റിയാദ്: വണ്ടൂര്‍ ഏരിയ വെല്‍ഫെയര്‍ അസോസിയേഷന്‍ ജനറല്‍ ബോഡിയും കുടുംബസംഗമവും റിയാദ് മദീന ഹൈപ്പര്‍മാര്‍ക്കറ്റ് ഓഡിറ്റോറിയത്തില്‍ നടന്നു. സാംസ്‌കാരിക സമ്മേളനത്തില്‍ സഗീര്‍ ഇ.പി. അധ്യക്ഷത വഹിച്ചു. പ്രവര്‍ത്തന ഫണ്ട് ശേഖരണാര്‍ഥം ജൂലൈയില്‍ സംഘടിപ്പിച്ച ബിരിയാണി ചലഞ്ചിന് പിന്തുണ നല്‍കിയവരെ ചടങ്ങില്‍ ആദരിച്ചു.

ജനറല്‍ ബോഡിയില്‍ സെക്രട്ടറി സക്കീര്‍ എം.പി. പ്രവര്‍ത്തന റിപ്പോര്‍ട്ടും ട്രഷറര്‍ ഇന്‍ചാര്‍ജ് ആതിഫ് ചെറുകോട് സാമ്പത്തിക റിപ്പോര്‍ട്ടും അവതരിപ്പിച്ചു. റിപ്പോര്‍ട്ടുകളും ബൈലോ ഭേദഗതികളും യോഗം അംഗീകരിച്ചു.

പി.എം.എ. ജലീല്‍, നസീര്‍ പി.കെ. എന്നിവരുടെ നേതൃത്വത്തില്‍ പുതിയ ഭാരവാഹികളെ തിരഞ്ഞെടുത്തു. നിസാര്‍ കൊണ്ടാടന്‍ (പ്രസിഡന്റ്), സജീല്‍ റഹ്മാന്‍ പന്നിക്കോടന്‍ (ജനറല്‍ സെക്രട്ടറി), ആതിഫ് പൂവതിക്കല്‍ ചെറുക്കോട് (ട്രഷറര്‍) എന്നിവരെ പ്രധാന ഭാരവാഹികളായി തിരഞ്ഞെടുത്തു. കൂടാതെ 17 അംഗ എക്‌സിക്യൂട്ടീവ് കമ്മിറ്റിയെയും 13 അംഗ രക്ഷാധികാരി സമിതിയെയും യോഗം തെരഞ്ഞെടുത്തു. സംഘടനയുടെ സീനിയര്‍ നേതാക്കളായ അസൈനര്‍ പി.പി., റഹ്മത് കള്ളിയില്‍, സഫീര്‍ തലാപ്പില്‍ എന്നിവര്‍ പ്രസംഗിച്ചു.

കുടുംബസംഗമത്തില്‍ കുട്ടികളുടെയും മുതിര്‍ന്നവരുടെയും വിവിധ കലാവിനോദ പരിപാടികള്‍ അരങ്ങേറി. കണ്‍വീനര്‍ സജീല്‍ റഹ്മാന്‍ പന്നിക്കോടന്റെ നേതൃത്വത്തില്‍ അനീഷ് ബാബു കെ.കെ., അസൈനര്‍ ഒബൈയര്‍, യാസിര്‍ ഇ.പി., നവാബ്, ഫൈസല്‍ ടി.എം.എസ്., സല്‍മാന്‍ ഫാരിസ്, ഷമില്‍ പി.ടി., മൂസക്കോയ, സൂരജ്, അക്ബര്‍ വാളശ്ശേരി, റിയാസ് ടി.പി., സജില്‍ പി.പി., അഷറഫ് മോയിക്കല്‍ എന്നിവര്‍ പരിപാടികള്‍ക്ക് നേതൃത്വം നല്‍കി. ജനറല്‍ സെക്രട്ടറി സക്കീര്‍ എം.പി. സ്വാഗതം പറഞ്ഞു.

റിയാദ്: ഇന്ത്യന്‍ നഗരങ്ങളിലേക്കു റിയാദില്‍ നിന്നു ഫ്‌ളൈനാസ് വിമാന സര്‍വീസുകളുടെ പുതിയ ഷെഡ്യൂള്‍ പ്രഖ്യാപിച്ചു. കോഴിക്കോട്, ന്യൂഡല്‍ഹി, ഹൈദരാബാദ് സെക്ടറുകളിലേക്കാണ് സര്‍വീസുകള്‍. കോഴിക്കോട്-റിയാദ് നവംബര്‍ 6 വെള്ളി പ്രത്യേക സര്‍വീസ് നടത്തും. റിയാദില്‍ നിന്ന് കോഴിക്കോട്ടേക്ക് ഫ്‌ളൈറ്റ് നമ്പര്‍ 327ഉും തിരിച്ചു നമ്പര്‍ 328ഉും സര്‍വീസ് നടത്തും. എല്ലാ വെളളി ദിവസങ്ങളിലും ഇതു തുടരും.

ഡല്‍ഹി-റിയാദ് സെക്ടറില്‍ നവംബര്‍ 1 മുതല്‍ 5 വരെ ആഴ്ചയില്‍ മൂന്ന് ദിവസങ്ങളില്‍ (ചൊവ്വ, വ്യാഴം, ഞായര്‍) സര്‍വീസുകള്‍ ഉണ്ടായിരിക്കും. റിയാദില്‍ നിന്ന് ഡല്‍ഹിയിലേക്കു ഫ്‌ളൈറ്റ് നമ്പര്‍ 329ഉും റിയാദിലേക്കു 330ഉും സര്‍വീസ് നടത്തും.

ഹൈദരാബാദ്-റിയാദ് സെക്ടറില്‍ നവംബര്‍ 4 ബുധനാഴ്ചയും നവംബര്‍ 7 ശനിയാഴ്ചയും സര്‍വീസുകള്‍ ലഭ്യമാണ്. ബുധന്‍, ശനി ദിവസങ്ങളില്‍ റിയാദ്-ഹൈദരാബാദ് സര്‍വീസിന് ഫ്‌ളൈറ്റ് നമ്പര്‍ 325ഉം തിരിച്ചുള്ള സര്‍വീസിന് 326ഉം സര്‍വീസ് നടത്തുമെന്നാണ് ഫ്‌ളൈനാസ് അറിയിച്ചിരിക്കുന്നത്.

ഇന്ത്യന്‍ വിമാന കമ്പനികള്‍ സൗദിയിലേക്ക് സര്‍വീസ് താല്‍ക്കാലികമായി നിര്‍ത്തിയ സാഹചര്യത്തില്‍ പ്രവാസി യാത്രക്കാര്‍ക്ക് ഏറെ ഉപകാരപ്രദമാകുന്ന രീതിയിലാണ് വിവിധ ഇന്ത്യന്‍ നഗരങ്ങളിലേക്കുള്ള വിമാന സര്‍വീസുകള്‍ ക്രമീകരിച്ചിട്ടുള്ളത്.

റിയാദ്: മൂന്നര പതിറ്റാണ്ടിലേറെ നീണ്ട പ്രവാസി ജീവിതം അവസാനിപ്പിച്ച് നാട്ടിലേക്ക് മടങ്ങുന്ന കെ.എം.സി.സി മുതിര്‍ന്ന നേതാവും റിയാദ് കെ.എം.സി.സി സെന്‍ട്രല്‍ കമ്മിറ്റി മുന്‍ ചെയര്‍മാനുമായ അബ്ദുല്‍ സലാം തൃക്കരിപ്പൂരിന് കെ.എം.സി.സി കാസര്‍ഗോഡ് ജില്ലാ കമ്മിറ്റി യാത്രയയപ്പ് നല്‍കി.

ശുമൈസി കോയിന്‍സ് റെസ്‌റ്റോറന്റ് ഹാളില്‍ നടന്ന യാത്രയയപ്പ് സംഗമം സെന്‍ട്രല്‍ കമ്മിറ്റി പ്രസിഡന്റ് സി.പി. മുസ്തഫ ഉദ്ഘാടനം ചെയ്തു. ജില്ലാ ആക്ടിങ് പ്രസിഡന്റ് ഷമീം ബാങ്കോട് അധ്യക്ഷത വഹിച്ചു. നാഷണല്‍ കെ.എം.സി.സി ഉപാധ്യക്ഷന്‍ ഉസ്മാന്‍ അലി പാലത്തിങ്ങല്‍ മുഖ്യപ്രഭാഷണം നടത്തി.

സെന്‍ട്രല്‍ കമ്മിറ്റി ജനറല്‍ സെക്രട്ടറി ഷുഹൈബ് പനങ്ങാങ്ങര, ഷംസു പെരുമ്പട്ട, റഹീം സോങ്കാല്‍, എം.ടി.പി. സാലി, മഷൂദ് തളങ്കര, ടി.എ.ബി. അഷ്‌റഫ്, ഫസല്‍ പടന്ന, ഇബ്രാഹിം മഞ്ചേശ്വരം എന്നിവര്‍ പ്രസംഗിച്ചു. അബ്ദുല്‍ സലാം തൃക്കരിപ്പൂര്‍ മറുപടി പ്രസംഗം നടത്തി. ജില്ലാ ജനറല്‍ സെക്രട്ടറി അഷ്‌റഫ് മീപ്പിരി സ്വാഗതവും ട്രഷറര്‍ ഇസ്മായില്‍ കാരോളം നന്ദിയും പറഞ്ഞു. ശരീഫ് ബായാര്‍, മജീദ് സോങ്കാല്‍, ഇസ്ഹാഖ് ഫാല്‍ക്കണ്‍, യാസിര്‍ കോപ്പ, ജമാല്‍ വള്‍വക്കാട്, ഖാദര്‍ നാട്ടക്കല്‍, സുബൈര്‍ കാരോളം, നസീര്‍ തൃക്കരിപ്പൂര്‍, അസ്‌കര്‍ പാറക്കട്ടെ, അസീസ് കജെ തുടങ്ങിയവര്‍ പരിപാടിക്ക് നേതൃത്വം നല്‍കി.

നോര്‍ക്ക കെയറും ഇടതുപക്ഷത്തിന്റെ അവകാശവാദങ്ങളും
പ്രവാസി മലയാളികളുടെ ക്ഷേമത്തിനായി രൂപകല്‍പ്പന ചെയ്ത പദ്ധതികളെ രാഷ്ട്രീയ നേട്ടങ്ങള്‍ക്കായി വളച്ചൊടിക്കുന്ന പ്രവണത വ്യാപകമാണ്. നോര്‍ക്ക കെയര്‍ ആരോഗ്യ ഇന്‍ഷുറന്‍സ് പദ്ധതി പിണറായി സര്‍ക്കാരാണ് ആരംഭിച്ചതെന്ന ഇടതുപക്ഷത്തിന്റെ അവകാശവാദങ്ങളും വീമ്പുപറച്ചിലുകളും തികച്ചും അടിസ്ഥാനരഹിതമാണ്. ചില ഇടതു അനുകൂല പ്രവാസി കൂട്ടായ്മകളും ഇത് ഏറ്റുപിടിക്കുന്നുണ്ട്. യഥാര്‍ത്ഥത്തില്‍ 2012ല്‍ ഉമ്മന്‍ചാണ്ടി സര്‍ക്കാരിന്റെ കാലത്ത് ആരംഭിച്ച ‘നോര്‍ക്ക പ്രവാസി രക്ഷാ ഇന്‍ഷുറന്‍സ് പോളിസി’യുടെ സ്വാഭാവികമായ തുടര്‍ച്ചയാണ് നോര്‍ക്ക കെയര്‍. അതേസമയം, നോര്‍ക്ക കെയറിന്റെ പ്രീമിയം തുക വര്‍ധിപ്പിച്ചത് സര്‍ക്കാര്‍ സര്‍ക്കാര്‍ ഗൗരവമായി പരിശോധിക്കണം.

2012ലെ ഉമ്മന്‍ചാണ്ടി സര്‍ക്കാരിന്റെ പ്രവാസി രക്ഷാ ഇന്‍ഷുറന്‍സ്
പ്രവാസി മലയാളികളുടെ ആവശ്യങ്ങള്‍ മാനിച്ച് 2012ല്‍ ഉമ്മന്‍ചാണ്ടി സര്‍ക്കാരിന്റെ കാലത്താണ് നോര്‍ക്ക റൂട്ട്‌സിന്റെ കീഴില്‍ ‘പ്രവാസി രക്ഷാ ഇന്‍ഷുറന്‍സ് പദ്ധതി’ക്ക് തുടക്കക്കമിടുന്നത്. വിദേശത്ത് തൊഴിലെടുക്കുന്ന സാധാരണക്കാരായ പ്രവാസികള്‍ക്ക് വലിയ സാമ്പത്തിക ഭാരമില്ലാതെ ചികിത്സാ സഹായം ഉറപ്പാക്കുക എന്ന ലക്ഷ്യത്തോടെ രൂപകല്‍പന ചെയ്ത പദ്ധതിയിലൂടെ, 18നും 60നും ഇടയില്‍ പ്രായമുള്ള എല്ലാ പ്രവാസികള്‍ക്കും വെറും 661 രൂപ പ്രീമിയം അടച്ചാല്‍ ആരോഗ്യ സുരക്ഷ ഉറപ്പുവരുത്താന്‍ സാധിച്ചിരുന്നു. ഈ കുറഞ്ഞ പ്രീമിയത്തിലൂടെ ആയിരക്കണക്കിന് പ്രവാസികള്‍ക്കാണ് അന്ന് ഒരു ലക്ഷം രൂപാ ചികിത്സാ ധനസഹായവും മൂന്നു ലക്ഷം രൂപ മരണാനന്തര സഹായവും ലഭിച്ചത്.

നോര്‍ക്ക കെയര്‍ ഉദ്ഘാടനവും തിരഞ്ഞെടുപ്പ് പ്രചാരണങ്ങളും
എന്നാല്‍ പത്തുവര്‍ഷം കേരളം ഭരിച്ച പിണറായി സര്‍ക്കാര്‍ ഒന്‍പത് വര്‍ഷം പിന്നിട്ടപ്പോഴും പ്രവാസികള്‍ക്കായി പുതുതായി യാതൊരു ക്ഷേമ പദ്ധതിയും ആവിഷ്‌കരിച്ചില്ലെന്ന ആക്ഷേപം ശക്തമായി. ഒടുവില്‍ തിരഞ്ഞെടുപ്പ് നേരിടേണ്ടിവന്ന ഘട്ടത്തില്‍, മുന്‍കാല യുഡിഎഫ് സര്‍ക്കാരിന്റെ പ്രവാസി രക്ഷാ ഇന്‍ഷുറന്‍സ് പദ്ധതിയുടെ സ്ഥാനത്ത് ‘നോര്‍ക്ക കെയര്‍’ എന്ന പേരില്‍ പുതിയ പദ്ധതി 2025 സെപ്റ്റംബര്‍ 22ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യുകയായിരുന്നു. ഇതൊരു തിരഞ്ഞെടുപ്പ് പ്രചാരണം മാത്രമാണെന്ന് അന്നേ വ്യാപക വിമര്‍ശനങ്ങള്‍ ഉയര്‍ന്നിരുന്നു. ഗള്‍ഫ് നാടുകളില്‍ ഇടതു പ്രവാസി കൂട്ടായ്മകളുടെ നേതൃത്വത്തില്‍ ഇതിന്റെ പ്രചാരണങ്ങള്‍ക്കു വാട്‌സാപ്പ് ഗ്രൂപ്പുകള്‍ക്കു രൂപം നല്‍കുകയും അംഗങ്ങളെ ചേര്‍ക്കാന്‍ ക്യാമ്പയിനുകള്‍ സജീവമാക്കുകയും ചെയ്തു. പ്രവാസി ക്ഷേമം മുന്‍നിര്‍ത്തി യുഡിഎഫിനോട് ചേര്‍ന്നുനില്‍ക്കുന്ന പ്രവാസി കൂട്ടായ്മകളു പദ്ധതിക്ക് പ്രോത്സാഹനം നല്‍കിയിരുന്നു.

നോര്‍ക്ക കെയറിലെ അശാസ്ത്രീയമായ പ്രീമിയം വര്‍ധന
തുടക്കത്തില്‍ 7,500 രൂപ മുതല്‍ ആരംഭിച്ചിരുന്ന വാര്‍ഷിക പ്രീമിയം തുക പിന്നീട് ഗണ്യമായി വര്‍ധിപ്പിച്ചതോടെയാണ് നോര്‍ക്ക കെയര്‍ നിലവില്‍ വലിയൊരു പ്രതിസന്ധിയിലേക്ക് നീങ്ങിയത്. 3 ലക്ഷം മുതല്‍ 1 കോടി വരെയുള്ള എട്ട് സ്ലാബുകളിലായി കുടുംബങ്ങള്‍ക്ക് 13,411 രൂപ മുതല്‍ 44,364 രൂപ വരെയുള്ള ഉയര്‍ന്ന നിരക്കുകളാണ് പ്രഖ്യാപിച്ചിട്ടുള്ളത്. പങ്കാളിയും രണ്ട് കുട്ടികളും അടങ്ങുന്ന കുടുംബത്തിന് 5 ലക്ഷം രൂപയുടെ കവറേജിന് 13,411 രൂപയും, ഉയര്‍ന്ന പരിരക്ഷാ വിഭാഗങ്ങളില്‍ 44,000 രൂപയ്ക്ക് മുകളിലും പ്രീമിയം നല്‍കേണ്ട അവസ്ഥയാണുള്ളത്. പുതിയ പദ്ധതിയില്‍ പ്രായപരിധി എടുത്തുകളഞ്ഞു എന്ന അവകാശവാദങ്ങള്‍ ഉയരുമ്പോഴും, പ്രായം കൂടുന്തോറും വന്‍ തുക പ്രീമിയം ഈടാക്കുന്നതിനാല്‍ മുതിര്‍ന്ന പ്രവാസികള്‍ക്ക് ഇത് അപ്രാപ്യമായി മാറുകയാണ്. കുടുംബാംഗങ്ങളെയും പ്രായമായ മാതാപിതാക്കളെയും ഇന്‍ഷുറന്‍സ് പരിധിയില്‍ ഉള്‍പ്പെടുത്താന്‍ ശ്രമിക്കുന്ന സാധാരണക്കാരായ പ്രവാസികള്‍ക്ക് താങ്ങാന്‍ കഴിയാത്തത്ര വലിയൊരു സാമ്പത്തിക ബാധ്യതയായി ഇത് മാറിക്കഴിഞ്ഞു.

കൃത്യമായ പഠനമില്ലാത്തത് സര്‍ക്കാര്‍ വീഴ്ച
കോണ്‍ഗ്രസ് സര്‍ക്കാരിന്റെ കാലത്ത് പ്രവാസികള്‍ക്കായി അടിത്തറയിട്ട പദ്ധതിയെ കാലാനുസൃതമായി മെച്ചപ്പെടുത്തുന്നതില്‍ പരാജയപ്പെട്ട ഇടത് സര്‍ക്കാര്‍, 661 രൂപക്ക് പകരം 7500 രൂപയിലേക്ക് പ്രീമിയം കുത്തനെ കൂട്ടി പ്രവാസികളെ വാഗ്ദാനങ്ങളുടെ മായാവലയത്തിലാക്കി കൊള്ളയടിക്കുന്ന നിലപാടാണ് സ്വീകരിച്ചത്. തിരഞ്ഞെടുപ്പ് മുന്നില്‍ക്കണ്ടുള്ള പ്രൊപ്പഗണ്ട എന്നതിനപ്പുറം കൃത്യമായ പഠനമില്ലാതെയാണ് നോര്‍ക്ക കെയര്‍ ഇന്‍ഷുറന്‍സ് പദ്ധതിക്ക് രൂപം നല്‍കിയതെന്ന് വേണം കരുതാന്‍. അതിന്റെ ദുരന്തമാണ് ഒരു വര്‍ഷം പിന്നിട്ടപ്പോള്‍ അതേപടി പദ്ധതി നടപ്പിലാക്കാന്‍ കഴിയാത്ത സാഹചര്യം സൃഷ്ടിച്ചത്.

വിശ്വാസ്യത തകരുന്നു; പ്രവാസികളുടെ ആശങ്കകള്‍
അതേസമയം, അശാസ്ത്രീയമായ പ്രീമിയം വര്‍ധനയും കൃത്യമായ ക്ലെയിം സെറ്റില്‍മെന്റുകളെക്കുറിച്ചുള്ള അവ്യക്തതകളും പദ്ധതിയുടെ വിശ്വാസ്യതയെ സാരമായി ബാധിച്ചിട്ടുണ്ടെന്ന് പ്രവാസികള്‍ തുറന്നുകാട്ടുന്നു. പുതിയ പോളിസികള്‍ എടുക്കുന്നതില്‍ നിന്ന് പ്രവാസികള്‍ വ്യാപകമായി പിന്മാറാന്‍ തുടങ്ങുന്നതോടെ കാമ്പയിന്‍ പൂര്‍ണ്ണമായും പരാജയപ്പെടാനാണ് സാധ്യത. പ്രവാസികളുടെ യഥാര്‍ത്ഥ ജീവിതസാഹചര്യങ്ങള്‍ മനസ്സിലാക്കാതെ നടപ്പിലാക്കിയ ഇത്തരം നയങ്ങള്‍ നോര്‍ക്ക റൂട്ട്‌സിന്റെയും സര്‍ക്കാരിന്റെയും ഭാഗത്തുനിന്നുള്ള ഗുരുതരമായ വീഴ്ചയാണ്.

പ്രതിഷേധവും മുന്നറിയിപ്പും
കേരളത്തിന്റെ സാമ്പത്തിക അടിത്തറയില്‍ നിര്‍ണായക പങ്കുവഹിക്കുന്ന പ്രവാസി സമൂഹം സ്വന്തം അവകാശങ്ങള്‍ക്കായി ഒത്തൊരുമിച്ച് രംഗത്തിറങ്ങുന്ന കാഴ്ചയാണ് ഇപ്പോള്‍ പ്രവാസലോകത്ത് കാണാന്‍ സാധിക്കുന്നത്. നോര്‍ക്ക കെയര്‍ പ്രീമിയം വര്‍ധനവിനെതിരെ സാമൂഹിക മാധ്യമങ്ങളിലൂടെയും വിവിധ സംഘടനകളുടെ നേതൃത്വത്തിലും ശക്തമായ പ്രതിഷേധങ്ങളാണ് ഉയരുന്നത്. പ്രവാസികള്‍ കൂട്ടത്തോടെ പോളിസി ബഹിഷ്‌കരിക്കാന്‍ തീരുമാനിച്ചാല്‍ അത് സര്‍ക്കാരിന്റെ പ്രവാസി അനുകൂല മുഖംമൂടി അഴിച്ചുമാറ്റും. ജനരോഷവും പ്രതിഷേധങ്ങളും വരും ദിവസങ്ങളില്‍ സര്‍ക്കാരിന്റെ രാഷ്ട്രീയ പ്രതിച്ഛായയ്ക്ക് കനത്ത കളങ്കം സൃഷ്ടിക്കുമെന്നുറപ്പാണ്. പ്രവാസികളുടെ ശക്തമായ ചെറുത്തുനില്‍പ്പും കൂട്ടായ ബഹിഷ്‌കരണവും സര്‍ക്കാരിനെയും നോര്‍ക്ക അധികാരികളെയും പുനര്‍വിചിന്തനത്തിന് നിര്‍ബന്ധിതരാക്കും. പ്രവാസി സമൂഹത്തിന്റെ വിശ്വാസ്യത നഷ്ടപ്പെടുത്തി മുന്നോട്ടുപോകാന്‍ സര്‍ക്കാരിന് സാധിക്കില്ല. പ്രവാസികളുടെ ന്യായമായ ആവശ്യങ്ങള്‍ അംഗീകരിച്ച് ഉയര്‍ന്ന പ്രീമിയം തുക പിന്‍വലിക്കാന്‍ സര്‍ക്കാര്‍ തയ്യാറാകണം. അല്ലാത്തപക്ഷം അത് വരും നാടുകളില്‍ വലിയ രാഷ്ട്രീയ പ്രത്യാഘാതങ്ങള്‍ക്കും സര്‍ക്കാരിനെതിരെയുള്ള ജനവികാരത്തിനും കാരണമായിത്തീരും എന്ന കാര്യത്തില്‍ സംശയമില്ല.

റിയാദ്: നോര്‍ക്ക കെയര്‍ ആരോഗ്യ ഇന്‍ഷുറന്‍സ് പദ്ധതിയുടെ പുതിയ പ്രീമിയം നിരക്കുകള്‍ക്കെതിരെ പ്രവാസലോകത്ത് വ്യാപക പ്രതിഷേധം. പ്രവാസികള്‍ക്കായി നടപ്പാക്കിയ പദ്ധതിയില്‍ പ്രീമിയം കുത്തനെ ഉയര്‍ത്തിയതോടെ ആയിരക്കണക്കിന് പ്രവാസി കുടുംബങ്ങളുടെ ആരോഗ്യസുരക്ഷയ പ്രതിസന്ധിയിലായി. പദ്ധതി പുതുക്കാനുള്ള നടപടികള്‍ അവസാന നിമിഷംവരെ വൈകിപ്പിച്ചത് നിരക്ക് വര്‍ധന നടപ്പാക്കാനായിരുന്നെന്ന സംശയവും പ്രവാസികള്‍ ഉയര്‍ത്തുന്നുണ്ട്. നിരക്ക് വര്‍ധന പിന്‍വലിച്ച് പഴയ രീതിയില്‍ പദ്ധതി തുടരണമെന്ന് കേളി കലാസാംസ്‌കാരിക വേദി ആവശ്യപ്പെട്ടു.

പ്രവാസികളുടെ ആരോഗ്യസുരക്ഷ മുന്‍നിര്‍ത്തി രൂപം നല്‍കിയ പദ്ധതിയില്‍ പുതിയ നിരക്കുകള്‍ വന്നതോടെ വിവിധ പ്രായവിഭാഗങ്ങളില്‍ വലിയ സാമ്പത്തിക ബാധ്യതയാണ് ഉണ്ടായിരിക്കുന്നത്. അഞ്ച് ലക്ഷം രൂപയുടെ വ്യക്തിഗത പരിരക്ഷയ്ക്ക് 51 – 60 പ്രായവിഭാഗത്തില്‍ വാര്‍ഷിക പ്രീമിയം 21,722 രൂപയായും, 61 – 70 പ്രായവിഭാഗത്തില്‍ ഇത് 28,326 രൂപയായുമാണ് നിശ്ചയിച്ചിരിക്കുന്നത്. 71 – 80 വിഭാഗത്തിലാകട്ടെ ഇത് 48,279 രൂപയാണ്. അതേസമയം അഞ്ച് ലക്ഷം രൂപയുടെ കുടുംബ പരിരക്ഷയ്ക്ക് 51 – 60 പ്രായവിഭാഗത്തില്‍ 35,664 രൂപയും 61 – 70 വിഭാഗത്തില്‍ 44,718 രൂപയുമാണ് പുതിയ നിരക്ക്. സാധാരണക്കാരായ പ്രവാസികള്‍ക്ക് താങ്ങാനാവാത്ത ഉയര്‍ന്ന നിരക്കുകള്‍ പദ്ധതിയുടെ അടിസ്ഥാനലക്ഷ്യത്തെ തന്നെ ചോദ്യം ചെയ്യുന്നതാണെന്ന് വിമര്‍ശനം ഉയരുന്നു.

പ്രായപരിധി എടുത്തുകളഞ്ഞുവെന്ന പ്രഖ്യാപനം സര്‍ക്കാര്‍ അവകാശപ്പെടുമ്പോഴും, ഉയര്‍ന്ന പ്രായത്തിലുള്ളവര്‍ക്ക് ഈടാക്കുന്ന ഉയര്‍ന്ന പ്രീമിയത്തെക്കുറിച്ച് അധികൃതര്‍ മറുപടി പറയണം. ഇന്‍ഷുറന്‍സ് പരിരക്ഷ ലഭിക്കുമെന്നത് മാത്രമല്ല പ്രധാനം; അത് സാധാരണക്കാര്‍ക്ക് താങ്ങാനാവുന്ന നിരക്കില്‍ ലഭ്യമാകണം. പ്രായം കൂടുന്തോറും രോഗസാധ്യതയും ചികിത്സാചെലവും വര്‍ധിക്കുന്ന സാഹചര്യത്തില്‍ മുതിര്‍ന്ന പ്രവാസികള്‍ക്ക് വലിയ പ്രീമിയം ചുമത്തുന്നത് അവരെ ആരോഗ്യപരിരക്ഷയില്‍നിന്ന് അകറ്റാനേ ഉപകരിക്കൂ. പ്രായപരിധി നീക്കിയെന്ന പ്രചാരണത്തിന്റെ മറവില്‍ നിരക്കുകള്‍ കുത്തനെ ഉയര്‍ത്തുന്നത് പ്രവാസികളോടുള്ള നീതിയല്ലെന്ന് പ്രവാസികള്‍ ചൂണ്ടിക്കാട്ടുന്നു.

പദ്ധതി പുതുക്കുന്നതില്‍ വ്യക്തത വരുത്താതെ അവസാന നിമിഷംവരെ നീട്ടിക്കൊണ്ടുപോയതും ഇപ്പോള്‍ പുറത്തുവന്ന ഉയര്‍ന്ന നിരക്കുകളും തമ്മില്‍ ബന്ധമുണ്ടോയെന്നാണ് പ്രവാസികളുടെ പ്രധാന ആശങ്ക. പുതുക്കലിനായി കാത്തിരുന്നവര്‍ക്ക് മുന്‍കൂട്ടി സാമ്പത്തിക ആസൂത്രണം നടത്താനോ മറ്റ് ബദല്‍ പരിരക്ഷാ മാര്‍ഗങ്ങള്‍ കണ്ടെത്താനോ ഉള്ള സമയം ലഭിച്ചില്ല. തുടര്‍ചികിത്സ ആവശ്യമുള്ളവരും കുടുംബാംഗങ്ങളുടെ ആരോഗ്യസുരക്ഷയ്ക്കായി നോര്‍ക്ക കെയറിനെ മാത്രം ആശ്രയിച്ചവരുമാണ് ഇതുമൂലം ഏറ്റവും കൂടുതല്‍ പ്രതിസന്ധിയിലായിരിക്കുന്നത്.

പ്രവാസികളുടെ പ്രശ്‌നങ്ങള്‍ ചര്‍ച്ച ചെയ്യാനും അവരുടെ ആവശ്യങ്ങള്‍ സര്‍ക്കാരിന് മുന്നിലെത്തിക്കാനും രൂപം നല്‍കിയ ലോക കേരളസഭയുടെ പ്രവര്‍ത്തനം ഫലപ്രദമല്ലാതായതോടെ പ്രവാസികളുടെ ശബ്ദം ഉയര്‍ത്താനുള്ള പ്രധാന വേദിയും നഷ്ടപ്പെട്ടതായി പ്രവാസികള്‍ ചൂണ്ടിക്കാട്ടുന്നു. പ്രവാസികളുടെ അഭിപ്രായങ്ങളും അനുഭവങ്ങളും കേട്ട് നയങ്ങള്‍ രൂപപ്പെടുത്തേണ്ടതിന് പകരം അവരുടെ ജീവിതത്തെ നേരിട്ട് ബാധിക്കുന്ന നിര്‍ണായക തീരുമാനങ്ങളില്‍ അവ്യക്തത തുടരുന്നത് അംഗീകരിക്കാനാവില്ല. പ്രവാസികളുടെ ശബ്ദം കേള്‍ക്കാനും അവരുടെ പ്രശ്‌നങ്ങള്‍ക്ക് ശാശ്വത പരിഹാരം കാണാനും സര്‍ക്കാര്‍ പൂര്‍ണ്ണമായും ബാധ്യസ്ഥമാണ്.

നോര്‍ക്ക കെയര്‍ പദ്ധതിയുടെ പഴയ നിരക്കുകളും പുതിയ നിരക്കുകളും തമ്മിലുള്ള താരതമ്യം അധികൃതര്‍ പരസ്യപ്പെടുത്തണമെന്നും പ്രീമിയം വര്‍ധനയുടെ കൃത്യമായ കാരണം വ്യക്തമാക്കണമെന്നും ആവശ്യമുയര്‍ന്നിട്ടുണ്ട്. നിലവിലുള്ള അംഗങ്ങള്‍ക്ക് ഇന്‍ഷുറന്‍സ് പരിരക്ഷ മുടങ്ങാതിരിക്കാനുള്ള സംവിധാനം ഉറപ്പാക്കണമെന്നും നിരക്കുകള്‍ സാധാരണക്കാര്‍ക്ക് താങ്ങാനാവുന്ന രീതിയില്‍ പുനഃക്രമീകരിക്കണമെന്നും പ്രവാസികള്‍ ആവശ്യപ്പെടുന്നു. പ്രവാസികളെ ഉയര്‍ന്ന പ്രീമിയത്തിന്റെ പേരില്‍ ആരോഗ്യ ഇന്‍ഷുറന്‍സില്‍നിന്ന് പുറത്താക്കുന്ന ദൗര്‍ഭാഗ്യകരമായ സാഹചര്യമുണ്ടാകരുതെന്നും, നോര്‍ക്ക കെയര്‍ പുതുക്കല്‍ വൈകിപ്പിച്ചതിന്റെ കാരണവും പുതിയ നിരക്കുകള്‍ നിശ്ചയിച്ചതിന്റെ വിശദാംശങ്ങളും സര്‍ക്കാര്‍ അടിയന്തരമായി വ്യക്തമാക്കണമെന്നും കേളി കലാസാംസ്‌കാരിക വേദി ആവശ്യപ്പെട്ടു.

റിയാദ്: ന്യൂമോണിയ ബാധിച്ച് ചികിത്സയില്‍ കഴിയവേ റിയാദില്‍ നിര്യാതനായ തിരുവനന്തപുരം വര്‍ക്കല വെട്ടൂര്‍ സ്വദേശി സുനില്‍ കുമാറിന്റെ (61) ഭൗതികശരീരം വ്യാഴാഴ്ച പുലര്‍ച്ചെ തിരുവനന്തപുരം വിമാനത്താവളത്തിലെത്തിക്കും. റിയാദില്‍ നിന്ന് കേരളത്തിലേക്ക് നേരിട്ടുള്ള വിമാന സര്‍വീസുകള്‍ നിലവിലില്ലാത്തതിനാല്‍, മൃതദേഹം റോഡ് മാര്‍ഗം ജിദ്ദയിലെത്തിച്ചാണ് ഗള്‍ഫ് എയര്‍ വിമാനത്തില്‍ ബഹ്‌റൈന്‍ വഴി നാട്ടിലേക്ക് അയക്കുന്നത്.

ശ്വാസകോശ സംബന്ധമായ അസുഖത്തെ തുടര്‍ന്ന് റിയാദ് ആസ്റ്റര്‍ സനദ് ആശുപത്രിയില്‍ ചികിത്സയില്‍ കഴിയവവേയാണ് മരണം. സിന്ധുവാണ് ഭാര്യ. ഡോ. ഗോകുല്‍ സുനില്‍ കുമാര്‍, ദേവനന്ദ സുനില്‍ കുമാര്‍ എന്നിവര്‍ മക്കളാണ്. റസാഖ് വയല്‍കരയുടെ നേതൃത്വത്തിലുള്ള റിയാദ് ഐ.സി.എഫ് വെല്‍ഫെയര്‍ ടീമുംസുഹൃത്തുക്കളായ ജയന്‍ കൊടുങ്ങല്ലൂര്‍, നബീല്‍ അബ്ദുല്‍ ഖാദര്‍, കുഞ്ഞിമോന്‍ എന്നിവരും ചേര്‍ന്നാണ് മരണാനന്തര നിയമനടപടികള്‍ ഏകോപിപ്പിച്ചത്.

അതേസമയം, റിയാദില്‍ നിന്ന് കേരളത്തിലേക്ക് നേരിട്ടുള്ള വിമാന സര്‍വീസുകള്‍ പുനരാരംഭിക്കാത്തത് പ്രവാസികള്‍ക്ക് കനത്ത തിരിച്ചടിയാണ് സൃഷ്ടിക്കുന്നത്. മൃതദേഹങ്ങള്‍ മറ്റ് നഗരങ്ങളിലെ വിമാനത്താവളങ്ങളിലേക്ക് നൂറുകണക്കിന് കിലോമീറ്റര്‍ റോഡ് മാര്‍ഗം കൊണ്ടുപോകേണ്ടി വരുന്നത് ബന്ധുക്കള്‍ക്കും സുഹൃത്തുക്കള്‍ക്കും വലിയ സമയനഷ്ടവും കടുത്ത സാമ്പത്തിക ബാധ്യതയുമാണ് ഉണ്ടാക്കുന്നത്. പ്രിയപ്പെട്ടവരുടെ വിയോഗത്തില്‍ ദുഃഖിതരായിരിക്കുന്ന കുടുംബങ്ങള്‍ക്ക് ഇത്തരം യാത്രാക്ലേശങ്ങള്‍ വലിയ മാനസിക ആഘാതമാണ് സമ്മാനിക്കുന്നത്. അതിനാല്‍, റിയാദില്‍ നിന്നുള്ള കേരള സര്‍വീസുകള്‍ എത്രയും വേഗം പുനരാരംഭിക്കണമെന്ന ശക്തമായ ആവശ്യത്തിലാണ് പ്രവാസി സമൂഹം.

തിരുവനന്തപുരം: പ്രവാസി മലയാളികള്‍ക്കുള്ള സമഗ്ര ആരോഗ്യ, അപകട ഇന്‍ഷുറന്‍സ് പദ്ധതി ‘നോര്‍ക്ക കെയര്‍’ എന്റോള്‍മെന്റ് പോര്‍ട്ടല്‍ നിലവില്‍ വന്നു. നിലവില്‍ പദ്ധതിയില്‍ അംഗങ്ങളായിട്ടുള്ളവര്‍ക്ക് ഇന്‍ഷുറന്‍സ് പുതുക്കുന്നതിനും പുതിയതായി രജിസ്റ്റര്‍ ചെയ്യുന്നതിനുമുള്ള അവസരം 2026 നവംബര്‍ 30 വരെ ലഭ്യമാണ്. ലോകത്തിന്റെ വിവിധ ഭാഗങ്ങളില്‍നിന്ന് പ്രവാസികള്‍ക്ക് ഓണ്‍ലൈനായി പദ്ധതിയില്‍ അംഗത്വം നേടാനും സേവനങ്ങള്‍ പ്രയോജനപ്പെടുത്താനും പുതിയ വെബ്‌പോര്‍ട്ടലിലും പരിഷ്‌കരിച്ച മൊബൈല്‍ ആപ്പിലും ഒരുക്കിയിട്ടുണ്ട്.

പദ്ധതിയുടെ ഭാഗമായി മുന്‍പുണ്ടായിരുന്ന അഞ്ചു ലക്ഷം രൂപയുടെ പരിരക്ഷയ്ക്കു പകരം 3 ലക്ഷം, 5 ലക്ഷം, 10 ലക്ഷം, 15 ലക്ഷം, 20 ലക്ഷം, 25 ലക്ഷം, 50 ലക്ഷം, 1 കോടി എന്നിങ്ങനെ എട്ട് വ്യത്യസ്ത സ്ലാബുകളില്‍ നോര്‍ക്ക കെയര്‍ പരിരക്ഷ ലഭിക്കും. ഇതില്‍ മൂന്നു ലക്ഷം രൂപ മുതലുള്ള പോളിസികളില്‍ പ്രവാസിയുടേയും പങ്കാളിയുടേയും മാതാപിതാക്കളെയും (110 വയസ്സുവരെ) ഉള്‍പ്പെടുത്താം. നിലവിലുള്ള രോഗങ്ങള്‍ക്ക് ആദ്യ ദിവസം മുതല്‍ ഇന്ത്യയ്ക്കുള്ളിലുളളവര്‍ക്ക് പരിരക്ഷ ലഭിക്കും. നോര്‍ക്ക പ്രവാസി ഐ.ഡി, സ്റ്റുഡന്റ് ഐ.ഡി, എന്‍.ആര്‍.കെ ഐ.ഡി കാര്‍ഡുള്ള 18 നും 70 നും ഇടയില്‍ പ്രായമുള്ള പ്രവാസികള്‍ക്ക് പദ്ധതിയില്‍ എന്റോള്‍ ചെയ്യാം. പോളിസി ഉടമയുടെ പ്രായത്തിന് ആനുപാതികമായാണ് പ്രീമിയം തുക കണക്കാക്കുന്നത്.

ഓണ്‍ലൈന്‍ എന്റോള്‍മെന്റ്, ഇ-കാര്‍ഡ് ഡൗണ്‍ലോഡ്, പേയ്‌മെന്റ് രസീത്, റീഇംബേഴ്‌സ്‌മെന്റ് ക്ലെയിം ഫോമുകള്‍, ക്യാഷ്‌ലെസ് ആശുപത്രികളുടെ പട്ടിക, ക്ലെയിമുകളുടെ തല്‍സ്ഥിതി പരിശോധന എന്നീ സേവനങ്ങള്‍ ഡിജിറ്റലായി ലഭ്യമാണ്. ഇതിനുപുറമെ ഡോക്ടര്‍ കണ്‍സള്‍ട്ടേഷന്‍, ലബോറട്ടറി പരിശോധനകള്‍, ഫാര്‍മസി സേവനങ്ങള്‍, അടിയന്തര സാഹചര്യങ്ങളില്‍ ലൈവ് ലൊക്കേഷന്‍ പങ്കുവെക്കുന്ന എസ്ഒഎസ് സംവിധാനം, ആംബുലന്‍സ് സഹായം അഭ്യര്‍ഥിക്കാനുള്ള സൗകര്യം എന്നിവയും ആപ്പില്‍ ലഭ്യമാക്കിയിട്ടുണ്ട്. നോര്‍ക്ക കെയറുമായി ബന്ധപ്പെട്ട സംശയങ്ങള്‍ക്കും ക്ലെയിം സഹായത്തിനുമായി ഇന്ത്യയില്‍നിന്ന് 24 മണിക്കൂറും 1860 4191 401, 1860 4191 402 എന്നീ ടോള്‍ ഫ്രീ നമ്പറുകളില്‍ ബന്ധപ്പെടാം. വിദേശത്തുള്ള അംഗങ്ങള്‍ക്ക് മൊബൈല്‍ ആപ്പിലെ ഇന്‍ആപ്പ് കോള്‍ സൗകര്യം പ്രവൃത്തി ദിവസങ്ങളില്‍ ഇന്ത്യന്‍ സമയം രാവിലെ 9.30 മുതല്‍ വൈകിട്ട് 6.30 വരെ ലഭ്യമാണ്.

റിയാദ്: ലഹരി ഉപയോഗം തുടങ്ങുന്നതിന് മുന്‍പ് തടയുക എന്ന ലക്ഷ്യത്തോടെ ദേശഭാഷ വ്യത്യാസമില്ലാതെ ‘റിസ’ നടത്തുന്ന ബോധവല്‍ക്കരണ പ്രവര്‍ത്തനങ്ങള്‍ അഭിനന്ദനാര്‍ഹവും ഹൃദയസ്പര്‍ശകവുമാണെന്ന് വിദ്യാഭ്യാസപ്രവര്‍ത്തകനും അത്താ എഡ്യൂക്കേഷന്‍ കമ്പനി സിഇഒയുമായ ഡോ. ഇബ്രാഹിം ബിന്‍ അലി ഫര്‍ഹാന്‍ അഭിപ്രായപ്പെട്ടു. കുട്ടികള്‍ക്കും അധ്യാപകര്‍ക്കും മാത്രമല്ല, രക്ഷിതാക്കള്‍ക്കും

മാര്‍ഗ്ഗദര്‍ശകമാണ് പദ്ധതിയെന്നും അദ്ദേഹം കൂട്ടിച്ചേര്‍ത്തു. സുബൈര്‍കുഞ്ഞു ഫൗണ്ടേഷന്റെ ലഹരിവിരുദ്ധ പരിപാടിയായ റിസയുടെ ‘ടോട്ട്’ പരിശീലനം പൂര്‍ത്തിയാക്കിയ 526 പേര്‍ക്കുള്ള സര്‍ട്ടിഫിക്കറ്റ് വിതരണ ചടങ്ങ് ഓണ്‍ലൈനില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഫൗണ്ടേഷന്‍ ചെയര്‍മാനും റിസാ കണ്‍വീനറുമായ ഡോ. അബ്ദുല്‍ അസീസ് അധ്യക്ഷത വഹിച്ചു. റാസിന്‍ അബ്ദുല്‍ റസാഖ് പ്രാര്‍ത്ഥന നിര്‍വഹിച്ചു. ജോസ് മ്യൂസിക് അക്കാദമിയിലെ വിദ്യാര്‍ത്ഥികള്‍ സൗദി അറേബ്യയുടെയും ഇന്ത്യയുടെയും ദേശീയ ഗാനങ്ങള്‍ ആലപിച്ചു.

മോഡേണ്‍ മിഡിലീസ്റ്റ് സ്‌കൂള്‍ പ്രിന്‍സിപ്പല്‍ ശബാന പര്‍വിന്‍, യാരാ സ്‌കൂള്‍ വൈസ് പ്രിന്‍സിപ്പല്‍ ഷറഫുദ്ദീന്‍, ഡോ. മുഹമ്മദ് ഒസാമ (സ്‌കൂള്‍ ആന്റ് മാസ് എഡ്യൂക്കേഷന്‍ ഡിപ്പാര്‍ട്ട്‌മെന്റ്, ഒഡീസ), ഡോ. രാജു വര്‍ഗീസ്, ഡോ. തമ്പി വേലപ്പന്‍, അഡ്വ. അബ്ദുല്‍ ജലീല്‍, ജിബിന്‍ സമദ് (ഫോര്‍ക്ക), ജോസ് തോമസ്, നിഖിലാ സമീര്‍, ആഷിക, അതുല്യ, വിദ്യാര്‍ത്ഥി പ്രതിനിധികളായ ലിബ ഷഹീന്‍, റയാന്‍ അഹമ്മദ്, നിസ ടി.കെ എന്നിവര്‍ സംസാരിച്ചു.

റിയാദ് മീഡിയാഫോറം പ്രതിനിധി ഷംനാദ് കരുനാഗപ്പള്ളി, സൈനുലാബിദീന്‍ വഴിക്കടവ് (എം.ഇ.എസ്), അശോക് കുമാര്‍ (തിരുവനന്തപുരം കൂട്ടായ്മ, ദമാം), ഇസ്മായില്‍ നൗഷാദ്, ഡോ. സമതാ നായിഡു (പ്രിന്‍സിപ്പല്‍, അന്നമാചാര്യ പി.ജി കോളേജ് ഓഫ് കമ്പ്യൂട്ടര്‍ സയന്‍സ്) എന്നിവര്‍ സന്നിഹിതരായിരുന്നു. റിസ ആക്ടിവിറ്റി കണ്‍വീനര്‍ മീരാ റഹ്മാന്‍ ടോട്ട് പരിപാടി വിശദീകരിച്ചു. റിസ കേരള കോര്‍ഡിനേറ്റര്‍ കരുണാകരന്‍ പിള്ള സ്വാഗതവും സ്‌കൂള്‍ ആക്ടിവിറ്റി കണ്‍വീനര്‍ പത്മിനി യു. നായര്‍ നന്ദിയും പറഞ്ഞു. റിസയുടെ ഗ്ലോബല്‍ മെമ്പര്‍ഷിപ്പ് സ്‌കീം ഉടന്‍ ആരംഭിക്കുമെന്ന് കണ്‍വീനര്‍ ഡോ. അബ്ദുല്‍ അസീസും പ്രോഗ്രാം കണ്‍സള്‍ട്ടന്റ് ഡോ. ഭാരതനും അറിയിച്ചു.

റിയാദ്: ഗള്‍ഫ് മലയാളി ഫെഡറേഷന്‍ റിയാദ് സെന്‍ട്രല്‍ കമ്മിറ്റിയുടെ പുതിയ ഭാരവാഹികളെ തിരഞ്ഞെടുത്തു. മലാസ് അല്‍മാസ് ഫാമിലി റെസ്‌റ്റോറന്റ് ഓഡിറ്റോറിയത്തില്‍ ചേര്‍ന്ന സെന്‍ട്രല്‍ കമ്മിറ്റി ജനറല്‍ ബോഡി യോഗത്തിലാണ് പുതിയ നേതൃത്വത്തെ പ്രഖ്യാപിച്ചത്. ഫൗണ്ടര്‍ ചെയര്‍മാന്‍ റാഫി പാങ്ങോട് തിരഞ്ഞെടുപ്പ് നടപടികള്‍ക്ക് നേതൃത്വം നല്‍കി. സെന്‍ട്രല്‍ കമ്മിറ്റി രക്ഷാധികാരി ഡോ. ജയചന്ദ്രന്‍ പുതിയ ഭാരവാഹികളെ പ്രഖ്യാപിച്ചു.

കഴിഞ്ഞ വര്‍ഷത്തെ പ്രവര്‍ത്തന റിപ്പോര്‍ട്ട് ജോയിന്റ് സെക്രട്ടറി ഇജാസും വാര്‍ഷിക വരവ് ചെലവ് കണക്കുകള്‍ ട്രഷറര്‍ സജീര്‍ ആറ്റിങ്ങലും അവതരിപ്പിച്ചു. അംഗങ്ങള്‍ക്ക് കണക്കുകള്‍ വ്യക്തമായി മനസ്സിലാക്കാന്‍ ഡിജിറ്റല്‍ സ്‌ക്രീന്‍ വഴിയാണ് സാമ്പത്തിക വിവരങ്ങള്‍ വിശദീകരിച്ചത്. കഴിഞ്ഞ വര്‍ഷത്തെ സംഘടനാ പ്രവര്‍ത്തനങ്ങള്‍ പ്രസിഡന്റ് ഷാജി മഠത്തില്‍ വിശദീകരിച്ചു. സംഘടനയുടെ പ്രവര്‍ത്തനങ്ങളും ഭാവി പദ്ധതികളും ഫൗണ്ടര്‍ ചെയര്‍മാന്‍ റാഫി പാങ്ങോട് അവതരിപ്പിച്ചു.

ഷാജി മഠത്തില്‍ (പ്രസിഡന്റ്), സജീര്‍ ആറ്റിങ്ങല്‍ (ജനറല്‍ സെക്രട്ടറി), ഡോ. ഷെറിന്‍ (ട്രഷറര്‍), സുബൈര്‍ കുമ്മിള്‍, അനിത്ര (വൈസ് പ്രസിഡന്റുമാര്‍), ഉണ്ണി കൊല്ലം, അഞ്ജലി (ജോയിന്റ് സെക്രട്ടറിമാര്‍), കിളിമാനൂര്‍ നൗഷാദ് (മീഡിയ), അസ്ലം പാലത്ത് (ജീവകാരുണ്യ കോര്‍ഡിനേറ്റര്‍), നിഷാദ് ഈസ, നസീര്‍ കുന്നില്‍ (ജീവകാരുണ്യ കണ്‍വീനര്‍മാര്‍), അഷ്‌കര്‍, നിസാം (സ്‌പോര്‍ട്‌സ്), സജാദ് മുസ്തഫ (പിആര്‍ഒ), റഫീഖ് (മെമ്പര്‍ഷിപ് കോര്‍ഡിനേറ്റര്‍), നൗഫല്‍ കോട്ടയം, ഇജാസ് (പ്രോഗ്രാം കോര്‍ഡിനേറ്റര്‍മാര്‍), അഫ്‌സല്‍ (കോര്‍ഡിനേറ്റര്‍), സജ്‌ന സജീര്‍, ഡിന്‍സി, റിഷാന അഫ്‌സല്‍, മുന്ന അയ്യൂബ്, ബീഗം നാസര്‍ (വനിതാ കോര്‍ഡിനേറ്റര്‍മാര്‍), ഷബീര്‍, ഹാഷിം (എക്‌സിക്യൂട്ടീവ് സപ്പോര്‍ട്ട്) എന്നിവരാണ് ഭാരവാഹികള്‍.

റിയാദ്: നോര്‍ക്ക കെയര്‍ ആരോഗ്യ ഇന്‍ഷുറന്‍സ് പദ്ധതിയുടെ കാലാവധി ഒക്ടോബര്‍ 30ന് അവസാനിക്കാനിരിക്കെ, പദ്ധതി പുതുക്കുന്നതില്‍ സര്‍ക്കാരിന്റെ ഭാഗത്തുനിന്ന് വ്യക്തത ഉണ്ടാകാത്തതില്‍ കേളി കലാസാംസ്‌കാരിക വേദി പ്രതിഷേധിച്ചു. പ്രവാസികളുടെ ആരോഗ്യസുരക്ഷ ഉറപ്പാക്കാന്‍ സര്‍ക്കാര്‍ അടിയന്തരമായി ഇടപെടണമെന്ന് കേളി ആവശ്യപ്പെട്ടു.

ലോക കേരളസഭയുടെ നിര്‍ദേശപ്രകാരം പ്രവാസികളുടെ ആവശ്യങ്ങള്‍ പരിഗണിച്ചു രൂപം നല്‍കിയ നോര്‍ക്ക കെയര്‍ പദ്ധതിക്ക് വലിയ ജനപങ്കാളിത്തമാണ് ലഭിച്ചത്. പദ്ധതിയുടെ ഗുണഫലങ്ങള്‍ നേരിട്ടറിഞ്ഞവരും തുടര്‍ചികിത്സ ആവശ്യമുള്ളവരും പോളിസി പുതുക്കാനായി കാത്തിരിക്കുകയാണ്. എന്നാല്‍ പദ്ധതിയുടെ തുടര്‍ച്ച സംബന്ധിച്ച് നിലനില്‍ക്കുന്ന അനിശ്ചിതത്വം പ്രവാസികളെ ആശങ്കയിലാക്കുന്നുണ്ടെന്ന് കേളി ചൂണ്ടിക്കാണിച്ചു.

പൊതുതാല്‍പര്യ പദ്ധതികള്‍ നിലച്ചുപോകുന്നത് സ്വകാര്യ ഇന്‍ഷുറന്‍സ് കമ്പനികള്‍ക്ക് മാത്രമേ ഗുണം ചെയ്യുകയുള്ളൂ. അതിനാല്‍ സ്വകാര്യ മേഖലയുടെ താല്‍പര്യങ്ങള്‍ക്കപ്പുറം പ്രവാസികളുടെ ആരോഗ്യസുരക്ഷയ്ക്കായിരിക്കണം സര്‍ക്കാര്‍ മുന്‍ഗണന നല്‍കേണ്ടത്. കാലാവധി അവസാനിക്കാന്‍ ദിവസങ്ങള്‍ മാത്രം ശേഷിക്കെ, ഗുണഭോക്താക്കളുടെ ആശങ്കയകറ്റാന്‍ നോര്‍ക്ക കെയര്‍ ഇന്‍ഷുറന്‍സ് പുതുക്കുന്നതിനുള്ള നടപടികള്‍ സര്‍ക്കാര്‍ ഉടന്‍ പ്രഖ്യാപിക്കണമെന്ന് കേളി ആവശ്യപ്പെട്ടു.