റിയാദ്: അന്വേഷണത്തിന്റെ പേരില്‍ ‘റിപ്പോര്‍ട്ടര്‍’ ചാനലിന്റെ ന്യൂസ് ഡെസ്‌കില്‍ കയറി സംപ്രേഷണം തടസ്സപ്പെടുത്തിയ പൊലീസ് നടപടി മാധ്യമങ്ങള്‍ക്കുള്ള താക്കീതാണെന്ന് കേളി കലാസാംസ്‌കാരിക വേദി. വരുംനാളുകളില്‍ സംസ്ഥാനത്ത് മാധ്യമങ്ങളും ജനാധിപത്യവും നേരിടേണ്ടിവരുന്ന ഭീഷണിയുടെ സൂചനയാണിതെന്ന് കേളി സെക്രട്ടറിയേറ്റ് പ്രസ്താവനയില്‍ ആരോപിച്ചു.

പൊള്ളയായ വാഗ്ദാനങ്ങള്‍ നല്‍കി അധികാരത്തിലെത്തി നാലു മാസം തികയും മുമ്പ് ജനദ്രോഹ നടപടികളുമായി മുന്നോട്ടുപോകുന്ന സര്‍ക്കാര്‍, തെറ്റുകള്‍ ചൂണ്ടിക്കാണിക്കുന്നവരുടെ വായ മൂടിക്കെട്ടാനാണ് ശ്രമിക്കുന്നത്. പരിശോധനയുടെ പേരില്‍ എഡിറ്ററുടെ കസേരയില്‍ കയറിയിരുന്ന് പ്രവര്‍ത്തനം തടസ്സപ്പെടുത്തിയത് കേട്ടുകേള്‍വിയില്ലാത്ത സംഭവമാണ്. വാര്‍ത്താ ഉറവിടം തേടാന്‍ നിയമപരമായ മാര്‍ഗങ്ങള്‍ നിലനില്‍ക്കെ ന്യൂസ് ഡെസ്‌കില്‍ നേരിട്ട് ഇടപെട്ടത് അമിതാധികാര പ്രയോഗമാണ്.

അധികാരത്തിലെത്തിയാല്‍ ചാനല്‍ പൂട്ടിക്കുമെന്ന് യുഡിഎഫ് നേതാവ് നിയമസഭാ തെരഞ്ഞെടുപ്പ് സമയത്ത് പ്രഖ്യാപിച്ചിരുന്നു. ഇതിന്റെ പശ്ചാത്തലത്തില്‍ ഇപ്പോഴുണ്ടായ നടപടിയെ കൂടുതല്‍ ഗൗരവത്തോടെ കാണണം. വിമര്‍ശനങ്ങളെ ജനാധിപത്യപരമായി നേരിടുന്നതിന് പകരം അധികാരശക്തി ഉപയോഗിച്ച് മാധ്യമങ്ങളെ വരുതിയിലാക്കാന്‍ ശ്രമിക്കുന്നത് അംഗീകരിക്കാനാകില്ല.

കേരളത്തില്‍ അപ്രഖ്യാപിത അടിയന്തരാവസ്ഥയുടെ അന്തരീക്ഷം സൃഷ്ടിക്കാനും മാധ്യമങ്ങളെ സമ്മര്‍ദത്തിലാക്കാനും ശ്രമിക്കുന്ന സര്‍ക്കാരിന്റെ നടപടികളില്‍ ശക്തമായി പ്രതിഷേധിക്കുന്നു. മാധ്യമസ്വാതന്ത്ര്യവും അഭിപ്രായ സ്വാതന്ത്ര്യവും സംരക്ഷിക്കാന്‍ ജനാധിപത്യ സമൂഹം ജാഗ്രത പുലര്‍ത്തണമെന്നും കേളി അഭ്യര്‍ത്ഥിച്ചു.

റിയാദ്: വിശുദ്ധ നഗരമായ മക്കയുടെ വ്യോമപരിധിയിലേക്ക് പ്രവേശിക്കാന്‍ ശ്രമിച്ച ഡ്രോണ്‍ സൗദി വ്യോമ പ്രതിരോധസേന തകര്‍ത്തു. യെമനിലെ ഹൂതികളാണ് ഡ്രോണ്‍ വിക്ഷേപിച്ചതെന്ന് സൗദി സഖ്യസേന. സെപ്റ്റംബര്‍ 15 ചൊവ്വാഴ്ച വൈകിട്ട് 6.50ഓടെയാണ് ഡ്രോണ്‍ കണ്ടെത്തി തകര്‍ത്തതെന്ന് സഖ്യസേനാ വക്താവ് മേജര്‍ ജനറല്‍ തുര്‍ക്കി അല്‍ മാലികി അറിയിച്ചു. മക്ക നഗരത്തിന്റെ തെക്കുഭാഗത്ത്, നിരോധിത വ്യോമപരിധിയില്‍ പ്രവേശിക്കുന്നതിന് മുന്‍പ് ഡ്രോണ്‍ നശിപ്പിച്ചതായി അദ്ദേഹം വ്യക്തമാക്കി.

2017 ജൂലൈയില്‍ ബാലിസ്റ്റിക് മിസൈല്‍ ഉപയോഗിച്ച് മക്കയെ ലക്ഷ്യമിട്ട സംഭവത്തിന് ശേഷം നടക്കുന്ന രണ്ടാമത്തെ ശ്രമമാണിത്. വിശുദ്ധ നഗരത്തിന്റെയും പുണ്യഹറമുകളുടെയും സുരക്ഷയില്‍ യാതൊരു വിട്ടുവീഴ്ചയുമുണ്ടാകില്ലെന്നും ആവശ്യമായ എല്ലാ പ്രതിരോധ നടപടികളും സ്വീകരിക്കുമെന്നും സഖ്യസേന വിശദീകരിച്ചു.

റിയാദ്: ആഘോഷപ്പൊലിമയും കലാപരിപാടികളുടെ വൈവിധ്യവും അരങ്ങുണര്‍ത്തി ‘ഒന്നിച്ചോണം-2026’ അരങ്ങേറി. റിയാദില്‍ പെരുമ്പാവൂര്‍ പ്രവാസി അസോസിയേഷന്‍ മലാസ് മിഡില്‍ ഈസ്റ്റ് ഇന്റര്‍നാഷണല്‍ സ്‌കൂള്‍ അങ്കണത്തിലാം് ആഘോഷപരിപാടികളില്‍ ഒരുക്കിയത്.

സാംസ്‌കാരിക സമ്മേളനത്തില്‍ പ്രസിഡന്റ് സാജു ദേവസ്സി അധ്യക്ഷത വഹിച്ചു. ഫോര്‍ക ചെയര്‍മാന്‍ റഹ്മാന്‍ മുനമ്പത്ത് ഉദ്ഘാടനം ചെയ്തു. രക്ഷാധികാരി സലാം പെരുമ്പാവൂര്‍, മുന്‍ പ്രസിഡന്റുമാരായ സലാം മാറമ്പിള്ളി, അലി വാരിയത്ത്, കരീം കാനാമ്പുറം, സാമൂഹികസാംസ്‌കാരിക രംഗത്തെ പ്രമുഖരായ ജയന്‍ കൊടുങ്ങല്ലൂര്‍, ഷിയാസ് കോട്ടയില്‍, ഷാജഹാന്‍ ചാവക്കാട്, അമീര്‍ കാക്കനാട്, ഷുക്കൂര്‍ ആലുവ, സഫീര്‍, ഉസ്മാന്‍ പരീത്, നിഷാദ് ചെറുവട്ടൂര്‍ (ഈസ്‌റ്റേണ്‍), ബഷീര്‍ (ഫോര്‍ടെക്) എന്നിവര്‍ ആശംസകള്‍ നേര്‍ന്നു. സെക്രട്ടറി കുഞ്ഞുമുഹമ്മദ് ചുള്ളിക്കാടന്‍ സ്വാഗതവും ട്രഷറര്‍ തന്‍സില്‍ ജബ്ബാര്‍ നന്ദിയും പറഞ്ഞു.

അലി വാരിയത്ത്, പ്രവീണ്‍ ജോര്‍ജ് എന്നിവരുടെ നേതൃത്വത്തില്‍ വിഭവസമൃദ്ധമായ ഓണസദ്യയും മാവേലി എഴുന്നള്ളത്തും സംഘടിപ്പിച്ചു. ആര്‍ട്‌സ് കണ്‍വീനര്‍ സിയാവുദീന്‍, സഹല്‍ പെരുമ്പാവൂര്‍ എന്നിവരുടെ നേതൃത്വത്തില്‍ അരങ്ങേറിയ തിരുവാതിര, ഫ്യൂഷന്‍ ഡാന്‍സ്, ഓണപ്പാട്ടുകള്‍ എന്നിവ ആഘോഷങ്ങള്‍ക്ക് വര്‍ണാഭമായ തുടക്കമേകി. ഏഷ്യാനെറ്റ് മൈലാഞ്ചി ഫൈനലിസ്റ്റ് സുഫിയാന്‍ ഖാലിദും റിയാദിലെ പ്രമുഖ ഗായകരും അണിനിരന്ന സംഗീതവിരുന്നും അരങ്ങേറി.

സ്‌പോര്‍ട്‌സ് കണ്‍വീനര്‍ നൗഷാദ് പള്ളത്ത്, ലാലു വര്‍ക്കി എന്നിവരുടെ നേതൃത്വത്തില്‍ വനിതകള്‍ക്കും കുട്ടികള്‍ക്കുമായി വിവിധ കായികമത്സരങ്ങളും വാശിയേറിയ വടംവലിയും നടന്നു. നൗഷാദ് പള്ളത്ത് ഒരുക്കിയ പൂക്കളവും അഡ്വ. അജിത് ഖാന്‍ അവതാരകനായിരുന്നു. കണ്‍വീനര്‍ മുജീബ് മൂലയില്‍, മജീദ് പാറക്കല്‍, എക്‌സിക്യൂട്ടീവ് അംഗങ്ങളായ അമീര്‍ കൊപ്പറമ്പില്‍, അന്‍വര്‍ മുഹമ്മദ്, ഹാരിസ് മേതല, ഹിലാല്‍ ബാബു, ജബ്ബാര്‍ കോട്ടപ്പുറം, കരീം മേതല, മിഥിലാജ്, ഷമീര്‍ പോഞ്ഞാശ്ശേരി, ഷമീര്‍ മുഹമ്മദ്, സുഭാഷ് അമ്പാട്ട്, ഉവൈസ്, സ്വാലിഹ്, അഷ്‌കര്‍ അലി, ഹാരിസ് തുടങ്ങിയവര്‍ പരിപാടികള്‍ക്ക് നേതൃത്വം നല്‍കി.

റിയാദ്: സൗദി അറേബ്യയില്‍ തുറസ്സായ സ്ഥലങ്ങളില്‍ ജോലി ചെയ്യുന്ന തൊഴിലാളികള്‍ക്കായി ഏര്‍പ്പെടുത്തിയിരുന്ന ഉച്ചവിശ്രമ നിയമത്തിന്റെ കാലാവധി അവസാനിച്ചു. വേനല്‍ക്കാലത്തെ കഠിനമായ ചൂടില്‍ നിന്ന് തൊഴിലാളികളുടെ ആരോഗ്യവും സുരക്ഷയും മുന്‍നിര്‍ത്തിയാണ് ജൂണ്‍ 15 മുതല്‍ സെപ്റ്റംബര്‍ 15 വരെ മാനവ വിഭവശേഷി, സാമൂഹിക വികസന മന്ത്രാലയം ഉച്ച വിശ്രമ നിയമം നടപ്പിലാക്കിയത്.

മൂന്ന് മാസമായി ഉച്ചയ്ക്ക് 12:00 മുതല്‍ വൈകീട്ട് 3:00 വരെ നേരിട്ട് സൂര്യപ്രകാശമേല്‍ക്കുന്ന തുറസ്സായ സ്ഥലങ്ങളില്‍ ജോലി ചെയ്യിക്കുന്നതിനായിരുന്നു വിലക്ക്. ഈ കാലയളവില്‍ സ്വകാര്യ മേഖലയിലെ സ്ഥാപനങ്ങള്‍ നിയമം കൃത്യമായി പാലിക്കുന്നുണ്ടെന്ന് ഉറപ്പുവരുത്താന്‍ മന്ത്രാലയം രാജ്യത്തുടനീളം വ്യാപകമായ പരിശോധനകള്‍ നടത്തിയിരുന്നു.

ഉച്ചവിശ്രമ നിയമത്തിന്റെ കാലാവധി പൂര്‍ത്തിയായതോടെ തൊഴിലാളികള്‍ക്ക് ഇനി മുതല്‍ സാധാരണ സമയക്രമത്തില്‍ ജോലികളില്‍ തുടരാം്. തൊഴിലാളികളുടെ സുരക്ഷ മുന്‍നിര്‍ത്തി നിര്‍ദ്ദേശങ്ങള്‍ പാലിക്കുകയും സഹകരിക്കുകയും ചെയ്ത സ്ഥാപനങ്ങള്‍ക്കു മന്ത്രാലയം നന്ദി അറിയിച്ചു.

റിയാദ്: സോഷ്യല്‍ മലയാളി കള്‍ച്ചറല്‍ കൂട്ടായ്മ ‘ഒരുമയുടെ പൊന്നോണം-2026’ റിയാദ് മലാസിലെ അല്‍മാസ് റെസ്‌റ്റോറന്റില്‍ വിപുലമായ പരിപാടികളോടെ അരങ്ങേറി. എസ്എംസികെ പ്രസിഡന്റ് ഷിജി ഫ്രാന്‍സിസ് അധ്യക്ഷത വഹിച്ചു. നജീം കൊച്ചുകലുങ്ക് ഉദ്ഘാടനം ചെയ്തു.

ചെയര്‍മാന്‍ റഫീഖ് പട്ടാമ്പി, സാമൂഹ്യപ്രവര്‍ത്തകരായ ശിഹാബ് കൊട്ടുകാട്, സുരേഷ് ശങ്കര്‍, ഡോ. റഷീദ്, ജനറല്‍ സെക്രട്ടറി ഫൈസല്‍ മുനീര്‍, വൈസ് പ്രസിഡന്റ് ജോണി തോമസ്, ജീവകാരുണ്യ കണ്‍വീനര്‍ ആന്‍സന്‍ ജയിംസ്, സ്‌പോര്‍ട്‌സ് കണ്‍വീനര്‍ രഞ്ജു പാടത്ത്, മീഡിയ കണ്‍വീനര്‍ ജിന്റോ തോമസ്, ജോയിന്റ് സെക്രട്ടറി ബിനോയ് ഉലഹന്നാന്‍, ലേഡീസ് വിങ് കണ്‍വീനര്‍ ശോശാമ്മ ജിജിമോന്‍, ഭാരവാഹികളായ അജീഷ് അശോക്, രജിത, ബിദേശ് പ്രേം, എല്‍ബിന്‍ കുര്യാക്കോസ്, നൗഷാദ് മടപ്ര, ലീന ജോര്‍ജ്, ഗായത്രി, സുധിന്‍, ഫാത്തിമ, ജാസ്മിന്‍ പ്രദീപ് തുടങ്ങിയവര്‍ ആശംസകള്‍ നേര്‍ന്നു. വൈസ് പ്രസിഡന്റ് ജെയ്‌സണ്‍ തോമസ് സ്വാഗതവും ട്രഷറര്‍ ബേബി തോമസ് നന്ദിയും പറഞ്ഞു. സുനിത ജിന്റോ ചടങ്ങുകള്‍ നിയന്ത്രിച്ചു.

എസ്എംസികെ കുടുംബത്തിലെ കുട്ടികളും മുതിര്‍ന്നവരും അവതരിപ്പിച്ച കലാസന്ധ്യ ആഘോഷങ്ങള്‍ക്ക് മാറ്റുകൂട്ടി. ഷിജി ഫ്രാന്‍സിസിന്റെ നേതൃത്വത്തില്‍ വനിതകള്‍ അണിനിരന്ന തിരുവാതിരക്കളിയും ക്രിസ് ക്രിസ്റ്റഫറിന്റെ ഗിറ്റാര്‍ പ്രകടനവും, അംഗങ്ങള്‍ അവതരിപ്പിച്ച വിവിധ നൃത്തങ്ങള്‍, ഗാനങ്ങള്‍, കവിതാപാരായണം എന്നിവ അരങ്ങേറി.

ബീറ്റ്‌സ് ഓഫ് റിയാദ് ഗ്രൂപ്പിന്റെ ചെണ്ടമേളവും പുലിക്കളിയും മാവേലിയും അരങ്ങിലെത്തി. ഐവ ഗ്രൂപ്പ് അവതരിപ്പിച്ച ഗാനമേളയും അരങ്ങേറി. സുരേന്ദ്രന്‍ ചേലക്കര, ശൈലജ, ലിജി, മെര്‍ലി, സൗമ്യ, ധന്യ നായര്‍, ബാബു ജോസഫ്, ആദില്‍, ജോസ്‌മോള്‍, നെസ്‌ല അല്‍ത്താഫ്, ആലീസ്, രാഹുല്‍, ഷാരോണ്‍, സീന ബിനോയ്, സുനിമോള്‍, ഹരിത, ജിസ്മി, അമൃത, ജെസ്‌ലിന്‍ എന്നിവര്‍ നേതൃത്വം നല്‍കി.

റിയാദ്: ജീവന്റെ തുടിപ്പുകള്‍ നിലനിര്‍ത്താന്‍ വെന്റിലേറ്ററുകള്‍ക്കൊപ്പം കാവലിരിക്കുന്ന മലയാളി മാലാഖമാര്‍ കുറച്ചുനേരം സ്വന്തം നാടിന്റെ ഗന്ധമുള്ള ഓര്‍മ്മകളിലേക്ക് നടന്നു കയറി. അടിയന്തിര ഘട്ടങ്ങളുടെയും പരക്കംപാച്ചിലിന്റെയും നടുവില്‍, റിയാദിലെ പ്രമുഖ ആശുപത്രിയിലാണ് ട്രോമാ ഐ.സി.യു നഴ്‌സുമാര്‍ ഒരുമയുടെയും സ്‌നേഹത്തിന്റെയും പൂക്കാലം ഒരുക്കിയത്.

മാവേലിയുടെ എഴുന്നളളത്ത് ആഘോഷപൂര്‍വ്വം വരവേറ്റു. സ്റ്റാഫ് നഴ്‌സ് ജോസ്‌ലിന്‍ മേരി ജോസ് ആണ് മാവേലിയായി പ്രത്യക്ഷപ്പെട്ടത്. തിരുവാതിര, നൃത്തനൃത്യങ്ങള്‍, ഓണക്കളികള്‍ എന്നിവക്ക് മാവേലിയും ഒപ്പം ചേര്‍ന്നു. വിഭവസമൃദ്ധമായ സദ്യയും ഒരുക്കിയിരുന്നു. ഐസിയു സേവനം മുടങ്ങാതെ, ഡ്യൂട്ടി അറേഞ്ച് ചെയ്തും നൈറ്റ് ഡ്യൂട്ടി കഴിഞ്ഞ് വിശ്രമിക്കാതെ ഓണാഘോഷത്തിന്റെ ഭാഗമാകാന്‍ നാല്പതിലധികം മലയാളി നഴ്‌സുമാരാണ് ആഘോഷങ്ങളില്‍ പങ്കെടുത്തത്.

യന്ത്രങ്ങളുടെ നിരന്തര ശബ്ദങ്ങള്‍ക്കിടയിലും, രോഗികളുടെ ജീവന് കാവല്‍ നില്‍ക്കുന്നതിനിടയിലെ ചെറിയ ഇടവേളയിലാണ് മാലാഖമാര്‍ പൂക്കളം തീര്‍ത്തത്. വീടുകളില്‍ നിന്നും കുടുംബങ്ങളില്‍ നിന്നും അകലെ, മണ്ണും മനവും വിതുമ്പുന്ന പ്രവാസത്തിന്റെ നൊമ്പരങ്ങള്‍ക്കിടയില്‍ ഓണാഘോഷം ആഅവര്‍ക്കൊരു സാന്ത്വനമായി. വിരഹത്തിന്റെ നടുവിലും ഒരു പിടി നല്ല ഓര്‍മ്മകളുടെ പൂക്കളമൊരുക്കി, ഒരുമയുടെയും സാഹോദര്യത്തിന്റെയും പൊന്നോണ സന്ദേശമാണ് റിയാദിലെ മാലാഖമാര്‍ സമ്മാനിച്ചത്.
കോഓര്‍ഡിനേറ്റര്‍ ബിജി മാത്യു സ്വാഗതം ആശംസിച്ചു. വിവിധ കലാപരിപാടികളും ഓണക്കളികളും ഐ.സി.യു വരാന്തകളില്‍ ആവേശം തീര്‍ത്തു. ബിക്‌സി ജോസ് നന്ദിപറഞ്ഞു.

അല്‍ അഹ്‌സ: ഹൃദയാഘാതം മൂലം മരിച്ച ആലപ്പുഴ തത്തംപള്ളി കൈതവനത്തറ വീട്ടില്‍ കുഞ്ഞുമോന്‍ സക്കറിയ (മാര്‍ട്ടിന്‍–55) യുടെ മൃതദേഹം ഇന്ന് രാത്രി നാട്ടിലെത്തിക്കും. മൃതദേഹം നാട്ടിലേക്ക് അയക്കുന്നതിന് അല്‍ അഹ്‌സ കിംഗ് ഫൈസല്‍ ആശുപത്രിയിലെ മോര്‍ച്ചറിയില്‍ നിന്നു ദമ്മാം മെഡിക്കല്‍ കോംപ്ലക്‌സിലേക്ക് മാറ്റി. എംബാമിംഗ് നടപടിക്രമങ്ങള്‍ പൂര്‍ത്തിയാക്കി ഇന്ന് (15-09-2026) ഉച്ചക്ക് 12.35ന് ദമ്മാം-കൊച്ചി എയര്‍ഇന്ത്യ എക്‌സ്പ്രസ്സ് വിമാനത്തില്‍ മൃതദേഹം കൊണ്ടുപോകും. രാത്രിയോടെ ആലപ്പുഴ തത്തംപള്ളിയിലെ വീട്ടിലെത്തിക്കും.

മൃതദേഹത്തോടൊപ്പം ഭാര്യ പ്രീതി, മകന്‍ ജോര്‍ജ് മാര്‍ട്ടിന്‍ എന്നിവര്‍ അനുഗമിക്കും. അല്‍ അഹ്‌സയില്‍ 32 വര്‍ഷമായി പ്രവാസിയായിരുന്നു മരിച്ച മാര്‍ട്ടിന്‍. ഇഖാമ കാലാവധി കഴിഞ്ഞ പ്രീതിക്കും മകന്‍ ജോര്‍ജിനും നാട്ടിലേക്ക് പോകാന്‍ കഴിഞ്ഞ ദിവസം സാമൂഹിക പ്രവര്‍ത്തകര്‍ ഇടപെട്ട് ഫൈനല്‍ എക്‌സിറ്റ് നേടിയിരുന്നു. മകന്‍ ജോര്‍ജിന്റെ പേരില്‍ അടക്കാനുണ്ടായിരുന്ന ആശ്രിത ലെവി 20920 റിയാല്‍ അടച്ചതിനു ശേഷമാണ് എക്‌സിറ്റ് വിസ ലഭിച്ചത്. മാര്‍ട്ടിന്റെ മൃതദേഹം നാട്ടിലേക്കയക്കുന്നതിനും, ഭാര്യയുടെയും മകന്റെയും ഫൈനല്‍ എക്‌സിറ്റിനും നടപടിക്രമങ്ങള്‍ പൂര്‍ത്തിയാക്കിയത് നവോദയ കേന്ദ്ര കമ്മറ്റി പ്രസഡിഡന്റ് ഹനീഫ മുവ്വാറ്റുപുഴയുടെ നേതൃത്വത്തിലായിരുന്നു.

മൃതദേഹം നാട്ടിലേക്കയക്കുന്നതിനുള്ള ചെലവുകള്‍ ഇന്ത്യന്‍ കമ്യൂണിറ്റി വെല്‍ഫെയര്‍ ഫണ്ടില്‍ നിന്ന് ഇന്ത്യന്‍ എംബസി അനുവദിച്ചു. കുടുംബത്തെ നാട്ടിലേക്കയക്കുന്നതിന് ആവശ്യമായ തുഡ കണ്ടെത്തുന്നതിനു അല്‍ അഹ്‌സയിലെ സാമൂഹിക, സാംസ്‌കാരിക, സാമുദായിക, രാഷ്ട്രീയ രംഗത്തുളളവരും സംഘടനകളും മാര്‍ട്ടിന്‍ കുടുംബ സഹായ സമിതി രൂപീകരിച്ചിരുന്നു, മൂന്ന് ദിവസത്തിനിടെ 50590 റിയാല്‍ സ്വരൂപിച്ചു. മാര്‍ട്ടിന്റെ ഭാര്യയെയും മകനെയും നാട്ടിലയക്കാനുള്ള ചിലവ് കഴിഞ്ഞു ബാക്കി തുക കുടുംബത്തിന് നല്‍കാന്‍ കമ്മറ്റി തീരുമാനിച്ചു. ഹനീഫ മുവ്വാറ്റുപുഴ, നാസര്‍ മദനി, തോമസ്, സുനില്‍ കുമാര്‍, സുജിത്ത്, ജയപ്രകാശ്, റോഷ്‌മോന്‍, സിസ്റ്റര്‍ അനു, സിസ്റ്റര്‍ സൈനമ്മ തോമസ്, സിസ്റ്റര്‍ ഇര്‍ഫാന, സജി, ഹെന്റി, സാം, മാര്‍ട്ടിന്റെ സഹോദരന്‍ മൈക്കിള്‍, മാര്‍ട്ടിന്റെ ഭാര്യ സഹോദരി പ്രീതി, മകന്‍ ജോര്‍ജ് എന്നിവര്‍ മൃതദേഹം കൊണ്ടുപോകുമ്പോള്‍ അല്‍ അഹ്‌സ കിംഗ് ഫൈസല്‍ ആശുപത്രി മോര്‍ച്ചറിയില്‍ എത്തിയിരുന്നു.

റിയാദ്: കേളി കലാസാംസ്‌കാരിക വേദി സില്‍വര്‍ ജൂബിലി ആഘോഷങ്ങളുടെ ഭാഗമായി സംഘടിപ്പിക്കുന്ന ‘കുഡു കേളി സഫാ മക്കാ കപ്പ്’ മെഗാ ക്രിക്കറ്റ് ടൂര്‍ണമെന്റ് സീസണ്‍-2ന് തുടക്കം. സുലൈ ടെക്‌നോമാക് ഗ്രൗണ്ടില്‍ നടന്ന ചടങ്ങ് കുഡു ഫൈനാന്‍സ് മാനേജര്‍ (പേറോള്‍) ഗിരീഷ് കുമാര്‍ ഉദ്ഘാടനം ചെയ്തു. സില്‍വര്‍ ജൂബിലി സംഘാടക സമിതി ആക്ടിങ് ചെയര്‍മാന്‍ നൗഫല്‍ സിദ്ധീഖ് അധ്യക്ഷത വഹിച്ചു.

കേളി രക്ഷാധികാരി സെക്രട്ടറി കെ. പി. എം. സാദിഖ്, കുടുംബവേദി സെക്രട്ടറി ഷെഹീബ വി.കെ, കേളി സെക്രട്ടറി സുനില്‍ കുമാര്‍, ട്രഷറര്‍ മധു ബാലുശ്ശേരി, സ്‌പോണ്‍സര്‍മാരായ സാറ്റ്‌കോ എംഡി കരീം പൈങ്ങാട്ടൂര്‍, മാസ്‌ട്രോ പ്രതിനിധി മഹേഷ്, സ്‌പോര്‍ട്‌സ് കമ്മിറ്റി ചെയര്‍മാന്‍ പക്രുദീന്‍ എന്നിവര്‍ പ്രസംഗിച്ചു. സംഘാടക സമിതി കണ്‍വീനര്‍ ഷാജി റസാഖ് സ്വാഗതവും ജോയിന്റ് കണ്‍വീനര്‍ നൗഫല്‍ ഉള്ളാട്ട്ചാലി നന്ദിയും പറഞ്ഞു. ആദ്യദിനം നാലു മത്സരങ്ങള്‍ അരങ്ങേറി.

റിയാദ്: സൗദി ദേശീയ ദിനാഘോഷങ്ങളുടെ ഭാഗമായി ഐസിഎഫ് സൗദി നാഷണല്‍ കമ്മിറ്റി രാജ്യത്തെ വിവിധ റീജിയന്‍ കേന്ദ്രങ്ങളില്‍ രക്തദാന ക്യാമ്പുകള്‍ സംഘടിപ്പിക്കുന്നു. രാജ്യത്തോടുള്ള പ്രവാസികളുടെ ഐക്യദാര്‍ഢ്യവും സാമൂഹിക ഉത്തരവാദിത്വവും പ്രകടിപ്പിക്കുന്നതിന്റെ ഭാഗമായാണു പരിപാടി.

മുന്‍വര്‍ഷങ്ങളില്‍ വിവിധ ഘടകങ്ങളുടെ നേതൃത്വത്തില്‍ വെവ്വേറെ ദിവസങ്ങളിലായിരുന്നു ക്യാമ്പുകള്‍. എന്നാല്‍ ഇത്തവണ കൂടുതല്‍ ഏകോപിതമായി ദേശീയ ദിനത്തില്‍ തന്നെ രാജ്യത്തുടനീളം റീജിയന്‍ തലത്തില്‍ രക്തദാനം നടത്തും. മഹത്തായ കാരുണ്യ ദൗത്യത്തില്‍ രക്തദാനത്തിനു സന്നദ്ധരായ മുഴുവന്‍ പ്രവാസി മലയാളികളും പങ്കാളികളാകണമെന്നു ഐസിഎഫ് സൗദി നാഷണല്‍ കമ്മിറ്റി അഭ്യര്‍ത്ഥിച്ചു.

റിയാദ്: ചെണ്ടമേളവും മഹാബലിയുടെ എഴുന്നള്ളിപ്പും വടംവലിയും സദ്യയുമായി ഗള്‍ഫ് മലയാളി ഫെഡറേഷന്‍ (ജിഎംഎഫ്) റിയാദില്‍ പൊന്നോണം ആഘോഷിച്ചു. ദിറാബില്‍ നടന്ന ആഘോഷപരിപാടികള്‍ രാവിലെ 10 മുതല്‍ അര്‍ദ്ധരാത്രിവരെ നീണ്ടുനിന്നു. ടെന്‍സി ഒരുക്കിയ പൂക്കളത്തോടെയാണു പരിപാടികള്‍ക്കു തുടക്കമായത്. തിരുവാതിര, നാടോടിനൃത്തം, സംഘനൃത്തം, അത്തപ്പൂക്കള മത്സരം, വടംവലി, കസേരകളി തുടങ്ങി വൈവിധ്യമാര്‍ന്ന കലാകായിക മത്സരങ്ങള്‍ അരങ്ങേറി. ഉണ്ണി കൊല്ലം മഹാബലിയായി. അത്തപ്പൂക്കള മത്സരത്തിനു സജീര്‍ ചിതറ, റിയാസ് പാലക്കാട്, സക്കീര്‍ ഹുസൈന്‍ എന്നിവര്‍ നേതൃത്വം നല്‍കി. മൂന്നു മണിക്കൂര്‍ നീണ്ട ഗാനമേളയും ഡിജെയും ആഘോഷത്തിന് ആവേശം പകര്‍ന്നു.

സാംസ്‌കാരിക സമ്മേളനത്തില്‍ റിയാദ് സെന്‍ട്രല്‍ കമ്മിറ്റി പ്രസിഡന്റ് ഷാജി മഠത്തില്‍ അധ്യക്ഷത വഹിച്ചു. വ്യവസായപ്രമുഖന്‍ ഡോ. ഇദ്രീസിനെ ചടങ്ങില്‍ പൊന്നാട അണിയിച്ച് ആദരിച്ചു. സൗദി പൗരപ്രമുഖന്‍ അബ്ദുല്‍ അസീസ് മുഖ്യാതിഥിയായിരുന്നു.

ജിഎംഎഫ് ചെയര്‍മാന്‍ റാഫി പാങ്ങോട്, ജനറല്‍ സെക്രട്ടറി ഇജാസ്, ട്രഷറര്‍ സജീര്‍ പെരുംകുളം, സൗദി നാഷണല്‍ കമ്മിറ്റി പ്രസിഡന്റ് അബ്ദുല്‍ അസീസ് പവിത്ര, ജനറല്‍ സെക്രട്ടറി ഹരികൃഷ്ണന്‍, കോഓര്‍ഡിനേറ്റര്‍ അഫ്‌സല്‍ കണ്ണൂര്‍, സുബൈര്‍ കുമ്മിള്‍, ടോംസി മാത്യു, റൂബി ടോം, സജ്‌ന സജീര്‍, റിഷാന അഫ്‌സല്‍, റിനു ഇജാസ്, നസീര്‍ കുന്നില്‍ തുടങ്ങിയവര്‍ പ്രസംഗിച്ചു.

ഓണാഘോഷത്തോടൊപ്പം ജീവകാരുണ്യ പ്രവര്‍ത്തനങ്ങള്‍ക്കും ജിഎംഎഫ് മുന്‍ഗണന നല്‍കുന്നതായി ജിസിസി ചെയര്‍മാന്‍ റാഫി പാങ്ങോട് പറഞ്ഞു. കേരളത്തിലെ 14 ജില്ലകളിലെ തെരഞ്ഞെടുത്ത കേന്ദ്രങ്ങളിലും ആദിവാസി മേഖലകളിലും ആയിരക്കണക്കിനു പേര്‍ക്ക് ഓണസമ്മാനം കൈമാറി. അല്‍ഷിഫ മെഡിക്കല്‍ ഗ്രൂപ്പുമായി സഹകരിച്ചു സൗദിയിലെ വിവിധ ഭാഗങ്ങളില്‍ മെഡിക്കല്‍ ക്യാമ്പും രക്തദാന ക്യാമ്പും സംഘടിപ്പിക്കുമെന്നും അദ്ദേഹം അറിയിച്ചു.