Cat in Cantonese

裝部 PC 打機

2015-11-29T12:51:00.000+08:00

上一次自己裝 PC 已經係 11 年前。嗰時啱入大學，淘汰咗中學部機，然後裝過部新嘅。後嚟 HP 嚟學校做促銷，買咗部 laptop，之後就一直冇重返過 desktop。到畢業嘅時候，買咗人生第一部 Mac，從此同 PC 講拜拜。

用 Mac 嘅早大問題當然係打機唔方便。Steam 𠵱𠺢有好多 indie game，好多都支持 Mac 甚至 Linux，但係喺 indie game 爆發之前，Mac 上邊根本冇咩玩得，一定要用 Boot Camp 裝個 Windows 先至有機打。不過 MacBook 嘅顯卡實在係太差啦，新啲嘅大作都玩唔到，所以後嚟換咗部 MacBook Pro，有獨立顯卡嘅。

呢部 MacBook Pro 陪伴我到打完 Bioshock Infinite 為止，之後就退役啦。手上淨返一部公司嘅 MacBook Pro 同自己嘅 MacBook Air，又挨咗段時間。公司嘅 MacBook Pro 係第一代有 Retina Display 嘅版本，當然有獨立顯卡啦，最初仲可以將分辨率開最高打 StarCraft 2 或者 Diablo 3 𠻹。𠵱𠺢慢慢就唔得啦，要分辨率就要放棄畫質。最大嘅問題係，公司機唔可以用 Boot Camp 裝 Windows，所以最新嘅游戲冇 Mac 版就冇得玩。

我有試過用 console 嚟解決打機嘅問題㗎，舊年 Thanksgiving 就買咗打折嘅 PS4 GTA5 bundle。坐喺沙發道打機，比較適合放鬆咁打，唔適合玩啲太過競技性嘅游戲。而且我都仲係習慣用鍵盤鼠標多過用手製，要求高嘅動作我用手製做唔到。

今年 Fallout 4 要出啦，我喺 Steam 上買嘅 Fallout: New Vegas 都未玩過。而且我仲揾 Blizzard 嘅 friend 要咗個 Overwatch beta invite，冇 PC 就冇得玩。諗嚟諗去，最終都係想買部 PC。話說自己從嚟未擁有過一張靚顯卡，不如就趁今次滿足一下啦！

之後我開始睇 PC Gamer 之類嘅網站做 research，最終確定落嚟嘅配置係咁樣嘅。顯卡作為重點，佔咗 1/3 嘅價錢。希望投資係值得嘅，可以用多幾年唔換機。我連升級方案都諗埋㗎啦，顯卡可以 SLI，內存直接 double，SSD 可以買多個 M.2 接口嘅速度更快，CPU 就超頻啦（買 6600k 就係為咗將嚟可以超頻）。升完級就應該變成咁。當然一切嘅前提係等到我要升級時所有要 double 嘅配件都仲有得賣，唔係嘅話就冇得升，最終相當於買新嘅。

雖然我可以按照 PCPartPicker 提供嘅最低價從唔同嘅網站買齊所有配件，但我最終都係喺 Amazon 買曬所有嘢，只有機箱係喺 Best Buy 買嘅因為 Amazon 冇貨。我對比過價錢，如果一件嘢 Amazon 唔係最抵，亦唔會比最抵貴多過 $10。因為 Amazon 一定可以 Prime，咁我就懶得同唔同網站打交道啦。

我從星期一開始落單，到星期五全部送到。我計劃星期五晚裝好，然後週末有機打。裝之前我仲諗過拍 time lapse。要輸出 1 分鐘嘅 time lapse，按 60 FPS 計要影 3600 張。我覺得我一個鐘就裝得完，所以 GoPro 設好 1 分鐘 1 張，裝喺三腳架上俯視視角拍攝。結果我裝咗 4 粒鐘⋯⋯

裝嘅過程中發咗幾次傻，浪費咗唔少時間。例如話，主板裝咗入機箱後先發覺 CPU 散熱要裝主板背面，只好卸返落嚟再裝過。比較得意嘅係接電源線。第一次買 fully modular 嘅電源，發現同以前電源出嚟一堆 Molex 線唔同，電源同線係分離嘅，要用到嘅線先接上去，咁就唔會有多餘嘅線留喺機箱入邊。主板接咗電之後 CPU 仲要一條獨立電纜備電，而顯卡就更離譜啦，要接兩條 GPU 電纜。難怪𠵱𠺢啲機器咁吃電啦！

裝完之後已經 12 點，第一次啟動竟然成功，不過因為無線鍵盤輸入呵到冇辦法裝 Windows，第二日揾人借咗個有線鍵盤之後先搞掂。然後將 Steam、Battle.net 等等一大堆嘢裝曬上去，跟住繼續打我 Mac 上未完成嘅 Legacy of The Void。

我冇買顯示器，暫時用 HDMI 接電視打機，連音箱都悭返！（我嘅電視有接 sound bar 所以音響效果仲唔錯。）今次裝完機，至少証明自己仲係識裝機嘅，以後有咩要搞仲可以自己喐手。

Posterous 要關門啦

2013-03-04T07:28:00.001+08:00

我中意用 Posterous 嚟發廣東話 blog post，係因為喺 iPhone 上用筆畫輸入廣東話方便，而 iPhone 上冇好用嘅 Blogger client，所以惟有用 Posterous 嚟發，然後利用佢強大嘅 autopost 轉發到 Blogger。好可惜嘅係，Posterous 被 Twitter 收購後就準備唔做啦，所以我要繼續揾下一個好用嘅 iPhone Blogger client。

唔知點解 MarsEdit 咁經典嘅 Mac Blogger client 就係唔出 iPhone 版。如果佢出嘅話我一定願意買。依家我喺 Mac 上就用 Byword 嚟寫 blog post 然後用 MarsEdit 嚟發，將嚟估計要喺 iPhone 上用 Byword 嚟寫，然後 Dropbox 同步到 Mac 後再發，真係幾煩下。

無論點都好啦，如果你仲睇𡁵我嘅 Posterous，咁就係時候轉去睇 cantonese.catchen.me 啦。

Posted via email from Cat Chen's Cantonese Posterous

Apple EarPods

2012-10-13T16:09:00.001+08:00

今日行過公司 IT 附近嘅 hardware vending machine，碌卡攞咗副 Apple EarPods，然後將我手上嘅 Apple Earphones 放低。用 iPhone 聽咗下，覺得區別唔大，就係清晰咗啲，同埋冇咁易甩出嚟。線控大咗，不過用下就慣。最好嘅一點係終於有捆線盒，啲線再都唔會亂繞。

Posted via email from Cat Chen's Cantonese Posterous

香港機場貴价餐

2012-09-29T13:45:00.001+08:00

經香港中轉去三番市，中午喺機場食，HK$ 98 一個班魚球套餐。碗粥上嚟嘅時候睇落去咩都冇，翻一翻發現仲係有班魚有瑤柱嘅。
香港機場乜都好，就係有得充電。我部 iPhone 4S 被我用嚟上網上到冇曬電，都只可以用 MacBook Air 嚟幫佢充。

Posted via email from Cat Chen's Cantonese Posterous

iPad 裂屏維修

2012-08-11T10:41:00.001+08:00

上個星期同只貓喺床上玩，一個唔覺意 iPad 就跌咗落地，然後裂痕貫穿整個屏幕。雖然唔影響觸摸（亦都有人話慢慢會影響觸摸反應），但我覺得仲係要修嘅，因為裂痕好影響閱讀。
上 Twitter 問大家 iPad 裂屏可以點修，原嚟 Apple 官方修要兩千幾，買所謂嘅「原裝屏幕」就只要幾百。我嘅係 64GB Wi-Fi 版，兩千幾修一下仲可以接受。後嚟上 Apple 官網確認，裂屏屬於 Out-of-Warranty 維修，第三代 iPad 無論型號一律收 $300，所以越貴嘅型號維修費用比例越低。
我去香港修或者去北京修都得，只不過香港 Genius Bar 隨約隨有，北京就因為黃牛黨搗亂而經常約滿，所以比較難約。此外，$300 喺香港交就唔使稅，喺北京交就要加 17% 增值稅，所以我最後選擇去香港修。
星期一我一早出門口去搭直通車，發現即刻走嗰班已經冇票，而下一班亦都冇曬一等票。等我排隊排到窗口嘅時候，下一班就淨翻一張特等票啦，咁我梗係要啦，因為再下一班就要中午先開出咯。我去到紅磡就速速西鐵轉地鐵過香港，然後上 IFC Mall 揾 Apple Store。
香港 Apple Store 嘅服務好似係比北京好啲。我 1:20 入去話有 1:30 嘅 appointment，即刻就有人話「咁我宜家幫你睇睇係咩問題啦」。佢好 nice 咁話我知裂屏要 charge HK$ 2368，我都預咗㗎啦，所以就話冇問題，叫佢先確認下係唔係即刻有得換。之後佢去倉庫幫我攞 replacement unit，裨我睇過開機 check 過冇問題之後再碌卡。
所謂 replacement unit，外面睇落去係全新嘅，入邊係點就唔知啦。搞掂之後同個 friend 出去食咗個唔知仲算唔算 lunch 嘅 lunch，之後佢去上班我搭直通車返歸。

Posted via email from Cat Chen's Cantonese Posterous

我返到廣州啦！

2012-05-15T12:41:00.001+08:00

前日下午 7 點鍾降落喺白雲機場，正式開始我喺廣州嘅生活。今次返嚟唔係度假，而係長期工作。我會繼續喺豌豆莢做，只不過工作地點換成咗我廣州。之後正常上班落班（包括星期六），要開會就打電話。

之後廣州有咩活動，大家可以叫埋我，不過記得我星期六都要上班就係啦。我一個月至少要返北京一次，所以北京嘅聚會仲可以偶爾參加下。如果有人要幫手帶嘢，亦都可以揾我。

P.S. 如果珠三角有人對豌豆莢嘅任何職位感興趣，都可以揾我。

Posted via email from Cat Chen's Cantonese Posterous

豐盛嘅晚餐

2012-02-26T19:13:00.001+08:00

今日下午去望京同人傾嘢，好快搞掂之後返屋企又唔係好，唔返又唔知做乜好，於是決定順路去 IKEA 睇睇。結果發現今日係 IKEA 冬季促銷最後一日，人多到爆，門口等的士排長隊。我即刻決定唔買大件嘢，拾啲三文魚就走。
返到屋企想煲湯但係冇肉，懶得落街買所以用章魚煲菜乾。因為最近呢兩日突然間掛住臘腸香，所以就做咗個臘味飯。加埋三文魚，一個人三個送。估計我食唔曬，唔知點算好，只有湯可以留低分裨其他人。
P.S. 唔知點解，當我烤三文魚嘅時候就會想嚟呢度寫嘢。

Posted via email from Cat Chen's Cantonese Posterous

公司嘅貓好中意撕紙

2011-12-18T00:22:00.001+08:00

佢未到 6 個月，未明白自己嘅尾巴係咩回事。如果你將佢條尾塞裨佢咬，佢照樣會這咬。

Posted via email from Cat Chen's Cantonese Posterous

小米二奶機到手

2011-12-12T23:43:00.001+08:00

作為一個被 iPhone 寵壞咗嘅用戶，Android 一直對我冇乜吸引力。不過，既然公司做嘅係 Android 產品，我點都要揾返部 Android 手機，唔係點做 dogfooding？我最想要嘅就梗係 Galaxy Nexus 啦，不過佢未有港版，英版又貴又難搞過嚟。小米雖然冇乜吸引力，但又冇乜衰，而且作為二奶機 2000 蚊仲可以接受，咁就佢啦。
部機到手後，實在係驚喜不斷。首先，作為多年 iPhone 用戶，我已經唔記得手機點樣開後蓋換電池啦。裝好電池之後著機，發覺唔記得插 SIM 卡，於是再次開後蓋將我張聯通 3G 數據卡塞入去。然後……Android 插 SIM 卡之後竟然要重啟？iPhone 一直可以熱插拔嘎！
著機之後裝嘅第一個 app 當然係豌豆莢啦，然後用佢嚟揾其它 app。好多 Android Market 上唔裨裝嘅 app 國內都可以揾到翻版，而且仲唔使錢，不過乾唔乾淨就唔知啦。我比較中意 next.wandoujia.com，因為佢係网頁直接推送，唔使裝任何 Windows 軟件。
係有 iPhone 4 嘅情況下，我真係冇乜動力將部小米手機攞出嚟用，所以佢只可以做二奶機。由於佢只係二奶機，所以我唔用佢嚟打電話發短信，只用嚟當 iPod Touch 用，塞張數據卡入去就算。如果真係要打電話，我就用 3G 打 Skype。
Android 比 iPhone 有意思嘅地方係 activity 嘅設計。例如話，輸完電話號碼後可以用 Skype 撥打而唔用電話撥打。不過，Android 用電太快，所以成日都要充。即使我一日其本上唔點用，佢都會冇𡁵大半電，實在係頂唔順！

Posted via email from Cat Chen's Cantonese Posterous

烤三文魚都好好食〜

2011-09-07T00:07:00.001+08:00

喺未買烤箱之前，有冰鮮三文魚就用嚟煎，結果煎到乾嗮，一啲都唔好食。今晚嘗試咗一下烤三文魚，發覺非常好味。

做法好簡單：將椒鹽抹喺三文魚表面，醃 20 分鐘。將三文魚放入預熱好嘅烤箱， 200 度烤，每一面烤 10 分鐘。

P.S. 今日淨係影低咗成品個樣，下次再整可以再 update 啲相。

Posted via email from Cat Chen's Cantonese Posterous

白飯加菜心要幾錢？

2011-08-19T19:54:00.001+08:00

白飯加菜心要幾錢？喺首都機場就賣 ¥18 。反正南航幾點嘅航班都有正餐，晚飯時間求祈食啲就算啦。呢個亦都係我一直飛南航嘅原因。如果飛國航，非正餐時間就得一個爛鬼燒餅——兩塊烤乾嘅麵餅中間夾一片火腿肉，我就一定先食餐勁嘅再登機。

Posted via email from Cat Chen's Cantonese Posterous

燒雞翼我中意食〜

2011-08-13T15:02:00.001+08:00

上週烤箱終於有貨，我喺京東落單後第二日就送到啦，於是我決定烤啲雞翼帶返公司分享。

星期四早上一早起床醃雞翼，用咗一罐可樂同等量嘅李錦記豉油機汁。浸咗廿分鐘後開始烤，每一面烤十分鐘保證熟。然後擦蜜糖同撒芝麻，再每一面烤兩分鐘就搞掂啦。

P.S. 烤嘅過程中，我發現長帝烤箱嘅計時器有問題，如果佢唔嘀嗒響，就證明佢被卡住咗無向前走。

Posted via email from Cat Chen's Cantonese Posterous

廣東話 blog 開張啦！

2011-08-09T14:56:00.004+08:00

好早之前我就設置好咗 cantonese.catchen.me 呢個域名，只係從未通過 Blogger 發表任何文章，主要係因為唔知寫乜好，而且喺電腦上輸入廣東話亦都唔方便。
後嚟我發現 iPhone 上用筆畫輸入廣東話比較方便，可惜 iPhone 上冇好用嘅 Blogger 客戶端，所以只好繼續擱置。最近我突然惗起， Posterous 有非常好嘅 iPhone client ，點解唔用佢嚟寫呢？然後利用 autopost 功能自動轉發到 Blogger 就可以啦。
不過，既然我都用 Posterous post 啦，點解仲要同步到 Blogger ？其實都冇乜點解，我暫時想保持幾個主 blog 都用 Blogger ，所以先咁做。將嚟想要完全切換到 Posterous 亦都唔難，改一下域名（同埋 feed ）嘅指向就係啦。

Posted via email from Cat Chen's Cantonese Posterous