்கலாம்.கூடுதல் விவரங்களை pgadmission@tnau.ac.in மின்னஞ்சல் மூலமும் 94890 56710 என்ற செல்போன் எண்ணிலும் தொடர்பு கொள்ளலாம்.

2027-ஆம் ஆண்டுக்கான சிபிஎஸ்இ 10, 12ஆம் வகுப்புத் தேர்வு அட்டவணை எப்போது?

2026-09-18T07:50:31.104+05:30

சிபிஎஸ்இ பாடத்திட்டத்தின் கீழ், 2026 - 27ஆம் கல்வியாண்டில் 10 மற்றும் 12ஆம் வகுப்புப் பயிலும் மாணவர்களுக்கான தேர்வு அட்டவணைகள் விரைவில் வெளியாகும் என எதிர்பார்க்கப்படுகிறது.

வழக்கமாக செப்டம்பர் மாத இறுதி வாரத்தில், தேர்வு அட்டவணை தேதிகளை சிபிஎஸ்இ நிர்வாகம் வெளியிடும், பிறகு அக்டோபர் - நவம்பரில் இறுதி அட்டவணை வெளியிடப்படும் என்பதால், மாணவர்கள், பெற்றோர் மத்தியில் தற்போது எதிர்பார்ப்பு அதிகரித்துள்ளது

இது குறித்த அதிகாரப்பூர்வ தகவல்களுக்கு cbse.gov.in என்ற இணையதளத்தில், மாணவர்கள், பெற்றோர், ஆசிரியர்கள் சரிபார்த்துக் கொள்ள அறிவுறுத்தப்பட்டுள்ளது.

இதுவரை அதிகாரப்பூர்வ தகவல்கள் எதுவும் வெளியிடப்படவில்லை. அதனால், அட்டவணை வெளியானதாக வரும் தகவல்களை நம்ப வேண்டாம் என்றும் கேட்டுக் கொள்ளப்பட்டுள்ளது.

வழக்கமாக 2027ஆம் ஆண்டு பிப்ரவரி மாதத்தில் தொடங்கி மார்ச் மாதம் வரை பத்து மற்றும் 12-ஆம் வகுப்புப் பொதுத் தேர்வுகள் நடைபெறலாம் என எதிர்பார்க்கப்படுகிறது.

முதலில், உத்தேச பட்டியல் வெளியாகும். அதில், தேர்வு நடைபெறும் நேரம், செயல்முறைத் தேர்வுகள் குறித்த விவரங்கள் வெளியாகும். பிறகே, தேர்வு அட்டவணை வெளியாகும். அனைத்துமே அதிகாரப்பூர்வ இணையதளத்தில்தான் வெளியிடப்படும்.

வரும் 2027 ஆம் ஆண்டில் 10 மற்றும் 12ஆம் வகுப்பில் மொத்தமுள்ள 204 பாடங்களுக்கு நடைபெறும் பொதுத் தேர்வை, சுமார் 45 லட்சம் மாணவர்கள் எழுதவிருக்கிறார்கள்.

ஜேஇஇ, நெட் தோ்வுத் தேதி வெளியீடு.

2026-09-18T07:48:42.814+05:30

ஜேஇஇ முதன்மை, யுஜிசி நெட் மற்றும் க்யூட் பிஜி உள்ளிட்ட தோ்வுகள் நடைபெறும் தேதியை தேசிய தோ்வு முகமை (என்டிஏ) வியாழக்கிழமை வெளியிட்டது.

அதன்படி நிகழாண்டு டிசம்பா் முதல் அடுத்தாண்டு மாா்ச் வரையில் ஒட்டுமொத்தமாக 14 தோ்வுகள் நடைபெறவுள்ளன. இது தற்காலிக தோ்வு அட்டவணை எனவும் நிா்வாக அல்லது எதிா்பாரா சூழல்களுக்கேற்ப மாற்றங்கள் மேற்கொள்ள வாய்ப்புள்ளதாகவும் மூத்த அதிகாரி ஒருவா் தெரிவித்தாா்.

இதுதொடா்பாக என்டிஏ வெளியிட்ட செய்திக் குறிப்பில், ‘பொறியியல் பட்டப்படிப்புகளுக்கான ஜேஇஇ முதன்மை நுழைவுத் தோ்வு 2027, ஜனவரி 22-24 மற்றும் ஜனவரி 28-30 வரை நடைபெறவுள்ளது. ஏதேனும் எதிா்பாரா சூழலால் ஜேஇஇ முதன்மைத் தோ்வில் இடையூறுகள் ஏற்பட்டால் மாற்றுத் தேதியாக ஜனவரி 31-அறிவிக்கப்படுகிறது.

யுஜிசி நெட் தோ்வு நிகழாண்டு டிசம்பா் 14-19-ஆம் தேதிக்குள் நடத்தப்படும். இடையூறுகள் ஏற்பட்டால் மாற்றுத் தேதியாக டிசம்பா் 20 மற்றும் 21 அறிவிக்கப்படுகிறது. சிஎஸ்ஐஆா் யுஜிசி நெட் தோ்வு டிசம்பா் 20-21 ஆகிய தேதிகளில் நடைபெறும்.

க்யூட் பிஜி தோ்வு மாா்ச் 1-5, மாா்ச் 8, மாா்ச் 12-20 மற்றும் மாா்ச் 24-25 ஆகிய தேதிகளில் நடைபெறும். மாற்றுத் தேதியாக மாா்ச் 30, 31 அறிவிக்கப்படுகிறது.

இதுதவிர 2026, டிசம்பா் தொடங்கி 2027 மாா்ச் வரை சிமேட் தோ்வு, ராஷ்ட்ரீய இந்திய நுழைவுத் தோ்வு, ராஷ்ட்ரீய ராணுவப் பள்ளிகள் தோ்வு, ஸ்வயம் தோ்வு, அகில இந்திய சைனிக் பள்ளிகள் நுழைவுத் தோ்வு உள்ளிட்ட தோ்வுகள் நடைபெறவுள்ளன’ எனத் தெரிவிக்கப்பட்டது.

6-ஆம் வகுப்பில் மும்மொழிக் கொள்கை: அடுத்த ஆண்டு முதல் அமல்படுத்த உச்சநீதிமன்றம் அறிவுறுத்தல்.

2026-09-18T07:47:01.610+05:30

அடுத்த கல்வியாண்டு முதல் 6-ஆம் வகுப்பில் மும்மொழிக் கொள்கையை அமல்படுத்துவது குறித்து பரிசீலிக்குமாறு சிபிஎஸ்இக்கு உச்சநீதிமன்றம் வியாழக்கிழமை அறிவுறுத்தியது.

சிபிஎஸ்இ பள்ளிகளில் 9-ஆம் வகுப்பில் ஜூலை 1 முதல் மும்மொழி பாடத் திட்டத்தைக் கட்டாயமாக்கி மத்திய இடைநிலைக் கல்வி வாரியம் (சிபிஎஸ்இ) அண்மையில் சுற்றறிக்கை வெளியிட்டது.

தேசிய கல்விக் கொள்கை-2020 மற்றும் தேசிய பள்ளிக் கல்வி பாட செயல்திட்டம்-2023 ஆகியவற்றின் ஒரு பகுதியாக, சிபிஎஸ்இ இந்த நடவடிக்கையை மேற்கொண்டது.

அதன்படி, மூன்று மொழிகளில், இரண்டு இந்திய மொழிகளை மாணவா்கள் தோ்வு செய்ய வேண்டும். வெளிநாட்டு மொழியை மூன்றாவது மொழியாகத் தோ்வு செய்யலாம். 10-ஆம் வகுப்பை பொருத்தவரை, மாணவா்கள் மீதான அழுத்தத்தைக் குறைக்கவும், கற்றலில் கவனத்தை நிலைநாட்டவும் மூன்றாவது மொழிக்கு பொதுத் தோ்வு நடத்தப்பட மாட்டாது.

மூன்றாவது மொழிக்கான மதிப்பீடு, முற்றிலும் பள்ளிகள் அளவிலும், அக மதிப்பீடாகவும் மேற்கொள்ளப்படும் என்று குறிப்பிட்டது. இதற்கு எதிராக தாக்கல் செய்யப்பட்ட மனுக்களை உச்சநீதிமன்றம் விசாரித்து வருகிறது.

இதன் தொடா்ச்சியாக உச்சநீதிமன்ற தலைமை நீதிபதி சூா்ய காந்த், நீதிபதிகள் ஜயமால்ய பாக்சி மற்றும் வி.மோகனா ஆகியோா் அடங்கிய நீதிபதிகள் அமா்வு வியாழக்கிழமை விசாரணை மேற்கொண்டது.

அப்போது, ‘குழந்தைகளின் நலன் கருதி, அடுத்த கல்வியாண்டு முதல் 6-ஆம் வகுப்பில் மும்மொழிக் கொள்கையை அறிமுகப்படுத்துவது குறித்து சிபிஎஸ்இ பரிசீலிக்கலாம்.

அதேசமயம் நிகழாண்டு 6-ஆம் வகுப்புப் பயிலும் மாணவா்கள் மூன்று மொழிகளை கற்க விரும்பினால் அவா்களுக்கான வாய்ப்புகளை ஏற்படுத்தித் தரலாம்’ என நீதிபதிகள் அமா்வு தெரிவித்தது.

குழு அமைப்பு: நீதிபதிகளின் அறிவுறுத்தல்களை பரிசீலிப்பதாக கூறி சிபிஎஸ்இ தரப்பில் ஆஜரான கூடுதல் சொலிசிட்டா் ஜெனரல் ஐஸ்வா்யா பாட்டி வாதிடுகையில், ‘சிபிஎஸ்இ பள்ளிகளில் 6-ஆம் வகுப்பு முதல் 10-ஆம் வகுப்பு வரை மும்மொழிக் கொள்கையை அமல்படுத்துவதை கண்காணிக்க செப்டம்பா் 16-ஆம் தேதி குழு அமைக்கப்பட்டது.

மத்திய கல்வி அமைச்சகத்தின் கீழ் செயல்படும் பள்ளிக் கல்வி மற்றும் எழுத்தறிவுத் துறையின் இயக்குநா் பகவதி பிரசாத் கலால் தலைமையிலான இந்தக் குழுவில் என்சிஇஆா்டி செயலா் ராஜீவ் குமாா், சிபிஎஸ்இ இயக்குநா் (கல்வி) பிரக்யா எம் சிங், கேந்திரிய வித்யாலயா பள்ளிகள் அமைப்பின் கூடுதல் ஆணையா் (கல்வி) சந்தனா மண்டல், நவோதயா வித்யாலயா பள்ளிகள் அமைப்பின் துணை ஆணையா் சோம்வீா் பூனியா ஆகியோா் உறுப்பினா்களாக நியமிக்கப்பட்டுள்ளனா்.

இக்குழு மொழிப் பாடங்களுக்கான தகுதிவாய்ந்த ஆசிரியா்களின் எண்ணிக்கை, பள்ளிப் பாடபுத்தகங்கள் கையிருப்பு, எண்ம மற்றும் பிற கற்றல் தளங்கள் உள்பட மும்மொழிக் கொள்கை அமலாக்கத்தில் ஏற்படும் பிரச்னைகளை கண்டறிந்து அதற்கான தீா்வுகளை பரிந்துரைக்கவுள்ளது’ என்றாா். இதையடுத்து, விசாரணையை செப்டம்பா் 23-ஆம் தேதிக்கு நீதிபதிகள் அமா்வு ஒத்திவைத்தது.

நவோதயா பள்ளிகளுக்கான இடங்களை 3 மாதங்களுக்குள் அடையாளம் காண வேண்டும்: தமிழக அரசுக்கு உச்ச நீதிமன்றம் உத்தரவு.

2026-09-18T07:41:47.979+05:30

நவோதயா பள்ளிகளை நிறுவுவதற்கான இடங்களை 3 மாதங்களுக்குள் தமிழக அரசு அடையாளம் காண உத்தரவிட்ட உச்ச நீதிமன்றம், மாநிலத்தில் அரசு மாறியுள்ளதால் மனநிலையிலும் மாற்றத்தை எதிர்பார்ப்பதாக தெரிவித்துள்ளது.

தமிழகத்தில் ஜவகர் நவோதயா வித்யாலயா பள்ளியை நிறுவ வேண்டும் என்ற உத்தரவை எதிர்த்து தமிழக அரசு தொடர்ந்த மேல்முறையீட்டு மனு உச்ச நீதிமன்றத்தில் நீதிபதிகள் பி.வி.நாகரத்னா, அகஸ்டின் ஜார்ஜ் மாசிஹ் ஆகியோர் அடங்கிய அமர்வில் மீண்டும் விசாரணைக்கு வந்தது. அப்போது நடந்த வாதம்:

நீதிபதிகள்: நவோதயா பள்ளிகளுக்கான இடத்தை அடையாளம் காண பிறப்பித்த உத்தரவை ஏன் செயல்படுத்தவில்லை? நவோதயா பள்ளிகளை தமிழகத்தில் அமைப்பதில் இருக்கும் சிக்கல் என்ன? எதற்காக அதை எதிர்க்கிறீர்கள்?

தமிழக அரசு தரப்பு மூத்த வழக்கறிஞர் ஜெய்தீப் குப்தா: எந்த மாநிலத்தில் போதிய பள்ளி கட்டமைப்புகள் இல்லையோ அந்த மாநிலத்தில் நவோதயா பள்ளிகளை நிறுவலாம், தமிழகத்தில் பள்ளி கட்டமைப்புகள் மிகவும் சிறப்பாக உள்ளன. கிராமப்புற மாணவர்களுக்கும் சிறந்த கல்வி வழங்கப்படுகிறது ஏற்கெனவே சிறந்த கட்டமைப்பை கொண்ட தமிழகத்துக்கு நவோதயா பள்ளிகள் தேவையில்லை என்பதே அரசின் நிலைப்பாடு. மேலும் நவோதயா பள்ளிகள் மும்மொழி கொள்கையை பின்பற்றுபவை என்பதால், அது தமிழகத்தின் இரு மொழி கொள்கைக்கு முரணானது. கல்வி பொதுப்பட்டியலில் உள்ளதால் அதில் மாற்றம் கொண்டு வர அழுத்தம் கொடுக்க முடியாது.

நீதிபதிகள்: இது மாநிலம் தனி வழியில்தான் பயணிக்கும் என்று கூறுவதாக உள்ளது, மொழிதான் பிரச்சினை என்றால் இந்திக்கு பதிலாக வேறு ஒரு மொழியை பயிற்றுவிக்கலாமே, நவோதயா பள்ளிகள் விவகாரத்தில் தமிழக அரசு தனது மனநிலையை மாற்றிக் கொள்ள வேண்டும்.

தமிழக அரசு தரப்பு வழக்கறிஞர்: இந்தியா கூட்டாட்சி தத்துவத்தில் இயங்கக்கூடிய நாடு, எனவே ஒரு விஷயத்தை எங்கள் மீது திணிக்க வேண்டும் என்ற நோக்கில் செயல்படக் கூடாது.

மத்திய அரசின் கூடுதல் சொலிசிட்டர் ஜெனரல் நட்ராஜ்: மொழிக் கொள்கையை பொறுத்தவரை அமர்ந்து பேசினாலே தீர்வு காண முடியும், இந்தி அல்லது வேறு மொழியைக்கூட மூன்றாவது மொழியாக எடுத்துக் கொள்ளலாம் என்பதுதான் புதிய கல்விக் கொள்கையின் சாராம்சம்.

தமிழக அரசு தரப்பு வழக்கறிஞர்: மத்திய அரசு மும்மொழிக் கொள்கையை தீவிரமாக பற்றி கொண்டுள்ளது, இந்தியை திணிப்பது தான் அவர்களுடைய நோக்கமாக இருக்கிறது. மும்மொழிக் கொள்கையை ஏற்காததால் தமிழகத்துக்கு வழங்க வேண்டிய ரூ.5,000 கோடிக்கு மேலான கல்வி நிதியை மத்திய அரசு இதுவரை விடுவிக்காமல் அழுத்தம் கொடுத்து வருகிறது.இவ்வாறு வாதம் நடந்தது.

இதைத் தொடர்ந்து நீதிபதிகள் கூறியதாவது: தமிழகத்தில் புதிய அரசு மாறியுள்ளது, அதனால் அதன் மனநிலையிலும் சில மாற்றத்தை எதிர்பார்க்கிறோம், எனவே, நவோதயா பள்ளிகள் அமைப்பதற்கான நிலத்தை முதலில் அடையாளம் காணுங்கள் பிற பிரச்சினைகளை நாம் ஒவ்வொன்றாக பேசித் தீர்த்துக் கொள்ளலாம். தமிழக அரசு கல்விக்கு எவ்வளவு முக்கியத்துவம் கொடுக்கிறது, எவ்வளவு செலவு செய்கிறது என்பது தெரியும். அதற்காக மிகப்பெரும் பாராட்டுக்களை தெரிவித்துக் கொள்கிறோம்.

மத்திய அரசின் கொள்கையை ஏற்றுக்கொள்வதால் அவர்களிடம் சரணடைந்து விட்டோம் என்று அர்த்தம் கிடையாது, தமிழகத்தில் நவோதயா பள்ளிகளை நிறுவுவதற்காக நிலங்களை அடையாளம் காண ஏற்கெனவே பிறப்பிக்கப்பட்ட உத்தரவை மாநில அரசு செயல்படுத்த வேண்டும், இதற்காக 3 மாத கால அவகாசம் வழங்குகிறோம்.

மேலும், நவோதயா பள்ளிகளை நிறுவுவதில் உள்ள முரண்பாடுகளை களைய, மத்திய அரசு மற்றும் தமிழக அரசின் உயர்மட்ட அதிகாரிகள் இணைந்து பேச்சுவார்த்தை நடத்தி முடிவெடுக்க வேண்டும். மாநில அரசின் கொள்கையின் அடிப்படையிலும், கூட்டாட்சி தத்துவத்துக்கு மதிப்பளித்தும் இந்த பேச்சு வார்த்தை அமைய வேண்டும்.

இந்த பேச்சுவார்த்தையின்போது நிறுத்தி வைக்கப்பட்டுள்ள தமிழகத்தின் கல்வி நிதி ரூ.5,000 கோடி குறித்தும் விவாதித்து தீர்வு காண வேண்டும். இவ்வாறு உத்தரவிட்ட நீதிபதிகள், விசாரணையை டிசம்பர் 14-ம் தேதிக்கு தள்ளிவைத்தனர்.

18 ஆண்டுகளுக்கும் குறைவாக பணியாற்றிய அரசு ஊழியா்களுக்கான இடைக்கால தொகை: தமிழக அரசு விளக்கம்.

2026-09-16T21:32:00.266+05:30

18 ஆண்டுகளுக்கும் குறைவாகப் பணியாற்றிய அரசு ஊழியா்களுக்கு இடைக்கால மாதாந்திர தொகை வழங்குவதில் புதிய விளக்கத்தை தமிழக அரசு வெளியிட்டுள்ளது.

இதுகுறித்து அரசு கருவூலம் மற்றும் கணக்குகள் துறை இயக்குநருக்கு நிதித் துறைச் செயலா் (செலவினம்) வெங்கடேஷ் அனுப்பிய கடிதத்தில் கூறப்பட்டுள்ளதாவது: 10 ஆண்டுகளுக்குமேல், ஆனால் 18 ஆண்டுகளுக்கு குறைவான தகுதியான பணிக் காலத்துடன் ஓய்வு பெறும் தகுதியுள்ள அரசு ஊழியா்களுக்கு, கடைசியாகப் பெற்ற மாதாந்திர அடிப்படை ஊதியத்தில் 30 சதவீதம் என்ற அளவில் இடைக்கால மாதாந்திரத் தொகையை அனுமதிப்பது, அவா்களின் பணிக் காலத்தின் அடிப்படையில் அனுமதிக்கத்தக்க தொகையைவிட இடைக்காலத் தொகை அதிகமாக இருக்க வழிவகுக்கும் என்று அரசின் கவனத்திற்கு கொண்டு வரப்பட்டுள்ளதால் இந்த அறிவுறுத்தல்கள் வழங்கப்பட்டுள்ளன.

அதன்படி, இடைக்கால மாதாந்திரத் தொகையாக நிலையான தொகையான ரூ.10,000 மற்றும் அதனுடன் பொருந்தக்கூடிய அகவிலைப்படியும் அனுமதிக்கப்படும்.

உறுதியளிக்கப்பட்ட ஓய்வூதியத் திட்டம் (டாப்ஸ்) விதிகள் மற்றும் நடைமுறைகள் அறிவிக்கப்பட்ட பிறகு, தகுதியான பணிக் காலத்தின் அடிப்படையில் ஒவ்வொருவருக்கும் உண்மையான அனுமதிக்கத்தக்க தொகை கணக்கிடப்பட்டு, அதில் வரும் வித்தியாசம், நிலுவைத் தொகையாக வழங்கப்படும்.

18 ஆண்டுகள் மற்றும் அதற்கு மேற்பட்ட பணிக் காலம் கொண்ட ஓய்வு பெற்ற அரசு ஊழியா்களுக்கு, கடைசியாகப் பெற்ற மாதாந்திர அடிப்படை ஊதியத்தில் 30 சதவீதம் அல்லது ரூ.10,000 என்பதில், எது அதிகமோ அந்தத் தொகையுடன் பொருந்தக்கூடிய அகவிலைப்படியும் சோ்த்து இடைக்காலத் தொகையாக தொடா்ந்து அனுமதிக்கப்படும்.

மேலும், அகவிலைப்படி உள்பட வழங்கப்பட்ட அதிகப்படியான தொகை, இந்த மாதம் முதல் இடைக்காலத் தொகை அல்லது இடைக்கால குடும்பத் தொகையிலிருந்து 10 சம தவணைகளில் திரும்பப் பெறப்படும் என்று தெரிவிக்கப்பட்டுள்ளது.

நீட் தேர்வு பயிற்சி அளிக்க நிறுவனங்களுக்கு அழைப்பு.

2026-09-16T21:30:24.882+05:30

சமூக நீதி துறையின் கீழ் செயல்படும், ஆதி திராவிடர் மற்றும் பழங்குடியினர் நலப் பள்ளிகளில், பிளஸ் 1 மற்றும் பிளஸ் 2 வகுப்பு மாணவர்களுக்கு, நீட், ஜே.இ.இ., 'க்யூட்' உள்ளிட்ட பல்வேறு உயர் கல்வி நுழைவுத் தேர்வுக்கான சிறப்பு பயிற்சிகள் வழங்கப்படுகின்றன.

போட்டித் தேர்வுகளுக்கான சிறப்புப் பயிற்சி மற்றும் வழிகாட்டுதல் வழங்குவதற்காக, தகுதியுடைய முன்னணி பயிற்சி நிறுவனங்கள், தங்களின் விருப்பங்களை தெரிவிக்கலாம் என, தமிழ்நாடு பழங்குடியினர் நல இயக்குநரகம் அழைப்பு விடுத்துள்ளது.

மேலும் தகவல்களுக்கு, https://www.tntribalwelfare.tn.gov.in/ என்ற இணையதளத்திலோ அல்லது 72007 38258, 73739 44312, 73388 01434 உள்ளிட்ட மொபைல் போன் எண்களிலோ தொடர்பு கொள்ளலாம் என தெரிவிக்கப்பட்டுள்ளது.

30 மாணவர்களுக்கும் குறைவாக 14,829 அரசு துவக்க பள்ளிகள்; தமிழகத்தை அதிர வைக்கும் சேர்க்கை சரிவு.

2026-09-16T21:28:48.723+05:30

தமிழகத்தில், 14 ஆயிரத்து 829 அரசு தொடக்கப் பள்ளிகளில், 30க்கும் குறைவான மாணவர்களே படித்து வரும் அதிர்ச்சி தகவல் வெளியாகி உள்ளது.

தமிழகத்தில், 24 ஆயிரத்து 349 அரசு தொடக்கப் பள்ளிகளில், 9 லட்சத்து 45 ஆயிரத்து 971 மாணவ, மாணவியர் படிக்கின்றனர். ஆண்டுதோறும் அரசு பள்ளிகளில் மாணவர் சேர்க்கை சரிந்து வருகிறது. மாணவர் சேர்க்கை இன்றி, இந்தாண்டு, 246 அரசு தொடக்கப்பள்ளிகள் மூடப்பட்டுவிட்டன.

வசதிகள் குறைவு

மேலும், 10 மாணவர்களுக்கு கீழ் படிக்கும் 3,027 பள்ளி, 20 மாணவர்களுக்கு கீழ் 6,635 பள்ளி, 30 மாணவர்களுக்கு கீழ், 5,167 பள்ளி என, மொத்தம், 14 ஆயிரத்து 829 பள்ளிகள் உள்ளன. இதன்படி, தமிழகத்தில், 60.90 சதவீத பள்ளிகளில், 30க்கும் குறைவான மாணவர்களே படிக்கின்றனர் என்ற தகவல் அதிர்ச்சியை ஏற்படுத்தி உள்ளது.

கல்வியாளர்கள் கூறியதாவது:

அரசு பள்ளிகளில் ஆங்கில வழிக்கல்வி இருந்தாலும், சில பெற்றோரிடம் தனியார் பள்ளியே சிறந்தது என்ற எண்ணம் உள்ளது. பல அரசு பள்ளிகளில் கட்டடம், கழிப்பறை, ஆய்வகம், விளையாட்டு மைதானம், ஸ்மார்ட் வகுப்பறை போன்ற வசதிகள் குறைவாக உள்ளன.

கட்டாய கல்வி உரிமை சட்டத்தின்படி, 30 மாணவர்களுக்கு ஒரு ஆசிரியர் இருந்தால் போதுமானது. இதன்படி, 30 மாணவர்களுக்கும் கீழ் உள்ள பள்ளிகளில், தலைமையாசிரியர், ஒரு ஆசிரியர், 10க்கும் கீழ் உள்ள பள்ளிகளில் தலைமையாசிரியர் மட்டுமே பணியில் உள்ளனர். இவர்களே, அனைத்து வகுப்புகளுக்கும் பாடம் நடத்த வேண்டி உள்ளதால், மாணவர்களின் கல்வி பாதிக்கப்படுகிறது.

அபாயம்

பெரும்பாலான அரசு தொடக்கப் பள்ளிகளில் எல்.கே.ஜி., யு.கே.ஜி., வகுப்புகள் இல்லாததால், பெற்றோர் ஆரம்பத்திலேயே தனியார் பள்ளிகளை நாடுகின்றனர்.

அரசு பள்ளிகளில் சேர்க்கையை அதிகப்படுத்த, மருத்துவ, தொழில் படிப்புகளுக்கான சேர்க்கையில் அரசு பள்ளி மாணவர்களுக்கு, 7.5 சதவீத இட ஒதுக்கீடு, அரசு பள்ளிகளில் 6ம் வகுப்பு முதல் பிளஸ் 2 வரை படிக்கும் மாணவர்கள் உயர்கல்வி பெற மாதம், 1,000 ரூபாய் ஊக்கத்தொகை உட்பட பல சலுகைகள் வழங்கப்பட்டன.

இருப்பினும், அரசு பள்ளிகளில் மாணவர்களின் எண்ணிக்கை, ஒவ்வொரு ஆண்டும் குறைந்து வருவதால், ஆசிரியர் தகுதி தேர்வில் தேர்ச்சி பெற்று காத்திருப்பவர்களுக்கு, அரசு வேலை பறிபோகும் அபாயம் உள்ளது.

இவ்வாறு அவர்கள் கூறினர்.

சென்னை பல்கலை பிஎச்.டி., ஆய்வறிக்கை விவகாரம்; அதிகாரம் பகிர்ந்தளிப்பதால் மாணவர்கள் அச்சம்.

2026-09-16T07:27:34.482+05:30

சென்னை பல்கலை பிஎச்.டி., ஆய்வறிக்கை கையெழுத்திடும் விவகாரத்தில் உயர் கல்வித்துறையின் நடவடிக்கை எதிர்காலத்தில் சிக்கல்களை ஏற்படுத்துமோ என்ற அச்சம் மாணவர்கள் மத்தியில் எழுந்துள்ளது.

நுாற்றாண்டு பழமையான பல்கலைகளில் ஒன்றான, சென்னை பல்கலையில் பல்வேறு மாநிலங்களை சேர்ந்த மாணவர்கள், பிஎச்.டி., எனும் ஆராய்ச்சி படிப்பை பயின்று வருகின்றனர்.

மாணவர்களின் ஆய்வு அறிக்கை, உள்நாடு மற்றும் வெளிநாடு அறிவியல் வல்லுநர்கள் பார்வைக்கு அனுப்பப்படும். இந்த வல்லுநர்களின் பெயர்களில், 12 பேரின் பெயரை, மாணவரின் வழிகாட்டியே, பல்கலையிடம் சமர்ப்பார். அதில், 3 பேரின் பெயரை பல்கலை தேர்வு செய்து, ஆய்வறிக்கையை, சம்பந்தப்பட்ட வல்லுநர்களுக்கு அனுப்பும்.

சென்னை பல்கலையில், துணைவேந்தர் பதவி காலியாக இருப்பதால், துணைவேந்தர் ஒருங்கிணைப்பு குழுவில் உள்ள 3 பேர், அதற்கு கையெழுத்திட வேண்டிய நிலை இருந்தது.

அதே போல், வல்லுநர் குழுவுக்கு அனுப்பப்பட்டு, இறுதி செய்யப்பட்ட மாணவர்களின் ஆய்வறிக்கையின்படி, அவர்களுக்கு முனைவர் பட்டம் வழங்குவதற்கான கோப்புகளும் துணைவேந்தர் ஒருங்கிணைப்பு குழுவிடம், 320 கோப்புகள் தேக்கம் அடைந்து இருந்தன.

இது குறித்து, நம் நாளிதழில், கடந்த மாதம் செய்தி வெளியானது. அதன் எதிரொலியாக, பிஎச்.டி., படிக்கும் மாணவர்களின் ஆய்வறிக்கை தொடர்பான கோப்புகளுக்கு, கையெழுத்திடும் அதிகாரம், ஆராய்ச்சி துறை வல்லுநர்களுக்கு வழங்கப்பட்டு, அந்த பிரச்னைக்கு தீர்வு காணப்பட்டது. இந்நிலையில் இந்த நடைமுறை சரிதானா என, மாணவர்கள் தரப்பில் கேள்வி எழுந்துள்ளது.

இது குறித்து, மாணவர்கள் கூறியதாவது:

ஒரு மாணவரின் பட்டப்படிப்பு சான்றிதழுக்கும், பிஎச்.டி., ஆய்வறிக்கைக்கும், துணை வேந்தரின் ஒப்புதல் அவசியம். துணை வேந்தர் இல்லாததால், இந்த பணிகளை துணை வேந்தர் ஒருங்கிணைப்பு குழு மேற்கொண்டு வருகிறது. ஆனால், சென்னை பல்கலையில் படிக்கும் பிஎச்.டி., மாணவர்களின் ஆய்வறிக்கை சார்ந்த கோப்புகளுக்கு கையெழுத்திடும் அதிகாரம், ஆராய்ச்சி துறை வல்லுநர்களுக்கு வழங்கப்பட்டுள்ள பல்கலை விதிகளுக்கு எதிரானதாக உள்ளது.

எதிர்காலத்தில் இந்த ஆய்வறிக்கைக்கான அங்கீகாரம் கிடைக்குமா என்ற கேள்வியும் எழுகிறது. பேராசிரியர்கள், பிரச்னை இல்லை என தெரிவித்தாலும், எதிர்காலத்தில் பாதிப்பு ஏற்படுமோ என்ற அச்சம் உள்ளது. சரியான நேரத்தில் உயர் கல்வித்துறை செயலர் உள்ளிட்ட அதிகாரிகள் ஆய்வறிக்கைகள் சார்ந்த கோப்புகளுக்கு கையெழுத்திட்டிருந்தால், இந்த சிக்கல்கள் ஏற்பட்டிருக்காது. உயர் கல்வித்துறை அதிகாரிகள் தங்களுடைய அதிகாரத்தை பிரித்து கொடுத்து, எங்களுக்கு அச்சத்தை ஏற்படுத்தி உள்ளனர். உயர் கல்வித்துறை இந்த விவகாரத்தில், எங்களுக்கு உறுதி அளிக்க வேண்டும்.

இவ்வாறு அவர்கள் கூறினர்.

பிஎட், எம்எட் மாணவர் சேர்க்கைக்கு விவரம் சமர்ப்பிக்க அவகாசம்.

2026-09-16T07:22:05.286+05:30

தமிழ்நாடு ஆசிரியர் கல்வியியல் பல்கலைக்கழக பதிவாளர் (பொறுப்பு) கே.ராஜசேகரன் வெளியிட்ட அறிவிப்பில் கூறியிருப்பதாவது: நடப்பு கல்வி ஆண்டில் (2026-27) பிஎட், எம்எட் மாணவர் சேர்க்கை விவரங்களை ஆசிரியர் கல்வியியல் பல்கலைக்கழகத்தின் இணையதளத்தில் ஆன்லைனில் சமர்ப்பி்ப்பதற்கான கடைசி நாள் செப்டம்பர் 21 வரை நீட்டிக்கப்படுகிறது.

எனவே, பல்கலைக்கழதத்தின் இணைப்பு அங்கீகாரம் பெற்ற கல்வியியல் கல்லூரிகளின் முதல்வர்கள் தங்கள் கல்லூரிகளில் பிஎட், எம்எட் படிப்புகளில் மேற்கொள்ளப்பட்ட மாணவர் சேர்க்கை விவரங்களை நீட்டிக்கப்பட்ட காலக்கெடுவுக்குள் சமர்ப்பிப்பதை உறுதிப்படுத்த வேண்டும். இதற்குமேல் காலநீட்டிப்பு வழங்கப்படாது. இவ்வாறு அவர் கூறியுள்ளார்.

பள்ளிகளில் காலை உணவு திட்டத்துக்கான பராமரிப்பு பணிகளை உள்ளாட்சி நிதியிலிருந்து மேற்கொள்ள உத்தரவு.

2026-09-13T09:18:21.096+05:30

காலை உணவுத் திட்டத்துக்கான பராமரிப்புப் பணிகளை உள்ளாட்சி நிதியிலிருந்து மேற்கொள்ள வேண்டும் என்று பள்ளிக்கல்வித் துறை உத்தரவிட்டுள்ளது.

அரசு, அரசு உதவி பெறும் பள்ளிகளில் 1 முதல் 5-ம் வகுப்பு வரை பயிலும் குழந்தைகளுக்கு முதல்வரின் காலை உணவுத் திட்டத்தின்கீழ் காலைச் சிற்றுண்டி திமுக ஆட்சியில் வழங்கப்பட்டது. ஆட்சி மாற்றத்துக்குப் பின்னர் தவெக அரசு, இத்திட்டத்தை 6 முதல் 8-ம் வகுப்புகளுக்கு விரிவாக்கம் செய்வதாக அறிவித்தது. மேலும், திட்டத்தின் பெயர், காமராஜர் காலை உணவுத் திட்டம் எனவும் மாற்றம் செய்யப்பட்டது. விரைவில் இத்திட்டம் செயல்படுத்தப்பட இருப்பதாகக் கூறப்படுகிறது.

இந்நிலையில் பள்ளிக்கல்வித்துறை சார்பில் அனைத்து மாவட்ட முதன்மைக் கல்வி அலுவலர்களுக்கு சுற்றறிக்கை ஒன்று அனுப்பப்பட்டது. அதில், பள்ளிகளில் காமராஜர் காலை உணவுத் திட்டம் என்ற பெயர்ப் பலகையை இடம்பெறச் செய்யவேண்டும். அந்தப் பலகை எந்தளவில் இருக்க வேண்டும் என்பது உட்பட விவரங்களும், பலகை வைக்கப்பட்டுள்ளதா என்பதை அதிகாரிகள் ஆய்வு செய்யவும் அறிவுறுத்தப்பட்டிருந்தது.

இதைப் பின்பற்றி கடலூர் மாவட்ட முதன்மைக்கல்வி அலுவலர், பள்ளிகளுக்கு அனுப்பிய சுற்றறிக்கையில், ‘பள்ளிகளின் சமையலறை, மின்விளக்கு, குடிநீர், இருப்பு அறை வசதிகள் சார்ந்த குறைபாடுகளை சொந்த நிதியின் மூலம் நிவர்த்தி செய்யவும், மாணவர்களுக்கு தட்டு, டம்ளர் வழங்க நடவடிக்கை மேற்கொள்ளவும் பள்ளி தலைமை ஆசிரியர்களுக்கு உத்தரவு பிறப்பித்திருந்தார். சொந்த நிதியில் இந்த செலவினங்களை மேற்கொள்வதற்கு ஆசிரியர்கள் எதிர்ப்புத் தெரிவித்தனர்.

இதையடுத்து பள்ளிக்கல்வித்துறைச் செயலர் இன்னசென்ட் திவ்யா வெளியிட்ட செய்திக்குறிப்பில், ‘‘பள்ளிக்கல்வி அமைச்சரின் அறிவுரையின்பேரில், கடலூர் மாவட்டம் சார்பில் வெளியிடப்பட்ட சுற்றறிக்கை தொடர்பாக கவனக்குறைவாக செயல்பட்ட பணியாளர்கள் மீது துறை ரீதியாக ஒழுங்கு நடவடிக்கை எடுக்க அறிவுறுத்தப்பட்டுள்ளது. பள்ளிகளுக்கு தேவையான தட்டுகள், டம்ளர்கள் மற்றும் சிறிய பராமரிப்புப் பணிகளை உள்ளாட்சி அமைப்புகள் தங்கள் நிதியில் இருந்து மேற்கொள்ள வேண்டுமென செப்.3-ம் தேதி மாவட்ட ஆட்சியரால் ஆணை பிறப்பிக்கப்பட்டுள்ளது’’ என்று கூறப்பட்டுள்ளது.

தமிழகத்துக்கு கூடுதலாக 250 எம்பிபிஎஸ் இடங்கள்: தேசிய மருத்துவ ஆணையம் அனுமதி.

2026-09-13T09:17:19.819+05:30

தமிழகத்துக்கு கூடுதலாக 250 எம்பிபிஎஸ் இடங்களுக்கு தேசிய மருத்துவ ஆணையம் அனுமதி அளித்துள்ளது.

தமிழகத்தில் அரசு - தனியார் கல்லூரிகளில் உள்ள அரசு ஒதுக்கீடு, நிர்வாக ஒதுக்கீட்டுக்கான எம்பிபிஎஸ், பிடிஎஸ் இடங்களை நிரப்புவதற்கான முதல் கட்டகலந்தாய்வு நிறைவடைந்துள் ளது. மருத்துவ கல்வி மற்றும் ஆராய்ச்சி இயக்ககம் நடத்திய கலந்தாய்வில் 9,437 எம்பிபிஎஸ், பிடிஎஸ் இடங்கள் நிரப்பட்டுள்ளன. 2-ம் சுற்று கலந்தாய்வு நடைபெற்று வருகிறது. இந்த சுற்றில் இடஒதுக்கீடு பெற்றவர்களின் விவரங்கள் செப்.15-ம் தேதி வெளியிடப்படவுள்ளது. இடஒதுக்கீடு பெற்றவர்கள் 18-ம் தேதி மாலை 5 மணிக்குள் கல்லூரிகளில் சேர வேண்டும்.

இந்நிலையில், காஞ்சிபுரத்தில் புதியதாக தொடங்கப்பட்டுள்ள தனியார் மருத்துவ கல்லூரிக்கு 150 எம்பிபிஎஸ் இடங்களுக்கு தேசிய மருத்துவ ஆணையம் அனுமதி வழங்கியுள்ளது. அதேபோல், 2 தனியார் மருத்துவ கல்லூரிகளுக்கு தலா 50 எம்பிபிஎஸ் இடங்களுக்கு ஆணையத்தின் அனுமதி கிடைத்துள்ளது. இந்த 250 இடங்களும், நடைபெறும் 2-ம் சுற்று மாணவர் சேர்க்கை கலந்தாய்வில் சேர்க்கப்பட்டுள்ளது. 2-ம் சுற்று கலந்தாய்வில் பங்கேற்று ஏற்கெனவே இடங்களை எடுத்த மாணவர்கள், மறுஒதுக்கீட்டுக்கு கோரி விண்ணப்பிக்கலாம் என்று தெரிவிக்கப்பட்டுள்ளது.

தமிழகத்தில் 1,626 பள்ளிகளில் குடிநீர் இணைப்பு இல்லை!

2026-09-11T07:29:10.122+05:30

'தமிழகத்தில் 1,626 பள்ளிகள், 6,444 அங்கன்வாடிகளுக்கு, குடிநீர் குழாய் இணைப்பு இல்லை' என, மத்திய கணக்கு தணிக்கை அறிக்கையில் தெரிவிக்கப்பட்டுள்ளது.

அதில் கூறியிருப்பதாவது:

அனைத்து கிராமப்புற வீடுகளுக்கும், 2024ம் ஆண்டுக்குள், குடிநீர் குழாய் இணைப்பு வழங்குவதே, 'ஜல்ஜீவன் மிஷன்' திட்டத்தின் நோக்கம். இத்திட்டம் 2028ம் ஆண்டு வரை நீட்டிக்கப்பட்டுள்ளது.

கடந்த 2023 - 24ம் ஆண்டு வரை, தமிழகத்தில் 81.87 சதவீத கிராமப்புற வீடுகளுக்கு, குடிநீர் குழாய் இணைப்புகள் வழங்கப்பட்டுள்ளன.

இதனால், பெண்களின் வேலைப்பளு குறைந்துள்ளது. பாதுகாப்பான குடிநீர் கிடைத்ததால், நீர் வழியாக பரவும், வாந்தி, வயிற்றுப்போக்கு, மஞ்சள் காமாலை, காலரா போன்ற நோய்கள் குறைந்துள்ளதாக, பயனாளிகள் தெரிவித்தனர்.

தமிழகத்தில் 1,626 ஊராட்சி ஒன்றியப் பள்ளிகள், 6,444 அங்கன்வாடிகளுக்கு, குடிநீர் குழாய் இணைப்பு வழங்கப்படவில்லை என, 2024 அக்டோபரில் திட்ட இயக்குநர் தெரிவித்தார்.

இவ்வாறு அதில் கூறப்பட்டுள்ளது.

மும்மொழி கொள்கை: நடப்பு கல்வியாண்டில் 6ம் வகுப்புக்கு விலக்கு தர சுப்ரீம் கோர்ட் அறிவுறுத்தல்.

2026-09-11T07:28:06.531+05:30

'மும்மொழி கொள்கையை அமல்படுத்துவதில் இருந்து இந்த ஆண்டு 6ம் வகுப்புக்கு விலக்கு அளிப்பது குறித்து மத்திய இடைநிலை கல்வி வாரியம் பரிசீலிக்க வேண்டும்' என, உச்ச நீதிமன்றம் அறிவுறுத்தியுள்ளது.

சி.பி.எஸ்.இ., எனப்படும் மத்திய இடைநிலை கல்வி வாரியம், 'தேசிய கல்வி கொள்கை - 2020' அடிப்படையில் பாட நடைமுறைகளில் பல்வேறு மாற்றங்களை அறிவித்தது. குறிப்பாக 6ம் வகுப்பு முதல் மும்மொழி கொள்கை கட்டாயம் என உத்தரவிட்டது. இந்த புதிய நடைமுறை கடந்த ஜூலை 1 முதல் அமலுக்கு வருவதாக அறிவிக்கப்பட்டது.

புதிய நடைமுறையின்படி, மூன்று மொழிகளை மாணவர்கள் பயில வேண்டும். அவற்றில் இரண்டு மொழிகள் கட்டாயம். அந்த இரு மொழிகளும் இந்திய மொழியாக இருக்க வேண்டும். ஒரு மொழி மட்டும் வெளிநாட்டு மொழியாக இருக்கலாம். இவற்றில் ஆங்கிலம் வெளிநாட்டு மொழியாக கருதப்படும் என தெரிவிக்கப்பட்டது.

இந்நிலையில் 9 மற்றும் 10 வகுப்பு மாணவர்களுக்கு மும்மொழி கட்டாயம் என்பதை எதிர்த்து மாணவர், பெற்றோர் சங்கம் சார்பில் உச்ச நீதிமன்றத்தில் வழக்கு தொடரப்பட்டது. தலைமை நீதிபதி சூர்யகாந்த் தலைமையிலான அமர்வில் இவ்வழக்கு விசாரணைக்கு வந்தது.

அப்போது நீதிபதிகள் பிறப்பித்த உத்தரவு:

நடப்பு கல்வியாண்டில் 6ம் வகுப்புக்கு மும்மொழி கொள்கையில் இருந்து விலக்கு அல்லது சலுகை அளிப்பது குறித்து சி.பி.எஸ்.இ., பரிசீலிக்க வேண்டும். அடுத்த கல்வியாண்டில் இருந்து கூட 6ம் வகுப்புக்கு மும்மொழி கொள்கையை நடைமுறைப்படுத்தலாம். மாணவர்களுக்கு மன அழுத்தம் தரும் வகையில் கூடுதல் சுமை அளிக்கக் கூடாது. புதிய மொழிகளை கற்பிக்க தேவையான உள்கட்டமைப்பு வசதிகளை உருவாக்க வேண்டும்.

இவ்வாறு உத்தரவிட்ட நீதிபதிகள், விசாரணையை வரும் 17ம் தேதிக்கு ஒத்திவைத்தனர்.

இவ்வழக்கு விசாரணையின் போது, '6 முதல் 8ம் வகுப்பு வரையிலான பாடத்திட்டங்களை வரையறுக்கும் அதிகாரம் என்.சி.இ.ஆர்.டி., எனப்படும் தேசிய கல்வி ஆராய்ச்சி மற்றும் பயிற்சி கவுன்சிலுக்கே இருக்கிறது. சி.பி.எஸ்.இ.,க்கு இல்லை' என, மனுதாரர் தரப்பில் வாதிடப்பட்டது.

பள்ளி மாணவர்களுக்கான காலாண்டுத் தேர்வு செப்.16-ல் தொடக்கம்.

2026-09-11T07:24:58.912+05:30

kalvikkuyil

பள்ளி மாணவர்களுக்கான காலாண்டுத் தேர்வு செப்.16-ம் தேதி தொடங்கி 25-ம் தேதி வரை நடைபெறுகிறது. அதன்பிறகு, விடுமுறை விடப்பட்டு, அக்.6-ம் தேதி பள்ளிகள் திறக்கப்படுகின்றன.

இதுகுறித்து பள்ளிக்கல்வித் துறை வெளியிட்டுள்ள அறிவிப்பு விவரம்: தமிழகத்தில் பள்ளிக்கல்வி பாடத்திட்டத்தைப் பின்பற்றும் அனைத்து விதமான பள்ளிகளிலும் 1 முதல் 12-ம் வகுப்பு மாணவர்களுக்கான காலாண்டு தேர்வுக்கால அட்டவணை தற்போது வெளியிடப்படுகிறது. அதன்படி, 1 முதல் 10-ம் வகுப்புகளுக்கு செப்.16 முதல் 24-ம் தேதி வரையும், 11, 12-ம் வகுப்புகளுக்கு செப்.16 முதல் 25-ம் தேதி வரையும் தேர்வு நடைபெறும். பாடவாரியான கால அட்டவணை பள்ளிகளுக்கு அனுப்பப்பட்டுள்ளன.

6, 8-ம் வகுப்புகள், பொதுத் தேர்வை எதிர் கொள்ளும் 10, 12-ம் வகுப்புகளுக்கு காலையிலும், 7, 9, 11-ம் வகுப்பு களுக்கு மதியமும் தேர்வுகள் நடைபெறும். மாணவர்களுக்கு செப்.26 முதல் அக்.5-ம் தேதி வரை விடுமுறை வழங்கப்படும். விடுமுறை முடிந்து பள்ளிகள் மீண்டும் அக்.6-ம் தேதி திறக்கப்படும். இவ்வாறு அதில் கூறப்பட்டுள்ளது.

வினாத்தாள் பதிவிறக்கம்: காலாண்டுத் தேர்வு வினாத்தாள்களை பதிவிறக்கம் செய்வதற்கான வழிகாட்டுதல்களும் வெளியிடப்பட்டுள்ளன. அதன்படி 1 முதல் 5-ம் வகுப்புகளுக்கான வினாத்தாளை எமிஸ் தளத்தில் மாவட்டக் கல்வி அலுவலர்கள் பதிவிறக்கம் செய்ய வேண்டும். 6 முதல் 8-ம் வகுப்புகளுக்கான வினாத்தாளை https://exam.tnschools.gov.in என்ற இணையதளத்தில் பதிவிறக்கம் செய்து அச்சிட்டுக் கொள்ள வேண்டும்.

முன்கூட்டியே வழங்கப்படும் வினாத்தாள்களை தலைமை ஆசிரியர்கள் மிகவும் பாதுகாப்பாக வைத்திருந்து, உரிய தேர்வு நாளில் மட்டுமே அந்தந்த பாடத்துக்கான வினாத்தாளைப் பயன்படுத்த வேண்டும். வினாத்தாள் பதிவிறக்கம், அச்சிடுவதில் தொழில்நுட்பச் சிக்கல்கள் ஏற்பட்டால் ‘14417’ என்ற உதவி எண்ணை தொடர்பு கொள்ளலாம்.

யுஜிசி நெட் மறுதேர்வர்கள் கவனத்துக்கு: என்டிஏ அறிவுறுத்தல்!

2026-09-10T07:29:46.563+05:30

தில்லியில் யுஜிசி நெட் மறுதேர்வு எழுதவிருக்கும் தேர்வர்களுக்கான முக்கிய வழிகாட்டு நெறிமுறைகளை தேசிய தேர்வு முகமை (என்டிஏ) செவ்வாய்க்கிழமை (செப். 8) வெளியிட்டுள்ளது.

நாட்டில் உள்ள பல்கலைக்கழகங்கள் மற்றும் கல்லூரிகளில் உதவிப் பேராசிரியர் பணியிடத்துக்கு தகுதி பெறுவதற்கும், அங்கு முனைவர் பட்டங்களை மேற்கொள்வதற்கான அங்கீகாரத்தைப் பெறுவதற்கும் மற்றும் மத்திய அரசின் இளநிலை ஆராய்ச்சி உதவித் தொகை பெறுவதற்கும் தேசிய தேர்வு முகமை சார்பில் ‘நெட்’ தேர்வு ஆண்டுக்கு இரண்டு முறை நடத்தப்படுகிறது.

அதன்படி, இந்த ஆண்டுக்கான முதல் தேர்வு ஜூன் மாதம் 22 ஆம் தேதி முதல் 30 வரை ஆறு நாள்கள் நடத்தப்பட்டது. 87 பாடங்களுக்கு நடத்தப்பட்ட இந்தத் தேர்வின் முடிவுகள் 84 பாடங்களுக்கு மட்டுமே வெளியாகின. ஆங்கிலம், வணிகவியல் மற்றும் சமூகவியல் பாடங்களுக்கான வினாத்தாள்களில் பல்வேறு பிழைகள் இருப்பதாகப் புகார்கள் எழுந்த நிலையில், அவற்றுக்கான மறுதேர்வு வரும் செப்டம்பர் 9, 10 ஆகிய தேதிகளில் நடைபெறும் என என்டிஏ அறிவித்திருந்தது.

இந்தத் தேர்வுகள் நாளை தொடங்கவுள்ள நிலையில், தில்லியில் தேர்வு எழுதுவோருக்கு வெளியிடப்பட்டுள்ள சில வழிகாட்டு நெறிமுறைகள்:

“18 வது பிரிக்ஸ் உச்சி மாநாடு, செப்டம்பர் 11 முதல் 13 வரை தில்லியின் பாரத் மண்டபத்தில் நடைபெற உள்ளது.

இதனால், செப். 9 மற்றும் 10 ஆகிய தேதிகளில் நகரில் பயணக் கட்டுப்பாடுகள் இருப்பதால், சாலைப் போக்குவரத்து வழக்கத்தை விட தாமதமாகலாம்.

எனவே, உங்கள் பயண வழியை இன்றே சரிபார்த்துக் கொண்டு, நாளை தேர்வு மையத்துக்குச் சென்றடைய கூடுதல் நேரத்தை ஒதுக்க வேண்டும்” என்று அறிவுறுத்தப்பட்டுள்ளது

எஸ்சி, எஸ்டி மாணவர்கள் 31,510 பேருக்கு 2017-23 காலகட்டத்தில் தாமதமாக கல்வி உதவித்தொகை.

2026-09-10T07:26:06.874+05:30

‘கடந்த 2017-23 காலகட்டத்தில் 31,510 எஸ்சி, எஸ்டி மாணவர்களுக்கு காலதாமதமாக கல்வி உதவித்தொகை வழங்கப்பட்டது’ என இந்திய தணிக்கை தலைவரின் அறிக்கையில் குற்றம் சாட்டப்பட்டுள்ளது.

எஸ்சி, எஸ்டி, எஸ்சி-மதம் மாறிய கிறிஸ்தவ மாணவர்களுக்கான கல்வி உதவித்தொகை திட்டங்கள் தொடர்பாக, இந்திய தணிக்கை தலைவரின் அறிக்கையில் கூறியிருப்பதாவது: எஸ்சி, எஸ்டி மாணவர்களின் கல்வியறிவு விகிதத்தையும் கல்வித்தரத்தையும் உயர்த்தும் நோக்கில் அவர்களுக்கு மத்திய-மாநில அரசு சார்பில் பல்வேறு கல்வி உதவித்திட்டங்கள் செயல்படுத்தப்படுகின்றன.

இதுகுறித்து போதிய விழிப்புணர்வு இல்லாததால் 2019-20 காலகட்டத்தில் குறிப்பிட்ட 8 மாவட்டங்களில் எஸ்சி, எஸ்டி மாணவர்களுக்கான ப்ரீ-மெட்ரிக், போஸ்ட்-மெட்ரிக் கல்வி உதவித்தொகை திட்டங்கள் சராசரியாக 46 சதவீதம் மற்றும் 39 சதவீத பள்ளிகளைச் சென்றடையவில்லை.

கடந்த 2017-23 காலகட்டத்தில் குறிப்பிட்ட கல்வி நிறுவனங்களில் 36,510 எஸ்சி, எஸ்டி மாணவர்களுக்கு ரூ.7.28 கோடி கல்வி உதவித்தொகை ஒரு மாதம் முதல் ஓராண்டு வரை காலதாமதமாக வழங்கப்பட்டுள்ளது.

இதே காலகட்டத்தில் வங்கிக்கணக்கு முடக்கம், பரிவர்த்தனை நிறுத்தம், வங்கிக்கணக்கு இல்லை போன்ற காரணங்களால் 3,530 பேருக்கு ரூ.161 கோடி கல்வி உதவித்தொகை வங்கிக்கணக்குகளில் செலுத்தப்பட முடியாமல் திருப்பி அனுப்பப்பட்டது.

அதேபோல், 2023-25-ம் ஆண்டுகளில் மத்திய கல்வி உதவித்தொகை பெற தகுதியில்லாத எஸ்சி மதம் மாறிய கிறிஸ்தவ மாணவர்கள் 2,576 பேருக்கு மத்திய அரசின்பங்கான 60 சதவீத உதவித்தொகை வழங்கப்பட்டதால் ரூ.3.64 கோடி தவறாக செலுத்த நேரிட்டது.

தணிக்கை குழு பரிந்துரைகள்

எஸ்சி, எஸ்டி மாணவர்களுக்கு கல்வி உதவித்தொகையை அனுமதிக்கும் முன், கல்வி நிறுவனங்களில் நிர்வாக ஒதுக்கீட்டின் கீழ் மாணவர் சேர்க்கை வெளிப்படைத் தன்மையுடன் மேற்கொள்ளப்படுவதை அரசு உறுதி செய்யவேண்டும்.

தகுதியுள்ள மாணவர்களுக்கு மட்டுமே கல்வி உதவித்தொகை வழங்கப்படுவதை உறுதிப்படுத்த அவர்களின் விண்ணப்பங்களை அரசு ஆராய வேண்டும். கல்வி உதவித்தொகை அந்தந்த கல்வி ஆண்டிலேயே வழங்கப்பட வேண்டும்.

மாணவர் சேர்க்கை படிவத்தில் ஜாதி, மத அடையாளங்கள் கட்டாயமில்லை: ஐகோர்ட்.

2026-09-07T07:53:35.185+05:30

'கல்வி நிறுவனங்களில், மாணவர் சேர்க்கையின் போது, விண்ணப்ப படிவத்தில் ஜாதி, மத அடையாளகங்ளை குறிப்பிட கட்டாயப்படுத்தக் கூடாது' என, உயர்நீதிமன்ற மதுரை கிளை உத்தரவிட்டுள்ளது.

விருதுநகர், இனாம்ரெட்டியபட்டி விக்ரமன் தாக்கல் செய்த மனு:

தனியார் கல்வி நிறுவனங்கள், மாணவர்களிடம் ஜாதி விபரங்களை கேட்க கூடாது என விதி உள்ளது. அதைமீறி கல்வி நிறுவனங்களில், மாணவர் சேர்க்கையின் போது, ஜாதி உட்பட, சமூக விபரங்கள் கேட்கப்படுகின்றன. இது மாணவர்களின் தேர்வு, சேர்க்கை செயல்முறைகளில் பாகுபாடு ஏற்பட வழிவகை செய்யும்.

எனவே, தமிழகத்தில் உள்ள தனியார் கல்வி நிறுவன விண்ணப்ப படிவங்களில், ஜாதி அல்லது சமூக விபரங்களை கட்டாயமாக சேகரிக்க தடை விதிப்பதோடு, தனியார் நிறுவனங்களில் பாகுபாடு இல்லாத சூழலை உறுதி செய்திட உத்தரவிட வேண்டும்.

இவ்வாறு கூறியிருந்தார்.

மனுவை ஏற்கனவே விசாரித்த நீதிபதிகள், 'விண்ணப்பத்தில் ஜாதி உட்பட, விபரங்களை கட்டாயமாக பெறக் கூடாது என்பது குறித்து, கல்வி நிறுவனங்களுக்கு சுற்றறிக்கை அனுப்பப்பட்டுள்ளதா' என, கேள்வி எழுப்பி இருந்த நிலையில், நீதிபதிகள் சி.வி.கார்த்திகேயன், சக்திவேல் அமர்வு முன், மீண்டும் விசாரணைக்கு வந்தது.

அரசு தரப்பு:

ஜாதி, மத அடையாளங்களை, கட்டாயம் கேட்க கூடாது என, பள்ளிகளை தொடர்ந்து, அரசு மற்றும் அரசு உதவி பெறும் கல்லுாரி, தனியார் கல்லுாரிகளுக்கு சுற்றறிக்கை அனுப்பப்பட்டுள்ளது.

நீதிபதிகள், 'பள்ளிகளில் ஜாதி, மத அடையாளங்ளை குறிப்பிட கட்டாயப்படுத்த கூடாது. இது தொடர்பான அரசாணையை பின்பற்றுவதை உறுதி செய்வதோடு விழிப்புணர்வும் ஏற்படுத்த வேண்டும் என, இது போன்ற மற்றொரு வழக்கில், சென்னை உயர்நீதிமன்றம் தீர்ப்பு வழங்கியுள்ளது. அதே தீர்ப்பை, இவ்வழக்கில் குறிப்பிடுகிறோம்' என, உத்தரவிட்டு, வழக்கை முடித்து வைத்தனர்.

ஐடிஐ-க்களில் சோ்க்கை: செப். 7 வரை அவகாசம்.

2026-09-07T07:51:16.157+05:30

தொழிற்பயிற்சி நிலையங்களில் (ஐடிஐ) நேரடி மாணவா் சோ்க்கைக்கான கால அவகாசம் செப். 7 வரை நீட்டிக்கப்பட்டுள்ளது.

இது குறித்து தமிழக அரசு வெளியிட்ட செய்திக்குறிப்பு: தமிழகத்தில் வேலைவாய்ப்பு மற்றும் பயிற்சித் துறையின் கீழ் 132 அரசு தொழிற்பயிற்சி நிலையங்களும் 278 தனியாா் தொழிற்பயிற்சி நிலையங்களும் இயங்கி வருகின்றன. இந்தத் தொழிற்பயிற்சி நிலையங்களில் 2026-2027-ஆம் ஆண்டு நேரடி சோ்க்கை கால அவகாசம் ஆக. 31-ஆம் தேதியுடன் நிறைவடைந்த நிலையில், மாணவா்களின் நலன் கருதி தொழிற்பயிற்சி நிலையங்களில் நேரடி சோ்க்கைக்கான கால அவகாசம் செப்.7 வரை நீட்டிக்கப்பட்டுள்ளது.

தொழிற்பயிற்சி நிலையங்களில் பயிற்சி பெற்றவா்களுக்கு நல்ல வேலைவாய்ப்புகள் கிடைக்கிறது. குறைந்தபட்சம் ரூ.20,000 முதல் மாணவா்களின் திறனுக்கேற்றவாறு ரூ.30,000 வரை மாதச் சம்பளம் கிடைக்கிறது.

தொழிற்பயிற்சி நிலையங்களுக்கு கல்விச் சான்றிதழ்களுடன் நேரில் சென்று தாம் விரும்பும் தொழிற்பிரிவை தெரிவு செய்து தொழிற்பயிற்சி நிலையங்களில் சேரலாம். மேலும், 94990 55642, 94990 55612 (வாட்ஸ் ஆப்) ஆகிய எண்களில் தொடா்பு கொள்ளலாம் எனத் தெரிவிக்கப்பட்டுள்ளது.

396 ஆசிரியர்களுக்கு மாநில நல்லாசிரியர் விருது: பள்ளிக்கல்வித் துறை அமைச்சர் ராஜ்மோகன் வழங்கினார்.

2026-09-07T07:48:08.269+05:30

மறைந்த குடியரசுத் தலைவர் ராதாகிருஷ்ணனின் பிறந்த நாளான செப்.5-ம் தேதி தேசிய ஆசிரியர் தினமாகக் கொண்டா டப்படுகிறது. அதையொட்டி, மாநில அளவில் சிறந்த ஆசிரியர்களைத் தேர்வு செய்து ‘டாக்டர் ராதாகிருஷ்ணன் விருது’ வழங்கி தமிழக அரசு கவுரப்படுத்தி வருகிறது. இந்த விருது பெறுபவர்களுக்கு ரூ.10,000 ரொக்கம், வெள்ளிப் பதக்கம் மற்றும் பாராட்டுச் சான்றிதழ் வழங்கப்படும்.

அதன்படி நடப்பாண்டில் 396 ஆசிரியர்கள் மாநில நல்லாசிரியர் விருதுக்குத் தேர்வு செய்யப்பட்டனர். இவர்களுக்கான விருது வழங்கும் விழா சென்னை கோட்டூர்புரம் அண்ணா நூலகத்தில் நேற்று நடைபெற்றது. இந்நிகழ்ச்சிக்கு பள்ளிக்கல்வித் துறைச் செயலர் பி.சந்தரமோகன் தலைமை வகித்தார். பள்ளிக் கல்வித் துறை அமைச்சர் ராஜ்மோகன் சிறப்பு விருந்தினராகப் பங்கேற்று 396 ஆசிரியர்களுக்கு மாநில நல்லாசிரியர் விருது வழங்கி கவுரவித்தார்.

அதைத்தொடர்ந்து அமைச்சர் பேசியதாவது: தன்னிடம் படித்த மாணவர்கள் தன்னைவிட உயரத்துக்குச் செல்லும்போது எவ்வித பொறாமையும் இல்லாமல் பெருமைப்படும் சான்றோர்கள்தான் ஆசிரியர்கள். அனைத்து ஆசிரியர்களுமே சிறந்த ஆசிரியர்கள் தான். பள்ளிகளில் பயிலும் அனைத்துக் குழந்தைகளின் வாழ்க்கையை ஆசிரியர்கள் சிறப்பாகக் கவனித்துகொள்ள வேண்டும். அதேநேரத்தில் ஆசிரியர்களின் வாழ்க்கையை மாற்றுவதற்கான அனைத்து விஷயங்களையும் உயிரைக் கொடுத்தாவது செய்வோம்.

இந்த அரசு அறிமுகப்படுத்தும் புதிய பாடத்திட்டத்தை மாணவர்களிடம் ஆசிரியர்கள் கொண்டு சேர்க்க வேண்டும். இந்த பாடத்திட்டம் இந்தியாவுக்கே முன்னுதாரணமாக மாற வேண்டும். இவ்வாறு அவர் பேசினார். இந்நிகழ்வில் பள்ளிக்கல்வித் துறை இயக்குநர் என்.லதா, தொடக்கக் கல்வித்துறை இயக்குநர் பூ.ஆ.நரேஷ், தமிழக பாடநூல் கழகத் தலைவர் லயோலா மணி, ஆசிரியர் தேர்வு வாரிய உறுப்பினர் செயலர் வி.சி.ராமேஸ்வர முருகன் உள்ளிட் டோர் கலந்து கொண்டனர்.

சென்னை மயிலாப்பூரில் உள்ள முன்னாள் குடியரசுத் தலைவர் ராதாகிருஷ்ணன் இல்லத்தில் சாந்தா பப்ளிஷர்ஸ், ஆசிரியர் கல்வியாளர் கூட்டமைப்பு, தமிழக மேல்நிலைப் பள்ளி தொழிற்கல்வி ஆசிரியர்கள் நலச்சங்கம் சார்பில் ஆசிரியர் தின விழா நேற்று நடைபெற்றது. இதில் அமைச்சர்கள் ராஜ்மோகன், எஸ்.ராஜேஸ்குமார் ஆகி யோர் பங்கேற்றனர். தொடர்ந்து, பள்ளிமற்றும் ஆசிரியர்களுக்கு விருதுகள் வழங்கப்பட்டன.

முதல்வர் வாழ்த்து: ஆசிரியர் தினத்தையொட்டி முதல்வர் விஜய் வெளியிட்ட வாழ்த்துச் செய்தியில், ‘‘மாணவர்களின் மனங்களில்அறிவொளி ஏற்றி, ஒழுக்கம், மனிதநேயம், சகோதரத்துவம் மற்றும் சமூகப்பொறுப்பு உள்ளிட்ட உயரிய நற்பண்புகளை விதைத்து, எதிர்கால வாழ்வுக்கான அடித்தளத்தை அமைத்துத் தருவதுடன்,நாட்டின் வளர்ச்சியோடு ஒட்டுமொத்த சமூக முன்னேற்றத்தையும் கட்டமைக்கும் உன்னதப்பணியை மேற்கொண்டு வரும் ஆசிரியர்களின் மகத்தான பணிகளை போற்றுவோம்’’ எனக் கூறியுள்ளார்.

மேலும், திமுக தலைவர் மு.க.ஸ்டாலின், எதிர்க்கட்சித் தலைவர் உதயநிதி ஸ்டாலின், தேமுதிகபொதுச்செயலாளர் பிரேமலதா உள்ளிட்டோரும் ஆசிரியர் தின வாழ்த்து தெரிவித்துள்ளனர்.

கல்வி இருக்க வேண்டியது ஒத்திசைவுப் பட்டியலிலா? மாநிலப் பட்டியலிலா?

2026-09-02T21:31:14.745+05:30

இந்திய அரசமைப்புச் சட்டத்தின் ஏழாவது அட்டவணையில் மத்திய, மாநில அரசுகளுக்கான அதிகாரங்கள் வரையறுக்கப்பட்டுள்ளன. இதன்படி, ஒத்திசைவுப் பட்டியல், மாநிலப் பட்டியல் என அதிகாரங்கள் பகிர்ந்தளிக்கப்பட்டுள்ளன.

கடந்த 1976-இல் முன்னாள் பிரதமர் இந்திராகாந்தி ஆட்சியில் அவசரநிலை அமல்படுத்தப்பட்ட காலத்தில், அரசமைப்புச் சட்டத்தில் மேற்கொள்ளப்பட்ட திருத்தத்தின்படி மாநிலப் பட்டியலில் இருந்த கல்வி ஒத்திசைவுப் பட்டியலுக்கு மாற்றப்பட்டது. அன்று முதல் கல்வியை மாநிலப் பட்டியலுக்கு மாற்ற வேண்டும் என குரல் ஓயாமல் ஒலித்துக் கொண்டிருக்கிறது

கல்வியைச் சர்வதேச தரத்திற்கு கொண்டு செல்ல வேண்டுமெனில், அதை ஒத்திசைவுப் பட்டியலிலேயே வைக்க வேண்டும் என்றும், மாநிலப் பட்டியலில் இருந்தால்தான், சமூகத்தில் நிலவும் பல்வேறு தடைகளைத் தகர்த்தெறிந்து கல்வியை முன்னேற்றத்துக்கு கொண்டு செல்ல முடியும் என்றும் இருவேறு கருத்துக்கள் நிலவுகின்றன.

கல்வி ஒத்திசைவுப் பட்டியலில் இருக்க வேண்டுமா?, மாநிலப் பட்டியலில் இருக்க வேண்டுமா? என்று கல்வியாளர்களிடம் கேட்டோம். அவர்களது கருத்துக்களை காண்போம்.

கல்விக் கொள்கையில் கூட்டு முயற்சி தேவை

தேசிய கல்வி கொள்கை 2020 சுதந்திரத்திற்குப் பிறகு வரையப்பட்ட இந்தியாவின் மூன்றாவது கல்விக் கொள்கை ஆகும். டாக்டர் ராதாகிருஷ்ணன் கமிஷன் (1948-49) உயர்கல்வியிலும், கோத்தாரி கமிஷன் அறிக்கை (1965) பொதுக் கல்வியிலும் கவனம் செலுத்தியிருந்தது. 1968-இல் வரையப்பட்ட முதல் தேசிய கல்விக் கொள்கையின் போது கல்வி மத்திய பட்டியலில் இருந்தது. 1976 இல் செய்யப்பட்ட 46-ஆவது அரசமைப்புத் திருத்தம் கல்வியை பொது பட்டியலில் சேர்த்தது. அதன் பிறகு இரண்டாவது கல்விக்கொள்கை 1986-இல் வெளியிடப்பட்டது. அதைத் தொடர்ந்து 1992 -இல் ஒரு செயல் திட்டம் வெளியிடப்பட்டது. பல்வேறு பங்குதாரர்களுடன் கலந்துரையாடிய பிறகு, கரோனா பெருந்தொற்று காலத்தில் 2020 -இல் தேசிய கல்வி கொள்கை 2020 வெளியிடப்பட்டது. உண்மையில், தேசிய கல்வி கொள்கை 2020, டி.எஸ்.ஆர். சுப்பிரமணியன் குழு அறிக்கை (2015) வடிவில் ஒத்திகை பார்க்கப்பட்டது. பின்னர் கஸ்தூரி ரங்கன் குழு இறுதியாக தேசிய கல்வி கொள்கை 2020-இன் அறிக்கையை உருவாக்கியது. இந்த மூன்று தேசிய கொள்கையிலும் சில பொது பிரச்சினைகள் உள்ளன. பரந்த தேவைகள் நாட்டில் இருப்பதால் பல பொதுவான சிக்கல்கள் உள்ளன. இந்த சிக்கலான நிலையில்தான், கல்வியை பொதுப்பட்டியலில் சேர்க்கும் பிரச்சினையை நாம் புரிந்து கொள்ள வேண்டும்.

பொதுப்பட்டியல் குறித்த கொள்கைகள் விஷயத்தில், அரசியலைத் தவிர்த்துவிட்டு மாணவர்களின் எதிர்காலம் மற்றும் வாழ்க்கைத் தரத்தை கருத்தில் கொண்டு, மத்திய மற்றும் மாநில அரசுகள் இரண்டையும் உள்ளடக்கிய சில வெற்றிக்கு வித்திடும் தீர்வுகளில் கவனம் செலுத்துவது அவசியமானது. சுகாதாரம் (மாநில பட்டியல்) மற்றும் கல்வி (பொது பட்டியல்) ஆகியவை எந்தவொரு அரசாங்கத்தின் மிக முக்கியமான இரண்டு சமூக உள்கட்டமைப்பு விஷயங்கள் ஆகும். சுகாதாரம் நீண்ட ஆயுளை உறுதி செய்யும் அதே வேளையில், கல்வி பொருளாதார செழிப்பை உறுதி செய்கிறது. இவை இரண்டும் சமூக-பொருளாதார முன்னேற்றத்தை உறுதி செய்கிறது. சுகாதாரம் மாநில பட்டியலில் உள்ளது என்றாலும், மத்திய அரசின் நேரடி கட்டுப்பாட்டின் கீழ் பல மருத்துவமனைகள் மற்றும் திட்டங்கள் உள்ளன. அவை மத்திய பட்ஜெட் மற்றும் பிற நிதி வடிவங்களில் இருந்து நிர்வகிக்கப்படுகின்றன. பொதுப் பட்டியலில் உள்ள கல்வி ஒரு சுவாரஸ்யமான கலவையைக் கொண்டுள்ளது. இதில் பல சிக்கல்கள் இருந்தாலும், எனது கவனம் மூன்று விஷயங்களில் உள்ளது - பள்ளிகள், உயர்கல்வியில் சேர்க்கை மற்றும் உயர்கல்விக்குப் பிறகு பட்டப்படிப்பு. முதலில் பள்ளிக் கல்வியுடன் தொடங்குவோம்.

உயர்கல்வியுடன் ஒப்பிடும்போது பள்ளிக் கல்வியின் அளவு மிகப்பெரியது. இந்தியா முழுவதும் சுமார் 14.7 லட்சம் பள்ளிகள் உள்ளன. இவற்றில் 2.6 லட்சம் பள்ளிகள் நகர்ப்புறத்திலும் மீதமுள்ளவை கிராமப்புறத்திலும் உள்ளன. இவற்றில், சுமார் 75% அரசுப் பள்ளிகள் (70% அரசு நடத்தும் பள்ளிகள், 5% அரசு உதவி பெறும் பள்ளிகள்). இப்பள்ளிகள் அடிப்படை கல்வி முதல் இடைநிலைக் கல்வி வரை சுமார் 24 கோடி மாணவர்களுக்கு கல்வியை வழங்குகின்றன. இதில் 1 கோடி ஆசிரியர்கள் பணிபுரிகின்றனர். பள்ளிக் கல்வியில் மாநில அரசுகளின் பங்கு தனித்துவமானது. குறிப்பாக பள்ளிக் கல்வியை வளர்ப்பதற்கான மொத்த பட்ஜெட் ஒதுக்கீட்டில் தமிழ்நாடு குறிப்பிடத்தக்க பங்கைக் கொண்டுள்ளது. மேலும் இதில் முன்னோடியாகவும் உள்ளது.

பெரும்பாலான பள்ளிகள் மாநில அரசுகளால் நடத்தப்படுகின்றன என்பதையும், அவற்றில் பெரும்பாலானவை கிராமப்புறங்களில் உள்ளன என்பதையும் கருத்தில் கொண்டு, மத்திய-மாநில உறவு எவ்வளவு முக்கியமோ, அதே அளவுக்கு இதை ஒரு வலுவான மத்திய-மாநில-பஞ்சாயத்து உறவாக மாற்ற பஞ்சாயத்துக்களையும் இதில் இணைத்துக் கொள்வது முக்கியம். மகாத்மா காந்தியின் "கிராம சுயராஜ்ஜியத்தை" யதார்த்தமாக்க கிராமப்புறங்களில் உள்ள பள்ளிகளுக்கு மத்திய மற்றும் மாநில அரசின் கூடுதல் உதவி மற்றும் ஆதரவு அவசியமாகிறது.